رواية حكاية لم ينهيها الفراق الفصل الثالث
الشاب اتنرفز وقال : إنت جاي تعلمنا الأصول في بلدنا؟
شاهين قرب خطوة وبصله في عينه قال: لا أنا مش جاي أعلّمك الأصول أنا بس بسألك الراجل ده له حق عندك ولا لأ؟
الشاب: انا اللي ليا حق وهو مش من حقه يتهرب من الدفع!
شاهين التفت للراجل وقال: الحساب كام يا حاج؟
الراجل: يا ولدي مش رايد أحملك همي أنا هتصرف.
شاهين: سألتك الحساب كام ما سألتكش رايد تحمّلني همك ولا لأ.
الراجل قال المبلغ فشاهين أخرجه من جيبه ودفعه للشباب وطلب منهم يصلحوا العطل ويخلّوا العربية تتحرك
الشاب أخد الفلوس وسكت لكن شاهين ما سابوش يمشي من غير ما يكلمه.
شاهين: الفلوس دي حقكم لو الشغل اتعمل لكن اللي حصل منكم مع الراجل الكبير ما يتكررش. الكبير يتصان واللي له حق ياخده بالمعروف إنت فاهمني؟
الشاب هز راسه: فاهم يا بيه.
شاهين: زين روحوا خلّصوا شغلكم.
رجع شاهين ناحية عربيته والراجل الكبير ناداه قال : يا ولدي ربنا يجبر خاطرك كيف ما جبرت خاطري بس أنا ما أعرفكش وإنت ما تعرفنيش ليه تسوي وياي كل ده ؟
شاهين وقف والتفت له قال: عشان لو أبويا الله يرحمه كان مكانك كنت أتمنى ألاقي اللي يقف وياه واللي ما يرضاهوش على أبوه ما يرضاهوش عليك يا راجل يا طيب.
الراجل رفع إيده للسماء وقال: ربنا يرحم أبوك ويجعل عملك في ميزان حسناتك يا ولدي.
شاهين ركب العربية وميساء كانت باصة له بإعجاب وقالت: إنت لسه كيف ما إنت يا شاهين.
شاهين: يعني إيه؟
ميساء: يعني عمرك ما كنت بتهمل حد محتاج لك وتمشي حتى لو ما تعرفوش.
شاهين سكت لحظة وبعدين قال:
يا ميساء خلي بالك من حاجة. مش كل واحد يطلب المساعدة يبقى مظلوم ومش كل واحد صوته عالي يبقى قوي. اسمعي من الطرفين وافهمي الحكاية وبعدها احكمي. العدل مش إننا نقف مع اللي بنحبه وخلاص العدل إننا نقف مع الحق حتى لو على نفسنا.
ميساء فضلت باصة له وكأنها بتتعرف على أخوها من جديد: أنا كنت فاكرة إنك رجعت من أمريكا راجل أعمال كبير وبس لكن شكلك رجعت وياك حكايات كتير رغم ان انا كنت خابرة انك مقضيها مع الاجانب ومع الخواجات😏💔.
شاهين ابتسم ابتسامة خفيفة: عيب يا بت انتي لسه صغيرة على الحديت ده.
أول ما العربية دخلت الحوش زينب كانت واقفة عند الباب وكل شوية تسأل الخادمة إذا كان شاهين وصل ولا لأ.
زينب: الواد قال خمس دقايق بقاله ساعة!
الخادمة: يا حاجة هو مشوار المدرسة بعيد شوية وبعدين يمكن وقف يسلم على حد.
زينب: ربنا يطمّن قلبي عليه.
العربية وقفت ونزلت ميساء جري وقالت : أمايااا! شاهين جابني!
زينب حضنتها ورفعت عينيها لابنها وقالت:
الحمد لله على سلامتكم يا ولادي يلا ادخلوا الغدا اتحط وكل العيلة مستنياكم.
شاهين باس راس أمه ودخل معاها لكن أول ما وصل للمضيفة لاحظ إن فيه كلامًا حادًا بين عمه جابر واخوه احمد اللي كان لسه ما شافوش بعد ما رجع من السفر
شاهين وقف عند باب المضيفة ولمّا سمع صوت عمه جابر عاليًابص ناحية أحمد اللي كان واقف وظهره للباب وماسك ورقة في إيده وملامحه متغيرة.
جابر بعصبية: يا أحمد أنا مش هفضل أعيد في الحديت ده كل يوم! اللي بقوله يتنفذ وإنت خابر إن مصلحة العيلة فوق مصلحة أي حد فينا!
أحمد بحدة: وأنا عمري ما قصّرت في حق العيلة يا عمي بس مش معنى إني ساكت على طول إني موافق على كل حاجة بتحصل!
جابر: إنت بترد عليّ يا ولد؟!
أحمد: لا يا عمي أنا بتحدت وياك وفي فرق بين الاتنين إنت ربيتني على إني أقول الحق ولا يوم قلت لي اسكت عشان اللي قدامك أكبر منك.
جابر ضرب كف على كف وقال: يا ساتر يا رب! هو أنا ناقص وجع دماغ؟! كل ما أفتح وياك موضوع ألاقيك واقف لي على الكلمة!
شاهين كان واقف بيسمع ولما لمح أحمد أخيرًا اتغيرت ملامحه تمامًا وكل الغضب اللي كان على وشه اختفى وظهرت مكانه ابتسامة ما ظهرتش من ساعة ما دخل البلد....
شاهين بصوت جهوري: يا نهار أبوك أبيض! هو أنا رجعت البلد ولا دخلت محكمة من غير ما أعرف؟!
أحمد اتجمد مكانه والورقة وقعت من إيده ولف ناحية الباب ببطء وكأنه خايف يكون الصوت اللي سمعه مجرد وهم.
وقال بذهول: شاهين؟!
شاهين فتح دراعاته: أيوه يا سيدي شاهين اللي مش رايد تسلم عليه!
أحمد جري عليه وفي لحظة كان حاضنه بقوة لدرجة إن شاهين رجع خطوتين لورا.
أحمد بصوت مخنوق: ولد ابويا ! إنت جيت؟! والله إنت جيت بجد؟!
شاهين ضحك وهو بيطبطب على ضهره: أيوه يا خوي سيب لي ضلوعي بس! أنا راجع من أمريكا مش راجع من حرب!
أحمد بعد عنه ومسك وشه بين إيديه وبصله من فوق لتحت وهو بيقول:
يا ولد! إنت بقيت جبل! إيه اللي حصل لك؟! إنت كنت طويل بس مش للدرجة دي!
شاهين: وإنت اللي كنت مليان شعر أسود بقيت عامل كيف عمك جابر لما يصحى من النوم!
جابر بصله بصدمة مصطنعة: إيه يا واد؟! هو أنا بقيت مادة للسخرية في الدار؟!
أحمد ضحك وقال: أهو يا عمي شاهين لسه ما قعدش خمس دقايق وبدأ يوزع الشتائم بالمجان!
شاهين شد أحمد لحضنه تاني وقال: وحشتني يا أحمد والله وحشتني يا أخوي.
أحمد سكت وابتسامته هديت رفع إيده وطبطب على كتف شاهين وقال: وإنت كمان وحشتني 15 سنه يا شاهين
كنت كل ما أدخل المضيفة أبص على مكانك وأقول لو كان شاهين اهنا كان قعد جنبي واتخانق وياه على آخر حتة لحمة في الطبق!
شاهين: وإنت كنت بتسيب لي آخر حتة أصلًا؟! ده إنت لو لقيتني جعان كنت بتقول لي استنى لما نشوف الغدا هيكفّي ولا لأ!
أحمد: يا كداب! ده أنا كنت بديك نصيبي!
شاهين: نصيبك إنت؟! أمال نصيبي كان وين؟
أحمد: في بطنك يا حبيبي! إنت كنت بتاكل نصيبي ونصيب ميساء اللي ما كانتش جت على وش الدنيا!
وفجاة؟!💔
