رواية حين يجبر العشق الفصل الخامس والثلاثون
في الجبل ...
كان صبري يذرع المكان ذهابًا وإيابًا بخطوات غاضبة، وقد انعقد حاجباه في ضيق واضح. ثلاثة أيام كاملة مرّت منذ اختفاء شاهين، لا خبر عنه ولا أثر، وهاتفه مغلق منذ آخر مرة حاول الاتصال به فيها.
توقّف أمام صخرة كبيرة، وأخرج هاتفه من جيبه للمرة التي لا يعلم عددها، ثم أعاد الاتصال به، لكن النتيجة كانت كالسابق؛ الهاتف مغلق.
أطبق على الهاتف بين أصابعه، وأطلق زفرة حانقة .....
لم يكن اختفاء شاهين أمرًا عابرًا يمكن تجاهله، فهو لم يكن مجرد واحد من رجاله، بل كان ذراعه الايمن وكاتم اسراره الذي يعتمد عليه في كل شيء...
واختفاؤه في هذا التوقيت تحديدًا لم يكن مطمئنًا، خاصة بعدما بدأت المواجهة التي ظل يؤجلها تقترب جداً ...
استدار نحو احدي رجاله الواقف عند مدخل المخبأ، وسأله بحدة: مفيش أي جديد ؟؟
هزّ الرجل رأسه نافيًا، فأردف صبري بنفاد صبر: يعني إيه مفيش جديد ، شاهين اختفى من تلات أيام، لا حد شافه ولا حد عارف راح فين هي الأرض انشقت وبلعته؟!
— دورت عليه في كل الأماكن اللي كان بيروحها يا كبير، وسألت رجالتنا، محدش عنده خبر عنه.
رمقه صبري بنظرة غاضبة، ثم أشار إليه بالانصراف: غُور من وشي، وخلي عينك مفتحة. أول ما يظهر له أثر، أعرف قبل أي حد.
انصرف الرجل بطاعه ، بينما ظل صبري واقفًا مكانه، يضغط على فكه في غضب. أخرج هاتفه مجددًا، وتأمل الشاشة لحظات قبل أن يتمتم بصوت خفيض، كأنه يخاطب غائبًا يسمعه:يا ترى مختفي فين يا شاهين؟تلات أيام بحالهم ومش عارف أوصلك... ولا تكون بتعمل مصيبة من مصايبك من غير ما ترجع لي؟!
صمت لحظة، ثم ارتسمت على وجهه ابتسامة ساخرة خالية من الطمأنينة.: إوعى تكون فاكر إنك تقدر تلعب من ورا ضهري يا شاهين...
أنا اللي علمتك تمشي، وعارف كويس إن مفيش خطوة بتاخدها من غير حساب.
أعاد الهاتف إلى جيبه، ثم رفع عينيه نحو امتداد الجبل، حيث بدت الصخور الموحشة كأنها تحاصره من كل جانب.
كان يدرك أن الوقت لم يعد في صالحه، وأن المواجهة التي اقترب موعدها لن تمنحه فرصة أخرى للاختباء. لكنه لم يكن يخشى رجال الجنوب بقدر ما كان يخشى أن يكون أقرب رجاله قد صار ثغرة ينفذون منها إليه.
....................
بعد ثلاثة أيام أخرى...
في المخزن...
انفتح الباب الحديدي، ودخل سلطان يتبعه عامر، الذي أغلق الباب خلفه قبل أن يتجه بنظره إلى شاهين الجالس في مكانه، وقد بدا عليه الترقب منذ لمح دخولهما.
تقدم سلطان بخطوات هادئة، ثم جلس أمامه وسأله بنبرة ثابتة: خير يا شاهين؟ طلبت إنك تشوفنا.
أما عامر، فاقترب منه بابتسامة ساخرة، وقال وهو يتفحصه:إيه يا شاهين ، هي قعدتك عندنا مش مريحاك ولا إيه؟
ولا محتاج نجيب لك واحدة من ال.....اللي تعرفهم تروق عليك شوية؟
ضحك سلطان باستهزاء، ثم ألقى نظرة على شاهين وقال مخاطبًا عامر: يمكن يكون عقل وقرر يتكلم، ويريّح نفسه ويريّحنا.
رفع شاهين عينيه إلى سلطان، ثم قال بجدية: أنا فعلًا قررت أتكلم، زي ما قلت يا شيخ سلطان...
بس قبل ما أتكلم، أنا عاوزك تضمن لي إن رقبتي تكون في أمان، وإني أكون في حمايتك بعد ما أسلّم لك صبري.
تبدلت ملامح سلطان، ونظر إليه بقوة قبل أن يجيبه ببرود:يا شاهين، الخاين مالوش أمان...
وأماني وحمايتي ليك هيكونوا على حسب اللي هعرفه منك.
تبادل شاهين النظرات بينه وبين عامر، ثم أخذ نفسًا عميقًا قبل أن يبدأ حديثه:صبري دفع كل الفلوس اللي معاه للمطاريد والرحّالة علشان يضمهم لرجالته ويقفوا معاه ضدكم. ناوي يهجم على أرض الجنوب كلها، يحتلها ويخليها تحت سيطرته، ويبقوا رجالته تحميه ويحميهم، وساعتها يبقى هو سيد الجنوب وسيد المجلس... بعد ما يخلص منك ومن عامر، ومن عمه الشيخ هاشم الرفاعي وهارون ابنه، وكمان...
توقف لحظة، وكأنه يتردد في ذكر الاسم التالي، قبل أن يستطرد: وكمان يخلص من الشيخ عارف.
ساد الصمت لثوانٍ، ثم أضاف شاهين بصوت خافت وهو يتهرب بعينيه من سلطان : وبعدها يتجوز الست حور، مراتك.
سكت، وأخذ يراقب رد فعلهما، منتظرًا أن يرى أثر كلماته عليهما، لكنه لم يكن مستعدًا لما واجهه.
فقد رأى الغضب يشتعل في عيني سلطان حتى بدا كأنهما جمرتان تحت رماد بارد، بينما تصلّب جسد عامر، وانقبضت يداه بعنف، قبل أن ينفجر صارخًا:ابن الكلب ده عاوز يخلي أرض الجنوب مأوى للمطاريد والرحّالة؟! والله لأقطع جتته بإيديا وأرميها لكلاب السكك!
رفع سلطان يده أمام عامر يأمره بالصمت، فابتلع الأخير غضبه بصعوبة، بينما أعاد سلطان نظره المحتقن بنيران الغضب إلى شاهين، وسأله بهدوء حذر: وإيه اللي يضمن لي إنك مش بتكدب؟
وإنك مش متفق مع صبري على كل ده، وعاوز تسلّمني ليه بعد ما أبلع الطُعم بتاعك؟
لم يبدُ على شاهين التفاجيء من شكوكه، بل أومأ برأسه متفهمًا وقال: عندك حق تشك فيّا، وده طبيعي...
بس كان يبقى من حقك تشك أكتر لو أنا قلت لك روح اهجم عليه في الجبل إنت ورجالة الجنوب وارميكم قدامه ، إنما هو اللي هيجيلك برجليه، مش إنت اللي هتروح له.
ضيّق سلطان عينيه، فاستكمل شاهين موضحًا:أنا قلت لك الكلام ده علشان تاخد احتياطك منه، وتأمّن نفسك انت وكل شيوخ القبائل.
وبعدين إنت ليك راجل من رجالتك هناك وسط رجال صبري، وأكيد بيقول لك على اللي بيحصل في الجبل.
سكت سلطان للحظات، وقد تذكر ما أخبره به ياسين قبل مجيئه إلى المخزن.
تذكر دخوله عليه في المكتب، وإخباره بما نقله منصور، الرجل المزروع وسط رجال صبري؛ عن جمعه للمطاريد والرحّالة، وضمهم إلى رجاله، وإمدادهم بكميات كبيرة من السلاح.
كان حديث شاهين متوافقًا تمامًا مع ما وصل إليه من معلومات، لكن ذلك لم يمنعه من الحذر.
حك سلطان طرف ذقنه، ثم سأله:وتعرف إيه تاني؟
هز شاهين رأسه نافيًا: ده كل اللي أعرفه.
ثم مال بجسده إلى الأمام، وسأله بقلق:كده هتحميني منه؟
ثبت سلطان عينيه عليه، وأجابه بحزم: هحميك منه... بس إنت كمان هتنفّذ كلامي الأول.
ابتلع شاهين حلقه الجاف وسأله: إيه هو؟
مال سلطان برأسه قليلًا، وقال بنبرة لم تحتمل النقاش: لازم ترجع الجبل لصبري.
تجمّد شاهين في مكانه، واتسعت عيناه بدهشة لم يستطع إخفاءها.: أرجع له؟!
أجابه سلطان دون أن يرفع عينيه عنه:
— أيوه... ترجع له، وتخليه يفتكر إنك لسه معاه.
ساد الصمت بينهما، بينما بدأ شاهين يدرك أن سلطان لا يكتفي بمعرفة ما يخطط له صبري، بل ينوي أن يجعل خطته طريقًا يصل به إليه.
.........................
غادر سلطان وعامر المكان بعد أن تركا شاهين أمام مهمته الجديدة؛ يعود إلى صبري، ويُوهمه بأنه ما زال على ولائه له، بينما يتحول في الحقيقة إلى عينٍ لسلطان داخل معسكر عدوه.
وما إن ابتعدا عن المخزن، حتى أخرج سلطان هاتفه وأجرى اتصالًا بالشيخ عارف، ثم أتبع ذلك باتصال آخر بالشيخ هاشم، طالبًا منهما دعوة جميع شيوخ الجنوب إلى اجتماع طارئ في أقرب وقت.
أما عامر، فتولى الاتصال ببقية الشيوخ وإبلاغهم بضرورة الحضور دون تأخير.
وبعد أن انتهيا من اتصالاتهما، استقل كلٌّ منهما سيارته، وانطلقا نحو مقر المجلس.
في مجلس شيوخ الجنوب...
كان جميع الشيوخ قد حضروا بالفعل، وجلسوا في انتظار وصول سلطان وعامر، وقد أثار طلب الاجتماع المفاجئ فضولهم وقلقهم، خاصة أن المجلس لم يكن على موعد انعقاده المعتاد.
وما إن دخل سلطان يتبعه عامر، حتى نهض بعض الحاضرين لتحيتهما، قبل أن يتخذا مقعديهما في صدر المجلس.
نظر الشيخ عارف إلى سلطان وسأله: خير يا سلطان؟ طلبت اجتماع المجلس في غير معاده ليه؟
اعتدل سلطان في جلسته، وألقى نظرة على الوجوه المتطلعة إليه، ثم قال بنبرة جادة:
فيه أخبار مهمة عن صبري، ولازم الكل يعرفها قبل ما الأمور تتطور أكتر من كده.
عقد الشيخ هاشم حاجبيه، وسأله بحدة:عمل إيه تاني النجس ده؟
أخذ سلطان نفسًا عميقًا، ثم أجاب: صبري جمع المطاريد والرحّالة، وبيجهزهم علشان يهجموا على الجنوب ويحتلوه.
لم تكد كلماته تستقر في أرجاء المجلس حتى انتفض هارون من مقعده، وقال بغضب: مش هيحصل... مش هيحصل غير على جثثنا!
رفع سلطان عينيه إليه، وأجابه بصرامة: هو فعلًا مش هيحصل غير على جثثنا، وصبري عارف ده كويس. وعلشان كده، من ضمن خطته إن اللي بيحاول يعمله ده مش هيحصل غير بعد ما يخلص عليّا أنا وعامر، وبعدها إنت يا هارون، والشيخ هاشم... وكمان الشيخ عارف.
انفجر المجلس بالضجيج، وتعالت أصوات الشيوخ بين غاضب ومستنكر، وبدأ كلٌّ منهم يعبّر عن رفضه لما سمعه، حتى اختلطت الأصوات ولم يعد أحد يسمع الآخر.
عندها ضرب الشيخ عارف الأرض بعصاه بقوة، فخفتت الأصوات تدريجيًا، حتى ساد الصمت.
مرّر الشيخ عارف نظره على الحاضرين، ثم قال بصوت جهوري: وفّروا غضبكم وعصبيتكم دي للمواجهة، لكن دلوقتي لازم كلنا نبقى إيد واحدة وكتف في كتف. صبري مش بيهدد واحد فينا وبس، ده بيهدد الجنوب كله، أرضنا وبيوتنا وناسنا. ومش هينفع نواجهه وإحنا متفرقين... لازم نحافظ على وحدتنا، وعلى أرضنا من الرعاع اللي فاكرين إنهم يقدروا ياخدوها من أصحابها.
ثم التفت إلى سلطان وسأله:ناوي تعمل إيه يا سلطان؟
وقبل أن يجيبه، تدخل أحد الشيوخ قائلًا:
إحنا لازم نبلغ الحكومة، علشان تبقى معانا وتمدّنا بالدعم اللازم.
نظر إليه سلطان مباشرة، وقال بحسم: الحكومة مش هتدخل تدافع لنا عن أرضنا... أرضنا إحنا اللي هندافع عنها، حتى لو موتنا كلنا فداها.
شيوخ الجنوب وولادهم وشبابها هم اللي هيدافعوا عنها ويجيبوا حقها. وبعد ما نخلص عليهم، اللي هيفضل منهم هو اللي هنسلّمه للحكومة... غير كده محدش هيدخل بينا.
ساد الصمت للحظات، بينما تبادل الشيوخ النظرات، قبل أن يتحدث الشيخ عارف مؤيدًا: كلام سلطان هو اللي هنعمل بيه. أرض الجنوب مسؤوليتنا كلنا، ومحدش فينا هيسيبها لحد يطمع فيها.
أومأ الشيخ هاشم موافقًا، وأردف هارون: وإحنا معاه لآخر نفس فينا ..
وتوالت موافقات بقية الشيوخ، حتى استقر المجلس على موقف واحد، لا تراجع فيه ولا انقسام.
مال الشيخ عارف قليلًا إلى الأمام، وسأل سلطان: وناوي على إيه يا سلطان؟
رفع سلطان رأسه، واستقرت عيناه على وجوه الحاضرين، وقد بدا الحسم واضحًا في ملامحه: إحنا هنخلّي الجنوب مقبرة لصبري واللي معاه.
ثم اعتدل في جلسته، وبدأ يشرح خطته لحماية أرض الجنوب، موزعًا المهام بين الرجال، ومحددًا المواقع التي يجب تأمينها، حتى لا يترك لصبري ثغرة ينفذ منها إلى أي قرية أو نجع.
كان حديثه هادئًا، لكنه لم يترك مجالًا للتردد؛ فهذه المرة لم يكن الأمر مجرد مطاردة لرجل هارب، بل مواجهة ستحدد من يملك الحق في أرض الجنوب، ومن سيخرج منها بلا عودة.
..........................
في الجبل...
وصل شاهين إلى مخبأ صبري بعد غياب دام ستة أيام، ودخل عليه بخطوات هادئة، محاولًا إخفاء ما يعتمل داخله من توتر.
ما إن وقعت عينا صبري عليه حتى نهض من مكانه بسرعة، واقترب منه بوجه عابس، وقال بحدة: إنت كنت مختفي فين يا شاهين كل ده وقافل تليفونك ليه؟
جلس شاهين على أحد المقاعد، وألقى نظرة عابرة عليه قبل أن يجيبه ببرود: هقولك كل حاجة، بس مالك متعصب كده ليه؟
رد صبري بنفاد صبر:وإنت شايف إن مفيش حاجة تعصب ؟؟؟
تلات أيام مش عارف أوصلك فيهم، ولا عارف إنت فين ولا بتعمل إيه؟؟
ابتسم شاهين ابتسامة خفيفة، وقال: لما تعرف أنا كنت فين، مش هتتعصب عليّا بالشكل ده.
أشار إليه صبري بيده في ضيق: قول... أنا سامعك.
استند شاهين إلى ظهر المقعد، وبدأ حديثه بنبرة عادية، وكأنه يحكي أمرًا لا يستحق كل ذلك الاهتمام: أنا كنت سهران زي العادة في نفس المكان اللي بسهر فيه كل فترة، وقضيت الليلة مع بت من البنات هناك.
والبنت كيفتني أوي بصراحه فقلت أبيت معاها وأمشي الصبح... وحصل.
قطّب صبري حاجبيه، بينما تابع شاهين:
الصبح صحيت على صوتها وهي بتتكلم في التليفون مع حد، وسمعتها جابت سيرة سلطان العامري في الكلام، ومستشفى وحوار كده أنا مفهمتش منه حاجة. فقلت أما أوقعها في الكلام وأعرف فيه إيه.
مال شاهين قليلًا إلى الأمام، واستطرد: لما خلصت مكالمتها، قعدت أهري معاها وأوهمتها إنها دخلت دماغي، وإنها مفيش منها اتنين، وبعد شوية سألتها كانت بتكلم مين. قالت لي بنت خالتها، وسكتت.
فقمت قايل لها بس أنا سمعتك بتقولي اسم راجل اسمه سلطان العامري.
توقف لحظة، ثم أكمل: قالت لي إن بنت خالتها شغالة عندهم في الدار، وإنها كانت بتحكي لها عن اللي حصل هناك.
سألتها إيه اللي حصل، فقالت لي هو إنت ما تعرفش مين سلطان العامري؟ قلت لها لأ. قالت لي إنه واحد من أكبر شيوخ الجنوب، وإن كان فيه واحدة شغالة عنده اتبلت عليه وقالت إنها حامل منه، وإن أمه كانت مصدقاها، لكن سلطان عمل تحليل إثبات نسب وطلع العيل مش ابنه، وإن البت دي كانت حامل من طليقها مش منه... وإن العيل كمان مات، وبعدها طردها من الدار.
ثم أضاف شاهين، متعمدًا أن يلقي كلمته الأخيرة دون اهتمام:ده غير إن حور كمان حامل.
انتفض صبري في جلسته، وكأن الكلمة أصابته في مقتل. قبض على ذراع المقعد بعنف حتى تصدّع الخشب تحت يده، ثم هوى به غاضبًا، وصاح: حور حامل؟!
اشتعلت عيناه بنيران الغيرة والحقد، وانقبض فكه بشدة، قبل أن يتمتم بوعيد: يعني ابن الكلب سلطان هيخلّف من حور؟! والله لأدفنه بإيدي... ومش هسيبه يتهنى بحاجة في الدنيا!
راقبه شاهين بحذر، ثم انتظر حتى هدأ صبري قليلًا، قبل أن يوجه إليه السؤال الذي كان ينتظره: وتليفونك كان مقفول ليه؟
مسح شاهين على وجهه، وأجابه ببساطة:
فصل شحن، ومكنش معايا شاحن. وأنا أصلًا مكنتش عامل حسابي إني أقعد في البلد الكام يوم دول.
لم يقتنع صبري تمامًا، فسأله وهو يحدق فيه: وإيه اللي رجعك؟
رد شاهين دون تردد: أصل جوز البت رجع. هو بيشتغل بره البلد، بيقعد شهر ويرجع أسبوع، ولما عرفت إنه رجع، قلت أمشي أحسن قبل ما تحصل مشكلة.
ظل صبري يحدق فيه بنظرات متشككة، ففهم شاهين ما يدور في رأسه. ورغم الخوف الذي تسلل إلى صدره، حاول أن يحافظ على ثبات ملامحه، وقال بشجاعة مصطنعة:
أنا عارف إنك شاكك فيّا، بس مش إنت معاك تليفون البت اللي كانت عند سلطان؟
لو مش مصدقني، كلمها وإنت تتأكد من كل حاجة قالتها لك ...
ظل صبري ينظر إليه لثوانٍ، ثم قال أخيرًا:لا، مصدقك... لأنك عارف كويس إن لو أنا شاكك إنك بتكدب، كنت دفنتك تحت رجلي دلوقتي.
نهض من مكانه، وأشار إليه بيده: روح يا شاهين، وسيبني لوحدي.
نهض شاهين وغادر دون أن يضيف كلمة أخرى، وما إن اختفى عن نظره حتى أخرج صبري هاتفه، وبحث عن رقم سارة، ثم ضغط زر الاتصال.
.....................
في مكان آخر...
كانت سارة تجلس وحدها، شاردة بعينين خاليتين من الحياة، حين أضاء هاتفها باسم صبري. ظلت تنظر إلى الاسم لحظات، قبل أن تجيب بصوت باهت: لسه فاكر تكلمني؟
جاءها صوته خشنًا ومباشرًا: إيه اللي حصل لك بالظبط؟
أطلقت ضحكة قصيرة خالية من أي فرح، ثم قالت: خسرت كل حاجة... وأولهم نفسي.
زمجر صبري بنفاذ صبر : مش وقت فلسفة، وحياة أمك انطقي وقولي إيه اللي حصل!
اغرورقت عيناها بالدموع، وانكسر صوتها وهي تقول: ابني مات... وطلع مش ابن سلطان.
ضيق صبري عينيه وسألها بخبثه : أومال ابن مين؟
أجابته بصوت مرتجف: طليقي.
ساد صمت قصير، قبل أن ينطلق صبري بضحكة قذرة، وقال باستهزاء: ده إنتِ كنتِ مدوراها بقى وإحنا مش عارفين!
طب مش كنتِ تقولي كنت أنا كمان أخدتك لفة...
وعلى فكرة، كنت هكيّفك أوي، أنا أجْدع من جوز الكلاب اللي نمتي معاهم!
أغمضت سارة عينيها، وانسابت دموعها على وجنتيها. لم تعد تملك طاقة للغضب أو الدفاع عن نفسها لكنها تستحق ... تستحق كل ما حدث لها وما تسمعه من حقاره ، لكنها تفوهت بحقيقه لا يمكن انكارها : علي فكره
مش هزعل من إهانتك ليا، لأني أستاهل أكتر من كده...
بس إنت عمرك في يوم ما تتحط في مقارنة مع سلطان يا صبري لأن الكلب صعب يتقارن بالأسد...
وإنت نهايتك هتكون على إيد سلطان يا صبري.
ثم أغلقت الهاتف في وجهه.
ظل صبري ممسكًا بالهاتف للحظات، وقد تبدلت ملامحه إلى غضب أعمى. لم يحتمل كلماتها، ولا المقارنة التي عقدتها بينه وبين سلطان، فألقى الهاتف بكل قوته على الأرض، ليتحطم تحت قدميه.
صرخ بصوت هادر: بقى أنا كلب با بنت الوسخه يا مومس ...
أنا هوريكي الكلب ده هيعمل إيه في سلطان وبكرة تشوفي... إنتِ وهما ....
ظل واقفًا وسط غضبه، تتزاحم في رأسه صور سلطان وحور، بينما لم يعد الأمر بالنسبة إليه مجرد رغبه في الثأر من كل من اذاه او حط من شانه فقد تحولت كراهيته إلى رغبة عمياء في تحطيم كل ما يملكه سلطان، حتى تلك السعادة التي لم يستطع صبري يومًا أن ينال مثلها.
.......................
بعد اسبوعين ....
صباح يوم الحسم...
لم يكن صباحًا عاديًا في دار العامرية، فقد حملت الساعات الأولى منه أنباءً لم تترك مجالًا للشك في أن المواجهة التي طال انتظارها باتت وشيكة.
وصلت المعلومات إلى سلطان تباعًا من شاهين ومنصور، وكلاهما أكد أن صبري لن ينتظر أكثر من ذلك، وأنه يستعد للهجوم مساء اليوم برفقة المطاريد والرحالة، مستهدفًا العامرية ورجالها، بعدما جمع من حوله كل من يطمع في أرضها وسلطتها.
ومنذ الصباح الباكر، كان سلطان وعامر وهارون وياسين يعقدون الاجتماعات، ويوزعون المهام بين الشيوخ والشباب، ويحددون نقاط التأمين والحراسة ومداخل البلد، استعدادًا لأي تحرك من رجال صبري.
لم يكن أحد منهم ينوي التراجع أو التفريط في أرضه، فقد أصبحت المواجهة حتمية، ولم يعد أمامهم سوى الاستعداد لها
عاد سلطان إلى الدار بعدما انتهى من توزيع المهام، وصعد مباشرة إلى جناح والدته.
كانت هانم قد فرغت لتوها من الصلاة، وجلست على سجادة صلاتها تسبح الله، وما إن رفعت عينيها ورأت ابنها يدخل بملامح جامدة ونظرات مثقلة بما يخفيه، حتى اعتدلت في جلستها وسألته بقلق: مالك يا سلطان في إيه يا ولدي؟
اقترب منها وجلس أمامها، ثم أمسك يدها بين كفيه، وظل ينظر إليها للحظات قبل أن يقول بصوت هادئ: ادعيلي يا أمي... أنا عاوزك النهارده تفضلي تصلي وتدعيلي.
ازداد القلق في عينيها، وضغطت على يده تسأله:في إيه؟ ما تقلقنيش عليك يا ضنايا.
تنهد سلطان، ثم قال وهو يحاول أن ينتقي كلماته:ـ النهارده يوم مهم في حياتي وحياة البلد كلها يا أمي...
يا إما أقدر أثبت نفسي وأكون قد المسؤولية اللي اتحطت على كتافي، وأثبت إني جدير إني أحميكم وأحمي بلدي، وأكون شيخ العامرية اللي يفتخر بيه الجنوب كله... يا إما تكون دي النهاية.
اتسعت عيناها خوفًا، وقالت بسرعة:بعد الشر عنك يا ولدي نهاية إيه اللي بتتكلم عنها في إيه فهمني ..
أطرق سلطان برأسه للحظة، ثم رفع عينيه إليها وقال بجدية: النهارده صبري والمطاريد والرحالة هيهجموا على البلد كلها.
وعاوزين رقبتي أنا وعامر، والشيخ عارف وهارون والشيخ هاشم...
وبعدها يفرضوا حكمهم على البلد كلها، وياخدوا الأرض واللي فيها.
شعرت هانم وكأن الأرض تميد بها. خفق قلبها خوفًا على ولديها، وعلى ارضها وبلدها ، لكنها تماسكت سريعًا، فلم يكن من حقها أن تزيد خوفه، وهو مقبل على يوم كهذا.
شدت على يده وقالت بنبرة قوية: لا عاشوا ولا كانوا يا ولدي دول فاكرين نفسهم مين علشان يطمعوا في العامرية وأهلها؟
ثم اعتدلت في جلستها، ورفعت رأسها بكبرياء وهي تضيف: إنتوا ولاد صفوان العامري... رجالة من ضهر راجل، ومفيش مخلوق من الكلاب دي يقدر عليكم ولا يقدر ياخد أرضكم منكم. اطمن يا ولدي، دارك في أمان، ومراتك وابنك في عينيّ. اتوكل على الله وما تشيلش همنا، ركز في اللي إنت رايح له بس.
توقفت قليلًا، ثم عادت تمسك يده بكلتا يديها، وقد بدأت نبرة صوتها تلين رغم محاولتها التماسك: بس توعدني تخلي بالك من نفسك ومن أخوك، وترجعوا لي سالمين، غانمين، راسكم مرفوعة. وايديكم غرقانه بدم الكلاب دول ، أنا مش عاوزة غير أشوفكم داخلين عليّ بالسلامة.
انحنى سلطان وقبّل يدها، فمالت عليه واحتضنته بقوة، تدفن وجهها في صدره وتحارب دموعًا كانت تهدد بالانهمار.
ربت على ظهرها بحنان، بينما سمعها تهمس: روح يا ولدي... قلبي وربي راضيين عنك. ربنا يحرسك ويحفظك ويردك ليا مجبور الخاطر، بإذن الله.
ابتعد عنها قليلًا، وقبّل رأسها قائلًا: ربنا يخليكي ليا يا أمي وما يحرمنيش من دعواتك.
ثم نهض وأضاف: هطلع أشوف حور قبل ما أمشي.
خرج من الجناح، بينما ظلت هانم تتابعه بعينيها حتى اختفى عن نظرها، ثم رفعت كفيها إلى السماء، ولم يتوقف لسانها عن الدعاء واخيراً سمحت لدموعها بالنزول .
في جناح سلطان...
دخل سلطان ، فوجد حور جالسة على الأريكة، تحمل كتابًا بين يديها وتقرأ باهتمام.
اقترب منها بهدوء، وانحنى يقبل رأسها، ثم سألها بابتسامة خفيفة:حور السلطان بتعمل إيه؟
رفعت حور عينيها إليه وابتسمت: بقرأ كتاب عن تربية الأطفال.
ظهرت ابتسامة بسيطة على شفتيه، وجلس إلى جوارها قائلًا بملاطفة: وإنتِ محتاجة تقري كتاب عن تربية الأطفال ليه؟ الحنان اللي عندك ده يربي عشر عيال مش عيل واحد.
ضحكت حور، ثم أغلقت الكتاب ووضعته جانبًا، لكن ابتسامتها خفتت حين تأملت ملامحه. كان وجهه يحمل شيئًا لا تستطيع تجاهله، ونظراته تهرب منها كلما حاولت الإمساك بها.
سألته بهدوء:مالك يا سلطان فيك إيه؟
أشاح بنظره عنها وأجاب: مفيش يا حور، دماغي مشغولة شوية بالشغل.
ظلت تنظر إليه، ثم قالت بنبرة عتاب رقيقة:
وعلشان مشغول بالشغل بتهرب بعيونك مني ليه مالك يا حبيبي؟
لم يجبها...بل جذبها إلى صدره وأحاطها بذراعيه بقوة، حتى استقرت بين ضلوعه.
كان يستطيع مواجهة صبري ورجاله، ولم يكن يخشى كثرتهم ولا أسلحتهم بقدر ما كان يخشى شيئًا واحدًا؛ أن يحدث له مكروه، فيترك حور وحدها، ويُحرم من رؤية طفله الذي لم يأتِ إلى الدنيا بعد.
أغمض عينيه، وشدد احتضانه لها، ثم همس بالقرب من أذنها: أنا بحبك أوي يا حور... بحبك أكتر من أي حاجة في الدنيا.
ابتعدت حور قليلًا، ورفعت وجهها إليه، تتأمل عينيه قبل أن تجيبه بابتسامة غلبتها العاطفة:وأنا كمان بحبك يا سلطان قلبي.
نظر إليها طويلًا، وكأنه يحاول أن يحفظ ملامحها في ذاكرته، ثم مال نحوها وقبّلها قبلة طويلة حملت من الشوق والخوف والاحتياج ما عجزت الكلمات عن التعبير عنه.
كانت حور تبادله مشاعره، بينما كان هو يتشبث بها وكأنه يريد أن يختزن من قربها ما يكفيه لمواجهة كل ما ينتظره وتحولت القبله للقاء عاصف استسلم له كلاهما يسروق بضع لحظات قبل المواجهه....
بعد فترة، نهض سلطان من جانبها متجهًا إلى الحمام، بينما بقيت حور في الفراش تنظر الي ظهره المشدود بقلق قبل ان يختفي داخل الحمام ....
بعد مدة خرج سلطان من الحمام وجدها واقفة في انتظاره، وقد بدا على وجهها إصرار واضح.
توقف أمامها وسألها: مالك واقفة كده ليه؟
رفعت عينيها إليه وقالت مباشرة: أنا عاوزة أعرف مالك في إيه.
تنهد سلطان بهم لكنها لم تترك له فرصة للمراوغة، وأكملت: ومن غير لف ولا دوران، وما تقوليش مفيش حاجة... بقالك أكتر من أسبوعين مش على طبيعتك. بتصحى بدري، وبتقضي اليوم كله بره، وكل ما أسألك بتقولي شغل. أنا مراتك يا سلطان، ومن حقي أعرف إيه اللي شاغل بالك.
ظل صامتًا للحظات.
كان يصارع نفسه؛ هل يخبرها بالحقيقة أم يتركها بعيدة عن كل ما يحدث؟ كان يعرف أنها لن تقبل بسهولة أن تظل في الظلام، لكنه لم يكن يريد أن يزرع الرعب في قلبها.
وقبل أن يحسم أمره، سُمع طرق على باب الجناح، أعقبه صوت الخادمة من الخارج:
شيخ سلطان... عامر بيه وياسين بيه جاهزين تحت ومستنيين حضرتك.
التفتت حور إليه بسرعة، وقد التقطت من النداء ما زاد شكوكها.: عامر وياسين مستنيينك ليه رايح فين يا سلطان؟
اقترب منها، وضمها إلى صدره للحظات، ثم أبعدها برفق وأمسك وجهها بين كفيه، ينظر مباشرة إلى عينيها.
قال بصوت ثابت: أنا رايح أثبت لنفسي وليكي وللجنوب كله إني ابن صفوان العامري، وإني جدير بالمكان اللي اتحطيت فيه.
عقدت حاجبيها بعدم فهم: ـ أيوه يعني رايح فين أنا مش فاهمة حاجة.
أجابها دون أن يزيح عينيه عنها: رايح آخد حقي وحقك من صبري وكلابه.
تجمدت ملامح حور، وشعرت بالدماء تنسحب من جسدها ....
حدقت فيه غير مصدقة، ثم خرج صوتها مرتجفًا:إنت هتروح لصبري؟
ليه يا سلطان؟ إنت لسه حاطه في دماغك انساه يا سلطان، علشان خاطري انساه... وعلشان خاطر ابننا.
وضع سلطان كفه على بطنها، ونظر إليها بعينين امتلأتا بالعزم، وقال: علشان خاطر ابننا أنا لازم أنهي الحكاية دي يا حور. لازم انهي صبري واللي معاه ، علشان لما ابننا ييجي الدنيا يلاقي أبوه واقف على أرضه، رافع راسه، عاوزه يكبر وهو عارف إن أبوه ما فرطش في حقه ولا في حق بلده.
ولو مت يبقي عارف اني مت وانا بدافع عن ارضي وارضه ...
ارتجفت شفتاها، وامتلأت عيناها بالدموع وهي تقول: اسكت! أوعى تجيب سيرة الموت يا سلطان.
أنا مش مستعدة أخسرك... مش مستعدة أعيش من غيرك. ابعت أي حد غيرك، كلم البوليس يقبض عليه، اعمل أي حاجة، بس بلاش تروح إنت... علشان خاطري.
تأملها سلطان طويلًا، ثم قال بنبرة تحمل شيئًا من العتاب: ويرضيكي الشيخ سلطان ما يقومش بواجبه ويقطع راس الافعي اللي عاوزه تغرس سمها في ارضنا وبلدنا وتسممها .//
هزت رأسها وسط دموعها:أنا خايفة عليك يا سلطان.
اقترب منها أكثر، وأمسك يديها قائلًا: وأنا عمري ما عرفتك خوافة يا حور.
فين البنت الشجاعة اللي ركبت فرسها في نص الليل وطلعت الجبل، ووقفت قدامي تتحداني؟
فين البنت القوية اللي وقفت قدام أي حد حاول يقلل منها أو يحاربها أو يهدم بيتها وحياتها؟
ابتسم ابتسامة صغيرة، ثم أكمل بصوت أكثر دفئًا: أنا عاوزك دايماً قوية زي ما إنتِ. أنا هكون بره الدار بدافع عن أرضي وبلدي، وإنتِ هنا بتحافظي على عرضي وبيتي. إنتِ ضهري وسندي يا حور، واللي بقوى بيه بعد ربنا... بلاش تكوني إنتِ نقطة ضعفي.
رفعت حور عينيها إليه، تحاول أن تجمع ما تبقى من قوتها ، ثم قالت من بين دموعها:
حاضر يا سلطان هقوي علشان خاطرك. بس توعدني إنك ترجع لي.
وضعت يدها على صدره، وأكملت بصوت انكسر رغم محاولتها التماسك: ـ أنا مش هقدر أعيش من غيرك.
ضمها سلطان إليه بقوة، وقبّل رأسها، ثم قال:ـ أوعدك إني هرجع لك يا حور... بس لو أمر ربنا نفذ، اعرفي إنه غصب عني، وإنك كنتِ آخر وأغلى حاجة في قلبي.
وضعت كفها على فمه بسرعة، وكأنها تمنعه من إكمال تلك الكلمات، وقالت بحزم اختلط بالبكاء: ـ هترجع لي... مش هقبل غير بكده. هترجع علشاني وعلشان ابننا، فاهم يا سلطان؟
نظر إليها، ثم ابتسم ابتسامة صغيرة وقبّل راحة يدها: أمرك يا حور السلطان.
ابتعد عنها واتجه إلى خزانة ملابسه، فاقتربت منه دون أن تنبس بكلمة، ووقفت إلى جواره تتابعه وهو يرتدي ملابسه ويستعد للخروج.
ارتدى بدلته، ثم تناول سلاحه وتفقده قبل أن يضعه في مكانه.
وحين انتهى، التفت إليها، فاقتربت منه وعدلت ياقة سترته بيدين مرتجفتين، ثم رفعت وجهها إليه.
لم تقل شيئًا، فقط نظرت في عينيه طويلًا.
فأمسك يدها وقبّلها، ثم مال نحوها وقبّل جبينها.: خلي بالك من نفسك يا حور.
أومأت له والدموع تلمع في عينيها: وإنت كمان...هستناك يا سلطان...
ابتسم لها، ثم استدار وغادر الجناح.
ظلت واقفة مكانها، تتابع خطواته حتى اختفى خلف الباب، وحين سمعت صوت خطواته تبتعد في الممر، رفعت كفيها إلى السماء، وانهمرت دموعها أخيرًا.
ـ يا رب... احفظهولي، وردّه ليا سالم. يا رب ما تكسرش قلبي فيه، ولا تحرمني منه... ده حبيبي وسندي وأبو ابني.
أما سلطان، فكان قد وصل إلى أسفل الدرج، حيث ينتظره عامر وياسين.
رفع رأسه، واستعاد ملامحه الصلبة التي يعرفها الجميع، ثم تحرك نحوهما بخطوات واثقة.
لقد حان وقت المواجهة... ولم يعد هناك مجال للتراجع.
