رواية ديون النبض الفصل الثاني والخمسون 52 بقلم مروه صياح


 رواية ديون النبض الفصل الثاني والخمسون 

جرب تقولها يا أمي

كنت حاسة بوجع مجد، وبالألم اللي جواه تجاه أمه. كنت شايفة الجرح اللي عايز يداويه، واللي فضل متعلق جواه سنين طويلة من غير ما يقدر يواجهه.

وعارفة إن المرة دي أنا بضغط عليه بكل قوتي، مش علشان أزود وجعه، لكن علشان أطلع الصديد اللي جواه، وأساعده إن الجرح ينضف ويبدأ يتعافى من الألم اللي عاش عمره كله شايله.

كملنا كلامنا، ومجد بصلي وقال بوجع:

مجد: إنتِ اللي بتقولي كده يا وعد؟ بعد ما حياتك إنتِ اتدمرت، وبعد ما صحتك راحت ومبقتيش قادرة تقفي على رجلك؟ بتقوليلي أحافظ على علاقتي بدكتورة جيهان؟

دكتورة جيهان دي اللي وقفت حياتي وأنا طفل، وما اكتفتش بكده، دي وقفت حياتك إنتِ كمان. هي كانت سبب عذابي، ولسه لحد دلوقتي.

سكت لحظة، وبعدها كمل بعصبية:

مجد: لا يا وعد، القرار الوحيد اللي أنا ندمان عليه هو إني سبتك. دكتورة جيهان دي بالنسبة لي ابتلاء وقدري، ربنا حطني في طريقها وجعلني ابنها ابتلاء. لكن أنا مش قادر أتحمل، مش قادر أتحمل أي تعب ييجي منها تاني.

بصيتله وقلت بهدوء:

أنا: يا مجد، دي أمك مهما كان.

مجد: أمي؟ صدقيني، الكلمة دي أنا مبقدرش أقولها. أنا كبرت وأنا شايفها دكتورة جيهان وبس، مش أكتر من كده.

لقيته اتوتر، وكأن الكلام رجعه لسنين بعيدة، وقال:

مجد: كان نفسي أقول لها أمي، أناديها بماما، زي ما كنت بسمع من أصحابي وزمايلي. كان نفسي تيجي المدرسة، تيجي تاخدني، زي ما كنت بشوف أصحابى وأهاليهم.

لكن حتى بابا كانت بتمنعه إنه يشوفني أو يعدي عليا. كنت بشوفه واقف مستنيني، وهي تكون مأكدة على السواق إنه ياخدني ويرجع بيا الفيلا تاني.

صدقيني يا وعد، هي كانت دايمًا مشغولة عني، دايمًا شايفة شغلها والمستشفى.

تقدري تقوليلي سابتني لمين؟

من صغري وأنا وحيد، حاسس إني غريب في بيتي. حاسس إني يتيم بالرغم من إن أمي عايشة. حرمتني من أبويا وأختي.

أنا ما أنكرش إنها وقفت في ضهري علشان أكون دكتور مجد اللي الناس عارفاه، بس إيه الفايدة؟

إني قدام الناس حاجة، وبيني وبين نفسي ولا حاجة.

أخد نفس، وكمل بصوت مليان وجع:

مجد: وعد، أنا مش قادر أسامحها على اللي عملته فيا، ولا هقدر أسامحها على اللي عملته فيكي، ولا هقدر أسامحها إنها فرقت بيني وبينك.

وعد، بالله عليكي بلاش تضغطي عليا، لأني مستحيل علاقتي تبقى طبيعية معاها. علاقتي بيها كده من قبل ما أعرفك.

صدقيني يا وعد، الموضوع ده مفيهوش كلام بالنسبة لي. ده قرار واخده من زمان... من زمان قوي.

بصيتله ورديت عليه:

أنا: مجد، إنت غلطان. صدقني هي كانت بتحاول تضمن مستقبلك.

مجد: على حساب مين؟ على حسابي أنا؟

المستقبل ده حتى اللحظة اللي إحنا فيها مش بيبقى بإيدينا، عمرنا كله بيد ربنا.

أنا عارف إنك هتقوليلي هي أخدت بالأسباب، بس أنا بقولك إني كنت قادر أبني نفسي بنفسي. كنت قادر أكون مجد اللي الناس شايفاه من غيرها، ومن غير ما أحتاج أكون ابن دكتورة جيهان.

بصيتله وسكت، فكمل:

مجد: أنا كنت بخبي على كل اللي يعرفوني إن أمي تبقى دكتورة جيهان، علشان عايز أكون أنا. عايز الناس تعاملني علشان شخصي أنا، مش علشان إني ابن دكتورة جيهان.

كملت كلامي معاه وقلتله:

أنا: مجد، جرب تسيب الأسى اللي جواك. جرب تقرب منها، جرب تناديها وتقول لها أمي. جرب تشيل الفوارق اللي بينك وبينها. صدقني، إنت اللي هترتاح.

وبعدين حتى لو هي غلطت، وحتى لو إنت شايف إنها قصرت معاك وما اهتمتش بيك، وحتى لو هي ما قدرتش تحسسك إنك ابنها وإنها أمك، إنت دلوقتي كبرت. بقيت مسؤول عن نفسك وعن طريقة تفكيرك.

إحنا لو فضلنا عايشين في الغلط اللي اتربينا عليه، وما حاولناش نصححه، صدقني هنندم بعدين. وساعتها ممكن ما يكونش فيه وقت إننا نصلح اللي فات.

أنا عارفة إن الظروف اللي الإنسان بيعيش فيها ساعات بتخليه يتصرف بطريقة معينة، وعارفة إن الموضوع صعب. وعارفة إن سنين عمرك كلها عشتها وإنت حاسس بالوحدة والغربة واليتم، زي ما إنت بتقول.

لكن يا مجد، أنا مش عايزة أضغط عليك. أنا دلوقتي زوجتك ومعاك، وزي ما لازم أكون جنبك في كل حاجة حلوة، لازم كمان أسندك وأوقف جنبك لما تكون بتفكر تاخد قرار غلط.

لازم أقولك لأ، ولازم أواجهك بالحقيقة حتى لو الكلام مش على هواك.

بصيتله وكملت:

أنا: مجد، أنا وافقت إني أكون زوجتك. وما عنديش مشكلة أفضل في حياتك، حتى لو ده هيكون مقابل إنك تحافظ على نجاحك، وتعيش راضي عن أمك وهي راضية عنك، وعلشان خاطر ابنك اللي جاي.

مجد، أنا بحبك، بس عمري ما كنت أنانية. مش هينفع أفكر في نفسي وما أفكرش فيهم.

وحتى لو إنت ضحيت بيهم عشاني، صدقني في يوم من الأيام ممكن تضحي بيا أنا كمان.

إنت بتقول إنك بتحبني، بس أنا عارفة إن جواك نفسك ترتاح من كل اللي حواليك، وأولهم دكتورة جيهان. لكن بالطريقة دي عمرك ما هترتاح، وهيفضل بالك مشغول طول الوقت.

صدقني، إنت بتتكلم كده علشان لسه زعلان منها ومتأثر باللي عملته فيك. والجفاء اللي بينكم مش هيتشال مرة واحدة، لكن لازم تبدأ.

ما تبقاش قاسي يا مجد.

دكتورة جيهان مش هتفضل طول عمرها صغيرة، وفي يوم من الأيام هتحتاجك. هتحتاج لمستك، وحضنك، ومسكه إيدك.

هي كمان هتكبر، وهتبقى زي الطفل الصغير اللي محتاج حبك وحنانك ورعايتك. وإنت اللي هتكون بالنسبالها الأب والابن وكل حاجة.

سكت لحظة، وبعدها افتكرت موقف حصل معانا، وقلتله:

أنا: فاكر يا مجد الست الكبيرة اللي أنا كشفت على قلبها؟ فاكر لما اكتشفنا إن قلبها سليم، لكن وجعها الحقيقي كان من ولادها اللي مشغولين عنها؟

فاكر؟

أنا فهمت دلوقتي إنت كنت ساكت ليه وقتها.

مجد بصلي وقال:

مجد: بس هي ربت وكبرت واهتمت وعملت اللي عليها، لكن دكتورة جيهان ما عملتش اللي عليها ناحيتي.

وعد: بس من وجهة نظرها هي عملت اللي عليها، بتفكيرها وبالطريقة اللي كانت شايفاها صح. لكن حتى لو هي غلطانة، إنت فين دورك يا مجد؟

إنت لازم تسامح... لازم تسامح يا مجد.

بصلي مجد، وكانت عينيه كلها وجع. أخدته في حضني، وحسيت إنه خلاص مش قادر يشيل أكتر من كده.

مجد: وعد، أنا تعبان.

أنا عمري كله عشته متعذب، ودماغي مبتبطلش تفكير. صدقيني أنا اتعذبت كتير قوي.

أي حد بيبص للدكتور مجد المعروف، يقول إنه مش ناقصه أي حاجة، لكن صدقيني أنا ناقصني أهم حاجة.

فضل يبكي أكتر، وقال بصوت متقطع:

مجد: أنا كان ناقصني احتواء وبس... ناقصني احتواء أمي وحبها. ناقصني الاحتواء الأسري اللي عمري ما عشته غير معاكم إنتوا.

وعد، أنا ما صدقت لقيتك، ولقيت بابا ورغد، ولقيت حازم ومامتك. حسيت معاكم بجو الأسرة اللي عمري ما حسيت بيه.

هي حرمتني من كل ده، وحرمتني من الإنسانة اللي بحبها.

إنتِ بتفكري في غيرك يا وعد أكتر من نفسك، وإنتِ كمان...

بصلي بنظرة كلها عتاب ولوم، وكمل:

مجد: إنتِ كمان استغنيتي عني وسبتيني.

بصيتله وقلت:

وعد: مجد، صدقني أنا كنت مضطرة.

بصلي ورد عليا بعصبية:

مجد: مضطرة إنتِ كمان تدمريني يا وعد وتدمري نفسك؟

إنتِ وقتها خدتي قرارك لوحدك إنك تبعدي. كنتِ فاكرة إن الوجع هيقل؟ بالعكس، أنا كنت بتعذب كل يوم.

كنت بضغط على نفسي في الشغل، وبهلك نفسي علشان أقدر أنسى.

فاكرة إن ده معناه إني كنت مبسوط وسعيد بالقرار اللي إنتِ أخدتيه عني؟

ما ادتنيش فرصة أحارب معاكي، وأنا ماسك إيدك. إنتِ فضلتِ إنك تسيبيني وتبعدي عني ساعتها يا وعد.

ما فكرتيش أنا قد إيه اتعذبت؟

إيه لازمة كل حاجة وإنتِ مش موجودة معايا يا وعد؟ إيه لازمة كل اللي حواليا وأنا حاسس إني وحيد وغريب؟

إيه لازمة إني أساعد كل الناس وأنا مش سعيد، ومش قادر أساعد حتى نفسي؟

إيه لازمة طفل ييجي نتيجة غلطة؟

سكت مجد، وكأنه ندم على الكلمة اللي خرجت منه، وفضل للحظات مش قادر يكمل.

رفع راسه وبصلي تاني، وقال بصوت مليان وجع:

مجد: وعد، صدقيني... حتى أنا كنت شايفك إنتِ، ومش شايف حد تاني.

ديون النبض 🫀
بقلم الكاتبه مروة صياح 🎯 ✍️ 

فتات من وقتك

كمل مجد كلامه، وهو ماسك وشي بين كفوفه، وقال بصوت مليان وجع:

مجد: أنا كنت بتمنى أكون معاكي إنتِ، كنت شايفك إنتِ قدام عيني. تفتكري إني كنت سعيد بالطفل ده؟ بالعكس، أنا كل ما أفتكر اللي حصل بلوم نفسي.

الحلم ده، حتى لما اتحقق، ما اتحققش معاكي إنتِ يا وعد.

كل لحظة عشتها وإنتِ بعيدة عني، كنت بتمنى أكون أسرة مع الإنسانة أنا اللي اخترتها، لكن هما أجبروني على أسرة أنا ما اخترتهاش.

أنا عمري ما شوفتها غير أختي، لكن في لحظة ضعف وأنا بفكر فيكي إنتِ، شوفتك إنتِ.

اتجبرت إنها تكون زوجتي، واتجبرت إنها تكون أم ابني، واتجبرت إن يبقى ليا ابن منها هي.

وعد، أنا مش هقدر... صدقيني مش هقدر أكمل.

غمضت عيني، ونزلت راسي، وقلتله بصوت هادي:

وعد: سامحني يا مجد، أنا كمان مش هقدر أكمل معاك. ده قرار أنا كمان أخدته.

بصلي بصدمة، وفي اللحظة دي حسيت أكتر إني بكسره وبكسر نفسي معاه.

لكن في نفس الوقت، ما كنتش عايزة أوافق على حاجة هو هيندم عليها بعد كده.
مش هقدر أستمر وأعيش سعيدة معاه، وأنا عارفة إن جواه إحساس بالنقص، وإن حياته مش كاملة زي ما هو نفسه يتمنى.

فضل باصصلي، والوجع ظاهر في عينيه، والدموع بدأت تنزل، وقال:

مجد: وعد، بلاش... بالله عليكي ما تبعديش عني تاني.

بصيتله وقلت:

وعد: يا مجد، إنت المرة دي اللي بتبعدني. إنت اللي مش عايزني أكمل معاك.

بالرغم من كل اللي حصل، صدقني أنا كان عندي أمل. كان عندي أمل إنك تعرف كل حاجة وتيجي تجري على قلبي.

أنا وصلت لمرحلة يأس وإحباط، ما كنتش عايزة أي حاجة، حتى حياتي نفسها ما كنتش عايزاها.

لكن الحاجة الوحيدة اللي كانت مخلّياني متمسكة بالحياة هي وجودك إنت، وإني أشوفك دايمًا مبسوط وناجح وسعيد.

أنا عارفة إن السعادة عمرها ما بتكون كاملة، بس على الأقل كنت عايزاك تكون مرتاح، بالك هادي ومش شايل كل الوجع ده جواك.

كنت كل يوم أمسك الجريدة وأدور على أي خبر يخصك. ولما كنت بشوفك وأسمع أخبارك، وأعرف إنك بتكبر من نجاح لنجاح، ده كان بيديني أمل وحافز إني أكمل.

غير كده لأ يا مجد، مش هينفع.

مش هينفع أفضل معاك وإنت واخد القرارات دي. لازم تحسن علاقتك بدكتورة جيهان، وسارة مينفعش تطلقها، وابنك اللي جاي ده إيه ذنبه يتعذب من قبل حتى ما يشوفك؟

بصلي وقال بانفعال:

مجد: وأنا ذنبي إيه في اللي حصل ده كله؟

بصيتله وقلت:

وعد: طب خلينا في النص يا مجد. عايزني أكون معاك؟ ما ترفضش حياتك معاهم. أنا راضية.

أنا راضية إنك تديني فتات من وقتك، أنا ما عنديش مشكلة.

بصلي بصدمة أكبر، وكأن كلامي كان آخر حاجة ممكن يتوقع يسمعها مني.

قام من جنبي، ولأول مرة أشوفه متضايق وعصبي بالشكل ده، وقال:

مجد: إنتِ لحد إمتى هتفضلي تضحي؟

وعد: المهم إني أكون معاك ومطمنة عليك.

بلاش يا مجد تهد كل حاجة. أنا مش هكون سعيدة وأنا شايفاك كده. مش هكون سعيدة وإنت معايا، وفي نفس الوقت اللي حواليك بعيد عنك ومش معاك.

بصلي وقال:

مجد: بس هما اللي اختاروا، مش أنا.

قرب مني تاني، ومسك وشي بين كفوفه، وقال بإصرار:

مجد: وعد، أنا عمري ما هكون سعيد غير وأنا معاكي. إنتِ مش قادرة ليه تفهمي إن هما سبب الوجع اللي أنا فيه ده؟

بصيتله وقلت برجاء:

وعد: مجد، عشان خاطري. إحنا اتكلمنا كتير قوي في الموضوع ده، ومش هسيبك.

بس لازم تسامح، وناخد وقتنا. ما ينفعش تاخد قرارك دلوقتي وإنت لسه متأثر بكل اللي حصل.

أنا مش موافقة على القرار اللي إنت أخدته ده.

فضل باصصلي شوية، وبعدها قال:

مجد: وعد... أوعديني إنك ما تسيبينيش. ده أهم حاجة عندي.

عشان خاطر مجد، وعشان خاطر الوعد اللي الحياة ادتهولي.

أنا مش هقدر أعيش لحظة واحدة وإنتِ بعيدة عني. أنا بتعذب من جوايا، ومش قادر أنسى أي لحظة بيني وبينك.

أنا كنت عايش على أمل إن أنا وإنتِ نتجمع تاني، ولسه مش مصدق إن كل اللي حصل ده حقيقي.

بصيتله، ورفعت إيدي وحاوطت وشه بين كفوفي، وقلتله بحب:

وعد: مجد، أنا بحبك أوي.

قرب مني وأخدني في حضنه وشدني ليه، وقال:

مجد: حاضر يا وعد. صدقيني، بس ما تضغطيش عليا. سيبيني زي ما أنا دلوقتي.

بصيتله وابتسمت، وقلت:

وعد: صدقني، مع الوقت حاجات كتير أوي هتتصلح، وإنت كمان هتحس براحة أكبر جواك.

المهم إنك تكون مرتاح يا مجد، دي أهم حاجة عندي.

بصلي، وبعدها حاول يغير جو الكلام، وقال بابتسامة فيها إرهاق:

مجد: يعني بدل ما أقعد معاكي سهرة حلوة، وأخدك في حضني، نقلب على بعض المواجع والزعل والألم بالشكل ده؟

بصيتله وقلت:

وعد: مجد، هنفضل لحد إمتى نضحك على روحنا؟ وأنا حاسة إن في حاجة جواك مش كاملة، وإنك مش مرتاح من جواك.

صدقني، أنا علشان بحبك، واثقة ومتأكدة إنك هتوصل للقرار الصح.

أنا عارفة إن وجودي جنبك بيديك جزء كبير من السعادة اللي إنت حاسس بيها، لكن ده ما يمنعش إني أعمل اللي عليا، وأكون أنا كمان مرتاحة من جوايا.

بصلي، وأخدني في حضنه، وشالني ودخلني على السرير.

فتح دراعي وقال بصوت هادي:

مجد: وعد، خديني في حضنك. عايز أغمض عيني، مش عايز أحس بأي حاجة غير إني أكون في حضنك وبس.

ضمّيته لصدري، وفضلت أمسح على راسه بحنان.

كنت حاسة إنه محتاج يرتاح، محتاج يفصل دماغه عن كل التفكير، وعن كل الكلام اللي اتكلمنا فيه، وعن الوجع اللي فتحناه سوا.

ما حاولتش أتكلم تاني، ولا أفتح أي موضوع جديد.

فضلت حاضناه، وهو ساكن بين إيديا، لحد ما غمضنا عينينا إحنا الاتنين، وغلبنا النوم.

ديون النبض 🫀
بقلم الكاتبه مروة صياح 🎯 ✍️ 

تاني يوم الصبح، فتحت عيني بهدوء، وكانت دي أول مرة أصحى فيها قبل مجد.

فضلت باصة له وهو نايم جنبي، وسرحت في ملامحه، كأني بتجول فيها واحدة واحدة، وبحاول أقرأ اللي مستخبي ورا هدوء وشه.

افتكرت كل الوجع اللي مر بيه، وكل اللي شاله جواه لوحده، وحسيت إني عايزة أضمه لحضني أكتر، وأطمنه إن خلاص، مش لازم يفضل قوي طول الوقت.

مكنتش حاسة إني مجرد زوجته، كنت حاسة إني مسؤولة عنه، عن راحته وابتسامته، وكأنه طفلي الصغير اللي نفسي أحميه من أي وجع تاني.

لكن رغم هدوء ملامحه وهو نايم، كنت حاسة إن وجعه لسه عايش جواه، وإن اللي فات مش سهل يمحيه يوم وليلة.

كان بيتقلب بهدوء، فابتسمت، ومديت صوابعي ولمست أنفه بخفة، وفضلت أحركها عليه بدلال، كأني بحتك بيها.

كان بيحاول وهو نايم يبعد الاحتكاك ده، فابتسامتي زادت، وقربت منه وطبعت قبلة طويلة على خده.

وفجأة فتح عينيه، وبصلي بابتسامة واسعة.

مجد: ليه خدي؟ ليه ما يكونش شفايفك هي اللي تلمس شفايفي؟

بعدت عنه بسرعة، وبصيت له بكسوف.

أنا: مجد! أنت صاحي؟

ضحك وهو بيقرب مني.

مجد: قبلك كعادتي، بس لما حسيت إنك هتفوقي، غمضت عيني تاني.

ابتسمت وهزيت راسي.

أنا: أنت بتضحك عليا يا مجد!

مسك إيدي وقربها من وشه، وبدأ يحرك صوابعي على ملامحه بحنان.

مجد: حبيت أحس إني مرغوب من عيونك وهي بتبصلي، ومن إيدك وهي بتلمس ملامحي، وأتوه في شوقك ليا... ولا أنتِ مش عاوزاني أحس بده؟

ابتسمت وأنا بتأمل عينيه.

أنا: وأنت ليه بتستنى؟ ما أنت دايمًا اللي بتعمل كده!

قرب مني أكتر، وقال بصوت هادي:

مجد: بس أنا عاوز ده منك أنتِ... عاوز أحس إنك مشتاقة ليا زي ما أنا مشتاق لك في كل حاجة.

وطيت راسي بخجل وقلت له:

أنا: مجد، أنا طبعًا مشتاقة لك في كل حاجة.

فضل باصص لي شوية، وبعدها ابتسم بمشاكسة.

مجد: بس أنتِ لسه بتخجلي مني!

قربت منه وقلت بابتسامة:

أنا: أنت نفسي يا مجد... هو فيه حد بيخجل من نفسه؟

ضحك وقال:

مجد: آه، أنتِ!

ضحكت وأنا بحاول أهرب منه.

أنا: خلاص بقى يا مجد!

سند راسه على راسي، وبصلي بحنان.

مجد: إيه؟ مستنية إيه؟

ضحكت وأنا ببصله باستغراب متعمد.

أنا: مستنية إيه؟

غمض عينيه، فغمضت عيني أنا كمان، وقربت منه وطبعت قبلة طويلة على شفايفه.

ضمني لحضنه أكتر، وكأن اللحظة دي كانت كفاية إنها تعوضنا عن أيام طويلة افتقدنا فيها بعض.

وبعد وقت طويل...

اتجمعنا كلنا وفطرنا مع بعض كعادتنا، وكانت الأجواء هادية ومليانة ألفة.

كنت قاعدة جنب مجد، وهو حاطط دراعه على كتفي واخدني في حضنه من الجنب، وكل شوية يهزر معايا ويضحكني.

لحد ما فجأة جرس الباب رن.

حازم قام يفتح، لكن اتفاجئ باللي واقفين قدامه، وفضل باصص لهم للحظات من غير ما يتكلم.

ياسين: مين يا حازم؟

حازم ما ردش، واكتفى إنه وسع لهم الطريق وقال:

حازم: اتفضلوا.

دخلت د. جيهان ومعاها سارة، وكان الاتنين موطّيين راسهم، وكأنهم داخلين وهم عارفين إن وجودهم مش هيكون سهل.

أول ما مجد رفع عينه وشافهم، ابتسامته اختفت تمامًا.

رفعت عيني أنا كمان، وفي اللحظة دي قلبي اتقبض، مش خوفًا منهم، لكن خوفًا من رد فعل مجد.

اتحرك بسرعة، وقام من جانبي، وبص لهم بغضب واضح.

مجد: أنتوا جايين تعملوا إيه هنا؟!

سكت لحظة، وبعدها كمل بنبرة حادة:

مجد: أنا سيبت لكم الدنيا كلها... عاوزين مني إيه تاني؟!

في اللحظة دي مسكت إيده، وبصيت له، فبصلي وكانت ملامحه كلها غضب.

ضغطت على إيده بقوة، بحاول أوصله إني جنبه، وإنه مش محتاج يدخل في مواجهة بالشكل ده.

وبعدين بصيت لد. جيهان وسارة وقلت بهدوء:

وعد: اتفضلوا... اقعدوا.

ماما ورغد وياسين سلموا عليهم، وبعدها رحبوا بيهم، رغم إن الجو كله كان مشحون بالتوتر.

أما مجد، ففضل واقف مكانه، واضح إنه مش متقبل وجودهم، ولا حتى عنده استعداد يسمع منهم.

سلمت عليهم وأنا قاعدة مكاني، ومن غير ما أتحرك بسبب عجزي، وقلت بابتسامة هادية:

وعد: أنا آسفة، رجلي تعبانة شوية، مش هقدر أقوم أسلم عليكم.

مكنش اعتذار قد ما كان محاولة أوصل لهم إني مش رافضة وجودهم، وإن سلامي وترحيبي بيهم حقيقيين، مهما كان اللي حصل.

بعد شوية، رغد وحازم وماما استأذنوا، وخرجوا من المكان، وسابونا لوحدنا معاهم.

أنا ومجد، قصاد د. جيهان وسارة.

مجد لسه واقف، وملامحه متجمدة، ورافض حتى إنه يقرب من المكان اللي هما قاعدين فيه.

بصيت له وقلت بهدوء:

وعد: مجد، ممكن تقعد؟

بصلي نظرة طويلة، وكأنه مش مقتنع إنه يقعد معاهم في مكان واحد، لكنه في النهاية استجاب لكلامي، وقعد جنبي.

حطيت إيدي على إيده، فبص لهم وقال ببرود:

مجد: خير... جايين ليه؟

ياسين كان قاعد بهدوء، مستني اللحظة المناسبة إنه يبدأ الكلام.

لف وشه ناحية د. جيهان، وبصلها مباشرة، وقال بصوت هادي لكنه حاسم:

ياسين: ابنك عرف كل حاجة.

وساد صمت تقيل في المكان...

د. جيهان فضلت باصة لياسين، من غير ما تقدر تنطق بكلمة، بينما مجد ثبت عينيه عليها، مستني يسمع منها أي رد.

أما أنا، فكنت ماسكة إيده، وحاسة إننا على وشك نفتح باب لحكاية يمكن تكون أصعب من كل اللي فات.

لأن المرة دي... مفيش أسرار هتفضل مستخبية.

ديون النبض 🫀

بقلم الكاتبة مروة صياح ✍️🎯

ياسين بص لدكتورة جيهان وقال بجدية:

ياسين: ابنك مجد عرف كل حاجة. عرف إن إنتِ السبب إن وعد تبعد عنه، وإنك السبب في تعبها وعجزها. ومش بس كده... عرف إن سارة كمان كانت معاكي.

دكتورة جيهان بصت لي بصدمة، هي وسارة، وكان واضح من ملامحهم إنهم ما كانوش يعرفوا إن اللي حصل لي وصل بيا للعجز.

مجد بص لهم، وبعدها قرب مني أكتر، ونزل على ركبته قدامي، وبص لهم وهو بيتكلم:

مجد: إيه؟ ما كنتوش تعرفوا؟ اتفاجئتوا لما عرفتوا إن إنتوا السبب في عجزها؟

مسك وشي بين كفوفه، وبص لي بحنان قبل ما يكمل كلامه:

مجد: بس هي مش عاجزة... وعد مش عاجزة. قلبها يعلّمك يا دكتورة جيهان اللي ما اتعلمتيهوش في جامعتك، ولا اللي بتعلميه لدكاترتك.

وعد مش عاجزة... اللي عاجز قلوبكم إنتوا. واللي أصابه الشلل هو قلبكم، مش رجليها.

وعد هتقف على رجليها تاني، عشان قلبها طاهر وبريء، وأنضف من قلوبكم إنتوا الاتنين.

عارفين إنتوا أذيتوها قد إيه؟ إنتوا أذيتوني أنا أكتر... ووجعتوني مرتين، مرة عشاني ومرة عشانها.

دكتورة جيهان وقفت، لكنها ما قدرتش تتكلم. قربت مني والدموع في عينيها، ونزلت على ركبتها قدامي، وكان باين عليها الخزي والندم.

دكتورة جيهان: وعد، سامحيني يا بنتي. أنا ما كنتش أعرف إن اللي حصل لك وصل للدرجة دي، ولا كنت أعرف إن نتيجة اللي عملته هتكون كده. كنت فاكرة إني بحافظ على مستقبل مجد، وبخليه يقرب مني غصب عنه... لأنه كان بيبعد عني.

بعدها بصت لمجد، ومدت إيدها ومسكت كتفه.

دكتورة جيهان: مجد، اسمعني.

بصلها مجد، وملامحه اتغيرت، وقال بصوت مليان وجع:

مجد: أسمعك؟!

تلاتين سنة وأنا كل اللي بعمله إني بسمعك.

تلاتين سنة وإنتِ بتتحكمي فيا.

تلاتين سنة وإنتِ شايفاني زي الجراب اللي بتحاولي تحافظي بيه على ثروتك ومكانتك وسلطتك.

تلاتين سنة وإنتِ شايفاني مجرد أداة عشان ثروتك دي تفضل معاكي.

انسي إن ليكي ابن اسمه مجد.

بص لها وكمل كلامه بنار في عينيه:

مجد:أكتر من سنتين ونص وأنا كنت حاسس إني لقيت نفسي. لقيت الحب اللي بدور عليه.

أنا شفت فيها أمي اللي اتحرمت منها.

شفت معاها ومع أسرتها حب الأسرة، والاهتمام، والاحتواء اللي اتحرمت منه عمري كله.

اتعلمت منها إزاي أحب، وإزاي أفكر في غيري. اتعلمت منها إزاي أخفف ألم الناس اللي حواليا، وإزاي أخفف ألم المرضى اللي بكشف عليهم.

الطب كان بالنسبة لي مهنة... لكن هي علمتني إنه روح، وإنه معاملة، وإنه وقاية قبل ما يكون علاج.

اتعلمت منها إزاي أعيش... واتعلمت منها إزاي أحب.

إنتوا بقى كل ده ما تعرفوش عنه حاجة. إنتوا كل اللي تعرفوه نفسكم وبس، أنانيتكم وبس.

عايزين فلوس؟ عايزين شركات؟ خدوا كل اللي إنتوا عايزينه.

أنا اللي إنتوا عايزينه نفذته لكم من زمان، والوصية اتنفذت... ولكن خلاص.

أنا بقولك: انسي إن ليكي ابن اسمه مجد.

بالنسبة لسارة، هي عندك، واللي في بطنها ربيه زي ما إنتِ عايزة. يمكن تعرفي تحبيه، يمكن تقعديه في حضنك، ويمكن تحسي معاه إنك أم.

وعلى ما أعتقد... عمرك ما هتحسي بالكلام ده.

سكت لحظة وبصلها، وبعدها قال:

مجد: دكتورة جيهان، هقولك حاجة أخيرة...

أنا اتجوزت وعد، ويا ريت ما أشوفكيش قدامي، لا إنتِ ولا سارة في أي مكان.

أنا سايب لكم كل حاجة، وهبدأ من الصفر. مش عايز أي حاجة تاني.

أنا سبت الدنيا كلها... مش عايز غير وعد.

الإنسانة اللي حبتني عشان شخصي أنا، والإنسانة اللي حسستني بنفسي ورجعتني لنفسي.

في اللحظة دي سارة وقفت قدامه، وقالت بصوت متوسل:

سارة: مجد، سامحني عشان خاطري، ما تسيبنيش.

رد عليها من غير ما يغير ملامح وشه:

مجد: لو أنا سامحتك... ابنك اللي في بطنك ده هيسامحك؟

لو أنا سامحتكم، اللي إنتوا عملتوه فيا وعملتوه في وعد... مين يحاسبكم عليه؟

إحنا برضه، على ما أعتقد، مش هتكون عدالة إن إنتوا تعملوا كل ده، وتفضلوا عايشين بأمان وراحة، وتاخدوا كل حاجة.

كفاية عليكم الورث اللي كنتوا بتحاولوا توصلوا له، وأنا مش عايز أي حاجة.

دكتورة جيهان، ما تقلقيش... شركاتك كبرت، وكل اللي إنتِ عايزاه تم وأحسن من كده.

بصلهم وقال بحسم:

مجد: عمري ما هسامحكم على اللي إنتوا عملتوه فينا.

دكتورة جيهان وقفت قدامه، وصوتها كان متكسر لأول مرة في حياتها.

دكتورة جيهان: بس صدقني يا مجد... أنا فهمت ده متأخر.

فهمت إني قصرت في حقك كأم، وفهمت إني أنا اللي دمرتك.

صدقني، أنا من جوايا كنت عايزة أطمن على مستقبلك. كنت بحارب نفسي عشان أبني لك مستقبلك.

ما كنتش عايزاك تتعب زيي، ما كنتش عايزاك تطلع ضعيف، ولا مدلل زي خالك.

جدك دلعنا كتير، وإحنا خسرنا كتير. كنت فاكرة إن اللي بعمله ده عشان أبنيك وأضمن لك مستقبلك. كان أهم حاجة عندي أشوفك إنسان معروف، إنسان عنده كل حاجة.

كنت خايفة عليك. بقسّي عليك عشان ما تغلطش، وما تقصرش في مذاكرتك ولا دراستك. كنت بقسّي عليك عشان تبني نفسك بنفسك.

أنا كمان اتجبرت يا مجد.

أنا حبيت ياسين زمان... كان هو كمان إنسان بسيط. ولما جدك عرف واتجوزته، جدك ما سكتش لحد ما طلقني منه.

مش بس كده، لما عرفت إني حامل حاولت أكمل حياتي مع ياسين، بس جدك وقف ضده.

وأنا ضعفت... كنت عايشة مدللة وعندي كل حاجة، ما قدرتش أستحمل الفقر. ضعفت وبعدت عن أبوك.

ما فكرتش فيك وقتها. ولدتك وسيبتك للمربية هي اللي تربيك. أبوك كان بيحارب عشان ياخدك، وأنا كنت بحرمك منه.

كبرت وأنا منشغلة عنك، كبرت وأنا بفكر في نفسي وفي مستقبلي. كبرت وأنا عايزة أكون دكتورة ناجحة وأحافظ على اللي عندي.

لدرجة إني نسيت نفسي... نسيت إن فيه حياة إنسان تاني مسؤولة عنها. لدرجة إني نسيتك إنت.

أوقات كتير كنت برجع من شغلي وأنا ناسية إن عندي ابن. ما كنتش بسأل عليك، ولا حتى أعدي عليك أطمن...

إنت نايم؟ أكلت؟ إنت كويس؟

مجد كان بيسمعها، لكن ملامحه ما كانش فيها أي ارتياح. كأن كل كلمة بتقولها بتفتح جرح قديم، وتفكره بسنين طويلة كان محتاج فيها أم، مش دكتورة ناجحة ولا صاحبة إمبراطورية.

قرب منها خطوة، وقال بصوت مليان مرارة:

مجد: إنتِ دكتورة كبيرة، ليكي شأنك واسمك ومكانتك.

عندك فيلا، وعربية واتنين وتلاتة. عندك مستشفى كبيرة، وشركة أدوية، وشركة أجهزة طبية... غير شغلك وغير علاقاتك.

أنا ما أنكرش إن إنتِ اللي عملتيني، بس إنتِ للأسف ما عندكيش أهم حاجة... ما عندكيش قلب.

عارفة يعني إيه ما عندكيش قلب؟

عارفة يعني إيه تكوني دكتورة قلب... وما عندكيش قلب؟

وفجأة صوته علي، وصرخ في وشها:

مجد: مين قالك تكلمي وعد وتبعديها عني؟ مين قالك تدخلي في حياتي؟

إنتِ اخترتي كل حاجة وأجبرتيني عليها. الحاجة الوحيدة اللي أنا اخترتها... بعدتيها عني.

قتلتيني للمرة التانية.

قتلتي مجد ابنك... والمرة دي قتلتي قلبه.

إنتِ عارفة إنك قفلتيني من كل الستات؟ جبتِ لي عقدة، ما بقيتش قادر أقرب من أي حد.

ما كنتش شايف إن فيه ست تستحق إني أحبها، ولا كنت شايف إن فيه قلب يستحق إني أقرب منه.

قرب مني تاني، ومسك وشي بين كفوفه، وكانت الدموع باينة في عينيه وهو بيكمل كلامه:

مجد: لحد ما شفت وعد.

هي اللي غيرت وجهة نظري. اللي عندها مش عندكم.

هي مش أنانية زيكم، ولا جشعة، ولا طماعة... بالعكس.

أنا فضلت أحبها وهي ما تعرفش.

كنت بشوفها وبراقبها وهي بتهتم باللي حواليها، وبتحاول تسعدهم.

كنت بشوف ضحكتها، ونشاطها في الجامعة، وتمسكها بمبادئها.

سنة ورا سنة، وهي ثابتة على مبادئها... وقفت قدامك وما همهاش.

وأنا بحبها في السر، واتمنيت بيني وبين نفسي إنها تكون ليا.

مش عايز أي حاجة تانية..


تعليقات