رواية دوار العوض الفصل الثالث 3 بقلم هاجر سلامه

الحما صباح فضلت واقفة في الصالة وجسمها كله بيترعش من الخوف والتوتر وبصت لنانسي بنظرة تحذير قوية وقالت لها بصوت جهوري هز الحيطان اسمعي يا بت أنتي اطلعي فوق شقتك حالاً ومسمعش صوتك برة الشقة دي خالص إحنا في صباحية ومش عايزين فضايح قدام الناس والجيران

إبراهيم مادتش لنانسي فرصة تنطق بكلمة تانية ومسكها من دراعها بكل قوته وسحبها وراه على السلم وهي عمالة تتنطط وتزعق بس هو مكنش سامع ليها وطلع بيها شقتهم فوق وزقها جوة الصالة ورزع الباب وراهم بكل غل وشه كان أحمر وعروقه بارزة من كتر العصبية والخوف اللي مالي قلبه وقرب منها وبص في عينيها وقال بصوت واطي ومخيف

إبراهيم :

انتي عرفتي الكلام ده ازاي وانطقي حالا وم تخبيش عليا كلمة واحدة مين اللي قالك السر ده وإيه اللي أنتي قولتيه تحت قدام هيام أنتي كنتي عايزة تخربي بيتي وتضيعيني

نانسي نفضت إيدها منه وبصت له بكل تحدي والغيرة كانت بتاكل في قلبها من المنظر اللي شافته تحت وقالت له بضحكة كلها شماتة ووجع

نانسي :

عرفت ازاي دي سهلة قوي يا إبراهيم إنت فاكر إن مفيش حاجة بتستخبى في الدنيا دي والا إيه أنا عرفت إنك كنت متجوز هيام علشان الورث الكبير اللي سمعت عنه من أصحابك في الكلية وعرفت إن أهلها لما ماتوا سابوا لها أرض وبيوت في البلد بس هي مكانتش تعرف قيمتها ولا كانت مهتمة وإنت لفيت عليها لحد ما خليتها تتجوزك علشان تلطش كل ده وأنا بقى كنت البنت اللي بتحبها وسبتني فجأة من غير أي سبب يذكر وجعت قلبي وكسرتني زمان وجات أمك وقتها وطيبت خاطري وقالت لي معلش يا بنتي ابني راح يتجوزها مصلحة ودا مشوار ومسألة وقت بالظبط وهيطلقها وياخد القرشين ونرجع لبعض ونعيش في تبات ونبات أمك هي اللي قالت لي على كل حاجة من زمان يا إبراهيم علشان تطمني إنك راجع ليا

إبراهيم حس إن الصدمة لجمت لسانه وحط إيده على راسه وقعد على الكنبة وهو مش قادر يقف على رجليه الكلام رجّعه لسنين ورا ليوم ما فكر في الخطة دي مع أمه لما عرفوا بوجاهة أهل هيام الله يرحمهم والورث اللي سابوه ومحدش كان يعرف عنه حاجة فضل ساكت ثواني وبعدين رفع عينه وبص لنانسي وقال بنبرة صادقة ومليانة وجع

إبراهيم :

أيوا يا نانسي أنا مش هأنكر أنا فعلاً في الأول اتجوزتها علشان الطمع وعشان القرشين والورث اللي كان هيتكتب باسمها وكنت متفق مع أمي إنها فترة وأطلقها ونعيش إحنا بالفلوس دي بس اللي أنتي مش فاهماه وماتعرفيهوش إن مع الأيام والسنين اللي عشتها مع هيام أنا أحبتها بجد أحبتها لدرجة مكنتش اتخيلها في حياتي هيام شالتني في عينيها وكانت بتتقي الله فيا في كل خطوة وملهاش أي ذنب في الدنيا دي كلها أنا مع الوقت نسيت الفلوس ونسيت كل حاجة وبقيت مش شايف في الدنيا دي غيرها ومقدرش أستغني عنها ثانية واحدة ولا هقدر أطلقها زي ما أمي كانت فاهمة

نانسي صرخت في وشه وعينيها مليانة دموع الغل والقهر وقالت له

نانسي :

يعني إيه أحبتها ومتقدرش تستغني عنها أمال أنا إيه ذنبي في اللعبة القذرة بتاعتكم دي طالما أحبتها اتجوزتني ليه وجبتني هنا ليه وقعدتني في شقتها وجرحت كرامتها ودلوقتي نازل لها في الصباحية تبكي تحت رجليها إنت بني آدم أناني ومابتفكرش غير في نفسك وبس يا إبراهيم

إبراهيم قام وقف وبص لها بكل قسوة وقال

إبراهيم :

أنا اتجوزتك علشان ضغط أمي اللي مابيرحمش وعشان موضوع الخلفة اللي هيام ملهاش يد فيه وأمي فضلت تزن فوق دماغي لحد ما وافقت بس اسمعي يا نانسي هيام خط أحمر في البيت ده والسر اللي أنتي عرفتيه دا لو طلع برة بقك أو هيام عرفت بيه كلمة واحدة والله العظيم هتشوفي مني وش عمرك ما شفتيه في حياتك وهطلقك في نفس اللحظة وهرميكي في الشارع ومش هيهمني أي حد فاهمة ولا مش فاهمة

نانسي قعدت على السرير وفضلت تعيط بحرقة وهي حاسة إنها دخلت في جوازة محكوم عليها بالفشل من أول يوم وإن جوزها اللي حلمت بيه سنين قلبه وعقله مع وحدة تانية خالص ومش شايفها ولا مقدر وجودها معاه في نفس الوقت تحت في شقة الحما صباح كانت الحما قاعدة في الصالة وايدها على قلبها وبتتنفس بصعوبة من كتر الخوف لولا إنها لحقت نانسي في آخر لحظة كان كل حاجة انكشفت وهيام عرفت الحقيقة وضاعت الفلوس والورث اللي هما لسه بيخططوا ازاي يسيطروا عليه هيام خرجت من الأوضة وبصت لحماتها بنظرات كلها شك وريبة وقالت بصوت هادي بس مليان ذكاء

هيام :

مالك يا طنط وشك اصفر كده ليه وخايفة من إيه بالظبط هي نانسي كانت تقصد إيه بكلامها دا وإيه السر اللي أنا معرفهوش ومخدوعة فيه من أول يوم إنتي وإبراهيم مخبيين عليا إيه يا طنط قولي لي الحقيقة

الحما صباح حاولت تتماسك وتجمع شجاعتها المزيفة وضحكت بضحكة صفرا وقالت لها

الحما صباح :

يا بنتي سر إيه وكلام فارغ إيه دي بت هبلة ولسه عيلة صغيرة وماتعرفش حاجة في الأصول وكانت غيورة بس لما شافتك في البيت وشافت إبراهيم نازل يطمن عليكي وعقلها صور لها حاجات ملهاش أساس من الصحة متسمعيش لكلام العيال دا واقعدي ارتاحي في أوضتك ومتشغليش بالك بحاجة واصبري كده لحد ما نعدي الأيام دي على خير

هيام سكتت ومحبتش تجادل معاها بس من جواها مكنتش مصدقة ولا كلمة من اللي حماتها قالتها الشك بدأ يزرع جوة قلبها وعقلها فضل يودي ويجيب وافتكرت كل السنين اللي فاتت وازاي إبراهيم كان متمسك بيها بزيادة وأوقات كان بيبقى فيه نظرة غموض في عينيه مكانتش عارفاها حست إن فيه مصيبة متدارية ورا الوشوش الطيبة دي وقررت من جواها إنها لازم تدور وتعرف إيه هو السر دا مهما كلفها الأمر ومش هتقعد مكسورة الجناح ومستسلمة للوضع ده تاني أبداً ودخلت أوضتها وقفلت الباب وهي بتفكر في أول خطوة هتعملها علشان تكشف الحقيقة كلها

الأيام بدأت تمر تقيلة ورخمة على كل اللي في البيت وكل واحد جواه بركان هادي ومستني اللحظة اللي ينف.جر فيها هيام كانت قاعدة في أوضتها تحت شريط السنين كله بيمر قدام عينيها زي فيلم سينما بتفتكر تفاصيل صغيرة مكانتش بتدقق فيها زمان كلام إبراهيم عن أهلها وسؤاله المستمر عن أي ورق قديم سابوه ليها ولما كانت تقوله إنها ملهاش حد ومفيش معاها غير ذكرياتهم كان وشه بيتغير ودلوقتي بعد كلام نانسي وتوتر حماتها صباح كل الخيوط بدأت تتشابك في عقلها وعرفت إن فيه لغز كبير ورا جوازة إبراهيم منها اللغز ده مش مجرد حب وإعجاب زي ما فهمها في الكلية

هيام قامت وقفت قدام المراية وبصت لوشها الدبلان وقالت لنفسها بصوت واطي :

أنا مش هفضل قاعدة هنا مستنية رحمتهم ولا هكون الضحية اللي الكل بيدوس عليها علشان خاطر هبلهم وطمعهم طالما ماليش ضهر في الدنيا دي فربنا هو ضهري وأنا اللي هجيب حقي بنفسي ولازم أعرف إبراهيم وأمه مخبيين عني إيه

خرجت من الأوضة بخطوات هادية ولقت الحما صباح قاعدة في الصالة وعمالة تفرز في قماش وسلاسل دهب جايباها لنانسي أول ما صباح شافت هيام طالعة غيرت ملامح وشها بسرعة ورسمت الطيبة المصطنعة وقالت :

تعالي يا هيام يا بنتي تعالي شوفي الغوايش دي لسه جايباها لعروسة إبراهيم عقبال ما نفرح بعيالهم يا رب أنتي عارفة نانسي بنت أختي وبحب أظبطها بس أنتي برضه غالية عندي يا حبيبتي وماتزعليش من كلامها بتاع الصبح دي عيلة وغيورة بس

هيام بصت للدهب ببرود وقعدت على الكنبة اللي قصادها وقالت بنبرة عادية خالص علشان متخليش صباح تشك فيها :

ولا يهمك يا طنط أنا مش زعلانة ونانسي لسه عروسة جديدة ومن حقها تغير على جوزها وأنا برضه مقدرة الموقف ومش عايزة مشاكل أنا بس كنت عايزة أطلب منك طلب صغير لو ينفع

الحما صباح حطت الدهب من إيدها وبصت لها بشك وقالت :

طلب إيه يا حبيبتي اؤمري عينيا ليكي طالما هادية وعاقلة كده

هيام :

أنا بقالي كتير من يوم ما اتجوزت مروحتش البلد عند أهلي الله يرحمهم وكنت عايزة أسافر هناك يومين أغير جو وأشوف قرايب أبويا البعاد وأقعد في بيتنا القديم شوية أشم ريحة أمي وأبويا تفتكري إبراهيم هيوافق

صباح أول ما سمعت سيرة "البلد" و"البيت القديم" قفشت في مكانها والدهب وقع من إيدها على التربيزة وعينيها برقت من الخوف والتوتر وقالت بسرعة وتلعثم :

بلد إيه وبيت قديم إيه يا بت الناس اللي عايزة تروحيه دلوقتي إنتي مأليكيش حد هناك خلاص وبعدين إبراهيم مش هيوافق تسافري لوحدك في الظروف دي وإنتي هنا معززة مكرمة تحت رجلي سيبك من الأفكار دي وخليكي قاعدة مكانك أحسن ليكي

هيام لاحظت الرعب اللي ظهر في عيون حماتها بمجرد ما جابت سيرة البلد الشك جواها اتحول ليقين إن السر كله مستخبي هناك في بلد أبوها وأمها بس حاولت تبان طبيعية وقالت :

خلاص يا طنط اللي تشوفيه أنا قولت أسألك الأول ولما يجي إبراهيم هبقى أتكلم معاه

في نفس الوقت فوق في الشقة الجديدة إبراهيم كان قاعد في الصالة وحاطط راسه بين إيديه والبيت كان هادي خالص نانسي كانت في الأوضة عمالة تعيط ومنهارة من كلامه وقسوته معاها في أول يوم جواز إبراهيم قام ودخل لها الأوضة ولقاها قاعدة على السرير ودموعها مغرقة وشها صعبت عليه شوية وقرب منها وقعد جنبها وقال بصوت هادي :

نانسي أنا مكنتش عايز أمد إيدي عليكي ولا أزعقلك في يوم زي ده بس أنتي اللي عصبتيني بكلامك تحت قدام هيام أنتي مش عارفة إن الكلام ده لو هيام عرفته هتمشي وتسيب البيت وأنا مقدرش أعيش من غيرها

نانسي رفعت راسها وبصت له بغل وقالت :

أنا مش قادرة أستوعب إنك لسه بتفكر فيها وبتحميها بالمنظر ده وأنا اللي بقيت على الهامش إنت اتجوزتني علشان تخلف وبس يا إبراهيم يعني أنا مجرد وسيلة علشان أمك تشوف حفيد وإنت ترضي أنانيتك وتفضل محتفظ بهيام والفلوس اللي هتاخدها من وراها إنت طلعت بني آدم مادي وبشع وأنا ندمانة إني وافقت أتجوزك

إبراهيم اتنهد بضيق وقام وقف وقال :

خلاص يا نانسي اللي حصل حصل وإحنا دلوقتي متجوزين قدام ربنا والناس عيشي حياتك وافرحي بشقتك وحاجتك وسيبي هيام في حالها وأنا هعدل بينكم في كل حاجة بس مسمعش سيرة الموضوع ده تاني على لسانك خالص فاهمة

نانسي سكتت ومردتش عليه بس من جواها الغيرة كانت بتاكلها وقررت إنها مش هتسيب هيام ترتاح في البيت ده طالما إبراهيم متمسك بيها كدا ولازم تخلي هيام تعرف الحقيقة علشان تمشي وتسيب إبراهيم ليها لوحدها

الليل ليل وإبراهيم نزل تحت علشان يشوف أمه ويطمن على هيام أول ما دخل الشقة لقى أمه صباح واقفه مستنياه في الطرقة ووشها مخطوف وسحبته من إيده ودخلوا المطبخ وقالت له بصوت واطي ومذعور :

الحق يا إبراهيم مراتها المصونة هيام كانت لسه بتسألني عن السفر للبلد وعايزة تروح هناك تشوف بيت أبوها القديم وقرايبها أنا خايفة البت دي تكون حست بحاجة أو نانسي تكون لمحت ليها بكلمة تانية من وراك البت لو سافرت البلد وعرفت إن الأرض الكبيرة اللي هناك والبيوت اتسجلت باسمها وإنها ورثت ثروة ملهاش أول من آخر كل خططنا هتضيع وإنت مش هتشوف مليم واحد من اللي بنحلم بيه

إبراهيم وشه اصفر وجسمه سقع من الخوف وقال لأمه :

أنتي بتقولي إيه يا أمي هيام عايزة تسافر البلد لا مستحيل أنا نبهت على نانسي ومظنش إنها قالت لها حاجة بس يمكن كلام نانسي الصبح هو اللي خلاها تشك وتفكر في أصحابها وأهلها أنا هطلع اتكلم معاها وأقفل السيرة دي خالص ومش هخليها تخرج من باب البيت ده لحد ما الأمور تستقر

إبراهيم خرج من المطبخ وراح على أوضة هيام وفتح الباب ودخل لقاها قاعدة بتقرأ في كتاب ببرود تام مكنش متعود عليه منها قرب منها وقعد جنبها وقال بنبرة حنينة مصطنعة :

أمي قالت لي إنك عايزة تسافري البلد يا هيام ليه يا حبيبتي تفكري في كدا وإنتي عارفة إني مقدرش أستغنى عنك وم أستحملش تبعدي عن عيني يوم واحد وبعدين هناك مفيش ليكي حد والبيوت قديمة ومهجورة خليكي هنا جنبي وأنا هعملك كل اللي أنتي عايزاه

هيام رفعت عينيها وبصت له بنظرة غريبة مفيش فيها الحب القديم اللي كان بيملا عيونها وقالت بصوت هادي ومخيف من كتر الثبات :

ماشي يا إبراهيم طالما أنتي وأمك مش عايزين أسافر خلاص أنا مش هسافر وهقعد هنا تحت رجليكم لحد ما أشوف أخرتها معاكم إيه

إبراهيم حس براحة لما لقاها وافقت بسهولة ومجادلتش معاه وباس راسها وقال :

ربنا يخليكي ليا يا حبيبتي وأنا عارف إنك أصيلة وبتستحملي علشاني

سابها وخرج وهو مطمن إن الموضوع اتأفل وهيام فضلت قاعدة في مكانها وابتسامة غامضة ظهرت على وشها وقالت في سرها :

طالما الخوف مالي قلوبكم كدا من سيرة البلد يبقى السر الكبير هناك وأنا مش هسافر يا إبراهيم أنا هعرف الحقيقة من هنا ومن تحت إيديكم ومن غير ما حد فيكم يحس

الفصل الرابع من هنا