رواية جثة الترعة الفصل الرابع والاخير بقلم محمود الأمين
مع الأسف، كان نفسي ألحق، بس مع دخولي كان أمر الله نفذ، ومات فتحي وهو مظلوم بسبب شهادة زور، واللي شهدها في حقه كان بينتقم منه.
كان عندي إحساس رهيب بتأنيب الضمير. لو كان كل واحد شاف شغله بضمير، كان ممكن كل حاجة تتغير، بس للأسف.
رجعت تاني على مكتبي، وأنا مش شايف قدامي غير إن اللي عمل كده لازم يتحاسب، حتى لو القضية خلصت بإعدام فتحي، المجرم لسه بره.. ولازم نرد كرامة فتحي، الشخص اللي اتظلم في كل حاجة من بداية القضية، وكانت النتيجة حياته.
قعدت على مكتبي وبدأت أفتكر كلام ياسر اللي اعترف بيه، عشان قال وقتها:
_ حق ربنا، أنا ما شفتش اللي حصل أصلًا. أنا فعلًا خرجت من المستوصف بعد اللي عرفته، بس رجعت من تاني على البيت. كنت تعبان ومرهق وعاوز أنام بأي شكل، ولما وصلت وكنت خلاص هدخل بيتي، لقيت واحد بينده عليا. بصيت ورايا لقيته منتصر. كنت مش عارف عاوز مني إيه، بس طلب يتكلم معايا. الساعة وقتها كانت داخلة على خمسة إلا تلت، وأنا كنت واخد الطريق مشي وتعبان. طلبت منه نأجل الكلام لحد بكرة، ولكن هو صمم إنه يدخل البيت عندي ويتكلم معايا، وساعتها فهمت منه إنه عاوزني أشهد زور، وعرفت إنه ق. تل مراته صابرين.
كان عاوزني أقول إن أبوها هو اللي عمل فيها كده، وإني أنا كنت في الأرض وشوفته وقتها.
طبعًا رفضت وقلت له: أنا مش ممكن أعمل كده!
وهنا هو بدأ يضغط عليا بموضوع أخويا عماد اللي لحد دلوقتي لسه في بالي ومش قادر أنساه، أخويا اللي أنا ظلمته لما وافقت أروح معاه عند الناس دي، وأنا عارف إنه هيترفض عشان حالته.
وبصراحة، لقيت نفسي قدام فرصة ما تترفضش. هنتقم من الشخص اللي كان سبب في وفاة أخويا، هلبسه جري.مة ق. تل، وهقول إني شوفته وهو بيخلص على بنته.
بلغته إني موافق، وخرج من عندي، ومن ساعتها وأنا مهتم بالموضوع. وبعد يومين بالظبط، لقيت منتصر بيتصل بيا وبيطلب مني أروح على القسم وأشهد زي ما اتفقنا.
مش هنكر إني في البداية كنت خايف، ولكن عملت ده وشهدت زور، وخلاص كل حاجة كانت بتقول إن فتحي هو اللي ق. تل بنته.
وكنت مهتم بتفاصيل القضية، وكل ما ينزل خبر عنها لازم أجيبه وأقراه، لحد ما قريت إنه اتحكم عليه بالإعدام.
مش عارف أوصف فرحتي إزاي في اللحظة دي. أنا حسيت إن حق أخويا بيرجع وأنا قاعد مكاني، وكنت مستني أسمع إن الحكم اتنفذ فيه.. بس فجأة كل حاجة اتغيرت لما لقيت نفسي محاصر من قوات الشرطة وبيتقبض عليا، بس...
...
سألنا ياسر عن السبب اللي منتصر ق. تل مراته عشانه، ولكن ما كانش عنده إجابة.
في اللحظة دي تليفوني رن، وكانت النيابة اللي طلعت إذن بالقبض على منتصر سليمان، عشان نعرف هو عمل كده ليه؟!
واتحركت قوة من القسم على بيته، وقدرنا نقبض عليه، واتحركنا بيه على القسم، وبدأت أتكلم معاه.
_ ق. تلت مراتك ليه يا منتصر؟!
= مراتي مين؟!.. تقصد صابرين؟!
هو حضرتك ما سمعتش الحكم بتاع القاضي؟ طيب بلاش، ما حكم الإعدام لسه متنفذ النهارده في أبوها، يبقى إزاي أنا اللي ق. تلتها؟
_ مش طلع أبوها مظلوم وما عملش حاجة؟ قصدي الراجل اللي رباها. أصل إحنا عرفنا الحقيقة، عرفنا إنها مش بنته، وأكيد أنت كمان كنت عارف... وقبل ما تحاول تنكر وتقول ما حصلش، الشاهد اللي شهد في المحكمة، اللي هو ياسر، اعترف عليك وقال إن أنت اللي طلبت منه يشهد الشهادة دي بعد ما خلصت على صابرين.
وصدقني، إحنا عندنا كل الأدلة إن أنت اللي عملت فيها كده، بس إحنا عاوزين نسمع منك، عاوزين نفهم الأسباب.
وعشان تصدق.. ده تقرير من مباحث الإنترنت، والتقرير ده بيقول إن رسالة الواتساب اللي بعتها صابرين للأستاذ فتحي، بتلومه فيها على اللي عمله، اتبعتت بعد حدوث الجري.مة مش قبل، واللي يعرف موضوع الاعتداء ده حضرتك وبس.
وأنا عارف إن أبوها ما عملش حاجة، وإنك أنت اللي اعتديت عليها.. اتكلم، صدقني الإنكار ده مش هيفيدك.
= كنت معشمها بالجواز، ولما حصلت بينا العلاقة كانت فاكرة إني لسه باقي عليها وهتجوزها، وأنت راجل وهتفهم، الواحد مننا لو وصل للحاجة دي ولقى البنت اللي قدامه سهلة، مستحيل يفكر يتجوزها.. وهي كانت سهلة أوي، زي ما تكون متعودة على الحاجة دي.
ولما لقيتني بدأت أبعد عنها، اتكلمت معايا، وساعتها طلبت منها تبعد عني، وإن اللي حصل ده بمزاجها مش غصب عنها.
طبعًا عملت الحبتين بتوع البنات، العياط والشحتفة وإني اتخليت عنها والكلام ده.
بس ده كان مش فارق معايا، لحد ما في يوم كلمتني، كانت عارفة إيه الحاجة اللي هتخليني أرجع وأتمسك بيها، وساعتها بلغتني إنها سمعت أمها وهي بتتكلم مع أبوها، اللي كان بيقول إنه كتب لبناته كل حاجة بالتساوي عشان هو خايف يموت وإخواته ياكلوهم، وإنه حابب يأمن مستقبلهم.
واللي أعرفه إن الأستاذ فتحي معاه فلوس على قلبه قد كده.. مش هبالغ لو قلت ملايين، بدل المحلات التلاتة، ده غير الأراضي وعمارة كبيرة في القاهرة.
طَمِعت، بس ما كنتش متوقع إنها هتتفق معايا إننا نخلص منه بعد ما تتأكد إنه كتب كل حاجة ليهم عشان يورثوا بسرعة.
كنت معجب بتفكير الشيطان اللي عندها، وفي نفس الوقت كنت طمعان في الفلوس، أما هي فمش فارقة معايا خالص.. وكنت عارف إن لما أروح أتقدملها، الحاج فتحي هيرفض.
بس هي فضلت تضغط عليه لحد ما وافق، وساعتها كانت اتأكدت إنه كتب كل حاجة باسمهم خلاص.
واتجوزنا، وأول ما طلعنا الشقة كنت بكلمها في إني عندي خطة ندبر بيها الحادثة اللي تبان قضاء وقدر، ويموت الحاج فتحي ونورث بقى.
ولكن ساعتها اتصدمت من كلامها، كنت فاكر إنها بتضحك عليا لما قالت:
: في حاجة أنا عرفتها، مش عارفة أواجهك بيها إزاي؟!.. أنا مش بنت فتحي ولا بنت عفاف، أنا تربية ملاجئ يا منتصر. هي اعترفتلي من يومين.. لما اكتشفت إن فتحي كاتب كل حاجة لنهى وسماح، يعني أنا مش هورث أي حاجة.
كنت مصدوم من كلامها، وفاكر إنها بتشتغلني وبتضحك عليا، وقلتلها:
: لا، حلوة الاشتغالة دي وملعوبة يا بنت فتحي، كل ده عشان أتجوزك، مش كده؟ بس أنا مش بيتضحك عليا. أنا مستعد أخلص عليكي دلوقتي وإنتي متجوزاني قدام الناس على إنك بنت بنوت، والكل عارف إنك شريفة ومحترمة. هخلص عليكي وأقول إنها طلعت مش بنت بنوت، وهطلع منها ده شرفي.
...
كانت فاكرة إنه مجرد كلام، لكن لما مسكت السكينة صرخت وطلعت تجري، وأنا نزلت أجري وراها، وساعتها الناس مسكوني وبدأوا يهدوني، وطلبوا مني أطلع السكينة دي فوق، ولو في مشكلة أروح وأتكلم مع أبوها.
وفعلًا طلعت غيرت هدومي، بس خليت السكينة معايا وخبيتها، واتحركت على إني رايح بيت أبوها، بس لقيتها واقفة على الطريق الزراعي وعمالة تعيط.
طلعت السكينة وخلصت عليها، ورميت الجث. ة في الترعة، ومسحت بصماتي من على السكينة، وكان في شال على كتفي لفيتها جواه.
واتحركت على بيت حمايا الحاج فتحي، اللي كان في الوقت ده بيصلي الفجر، ولما وصلت عند بيته كان الباب موارب، ودي كانت فرصتي.
حطيت السكينة في أوضة نومه وخرجت، واستنيته لما رجع، بس اللي رجع وقتها كان ياسر اللي اتكلمت معاه وفهمته هيعمل إيه؟!
الكل كان عارف حكاية ياسر وأخوه عماد مع الحاج فتحي، وعارفين إن الحاج فتحي هو السبب في موت عماد، وإن ياسر عاوز ياخد حق أخوه.
وبصراحة، الراجل وافق وما قصرش، وبعدها خرجت من عنده، وكان حمايا رجع بيته. اتكلمت معاه في اللي حصل، وروحنا عشان نعمل محضر التغيب.
وبعد ما اكتشفوا جث. تها اللي كانت في الترعة، قلت على الحكاية اللي كنت مألفها، إن أبوها هو اللي اعتدى عليها، وإنها هي اللي اعترفت بده، مع شهادة ياسر اللي قال إنه شاف الحاج فتحي وهو بيق. تل بنته.
وبكده هو لبس كل حاجة، وطبعًا سلاح الجري.مة كان في بيته، ولولا إن الأخ ده شهد عليا كان الموضوع اتقفل، بس أهو لبس نفسه ولبسني معاه.
....
كنت مش عارف أقول إيه بعد ما الأخ ده خلص اعترافه. كنت شايف إن صابرين تستاهل اللي حصلها، وإن ما حدش اتظلم في القضية دي غير الحاج فتحي، الراجل اللي اتعدم ظلم.
وبعد ما خلصت التحقيقات، اتعادت المحاكمة تاني، وسمعت ساعتها جملة مش هنساها من القاضي، لما قال:
وتطبيقًا للعدل، رغم إن القضية قد حكم فيها من قبل، ونُفذ فيها حكم الإعدام على شخص مظلوم لم يرتكب أي جرم، لذلك أُعيدت القضية من جديد، ولكن هذه المرة للحكم على من ارتكب الجرم، ومن شهد زور ليظلم بريئًا.
المحكمة حكمت على منتصر بالإعدام.. وعلى ياسر اللي شهد الشهادة الزور بـ7 سنين.
وخلصت القضية اللي لحد دلوقتي مش قادر أنساها.. قضية جث. ة الترعة.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
