رواية حكاية حب الفصل الرابع 4 بقلم ملك عبدالله


 رواية حكاية حب الفصل الرابع

كل شيء قسمة ونصيب يا عمو دي دبلة ابنك، وباقي الشبكة وكل حاجة هتكون عندكم في أقرب فرصة.

مديت إيدي وخلعت الدبلة من صباعي، وحطيتها قدامه على الترابيزة.

لـِ ثـواني، محدش اتكلم
الصمت كان غريب، وكل الموجودين بيحاولوا يستوعبوا اللي حصل.

ماما بصتلي بصدمة، وبعدين عينيها راحت للدبلة اللي قدامنا، وقالت بعدم استيعاب:
- آسية! إنتِ بتقولي إيه يا بنتي؟! إيه اللي بيحصل ده خيانة إيه؟!

قبل ما أرد، عمر قام من مكانه وقال بعصبية:
- إنتِ بتعملي إيه؟ وإيه الكلام اللي بتقوليه ده؟!

رفعت عيني ليه، وأنا مش شايفة قدامي غير شخص غريب.

- بعمل اللي كان المفروض أعمله من أول ما عرفت حقيقتك يا عمر.

- آسية، إنتِ فاهمة الموضوع غلط، وإحنا ممكن نتكلم ونحل أي سوء تفاهم بينا.

ابتسمت بوجع وهزيت رأسي:
- سوء تفاهم؟! هو إنك تقول لواحدة تانية إنها البنت اللي نفسك تكمل حياتك معاها، وإن أنا مجرد اختيار لوالدك، ده اسمه سوء تفاهم؟!

والده بصله بحدة وقال:
- اسكت يا عمر! أنا عايز أفهم منك الأول إيه اللي حصل.

أما أنا، فكنت خلاص استنفدت كل طاقتي. مابقتش قادرة أسمع تبريرات، ولا حتى أواجه حد.

بصيت لبابا، اللي كان ساكت من وقتها، وقربت منه وقلت بصوت مكسور:
- أنا مش قادرة أستحمل يا بابا ممكن يمشوا من هنا؟ أنا أخدت قراري، عمر خاني، صدقني
 وأنا مستحيل أعيش مع واحد خاين.

طبطب على رأسي وأخدني في حضنه، وبعدين بص لوالد عمر وقال بهدوء:
- كل شيء قسمة ونصيب، وبنتي أكيد ربنا هيعوضها بالأحسن.

عمو فهم من كلام بابا إن مفيش مجال لأي نقاش، فـ قام وأخد مراته، واعتذرلنا عن اللي حصل، وقال إنه هيفهم من ابنه إيه اللي حصل بالظبط، وإنه ممكن يكون مجرد سوء تفاهم.

أما عمر، ففضل واقف مكانه، لكن عينيه كانت متعلقة بأدهم وبس، لحد ما والده مسكه من دراعه وشده، وخرجوا كلهم من البيت.

قعدت بهدوء، وبابا وماما حواليّا، بيحاولوا يفهموا إيه اللي حصل، لكن من غير ما يضغطوا عليّا أو يطلبوا مني أحكي حاجة مش قادرة أقولها.

بعد حوالي تلت ساعة، لقينا مريم داخلة البيت.

بصتلنا باستغراب وقالت بعفوية:
- هو إنتوا لحقتوا اتغديتوا؟ فين عمر وأهله؟

بصيت لأدهم، وعيوني بدأت تتملي بالدموع.
لما واجهت عمر، كنت صامدة وبحاول أكون قوية، لكن دلوقتي...

أنا هـواجه أختي إزاي؟!
وهقولها إيه؟!
والأصعب من كل ده إني هواجهها قدام مين؟!

قربت منها ووقفت قصادها، بحاول أبلع الغصة المُرّة اللي في حلقي عشان أقدر أتكلم.
- عايزة تعرفي عمر فين؟

هزت رأسها باستغراب، فرديت عليها بهدوء ظاهري:
- أنا وعمر سبنا بعض.

اتشكلت الصدمة على وشها، وبصت لكل الموجودين بتوتر حاولت تخفيه، لكني لاحظته.

- ليه؟!

- خـ.انـي.

قولتها ببساطة، وكأن الموضوع عادي، أو كأنه مبقاش يستاهل مني أي انفعال.

- إزاي؟! أكيد فاهمة الموضوع غلط.

بصتلها لـ ثواني، بحاول أفهم إذا كانت فعلًا مستغربة، ولا بتحاول تدارى حاجة ورا ملامحها.

ابتسمت ابتسامة باهتة، وقُلت:
- يا ريت أكون فاهمة غلط يا مريم يا ريت.

بصيت لماما وبابا، وقلت بهدوء ظاهري، رغم إن قلبي من جوايا كان بيتفتت من الانهيار:
- كنتوا بتسألوني عرفت إزاي، ومين البنت اللي عمر بيخونني معاها؟

سِكت لحظة، وبعدين كملت وأنا ببص لمريم مباشرة:
- أقدملكوا البنت اللي بيحبها.. البنت اللي شايفها فتاة أحلامه، واللي خان خطيبته عشانها

مريم أختي.

الصدمة ارتسمت على وشوشهم، مريم وبابا وماما.
فضلوا حوالي دقيقة ساكتين، محدش فيهم قادر ينطق أو يستوعب اللي سمعه.

وأول واحدة كسرت الصمت كانت مريم، اللي قالت بانفعال:
- إيه الجنون والكذب ده؟! إنتِ مصدقة نفسك؟! محدش يصدقها يا جماعة! ماما، بابا، أكيد إنتوا مش هتصدقوا الهبل ده!

قبل ما حد فيهم يرد، أدهم اتكلم بنبرة حاسمة:
- آسية مش بتكدب يا مريم.

لفت وشها ناحيته بسرعة، وقالت بصدمة ممزوجة بالغضب:
- إنت مصدقها يا أدهم؟! هي لحقت تخليك تصدقها؟! صدقني أنا مش هي!

بصلها أدهم باستخفاف، ورد من غير ما يتردد:
- إنتِ مين أصلًا عشان أصدقك؟! لكن آسية أنا أصدقها لو عيني شافتها بتغلط، حتى لو كل الناس كذّبوها.

- بصيت لأدهم بامتنان واضح، للحظة حسيت إن جملته خففت جزء، ولو بسيط، من الوجع اللي جوايا.

لكن صوت ماما قطع اللحظة دي، وهي بتبصلي بعدم تصديق:
- آسية يا بنتي، أكيد في حاجة غلط أكيد فيه سوء تفاهم! إنتِ بتتكلمي على مين؟ مريم؟ مريم أختك؟!

بابا اتدخل هو كمان، بنبرة مترددة:
- مامتك عندها حق يا آسية، أنا مش بكذبك، لكن مفيش عقل يستوعب اللي بتقوليه ده! دي أختك يا بنتي، حبيبتك اللي اتربت معاكي في نفس البيت!

بصيتلهم، وحسيت إن وجعي بيتضاعف. حتى هما مش قادرين يتخيلوا إن مريم ممكن تكون عملت فيا كده.

ماما كملت وهي بتحاول تستوعب:
- عُمر أنا صدقتك من غير ما أشوف دليل واضح، لكن أختك؟! إزاي تعمل فيكي كده؟!

ضحكت ضحكة قصيرة خالية من أي فرحة، وقلت وأنا ببص لمريم مباشرة:
- ببساطة عشان هي مش أختي!

- آسية!!

صوت بابا جه حاد، لكن المرة دي مكنتش مستعدة أتراجع أو أبلع كلامي عشان خاطر حد.

لفيت ناحيته وقلت بانفعال بدأ يظهر في صوتي:
- إيه يا بابا؟! هي دي الحقيقة اللي إنتوا مش عايزين تصدقوها! مريم مش أختي، مريم بنت عمي بس حتى للأسف، مش قادرة أقول عليها بنت عمي بعد اللي عملته!

بصيت لمريم اللي كانت واقفة قدامي، وملامحها اتغيرت، فكمّلت وأنا بحاول أسيطر على رعشة صوتي:

- ولاد العم عمرهم ما يعملوا كده في بعض! ولاد العم بيخافوا على بعض، وبيصونوا العِشرة، مش بيطعنوا بعض في ضهرهم!

قربت خطوة منها، وقلت بمرارة:
- أنا كنت فاكرة إنك أقرب الناس ليا، كنت بحكيلك كل حاجة، وبأتمنالك الخير من قلبي وإنتِ كنتِ بتاخدي كل ده وتستخدميه ضدي؟!

وقفت لحظة، وبصيتلها من فوق لتحت قبل ما أقول بحدة:
- عشان كده، متقوليش على نفسك أختي تاني إنتِ خسرتي الحق ده بإيدك.

هزيت رأسي بعدم تصديق، وكملت بصوت متقطع من كتر الوجع:
- ليه؟! أنا عملتلك إيه؟ ليه تلفّي على كل حاجة بحبها؟ ليه بتكرهيني؟ ليه بتعامليني كأني سرقت منك حاجة؟ ليه يا مريم؟!

فجأة، انفجرت في الكلام:
- إنتِ بتتكلمي كأني أنا المذنبة الوحيدة! إنتِ عمرك ما كنتِ بتشوفي غير نفسك يا آسية!

ضحكت بسخرية، وهزيت رأسي:
- دي تمثيلية جديدة صح؟! آه يلا، ورّينا يا مريم زي كل مرة، يلا ورّينا هتعدّي الموضوع ده إزاي!

بابا بص لمريم بصدمة، وسألها:
- إيه اللي أختك بتقوله ده يا مريم؟ ده حقيقي؟!

اتلخبطت ملامحها، وفضلت ساكتة لحظات قبل ما ترد:
- مش بالظبط يا بابا.

- يعني إيه مش بالظبط؟! يعني إيه؟!

صوت بابا ارتفع، ومقدرش يخفي غضبه:
- إنتِ لسه هتبرري؟! مش هتنفي أصلًا؟! هو فيه مجال نخلي الكلام ده حقيقي؟! إنتِ تعملي في أختك كده يا مريم؟! تعملي فينا كده؟!

قربت مريم من ماما بسرعة، ومسكت إيدها، ودموعها بدأت تنزل:
- اسمعيني يا ماما، أنا آه غلطت، بس مش زي ما إنتوا متخيلين هو بس...

سكتت لحظة، وبصت لماما برجاء قبل ما تكمل:
- أنا مكنتش أقصد إن الموضوع يوصل لكده، والله ما كنت مخططة لأي حاجة! أنا وعمر إحنا اتقربنا من بعض من فترة، والموضوع بدأ من غير ما أحس حاولت أبعد أكتر من مرة، بس..

قاطعتها وأنا مش مصدقة اللي بسمعه:
- بس إيه؟! بس إيه يا مريم؟! كمّلي، أنا عايزة أسمع باقي الحكاية!

بصتلي بدموع وقالت:
- إنتِ مش فاهمة يا آسية، عمر هو اللي بدأ، هو اللي قالي إنه مش عايز يكمل معاكي، وإنه من الأول مكنش بيحبك.

ضحكت بمرارة، وقلت:
- آه طبعًا يبقى كده إنتِ بريئة! هو اللي بدأ، وإنتِ مجرد ضحية، صح؟!

- أنا محاولتش أخد منك حاجة!

- بس أخدتي يا مريم أخدتي مني ثقتي فيكي، وأماني معاكي، وحتى إحساسي إن ليا أخت ممكن ألجأ ليها من غير ما أخاف منها!

بصيت لماما وبابا، ودموعي أخيرًا غلبتني، وخرج صوتي محمّل بوجع أكبر بكتير من اللي حصل النهارده:

- مش أول مرة مريم تجرحني كده مش أول مرة قلبي يوجعني بسببها، ومش أول مرة أضطر أتخلى عن حاجة بحبها عشان خاطرها!

سكت لحظة، ومسحت دموعي بعصبية، وبصيت لمريم اللي كانت واقفة قدامي، فحسيت إن كل المواقف القديمة رجعت تتزاحم في دماغي مرة واحدة.

- أنا طول عمري كنت بحاول أكون أخت كويسة ليها، كنت بعدّي، وأسكت، وأتنازل، وأقنع نفسي إن بكرة هتتغير إن يمكن في يوم تحس بيا، أو حتى تعتبرني حد يستاهل منها شوية حب!

ضحكت بوجع، وكملت:
- بس مفيش حاجة اتغيرت كل مرة كنت بخسر فيها حاجة، كنت بقول معلش، دي مريم! كل مرة كانت بتوجعني، كنت بدورلها على عذر، وكل مرة كانت بتاخد مني حاجة بحبها، كنت بلوم نفسي بدل ما ألومها!

بصيت لمريم مباشرة، وصوتي بدأ يعلى رغم محاولاتي أتماسك:

- مريم عمرها ما كانت أختي، ولا عمرها هتكون! الأخت مش بتتمنى تشوف أختها مكسورة، مش بتستنى اللحظة اللي تقع فيها عشان تزود عليها، ومش بتبقى عارفة أكتر نقطة بتوجعها وتختار تضغط عليها بإيديها!

رجعت بصيت لماما وبابا، وقلت بانهيار:
- مريم أكتر شخص خلاني أفقد ثقتي في نفسي، أكتر شخص خلاني أشك في كل حاجة حلوة فيا، وأفضل أسأل نفسي أنا عملت إيه عشان أستحق كل ده؟! ليه دايمًا لازم أكون أنا اللي أتنازل؟ ليه لازم أكون أنا اللي أخسر عشان هي تبقى مبسوطة؟!

حطيت إيدي على صدري، وكملت بصوت مبحوح:
- أنا تعبت.. تعبت من إني أفضل أبررلها، ومن إني كل ما أتكسر ألم نفسي لوحدي عشان محدش يحس إني ضعيفة قدامها!

بصيتلها للمرة الأخيرة، وقلت بمرارة:
- بس المرة دي لأ المرة دي مش هتنازل، ومش هسامح نفسي لو رجعت أسمحلك تكسري فيا حاجة تاني. كفاية يا مريم أنا مش هفضل طول عمري أدفع تمن إنك مش عارفة تحبيني!

قربت منها، ودموعي بقت بتغلبني أكتر، وقلت بصوت مكسور:
- بس عايزة أعرف ليه؟ ليه يا مريم؟! أنا عملتلك إيه؟!

ردت عليّا من غير تردد، وكأنها كانت مستنية السؤال ده من سنين:
- عشان عندك أم وأب!

بصتلها بصدمة، مش مستوعبة اللي سمعته.
- إنتِ مجنونة؟! أومال مين دول؟! إنتِ مش معتبرة دول أهلك؟!

ضحكت بسخرية وسط دموعها، وقالت:
- أهلي؟! إنتِ بتسأليني عن أهلي؟! إنتِ عارفة يعني إيه تعيشي في بيت طول عمرك حاسة إنك ضيفة فيه؟! عارفة يعني إيه تبقي وسط ناس بيحبوكي، بس في كل لحظة بتفتكري إنك مش بنتهم؟!

- مريم...

قاطعتني وهي بتمسح دموعها بعصبية:
- لأ، اسمعيني المرة دي! طول عمري عايشة في ضلك يا آسية! طول عمري إنتِ البنت اللي ليها أب وأم، وأنا البنت اللي أبوها وأمها ماتوا وسابوها! إنتِ اللي ليكي اسمهم، وأنا مجرد بنت أخو الراجل اللي قرر يتكفل بيها!

هزت رأسها وهي بتضحك بوجع:
- فاكرة لما كنتوا بتتجمعوا في الأوضة وإنتِ في حضن بابا وماما؟ كنت ببصلكم من بعيد وأسأل نفسي هو أنا ليه معنديش حد يحضني بالشكل ده؟ ليه لازم أفضل فاكرة إن بابا وماما مش موجودين؟!

- دول كانوا بيفضلوكي عليّا يا مريم! دول قرروا يبطلوا خلفة عشان يقدروا على تربيتنا! دول حرموني من إن يكون عندي إخوات تاني عشانك، وعشان نفضل أنا وإنتِ قريبين من بعض ومتحسيش بالغربة!

صرخت وهي بتقاطعني:
- وأنا طلبت منهم يعملوا كده؟! أنا طلبت إنهم يضحوا بحاجة عشان خاطري؟! هو أنا اخترت أكون يتيمة؟! اخترت أبويا وأمي يموتـ.وا ويسيبوني؟!

سكتت لحظة، ودموعها نزلت أكتر، قبل ما تكمل بصوت مرتعش:
- إنتِ مش فاهمة يا آسية إنتِ عمرك ما هتفهمي. إنتِ كنتِ بتعيشي كل يوم وإنتِ متأكدة إن فيه اتنين مهما حصل هيختاروكي، وأنا كنت كل يوم بحاول أقنع نفسي إنهم اختاروني أنا كمان، وإن وجودي هنا مش شفقة ولا واجب!

بصت لماما وبابا، ورجعت بصتلي:
- كنت بفرح لما بابا يجيبلي حاجة زيك، ولما ماما تناديني يا بنتي، بس كنت برجع أوضتي وأسأل نفسي هو لو بابا وماما كانوا عايشين، كانوا هيحبوني كده؟ كانوا هيختاروني؟ ولا أنا مجرد أمانة شالوها من باب الواجب؟

قربت مني خطوة، وصوتها بقى هادي، لكنه كان مليان مرارة:
- الحقيقة عمرها ما هتتغير يا آسية إنتِ بنتهم الوحيدة، وأنا بنت أخو الراجل اللي أخوه مـ.ات، فقرر يتكفل بيتمه بدل ما يرميها.

ابتسمت ابتسامة مكسورة، وقالت:
- أنا اسمي مريم حسين، وإنتِ اسمك آسية باسم حتى اسمك واخد من أبوكي، وأنا اسمي شايل اسم أبويا اللي مش موجود. مهما عملوا عشان يحسسوني إني واحدة منكم، الحقيقة دي عمرها ما بتتغير.

رجعت خطوة لورا، ومسحت دموعها، وكأنها بتحاول تستعيد قوتها:
- كنت بغير منك يا آسية من حاجات كتير يمكن إنتِ عمرك ما خدتي بالك منها.
كنت بغير من أبسط حاجة عندك، من إنك تقدري تتخانقي مع بابا وتزعلي منه وتتصالحي معاه، وأنا حتى مكنتش عارفة أزعل من بابا وأقوله إني متضايقة، كنت بخاف أحسسه إنه قصّر معايا!

بصتلي بعينين مليانين دموع:
- وكنت كل ما أحس إن فيه حاجة بتميزك عني، أقول لنفسي حتى دي كمان مش من حقي؟! حتى الحب اللي في البيت ده لازم أحس إني باخده بالقطارة؟!

سكتت لحظة، وبعدين قالت بصوت مخنوق:
- أنا عارفة إني غلطت وعارفة إني وجعتك، بس إنتِ مش متخيلة أنا كنت حاسة بإيه طول السنين دي.
أنا تعبت من إني أفضل البنت اللي لازم تكون ممتنة على كل حاجة، البنت اللي مينفعش تزعل، ومينفعش تعترض، ومينفعش تطلب أكتر من اللي اتقدم لها!

- ولما عمر حبني لأول مرة حسيت إن فيه حد اختارني أنا. مش عشان أنا أختك، ولا عشان عايشين في بيت واحد، ولا عشان حد وصّى عليّا اختارني عشان أنا مريم!

-أنا محبتش عُمر بس كنت بغير منك ،بغير عشان لما أبوه طلب يناسب بابا طلبك أنتِ رغم إن أنا الأكبر منك عشان أنتِ بنته مش أنا

صوتها اتكسر وهي بتكمل: 
بس كنت برجع أسأل نفسي ليه آسية دايمًا ليها كل حاجة وأنا لأ؟! ليه حتى الشخص الوحيد اللي حسيت إنه اختارني لازم يكون من نصيبها هي؟!

وقفت قدامي، ودموعها بتنزل من غير ما تحاول تخبيها:
- أنا مش بقول إني معملتش حاجة غلط، بس متطلبيش مني أقولك إني مكنتش موجوعة أنا كمان اتوجعت يا آسية، واتكسرت، واتمنيت حاجات عمري ما قدرت أطلبها.

- فضلت باصة لمريم شوية، ومكنتش عارفة أقولها إيه، كل اللي كنت عايزة أفهمه هو ليه اختارت توجعني أنا بالذات؟

مسحت دموعي، ولفيت وشي بعيد عنها، وقلت بصوت مكسور:
– أنا مش هقدر أكرهك يا مريم، بس أكيد مش هقدر أرجع أشوفك زي الأول في حاجات لما بتتكسر، حتى لو اتصلحت، عمرها ما بترجع زي ما كانت.

بصيت لمريم، وبعدها بصيت لبابا وماما، وخدت نفس عميق قبل ما أقول:
– أنا مش هقدر أكمل  معاها في نفس البيت بعد اللي حصل مش هقدر أشوفها كل يوم وأتعامل كأن مفيش حاجة حصلت.

مريم رفعت عينيها ليا بصدمة، وقبل ما تتكلم، كملت كلامي:

– أنا مش بطردك من حياتي بس، أنا كمان مش هقدر أشاركك بيتي تاني البيت ده لازم يبقى فيه واحدة فينا بس، أنا أو أنتِ 


تعليقات