رواية فستان وجزمة وعيلة في ازمة الفصل الثاني 2 بقلم شيماء يسري زهران

 


رواية فستان وجزمة وعيلة في ازمة الفصل الثاني بقلم شيماء يسري زهران


- اوه نو! اوه نو ماي برازر! (اخويا) مكنش يور داي! (يومك)

دي ساندي اخت الخواجة روبرت توفيق الله يرحمه يعني، كانت قاعدة بتندب على اخوها وحزينة في نص الڤيلا كده.

نزلت من ع السلم مرات الخواجة الأمريكية:

- في ايه ساندي؟ ليه تبكي؟

- روبرت، ابكي على روبرت، انا حزينة اماندا.

- وانا نوت (مش) حزينة! اخوكي اتجوز عليا مصرية وانا اللي دعيت عليه يمو**ت في مصر! بعيد عن امريكا.

نزلت اماندا تقعد على كرسي من كراسي الصالونات الكبيرة ،قربت ساندي تقعد جمبها ترد:

- انتي ليه قلبك بلاك (اسود) كده اماندا! خلاص ده في الماضي!

خرجت من اوضتها فتحية، الست المصرية الأصيلة اللي رغم انها عايشة في ڤيلا ومن اغني سيدات مصر لكن ربطة قشربها ع الراس والجلبية البيتي المصرية تدل على أصولها.

خرجت وهي بترمي كلامي في نبرة باردة:

- مسم، قال في الماضي قال، ماضي ده ايه منك ليها.

قعدت على كرسي في الصالون معاهم وهي بتاكل حلويات كده في طبق:

- الخواجة اللي اختارني يا اماندا..مش بايدي والله يا حبيبتي.

- اختارك! يو (انتي) مفكرة نفسك هتاخدي فلوسه! 

- اومال هاخد شراباته يا عنيا؟ ده حقي وحق عيالي.

قال اماندا في صوت عالي وغل:

- انا المفروض اخد كل فلوسه، انا هيز وايف (زوجته) الأمريكية! 

- اقعدي بقى صوصوي كده بالانجليزي بتاعك، الله يرحمك يا روبرتي كان ييجي يعملني انجليزي يقولي يعني ايه طاقية اقوله هات، يقولي هات انت قلبي يا لص.

ضحكت فتحية بصوت عالي متعمدة تغيظها وكلت حتة حلويات كمان، صرخت اماندا :

- شايفة ساندي!! شايفة؟؟ انا اكره الست دي!

قالت ساندي وهي بتعيط:

- انتوا قاعدين تعملوا مشاكل وانا قاعدة ابكي على روبرت! ده وقت مشاكل!

نادى صوت من جوا المطبخ:

- أنتِ يا فتحية، يابت يا فتحية.

- أيوة ياما، يوه مانا لسه كنت معاكي في المطبخ بقى مش قادرة اقوم.

خرجت امها الكبيرة في السن شوية، الست نادية، ماسكة في أيدها علبة حلويات فاضية:

- فين يابت الحلويات كلها اللي أنتِ جيبتيها امبارح!

قالت ساندي في غـ.ضب:

- انتوا مش مكسوفين!! تأكلوا سويتس (حلويات) واخويا ما****ت! انتوا مصريين وده مش صحيح في مصر!!

ردت نادية:

- بس يابت مسمعش صوتك خليكي ياختي في نفسك، ردي عليا يابت يا فتحية، طب كنتي سيبتي لأمك حتة يا مفجو.عة!

ردت فتحية والشيكولاتة في بوقها:

- يوه ياما، تعالي خدي سيبتلك حتة اهو.

صر.خت اماندا لما لمست فتحية أيدها المتبهدلة بالشوكولاتة مخدة الكرسي:

- انتوا مكنش ينفع تعيشوا هنا في الڤيلا! أنتِ ..

رفعت نادية وشها ليها:

- نعم ياختي عايزة حاجة؟

- أنتِ خلاص عزيتي في يور برازر ( اخوكي) يلا ارجعي بيتك وامشي من هنا!

قامت فتحية تشهق:

- بتطردي امي يابت! والله هجيبك من شعرك تعالي.

قربت فتحية منها صوتت اماندا هي وساندي وجريوا لفوق.

- كـ.تك مصيبة! شوف الولية أمريكية خمسينية ازاي وجسمها معصعص! مسم..انا عارفة روبرت حبيبي بصلها قبلي على ايه!

قالت نادية امها وهي بتقعد جمبها وبتاكل شيكولاتة:

- ماهو عشان كده يابت شاف الجمال ده كله وقرر يصحح غلطته، الله! امممم هاتي يابت واحدة كمان هاتي.

- ياما مانتي كلتي!

زعقت في وشها:

- أخس عليكي بت رِمة! أما انتي بت سوسة صحيح زي ولاد أمر.يكا دول.
ـــــــــــــــــــــــــــــــ

| في اليوم التاني - شقة مرام|

- بقولك يا ماما..

- ها..ارغي ياختي.

- في حاجة كده قدمت عليها ع النت ومقولكيش بقى يا ماما على فلوسها اللي ممكن تجيلي من وراها.

قفلت امها الحلة بعد ما داقت الشوربة، لفت تسأل:

- حاجة ايه دي؟

- بصي هو كاستينج تمثيل بردو بس..

لفت امها الرخامة تاني تحط الطماطم في الخلاط في نظرات سخرية.

- يا ماما والله ده مختلف اوي.

- مختلف ازاي يعني؟

- اهو ده السؤال اللي بحبه، بصي بقى..هو كاستينج مليان موهوبين كتير أوي فوق الألف شخص، وقال ايه يا ماما تخيلي بيحصل ايه!

- بيحصل ايه؟

- بيدوا الموهوبين اللي رايحين يقدموا اصلا فلوس! متخيلة!

- اممم يعني كام يعني؟

داست امها على زرار الخلاط، علت مرام صوتها اكتر:

- هاخد خمستلاف جنيه عشان بس قدمت في الكاستينج!

وقفت امها الخلاط:

- بتقولي ايه؟

- شوفتي بقى! وهندفع ايجار الشهر ده وإيجارات الشهور المتراكمة علينا كمان لعبده الز.فت ده.

- اممم، بس يابت ليه يعني هيدوكي الفلوس دي وانتي اللي محتاجاهم!

- ماهو..ماهو يا ماما اصل دول ناس مبتدئة في مجال الاخراج والإنتاج وكده بس بيكتشفوا المواهب، فعايزين..عايزين يعني يكبروا المشروع بتاعهم فبيشجعوا الناس.

- طب حلو ده يابت.

- بس في مشكلة يا ماما.

- هي ايه؟

- الكاستينج ده هيكون في شرم الشيخ وهنقعد شوية حلوين كده هيوفرولنا سكَن وكل حاجة.

- نعم ياختي! وانتي مفكرة أبوكي هيوافق!!!

| في الليل|

- ومش موافق ليه بس يا بابا!!! بقولك هتدفع فلوس الشهور كلها لعبده.

- انا بنتي تقعد في شرم الشيخ لوحدها مع ناس غريبة!

قربت اقعد جمبه ع السرير وأبو.سه من خده:

- يا بابا يا حبيبي افهم، ده سكَن كبير ليا اوضة لوحدي وممثلين كبار كمان هيكونوا موجودين وكلنا وسط فني في بعضنا..بنتك هتنطلق يا حاج بقى.

سكت شوية..عدل نضارته وبص شمال ويمين بعينيه، سأل تاني في صوت واطي:

- كام ال...فلوس

- ايه؟

على صوته في احراج:

- كام الفلوس يعني؟

- خمستلاف جنيه! ع قد شهور الايجار بالظبط!

لف مستغرب:

- فعلا! ازاي مظبوطين كده! يكونشي عبده اللي عامل الموضوع ده!

ضحكت وقولت:

- شوفت بقى! انت موافق صح؟ وافق بقى يا بابا وانا كل يوم هطمنكم عليا..ها قولت ايه؟؟؟
ـــــــــــــــــــــــــــــــــــ

| في شقة مراد|

- بقولك يابا هي فين فساتين تيتة الله يرحمها.

- بتدور ليه؟ ما قولتلك هبقى اطلعهم للناس المحتاجة.

- انا هطلعهم، كنت معدي النهاردة في طريقي للشغل لقيت دار مسنين كده محتاجين تبرعات زي دي.

- بجد؟ طب وفرت عليا كنت لسه هدور، عندك في الدلفة اليمين من دولابها.

دخل مراد اوضة سته اللي كانت عايشة فيها وفتح الدولاب، لقى الفساتين في وشه، ابتسم وهو بيمضغ اللبانة وخرجهم من الدولاب يحطهم قدامه.

خرج من الأوضة بعدها، كان أبوه قاعد بيقرأ من المصحف على الكنبة، استناه يخلص الآية وقال:

- بقولك يابا، في مشوار مقولكش عليه بقى، هيطلعنا فوق.

- مبقيتش فارقة يابني بعد امي، كلنا هنطلع فوق.

- يابا ارحمني من النكد، بقولك هيطلعنا فوق في الفلوس يعني..هنبقى من أغنياء المجتمع.

- نكد؟ يابني كلنا لها، ما دايم الا وجه الله.

عيط ابوه وكمل:

- امي وحشتني اوي.

ضرب مراد كف بكف:

- طب وحد الله يابا، ربنا يرحمها يارب ويجمعك بيها.

اتنفض أبوه رجع مراد لورا في خضة:

- انت بتدعي عليا؟؟

- لا اله الا الله مش لسه كنا كلنا هنطلع فوق ومبقيتش فارقة؟

- انطق ياض كنت عايز تقول ايه؟

- واحد صاحبي جايبلي شغل في الغردقة، هقبض في الشهر الواحد عشرتلاف جنيه، بدل شنباته اللي بيقبضني خمسة ده.

- عشرة! ما تشغلني معاك ياض.

- اشغلك ايه يابا؟ لو كوباية اتكسرت تقعد تعيط عليها؟

عيط ابوه:

- انت..انت على فكرة بقيت تكلمني بأسلوب وحش! انت بقيت عاق يابني!!! فينك يا امي.

قرب مراد منه بنفاد صبر:

- يا صبر ايوب، يابا انا أقدر ازعلك؟ ده انت البركة والله هات ايدك ابوسها اهيه.

- بتشدها كده ليه يابني! انت كمان عايز تو.جعني ومش مراعي سني!

قام مراد من ع الكنبة متعصب:

- طب اه، انا كده، واقولك ع الكبيرة يا حاج؟ دار المسنين اللي شوفته كنت عشان اوديك فيه.

عيط ابوه وقال:

- بقى كده! 

دخل مراد اوضته تاني، سحب أبوه كوباية الشاي من ع الترابيزة وشفط بوق وقال في نبرة حزينة:

- حتى الشاي بقى ماسخ مهما حطيت سكر يا امي، فينك يا امي.

نده في صوت عالي بعدها:

- طب متنساش تحوش بقى من المرتب ده وتطلعني عمرة ياض انت.

| في ڤيلا الخواجة|

كانت قاعدة حبيبة بنت ساندي، مش محتاجة اقول اني كده الخواجة يبقى خالها يعني، ماسكة الفون وبتابع الهاشتاج اللي بقى منتشر في كل حتة #نطالب_برجوع_عزيزة_وجمال

خـ.بط ابوها ع الأوضة واللي كان مصري واتجوز اخت الخواجة ساندي الأمريكية.

- ايه ده لسه منمتيش؟

- اه يا بابي بص الهاشتاج عمال ينتشر.

- وريني كده....تصدقي فعلا! ده زاد اوي في كل حتة، خالك كانت مصر كلها بتحبه فعلا يا حبيبة.

- اومال ليه عزيزة وجمال قرروا يسيبوه يا بابي؟ دول هاجروا ومرجعوش.

اتنهد وقال:

- ده موضوع كبير اوي، هبقى اتكلم معاكي فيه بعدين، جاي من الشغل تعبان، تصبحي على خير.

خرج حلمي من الأوضة، رجعت تقعد على السرير تتابع التريند.
ــــــــــــــــــــــــــــــــــ

دخل مراد محل بواريك يسأل:

- بكام دي يا ريس؟

- دي عاملة الف وسبعمية.

- ليه ياعم هلبسها لجوزي!

- هو انت اللي هتلبسها اصلا مش المدام!!!

اتحرج مراد وقال:

- لأ المدام طبعًا، بس نزلي سعرها شوية عشان عيد ميلادها ولسه عايز اجيبلها هدية تانية، اعمل واجب مع زبونك ياعم.

- طب همشيهالك الف وستومية.

- طب وعشان خاطري!

- والله ما ينفع اكتر ركن من كده دي اصلية وشهر هندي طبيعي.

- فعلا؟ شعر هندي بالف وستومية؟ ده انت كريم فعلا بقى.

- شوفت يا استاذ بقى، ثواني انزلهالك تشوفها.

نزلهاله مسكها مراد:

- ودي حلوة يعني تعيش؟

- تعيش ياباشا متعيش ليه بقولك شعر هندي.

- اه، ده واخدين من شعور الفنانين الهنود بقى وكده؟

- فنانين ايه يا استاذ! دي بتبقى لا مؤاخذة واحدة هندية ما.تت قبل ما يحر .قـ  وها شعرها بيتقص ويتباع و..

- بس خلاص ايه ياعم! مش عايز انا هنود..

رفع عينه لفوق:

- بكام دي؟

- دي بخمسمية، بس نوعها حلو بردو، اسمها باروكة هيفاء.

- هيفاء وهبي؟؟؟

- أيوة، عشان كانت بتلبس نفس الشكل في البواريك.

- طب معقولة يعني باروكة هيفاء بخمسومية والست المحرو* قة دي مش عارف بكام..ورينا ياعم الحلويات دي نزلها.

نزلهاله:

- ياعيني ع ملمس الشعرة..دي بتبو*س الواوا؟

- واوا ايه يا استاذ!

- اسف اندمجت..تمام هاخدها.

| في اليوم التاني|

كانت قاعدة فتحية في الجنينة بتسقي الزرع، دخلت اماندا تقعد ع المُرجيحة.

لفت فتحية وراها وعوجت بوقها:

- يمرجحوكي في الجحيم يا بعيدة، قومي يا و.لية يا شحطة من هنا.

- جحيم! انتي بتقولي اروح الهيل! اوه god! أنتِ كتير لسانك طويل!

- بقولك ايه يا و.لية أنتِ، انا صاحية مش طايقة نفسي قلبي واكلني على عيالي اللي مش لقيالهم طريق دول، ابعدي عني، قومي من ع المرجيحة خليني انضفها.

- عيالك؟ اللي انتي مفكرة هسيبهم ياخدوا فلوس روبرت؟ إن يور دريمز فتحية ( في احلامك).

| في الصالون برا|

خـ.بط الباب، خرجت الشغالة من المطبخ تفتح:

-who are you? (انت مين)

بصوت رفيع مصطنع قال:

- hello I'm عزيزة(اهلا انا).


شكرا لزيارتكم عالم روايات سكيرهوم

تعليقات