رواية زوجاتي الثلاثه الفصل الثالث بقلم جمانه السعيدي
مصطفى....بعد كلام امي وحجي الناس عليه
والسؤال الي دمرني دمار ليش ماعدكم اطفال
بديت افكر فعليا بلزواج
من حقي ازوج ويصير عندي اطفال
اني مو زغير والعمر جاي يركض هاي خمس سنوآت خلصن واني انتظر
شكد بعد انتظر
اريد ولو طفل واحد
المن عايش اني المن اشتغل هذا الخير كله المن
بديت افكر شلون اكدر افاتح ميسون بهذا الموضوع بدون ما تزعل
اني ماكدر على زعلها لان احبها
ميسون صارت جزء مهم من حياتي وماكدر استغني عنها
بهاي الفتره فتح ولد بلركن مال دائرتنا يبيع فواكه
شغلات نظيفه وشي مرتب والأهم يقبل اختار بكيفي
كل يوم امر علي اخذ منه فواكه للبيت
الولد من العماره جاي يسترزق هنا
تقريبا كل الموضفين يشترون منه لان يجيب شغلات حلوه
اشتريت منه
سعدون.....اليوم مبين مالك خلك
مصطفى....اي ولله اكو شغله مخربطه وضعي
سعدون....الله يريح بالك
مصطفى....أمين ادعيلي الله يرزقني طفل حتى ارتاح
سعدون...انت ماعندك اطفال
مصطفى...اي هاي السنه الخامسه
سعدون...الله كريم انشاء الله رب العالمين ما ينساك ابد
(( سعدون اله علاقه بلزوجه الثالثه ))
مصطفى...هلكد مااهم بهذا الموضوع وشاغل تفكيري
حتى وضعي كله تغير
وميسون بدت تحس بهذا التغير
ميسون....شكو هليام متغير وشكلك تعبان
مصطفى.. ماكو شي
ميسون...بداعتي عليك احجي قابل مااعرفك
مصطفى.....مااريد احجي خاف اضوجين
ميسون.... اضوج مستحيل اضوج منك انت احسن شي صار بحياتي كلها
وجنت اتمنى تكمل هاي الفرحه بطفل
لان انت انسان ما تتعوض ابد بس مابيدي شي
مصطفى...مادام فتحتي هذا الموضوع اريد احجي شي
بنفسي
ميسون...احجي اسمعك احجي اي شي يجي على بالك
لا اضم بكلبك اي شي
اخاف عليك من الحزن والضوجه
مصطفى... تحبيني
ميسون....ولله كلمة الحب زغيره وماتكدر تعبر عن احساسي اني مو بس احبك اني اموت عليك
ومستحيل اتخيل حياتي من دونك ابد
مصطفى....زين اني اريد اسوي شي بس خايف اضوجين مني
ميسون...مااضوج منك اني احبك واريد مصلحتك
مصطفى...واني هم احبج الدرجه مرات ااكول
شلون الدنيا ضمتها اليه وشلون جابتها كبالي
انت كامله من كلشي والكمال لله تعالى
ميسون....كول اسمعك اذا شي بي راحتك اني موافقه
مصطفى....شي يخص الاطفال
ميسون....شنو الشي الي يخص الاطفال اذا اكو شغله تحل مسئلة الاطفال مستعده امشي وراك الاخر الدنيا
امشي واني مغمضه
جمانه السعيدي
مصطفى.....اني اكول مادام فات كل هذا الوقت ولاصار عدنا اطفال يمكن اني وياج ما مقسوم يصير عدنا طفل
اني ااكول ازوج حتى يصير عدنا اطفال
اطفالي هما اطفالج
بقت تباوع عليه وسكتت مثل الي انصدمت من كلامي
ما متوقعه اني ممكن بيوم من الايام ازوج عليها
ميسون....تحجي صدك
مصطفى....مو قصور بيج اني لو ادور الدنيا كلها مالكه وحده نفسج ابد
بس عاجبج وضعنا هذا وواحد مكابل الثاني
نشتغل وعدنا فلوس وعدنا بيت وما ناقصنا شي
بس إلى متى
شنو النهايه شلون راح نكمل باقي عمرنا
ميسون...تريد تزوج عليه علمود الاطفال
ومنو كال اذا ازوجت راح يصير عندك اطفال
مصطفى...نجرب ما خسرانين شي
ميسون...وجيب وحده ثانيه تشاركني بيك وجرب
واني شنو ذنبي اعيش احساس الالم
ليش تريد تكسرني اني مابيه شي وكل التحاليل تكول
اني مابيه شي
مصطفى....اني مابيه شي وانتي مابيج شي
وشنو الحل العمر جاي يركض
الي بعمري سجلو جهالهم بلمدرسه
اني مراح اتغير عليج ولا راح انقص عليج شي
تبقين بيتج معززه مكرمه وهيه تسكن بيت ثاني
ميسون...هذا حجي وبعدين يصير غير حجي
من يصيرون الجهال الطبيعي تتغير عليه الحياة والضروف تخليك تتغير
مو بكيفك راح تنجبر تتغير هذا اذا ما شرطت عليك
اطلكني وتشمرني بلشارع
مصطفى....ليش تصعبين الحياة علينا ثنيبنه خلي ازوج
وبعدين اذا تغيرت اللج حق تسوين اي شي يعجبج
ميسون....بس اني عندي حل احسن
مصطفى...شنو الحل
ميسون...اعوفلك البيت تزوج براحتك ليش تتحمل مسؤليتي ومسؤولية بيت ثاني
مصطفى...شنو قصدج
ميسون....طلكني وعيش حياتك انت تستاهل يصير عندك اطفال
مجنت متوقعه نفسي هلكد ثكيله عليك
راح اعوفلك كلشي عيش حياتك واني اعيش حياتي
مصطفى.....مستحيل شنو تعوفيني
ميسون....لا مو مستحيل انت لمن فكرت تزوج عليه
كان الموضوع سهل عليك
سهل تتخلى عني علمود موضوع مالي ايد بي
كلشي مقدر ومكتوب من رب العالمين
ليش تعاقبني علي
مصطفى.....بس فكري زين أولادي هما اولادج
ميسون...واني كلت كلمتي الاخيره طلكني وعيش حياتك
مستحيل اقبل اصير اضافه على حياتك
لو اكون كلشي لو ولا شي
مصطفى...واني مراح اطلك
ميسون...حياتي وياك متوقفه على هذا الزواج
تزوج اطلكني ماكو مجال للنقاش بهذا الموضوع ابد
جمانه السعيدي
مصطفى..عافتني وراحت نامت بلغرفه للثانيه
زعلت عليه
ثاني يوم كعدت لكيتها نايمه وقافله الغرفه عليها
يوميه تكعد قبلي وتحضر الريوك وتحضرلي الحمام
نتريك ونطلع للدوام سوه
دكيت الباب ما تقبل ترد عليه
مصطفى...ميسون يله نروح للدوام
ميسون...اليوم مااداوم تعبانه
مصطفى...افتحي الباب شبيج تعبانه اخذج للمستشفى
ميسون...لا اريد انام
عفتها ورجعت بدلت ملابسي حتى اروح للدوام
مصطفى...اعرف زعلانه عليه بس هذا أمر لابد منه
تزعل فتره وترجع ترضا بلامر الواقع
رحت الامي قبل لا اطلع للدوام
امي...هله صباح الخير
مصطفى...صباح الخيرات
امي....شعجب اليوم جاي الصبح شلون عافتك ميسون
مصطفى...ميسون اليوم زعلانه
امي....ليش
مصطفى.....لان كتلها ازوج
امي.....ميخالف ميسون تحبك فتره وترضا
بس انت لا ترجع بكلامك مو تشوفها زعلانه وتبطل
مصطفى....محد يعرف اني شلون محتاج يصير عندي طفل
بعد مااكدر اتحمل اكثر
امي....يوم يومين وترضا بس انت خليها كدام الأمر الواقع
مصطفى....وين الكه بنيه تقبل تنزل على ضره
امي...لا تخاف اني صار فتره ادور على عروس
عندي وحده تقبل وتكيف
مصطفى...من هاي الي تقبل وتكيف
امي...الهام بت حجي حمود هاي اقاربنا وخوش بنيه
عمرها يجوز ٣٠ وبعدها مامزوجه
مصطفى...تقبل
امي...تكيف وصلت ٣٠ ومامزوجه بعدين انت شنو ناقصك حلو مرتب موضف عندك املاك
قابل تلكه واحد احسن منك
مصطفى...تمام
امي...اروح احجي ويا اهلها واشوفهم شنو طلباتهم
مصطفى...اي روحي
مصطفى...طلعت للدوام بس كلش ضايج
ضايج على ميسون مااريدها تزعل مني
ليش ما تقدر وضعي ليش ما تساعدني حتى يصير عندي اطفال
اني مأكول هيه السبب
بس هاي حكمت رب العالمين
وما بيدنا نغير شي
بقيت طول الدوام عيني على مكتبها
مكانها خالي شلون خاف يطول زعلها
خاف تعوفني من صدك
رجعت للبيت لكيتها واكفه بلمطبخ شافتني دخلت
بس مااهتمت مااهتمت الوجودي
قربت عليها
حضنتها من ورا وبستها من جتفها
مصطفى.....ليش الحلو زعلان
ميسون...على اساس يهمك زعلي
مصطفى...ماتعرفين اني شكد احبج
ميسون...مبين الحب من هاي تريد تزوج عليه
مصطفى...عفتها وكفت بصفها
عندج حل ثاني كولي مستعد اسمعج
ميسون.....الحل نقبل بقمست رب العالمين ونسكت
مصطفى....فات خمس سنوات شكد ننتظر بعد
ميسون...العمر كله مادام تحبني واحبك
مصطفى...مااكدر اتحمل أكثر واعيش على حلم يجوز يتحقق ويجوز لا
ميسون...خلص كلمن يعيش حياته
مصطفى...بس اني احبج
ميسون....شنو فايدة الحب وانت تفكر تزوج وحده غيري
مصطفى....بعد فتره راح تشوفين هذا القرار الصحيح
للي مثل وضعنا
اني مااعرف اضم عليج شي
امي اليوم راحت تخطبلي اني مراح أتراجع عن هذا القرار
بس سمعت هاي الكلمه نزلن دموعها
مسحتهن باوعت عليه وحجت بعبره
ميسون...ولله سويتها صدك
مصطفى.....هذا الموضوع اني حسمته خلاص
ميسون...واني راح اطلع من هذا الببت دزلي ورقة طلاكي
مصطفى...دخلت الغرفه اسمعها تبجي بصوت عالي
بجيها مرد كلبي مرد
بس خلاص ماكدر أتراجع بعد لازم اكمل
ااكيد تزعل فتره وبعدين تقبل بلامر الواقع
اخذت ملابسها وطلعت كدامي وحتى ماكدرت امنعها
دخلت للغرفه طفيت الضوه وتمددت حتى ملابسي مانزعتهن
بقيت احوس فكره اجيبني وفكره توديني
ساعه اكول اروح ارجعها واعوف فكرت الزواج
وساعه اكول وين تروح اكيد ترجع
لان مراح تلكه واحد يحبها بكدي
اذا تراجعت هسه بعد مااكدر اخطي هيج خطوه مره ثانيه
اكمل وازوج بلكت يصير عندي طفل
زعل ميسون اكدر اعالجه بس موضوع الاطفال شلون اكدر
اعالجه
جمانه السعيدي
بعدني كاعد واتكلب
صارت الدنيا مغرب
اندكت الباب طفرت ااكيد هاي ميسون رجعت
اعرفها تحبني ومستحيل تعوفني
فتحت الباب امي
مصطفى....هله يمه
امي.....هله طالع شنو
مصطفى....لا ماطالع بعدني مانزعت ملابس الدوام تعاي اتفضلي
امي... غمزتلي تجي توصلني للبيت
مصطفى.....تعالي ماكو احد ميسون راحت زعلانه بيت اهلها
امي....عليمن زعلانه متعافيه عايفه هذا الخير كله ورايحه زعلانه
مصطفى...تعاي ادخلي حتى غده بعدني ما تغديت
دخلت امي ...بعدك ما تغديت ليش
مصطفى....مااشتهي
دخلت امي بوجها شغلت الطباخ وحمت الاكل وصبت
امي...تعال اكل
مصطفى...كعدنا اني وياها ناكل
امي.. عوف ميسون يوم يومين شهر وترجع وين تلكه واحد مثلك
اليوم اني رحت خطبت الهام امها وافقت والبنيه كيفت
بس بعد يسئلون ابوها و يرجعولنا خبر
مصطفى.... هيج البنيه وافقت بسرعه
امي....وين تلكه واحد مثلك عمرها ٣٠ وما معرسه
مصطفى...خير انشاء الله
امي...من يكمل عرسك اروح ارجع ميسون للبيت
مصطفى...انشاء الله تقبل ترجع
امي....ترجع لا تخاف ميسون تحبك ترجع
مصطفى.......الله يطمنيج
شكرا لزيارتكم عالم روايات سكيرهوم
