رواية انس وندي الفصل الثاني 2 بقلم سلسبيل احمد


 رواية انس وندي الفصل الثاني 

فضلت قاعد مكاني، عيني على باب الأوضة..

وكل شوية أبص على الموبايل وأرجع أحطه تاني من غير ما أعمل حاجة.

كنت حاسس إن الوقت واقف، وإن كل دقيقة بتعدي من غير ما أعرف أخبار جدي بتعدي عليا بالعافية.

سمعت صوت خطوات سريعة، ورفعت عيني لقيت عمران جاي ناحيتي.

عمران: «أنس!»

قومت من مكاني.

أنس: «بابا.»

عمران: «إيه الأخبار؟ طمني، هو فين دلوقتي؟»

أنس: «جوه، لسه الدكاترة بيتابعوا حالته.»

عمران: «طب قالولك إيه؟»

أنس: «فيه اشتباه في جلطة، ولسه مستنيين نتائج الفحوصات.»

عمران حط إيده على كتفي: «إن شاء الله خير، متقلقش.»

هزيت راسي من غير ما أرد، ورجعت قعدت.

عمران قعد جنبي، وفضل باصص ناحية باب الأوضة شوية، قبل ما يتكلم.

عمران: «إنت كنت معاه لما تعب؟»

أنس: «آه، كنت لسه راجع من الشغل، وأم محمود قالتلي إنه مش كويس. دخلت أطمن عليه، وبعدها بشوية حصل اللي حصل.»

عمران: «وكان كويس طول اليوم؟»

أنس: «كان بيشتكي من صداع، بس كالعادة قال إنه كويس ومفيش حاجة.»

عمران اتنهد: «أبويا  ده عمره ما هيتغير.»

بصيتله من غير تعليق.

عمران: «طب إنت عامل إيه؟ أكلت حاجة؟»

أنس: «مش جعان.»

عمران: « إنت من إمتى ما أكلتش؟»

أنس: «مش وقت الكلام ده يا بابا.»

سكت عمران، وأنا رجعت أبص ناحية الأوضة.

مكنتش عايز أتكلم في أي حاجة تانية. 
كل اللي يهمني إن جدي يبقى بخير.

بعد شوية خرج الدكتور، فقمت أنا وعمران في نفس اللحظة.

أنس: «خير يا دكتور؟»

الدكتور: «إحنا خلصنا جزء من الفحوصات، والحالة محتاجة متابعة دقيقة. فيه جلطة فعلًا، وبدأنا التعامل معاها، لكن لسه محتاجين نتابع الاستجابة للعلاج ونراقب حالته.»

عمران: «يعني حالته مستقرة؟»

الدكتور: «حاليًا هو تحت الملاحظة، وهنقدر نحدد تفاصيل أكتر مع متابعة الساعات الجاية. المهم إنه يفضل تحت رعاية الفريق الطبي.»

أنس: «وإمتى نقدر نشوفه؟»

الدكتور: «تقدروا تدخلوا تطمنوا عليه لما نخلص الإجراءات اللي جوه، بس ياريت الزيارة تكون قصيرة عشان يرتاح.»

هزيت راسي.

أنس: «شكرًا يا دكتور.»

الدكتور: «العفو.»

رجعت قعدت، وحسيت إن نفسي رجعلي شوية.
 مش معنى كده إني اطمنت تمامًا، لكن على الأقل عرفت إنه تحت الرعاية وإن فيه خطة للتعامل مع حالته.

عمران: «هكلم نسرين أطمنها، وآية وآسر أكيد هيقلقوا لما يعرفوا.»

أنس: «قولهم إن جدو في المستشفى وإنه تحت الملاحظة، بس متخوفهمش.»

عمران: «حاضر.»

قام يبعد شوية عشان يتكلم في الموبايل، وأنا فضلت مكاني.
_________________

كنت براجع شوية بيانات في مح  لما بسمه  قربت مني.

بسمه : «ندي، حالة الحاج عبد العزيز اللي دخلت الطوارئ، إنتِ اللي متابعة معاه؟»

ندي: «آه، ليه؟»

زميلتي: «الدكتور طلب إننا نتابع ملفه كويس، هو عنده تاريخ مرضي سابق، صح؟»

ندي: «أيوه، حسب المعلومات اللي موجودة في الملف.»

زميلتي: «طب خدي بالك، شكله محتاج متابعة كتير.»

ندي: «ما إحنا موجودين، متقلقيش.»

خدت الملف وراجعته، وبعدها اتجهت ناحية أوضته عشان أتابع التعليمات المطلوبة مني.

دخلت بهدوء، ولقيته مستلقي على السرير، وعينيه مفتوحة.

ندي بابتسامة: «صباح الخير يا حاج عبد العزيز.»

بصلي وحاول يرد، لكن كلامه كان لسه صعب عليه.

قربت منه شوية.

ندي: «براحتك يا حاج، مش لازم تتكلم دلوقتي.»

كان باصصلي بتركيز، وبعد لحظات حرّك إيده حركة بسيطة ناحية الكوباية.

ندي: «عايز تشرب؟»

هز راسه حركة خفيفة.

ندي: «طيب، هسأل الفريق الأول إذا كان مسموح لحضرتك تشرب دلوقتي.»

خرجت أتأكد من التعليمات، ورجعتله.

ندي: «لسه شوية يا حاج، معلش. أول ما الدكتور يسمح هنساعدك.»

كان واضح عليه الضيق، فحاولت أغيرله الجو.

ندي: «وبعدين إيه يا حاج؟
 إحنا لسه في أول اليوم، وعايز تتعبني من دلوقتي؟»

حاول يبتسم.

ندي: «أهو كده، الضحكة دي أحسن بكتير.»

ظبطتله الملاية، واتأكدت إن وضعه مريح، وبعدها كملت متابعة حالته حسب التعليمات.

وأنا خارجة، لقيت حفيده واقف عند الباب.

أنس: «لو سمحتي، هو كويس؟»

ندي: «الحالة تحت المتابعة يا فندم، والدكتور شرح لحضرتك الوضع.»

أنس: «أنا بس عايز أعرف هو محتاج حاجة؟»

ندي: «حاليًا إحنا متابعين كل حاجة، ولو فيه أي احتياج هنتصرف.»

بص ناحية جده من خلال الباب المفتوح.

أنس: «هو حاول يتكلم؟»

ندي: «حاول، بس الأفضل ميتضغطش على نفسه في الكلام دلوقتي.»

هز راسه، وبعدها سأل:

أنس: «ممكن أدخل أشوفه؟»

ندي: «طبعًا، بس الزيارة تكون قصيرة عشان يرتاح.»

دخل من غير ما يرد، وأنا كملت طريقي.
______________

دخلت عند جدي، وقربت من السرير.

أنس: «إيه يا جدو؟ عامل إيه دلوقتي؟»

بصلي، وحاول يحرك إيده ناحيتي.

مسكت إيده وقعدت جنبه.

أنس: «الحمد لله إنك أحسن.»

كان بيحاول يقول حاجة، لكن الكلام مش واضح.

أنس: «متتكلمش يا حبيبي، الدكتور قالك ترتاح.»

حاول يرفع حاجبه وكأنه بيعترض.

ابتسمت رغم قلقي.

أنس: «إيه؟ حتى وإنت تعبان مش عايز تسمع الكلام؟»

حاول يبتسم، وفضل باصصلي.

أنس: «أنا هنا، ومش هسيبك.»

دخلت الممرضة تتابع حالته، فبعدت شوية عن السرير.

ندي: «معلش يا فندم، محتاجين نكمل المتابعة.»

أنس: «حاضر.»

خرجت من الأوضة، وقبل ما أقفل الباب بصيت لجدي مرة أخيرة.

كان لسه باصص ناحيتي.

___________

كنت واقفة براجع حاجة في الملف، لما لقيت حفيد المريض خارج من الأوضة.

كان شكله مرهق جدًا، وعينيه فيها قلق واضح، لكنه أول ما شافني رجع لنفس تعبيره الجاد.

أنس: «هو الدكتور هيعدي عليه تاني إمتى؟»

ندي: «الدكتور بيتابع الحالة، وهيعدي عليه حسب خطة المتابعة.»

أنس: «أنا محتاج أعرف كل حاجة بتحصل.»

ندي: «وده حق حضرتك طبعًا، بس لو عندك أي استفسار طبي، الأفضل تسأل الدكتور المسؤول عن الحالة عشان يديك المعلومات كاملة.»

أنس: «أنا بسأل عن المتابعة.»

ندي: «وإحنا متابعين يا فندم.»

سكت لحظة، وبعدين قال:

أنس: «تمام.»

مشيت من قدامه، وأنا جوايا إحساس إني مش هعرف أتعامل معاه بسهولة.

مش عشان هو قريب المريض وقلقان، ده شيء طبيعي، لكن لأنه بيتكلم بطريقة تخلي اللي قدامه حاسس إنه مطالب يثبت كفاءته في كل كلمة.

رجعت لمحطة التمريض، وبسمه  بصتلي.

بسمه : «مالك؟»

ندي: «مفيش.»

بسمه : «هو ده خفيده  الحاج عبد العزيز ؟»

ندي: «أيوه.»

بسمه : «شكله قلقان جدًا.»

ندي: «طبيعي، ده جده.»

بسمه : «بس باين عليه إنه مش سهل.»

بصيتلها وقلت: «ما دع اللي كان  ناقصنا  شخصيات مش سهلة.»

ضحكت بسمه ، وأنا رجعت أكمل شغلي.

_________

كنت واقف مع عمران لما الموبايل رن.

أم محمود.

رديت بسرعة.

أنس: «أيوه يا أم محمود.»

أم محمود: «طمني يا ابني، عامل إيه الحاج؟»

أنس: «لسه تحت الملاحظة، والدكاترة بيتابعوا حالته.»

أم محمود: «يا رب يقوم بالسلامة. 

أنس: «ادعيله بس.»

أم محمود: «بدعيله والله، وكنت عايزة أسألك، إنتوا محتاجين أجيبلكم حاجة؟ أكل؟ هدوم؟ أي حاجة؟»

أنس: «لا يا أم محمود، متتعبيش نفسك.»

أم محمود: «أنا مش بتعب نفسي، أنا بس عايزة أعمل حاجة.»

أنس: «خلاص، خليكي في البيت دلوقتي، ولو احتجنا حاجة هكلمك.»

أم محمود: «ربنا يطمن قلبك يا ابني.»

أنس: «آمين.»

قفلت معاها، وبصيت لعمران.

عمران: «أم محمود؟»

أنس: «آه، بتطمن على جدو.»

عمران: «ربنا يخليها، دي بقالها سنين معاه.»

أنس: «دي من أهل البيت.»

عمران هز راسه، وبعدها سألني:

عمران: «إنت هتفضل هنا؟»

أنس: «طبعًا.»

عمران: «طب روح هاتلك حاجة تاكلها، وأنا هفضل هنا.»

أنس: «مش هسيب المكان.»

عمران: «يا أنس، أنا موجود. مش هسيب أبويا.»

بصيتله شوية، وبعدين وافقت أجيب حاجة خفيفة.

كنت عارف إن بابا بيحاول يساعد، وإنه فعلًا قلقان على جدي، لكن وجوده جنبي كان غريب شوية.

علاقتنا مش وحشة لدرجة إننا منقدرش نتكلم، لكنها مش قريبة برضه.

من وقت ما سافر واتجوز نسرين، كل واحد فينا بقى عنده حياته، وبقينا بنتكلم في المناسبات أو في الأمور الخاصة بجدي والشركة.

ومع ذلك، في اللحظة دي، مكنش عندي استعداد أفتح أي كلام قديم.

________

خلصت جزء كبير من شغلي، وكنت راجعة ناحية أوضة عبد العزيز عشان أراجع حالته.

لقيت عمران واقف قدام الباب، وبيتكلم في الموبايل.

دخلت بعد ما استأذنت، ولقيت عبد العزيز صاحي.

ندي: «إزيك يا جدو ؟»

بصلي وحاول يحرك إيده.

ندي: «الحمد لله، شكلك أحسن شوية.»

ابتسمتله وأنا بتابع حالته.

ندي: «بس إيه يا حاج، إنت ناوي تقعد عندنا كتير ولا إيه؟»

حاول يبتسم، وعينيه فضلت متعلقة بيا.

ندي: «لا، أنا عارفة إنك زهقت، بس لازم تسمع كلام الدكتور عشان تقوم بالسلامة.»

في اللحظة دي دخل أنس، وكان ماسك كيس صغير.

أنس: «جدو، جبتلك...»

وقف لما شافني.

أنس: «إنتِ هنا؟»

بصيتله باستغراب.

ندي: «أيوه، بعمل متابعة الحالة.»

أنس: «تمام.»

رجع بص لجده، وقرب منه.

أنس: «جبتلك حاجتك من البيت، لما تبقى أحسن هتحتاجها.»

عبد العزيز حاول يبص للكيس، وبعدها بص لأنس.

أنس: «متقلقش، كل حاجة موجودة.»

خلصت اللي بعمله، وكنت بكتب الملاحظات لما سمعت صوت عبد العزيز بيحاول يطلع كلمة.

قربت منه.

ندي: «نعم يا حاج؟»

حاول يتكلم، لكن صوته كان ضعيف ومش مفهوم.

ندي: «براحتك، مش مستعجلين.»

بص لأنس، وبعدها حاول يحرك إيده.

أنس مسكها فورًا.

أنس: «عايز إيه يا جدو؟»

فضل يحاول يتكلم، لكن مقدرش يكمل.

أنس قرب منه أكتر.

أنس: «خلاص، متتعبش نفسك. أنا فاهم إنك عايزني أفضل.»

ابتسمت من غير ما أعلق، وكملت شغلي.

بعد ما خلصت، بصيت لأنس.

ندي: «لو سمحت، حاول تخليه يرتاح ومتكترش عليه الكلام.»

أنس: «أنا مش بتكلم كتير.»

ندي: «أنا قصدي إنه محتاج راحة، مش أكتر.»

أنس: «حاضر .»

خرجت من الأوضة، وأنا بقول لنفسي إن الراجل ده محتاج يتعلم إن مش كل ملاحظة معناها إن حد بيهاجمه.

__________

بعد ما الممرضة خرجت، بصيت لجدي.

أنس: «إيه يا جدو؟ مش عاجبك المستشفى؟»

حاول يبتسم.

أنس: «طب ما تقوم بالسلامة ونرجع البيت، وأنا هقعد معاك براحتك.»

فضل باصصلي، وبعدها حاول يحرك إيده ناحية إيدي.

مسكتها.

أنس بصوت هادي: «أنا عارف إنك سامعني، وعارف إنك هتقوم إن شاء الله.»

فضلت قاعد جنبه، ومشيتش غير لما عمران رجع وقعد معاه شوية.

_________

كنت في استراحة التمريض لما بسمه  دخلت وهي شايلة كوباية قهوة.

 «خدي، شكلك محتاجة القهوة دي.»

ندي: «ربنا يخليكي، أنا فعلًا مش قادرة.»

بسمه : «إيه أخبار الحالة اللي متابعة معاها؟»

ندي: «لسه تحت الملاحظة.»

زميلتي: «والحفِيد؟»

بصيتلها.

ندي: «ماله؟»

زميلتي: «حاساه متوتر جدًا.»

ندي: «ما هو جده تعبان، طبيعي.»

زميلتي: «بس إنتِ شكلك مش طايقاه.»

ندي: «هو أنا لحقت؟
 ده أنا شوفته كام مرة بس.»

ضحكت بسمه.

بسمه : «أهو من أول كام مرة حكمتي عليه.»

ندي: «مش بحكم على حد، بس طريقة كلامه مش مريحة.»

بسمه : «سيبيه يا ستي، المهم الحالة.»

ندي: «بالظبط.»

شربت شوية من القهوة، وقمت عشان أرجع أكمل شغلي.

________

كان عمران قاعد جنبي، ولأول مرة من وقت ما وصلنا المستشفى حسيت إني محتاج أتكلم.

أنس: «بابا.»

عمران: «نعم يا أنس؟»

أنس: «إنت هتفضل هنا مع جدو؟»

عمران: «طبعًا، ده أبويا.»

أنس: «أنا عارف، بس لو عندك شغل أو حاجة...»

عمران قاطعني: «مفيش حاجة أهم منه دلوقتي.»

هزيت راسي.

عمران: «وبعدين إنت مش لوحدك يا أنس، إحنا الاتنين موجودين.»

بصيتله، ومردتش.

بعد لحظة، سألني:

عمران: «إنت أكلت؟»

أنس: «آه.»

عمران: «كويس.»

رجعت سندت ضهري على الكرسي، وغمضت عيني شوية.

كان يوم طويل جدًا، ولسه مفيش أي حاجة مطمّنة بشكل كامل.

وفجأة سمعت صوت جدي.

عبد العزيز بصوت ضعيف: «أن... أنس.»

فتحت عيني بسرعة، وقومت من مكاني ودخلتله.

أنس: «أنا هنا.»

قربت منه ومسكته من إيده.

حاول يتكلم تاني، لكن الكلمات طلعت متقطعة.

أنس: «متتعبش نفسك يا حبيبي، أنا جنبك.»

بصلي، وحاول يبتسم.

ابتسمتله أنا كمان.

أنس: «عايز حاجة؟»

حرك عينيه ناحية عمران، اللي دخل ووقف عند السرير.

عمران قرب منه ومسك إيده التانية.

عمران: «سلامتك يا حاج، خوفتنا عليك.»

عبد العزيز فضل باصصله، وعينيه فيها كلام كتير، لكن مكنش قادر يقوله.

عمران: «إن شاء الله تقوم بالسلامة ونرجع البيت، وتفضل تتخانق معانا زي عادتك.»

حاول عبد العزيز يبتسم، وأنا فضلت واقف بينهم ماسك إيده.
 

ولأول مرة من وقت ما دخلنا المستشفى، ضحكت ضحكة صغيرة.


تعليقات