رواية حكاية من قلب الصعيد الفصل الثالث
صباح جديد في سرايا الحاج محمود الهواري، والبيت بدأ يصحى واحدة واحدة.
الحاجة زينب كانت في المطبخ بتجهز الفطار، وهاجر بتساعدها، ومريم واقفة جنبهم بتجهز الأطباق.
زينب بحنان: صباح الخير يا بنتي يا مريم.
مريم: صباح النور يا أمي، أعملك حاجة تانية؟
زينب: ربنا يباركلي فيكي يا بنتي، إنتِ من ساعة ما صحيتي وإنتِ واقفة على رجلك، روحي ارتاحي شوية.
مريم بابتسامة: أنا مرتاحة والله يا أمي، وبحب أكون معاكي.
زينب: ربنا يخليكي ليا يا حبيبتي.
في اللحظة دي دخلت ليان المطبخ، لابسة لبس شيك وماسكة موبايلها.
ليان: صباح الخير.
زينب: صباح النور يا ليان، تعالي يا بنتي الفطار قرب يجهز.
ليان وهي بتبص للمطبخ: هو إنتوا بتصحوا من الفجر كل يوم كده؟!
زينب: دي عادتنا يا بنتي، البيت ليه شغل ومسؤوليات.
ليان: آه طبعًا، ما هو مفيش حاجة تتعمل غير الأكل والشرب.
مريم بصتلها وسكتت، لكن زينب فهمت قصدها.
زينب بهدوء: كل بيت وليه نظامه يا ليان، وإحنا متعودين على كده.
ليان: ربنا يعينكم بقى.
وسابتهم وخرجت من المطبخ.
مريم بصت لزينب وقالت: معلش يا أمي، متزعليش.
زينب: أنا مش زعلانة يا بنتي، بس ربنا يهدي النفوس.
وبعد شوية الكل اتجمع على السفرة.
الحاج محمود كان قاعد في مكانه، وحمزة جنبه، ويوسف نازل ومعاه ليان.
محمود: صباح الخير يا ولاد.
الكل: صباح النور يا حاج.
حمزة: إيه يا يوسف، نمت كويس؟
يوسف: الحمد لله، بس شكلي هتعود على النوم هنا بالعافية.
حمزة ضحك: ليه بس؟ ده إنت كنت بتجري في الأرض وإنت صغير.
يوسف: يا عم حمزة، دي كانت أيام وعدت، دلوقتي أنا بقيت بتاع مكاتب واجتماعات.
محمود: والأرض دي يا ابني عمرها ما تتعوض، دي خير أبوك وجدك.
يوسف: عارف يا حاج، وأنا مش ناسي أصلي، بس لازم نطور الشغل شوية.
حمزة: وده اللي بنتكلم فيه، وأنا معاك في أي خطوة فيها مصلحة العيلة.
ليان كانت قاعدة ساكتة، وكل شوية تبص في موبايلها، لحد ما زينب قالت:
زينب: مريم يا بنتي، اقعدي كلي معانا.
مريم: حاضر يا أمي.
حمزة سحب لها الكرسي وقال: تعالي يا مريم، اقعدي هنا.
ليان بصت للموقف بضيق، وقالت لنفسها: هو مفيش غير مريم في البيت ده؟!
يوسف لاحظ إنها متضايقة، لكنه ما حبش يتكلم قدام الكل.
بعد الفطار، يوسف خرج مع حمزة والحاج محمود علشان يشوفوا الأرض ويتكلموا في موضوع التوسعات الجديدة.
أما ليان فطلعت أوضتها، وأول ما دخلت قفلت الباب واتصلت بصاحبتها نادين.
نادين: إيه يا ليان، اختفيتي فين؟ بقالي يومين مش عارفة أوصلك.
ليان بضيق: أنا هنا في الجحيم اللي اسمه السرايا.
نادين ضحكت: لسه مش متعودة على عيلة جوزك؟
ليان: أتعود على إيه بس يا نادين؟ أنا زهقت من كل حاجة هنا، من البيت ومن الناس ومن طريقة حياتهم.
نادين: طب ويوسف؟ مش المفروض إنه جوزك؟
ليان ضحكت بسخرية: يوسف؟ أنا أصلًا مش بحبه ولا حاجة، هو بالنسبالي مجرد بنك متنقل. طول ما بينفذ أوامري وبيجيبلي اللي أنا عايزاه يبقى تمام، إنما حب ومشاعر والكلام ده، مفيش الكلام ده.
نادين: يا بنتي إنتِ بتتكلمي كده بجد؟!
ليان: أيوه طبعًا، وبعدين أنا مش بحب أهله خالص، وخصوصًا أمه.
نادين: ليه بس؟ دي شكلها ست طيبة.
ليان: طيبة إيه؟ دي عاملة فيها محامية لمريم، كل ما يحصل موقف تلاقيها بتدافع عنها وكأنها بنتها الوحيدة، وأي حاجة مريم تعملها تبقى صح، وأي حد يتكلم معاها يبقى غلطان.
نادين: طب ما يمكن بتحبها وبتعاملها زي بنتها.
ليان بسخرية: دي لو معاها أطفال، أو حلوة شوية، أو حتى متعلمة، كنت أقول عندها حاجة تتميز بيها، إنما دي مفيهاش أي ميزة بصراحة، ومع ذلك واخدة اهتمام العيلة كلها.
نادين: طب وإنتِ مالك بيها للدرجة دي؟ ما تسيبي كل واحد في حاله.
ليان: أسيبها إزاي وأنا شايفة نفسي في مكان وهي في مكان تاني خالص؟ العيلة دي مش من مستوايا يا نادين، وأنا مش عارفة أنا إزاي وافقت أعيش وسط الناس دي.
نادين: ما إنتِ عارفة إن باباكي هو اللي كان عايز الجوازة دي.
ليان: أيوه، بابا هو اللي ضاغط عليا وبيقولي اصبري يا بنتي، دي ناس غريبة وحياتهم زراعة وأكل وشرب.
وبعدين هو ده شكل الحياة اللي أنا عايزاها؟ فين الخروج؟ فين اللبس الشيك؟ فين الكافيهات والنوادي؟ فين الحياة اللي كنت متعودة عليها؟ دي حاجة تقرف.
نادين: طب ما تطلبي من يوسف تسافروا القاهرة وتعيشوا هناك.
ليان: طلبت منه قبل كده، وكل مرة يقولي شوية ونرجع، وعنده شغل وأرض ومسؤوليات، وأنا مش فاهمة إيه اللي رابطهم بالأرض دي بالشكل ده.
نادين: خلي بالك يا ليان، يوسف ممكن يكون بيحب أهله ومش هيقبل إنك تتكلمي عليهم بالطريقة دي.
ليان: هو حر، أنا مش هغير رأيي علشان خاطر حد.
نادين: طب ومريم؟ هتفضلي على طول متضايقة منها؟
ليان: طبعًا، أنا مش مستحملة أشوفها، خصوصًا لما حمزة وأمه يقعدوا يدافعوا عنها كأنها ملكة زمانها.
نادين: واضح إن الموضوع أكبر من مجرد اختلاف طباع.
ليان: أنا عايزة أعيش حياتي وبس، ومش هفضل محبوسة هنا كتير.
قفلت ليان المكالمة، ورمت الموبايل على السرير، ووقفت قدام المراية بتبص لنفسها.
وقالت بصوت واطي: أنا مش هفضل في المكان ده العمر كله.
وفي نفس الوقت، كان يوسف راجع من الأرض مع حمزة والحاج محمود.
يوسف: أنا شايف إننا نبدأ في التوسعات من الشهر الجاي، وهظبط كل حاجة مع المهندسين.
حمزة: تمام، بس أهم حاجة ندرس الموضوع كويس قبل ما نبدأ.
محمود بفخر: ربنا يبارك فيكم يا ولادي، أهم حاجة تفضلوا إيد واحدة.
يوسف: ربنا يخليك لينا يا حاج.
دخلوا السرايا، ويوسف طلع أوضته علشان يغير هدومه، ولقى ليان قاعدة على السرير بتقلب في موبايلها.
يوسف: إيه يا ليان، عاملة إيه؟
ليان من غير ما تبصله: الحمد لله.
يوسف: مالك؟ حاسس إنك متضايقة من الصبح.
ليان: أنا زهقت من القعدة هنا يا يوسف، وعايزة أرجع القاهرة.
يوسف: لسه يا ليان؟ إحنا لسه جايين من يومين، وبعدين أنا عندي شغل مع حمزة والحاج محمود.
ليان: وأنا مالي بشغلك؟ هو أنا جيت هنا علشان أفضل قاعدة وسط الأرض والزرع؟
يوسف: ليان، اتكلمي باحترام، دي أرض أبويا ودي عيلتي.
ليان: أنا ما غلطتش في حد، أنا بس بقول إني مش مرتاحة.
يوسف: عدم راحتك حاجة، وطريقة كلامك عن أهلي حاجة تانية خالص. أمي وحمزة ومريم ليهم احترامهم، ومش هقبل إن حد يقلل منهم، حتى لو إنتِ.
ليان بصتله بغيظ: يعني أنا كمان بقيت الغلطانة؟
يوسف: أنا مش داخل أعمل خناقة معاكي، بس عايزك تفهمي إن أهلي خط أحمر.
وسابها وخرج.
ليان فضلت باصة ناحية الباب، وملامح الغضب على وشها.
أما مريم فكانت قاعدة مع الحاجة زينب في الجنينة.
زينب: مالك يا مريم؟ حاساكي ساكتة النهارده.
مريم: مفيش يا أمي، بس حاسة إن ليان مش بتحب وجودي.
زينب: إنتِ مالكيش دعوة بحد يا بنتي، إنتِ في بيتك ووسط أهلك، واللي في قلبه حاجة هو حر فيها.
مريم: أنا مش عايزة أكون سبب في أي مشكلة بين يوسف وليان.
زينب: إنتِ مش سبب في حاجة، وإياكي تفتكري إنك أقل من أي حد في البيت ده. إنتِ مرات ابني وليكي نفس مكانة الكل.
مريم ابتسمت: ربنا يخليكي ليا يا أمي.
زينب: ويخليكي لينا يا بنتي.
بعد شوية، حمزة دخل الجنينة وشاف مريم قاعدة مع أمه.
حمزة: إيه يا ست الكل، واخدة مراتي مني؟
زينب ضحكت: مراتك إيه بس؟ دي بنتي قبل ما تكون مراتك.
حمزة: طب وأنا ماليش حق فيها ولا إيه؟
مريم ضحكت بخجل، وزينب قامت وقالت: خد مراتك يا سيدي، أنا هروح أشوف المطبخ.
حمزة قعد جنب مريم وقال: مالك يا مريم؟ في حاجة مضايقاكي؟
مريم: لا يا حمزة، مفيش.
حمزة: أنا عارفك كويس، وإنتِ لما بتسكتي بالشكل ده بيكون في حاجة.
مريم: أنا بس مش عايزة المشاكل تزيد بين ليان وباقي العيلة بسببي.
حمزة بجدية: اسمعيني كويس، إنتِ مش مسؤولة عن تصرفات حد، ومش مطلوب منك ترضي كل الناس على حساب نفسك. إنتِ ليكي مكانتك وكرامتك، ومحدش له حق يقلل منك.
مريم ابتسمت وقالت: ربنا يخليك ليا.
حمزة: ويخليكي ليا يا مريم.
وبعد المغرب، كانت العيلة كلها مجتمعة في الصالون، والحاج محمود بيتكلم مع يوسف في شغل الأرض، وزينب بتجهز الشاي، ومريم قاعدة جنبها.
ليان دخلت الصالون، ولما شافت مريم بتضحك مع زينب، ابتسمت ابتسامة مصطنعة وقالت:
ليان: واضح إن القعدة حلوة أوي هنا.
زينب: تعالي يا بنتي، اقعدي معانا.
ليان: لا، أنا كنت داخلة أقول ليوسف إني عايزة أكلمه في موضوع مهم.
يوسف: خير يا ليان؟
ليان: مش قدام الكل.
يوسف قام معاها وطلعوا ناحية الأوضة.
ليان أول ما دخلت قالت: أنا مش هقدر أكمل هنا كتير يا يوسف، ولازم نحدد هنرجع القاهرة إمتى.
يوسف: يا ليان، أنا مش هسيب شغلي ومسؤولياتي علشان إنتِ مش عاجبك المكان.
ليان: يعني إيه؟ أنا مش مهمة عندك؟
يوسف: إنتِ مراتي وليكي حقوقك، لكن مش معنى كده إني أسيب أهلي وأبعد عنهم.
ليان: يبقى لازم تختار، يا أنا يا حياتك هنا!
يوسف بص لها باستغراب، وسكت شوية، وبعدها قال بهدوء: أنا مش هختار بين مراتي وأهلي، لأن المفروض إنك تكوني جزء من العيلة مش سبب في تفريقها.
ليان اتصدمت من رده، وما لقتش كلام تقوله.
أما يوسف، فخرج من الأوضة وسابها واقفة مكانها.
ليان فضلت باصة للباب، وعينيها مليانة غضب، وبعد لحظات مسكت موبايلها وبعتت رسالة لصاحبتها نادين:
"أنا مش هسكت كتير، ولازم ألاقي طريقة أخرج بيها من العيلة دي."
لكنها ما كانتش تعرف إن كلامها وتصرفاتها مش هتفضل مستخبية كتير، وإن اللي جاي هيكشف وشوش كتير كانت مستخبية ورا الابتسامات.
وبعد شوية...
يوسف نزل الصالون، وكان الحاج محمود قاعد بيتابع شوية أوراق تخص الأرض.
يوسف: حاج، أنا عندي اجتماع مهم في القاهرة، ولازم أسافر النهارده.
الحاج محمود رفع عينه وبصله: إنت كده ليك تلات أيام بس يا بني، ولسه ورانا شغل كتير هنا، ولا مراتك عايزة تمشي؟
يوسف: يا حاج، أنا هوصل القاهرة، أحضر الاجتماع، وأوصل ليان لأهلها، وبعدها أرجع أكمل شغلي هنا.
الحاج محمود: يعني هترجع تاني؟
يوسف: طبعًا يا حاج، يومين بالكتير وهكون هنا.
حمزة كان قاعد وسامع الكلام، فقال: طب يا يوسف، تعالى معايا، أنا عايزك في موضوع مهم.
الحاج محمود قام من مكانه وقال: اخرج مع أخوك يا يوسف، وأنا هقوم أصلي وأرتاح شوية. ربنا يخليكم لبعض يا ولادي.
يوسف: ربنا يخليك لينا يا حاج.
خرج حمزة ويوسف من الصالون، ومشيوا لحد ما وصلوا للجنينة، وقعدوا في مكان بعيد عن باقي العيلة.
حمزة بص ليوسف وقال: مالك يا يوسف؟ أنا حاسس إنك مش مرتاح خالص، في إيه؟ احكيلي.
يوسف حاول يغير الموضوع: لا يا عم، متشغلش بالك، مفيش حاجة.
حمزة: هتخبي على أخوك يا يوسف؟
يوسف سكت شوية، وبعدها اتنهد وقال: بص يا حمزة، أنا مش عارف الحياة اللي أنا عايشها مع ليان دي أنا مبسوط فيها ولا لأ. هي حلوة وشيك ومتعلمة، وأهلها مسنودين جامد، وكل حاجة فيها كانت عاجباني، بس هي عايزة تعيش حياة غير الحياة اللي أنا متعود عليها.
حمزة: يعني إيه؟
يوسف: يعني إنت عارف إحنا مين، وعارف هيبتنا في البلد وكلمتنا اللي محدش يقدر يكسرها، بس رغم كل ده مش عارف أغيرها ولا أخليها تتقبل حياتنا. كل اللي في دماغها القاهرة والخروج والكافيهات والنوادي، وأنا مش عارف أعمل إيه.
حمزة بصله باهتمام وقال: طب إنت بتحبها يا يوسف؟
يوسف رد من غير تفكير: آه، وده اللي تعبني.
حمزة ربت على كتفه وقال: ربنا يهديها ويصلح الحال بينكم.
سكت حمزة لحظة، وبعدها ملامحه اتغيرت وبقى جاد أكتر.
حمزة: بس يا يوسف، أنا عايز أقولك حاجة مهمة، ودي تفضل بيني وبينك.
يوسف قرب منه وقال: قول يا حبيبي، إنت عارف إن سرك في بير.
حمزة أخد نفس عميق وقال: أنا مريض قلب يا يوسف، وعندي مشاكل صحية كتير، وأمي وأبويا ميعرفوش أي حاجة عن الموضوع ده، وأنا داخل على عملية كبيرة، ومش عارف هتوصل بيا لفين.
يوسف اتخض من كلامه وبصله بعدم تصديق: إنت بتقول إيه يا حمزة؟! إزاي الكلام ده؟ وإزاي متقوليش؟ ده أنا أسفرك آخر الدنيا، لازم أطمن عليك! يلا هكلم السكرتير هناك ونظبط كل حاجة، ولازم تسافر.
حمزة مسك إيده وقال: اهدى يا يوسف، لازم تفهم الأول. علشان كده أنا مقولتش لحد، حتى مريم متعرفش إن حالتي اتدهورت بالشكل ده، ولا إنها عملية كبيرة ومستنيين نحدد ميعادها.
يوسف بصله بصدمة: وكل ده مخبيه عننا؟!
حمزة: كان لازم أخبي يا يوسف. الحاج لو عرف ممكن يروح فيها، وإنت عارف أمي كمان تعبانة ومش هتستحمل تسمع خبر زي ده. أنا مش عايز أكون سبب في تعبهم أو خوفهم.
يوسف: يبقى لازم تسافر القاهرة، ونروح لدكتور مشهور ونشوف حالتك وصلت لفين، ومش هنسيبك غير لما نطمن عليك.
حمزة هز راسه وقال: يا يوسف، أنا متابع مع أكبر الدكاترة هنا، وهما كمان متخصصين جدًا، وهما اللي هيحددوا ميعاد العملية. أنا مش محتاج غير إنك تبقى جنبي هنا، ومش عايز حد يعرف خالص.
يوسف: بس يا حمزة...
حمزة قاطعه: اسمعني للآخر. لو حصل أي حاجة، عايزك تبقى جنب أمك وأبوك، وتراعيهم وتراعي مصالحنا، ومريم كمان متحسش إنها لوحدها. عايزك تكون سند ليهم.
يوسف عينيه لمعت من التأثر وقال: بعد الشر عنك يا حبيبي، متقولش الكلام ده تاني. إن شاء الله خير، وأنا جنبك وفي ضهرك طول عمري، ومش هسيبك تواجه أي حاجة لوحدك.
حمزة ابتسم ابتسامة بسيطة وقال: تسلم يا قلب أخوك.
يوسف حضنه بقوة، وكان جواه خوف كبير عمره ما حس بيه قبل كده.
يوسف بصله وقال: بس اسمعني، من النهارده أنا معاك في كل خطوة، ومش عايزك تخبي عني أي تطورات في حالتك.
حمزة: وعد.
وفي اللحظة دي، صوت مريم جه من بعيد:
مريم: حمزة! يوسف! إنتوا فين؟ ماما بتسأل عليكم!
حمزة بسرعة رجع لملامحه الطبيعية، ومسح وشه وقال: أهو يا مريم، جايين.
يوسف بص لأخوه، وفهم إن السر لازم يفضل بينهم.
قاموا الاتنين ورجعوا ناحية البيت، لكن يوسف كان غير يوسف اللي خرج من شوية.
بقى شايل سر تقيل، وخايف على أخوه اللي عمره ما تخيل إن ممكن ييجي يوم ويشوفه في الحالة دي.
