رواية سواق التكتوك الفصل الثاني 2 بقلم أميرة عادل

كان دراع بني آدم..

وقتها حسيت بجسمي كله بيرتعش من المنظر وبعدت تلقائي وقولت برعب:

"دراع مين ده؟؟ أنتي قتلتي مين؟؟"

وقتها رديت عليا بكل برود الدنيا

"مقتلتش حد.. ده دراعي أنا!!"

دراعها؟؟

ده انيل من أنها تكون قاتلة حد..

بس المرعب في الحوار لما عيني جات على دراعها الشمال وكان مبتور وبينقط منه دـ.ـم على رصيف الشارع!!

أول ما شوفت المنظر ده اغمى عليا وقتها..

صحيت على حد بيخبط على كتفي وبيقول:

"يا استاذ اصحى.. يا أستاذ.. هو ده مات ولا إيه؟؟"

قومت من مكاني لقيت نفسي قاعد في نفس الشارع، بس الغريب أنه البنت أم دراع مبتور مش موجودة، بصيت للشخص إللي فوقني وقولت:

"كان في آنسة بدراع واحد شوفتها؟؟"

الراجل بص ليا باستغراب ورد

"أنا كنت ماشي في الشارع ده ولقيتك واقع على الأرض ومكنش فيه حد معاك"

فضلت باصص للراجل وأنا مش قادر أستوعب كلامه، وقولتله بتوتر:

"يعني إيه مكنش فيه حد معايا؟! دي كانت واقعة قدامي، وكان معاها شنطة سودا فيها دراعـها!"

الراجل هز راسه باستغراب وقال:

"يا ابني أنت شكلك تعبان، قوم روح بيتك أحسن بدل ما يحصل لك حاجة."

بصيت حواليا يمكن ألاقي أي دليل يثبت إن اللي شوفته كان حقيقي، لكن مكنش فيه أي أثر للبنت ولا الشنطة.

ركبت التوكتوك وطلعت أجري من المكان، وفضلت طول الطريق بفكر في كلامها، خصوصًا لما قالت إن الدراع اللي في الشنطة بتاعها هي!

وصلت البيت، وأول ما أمي شافتني قالت بقلق:

"مالك يا يونس؟ وشك مخطوف كده ليه؟"

رديت عليها وأنا داخل:

"مفيش يا أمي، بس تعبان شوية"

دخلت أوضتي وقفلت الباب، وفضلت قاعد على السرير لحد ما افتكرت حاجة خلتني أقوم من مكاني بسرعة...

قمت فتشت في جيبي وطلعتها ال ١٠٠ إللي اخدتها منها، يعني البنت اللي شوفتها كانت حقيقية..

طلعت موبايلي واتصلت على صاحبي الشيخ يوسف وحكيتله الموضوع كله، وبعدها قال

"الظاهر أنه البنت دي محتاجة مساعدتك عشان كدا بقيت تظهر لك في كل مكان"

سألته وأنا مستعجب الموضوع

"اساعدها في إيه؟؟ وليه أنا بالذات اللي بتظهرلي؟؟"

رد عليا بهدوء

"الله أعلم، بس إللي اعرفه أنك لازم تحاول تساعدها مادام استنجدت بيك في الحلم"

قفلت معاه وأنا كلي حيرة في الموضوع المريب ده..

تاني يوم قررت اروح لحارة البنت عشان اسأل عنها الجيران يمكن الاقي حاجة تفيدني..

وصلت الحارة بعد حوالي نص ساعة، ووقفت بالتوكتوك في أول الشارع، ونزلت أسأل واحد صاحب محل عن عمارة بنت كنت بوصلها ونسيت حاجة في التوكتوك معايا واضطريت اكذب عليه عشان يرضى يجاوبني.

وصفتهاله إنها بنت رفيعة وبتلبس عباية سودة، وفي إيدها شنطة سودا.

الراجل سكت شوية، وبعدها قال:

"استنى هنا، إنت تقصد ورد بنت عم رجب؟"

هزيت راسي بسرعة وقلت:

"أيوه هي! تعرفها؟"

بص حواليه كأنه خايف حد يسمعه، وبعدها قرب مني وقال:

"يا ابني البنت دي مختفية من أكتر من شهر، ربنا يستر على بناتنا"

اتصدمت من كلامه وسألته:

"مختفية إزاي يعني؟! ما أنا شوفتها بعيني امبارح وأول امبارح!"

الراجل اتخض من كلامي وقال:

"إنت بتقول إيه يا ابني؟! دي آخر مرة شوفتها كانت ليلة ما خرجت من البيت ومعاها شنطة سودا، ومن ساعتها محدش شافها!"

حسيت بقشعريرة في جسمي، وافتكرت كلامها لما كانت بتقولي ساعدني يا يونس في الحلم.

سألته بسرعة:

"طب بيت عم رجب فين؟ أنا لازم أقابله."

وصفلي الشقة بتاعتهم في العمارة اللي كنت بوصل ليها ورد كل يوم.

طلعت السلم وخبطت على الباب، وبعد شوية فتحلي راجل كبير في السن، وشه كان باين عليه الحزن والتعب.

سألني:

"أيوه يا ابني، عايز مين؟"

قلتله:

"حضرتك عم رجب؟"

هز راسه، فقلتله:

"أنا يونس، سواق التوكتوك كنت بوصل بنت حضرتك ورد كل يوم."

أول ما سمع اسم بنته، عينيه دمعت، ومسكني من دراعي وقال:

"إنت تعرف بنتي منين؟! هي فين؟! بالله عليك قولي هي فين؟!"

اتلخبطت من رد فعله، وقلتله:

"أنا مش عارف، بس هي ظهرتلي أكتر من مرة، وكانت كل مرة معاها شنطة سودا."

عم رجب قال بصوت مكسور:

"الشنطة السودا؟! دي كانت آخر حاجة خرجت بيها من البيت!"

وقبل ما ارد عليه سمعت صوت ست جاية من جوا وهي بتقول

" مين ده يا رجب؟؟ وبيسأل على ورد ليه؟؟ يكونش الجدع اللي هربت معاه!!"

بصيت ليها بتعجب من كلامها، وعم رجب قال بغضب

"اتقي الله يا فتحية، أنا بنتي متربية ومستحيل تعمل كدا"

وبص عليا قال

"أنا يا ابني بنتي مختفية زي ما قولتلك من شهر ومعرفش ازاي بتظهرلك"

بعد كلامي مع عم رجب، رجعت للشغل تاني وأنا محبط على الآخر أني ملقتش معلومة واحدة تفيدني..

فضلت ألف بالتوكتوك لحد ما الليل دخل، وعلى الساعة ١١:٤٥ بالظبط، حسيت بحد بيخبط خفيف على ضهري...

بصيت ورايا وأنا مفزوع، والصدمة أنه ورد كانت هي إللي بتخبط على ضهري!!

حاولت اتمالك أعصابي وسألتها

"أنتي عاوز مني إيه؟؟

ردت عليا بهدوء

"قولتلك يا يونس عوزاك تساعدني وتلاقي جثتي وتدفني"

سألتها برعب

"جثة إيه؟ هو أنتي ميتة أصلا؟؟"

رديت عليا بنبرة فيها حزن

"أيوة ميتة، في شخص قتلني ورماني في  مصرف قديم برا حارتنا"

سألتها بصدمة:

"مصرف إيه ده؟! وإنتي تعرفي مكانه بالظبط؟"

هزت راسها وقالت بحزن:

"أيوة، أقدر أوصفهولك عشان عاوزة جثتي تظهر للناس ومحدش يجيب في سيرتي أني سيبت البيت برضايا"

ورغم خطورة الموقف إلا أني طلبت منها توصفلي المكان عشان اساعدها..

وصلت للمكان اللي قالت عليه وكان عبارة عن شارع جانبي مهجور، وفضلت الف بالتوكتوك شوية بدور على المصرف وفجأة لقيته...

نزلت من التوكتوك وقربت من المصرف وضربات قلبي كانت سريعة جداً..

فتحت الكشاف على المصرف وانصدمت من إللي شوفته!!

كان فيه جـ.ـثة بنت!!

اتصلت على الشرطة بسرعة وبلغتهم أني لقيت جـ.ـثة

بعد دقايق وصلت الشرطة، وبدأوا يعاينوا المكان، وبعدها نقلوا الجـ.ـثة للمشرحة عشان يتأكدوا من هويتها.

وبعد يومين اتأكدوا إنها ورد فعلًا، وبدأت التحريات لحد ما قدروا يوصلوا للقاتل، وكانت المفاجأة إنه شاب من نفس الحارة اسمه سامح، وكان عاوز يتجوزها، لكنها رفضته أكتر من مرة، فقرر ينتقم منها وينهي حياتها ويتخلص من جـ.ـثتها في المصرف.

وبعد القبض عليه واعترافه بجريمته، وأهل ورد قدروا يستلموا جـ.ـثتها ويدفنوها، وأخيرًا عرفت ترتاح.