رواية ورطة لقائنا الفصل الثالث
(٣)
- خطيبتك!
كان واقف مصدوم من وجودها، بصلي ورجع بصلها بعدم تصديق.. فبصيت لُه بأستغراب.
- سارة؟
ابتسَـمت، مشيت ناحيته بخطوات بطيئة.. قربت منه، فبعد عنها، بصلي ورجع كمل كأنُّه لسه مدرك:
- مريم.. دي سارة اللي حكيتلك عنها
ابتسامتها وسعت:
- أنت لسه بتحكي عني؟
بصيت لُه بعدم فهم، فأتحرك خطوات ناحيتي وهو بيتنفس وبيحط ايده في جيبه:
- آه حكيت لمريم عن خطيبتي اللي خانتني.. ودي حاجة متتحكيش؟
ملامح وشها اتغيرت، حمحمت وكملت بتوتر:
- قلتلك إنك فاهم غلط، أنتَ مدتنـ..
قاطعها بابتسامة بسيطة:
- خلاص يا سارة حصل خير، اللي حصل حصل واتقفل وأنا نسيته..
مسك الورد اللي كان على التربيزة ومدهولي:
- الورد بتاعك، تعالي نمشي من هنا الدنيا تنشنت.
رفعت حاجبي فأداني الورد وهمس في ودني:
- طبعًا لو حلفت إني معرفش مش هتصدقيني..
مشيت جنبه وأنا بهمس:
- وهي عرفت مكانك منين؟ مش يمكن جايبها علشان تعمل الشو ده؟
- أنتِ شايفاني بتاع شو يعني؟
قالها بصوت واضح نسبيًا، وعلى وشه علامات عدم تصديق.. اتنهِـدت وأنا ببص لها ورجعت بصيت لُه تاني:
- لأ
اتنهِـد ومشي جنبي بهدوء، فتحلي باب العربية وراح ركب هو كمان، ركبت جنبه وفضلنا ساكتين شويه.. هو كان ساكت تمامًا معرفش علشان شافها، ولا علشان اللي قولتهوله، اتنهِـدت بزهق وكملت:
- هو فيه إيه؟
- مفيش حاجة
قالها بصوت هادي، حسيت إنه زعلان فكملت وأنا بعدل قعدتي وببصله:
- هو أنا اللي جبتها؟
بصلي وكمل بهدوء:
- بس أنا قلت لك إن مفيش حاجة يا مريم
كنا ماشيين في طريق الكورنيش، كملت بهدوء:
- طيب وقف العربية الهوا حلو
- لأ الجو برد، أنا اصلًا نسيت الشركة معرفش رايح فين.. هلف وأرجع تاني.
بصيت لُه ونفخت بزهق، فأتنهِـد ووقف العربية، سند راسه لورا وفضل ساكت فأتكلمت:
- هو أنتَ وقفت علشان نعسان يعني ولا إيه؟
اتعدل وبصلي وكمل بإنفعال:
- هو أنتِ عايزة إيه؟ مش أنا بعمل شو
رجعت الورد ورا وكملت وأنا ببصله:
- مكانتش كلمة خرجت من بوقي دي يعني كنت بهزر
- بس معنى الكلمة دي إني جايبها وجايبك قصد، وجايبلك ورد مرازية فيها مش أكتر.. وأنتِ عارفة كويس وأنا قايلك إن سارة مبقتش تفرقلي في اي حاجة وإن اللي حصل ضايقني وحسسني فترة طويلة بقلة ثقة ناحية كل اللي حواليا، بس لما قررت أتخطى لا هي ولا غيرها بقى يفرقلي.. معرفش عرفت منين إني في الكافية بس الأكيد إني مش هجيبها، ولو هجيبها فمش هجيبك
كنت بصاله وهو بيتكلم، اتنهِـدت وحركت كتفي بهدوء:
- حتى لو جبتها وجبتني فيها إيه، ما احنا كده كده مفيش بيننا حاجة
بصلي ثواني وبعدين ضحك بعدم تصديق:
- بجد فعلًا؟
- امال فيه حاجة وأنا معرفش يعني؟
كمل وهو بيدوس على البنزين جامد:
- لأ عندك حق مفيش حاجة..
معرفش كان مفكر نفسه في سباق عربيات، ولا حسبنا دخلنا جاتا ولا إيه! وياترى لو كلمته دلوقتِ هينفخ فيا يرميني من الشباك ولا هيعمل إيه.. كنت حاسة بطني مقلوبة من حركة العربية بس مش عارفة اتكلم، كملت بإنفعال وأنا ببصله:
- سوق بالراحة يأما تقف وتنزلني..
بصلي وكمل:
- ولا هعمل ده ولا ده
- بطني بتوجعني يا أدهم
قولتها بصوت هادي وأنا حاطة إيدي على بطني، فهدى سرعة العربية شويه.. وأخد نفسه كذا مرة ورا بعض، وقف بينا وبصلي:
- أنتِ كويسه؟
بصيت لُه بلوم ومردتش، فكمل وهو بيمدلي ماية:
- طب اشربي حبة مايه
زقيت الماية وكملت بعصبية:
- مش عايزة اشرب
اتنهِـد وهو بينزل من العربية وبيفتحلي الباب:
- انزلي نشم هوا
- لأ هنزل بس مش هشم هوا، هوقف تاكسي وارجع الشركة ومتكلمنيش تاني.
مسكت شنطتي وخرجت من العربية وجيت ماشية مسك ايدي:
- طب والورد
- مش عايزة منك حاجة
بصلي وكمل بهدوء:
- طب متمشيش..
بصيت لُه ثواني بعدين مشيت وسيبته، فجيه ورايا وكمل:
- أنتِ غريبة والله أنتِ اللي مضايقاني واتضايقتِ..
كملت وأنا ماشية:
- ماشي أنا اللي كلت الجبنة
اتنهِـد ووقف قدامي:
- قلت متمشيش وتسيبيني..
كملت وأنا بربع ايدي بعصبية:
- علشان إيه يعني؟
كمل بهدوء:
- علشان خاطري
اتنهِـدت وبصيت الناحية التانية، بس فضلت واقفة فكمل بضحك بسيط:
- طب حلو طلع ليا خاطر في الليلة دي كلها.
- طب ريح دماغك بقى ملكش دعوة بيا..
روحت سندت ضهري على العربية، فجيه وقف جنبي وكمل بهدوء:
- لما شوفتها افتكرت الموقف فاتضايقت، بس علشانها هي علشان الموقف.. بس لما شوفتك حسيت إني احسن، يعني مريم موجودة هعوز إيه تاني
ابتسَـمت غصب عني، جيه يبصلي كشرت فضحك:
- ماشي خلاص مكنش مفروض اسوق بسرعة كده
- وأنا مكنتش قصدي اقول انه شو، بس اتضايقت من وجودها..
بصيت لُه وكملت بتحذير:
- ومتسألنيش ليه، لأني معرفش.. بس احساس غريب كده إن هي موجودة وأنا موجودة وأنتَ موجود، حسيت إني طرف تالت
- وأنا دلوقتِ واقف مع مين؟
حركت كتفي بهدوء:
- تقريبًا معايا.
- خلاص يبقى مفيش طرف تالت ولا حاجة.
اتنهِـدت وكملت بهدوء:
- أنا آسفة
- متمشيش وتسيبيني تاني بقى..
- متتنرفزش تاني بقى.
بصلي ثواني وحرك راسه بموافقة:
- حاضر.
فضلت بصاله فكمل بنكش:
- أنتِ اكيد متنرفزة علشان مكلتيش لو كلتِ هتهدي
- طب والشغل يعني
- يا بنتي أنتِ مع صاحب الشغل، مين هيكلمك
اتنهِـدت وكملت بهدوء:
- بيقعدوا يقولوا كلام سخيف على فكرة
بصلي بأستغراب:
- مين دول؟
- كام حد في المكتب، بيقعدوا يتكلموا عني وحش ولو رديت عليهم هقل أدبي واحول الشركة للتحقيق
كمل وهو بيشاورلي:
- اركبي، وابقي عرفيني هم مين وأنا هتصرف
- مش هأذي حد في شغله
- متقلقيش.
فعلًا مكنتش عايزة أعرفه مين، أدهم مش مؤذي بس مبيحبش الكلام الكتير، والهري اللي ملهوش لازمة.. مع إننا بنهري هري ملهوش لازمة أهو، بس هو بيجزأ مبادئه.. مش حرفيًا، هو مبيحبش حد يتكلم على حد، بس هو بيتكلم معايا مش عني.
فتح اغاني فكانت اغنية بهاء سلطان
"أنا مش معاهم أنا معاكِ، أنا كنت تايه وصغير والحب خلاني اتغير.. أنا كنت حبيبتي كأني شيطان وبقيت ملاك وأنتِ ملاكي.
صدقيني أنا عايز أعمل أي حاجة علشان ارضيكِ، عايز ابقى حد يستاهل بجد يبقى ليكِ."
كان بيبصلي بصة غريبة اوي، هي حلوة.. بس تخوف، معرفش ليه تخوف بس كل حاجة بقت بتخوف.. مع إن أدهم ميخوفش، بس جوايا حاجة مبتطمنش مهما حصل، قفلت الاغنية وبصيت الناحية التانية وأنا بهرب من عيونه، اتنفس بهدوء وبص قدامه، وقف بينا قدام محل كبابجي.. بصيت لُه ورفعت حاجبي فكمل:
- عارف إنك بتحبي الكفتة المشوية، ده أكتر راجل بيعمل كفتة مشوية لذيذة دوقتها في حياتي.. مهما كلت منه مبزهقش، من ساعة ما جيت وانا باكل هنا.
ضحكت وكملت بهدوء:
- أنا لو شوفتك في الشارع مستحيل اتوقع انك عيشت في المانيا سنة حتى
- على فكرة أنا معيشتش كتير، أنا أهم ايام حياتي وذكرياتي كانت في مصر عادي، بابا كان عايش هناك وأنا وماما وسالم اخويا هنا، لما سالم خلص ثانوية عامة بابا بعت اخده يكمل هناك جامعة ويشتغل معاه في البيزنس بتاعه، وأنا كمان.. بس أصلًا بابا كان شريك في الشركة دي في مصر ب55%، أنا اتخرجت هناك واشتغلت مع بابا حوالي 5 سنين او اكتر، طبعًا كنت بشتغل وبحوش وماسك شغل بابا، فلما قررت انزل مصر اشتريت من بابا الأسهم بتاعته وبقت بأسمي، فيعتبر ده بتاعي أنا بس، وبحاول اشتري ال 45 الباقيين علشان عايز اظبط كذا حاجة في الشركة، فاهمة؟
كنت بصاله بصدمة وهو بيتكلم، مش من عدد الاسهم، علشان ليه بيقولي كل ده يعني.. كملت بتفهُم:
- ايوه، طيب إيه هنتغدى الاسهم بتاعتك
- أنتِ فصيلة والله أنزلي
- ابقى احكيلي باقي الحكاية وأحنا بناكل
بصلي وكمل وهو بينزل:
- مش هحكيلك حاجة أنتِ اللي زيك يستاهل ميعرفش حاجة
ضحكت وأنا بنزل:
- هتقول منغير ما تاخد بالك
- أنتِ مستغلة وضعي اوي خلي بالك.
ضحكت وأنا ماشية جنبه، اقعدنا في الهوا برا، طلب لنا كفتة ورجع قعد قدامي.
- هو أنتِ عمرك ما فكرتِ تسافري برا؟
- مصر صعبة اوي يا أدهم، العيشة صعبة على اللي زيي.. اتربينا بصعوبة، اتعلمنا بصعوبة، لقينا شغلانة حلوة بصعوبة، واصلًا شغلاناتنا بتبقى مهددة بالانهيار في الغالب.. خدت كورسات، منمتش ايام، ذاكرت علشان اجيب امتياز في كلية مش عايزاها اصلًا بس علشان لو الوقت عدى هندم.. مصر صعبة اوي..
اتنهِـدت وكملت بابتسامة خفيفة:
- بس مقدرش أخرج واسيبها، فيها ذكرياتي وكل حياتي، فيها حاجات صعبة بس فيها حاجات حلوة كتير.. لو خرجت من مصر أموت.
ابتسَـم ابتسامة خفيفة وكمل:
- لما برجع مصر ببقى مبسوط، مع إني برا مصر مستقر.
اتنهِـدت وكملت:
- أهي الدنيا كده هنعمل إيه؟
الأكل وصل، فأخده ونزله.. الأكل كان طعمه حلو اوي، والجو حلو أوي، وأدهم حلو أوي، والطحينة حلوة اوي، وعيونه حلوة اوي.. وابتسامته وسط الكلام جميلة، مشاعره جميلة.
أول مرة اكل مع حد فأحس إن الحد أحلى من الأكل، وإني مستعدة اسيب الأكل وأقعد أحط ايدي على خدي واسمع كلامه.. بس فجأة بفتكر إن مينفعش ارتاح له اوي كده، اصل يعني مهما حصل ده أدهم وراجل، بس أدهم.. أدهم مش أي راجل.
- مريم أنتِ معجبة بيا..
بصيت لُه بخضة وشرقت، فكمل وهو بيضحك وبيمدلي الماية:
- اقسم بالله بهزر اهدي.
اخدت منه الماية شربت بعدين حدفته بيها:
- ما تعقل الكلام كده يا اخي، هعجب بيك ليه انت مفكر نفسك حلو يعني
ضحك وكمل وهو بيحط ايده على خده وبيبصلي:
- يعني أنا مش حلو؟
لا يا حبيبي أنتَ زي القمر متبصليش كده بس أحسن احبك ولا حاجة، احب مين لا حول ولاقوة إلا بالله! انا اتجننت ولا إيه؟
خلصنا أكل وقومنا يروحني، كنت ساندة راسي على شباك العربية وهو بيسوق بهدوء.. كنت حاسة إن جزء جوايا مبسوط اوي، مستكين اوي، بحب القعدة مع أدهم اوي.. برتاح وأنا معاه، بس المشكلة إني معرفهوش، معرفش اهله.
وصلنا قدام البيت، فكملت بهدوء وأنا باخد الورد من ورا:
- شكرًا يا أدهم..
- على الورد؟
ضحكت بنكش:
- تؤ، على الكفتة..
ضحك وكمل بهدوء:
- طب هجيبلك كل يوم.
ابتسَـمت وفتحت الباب علشان اخرج، بس وقفني صوته:
- مريم..
بصيت لُه، فبصلي ثواني.. بعدين أتنهِـد وكمل:
- أنا بحبك، ومش بقولك كده علشان اقولك حبيني.. بس أنا بعرفك أنتِ إيه بالنسبالي علشان سؤال هو بينا حاجة، آه أنا نفسي جدًا يكون بيننا حاجة، بس أنا عارف كويس إنك مش جاهزة دلوقتِ ومش هضغط عليكِ في إني اخد خطوة وأكلم ابوكِ دلوقتِ.. بس عايزك دايمًا تبقي فاكرة إني بحبك أكتر من أي حاجة في الدنيا، وعندي استعداد استنى لحد ما تكوني مستعدة..
كُنت بصاله بصدمة، فابتسَـم بهدوء:
- ومنغير ضغط، أنا موجود.. وأنتِ موجودة، والوقت موجود محدش فينا هيتوه من التاني، صح؟
أخدت نفس وخرجته، كنت حاسة إني مش مستوعبة.. كملت بهدوء:
- تصبح على خير
خرجت من العربية وقفلت الباب فبصلي من الشباك:
- وأنتِ من أهل الخير.
كنت ببصله كل شويه وأنا ماشية بعدم تصديق، هو اعترفلي بالحب دلوقتِ ولا أنا بيتهيألي؟ لا حول ولا قوة إلا بالله.. يعني إيه اللي بيتقال ده بس يا جدعان، حب ايه اللي أنتَ جاي تقول عليه؟
دخلت من باب الشقة، وقفلت ورايا الباب بنفس الصدمة.. وانا داخلة اوضتي قابلتني مراية، بصيت فيها لقيتني مبتسمة.. لا حول ولا قوة إلا بالله أنا ببتسم على إيه دلوقتِ؟ خفت ماما وبابا يشوفوني يعرفوا ان حصل حاجة، فدخلت اوضتي بسرعة، رميت الورد على السرير واترميت جنبه وأنا ببتسم.. ابتسامتي وسعت وضحكت فخبيت وشي بأيدي، كنت حاسة دقات قلبي عالية، مكسوفة.. بس خايفة، خايفة اوي المرة دي، هتبقى صعبة.
***
"إن كان أمل العشاق القرب، أنا أملي في حبك هو الحب.. وإن غِبت سنة، أنا برضوا أنا."
فكرت كتير اروح الشغل، ولا اخد بريك النهارده علشاني وعلشانه، قررت في الاخر انزل علشان اتعامل عادي، وصلت المكتب وجيت اخبط عليه علشان اديله ورق سمعته بيدندن.. هو بيبقى ايه احساسنا لما نبقى عارفين إن كل دندنة لينا؟ كل خطوة علشاننا، كل حاجة بتاعتنا؟ وبيبقى إيه حل الغصة اللي بتيجي فجأة بتخوفنا إن كل ده يبقى لينا، الضحكة بتختفي وبيتبني مكانها سور من خوف، إنك تعيش تجربة سيئة.. أنتَ اتعافيت من الشخص بس لسه التجربة سايبة جواك أثر مش بيتمسح بالوقت، رجعت في رأيي ومخبطش جيت ماشية لقيت الباب بيتفتح.
- مريم.. فيه إيه رايحة فين
حمحمت وكملت بهدوء:
- أنا.. كنت جاية اجيبلك الملفات
مد ايده وكمل بأستغراب:
- طب ومجيبتيهاش ليه هاتي
مديتهاله، ولفيت ضهري علشان امشي فكمل بهدوء:
- تعالي هنا رايحة فين.
بصيت لُه بتوتر:
- ايه في ايه..
ضحك وكمل بهدوء:
- مش هو ده الورق اللي عايزه
مسكت الورق منه وبصيت لُه:
- ايه ده والله مكنش ده، استنى هجيبه واجي
- جيبيه
كملت وأنا ماشية:
- هبعتلك نور بيه
ربع ايده وكمل:
- أنتِ يا مريم..
بصيت لُه بعدم فهم فكمل:
- أنتِ اللي هتجيبي الورق، ده شغلك.
بلعت ريقي بصعوبة، وحركت راسي بإيجاب.. روحت المكتب بتاعي، رميت الورق على المكتب واخدت التاني فنور بصتلي بأستغراب:
- هو فيه إيه يا حبيبتي أنتِ من امبارح مش على بعضك
- أدهم ده غاوي وجع الدماغ، ليا وليه
بصتلي بعدم فهم فكملت بصوت واطي:
- امبارح قالي إنه بيحبني..
شهقت وكملت وهي بتضحك:
- شوفتي مش قلتلك!
خبطتها وأنا خارجة من المكتب:
- لو فتحتِ بوقك هخليه يرفدك
- ممكن افتح بوقي ليوسف واسماء؟
- هموتك يا نور
اتنفست بزهق وهي بتقعد على المكتب:
- ده أنتِ باردة والله
مشيت وسيبتها، روحت مكتبه.. فكرت اخبط ولا لا، سمعت صوته:
- ادخلي يا حبيبتي بطلي تلفي رايح جاي..
فتحت الباب وكملت بإنفعال:
- ايه حبيبتي دي احترم نفسك، حتى لو مجازية
ابتسَـم وهو بيرجع بضهره لورا:
- ما هي مش مجازية، أنتِ فعلًا حبيبتي..
- هو مش قلت مش هتضغط عليا؟
- أيوه ومضغطتش أنتِ اللي متوترة
حطيت لُه الملفات على المكتب وجيت ماشية كمل بهدوء:
- سارة كلمتني
بصيت لُه، حسيت إني اتضايقت.. معرفش اتضايقت ليه مع إني مش فارقلي زي ما قلت.. كملت وأنا بربع ايدي:
- ليه؟
اتنهِـد وكمل:
- صاحب الكافية ده كان واحد صاحبي في الجامعة نزل هنا وفتح الكافية ده، هي قابلته وعرفت منه اني ببقى هناك فكانت جاية ومتعرفش اكيد هبقى هناك ولا لا..
ابتسَـمت بسخرية:
- آه ده أنتَ اتكلمت معاها بقى وعرفت
ضحك ضحكة بسيطة وكمل:
- صاحبي اللي قال
حمحمت ونزلت ايدي:
- وأنا مالي، مش فارقة.
كمل وهو بيبصلي:
- يعني مش عايزة تعرفي كلمتني قالت إيه؟
- مش مهتمة..
لفيت وشي علشان اخرج، كان نفسي ارجع اوي اسأله قالتله ليه.. وهو اصلًا بيقولي ليه، هو ايه اللي ليه ما هو قال انه بيحبني يعني، بس افرض بيكذب وناوي يرجعلها، احسن اعيش اللي مرات عمر عاشته! لا لا لا ده أدهم مش عمر، لازم افصل بين الاتنين.
جيت خارجة كمل:
- كلمتني تقولي إني وحشتها، قلت لها متشوفش وحش.. متكلمنيش تاني علشان مراتي بتغير
بصيت لُه وكملت بصدمة:
- مراتك؟
- آه، أنتِ.. مستقبليًا يعني
بصيت لُه ثواني، بعدين ضحكت:
- والله العظيم أنتَ مش طبيعي بجد
ابتسَـم وحرك كتفه:
- اعمل ايه بقى، الحب وسنينه
- والله
غمزلي وهو بيكمل:
- آه والله
اقسم بالله وقح، وقح جدًا.. مشيت وسيبته وأنا بدعي ميكنش حد تاني بيتكلم في الموضوع ده، أنا معرفش هعيش ازاي معاه والله في الشركة بالشخصية دي، ده خطبني في دماغه وكمان شهرين هلاقينا متجوزين في دماغه برضوا.
***
عدى شهر، في شد وجذب سوا.. يوم بيحاول يقرب ويقوم بيسكت علشان ميضغطنيش، شويه قريب مني.. وشويه بعيدة أنا عنه، تقريبًا خدت اجازات اكتر من اللي خدتها طول عمري.
- هو حضرتك هتفضلي تأجزي؟
- ما هي اجازة من مرتبي..
- الشغل بقى بيتراكم، مش متاح اجازات تاني.
كملت بإصرار:
- انا تعبانة ومحتاجة ارتاح.
كمل بجديّة:
- ده دلع يا مريم.
كملت وأنا بخرج:
- خلاص يبقى هقدم استقالتي
قام وقف وجيه ورايا، مسك ايدي فبصيت لُه:
- مش قلتلك قبل كده متسيبينيش وتمشي؟
كملت بإنفعال:
- مش قادره.. مش قادره أفضل قدامك، ومش عارفة امشي.. مش عارفة أكذبك ومش قادره اصدقك، برتاح وانا معاك فبخاف من راحتي معاك..
بص حوالينا لقى كله واقف فأخدني ودخلنا المكتب بتاعه، كملت وأنا بشد ايدي منه:
- أنتَ ليه ظهرت في حياتي تاني! ليه بتعمل كده فيا.. ليه شقلبت حياتي وليه حسستني بمشاعر غريبة، أنا ملحقتش اتعافى من اللي حصل، ملحقتش أنسى إني اتخانت.. أنتَ مش متخيل أنا متوترة طول الوقت من خطيبتك القديمة ازاي، طول الوقت بفكر هيحصل إيه لو حاولت تقرب زيادة وانا ببعدك عني، خايفة ترجعلها وخايفة ابقى معاك.. تعبت تعبت.
خلصت كلامي وقعدت مكاني، حطيت ايدي على وشي وعيطت، نزلت قعد قدامي وكمل بصوت هادي:
- يا مريم أنا بحبك، بحبك أنتِ.. سارة متفرقليش في اي حاجة، هي اصلًا ولا اي حاجة بالنسبالي، أنتِ الست اللي عايز أكمل معاها حياتي واللي اقدر أسلم لها روحي وحياتي وأنا متطمن، سارة كانت خطيبتي بس يا مريم أنتِ حبيبتي وهتبقي مراتي وكل حاجة حلوة في حياتي، أنا مفهمتش يعني إيه الدنيا غير لما شوفتك.. أنا عارف خوفك ومقدره، بس والله العظيم بحبك ومش بمزاجي اقرب منك
رفعت عيوني وكملت بهدوء:
- ممكن متضغطش عليا يا أدهم؟
- حاضر مش هضغط عليكِ بس اهدي..
حاولت اهدى فعلًا، بطلت عياط وكملت بهدوء:
- ممكن نتمشى بعد ما نخلص شغل؟
- اعتبرينا خلصنا شغل
حركت راسي بنفي:
- مش قادره دلوقتِ، خلينا بعد ما نخلص شغل.. ولوقتها مش عايزة اشوفك
رفع حاجبه فكملت بهدوء:
- عايزة اركز في الشغل
- ليه أنا بعمل إيه
- بتوترني
حرك راسه بإيجاب:
- ارجعي شغلك طيب واهدي، ولو عوزتيني تعالي
حركت راسي بموافقة ومشيت، كنت حاسة إني محتاجة اهدى.. محتاجة ادي نفسي فرصة واديله هو كمان، نتكلم سوا، احكيله مشاكلي، أدهم هيفهمني.
فضلت طول اليوم في المكتب بشتغل، حاسة ان طاقتي خلصانة وان الفيشة بتاعتي حد شايلها، بشتغل بس منغير صوت، خلصت شغلي وخرجت من الشركة قعدت في مكان جنب عربيته، كان خارج بيتلفت حواليه اول ما شافني جالي.. مكنش عارف يتنفس، قعد جنبي وكمل:
- فكرتك مشيتِ.
- بس أنتَ قلت لي متسيبينيش وتمشي..
بصلي ثواني بعدين ضحك ضحكة بسيطة:
- لو مكنتش قلتلك كنتِ هتمشي؟
حركت راسي بإيجاب فكمل:
- تحبي نعمل ايه
- نتمشى..
قام وقف وشاورلي:
- يلا بينا.
قمت معاه، كنت ماشية باصة في الارض شويه.. وببص على الطريق شويه، وهو ماشي جنبي بهدوء.
اتنهِـدت وكملت:
- أنا مش فارقلي عمر، زي ما أنتَ مش فارقلك سارة.. بس حاسة إن التجربة اثرت فيا تأثير مش طبيعي، خلتني بخاف اثق في حد..
بصيت لُه وكملت وانا ببتسِـم:
- بس لما باجي افكر، بقول إنك مش حد.. أنتَ أدهم، اللي ظهرلي في اكتر وقت صعب، ساعدني منغير مبررات منغير ما يطلب مني حاجة، فجأة لقيته في كل تفاصيل يومي.. أنا حتى عمري ما عيشت التفاصيل دي مع عمر، وعارفة إن أنا اول مرة ابص للحب بعيون تانية.. عيون عايزة تستقر يا أدهم.
ابتسَـم ابتسامة هادية، فاتنفست وكملت وأنا بحرك ايدي بعشوائية:
- مش عايزة اعيش قصة حب مجنونة، مش عايزة قلوب حمرا وورد..
سكتت ثواني وضحكت:
- لا بصراحة عايزة ورد
ضحك وهو باصصلي، فكملت:
- تعبت من التفكير، بس أنتَ بترتب أفكاري وأنا معاك.. تعبت من الخوف بس أنتَ بتطمني، وأنا معاك بحس إني حرة حتى مني يا أدهم، عارف اكتر حاجة بتضايقني منك ايه؟ إني وأنا جنبك مبفكرش، افكاري بتبقى هادية.. بخاف اوي يا أدهم بخاف اوي وانا لوحدي يطلع كل ده حلم واقوم من النوم الاقيني لوحدي.
أخد نفس وكمل بهدوء:
- طب أنا عندي حل حلو
بصيت لُه فكمل:
- نتجوز، بحيث إنك تصحي من النوم تلاقيني جنبك..
ضيّقت عيني ووقفت فجأة، فعمل نفس الحركة وهو مستني مني رد، ضحكت وحركت كتفي:
- موافقة.
فتح عينه بصدمة:
- ده بجد ولا احنا في برنامج الصدمة؟
- احنا في برنامج الصدمة طبعًا بص الكاميرا..
ضحك وكمل وهو بياخد خطوة ناحيتي فبعدت عنه:
- لأ النهارده هكلم ابوكي بقى وكلام من ده، وياريت تجيب ورد احمر، وهات معاك جاتوة شوكولاتة بس..
بصلي وكمل بضحك:
- أنتِ مكنتيش بتكلميني طول اليوم علشان تحضري ليست قراية الفاتحة
كملت بزهق:
- كنت مجهزة اقولك تبعد عني
- طب كويس انك مقولتيش علشان كنت مقرر لو عملتيها اخطفك واهرب بيكِ على المانيا واتجوزك هناك
- آه أنتَ مجنون بقى
- بيكِ يا مريومي.
ضحكت برضا، ومشيت جنبه كل شويه ابصله اتأكد من إن فعلًا قولتله إني موافقة اتجوزه، أنا ممكن اوافق اتجوزه خمس مرات علشان نظراته اللي عمري ما شوفتها في حتة دي، الدنيا فيها رجالة كتير.. بس أنا حاسة إني خدت ألذ وأحن واحد فيهم.
"حبك مفرحني فرحة طير بطيرانه، قربك مريحني راحة الروض لأغصانه.. عطفك ساقيني الحنان كله بألوانه، ودك مهنيني.. قربك مخليني انسان لقى نفسه فيك من بعد توهانه."
***
عدى سنتين، سنتين بالضبط كانت كفاية تخليني اتطمن.. وأصدق إني بعيش أحلى قصة حب في حياتي، هي مش بس عوض عن أيامي الوحشة.. أو عن تجربة وحشة، دي عوض عن اي لحظة ضايعة في حياتي.
راجل حنيّن ولذيذ، مبيتكسفش يظهر حبه قدام أي حد وفي اي وقت.. بيحبني بكلامه، وبتصرفاته، في وقت ضعفه وفي وقت ضعفي وفي كل اوقات قوتنا احنا الاتنين، وأنا ناجحة بيسقفلي ووأنا واقعة بيسندني.. وهو ناجح بيعترف بفضل وجودي، وهو حاسس إنه مش قادر يقف بيلجأ لي، يعني لو مش ده الاستقرار والأمان اللي عيشت أحلم بيه طول عمري؛ هيكون إيه؟
كُنا عازمين أهله علشان نازلين من ألمانيا النهارده، بما إنهم عرفوا إني ولدت.. مقدروش ينزلوا في الفرح، بس قرروا ينزلوا زيارة علشان يشوفوني ويشوفوا حفيدتهم "آيلا" الحاجة الحلوة اللي ضافت لحياتي أنا وأدهم مسؤولية.
كنت واقفة في المطبخ بحضر الأكل وهو كان في الشغل، سمعت صوت مفاتيحه في الباب.. وكالعادة أول حاجة عملها دخل يشوفني في المطبخ، جيه حضني من ضهري فضحكت:
- حمدلله على سلامتك يا حبيبي
باسني في رقبتي وهو بيكمل:
- الله يسلمك يا حبيبتي، إيه كل الأكل ده..
- متقلقش عملاه كله مناسب لعمو وطنط وسالم، وطبعًا مش ناسية مراته وعياله.. أنا اصلًا كلمت مرات سالم عرفت منها اكلها واكل الاولاد وسالم المفضل وعملته..
ضحك وهو بيكمل:
- أنا معرفش إيه الحلو اللي عملته في حياتي علشان مريم تظهر فيها فجأة
ضحكت وأنا بمسك خدوده:
- أنتَ الحلو يا أدهومي
- طب ممكن حضن
- أنا ريحتي كانت أكل دلوقتِ ريحتي كلها البرفيوم بتاعتك، لو الاكل كرف أنتَ حر..
بصلي ورفع حاجبه:
- هو أنتِ مش عايزة تحضنيني؟
ضحكت وأنا بحضنه:
- هو أنا هحضن مين غيرك يا حبيبي بس..
اتنفس براحة وهو بيحاوطني:
- لأ، خدتك حكر خلاص محدش غيري.
ضحكت وأنا في حضنه فكمل بهدوء:
- اهي دي انتصارات أخر الطريق ولا بلاش..
- أنا؟
بعد عن حضني وضحك وهو بيبص لصنية البشاميل:
- يا مريم هنهزر البشاميل طبعًا..
بصيت لُه وضيّقت عيني، فباسني من خدي وكمل:
- أنتِ أحلى حاجة حصلت في حياتي.
- وأنتَ أحلى حاجة حصلت في الدنيا يا أدهم.
"كل الطُرق لِلهرَب مِنك تُؤدي إليك، فَـ.. لِأين سأهرُب!"
تمت
