رواية من قتل سهير الرقاصة الفصل الثاني بقلم ياسر عوده
وفعلا سابه وكيل النيابه، ولما سابه كان عاوز يتكلم مع ضابط الشرطه، ووقتها عينه جت عليا ولقيته بيقولي:
-انت مين، تبع المعمل الجنائي؟
-لا يا باشا، اسمي حسام وشغال صحفي.
اول لما قولتله صحفي وقتها لقيت وشه اتغير، واتكلم وزعق وقال:
-مين قال تدخلوا الصحافه، ايه التهريج ده.
وقتها جه الضابط المسئول وقاله:
-انا هتصرف يا فندم.
وجالي ومسكني من دراعي وقالي:
-اسمك ايه؟
-اسمي حسام.
-انت دخلت هنا ازاي؟
-دخلت عادي، وانا معرفش ان الدخول ممنوع، احنا متعودين اننا نغطي أي سبق صحفي.
ابتسم الضابط وقالي:
-طيب انت هتطلع من هنا، ولما النيابه تمشي انا هسمحلك تعرف المستجدات.
ابتسمت وقولتله:
-والله يا باشا انا كفايه عليا وشك السمح دا، انت يا فندم لو سبتني هنا انت مش هتحس بيا خالص، وبعدين في التحقيق بتاعي هشيد بدور سيادتك طبعا.
ابتسم تاني وقالي:
-حلو الشيوتين بتوعك دوول، انت متخيل ان الكلام دا بياكل معانا، بس بصراحه انت عجبتني، خليك هنا لغايه لما اكلم وكيل النيابه.
وفعلا راح الضابط واتكلم مع وكيل النيابه، وبعد لحظات لقيته بيقولي:
-الباشا وافق انك تفضل موجود، بس مش عاوزك تعمل أي ازعاج، تمام.
-اعتبرني شبح يا باشا.
وفعلا سابوني، وكملت اللى كنت بعمله، وكانت عنيا على وكيل النيابه وهو بيكمل تحقيقاته، ولقيته بيتكلم مع واحد من فريق المعمل الجنائي واللى قاله:
-احنا مالقناش أي علامه على باب الشقه بيدل ان الجاني دخل بطريقه غير شرعيه، واضح ان المجني عليها هي اللى فتحتله باب الشقه، او انه كان معاه نسخه من مفتاح الشقه.
-طيب وبالنسبه للبصمات؟
-دي المشكله الحقيقيه اللى قابلتنا في مسرح الجريمه.
-مش فاهم تقصد ايه، تقصد انكم مالقتوش أي بصمات غريبه عن الشقه؟
-بالعكس يا فندم، احنا لقينا بصمات كتير اوي بشكل مبالغ فيه.
-كام بصمه تقريبا؟
-اكتر من عشر بصمات وكلهم مختلفين عن بصمه المجني عليها.
-ودا معناه ايه؟
-حاجه من الاتنين، اما ان الجاني اكتر من شخص ودي حاجه صعبه، لان مستحيل ان اكتر من عشر افراد هيرتكبوا مع بعض الجريمه دي، والاحتمال التاني ان كان في الشقه دي احتفال معين او حفله.
-طيب لقيتم أي كاميرات مراقبه في الشقه او حتي في العماره نفسها؟
-للاسف لا يا فندم.
-ازاي ده، معقول عماره بالشكل دا وفي موقع مميز زي اللى هي فيه، ومع مستوي معيشه الناس الموجوده مافيش كاميرات مرقبه؟
-دي من ضمن علامات الاستفهام الغريبه في الموضوع.
-تمام انا هحقق في المضوع دا بنفسي، قولي في أي معلومات تانيه وصلتلها؟
-ايوه يا فندم، احنا مالقناش أي فلوس او مصوغات دهبيه في الشقه نهائي، وكان واضح على ايد المجني عليها انها كانت لابسه مصوغات دهبيه زي الخواتم واتخدت منها بعد موتها.
-انت تقصد ان الجريمه دي ممكن تبقى بدافع السرقه.
-دي حاجه من ضمن الاحتممالات.
-طيب لقيتم اداه الجريمه؟
-لا يا فندم.-شكرا.
وبعد ما خلص وكيل النيابه معاه اتكلم مع دكتور الطب الشرعي، وسأله عن المعلومات اللى وصلها، ورد عليه الدكتور وقاله:
-واضح من ملامح اللى كانت على وجه المجني عليها انها كانت مرعوبه، ومن شكل الطعنات اللى كانت في الصدر والرقبه والبطن ان الجاني كان واقف قدمها ماقتلهاش غدر من وراها.
-هي اتقتلت بأيه؟
-المرجح انها سكينه عاديه، ممكن تكون سكينه مطبخ من اللى بتستعمل في المنازل.
-تفتكر يا دكتور الجاني شخص واحد ولا اكتر من شخص؟
-لا شخص واحد، طريقه الطعن واتجاه الطعنات كلها متماثله تقريبا، ودا يرجح ان القاتل شخص واحد، والمجني عليها كانت بتحاول تدافع عن نفسها.
-الجريمه تمت من امتي يا دكتور؟
-من 48 ساعه على الاقل، ودا اللى خلي ريحه الجثه تخرج بالشكل ده.
في أي معلومات تانيه ممكن تساعدنا في الوصول للجاني؟
-في دليل مهم جدا، احنا لقينا بقايا جلد وخلايا في ضوافر المجني عليها، واكيد دي للجاني، بس مش هنقدر نحدد الحمض النووي بتاعها الا لما ننتقل للمشرحه ونعمل التحاليل اللازمه.
-شكرا يا دكتور، وبانتظار التقرير النهائي.
ولما خلص وكيل النيابه مع دكتور الطب الشرعي، هو بلغ الضابط المسئول انه هيمشي، وطلب منه يعمل تحريات كامله عن المجني عليها وجوزها، ومش بس كده عن كل الناس اللى كانوا ليهم علاقه بقريب او من بعيد بالمجني عليها، والضابط قاله:
-ماتقلقش يا فندم، احنا شغالين بكل طاقتنا.
ولما مشي وكيل النيابه، الضابط نداني، ولما روحتله لقيته بيقولي:
-ها قدرت تجمع تحقيقك الصحفي اللى محتاجه.
-ايوه يا باشا، انا بصراحه مش عارف اشكر حضرتك ازاي.
-مافيش داعي للشكر، انا عاوزك تمشي وكفايه كده، خلي الرجاله تشوف شغلها.
-حاضر يا باشا، بس ينفع اعرف اسم حضرتك واخد رقمك.
-اسمي رياض، بس عاوز رقمي ليه؟
-احتياط يا باشا، يمكن احتاج حضرتك.
ابتسم رياض باشا وقال لواحد من رجالته يديني رقمه، ولما خدته مشيت زي ما هو قالي، روحت على البيت وتاني يوم روحت للجريده وكتبت التحقيق بتاعي، وكان تحقيق جامد اوي واتنشر فيه معلومات مهمه، تفاصيل مافيش حد كتب عنها، وبمجرد نشر التحقيق وبعد مرور كام ساعه التحقيق بقى ترند، واتنشر في كل المواقع والصفحات الاخباريه، وكل الناس اهتمت تعرف مين اللى قتل الرقاصه سهير، وعلى فكره دا كان السؤال اللى كل الناس كانت عاوزه تعرف ايجابته باي شكل من الاشكال.
مر حوالي 3 ايام، وكل الناس كانت لسه عاوزه تعرف مين اللى قتل الرقاصه، ولقيت رئيس التحرير بيكلمني وبيقولي:
-مالك يا حسام نمت على نفسك كده ليه؟
-ليه يا ريس بتقول كده؟
-انت ماكملتش التحقيق الصحفي بتاعك، بتاع جريمها الرقاصه.
-يا ريس الناس كلها دلوقتي بتكتب عنها، والكل متابع باقي الاحداث، يعني انا لو كتبت عنه هبقى واحد من ضمن المجموعه مش اكتر.
-بالعكس يا حسام، الناس مستنيه انت اللى تكمل، انت اللى بداءت الموضوع ولازم تكمله، ولا ايه؟
كلامه كان مقنع، ووقتها قولتله:
-حاضر يا استاذ عنيا.
وفعلا انا ابتديت ارجع اشتغل على الموضوع مره تانيه، واول حاجه عملتها اني كلمت رياض باشا، الضابط اللى كان مسئول عن التحقيقات، ولما كلمته في البدايه كان نسيني وقالي:
-حسام مين انا معرفش حد باسم حسام؟
-انا حسام يا باشا، الصحفي اللى كنت موجود في شقه الرقاصه سهير، اللى حضرتك خلتني اكتب التحقيق عن الجريمه.
-ايوه افتكرتك، خير يا حسام عاوز حاجه.
-الحقيقه ايوه يا باشا، انا طمعان في كرم حضرتك اني اكمل شغلي في الجريمه.
-ماتكتب عنها، هو في حد منعك.
-انت مش فاهمنا يا باشا، انا علشان اكتب عنها محتاج معلومات، والمعلومات عند حضرتك.
-ايوه فهمتك، طيب يا حسام، تعلالي القسم وانا هشوف هعمل معاك ايه.
-الله يباركلنا في عمرك يا باشا، ساعه وهكون عندك في القسم.
وقبل ما تمر الساعه كنت عنده في القسم، بس انا خدت وقت لغايه لما دخلت عنده، ولما دخلت قالي:
-اسمع يا حسام الموضوع معقد شويه، هتقعد في أي جنب وتسمع التحقيقات من غير ما اسمع صوتك، مفهوم ولا تخرج بره.
-لا مفهوم طبعا.
وقعدت في جنب وحضرت التحقيقات، وكان تحقيق الضابط مع غاليه، ودي كانت مرات حارس العماره اللى حصلت فيها الجريمه، واتكلم معاها وقالها:
-قوليلي يا غاليه، انتي سارتي امتي على القريه بتعتك؟
-قبل ما الجريمه ما تحصل بيوم يا باشا.
ابتسم الضابط وقالها:
-انتي عارفه الجريمه حصلت امتي؟
-حضرتك انا سمعت زي ما كل الناس سمعت.
-طيب سافرتي ليه في الوقت ده؟
-ابويا كان تعبان شويه روحت اشوفه واطمأن عليه.
-لا الف سلامه عليه، وقعدتي كام يوم في القريه؟
-قعدت لغايه لما عوض كلمني وعرفني اللى حصل وقالي ان حضراتكم عاوزني.
في الوقت دا رياض باشا حط قدام غاليه شنطه فيها فلوس كتير وقالها:
-ايه الفلوس دي كلها اللى لقناها في اوضتك في بيت ابوكي يا غاليه؟
-دي مش فلوسي يا باشا، دي فلوس ابوكي.
-دوول اكتر من مليون جنيه يا غاليه، ابوكي هيحط مليون جنيه تحت السرير في الاوضه اللى انتي قاعده فيها.
-هو كان حطيتها ونسيها.
ضحك وقالها:
-في حد بينسي مليون جنيه، طيب قوليلي ابوكي جاب الفلوس دي منين؟
-كان عنده قطعه ارض وباعها يا باشا.
-على حسب المعلومات اللى جاتلنا ان ابوكي كان شغال اوجري عند الناس يا غاليه، واحوالكم الماديه تعبانه شويه، ارض ايه اللى باعها، وكمان هيئه بيت ابوكي ومستوي المعيشه بتقول انه مستحيل انه يمتلك مبلغ زي ده، ولا انا بتكلم غلط.
سكتت غاليه وماتكلمتش، وقتها الضابط عرف انه قرب يخليها تعترف وقالها:
-انتي عارفه ان احنا ممكن نحول ابوكي للنيابه، اصل على حسب كلامك لو الفلوس دي فعلا بتعته، وقتها هيبقي في احتمال من اتنين، اما ابوكي شغال في السلاح او المخدرات، ودا راجل كبير وصحته على قده ومش حمل بهدله، ولا انتي ايه رأيك.
-لا يا باشا ابوس ايدك، ابويا راجل كبير وفي حاله.
-بالظبط كده، قولي بقى الفلوس دي فلوس مين؟
-دي فلوسي انا يا باشا.
شكرا لزيارتكم عالم روايات سكيرهوم
