رواية جثث الحموات الفصل الثالث بقلم محمود الأمين
لسانه كان مش موجود.. المنظر كان صعب، ومفيش حد فينا متخيل حجم البشاعة اللي حصلت لمسعد دي، مين الشخص اللي بيمتلك القسوة دي ويقدر يعمل فعل زي ده؟
بس اللي اكتشفناه وقتها إن مسعد نفسه حركته مشلولة، مش عشان مربوط في كرسي، لا، إحنا بعد ما فكيناه وجينا عشان نقومه من على الكرسي وقع على الأرض، والحاجة الوحيدة اللي كانت بتتحرك في جسمه كله هي عينيه اللي كان بيعيط منهم بس.
طلبنا الإسعاف بسبب الن.زيف اللي حصل ده، واتنقل مسعد على المستشفى، ولكن لما فتشنا الشقة كانت فاضية، ما فيهاش أي حاجة تدل على وجود حد، وكل اللي قدرنا نعمله وقتها إننا نرفع البصمات اللي موجودة في المكان، واللي متوقع إنها تطلع بصمات مسعد بس.. أكيد اللي بيعمل كده مش هيغلط غلطة تافهة زي دي!
واتحركنا ورا عربية الإسعاف، ولما وصلنا المستشفى وتم فحص مسعد، الدكتور قال إن مسعد اتحقن بمادة بتعمل شلل في الأعصاب ومش بتخلي الشخص يعرف يتحرك من مكانه لمدة كبيرة، بس حالة مسعد كانت مختلفة شوية عشان اللي عمل فيه كده حقنه أكتر من مرة، لحد ما سبب تلف في الأعصاب، مش مجرد شلل أو خلل مؤقت، يعني مسعد هيفضل كده.
وطبعًا لما عرفنا الموضوع ده اتصدمنا، عشان إحنا كان عندنا أمل إنه لما يفوق من الحالة اللي هو فيها، على الأقل هيكتب اللي حصل على ورق وهنفهم منه مين اللي عمل كده؟!
ولكن بعد كلام الدكتور الموضوع كان صعب.. وبعد مرور 48 ساعة، في تليفون غريب وصلني كان من النيابة... وكيل النائب العام حسن الكردي طلب مني أروح على مكتبه لأمر ضروري، بس قال جملة في التليفون ما كنتش فاهمها.. أنا اتصلت بيك وطلبت منك تيجي بشكل ودي، وأتمنى إنك تيجي بدل ما الموضوع يبقى رسمي.
وبعد ما خلص كلامه قفل السكة، الصيغة اللي كان بيتكلم بيها كانت رسمية لأبعد الحدود، وده خلاني أروح على مكتب وكيل النائب العام حسن الكردي عشان أفهم منه في إيه بالظبط، ولما وصلت بدأ ما بينا الحوار التالي:
_ تعرف يا حازم، أنا مستحيل كنت أفكر إني أشك فيك للحظة، أنت رئيس المباحث والشخص اللي دايمًا قلبك على الشغل، وبتعمل تحرياتك وبتحقق في كل كبيرة وصغيرة، وعمرك ما فشلت في قضية، وعشان كده لما وصلتني الأدلة اللي عليك كنت مستغرب، ولما راجعت تفاصيل القضية نقطة نقطة اكتشفت إنك أنت الشخص اللي بندور عليه.. أنت الشخص اللي عمل كل حاجة.
= أنا مش فاهم أي حاجة، حضرتك بتقول إيه؟!
_ لسه هتستهبل؟ ده أنت عارف حسن الكردي كويس، وأنا مش عاوز أخد ضدك إجراء مش هيعجبك، وعشان تكون فاهم، أنت خلاص انتهيت، هتطلع من الخدمة وهتتحبس وهيطبق عليك القانون يا حازم.
= حسن باشا، أنا مش فاهم أي حاجة، بعد إذن حضرتك اتكلم وقول في إيه؟.. وإيه معنى كلامك ده؟
_ بص على التقرير ده وأنت هتفهم كل حاجة.. ده تقرير المعمل الجنائي والبصمات الخاص بالشقة اللي لقينا فيها مسعد.
....
مسكت التقرير وفتحته، وساعتها اتصدمت عشان اللي كانت في الشقة كانت بصماتي أنا، ده غير إن في حاجة في الأحراز تخصني، الدبلة بتاعتي، وعلى حسب ما مذكور في التقرير كان مكتوب إنها كانت موجودة في الشقة وملطخة بالد.ماء.. وإيد حسن الكردي ماسكة الدبلة في إيده وبيقول إن دي دبلتي، وساعتها كمل كلام وقال:
_ لما وصلنا التقرير ده ولقينا إن البصمات بصماتك أنت، والدبلة كانت موجودة في المكان، بدأت أراجع كل حاجة، كل خيط، والبداية كانت مع الحادثة اللي حصلت لمرات الأستاذ عمر ابن المجني عليها الأولى مدام نرمين.. عمر مراته اتوفت في حادثة عربية وكانت حامل، ومع انتشار الخلافات وقتها، في ظابط راح وحقق في الموضوع هناك.. والظابط ده كان أنت يا حازم.
يعني أنت كنت تعرف العيلة دي من الأول.. طيب المفاجآت خلصت لحد هنا؟ لا.. حفيد مدام عفاف المجني عليها في الجري.مة التانية واللي الطب الشرعي أثبت إنه اتق.تل، مين اللي كان بيحقق في القضية وقتها؟ أنت برضه يا حازم بيه.
ده غير إننا أصحاب من زمان، وأنا عارف إن علاقتك بوالدتك كانت متوترة شوية، وإنها كانت بتعاملك معاملة صعبة بعد وفاة والدك الله يرحمه، بس هل الدافع عندك كان نفسي ولا إيه بالظبط؟.. إيه الدافع ورا الجرا.يم دي يا حازم؟
أنا كنت مذهول من الكلام، مش عارف إيه اللي ودى بصمات الشقة ودبلتي اللي كانت موجودة هناك.. وأنا عارف إن التحريات دي صح، وإني أنا اللي كنت بحقق في الجريمتين دول فعلًا. الأولى اتحسبت ق.تل خطأ، والشخص اللي خبط مدام صفاء بالعربية طلع براءة، والتانية رغم وجود الجث.ة وسبب الوفاة اللي كان فيه شبهة جنائية، ولكن في النهاية القضية اتقيدت ضد مجهول.. كنت مش مصدق نفسي وحاسس إني بحلم.
النيابة استندت في اتهامها ليا على إن اللي ارتكب الجرا.يم دي هو شخص مريض نفسي، معندهوش أي عداوات مع حد من الضحايا، ولكن مشكلته كانت نفسية، شخص والدته كانت بتعامله بطريقة وحشة وحصله مشاكل نفسية بسببها، ولما وقع تحت إيده قضيتين حقق فيهم، واكتشف إن في كل قضية فيهم الأم كانت بتعامل ابنها بطريقة وحشة ودمرت حياته وتسببت في دخولهم لمصحة نفسية عشان يتعالجوا، فقرر ينتقم منهم عشان كده، وإنه أكيد.. ورغم إن هما عندهم حق في السيناريو اللي رسموه عشان يعرفوا مين هو الشخص ده؟!.. إلا إني كنت مظلوم، وكنت بفكر في مين الشخص اللي عمل كده وعاوز يلبسني الجرا.يم دي؟!
ولقيت نفسي بتحجز بأمر من النيابة، واتحولت من رئيس مباحث لمتهم في جرا.يم ق.تل.. وبعد 24 ساعة رجعت على النيابة مرة تانية، وكنت فاكر إنهم وصلوا لدليل براءتي.. ولكن أخدت في وشي الصدمة الأكبر عشان وكيل النائب العام حسن الكردي اتكلم وقال:
_ للأسف موقفك اتأزم أكتر يا حازم، لما عملنا تحريات مفصلة عنك اكتشفنا إن والدتك كانت مريضة زهايمر في الفترة الأخيرة قبل ما تتوفى، وإن سبب الوفاة هو تناول جرعة زائدة من العلاج الخاص بيها، وده اللي عملها مشاكل دخلت بسببها العناية المركزة، وبعدها بـ48 ساعة اتوفت.
ومع الاتهامات اللي بتدور حواليك، واضح إن الموضوع مش صدفة، وإنك أنت اللي عملت كده في والدتك قبل ما تعمل كده في مدام نرمين ومدام عفاف.. ويا عالم ارتكبت جرا.يم تانية ولا لأ يا حازم؟
= والدتي هي اللي أخدت العلاج لوحدها يومها، وهي اللي زودت الجرعة بسبب إنها كانت ناسية هي أخدت الدوا ولا لأ.. أنا كنت مقصر في حقها، ولكن والله ما أنا اللي ق.تلتها، هي ماتت بسبب النسيان.
....
النيابة كانت رافضة تصدق أي حاجة من كلامي، وخلاص كل حاجة كانت بتقول إن أنا اللي عملت كل ده، لحد ما حصلت حاجة هدمت كل التوقعات بتاعة النيابة.. والاستنتاجات كلها اللي استندت فيها على اتهامها ليا.
والحاجة دي كانت بلاغ.. بلاغ جديد بسبب صراخ طالع من شقة، وساعتها طلبت من وكيل النائب العام إني أروح معاهم، ورغم رفضه في البداية إلا إنه وافق في الآخر بسبب إصراري على الموضوع، واتحركنا على مكان البلاغ، ولما وصلنا هناك لقينا الجيران متجمعة قدام بيت.. وبيقولوا إن في صراخ ست خارج من جوه، ولكن هما مش عارفين مين هي الست دي؟!.. وإن الصوت سكت فجأة وهما خايفين، واللي كنت متوقعه إننا لما نقتحم البيت ده هنلاقي جث.ة جديدة ونفس التفاصيل تاني.. ولكن لما كسرنا الباب ودخلنا كانت في مفاجأة أكبر في انتظارنا.. والمفاجأة دي هي
شكرا لزيارتكم عالم روايات سكيرهوم
