رواية نارين بين الحب والوجع الفصل الرابع والاربعون 44 بقلم ليلي طاهر


 رواية نارين بين الحب والوجع الفصل الرابع والاربعون 

ردّ الجميع السلام بهدوء، بينما تقدم سليم وجلس في المقعد المجاور لوالده.

التفت سليم بنظراته نحو سيلا، فلاحظ ارتجاف أصابعها وشحوب وجهها، بينما كانت تحاول جاهدة إخفاء ارتباكها أمام والدتها وأخيها. أدرك أنها على وشك فقدان السيطرة على الموقف، فتدخل قبل أن تفضحها نظراتها.

ابتسم سليم بهدوء، ووجه حديثه إلى مراد بنبرة واثقة ومرنة:

«أيوه يا مراد، سيلا فعلًا كانت عندنا امبارح.. وأنا اللي طلبت منها تيجي من غير ما تقولك إنت أو طنط نجاة، عشان تتعرف على بابا وماما الأول، ونعملها مفاجأة ليكم كلكم النهاردة.»

انعقد حاجبا مراد باستغراب واضح، وانتقلت نظراته بين سليم وشقيقته محاولًا استيعاب ما يُقال، ليبتسم سليم بثبات وينهي حيرته قائلًا بحسم:

«باختصار كده يا مراد.. أنا وسيلا بنحب بعض، وأنا جاي النهاردة عشان أتقدملها رسمي.»

ساد صمت لثوانٍ معدودة، اتسعت خلاله عينا سيلا بدهشة غير مصدقة، بينما تلاشت نظرات الشك من وجه مراد تدريجيًا، وحلت محلها ابتسامة ترحيب ممزوجة بالعتاب الودود وهو ينظر لشقيقته:

«بقى كده يا سيلا؟ بتتفقوا من ورانا وتعملوا مفاجآت؟ على العموم أهلًا بيكم طبعًا، ده شرف لينا.»

انتفضت سيلا من مقعدها فجأة، واندفعت نحوه وهي تهتف بنبرة متقطعة يفضحها التوتر:

«سليم.. ثانية واحدة!»

قبضت على ذراعه بشدة وسحبته خلفها بخطوات سريعة ومرتبكة نحو ركن بعيد في الصالون، بعيدًا عن مسامع الجميع. تعالت ضحكات الكبار من خلفهما، وعلّقت كاميليا بمرح وهي تلتفت إلى نجاة ومراد:

«يا عيني عليهم! واضح إنهم مش قادرين يبعدوا عن بعض حتى وهما وسطنا!»

في الركن البعيد، استدارت سيلا نحو سليم وصدرها يعلو ويهبط من فرط الانفعال، وضربت الأرض بقدمها بعصبية، وهي تلوّح بيديها في الهواء وتهمس بصوت لاهث:

«إنت.. إنت إزاي تعمل كده؟! مين اللي.. إيه الكلام اللي إنت قولته جوه ده؟! هو إيه اللي بنحب بعض؟!»

نظر إليها سليم ببرود تام، ثم وضع يده في جيب بنطاله واعتدل في وقفته شامخًا، وهو يطالعها بنظرة ساخرة قبل أن يرد بهدوء مستفز:

«خلاص.. هروح أقولهم إن الموضوع كله لعبة، وإنك إنتِ اللي جيتي عندنا امبارح، وقولتي قدام الناس إنك خطيبتي وبتحبيني ومش قادرة تبعدي عني.»

اتسعت عينا سيلا بذهول، وشهقت بخفوت وهي تمسك جبهتها بيدها في توتر، ثم خطت خطوة نحوه وضغطت على كل حرف بحدة وانفعال:

«اتصرف! وانهي المهزلة دي.. أنا يستحيل أتجوزك بجد!»

اقترب سليم منها خطوة، وخفض صوته بنبرة جادة وحاسمة لا تقبل النقاش، وهو يطالعها بنظرات ثابتة:

«اللي عملتيه إمبارح هيأثر على سمعة إخواتك وسمعتي.. ومافيش قدامنا غير إننا نكمل الحكاية للآخر.»

تسمّرت سيلا في مكانها، واشتعل الضيق في عينيها وهي تنظر إليه بذهول وغضب مكتوم، قبل أن تهمس بانفعال:

«يعني إيه؟!»

ردّ سليم بهدوء قاطع لا يحمل أي تراجع:

«يعني اللي سمعتيه.. لازم نكمل الجوازة.»

تجمدت الكلمات على شفتيها من فرط الصدمة، وكادت أن تنفجر في وجهه مجددًا، لولا أن ارتفع صوت نجاة من وسط الصالون وهي تضحك بمرح وتنادي عليهما:

«إيه يا ولاد، كفاية همس بقى! تعالوا اقعدوا معانا خلينا نتكلم في المهم!»

التفتت سيلا نحو والدتها بابتسامة متوترة، تحاول إخفاء ارتباكها الشديد. أما سليم، فرسم ابتسامة هادئة واثقة على وجهه، ومدّ يده ليأخذ كفّها المرتجف بلطف ظاهري، بينما أحكم قبضته عليه قليلًا، وكأنه يذكرها بأن الأمر لم يعد بيدها.

سارت سيلا بجانبه نحو المقاعد، وعقلها يضج بالأسئلة، لا تصدق كيف تحولت محاولتها لإحراجه إلى ورطة حقيقية وجدت نفسها عالقة فيها.

جلس الاثنان وسط نظرات الرضا والترحيب من الجميع، ليلتفت رأفت نحو نجاة ومراد قائلًا بجدية ودودة:

«على بركة الله يا نجاة هانم.. إحنا طبعًا جايين النهاردة نطلب إيد بنتنا سيلا لابني سليم، ونحب نسمع رأيكم عشان نتفق على كل حاجة.»

ابتسمت نجاة بودّ وترحيب وهي تنظر إلى رأفت وكاميليا، ثم التفتت إلى ابنها مراد الذي أومأ برأسه موافقًا بابتسامة هادئة، قبل أن تقول بنبرة دافئة:

«إحنا طبعًا يشرفنا نسبكم يا سيادة اللواء، وسيلا بنتك وسليم مننا، ومفيش بينا الكلام ده.. لا مهر ولا شروط، إحنا بنشتري راجل.»

أومأ رأفت برأسه تقديرًا لكلامها، وردّ بوقار وحزم:

«ربنا يعز أصلك يا نجاة هانم، بس حق سيلا محفوظ بالكامل، وكل اللي تطلبوه إحنا تحت أمركم فيه.»

في تلك اللحظة، التفت سليم برأسه نحو سيلا، وهو يبتسم بهدوء ويثبت نظراته في عينيها، قائلًا بنبرة واثقة تحمل معنى خفيًا لا يفهمه سواها:

«كل اللي سيلا عايزاه أنا هعملهولها.»

نظرت إليه سيلا بذهول وغيظ مكتوم، وحاولت أن تبتسم مجاملة أمام الجميع، فخرجت ضحكتها متكلفة وبالعافية؛ كشفت عن أسنانها لثانية سريعة قبل أن تطبق شفتيها وتغلق فمها مجددًا، وهي تشتعل من الداخل.

اعتدل سليم في جلسته بعد ذلك، ونظر إلى الجميع بجدية وهدوء قبل أن يقول بنبرة حاسمة:

«وبعد إذنكم طبعًا.. أنا بستأذنكم نخلي كتب الكتاب والفرح الأسبوع الجاي على طول.»

ساد صمت مذهول لثوانٍ في المكان؛ فشهقت سيلا بصوت مسموع واتسعت عيناها بصدمة حقيقية وهي تنظر إليه بعدم تصديق، بينما التفتت نجاة نحو ابنها مراد الذي انعقد حاجباه باستغراب شديد، قبل أن يوجه حديثه لسليم بنبرة متسائلة:

«إزاي بالسرعة دي يا سليم؟! إحنا لسه ما لحقناش نجهز أي حاجة، والموضوع محتاج وقت!»

ردّ سليم بثبات وثقة، وهو يبتسم بلباقة موضحًا السبب:

«ما تشيلش هم أي تجهيزات يا مراد، كل حاجة جاهزة من الألف للياء، وفستان سيلا وحاجتها كلها هتوصلها لحد عندها.. الفكرة بس إني كنت المفروض أسافر مأمورية امبارح، لكن حصل تعديل في الخطة واتسلمت لزميل تاني، وده خلاني أقدر أرتب أموري وأتمم الجواز في أقرب فرصة بدل ما أضطر أأجله بسبب شغلي.»

ترددت نجاة للحظة، ونظرت إلى ابنتها الصامتة ثم التفتت إلى سليم قائلة بقلق:

«بس يا ابني عاصم مش موجود دلوقتي، وما ينفعش نعمل فرح أخته وكتب كتابها من غير ما يكون موجود!»

ابتسم سليم بهدوء وثقة، وكأنه كان مستعدًا لهذا السؤال تحديدًا، فردّ قائلًا:

«اطمني يا نوجة.. أنا كلمت عاصم وفهمته كل حاجة، وهو موافق ومبسوط جدًا، وأكدلي إنه هينزل مخصوص على الميعاد عشان يحضر كتب الكتاب والفرح بنفسه.»

أومأت نجاة برأسها بارتياح كبير وهي تبتسم بسعادة، بينما ابتسم رأفت ببهجة ورفع يديه قائلًا:

«خلاص، طالما متفقين ومفيش بينا خلاف، يبقى نقرأ الفاتحة على بركة الله!»

رفع الجميع أيديهم لقراءة الفاتحة وسط أجواء تملؤها الفرحة والمباركات، بينما رفعت سيلا يديها ببطء، وشفتيها تتحركان بكلمات الفاتحة، لكن عينيها ظلتا معلقتين بسليم، الذي بدا في غاية الهدوء والرضا.

كانت تدرك أن قراءة الفاتحة قد أغلقت أمامها آخر أبواب الهروب، وأن معركتها الحقيقية مع سليم قد بدأت للتو!

وفي الجانب الآخر، في صعيد مصر، كان الهدوء يعم أرجاء القرية كالعادة، باستثناء الناصية التي يقع عندها دكان «الشيخ مصطفى» للعطارة، على الشارع العام.

تبدّل حال الدكان البسيط تمامًا في ثاني أيام وجود لينا؛ فبعد أن كان مقصدًا للنساء العجائز الباحثات عن أعشاب للبرد أو بهارات للطبيخ، تحوّل منذ الصباح إلى قبلة لرجال القرية وشبابها! طابور طويل امتد خارج الدكان، والجميع يقفون باهتمام بالغ، يتظاهرون بتفحص أجولة الكمون والفلفل الأسود، بينما تحاول أعينهم التسلل خلسة نحو الركن الجانبي بالداخل.

في ذلك الركن البعيد نسبيًا عن الباب، وخلف مكتب خشبي قديم، كانت تجلس لينا منهمكة في تسجيل الفواتير ومراجعة دفاتر الحسابات بتركيز وهدوء، غافلة تمامًا عما يدور حولها.

على الجانب الآخر، وقف الشيخ مصطفى خلف الميزان، وقد ارتسم الضيق والغضب المكتوم على وجهه الوقور. فالرجل الطيب الذي فتح لها بيته ودكانه، واعتبرها أمانة في رقبته كابنته، لم يخفَ عليه سبب هذا التهافت المفاجئ. كان يزن الطلبات بسرعة ويحاول صرفهم بشتى الطرق، لكنهم كانوا يماطلون ويتحججون بطلبات إضافية ليبقوا أطول فترة ممكنة.

ضرب الشيخ مصطفى كفًّا بكف بضيق، وحاول بوقفته حجب الرؤية عن مكتبها، ثم قال بنبرة حازمة:

- يا ولاد الحلال، خدتوا طلباتكم، يلا كل واحد يتكل على الله ويشوف حاله! واجفين تسدوا باب الدكان والطريج ليه؟

رد أحد الشباب وهو يمد رقبته محاولًا النظر إلى الداخل:

- ثواني بس يا شيخ مصطفى، بفتكر الحاجة في البيت وصّتني على إيه تاني غير الكمون... 

زفر الشيخ مصطفى بغضب مكتوم، مدركًا تمامًا مراوغتهم وعنادهم، فقد عجز عن إقناعهم بالانصراف.

في تلك اللحظة، توقفت سيارة فارهة يقودها الدكتور ريان عند أول الشارع ،ضغط على بوق السيارة مرة، ثم ثانية، لكن التجمهر الكثيف كان يسد الطريق تمامًا ويحول دون مروره.

أخرج ريان رأسه من نافذة السيارة، وعقد حاجبيه باستغراب وهو يتفحص الحشد الغريب. لمح شابًا من أهل القرية يقف في آخر الطابور، فناداه:

- يا واد يا محروس! تعالَ اهنه!

التفت محروس، وما إن رأى الطبيب حتى هرول إليه بابتسامة واسعة:

- أهلًا يا دكتور ريان.

أشار ريان بيده نحو الزحام متعجبًا:

- إيه يا ابني اللي حاصل ده؟ الطريج مجفول ليه؟ هو في اى عند الشيخ مصطفى؟

حكّ محروس مؤخرة رأسه بارتباك مصطنع، محاولًا إخفاء السبب الحقيقي:

- لا مفيش حاجة يا دكتورنا، دول بس الجماعة واجفين يشتروا بهارات وتوابل للبيت.

رفع ريان حاجبه الأيسر، ونظر إلى الطابور الطويل من الرجال ذوي الشوارب والجلابيب، ثم عاد بنظره إلى محروس، وعلى وجهه نظرة تجمع بين الشك والسخرية:

- بهارات؟! ومن ميتى يا محروس رجالة البلد هما اللي بيوجفوا طوابير عشان يشتروا كمون وفلفل أسود؟ ده الحريم هما اللي بيشتروا الحاجات دي!

تلعثم محروس، وخفض صوته وهو يبتسم ببلاهة:

- ما هو... أصل البهارات عند الشيخ مصطفى اليومين دول بجت تفتح النفس جوي يا دكتورنا، من ساعة ما البت البندرية أم عيون زرجا مسكت الحسابات جوه، والواحد بجى يحب يحاسب على حاجته بنفسه!

توقفت يد ريان على مقود السيارة، وتجمّدت ملامحه للحظة، قبل أن تتبدل نظراته بإدراك سريع.

«البندرية أم عيون زرقا!»...

لم يكن بحاجة إلى رؤيتها من مكانه ليعرف من يقصدون؛ فهي بلا شك الفتاة التي التقاها بالأمس، ولا تزال صورتها وموقفها القوي عالقين في ذهنه.

ضيق ريان عينيه وهو ينظر إلى طابور الرجال بنظرة مختلفة؛ فلم يعد الأمر مجرد فضول عابر، بل شعر بالضيق من تهافتهم على الدكان لمجرد إلقاء نظرات متطفلة عليها، بينما يحاول الشيخ مصطفى وحده إبعادهم عنها.

أطفأ محرك سيارته بحركة حاسمة، وفتح الباب لينزل، قائلًا لمحروس:

- طيب يا محروس... وسّع كده أما أدخل أشوف حكاية البهارات اللي جلبت حال البلد دي!

ترجل ريان من سيارته بخطوات واسعة وواثقة، وملامحه الجادة تفرض هيبتها على المكان بمجرد اقترابه. ما إن لمحه الواقفون في الطابور حتى بدأ الهمس يسري بينهم، وتراجع بعضهم خطوة إلى الوراء احترامًا وارتباكًا من نظراته الحادة التي راحت تتفحصهم واحدًا تلو الآخر.

وقف ريان عند مدخل الدكان، واضعًا يديه في جيبي بنطاله، ونظر إليهم بنبرة هادئة تحمل من السخرية والحزم ما يكفي لإرباكهم:

- إيه يا رجالة؟ خير إن شاء الله! هو البلد كلها جالها نقص في الكمون النهارده ولا إيه؟

تبادل الرجال النظرات في حرج، وتنحنح أحدهم محاولًا تبرير وقفته:

- أبدًا يا دكتورنا، ده... ده بس البيت محتاج شوية طلبات.

رفع ريان حاجبه وهو ينظر إلى الأكياس الفارغة أو الصغيرة جدًا في أيديهم، ثم قال بنبرة جادة وحاسمة:

- الشيخ مصطفى راجل كبير ومش هيجدر يلاحج على الوجفة دي كلها مرة واحدة، وكمان عربيتي واجفة في أول الشارع ومحتاج أعدي... فاللي خلّص طلبه يتفضل يمشي، واللي لسه مجاش دوره ييجي آخر النهار أو يبعت حد من أهل بيته ياخد الحاجة.

لم يجرؤ أحد على الاعتراض؛ فالدكتور ريان له مكانته واحترامه الكبير بين أهل القرية. وفي ثوانٍ معدودة، بدأ الطابور يتفكك، وانصرف الرجال تباعًا وهم يلقون التحية على الطبيب على عجل، حتى خلت الناصية من التجمهر وعاد الهدوء إلى المكان.

تنفس الشيخ مصطفى الصعداء، ومسح جبينه بمنديله القماشي، ثم نظر إلى ريان بامتنان واضح:

- ربنا يبارك فيك يا دكتور ريان ويكرم أصلك، والله كنت محتار أفض اللمة دي إزاي من غير ما أحرج حد فيهم.

ابتسم ريان باحترام واقترب ليصافحه:

- ولا يهمك يا حاج مصطفى، إحنا أهل والواجب واجب.

ومع هدوء الضجيج بالخارج، رفعت لينا رأسها أخيرًا عن دفاتر الحسابات لتعرف سبب هذا التغير المفاجئ، فوقعت عيناها الزرقاوان على ريان الواقف عند مدخل الدكان. اتسعت عيناها بدهشة خفيفة حين تعرفت عليه فورًا، فبادلها ريان إيماءة هادئة بالرأس تحمل الاحترام، قبل أن يلتفت مجددًا إلى الشيخ مصطفى.

أشار الشيخ مصطفى بترحاب نحو الخارج، حيث تمتد تندة قماشية كبيرة تحت ظل شجرة عتيقة أمام الدكان، وقد وُضعت تحتها طاولة خشبية صغيرة ومقعدان للراحة بعيدًا عن حرارة الشمس:

- اتفضل يا دكتورنا، اجعد استريح في الضل شوية، ده واجب ضيافتك علينا.

أومأ ريان بالموافقة، وتوجه للجلوس تحت ظل الشجرة، بينما التفت الشيخ مصطفى إلى الداخل ونادى بصوت أبوي دافئ:

- يا لينا يا بتي، اعمليلنا فنجانين جهوة حلوين من إيدك على السخان اللي عندك وهاتيهم.

أجابته لينا بصوت هادئ ومهذب:

- حاضر ، ثواني وتكون جاهزة.

خرج الشيخ مصطفى وجلس مقابل ريان، وراح يشكره مرة أخرى على حسن تصرفه وسرعة بديهته. وبعد لحظات، خرجت لينا تحمل صينية صغيرة عليها فنجانا القهوة، وضعتهما بهدوء وأدب أمامهما، ثم استأذنت وعادت إلى مكتبها داخل الدكان.

انتظر ريان حتى ابتعدت لينا وعادت إلى الداخل، وأصبح حديثهما بعيدًا عن مرمى سمعها. ارتشف رشفة من قهوته، ثم وضع الفنجان بهدوء على الطاولة، وصمت لثوانٍ قبل أن يلتفت إلى الشيخ مصطفى بملامح جادة:

- يا حاج مصطفى، أنت راجل كبير ومقامك محفوظ، وعارف إن كلامي ده طالع من خوف وحرص على مصلحتك ومصلحة المكان.

اعتدل الشيخ مصطفى في جلسته باهتمام:

- جول يا ولدي، سمعك.

تنهد ريان، وأشار برأسه إشارة خفيفة نحو الدكان:

- أظن اللي حصل النهارده وضّح لنا المشكلة يا حاج مصطفى. وجود الآنسة اهنه في دكان على الشارع، وفي بلد مجفولة وليها عاداتها، مش هينفع.

خفض الشيخ مصطفى عينيه بتفكير، وتنهد بعمق، فأكمل ريان بهدوء وحزم:

- النهارده جدرنا نفض اللمة بالذوق، لكن بكرة وبعده الموضوع ممكن يكبر ويعمل مشاكل ملهاش أول من آخر، لا ليك ولا ليها... فكده مش هينفع إنها تفضل شغالة اهنه معاك في الدكان.

ساد صمت للحظات بين الرجلين، قبل أن يتنهد الشيخ مصطفى بعمق، ويهز رأسه بتفهم وهو ينظر إلى ريان بعينين يملؤهما الوقار والصدق:

- والله عندك حج يا ولدي، كلامك عين العقل. أنا أصلًا ما كنتش موافج على نزولها الدكان من الأول، وعارف طبع البلد، بس هي صممت ، وأنا ما رضيتش أزعلها ولا أكسر بخاطرها.

صمت الشيخ مصطفى لثانية، ثم عقد حاجبيه بحسم وأضاف بنبرة قاطعة:

- بس خلاص... اللي حصل النهارده ده آخره، وما عادش هتشتغل اهنه نهائي تاني، لو على رجبتي!

أومأ ريان برأسه بارتياح، فقد اطمأن إلى أن الفتاة أصبحت في رعاية رجل أمين، يخاف عليها ويحرص على سلامتها كما لو كانت ابنته.

وفي مكانٍ آخر، بعيدًا عن أجواء الصعيد...
أغلق ممدوح حاسوبه المحمول دفعة واحدة، وأطلق زفرة طويلة وهو يفرك رقبته بتعب، ثم نهض من مقعده واتجه نحو مكتب والده.

- «خلاص يا بابا، كل ورق الصفقة خلص... فاضل بس إمضا جدي بهاء على تفويض البنك عشان التحويل يتم النهاردة ونقفل الديل ده.»

كان شاكر يقلّب الأوراق أمامه بتركيز، فمد يده نحو هاتفه دون أن يرفع عينيه، وهز رأسه قائلاً:

- «تمام، هكلم المستشار القانوني للبنك يبعت المندوب ياخد الإمضا من القصر، أبويا مش قادر ينزل النهاردة.»

وقبل أن يلامس إصبعه الشاشة، اهتز الهاتف معلنًا عن اتصال من مدير فرع البنك. أسند شاكر ظهره إلى المقعد وأجاب بابتسامة هادئة:

- «أهلاً يا أستاذ طارق، لسه كنت هكلمك...»

لكن الابتسامة اختفت فجأة، وتوقفت الكلمات على شفتيه. اعتدل في جلسته، وانعقد حاجباه بشدة، بينما انقبضت أصابعه حول القلم الذي يمسكه.

- «إيه اللي بتقوله ده يا طارق؟! إزاي يعني التوقيع مش معتمد؟ ده حساب الشركة الأم!»

دفع كرسيه للخلف ونهض واقفًا، وأخذ يذرع المكتب بخطوات متوترة، وقد ارتفع صوته بحدة:

- «السجل التجاري اتغير؟! اتغير إزاي ومين اللي غيره؟! بقولك إيه، ابعتلي صورة من المستندات اللي اتقدمتلكم حالاً على الواتساب... حالاً!»

أنهى المكالمة وألقى الهاتف فوق المكتب بعنف، فاقترب ممدوح منه بقلق وقد اتسعت عيناه:

- «في إيه يا بابا؟ البنك ماله؟»

لم يجبه شاكر. ظل واقفًا يحدق في شاشة الهاتف، حتى صدر صوت الإشعار بوصول الرسالة. اختطفه سريعًا وفتح الصور المرفقة، ثم أخذ يكبّر المستندات ويتنقل بينها بعينين متسارعتين.

توقف عند مستخرج السجل التجاري وعقد بيع الأسهم. قرأ الاسم المدون في خانة المالك الجديد، ثم انتقل ببصره إلى أسفل الصفحة، حيث استقر التوقيع.

تجمدت أصابعه فوق الشاشة، وشحب وجهه في لحظة.

- «باعها...»

خرجت الكلمة هامسة، قبل أن يرفع عينيه إلى ابنه ويقول بصوت مبحوح:

- «جدك باع الشركة الأم يا ممدوح! كتبها بيع لواحد اسمه صابر!»

انتزع ممدوح الهاتف من يده، وأخذ يتفحص المستندات بذهول، ثم هز رأسه رافضًا ما يراه:

- «صابر؟! مين صابر ده؟! مستحيل! جدي يعمل كده؟ أكيد الورق ده مزور!»

اختطف شاكر مفاتيح سيارته من فوق المكتب، واتجه نحو الباب بخطوات غاضبة، وهو يهتف:

- «ده خطه وإمضته... أنا عارف إمضة أبويا! تعالا معايا حالاً!»

وبعد أقل من نصف ساعة، توقفت سيارة شاكر أمام القصر. ترجل منها مسرعًا، وتبعه ممدوح، وما إن دخلا حتى اندفع شاكر نحو بهو الصالون بخطوات واسعة، لا يكاد يسيطر على غضبه.

كان الجد بهاء جالسًا في مكانه، وما إن لمح ابنه يقتحم المكان بتلك الهيئة حتى انتفض في مقعده، قبل أن يتدارك نفسه ويستعيد هدوء ملامحه.

توقف شاكر أمامه، وألقى الهاتف فوق الطاولة الزجاجية بعنف، فارتجت محتوياتها تحت وطأة الاصطدام.

- «إيه ده يا بابا؟! فهمني إيه المهزلة دي؟!»

ألقى بهاء نظرة على الهاتف، ثم رفع عينيه إلى ابنه دون أن ينبس بكلمة.

اقترب شاكر خطوة أخرى، وأشار إلى المستندات بيد مرتجفة من شدة الغضب:

- «الشركة الأم اللي بنيناها طوبة طوبة... تاريخنا واسمنا في السوق! تمضي على بيعها لواحد اسمه صابر؟! مين صابر ده أصلاً؟! وإزاي تبيع في السر ومن ورانا؟!»

جثا ممدوح بجوار مقعد جده، وأمسك بيده بكلتا يديه، بينما راحت عيناه تتنقلان بين وجهه والمستندات:

- «يا جدي، اتكلم... مين صابر ده؟ قول إن الورق ده مضروب، قول إن الإمضا دي مش إمضتك! أكيد في حاجة غلط!»

سحب بهاء يده بهدوء من بين كفي حفيده، ثم نهض واقفًا، وثبّت عينيه على شاكر، وقال بنبرة حاسمة.....
******


تعليقات