رواية من قتل سهير الرقاصة الفصل الثالث بقلم ياسر عوده
-حلو، ومدام دي فلوسك ليه بتنكريها.
-علشان خايفه من الحسد يا باشا، دي فلوس شقايا وتعبي انا وجوزي يا باشا.
وقتها الضابط اتعصب اوي، وضرب المكتب بايده وقالها:
-احنا هنستعبط يا روح امك، تعبك وشأقي ايه اللى هيجبلكم مليون جنيه انتي وجوزك، اتظبي يا بت بدل ما اظبطك، هرميكي في الحجز لغايه لما يبانلك اصحاب.
وقتها هي انهارت وخافت جدا من الضابط، وقالتله:
-حاضر يا باشا، هقول كل حاجه، الفلوس دي خدناها من شقه المدام سهير الله يرحمها.
وقتها الضابط ابتسم واتكلم بهدوء من تاني وقالها:
-احكيلي بقى يا غاليه وبراحه وبالتفصيل، ازاي قتلتم المجني عليها وخدتم فلوسها.
قامت غاليه من مكانها وقالت:
-لا يا باشا، احنا ماقتلنهاش، احنا سرقنا الفلوس فعلا بس ماقتلنهاش.
-احنا هنرجع تاني للاستعباط، ما احنا كنا كويسين.
-انا بقول الحقيقه يا باشا، احلفك على ايه اننا ماقتلنهاش.
وقتها الضابط نفخ وبعدها اتكلم بهدوء وقالها:
-تمام، خليني معاكي، لو انتي وجوزك ماقتلتوهاش زي ما بتقولي، ازاي سرقتوها.
-هقولك يا باشا على كل حاجه.
-قولي انا سامعك.
-انا كنت شغاله في شقه المرحومه، كانت بتخليني اروح عندها علشان انضف الشقه، وكمان اعملها الاكل اللى هي محتاجاه، وعصائر كتير وحاجات كتير اوي.
-كنتي بتنضفلها كل يوم؟
-ايوه يا باشا كل يوم، والحقيقه مهما انضفها اروح لها تاني يوم والاقيها زي الزفت، متبهدله ومليانه ازايز فاضيه، ولما في يوم سألتها:
-ايه الازايز دي يا مدام سهير، وقتها قالت:
-دي خمره، تحبي تشربي؟
-لا يا هانم حد الله بيني وبنها.
وقتها هي ضحكت وقالت:
-تفضلي طول عمرك وش فقر.
-قوليلي يا هانم، مين اللى بيشرب كل الازايز دي؟
-انا ورمزي، وكل اصحابنا اللى بيجولنا.
-بس دي ازايز كتير اوي، بتشربوا كل دوول.
-ماتدخليش انتي، ومالكيش دعوه، كملي شغلك وانتي ساكته.
-حاضر.
وفي اليوم دا انا شوفتها وهي داخله اوضه النوم، ولقتها فتح الدولاب بتاعها وطلعت صندوق مليان دهب، كان عندها دهب كتير اوي يا باشا يحل مشكله بلد بحلها، فضلت عيني على الصندوق دا لغايه لما هي انتبهت عليا وزعقت معايا وقالتلي:
-انتي وقفه عندك بتعملي ايه؟
-مافيش يا هانم، انا بنضف اهو.
-طيب اخلصي وكملي شغلك.
وفعلا كملت شغلي، ولما روحت الاوضه اللى قاعده فيها انا وعوض واطفالنا كمان، قولتله على اللي شوفته عندها، وقتها هو قالي:
-اه لو قدرنا ناخد الدهب اللى عندها.
-انت اتجننت يا عوض، دي كانت وديتنا في داهيه، انت عارف انا فكرت في فكره كده.
-فكره ايه؟
-انا احاول اخد أي حاجه من عندها خاتم او سلسله أي حاجه هي مش هتاخد بالها منها، عندها كتير ومش هتحس بيها خالص.
-فقريه زي ما هي بتقولك، يا بت اسمعي المثل بيقول لو سرقت اسرق جمل.
-انت عاوز تودينا في داهيه؟
-لا داهيه ولا نيله، احنا هناخد كل حاجه من غير ما حد هيعرف.
-وهنعمل دا ازاي يا ابو العوريف.
-ساهله وبسيطه اوي، احنا عاوزين نعمل نسخه على مفتاح الشقه بتاعتها من غير ما حد ياخد باله.
اتصدمت لما قالي كده وسألته:
-ودي هنعملها ازاي؟
-بصي انا هجبلك عجينه معينه بيستخدموها بتوع المفاتيح، هتطبعي عليه مفتاح باب الشقه من غير ما سهير تاخد بالها، وتجبهالي وانا هخلى واحد اعرفه يعملنا عليها المفتاح.
-بالسهوله دي؟
-ايوه اومال انتي فاكره ايه.
-طيب وبعدين هنعمل ايه؟
-مافيش، احنا عارفين مواعيد خروجها ودخولها، هندخل الشقه وهي مش موجوده وناخد كل اللى نقدر عليه، ونخرج ولا من شاف ولا من دري.
-انا هعملك المفتاح في العجينه، بس انا مش هدخل معاك الشقه.
-اه يا جبانه، بس ماشي عادي موافق.
وفعلا يا باشا انا نفذت اللى هو قاله، وعملتله المفتاح، وفي يوم هو قرر يروح يدخل الشقه علشان ينفذ اللى اتفقنا عليه، ولما دخل الشقه وخلص وخرج لقيته جايلي وهو بيتنفض، وسألته:
-مالك يا عوض حصل ايه؟
-الست سهير اتقتلت.
-يا ليلتك السوده، قتلتها.
-قتلتها ايه حرام عليكي هتوديني في داهيه، انا ماقتلتهاش.
-ازاي وانت داخل عليا بالفلوس دي كلها، وايه الشنطه التانيه دي كمان؟
-دي شنطه الدهب.
يعني قتلتها.
-الله يخربيتك انتي ايه جاموسه مابتفهميش ماقتلتهاش.
-اومال ايه اللى حصل؟
-انا فتحت باب الشقه بالمفتاح، وكنت مفكر انها مش في الشقه في المعاد ده، بس لما دخلت ولسه بقول يا هادي اترعبت، لقيت قدامي جثتها على الارض وغرقانه في دمها، وقتها كنت ههرب بسرعه، بس انا تمالكت نفسي في لحظات، وقررت اني لازم اكمل اللى روحت علشانه، وعلشان كده انا دخلت اوضه نومها وفتحت الدولاب ولقيت شنطه الدهب، ومش بس كده ولقيت فلوس كتير خدتها، وانا طالع كان في ايديها دهب كتير، قلعتها الدهب وخرجت.
-الله يخربيتك يا عوض، ودتنا في داهيه، بتسرق وحده ميته، هيعدمونا يا عوض، لا هيعدموك انت.
-اخرسي، انتي تخرسي خالص هتودينا في نصيبه بسبب كلامك ده، بصي انتي تخدي الفلوس والدهب وتسفري على البلد وماتجيش خالص الا لما ابعتلك فاهمه.
وسافرت يا باشا زي ما قالي، وبالنسبه للدهب انا وجوزي نعرف واحد شغال في الدهب، روحتله واديته الدهب اللى سرقناه وقال انه هيجمعلنا فلوسه وهيدهلنا.
وقتها الضاب قالها:
-هو اللى بلغنا عنك يا غاليه، احنا كنا ناشرين اوصاف الدهب المسروق.
-دا كل اللى حصل يا باشا، لو عاوزني احلفلك انا مستعده.
-لا سيبك من حكايه الحلفان دي، واحنا هنعرف بطريقتنا ان كنتي صادقه او كدابه.
ولما خلص الباشا تحقيقه مع غاليه جاب عوض، واللى قال نفس الكلام، ووقتها عرضهم على النيابه اللى امرت بتحولهم للطب الشرعي علشان يطابقوا الحمض النووي بتعهم باللى لقوه في ضوافر المجني عليها، ونتيجه التحليل انه كان غير متطابق، وتم حجز الاتنين بتهمه السرقه والتستر على الجريمه.
رغم ان الشرطه اتقدمت اوي في التحقيقات، بس للاسف ماوصلوش لغايه دلوقتي للجاني، وطبعا انا كتبت عن حكايه عوض ومراته في التحقيق بتاعي، والدنيا اتقلبت مره تانيه، واسمي بقى معروف في كل مكان بسبب اللى كتبته، وكان دا دافع علشان اكمل الجريمه دي للنهايه، وكنت كل يوم عند الضابط رياض واللى كان بيسمحلي احضر التحقيقات، وفي يوم قدروا يوصلوا للي اسمه رمزي، واللى كان زوج المجني عليها، وبداء الضابط في التحقيق معاه ووجهله تهمه القتل، ووقتها رد وقال:
-لا قتل ايه يا باشا، انا مستحيل اقتل سهير، ومهما حصل بنا هي وش الخير عليا.
-اسمع يا رمزي، الكلام دا مايكلش معايا، هات المفيد واعترف.
-انا هعترف بالحقيقه يا فندم، بس ارجوك تصدقني.
-قول وانا هشوف.
-الاول انا اتعرفت على سهير لما كنت بزور القريه اللى كنت منها، سهير طول عمرها حلوه، وكل بنات القريه بتتكلم عنها وعن رقصها، اصلها هي اللى كانت بترقص في أي مناسبه في فرح أي حد من بنات القريه، بس كانت بترقص في قعدات الحريم والبنات بس، اصل كان ليها اخ اسمه سمير، ودا كان ملتزم شويه ولو كان عرف انها رقصت قدام حد كان ممكن يموتها، هو اصلا كان بيضربها لما كان بيعرف انها بترقص في قعدات الحريم.
ومن وقتها وانا عقلي وقلبي اتشدلها من كتر ما سمعت عنها، وفي يوم من الايام عرفت ان اخوها اتحبس بتهمه ضرب ابوه، وعرفت ان سهير خلاص مابقاش ليها حد لان ابوها مات بعد اللى حصل بفتره بسيطه، وامها ماتت قبلها بفتره، ومن وقتها وسهير بقت حره، وفي فرح من الافراح هناك سهير طلعت ورقصت، ووقتها بمجرد اني شوفتها وشوفت رقصها عرفت ان طاقه القدر اتفتحتلي، ومن ساعتها كل اللى كان يهمني اني اتعرف عليها، ومش بس كده انا لازم اخليها تحبني باي شكل من الاشكال.
واتعمدت اني ابقى موجود في أي مكان هي فيه، لغايه لما اتعرفت عليها ولما بقت تثق فيا قولتلها:
-خساره موهبتك في الرقص تدفن هنا يا سهر، انتي لو تسمعي كلامي، هخليكي راقصه مصر الاولي.
-هبقى زي دينا وفيفي عبده؟
-لا انتي هتبقى احسن منهم كلهم، بس انتي تسمعي كلامي.
-انا موافقه بس بشرط واحد.
-اشرطي.
-تتجوزني، لما هبقى على زمتك وقتها هعمل اللى انا عاوزاه.
فرحت وقتها طبعا، وقولتلها طبعا موافق.
شكرا لزيارتكم عالم روايات سكيرهوم
