رواية مجهول النسب الفصل الثالث 3 بقلم ياسر عوده

 


رواية مجهول النسب الفصل الثالث بقلم ياسر عوده



مر حوالي شهرين على اللى حصل، حاولت انسي كل حاجه من اللى حصل بس الموضوع كان مستحيل، وفي يوم جالي اتصال على تليفوني من رقم غريب، ولما رديت على الاتصال وقتها كان المتصل ضابط شرطه وقالي:
-الاستاذ كريم معايا؟
-ايوه يا فندم.
-انا عاوزك تيجي لقسم الشرطه.
اتخضيت وقتها وقولتله:
-خير يا فندم، حصل ايه؟
-لا مش هينفع نتكلم هنا، لازم تيجي حالا.
-حاضر يا فندم.
وروحت لـ قسم الشرطه، ولما قابلت الضابط عرفته، كان هو نفس الضابط اللى قابلني لما قدمت البلاغ ضد هيام، ولما قعدت لقيته بيقولي:
-من فتره انت جيت يا استاذ كريم وقدمت بلاغ ضد السيده هيام واللى كانت مراتك وقتها بتتهمها بالزنا، مظبوط؟
-ايوه يا فندم، واتحكم عليها بعد ما الطب الشرعي اكد البلاغ بتاعي، وكمان انا طلقتها في المحكمه.
-تمام دا اللى حصل فعلا وقتها، وانا جايب بخصوص الموضوع ده.
-حضرتك انا مش فاهم حاجه خالص، الموضوع خلص.
-اصبر عليا يا استاذ كريم، في ادله جديده ظهرت في القضيه، وانا جايبك مخصوص علشان تشوف الادله دي.
ووقتها لقيته بيوريلي فديو كانت فيه هيام مراتي، اقصد طالقتي، كانت نايمه علي سرير مستشفى، ودخل شخص لـ اوضتها وابتدي يقلعها هدومها وعمل معاها علاقه، وقتها قولت للضابط:
-ايه اللى انت بتورهولي ده؟، انت بتوريني خيانتها وبتعرفني مين عاشقها؟
-انا مش جايبك علشان اوريك العشيق زي ما انت بتقول، بالعكس انا جايبك علشان اقولك انت مراتك طلعت بريئه من كل الاتهامات.
-بريئه ازاي وانت بتوريني فديو ليها وهي في الوضع ده؟
-خد شوف الفديو دا كمان وبعدها هشرحلك.
وفرجني على فديو تاني لنفس الشخص بيعمل علاقه مع وحده تانيه، وبعدها الضابط قالي:
-مع اني المفروض مافرجكش على الفديوهات دي من الاساس، بس انا حبيت اصلح غلط حصل وابراء وحده من تهمه هي ماعملتهاش.
-انا مش فاهم حاجه.
-الشخص اللى في الفديو دا ممرض اسمه جابر، والمكان مستشفي ومراتك والست التانيه ماكنوش في وعيهم، كانوا تحت تأثير مخدر ومش حسين باللى بيحصل معاهم، واللى حصل مع مراتك حصل لما كانت محجوزه في المستشفي من كام شهر لما تعبت لما كانت في شغلها واتحجزت فتره في غرفه العنايه المركزه.
-انت عاوز تفهمني انه اعتدي عليها من غير ما هي تحس يعني.
-بقولك يا استاذ كريم كانت تحت تأثير مخدر، بنج بمعني اصح.
كنت حاسس ان الدنيا بتلف بيا، وماكنتش عارف اقوله ايه، ولقيته بيبتدي يحكي كل اللى حصل من البدايه وقالي:
-البدايه لما لقيت في وحده دخلت القسم وطلبت انها تقابلني، اسمها حسنيه، ولما قابلتني لقيتها بتقولي:
-انا جايه اقدم بلاغ يا فندم.
-بلاغ ضد مين؟
-ضد جوزي يا فندم.
-طيب قوليلي عمل ايه، ضربك ولا طردك من الشقه ولا استولي على دهبك؟
-لا يا فندم، هو ماعملش كل ده، هو عمل حاجه انا مستحيل اقبلها على نفسي او اختي او بنتي، وعلشان كده انا جيت ابراء زمتي قدام ربنا وابلغ عنه.
وقتها حسيت ان الموضوع مختلف، وقولتلها:
-ممكن تشرحيلي ايه الحكايه علشان افهم.
-حضرتك انا اسمي حسنيه، وشغاله ممرضه في مستشفي، ومتجوزه من واحد اسمه جابر، وهو كمان شغال ممرض في نفس المستشفي، بس في قسم العنايه المركزه.
-تمام، ايه المشكله؟
المشكله اني لقيت الفديوهات دي على تليفونه.
وابتديت تفرجني على الفديوهات، ومن ضمنها انا شوفت مراتك يا استاذ كريم، وقتها قولتلها:
-انا عاوز اعرف كل التفاصيل، وايه حكايه الفديوهات دي.
-انا عمري ما فكرت اني ادور وراه، بس هو بقاله فتره مش مظبوط خالص، بيتصرف تصرفات غريبه، بيدخل اوضه النوم وبيقفل على نفسه الباب وماكنتش فاهمه في البدايه هو بيعمل ايه، بس لما حاولت اعرف لقيته ماسك تليفونه ومركز فيه وبيتفرج عليه بطريقه غريبه.
-يعني ايه بطريقه غريبه.
وقتها حسيت انها محرجه وقالت:
-حسيت انه بيتفرج على افلام اباحيه، دا كان واضح من الطريقه اللى بيتفرج بيها على التليفون، وعلشان اتأكد من اللى شكيت فيه، كنت محتاجه اخد تليفونه واعرف جواه ايه، اصلي ماكنتش مصدقه ان جابر ممكن يعمل الحكايه دي ويتفرج على الافلام دي، وفعلا في يوم خليته نايم وسحبت التليفون من جنبه، وكمان فتحته عن طريق بصمه صباعه ولما عملت كده وخرجت بعيد عنه واتفرجت على التليفون، وقتها شوفت الفديوهات دي، واتصدمت لما شوفتها طبعا، اصل انا ممرضه وفهمت ان اللى حصل دا ماكنش بموافقه المريضات، لا واضح اوي انهم مش في وعيهم، واضح انهم تحت تأثير مخدر او بنج، وعلشان كده انا نسخت الفديوهات دي عندي على التليفون بتاعي، وبدون تفكير انا جيت ابلغ عنه.
-طبعا انا بشكر حضرتك على التصرف بتاعك دا، بس انا محتاج اوجهلك سؤال مهم.
-اتفضل؟
-انتي ازاي ماترددتيش لحظه انك تيجي تبلغي عن جوزك، انتي متخيله الفضيحه اللى هتلاحقك انتي وعيالك؟
-اهو انا جيت ابلغ عنه علشان خاطر بناتي يا فندم.
-مش فاهم، تقصدي ايه؟
-انا معايا 3 بنات، تخيل لو انا فكرت بالطريقه اللى حضرتك فكرت فيها اكيد وقتها ماكنتش هاجي ابلغ، بس انا فكرت بطريقتي انا، لو سكت وقتها هو مش هيتعاقب، ووقتها بناتي اللى كانوا هيدفعوا التمن، اصل التمن لازم يتدفع لو هو مادفعهوش هيدفعوه ذريته، اما بناتي او انا، علشان كده انا جيت ابلغ عنه وادفعه التمن على الى عمله.
طبعا شكرتها وطلبت من رجالتي تحريات كامله عن جابر ده، ولما فرغنا جميع كاميرات المستشفي واتأكدت ان السيدات اللى اتصوروا فعلا دخلوا المستشفي في قسم العنايه المركزه، وهو كان موجود وقتها، وكمان لما المعمل الجنائي اكدلي ان الفديوهات سليمه وماحصلش فيها أي تلاعب، وقتها اصدرت امر من النيابه للقبض على جابر علشان احقق معاه.
لما قبضت على جابر وجه قعد قدامي، في البدايه انكر كل حاجه، وحتى لما واجهته بالفديوهات انكرها كلها، بس لما واجهته بأقوال مراته وبباقي التحريات فهم انه خلاص مافيش في ايده حاجه يعملها، وابتدي يحكي وقال:
-كان عندي احلام زمان لما كنت صغير في وقت المراهقه اني اتجوز اكتر من وحده، بس لما كبرت واتصدمت بأرض الواقع، لما حبيت اتجوز ماخترتش البنت الجميله اللى كنت اتمني اتجوزها، واخترت وحده عاديه اوي، اخترت وحده بتشتغل معايا في نفس المستشفى علشان هتساعد في مصاريف البيت، وطبعا انا اقصد بكلامي ده حسنيه، واللى كانت عاديه ويمكن اقل من العاديه.
-ماحدش اجبرك على الجواز منها لو ماكنتش عجباك او لو ماكنتش بتحبها؟
-الظروف هي اللى اجبرتني يا فندم، انا ماكنش عندي الامكانيات اللى تخليني اتجوز من وحده جميله مش بتشتغل، وكمان انا نفسي ماكنتش الشاب الوسيم اللى ممكن يعجب أي بنت وخلاص، ومش بس كده انا اضطريت اتجوز وحده اكبر مني بـ خمس سنين، من الاخر كده اللى لقتها قدامي وقبلت بيا بظروفي اللى كانت سيئه اوي.
-بردوا مش مبرر، بس مش دا موضوعي دلوقتي، كمل ايه اللى حصل بعد كده.
-اللى حصل اني كنت مقهور يا فندم، انا واحد اتجوز وحده مش جميله وكمان اكبر منه ومخلف منها كمان، في الوقت اللى كنت بشوف فيها اللى اجمل منها بكتير، زي الممرضه اللى اسمها نسرين واللى اتعينت من كام سنه في المستشفي.
-مين نسرين دي وايه حكايتها؟
-نسرين دي الحلم اللى كنت بحلمه ولقيته بيتحقق قدامي، اول لما اتعينت وعيني جت عليها حسيت ان هي دي البنت اللى طول عمري بحلم اتجوزها، كانت جميله بطريقه صعب تتوصف، وكانت مبتسمه لـ كل الناس، وكل اللى شغالين في المستشفى عينه عليها من الحارس اللى واقف على باب المستشفي، لغايه مدير المستشفى نفسه، وحتى المرضا اللى كانوا بيدخلوا المستشفى لما بيشفوها كانت عينيهم بتفضل عليها طول ما هي في المكان، وانا اول لما شوفتها اتمنيت تبقى ليا، وحلمت بيها لوقت طويل اوي، بس اتصدمت في النهايه لما عرفت ان واحد من الدكاتره اللى في المستشفي اتقدملها وخطبها، طبعا دي جوازه أي ممرضه تتمناها، ان دكتور يتجوزها، وبعد كام شهر اتجوزته وقعدت من الشغل، بس بعد سنتين من اللى حصل اتصدمت لما شوفتها قدامي، والصدمه الاكبر انها كانت اتطلقت، وقتها حسيت ان الفرصه جتلي وحاولت اتقرب منها، اتعاملت معاها باهتمام وفي الوقت دا مراتي كانت حامل وقاعده من الشغل، ودا سهلي اني اقرب من نسرين اكتر واكتر، ولما في يوم صارحتها بشعوري نحيتها لقتها ردت عليا وقالت:
-انت اتجننت، ازاي تتخيل اني ممكن ابصلك حتي، يعني بعد ما كنت متجوزه دكتور هتجوزك انت؟
وقتها انا قررت اني انتقم منها، ودا اللى عملته فعلا، اول حاجه انا اعتذرتلها عن اللى عملته، وفهمتها اني ماكنتش اقصد ومع الوقت اتقبلت اعتذاري، وفضت مستني الفرصه المناسبه وكنت في أي فرصه بضيف للمشروب اللى بتشربه نوع من العقاقير اللى بيعملها تسارع في ضربات القلب، لغايه لما في يوم تعبت واتحولت للعنايه المركزه، ووقتها انا اعتديت عليها وكنت مصور كل حاجه، وهي ماحستش بحاجه لاني كنت حطتلها بنج في المحاليل اللى كنا معلقنها ليها، ولما فاقت انا روحتلها وفرجتها على الفديو، كنت عاوز ازلها واكسرها، وقولتلها:
-اللى حصل دا عقاب ليكي على الكلام اللى انتيق ولتهولي قبل كده، ولو اتكلمتي مع أي حد هنشر الفديو دا في كل حته ومش هيفرق معايا ايه ممكن يحصل معايا بعدها.


شكرا لزيارتكم عالم روايات سكيرهوم

تعليقات