رواية الوصفة الأولي الفصل الثالث بقلم هنا محمد
- وريني كده يا تيا، الفستان ده؟
رفعت تيا الفستان أمام والدتها بسعادة، ثم قالت:
- بس إيه رأيك في الفستان ده؟ خطير، مش كده يا ماما؟
نظرت والدتها إلى الفستان للحظات، ثم عقدت حاجبيها باستنكار.
- خطير! إيه استايل التمانينات ده يا بنتي؟ شكله بشع! اقلعي القرف ده والبسي اللي اشتريتهولك.
- بس ده عاجبني عادي!
- تيا، أنا فاهمة حركاتك كويس. حتى لو مش هتوافقي، البسي عدل على الأقل علشان منظرنا قدام الناس!
تنهدت تيا باستسلام، ثم وضعت الفستان جانبًا.
- حاضر... فين فريدة؟
- مشيتها.
التفتت تيا إليها بصدمة.
- إزاي يا ماما؟! دي بقالها سنين معانا!
- أعمل إيه يعني يا تيا؟ أبوكي حتى مرتبها مش هنعرف ندفعه!
- أمال هنعيش إزاي؟ هو بابا فلس نهائي؟ مفيش ولا جنيه حتى؟!
- يوه عليكي! إنتِ كل شوية هتوجعي دماغي بالموضوع؟ ما قلتلك أيوه مليون مرة!
- طب ومين اللي هينضف البيت ويطبخ لنا؟
نظرت إليها والدتها بجدية، ثم أجابت ببساطة:
- إنتِ.
اتسعت عينا تيا، وكأنها سمعت للتو خبرًا كارثيًا.
- أنا؟! لا، مش للدرجة دي يا ماما! أنا مستحيل أعمل حاجة زي دي!
- يبقى توافقي على العريس وتعيشي عيشة سعيدة!
- والله؟! ماشي يا ماما، أنا هقعد معاه علشان خاطر بابا مش أكتر!
- يعني هو أبوكي مهتم يعني؟
- أيوه مهتم، على الأقل مش طول الوقت قارفني بالعريس كأنه مفيش غيره في الدنيا!
- طب يلا اخلصي وبطلي تضييع وقت، والبسي علشان كلموني وقالوا إنهم هيكونوا هنا كمان ساعة.
رفعت تيا عينيها إلى الساعة المعلقة على الحائط.
- Oh my God!
نظرت إليها والدتها باستغراب.
- في إيه يا بنتي؟
- وأنا هجهز في ساعة إزاي يعني؟!
- ما إنتِ لو تبطلي كلام وتروحي تلبسي، هتلاقي إنك خلصتي ولسه فاضل وقت كمان.
- أوف... ماشي!
---
بعد مرور بعض الوقت، خرجت تيا إلى غرفة المعيشة وهي ترتدي فستانًا باللون الأصفر الهادئ، بسيطًا وأنيقًا.
تأملتها والدتها للحظات، ثم قالت باستنكار:
- أصفر يا تيا؟!
- إنتِ اللي جايباه يا ماما! إنتِ فقدتي الذاكرة ولا إيه؟
- ذوقي غريب عمومًا، بس يلا مش مشكلة. هي قعدة تعارف بينكم وخلاص.
وقبل أن تكمل حديثها، دوّى صوت جرس الباب في أرجاء الفيلا.
التفتت الأم نحو الباب وقالت:
- جم أهم!
---
بعد دقائق، جلست تيا أمام باسم، بينما كانت والدتها ووالدته تتبادلان الأحاديث الودية في الجهة الأخرى من الغرفة.
نظر باسم إليها بابتسامة، ثم قال:
- طب وإنتِ اسمك إيه بقى؟
نظرت إليه تيا باستغراب.
- أنا؟ لا، مش هقول قبل ما تقولي إنت الأول.
- في إيه؟ ده إحنا داخلين مسابقة؟
تمتمت تيا في داخلها:
هو بيتنافس على إيه المجنون ده؟
ثم عادت لتنظر إليه.
- لا مفيش... اسمي تيا.
- تيا! اسم الإكس بتاعتي.
رفعت تيا حاجبيها بدهشة، ثم قالت بابتسامة مصطنعة:
- الإكس؟ جميل جدًا... وأنت اسمك إيه بقى؟
- باسم.
- باسم اسم جميل.
- ما أنا عارف! المهم، احكيلي عن نفسك، بتشتغلي إيه وإيه لونك المفضل وكده يعني؟
أجابت تيا بملل واضح:
- سابقًا عاطلة، حاليًا شغالة في مطعم. ولوني المفضل الأسود، زي عيشتي بالظبط.
اختفت الابتسامة من وجه باسم قليلًا، ثم سألها:
- المطعم؟ إنتِ المديرة هناك؟
نظرت إليه تيا باستغراب.
- لا، موظفة عادية، بشتغل في المطبخ.
تغيرت ملامحه، وأصبح أكثر جدية في حديثه.
- آه... يعني بتشتغلي بنفسك في المطبخ؟
- أيوه، عندك مشكلة؟
- لا، مفيش مشكلة طبعًا. بس مكنتش متوقع إنك تشتغلي في حاجة زي دي.
نظرت إليه تيا للحظات، ثم قالت ببرود:
- طب ما تيجي نغير الموضوع؟ إنت سألتني أسئلة كتير، احكيلي عن نفسك بقى.
- أنا عندي تلاتين سنة، دكتور بيطري، وعندي عيادة خاصة بيا.
- أمم، جميل. بتحب اللون إيه؟
- الوردي، بحسه لون جميل.
نظرت إليه تيا بصمت للحظات، ثم قالت مباشرة:
- طيب، أنا مش عايزاك بصراحة، وقاعدة التعارف دي كلها علشان والدتي مش أكتر.
تعجب باسم من صراحتها، ثم اعتدل في جلسته وقال:
- تمام، أنا كمان مش شايف إننا مناسبين لبعض. ممكن نعتبر إننا اتعرفنا وخلاص.
ابتسمت تيا ابتسامة خفيفة.
- اتفقنا.
---
بعد مغادرة باسم وأسرته، أغلقت الأم الباب وعادت إلى غرفة المعيشة، وقد اختفت ابتسامتها تمامًا.
- عاجبك كده؟ أهي فضحتينا قدام الناس! وتقولي له إني بشتغل في مطعم؟!
ردت تيا ببرود:
- أمال أقوله إيه؟ إني مديرة المطعم مثلًا؟
- اهدي شوية يا ناهد، هي متقصدش أكيد.
كان والدها يحاول تهدئة الأجواء، لكن تيا تدخلت قائلة:
- لا، قاصدة. إنتوا مشفتوش نظرته ليا لما عرف إني بشتغل في المطبخ؟ ده إنسان بياخد بالمظاهر وبس!
نظرت إليها والدتها باستنكار.
- لا والله؟ وإنتِ اللي مش بتاخدي بالمظاهر يعني؟!
التفتت تيا نحو والدها.
- ما تقولها حاجة يا بابا!
تنهد والدها، ثم قال:
- ناهد، سيبي البنت خلاص. هي مش حاباه، هنعمل إيه يعني؟ وبعدين الموضوع انتهى.
نهضت تيا والتقطت حقيبتها من فوق الأريكة.
- أنا رايحة الشغل، سلام!
ردت والدتها بصوت مرتفع:
- مش فالحـة غير في كده!
---
وصلت تيا إلى المطعم كالعادة، ودخلت إلى المطبخ حيث وجدت ياسين وماريا منشغلين بتحضير المكونات.
كانت ماريا تقطع بعض الخضروات، بينما يراجع ياسين قائمة الطلبات أمامه.
ما إن لاحظت ماريا دخول تيا حتى ابتسمت لها.
- صباح الخير يا تيا!
- صباح النور.
تأملت ماريا وجهها للحظات، ثم سألتها:
- مالك؟ شكلك مش طايقة نفسك النهارده.
وضعت تيا حقيبتها في المكان المخصص لها، ثم تنهدت.
- يومي النهارده بدأ بقرف، وشكله هينتهي بقرف.
رفعت ماريا حاجبيها باهتمام.
- إيه ده؟ احكيلي!
اقتربت تيا منها وبدأت تحكي لها ما حدث، من إجبار والدتها لها على ارتداء الفستان، وحتى مقابلة باسم.
وما إن انتهت حتى اتسعت عينا ماريا.
- استني بس! إنتِ رفضتي الدكتور البيطري؟!
- أيوه، عندك اعتراض؟
- لا خالص، بس كنت عايزة أعرف لو عنده عيادة فاضية نوديهالك تكشفي على أعصابك منه!
انفجرت تيا ضاحكة، بينما تدخل عمر من مكانه قائلًا:
- يعني إيه؟ رفضتي الدكتور؟! يخسارة، ده كان ممكن يبقى عندنا خصم على علاج الحيوانات! أنا وماريا مربيين قط!
نظرت إليه تيا باستغراب.
- هو أنا شكلي فاتحة جمعية خيرية ليكم ولا إيه؟!
ضحكت ماريا، ثم قالت لعمر:
- سيب البنت في حالها يا عمر، مش ناقصة منك.
- أنا بقول مصلحة عامة يا جماعة!
وفي تلك اللحظة، جاء صوت ياسين من خلفهما:
- هو إنتوا جايين تشتغلوا ولا فاتحين قعدة حكي الصبح؟
التفت الثلاثة إليه، فأجاب عمر بسرعة:
- بنناقش موضوع مهم يا شيف.
نظر ياسين إليه بشك.
- خير؟
ردت ماريا وهي تحاول كتم ضحكتها:
- تيا رفضت عريس كان متقدم لها.
نظر ياسين إلى تيا للحظة، ثم قال بلا اهتمام:
- وإيه المشكلة؟ هو حد أجبرها توافق؟
ابتسمت تيا ابتسامة صغيرة.
- أخيرًا حد عاقل في المكان ده!
رد ياسين وهو يلتقط ملف الطلبات:
- متفرحيش أوي، أنا مش فاضي لمشاكل عائلية. يلا كل واحد يرجع لشغله.
ضحك عمر، بينما عادت ماريا إلى تقطيع الخضروات.
نظرت تيا إلى ياسين وهو يبتعد، ثم تمتمت:
- هو لازم يبوظ أي لحظة لطيفة في حياتي؟!
وفجأة، ظهر إيلاف من ناحية المدخل، وكان يضحك بطريقة مبالغ فيها وهو ينادي:
- ياسين! تعالى بسرعة!
التفت ياسين نحوه باستغراب.
- خير؟ في إيه؟
- أم تيا هنا وعايزة تاخدها!
نظر إليه ياسين ببرود، ثم قال:
- وأنا مالي؟ قول لتيا تروح تكلمها.
تدخلت تيا بسرعة، وقد شعرت ببعض الحرج أمام زملائها.
- أنا هروح أشوفها.
تركت ما بيدها واتجهت نحو المدخل، بينما تبادل عمر وماريا نظرة ضاحكة.
---
وجدت تيا والدتها تقف بالقرب من الاستقبال، وما إن رأتها حتى قالت باستغراب:
- إنتِ جيتي الشغل كمان يا ماما؟!
ردت والدتها دون اهتمام:
- أعمل إيه يعني يا تيا؟!
- طب خير؟ في حاجة حصلت؟
اقتربت منها والدتها وقالت بحماس:
- بصي، عندي ليكي عريس أخطر وأحسن من ده!
أغمضت تيا عينيها للحظة، ثم قالت باستسلام:
- ماما، الله يخليكي روحي إنتِ! جاية علشان تقوليلي على عريس؟ وبعدين إيه حكاية العرسان دول فجأة؟ من الآخر، أنا مش هتجوز غير اللي يضحي بكل حاجة علشاني و...
قاطعتها والدتها وهي تلوح بيدها.
- خلاص خلاص، فهمت دماغك! إنتِ مش هتتجوزي غير اللي في خيالك ده!
فتحت تيا عينيها بصدمة.
- ومين قال إني عايزة؟! يلهوي بجد! روحي يا ماما أرجوكي، ولما أرجع نشوف الموضوع ده!
- ماشي، بس متنسيش إن عندي كلام تاني معاكي.
- حاضر، سلام!
غادرت والدتها المكان أخيرًا، فتنفست تيا براحة، ثم التفتت لتجد ياسين واقفًا خلفها، وقد كان يضحك على ما سمعه.
- واضح إن والدتك مصممة!
نظرت إليه تيا بضيق.
- أعمل إيه بقى؟ مش هتسكت الفترة دي خالص!
توقف ياسين عن الضحك، ثم أشار نحو المطبخ.
- خلاص، كفاية هزار على حساب الشغل. يلا، عندنا طلبات مستنية.
تمتمت تيا بصوت هادئ:
- هو إيه الانفصام ده؟
كان ياسين يحمل بعض الصناديق، لكنه التفت إليها فور سماع كلمتها.
- سامعك على فكرة!
ارتبكت تيا قليلًا، ثم أجابت بسرعة:
- ما أنا عارفة أصلًا!
رفع ياسين حاجبه باستغراب، ثم أكمل طريقه نحو المطبخ.
- طب يلا يا أستاذة، بدل ما أغير رأيي وأرجعك تقشري بطاطس من الأول.
نظرت تيا إليه باعتراض.
- لا، كده كتير! هو مفيش ترقية في المكان ده؟!
ضحك ياسين دون أن يلتفت إليها.
- لما تعرفي تقطعي الخضار نبقى نفكر في الترقية
تبعته تيا وهي تتمتم:
- ربنا يصبرني عليك يا شيف ياسين !
شكرا لزيارتكم عالم روايات سكيرهوم
