رواية جريمة في بيت العيلة الفصل الثاني 2 بقلم ياسر عوده

 


رواية جريمة في بيت العيلة الفصل الثاني بقلم ياسر عوده



استدعت النيابه زوجه هاني، واللى كان اسمها بسمه، وبمجرد انها حضرت قدام النيابه، ابتدي وكيل النيابه يوجه ليها الاسأله وقال:
-ايه طبيعه العلاقه اللى كانت بين جوزك والمتهمه؟
وقتها ردت بسمه وهي منهاره من العياط وقالت:
-الشيطانه اللى اسمها هبه دي هي سبب في كل اللى حصل، هي اللى وقعت بين الاخين في الاول، وبعدها قتلت جوزي علشان ابقى ارمله زيها.
-انا مش فاهم حاجه من كلامك ده، عاوزك تحكيلي كل حاجه من البدايه.
-هاني جوزي الله يرحمه كان الاخ الاكبر، وكان جوز هبه شريف هو الاخ الاصغر، والاتنين مرثوا من ابوهم ورشه تصليح عربيات، ورغم ان الاتنين ورث في الورشه، بس هاني كان بيراعي ظروف اخوه شريف وكان سايبله الورشه يسترزق منها من غير ما ياخد منها حاجه خالص، مع ان الورشه كانت بتكسب فلوس كتير اوي، واوقات كتير كنت بتكلم مع هاني وبقوله:
-انت ليه مضايقها علينا مع انك عند ورث ومش بتستفاد منه حاجه خالص.
-ورث ايه اللى بتتكلمي عليه يا بسمه، احنا مش هنخلص من موضوع الكلام عن الورشه، انا سايبها لـ اخويا علشان دا مصدر رزقه الوحيد.
-انت ليه محسسني ان احنا عندنا الفلوس بالكوم في الدولاب، ما احنا كمان حالنا على القد، ويادوب اللى جاي على قد اللى رايح.
-مالنا احوالنا ما احنا زي الفل، انتي مش ناقصك حاجه، واحنا مستورين والحمد لله، انا شغال على عربيه وكل حاجه تمام.
-عربيه ايه يا هاني، دا انت حتى لما بتحب تصلح العربيه بتعتك وتوديها للورشه عند اخوك كنت بتدفعله حق التصليح زي الغريب، مع انك شريك في الورشه، وهو مش يخلي عنده شويه دم ويراعي ده، لا كان بياخد منك حق التصليح.
ولما كنت بقوله الكلام دا كان بيتعصب عليا، ووصل بيه الحال انه ضربني وقتها وقالي:
-انت ازاي تغلطي في اخويا، انا واخويا حرين مع بعض، واللى في جيبي ليه، دا اخويا اللى ماليش غيره من بعد موت ابويا وامي، ولو طب عربيتي حتى هدهاله انتي ماتدخلين بنا.
وديما كان بيسبني ويروح يقعد مع اخوه في الورشه، يروحله ويساعده في شغله لما هو يخلص شغله على العربيه، ويفضل سهران معاه لغايه لما يقفل الورشه، وبعد كل دا ماكنش بياخد منه أي فلوس مع ان دا كان من حقه، ومش بس كده، هاني كان بيدي لـ اخوه فلوس باستمرار، هاني ليه عند اخوه اكتر من 100 الف جنيه، ورغم كل ده كانت هبه بتكره هاني كره العمي، وكانت مابتسبش الزن على ودن جوزها علشان تقلبه على اخوه، واتسببت ان شريف اتخانق مع اخوه هاني قبل كده، بسبب كلامها اللى كانت بتقولهوله واللى كانت بتفتري بيه على جوزي هاني الله يرحمه، مع ان روحه كانت في اخوه شريف.
-طيب هي ليه كانت بتعمل كده، مع انك كنتي بتقولي ان هاني كان بيساعد جوزها ومسلفه فلوس كتير زي ما انتي بتقولي؟
-علشان خاطر الفلوس دي يا باشا، هي ماكنتش عاوزه جوزها يسدد أي فلوسه عليه نهائي، وكانت بتقول لـ جوزها باستمرار ان هاني أكل حقه، واكيد هو خد فلوس حماها كان شايلها ودا سبب انه معاه فلوس كتير كده، وكانت بتقوله ان مستحيل العربيه اللى شغال عليها هاني تكسبه كل الفلوس اللى كانت معاه، وفضلت على الحال دا وكانت سبب المشاكل اللى كانت بتحصل بين شريف واخوه، ورغم كل ده لما شريف مات هاني ماسبهاش خالص، ودا كان رد الجميل منها، قتلته علشان تحرمنا منه ربنا ينتقم منها.
-وشريف مات ازاي؟، بطريقه طبيعيه ولا حصل ايه؟
-هي اللى كانت السبب، هي اللى كانت بتوقع بين الاخوات، وفي يوم وقعت بين الاخين وراحت قالت لـ جوزها شريف الله يرحمه، ان جوزي هاني لو صادفها في الشارع ولو بالصدفه، كان بيبصلها بنظرات مش بريئه، وحاولت تخلي جوزها يفتكر ان هاني جوزي عينه عليها، مع اني عارفه انها كدابه ومابتقولش الحقيقه خالص، بس للاسف شريف جوزها كان زي المسحور ليها، كان بيسمع كلامها وبيصدقها على طول من غير ما يفكر في الكلام، وفعلا لما هاني جوزي راح يقعد معاه ويسأل عليه في الورشه كالعاده، وقتها شريف مسك فيه واتخانق معاه، ومش بس كده دا خبطه على دماغه بخشبه عورت هاني، ورغم اللى عمله دا وان هاني راح المستشفى هو رفض يسمع كلامي ويروح يقدم بلاغ في اخوه، وقالي وقتها:
-انا مستحيل اقدم بلاغ في اخويا مهما حصل، ازاي يعني اروح احبسه، دا اخويا اللى ماليش غيره في الدنيا كلها.
ولما الدكتور في المستشفى سأله عن الجرح اللى في راسه ازاي اتجرح بيه، وقتها هو رد عليه وقاله:
-انا اتخبط يا دكتور في دريكسيون العربيه لما مسكت الفرامل مره وحده، علشان كان في طفل بيعدي الطريق فجأه وانا ماكنتش منتبه وماكنتش لابس حزام الامان.
ورغم ان الدكتور ماكنش مقطنع بكلام هاني، بس هو كان مضطر يصدقه، وطبعا هو عمل كل دا علشان اخوه شريف رغم كل اللى عمله شريف معاه.
وبعد كام يوم لما شريف عرف اللى عمله هاني اتصل عليه وقاله:
-حقك عليا يا اخويا انا اسف، انا مش عارف ازاي عملت اللى عملته.
ووقتها هاني كل اللى قالهوله:
-انا مش فارق معايا اني اتعورت، كل اللى يفرق معايا انك ماتصدقش الكلام اللى قالته مراتك هبه عني، انا مستحيل ابصلها أي بصه وحشه لا سمح الله.
وصدقه شريف وطلب منه يجيله على الورشه زي ما كان بيعمل، وفعلا هاني قاله:
-اول لما حالتي تتحسن هجيلك يا اخويا ماتقلقش.
ولما سمعت مكالمه هاني مع شريف انا زعلت مع هاني وقولتله:
-ايه الكلام اللى انا سمعتك بتقوله دا، انت ازاي هتروح عنده تاني بعد اللى حصل، مش خايف يكون عاملك كمين ولا حاجه؟
-كمين ايه يا بسمه، انتي ازاي تتخيلي ان اخويا ممكن يعملي كمين او أي حاجه تضرني من الكلام الفارغ ده، انتي فاهمه بتتكلمي عن مين، انتيب تتكلمي عن اخويا يعني مهما حصل احنا مالناش غير بعض.
ورفض انه يسمع كلامي خالص، وفعلا راح عند اخوه شريف وماسمعش كلامي، ولما راح حصلت المصيبه.
-مصيبه ايه؟
-انا ماعرفش التفاصيل كلها، كل اللى اعرفه ان هاني لما راح عند اخوه، وقتها هو طلب منه يساعده في شغل الورشه، وبعدها انفجرت انبوبه اكسوجين، ولما انفجرت النار مسكت في الورشه كلها، وحاول هاني يلحق اخوه اللى النار مسكت فيه بس ماقدرش، وكانت النتيجه ان هاني اتعرض لعده حروق.
-اخر سؤال ليه المجني عليه كان في شقه المتهمه؟
-هي اللى كلمته يا باشا، هي اللى اتصلت عليه وقالتله:
-ابن اخوك تعبان يا هاني، وكل شويه يسأل عليك وبيقولي ليه عمو مابيجيش يشوفنا ويسأل عننا، ولما هاني سمع الكلام دا راح عندها على طول، اتصل على سواق توكتوك وقاله عاوزك في مشوار مهم.
وانا شوفته وهو واخد فلوس من الدولاب، ووقتها وقفته وقولتله:
-انت رايح فين يا هاني؟
-رايح اشوف ابن اخويا واطمأن عليه.
-رايح لـ ابن اخوك ولا لـ مرات اخوك.
وقتها اتعصب عليا وقالي:
-ايه الكلام اللى انتي بتقوليه دا يا بسمه، انتي تعرفي عن جوزك كده؟
-انا بقولك الكلام اللى مرات اخوك هبه هتقوله، هي مش هتقول انك رايح تشوف ابن اخوك، لا هتقول انك رايح تشوفها، انا فهماها كويس وعارفه هي بتفكر ازاي، اسمع مني وصدقني.
-بطلي تخاريف وكلام فاضي، ابن اخويا مابقاش ليه غيري، وانت عارفه ان حاله اهل هبه على قدهم ومش هيقدروا يسعدوها، وانا واجب عليا اساعدهم.
-علشان كده خدت فلوس من الدولاب، انت كده بتحط نفسك في مشاكل احنا في غنى عنها.
-مشاكل ايه اللى بتتكلمي عنها، انا هروح اطمأن على ابن اخويا واديهم فلوس وامشي على طول، حتى هخلي سواق التوكتوك اللى هيوصلني يستناني ماتقلقيش.
-طيب لو عاوز تريحني، خلي سواق التوكتوك يطلع معاك في شقه اخوك، علشان يبقى معاك لو حصل حاجه.
-ايه الكلام الفارغ اللى انتي بتقوليه ده، يعني ايه اخلي واحد غريب يطلع عند شقه اخويا الله يرحمه، شكلك اتجننتي.
-انا ماتجننتش ولا حاجه، بس انا خايفه وقلقانه من هبه، اسمع كلامي واعمل اللى بقولك عليه وريحني.
وقتها رد عليا بهدوء وقالي:
-حاضر، هسمع كلامك مع اني عارف ان اللى انتي بتقوليه غلط مش صح، بس انا هريحك، ممكن تسبيني انزل بقى.
ونزل هاني وكنت مفكره اني باللى طلبته منه هحميه من هبه، بس دا ماحصلش، وفي الاخر بدل ما يرجعلى رجعلي خبره، جوزي مات يا باشا وانا عاوزه حقه من اللى قتلته.
-ماتقلقيش يا مدام، حق جوزك هيرجع، بس اخر حاجه حابب اعرفها منك اسم سواق التوكتوك اللى جوزك اتصل عليه وطلبه علشان يوصله لشقه اخوه.
-اسمه عاطف يا باشا.


شكرا لزيارتكم عالم روايات سكيرهوم

تعليقات