رواية جريمة قتل واغتصاب الفصل الثالث بقلم ياسر عوده
-عروسه ايه يا اسماعيل، اسمع انا ماليش في حواراتك، وانت حواراتك كتير.
-حوارات ايه يا عم، دا جزاتي اني لقيت عروسه ولما شوفتها قولت دي تنفع ايمن حبيبي وابن شركتي.
-مش فاهم منك حاجه، عروسه ايه؟
-عربيه، بس مش عربيه عاديه، عربيه ربع نقل بس ايه، تشوفها تقول حالتها زيرو.
-ايوه يا اسماعيل، بس لو حالتها زي ما بتقول كده دي هتقطع مبلغ وقدره، وانا مش بشتغل في الحاجات دي لاني ماعيش فلوس تكفي الشغل ده.
-ولا مبلغ ولا حاجه، صاحب العربيه واقع، ومزنوق زنقه ما يعلم بيها الا ربنا، الواد ابنه اتمسك في كمين وهو معاه مخدر الحشيش، والمحامي وعده انه هيطلعه بس طالب منه مبلغ كبير اوي، والراجل ماعهوش الفلوس وعلشان كده قرر يبيع العربيه، وعاوز يبعها النهارده قبل بكره، ومستعد يبعها بـ نصف التمن، ويمكن ربع التمن لو الفلوس حاضره دلوقتي قبل ساعه كمان.
-ايوه يا اسماعيل، بس احنا كده هنستغل احتياج الراجل وهنبخس بتمن العربيه الارض.
-نبخس ايه وكلام فاضي ايه، دي تجاره والتجاره حلال، والراجل هو اللى عاوز يبيع بالتمن ده، احنا مالنا ولو انت ماشترتش اكيد في غيرك هيشتري، البيعه دي انت هتكسب فيها فلوس كتير اوي يا ايمن، وانا ليا حلوتي طبعا.
وقتها انا فكرت في كلامه، وبعدها قولتله:
-خلاص يا اسماعيل انا موافق، بس طبعا لازم اشوف العربيه الاول.
-يا حبيبي انت تيجي معايا نشوفها، بس خلي معاك مبلغ تدفعه عربون وخد العربيه معاك.
-وصاحب العربيه هيديني العربيه كده من غير ما يضمن حقه.
-انا الضامن يا ايمن، اصل اسماعيل دا حبيبي زي ما انت حبيبي كده، وهو مستعجل علشان يروح يدفع فلوس للمحامي علشان يطلع ابنه.
-ودا عاوز كام طيب؟
-يعني ممكن نقول خمسين الف مثلا بشكل مؤقت، لغايه لما تحصل البيعه وكل واحد ياخد حقه.
طبعا المبلغ كان صغير اوي بالنسبه لتمن العربيه، وانا وافقت وخدت المبلغ اللى قاله اسماعيل وروحت اقابل صاحب العربيه اللى قالي عليه، ولما شوفت العربيه لقيت حالتها جديده اوي، كانت كسر زيرو فعلا، وكان تمنها لو بعتها على حالتها دي من غير ما اعمل فيها حاجه خالص مبلغ كبير اوي، ولقيت صاحب العربيه متلهف فعلا علشان يبيع، واديته العربون وخدت العربيه، وكتبلي ورقه بالمبايعه وخدت العربيه وروحت بيها بعد ما اديت لـ اسماعيل حلوته، بس لما روحت وفضلت افكر في اللى حصل حسيت ان في حاجه مش مريحه في الموضوع، وعلشان كده قررت اني لازم اروح تاني يوم الصبح على المرور علشان اكشف على العربيه، وفعلا دخلت المرور وهناك قابلت امين شرطه اعرفه وقولتله:
-اكشفلي على العربيه دي واعرفلي لو عليها أي مشاكل من أي نوع.
وفعلا كشف على العربيه وبعدها لقيته جالي وقالي:
-انت جبت العربيه دي منين يا ايمن، العربيه دي مسروقه، ومش بس كده صاحب العربيه اتقتل وهو بيدافع عن العربيه.
انا اترعبت لما قالي الكلام ده، وقولتله:
-ايه الكلام اللى بتقوله دا، يخربيتك يا اسماعيل ربنا ينتقم منك، اعمل ايه يا امين؟
-اسمع المفروض اني اتحفظ على العربيه هنا واتحفظ عليك انت شخصيا ونبلغ النيابه، بس انا عارف انك مش بتاع الشغل الشمال ده، وعلشان كده انت هتاخد العربيه دي وتطلع على النيابه، وهناك هتقدم البلاغ باللى حصل معاك بس ماتقلش عني حاجه، هتقول انك شاكك في امر العربيه وتحكلهم عن اللى باعلك العربيه وهما هيعملوا اللازم.
-ايوه بس هما كده هيمسكوا زميلي اللى معايا في الشغل بسبب العربيه دي؟
-يمسكوه ولا يغور في داهيه، هو يتصرف معاهم لو مالهوش دعوه بالموضوع هيخرج منها، انما لو عارف يبقى يستاهل اللى يحصله، كفايه انه كان عاوز يورطك معاه في المصيبه دي.
وفعلا سمعت كلام الامين، ولما خرجت من عنده خدت العربيه وروحت على النيابه، وهناك قابلت وكيل النيابه وقولتله:
-يا باشا انا اشتريت من واحد عربيه بسعر رخيص، انا دفعتله العربون بتاعها بس من ساعه ما اشتريتها وانا مش مرتاح، وحاسس ان في حاجه غلط، وعلشان كده جيت اقدم بلاغ عن العربيه علشان تتأكدوا لو كانت العربيه دي سليمه او لا علشان انا مش مرتاح للموضوع كله.
وقتها وكيل النيابه طلب استعلام امني عن العربيه وعني انا كمان، ووقتها عرف ان العربيه مسروقه وكمان متورطه بجريمه قتل، وبعدها قالي:
-احكيلي نت اشتريت العربيه دي ازاي ومن مين؟
وقتها حكتله كل اللى حصل بيني وبين اسماعيل، وكمان الشخص اللى اشتريت منه العربيه، ووقتها النيابه طلعت قوه من الشرطه معايا علشان اعرفهم مكان اسماعيل، وفعلا روحت معاهم للشركه وقبضوا عليه، وبعدها روحنا للشخص اللى باعلي العربيه، وهناك اسماعيل انكر انه يعرف أي حاجه عن ان العربيه مسروقه، وقال:
-يا باشا البائع هو اللى قالي على العربيه، وماعرفش أي حاجه عن انها مسروقه او حكايه انها مرتبطه بجريمه قتل.
بس الشخص التاني البائع قال في اقواله:
-اسماعيل فعلا مايعرفش ان العربيه مرتبطه بجريمه قتل، بس هو كان عارف ان العربيه مسروقه.
وبسبب اعترافه تم اتهام اسماعيل واتحكم عليه بالسجن سنتين، وحتى انا كمان خسرت الفلوس اللى دفعتها عربون ال 50 الف، لان الراجل اللى خدهم قال في النيابه:
-الفلوس اتوزعت يا باشا، انا والناس اللى سرقنا العربيه سرفنا نصبنا، واسماعيل خد نسبته هو كمان.
شوفت بقى يا عم سعيد ان الشغلانه دي مش سهله زي ما انت بتقول؟
ودا الكلام اللى قالهولي ايمن وقتها يا باشا، وبصراحه لما قالي الكلام دا ابتديت اخاف من الشغلانه بتعته فعلا، كان ممكن في لحظه يتحبس دا غير الفلوس اللى راحت عليه، وانا راجل غلبان وعلى باب الله.
-تمام يا سعيد، قولي بقى حكايه ايمن واسماعيل دي حصلت من امتي؟
-مش فاكر يا باشا، بس هي حصلت من فتره، بس اللى اعرفه ان اسماعيل طلع من السجن بعدها، ولما طلع قدر يرجع يشتغل في الشركه مره تانيه.
-وازاي الشركه تشغله تاني بعد اللى عرفوه عنه؟
-هو جه يا باشا وفضل يعيط لرئيس مجلس الاداره وقاله انه تاب وبقي يعرف ربنا والكلام ده، وفعلا صعب عليه ورجعه الشغل.
-وانت ايه رأيك يا سعيد، شايف ان اسماعيل دا تاب فعلا ولا ايه نظامه؟
-الله اعلم يا باشا، بس اللى اعرفه ان احوال اسماعيل اتحسنت اوي، مع انه لسه طالع من السجن من فتره مش كبيره.
-تمام يا سعيد تسلم.
وبعد ما كنت شاكك في سعيد استبعدته فتره، وروحت طبعا لـ هشام باشا وعرفته بالمعلومات اللى وصلتلها وبكل اقوال سعيد، وحكايه ايمن بـ اسماعيل، ووقتها هشام باشا قالي:
-احنا علشان نخلي اللى اسمه اسماعيل دا يتكلم يا مطاوع لازم نمسك عليه أي دليل، والاحسن اننا نطلع اذن من النيابه ونفتش بيته، يمكن وقتها نلاقي أي دليل ضده يخلينا نضغط عليه ويعترف بالحقيقه.
-تمام يا باشا.
وفعلا دا اللى حصل، وجبنا اذن من النيابه، وهشام باشا طلع معانا في حمله علشان نفتش بيت اسماعيل ونقبض عليه، ولما روحنا البيت بتاعه مالقنهوش موجود، واللى كان هناك مراته وعياله، وطبعا فتشنا البيت ولما فتشناه لقينا عنده فلوس، وماكنش مبلغ صغير كان فوق ال 200 الف جنيه، وطبعا حرزنا المبلغ ودا كان دليل كافي بتورط اسماعيل بجريمه قتل ايمن، لان على حسب اقوال زوجه ايمن اللى اسمها نوال ان الجناه سرقوا فلوس من الدولاب، بس هي ماقلتش المبلغ قد ايه وقتها.
لما سألنا مرات اسماعيل عن مكان جوزها وقتها قالت:
-ماعرفش حاجه عن مكانه يا باشا، هو مش بيقولنا هو رايح فين وجاي منين.
وقتها الباشا قالها:
-اتصلي عليه واسأليه هو فين، واوعي تعرفيه ان احنا هنا انتي فاهمه.
-حاضر يا باشا.
وفعلا مراته اتصلت عليه وقالتله:
-انت فين يا اسماعيل؟
رد عليها وقالها:
-وانتي من امتي بتسأليني السؤال ده؟
-الواد ابنك اتخانق مع واحد صحبه وعوره، والحكومه جت وخدته على القسم، وانا مش عارفه اعمل ايه؟
رد عليها اسماعيل بكل هدوء وقالها:
-ماتعمليش حاجه، انا هروح اشوفه هبب ايه وهراضي اهل الواد اللى اتخانق معاه.
وقفل اسماعيل الاتصال مع مراته، بس اللى حصل بعد كده ان اسماعيل مارحش لـ قسم الشرطه زي ما قال، ومش بس كده هو حتى مارجعش للبيت تاني، وفهمنا وقتها انه عرف ان احنا كنا عملين ليه كمين، وعلشان كده هرب وماجاش، واتوقعنا ان ممكن أي حد من الجران اتصل عليه وعرفه اننا في بيته مثلا، المهم اننا كنا لازم نتصرف ونجيب اسماعيل من تحت الارض، وابتدينا نعمله اكتر من كمين، مره عند بيته ومره عند بيت اخواته البنات، وفضلنا لمده 48 ساعه نطارده بالشكل دا، وكنا متأكدين اننا خلاص وصلنا للقاتل لانه لو كان بريء، فاكيد مش هيهرب مننا بالشكل ده.
وبعد محاولات كتير وتتبعنا رقمه قدرنا نوصله، كان مستخبي عند واحد من اصدقائه وقبضنا عليه، وقدام النيابه انكر كل حاجه في البدايه، بس وكيل النيابه قاله:
-لو انت مالكش دعوه بقتل ايمن، ليه كنت هربان طول الوقت دا، وكمان الفلوس اللى لقناها عندك في البيت دي بتاعت مين.
-يا باشا دي فلوس، كسبانها بالحلال، وانا هقتل ايمن ليه بس، مافيش بيني وبينه غير كل خير، ولو حضرتك تقصد بكلامك اللى حصل من اكتر من سنتين انا اتحبست وقتها وسددت اللى عليا للحكومه وانا دلوقتي بريء ومافيش عليا حاجه خالص.
-بص يا اسماعيل، انت المتهم الوحيد اللى قدامي، ولو اعترفت او لا انت اللى هتشيل الجريمه كلها، ودي كمان جريمه قتل وسرقه واعتداء على سيده، يعني حكم الاعدام مستنيك.
شكرا لزيارتكم عالم روايات سكيرهوم
