رواية اخر نفس صبر الفصل الرابع والخمسون 54 بقلم حنين عادل

 

 

 رواية اخر نفس صبر الفصل الرابع والخمسون بقلم حنين عادل




مسكت ميادة ايد راغب وهي مبتسمة 

بصت علي ايده وهي بتقول : ايدك متلجة يا حبيبي بردان !

مسكتها بايديها الاتنين وهي بتقول:
انا ماعدش عندي صبر ...وحشتني ...وحشني اسمع صوتك يا حضرة الظابط...
ايه بقا ما تحن يا جن أنا مستنظر !
ايه ده ..
ايه اللي انا بقوله ده بس ؟

ضحكت : انا شكل قلة النوم عملت معايا عمايلها...
أنا عاوزة استحمي يا راغب ريحتي بقت وحشة اوي 

ياربي..الحمد لله انك مش سامعني...

بس قلبي مش مطاوعني اسيبك وامشي ..
ولا البيبي عاوز يسيبك ...

حطت ايدها علي بطنها بحب : ابننا يا راغب...
مستحيل انزل حتة من حبيبي !

*انتِ قولتي ايه ؟!.

اتنهدت : ابننا يا حبيبـ..

بصت له بـ فرحة وابتسامتها مالية وشها واتجمعت الدموع في عينيها : راغب...انت فوقت ..
انت رجعت لي يا حبيبي .

ابتسم وهو بيمشي ايده علي وشها : وحشتيني يا ميادة ...

كمل بـفرحة : أنتِ بتتكلمي بجد ...انت مانزلتيش ابننا .

هزت راسها : عمري ...عمري ماقدر حتي لو وجعتني قد كده مليون مرة ...ماقدرش انزل روح ربنا رزقني بيها وماقدرش اوجع اكتر حد حبيته في حياتي ..

بص لها وسكت ثواني وبعدين قال: أنا آسف يا ميادة ...آسف علي كل احساس وحش حسيتي بيه
بس اديكي شوفتي أنا بتعامل مع مين ...

مسكت ايده اللي كانت بتلمس وشها وباستها: خلاص ...كل الوحش فات ياراغب...المهم نفضل سوا ..

راغب: اممم ...

كمل بغمزة:
ايه بقا ما تحن ياجن أنا مستنظر ده ؟
مستنظر ايه يا أبيض ؟

بصت له بخجل : أنتَ...أنتَ كنت سامعني ؟

هز رأسه : ايوه!

ردت ميادة بسرعة : كل حاجة ...كل حاجة ؟

ضحك راغب: ايوه ...
من اول حوار سماح !
اللي لا بتريح ولا ترتاح !
بنت قريبكم من بعيد اللي كانت بتيجي تعمل المصايب وتلبسك فيها ..
لحد انك عاوزة تستحمي !

حطت ايدها علي بوقها بخجل : 
يووووه بقا ...

سكتت ثواني وبصت له بغضب: يعني انتَ كنت فايق اصلًا وبتشتغلني يا حضرة الظابط؟

بص لها بحب : كان واحشني صوتك ...كنت عاوز اسمع لك بس ...عاوزك تطلعي كل اللي في قلبك ...
بس ..لما قولتي أنك مانزلتيش ابننا ماقدرتش اكمل تمثيل...

اتنهد : اكدتي لي انك نزلتيه حصل لي انهيار
الحزن كان بياكل في قلبي بس لأ ...
كان في حاجة جوايا بتقول لي مستحيل 
مكان في قلبي منور بيقول لي مستحيل ميادة تنزل طفل حلمتوا بيه سوا ..
مستحيل ميادة تبقي قاسية للدرجة دي ...
مستحيل ميادة تجرح حضرة الظابط.

*طب ..وافرض ميادة شيطانها اتغلب منها ونزلته ...كنت هتعمل ايه ؟

ابتسم : كنت هسامح وهستعوض ربنا  ..
اه نفسي في طفل ...بس تكوني أنتِ أمه .
مش عاوزه من حد غيرك ..

كمل بقلق : 
اه صحيح ..أنتِ كويسة ؟
بعد الوقعة اللي زقهالك ابن الكلب اللي دخل يقتلني ده؟

ابتسمت ميادة :
اه الحمد لله ...

 ضيقت عينيها بـ شك وكأنها بتربط الأحداث ببعض: 
راغب...ممكن اعرف انت فايق من امتي ؟

هرش في شعره وقال وهو قافل عين وفاتح التانية : من يجي كده ....أو اكتر مش فاكر يعني !

ضغطت علي شفايفها بغضب: يعني انت فوقت عادي ومادخلتش غيبوبة اصلا !

رد بتوتر : احم...أنا آخد طلقة في منطقة خطر علي فكرة أنتِ زعلانة اني مادخلتش غيبوبة ولا ايه !

بصت له بغضب وكانت هتتكلم ..

فـ رد بسرعة : حبيبتي اهدي بس كده 
استهدي بالله يا وحش أنا تعبان  ...ده لـ دواعي أمنية والله ! 
مش بايدي أنا كنت مجبور عشان عارف ان الخطر لسه موجود !

اتنهدت وهي بتهز راسها بتفهم: 
طيب ...بس اوعدني ..انك عمرك ما هتكدب عليا تاني..

راغب بابتسامة : اوعدك ...

كملت كلامها : حتي لو بتحميني !

هز رأسه بابتسامة: حتي لو بحميكي ..
بس تشوفيني بعين قلبك يا ميادة !

بصت له بفرحة باينة في عيونها وهي بتقول : 
اه يا نصي التاني اللي رجع لي من بعد غياب ..

ضحك راغب: واضح أن الدنيا هتحلو !

ميادة باستغراب: قصدك ايه؟

ابتسم راغب: يعني ...بقيتي مبادرة بالكلام الحلو ...وهتولع ياشقيق ...

ضحكت ميادة: ياجدع انت في ايه ولا ايه روق الأول ...وبعدين ما تنساش انك طليقي يا حبيبي !

راغب : رديتك يا ميادة !

ضحكت بسخرية : ههههه لا يا روحي مش موافقة !

ابتسم راغب: بطلي بقا هزار !

بصت له بجدية: بجد يا راغب مش موافقة ...الا بشروط

ضحك راغب: وايه هي شروطك يا أبيض ؟
*ــــــــــــــــــــــــــــــــــــــ*
وفي السجن ...

نور الزنزانة اتطفي ...بص ممدوح حواليه بخوف وهو بيبلع ريقه بتوتر ...

ممدوح : يا عبد الموجود ...يا عسكري عبد الموجود ...

المكان كان عتمة اوي وماكنش شايف اي حاجة قدامه ..

قام من علي السرير وقف وهو ساند علي الحديد بتاعه ...

صوت الباب بيتفتح ببطئ ...

بلع ريقه بخوف وهو بيقول : ده...ده انت يا عبد الموجود !...

ماكنش فيه رد ...صوت خطوات بتقرب منه خطوة ورا التانية ...

ممدوح بصوت عالي: يا عبد الموجود....انت فين ....

دقات قلبه علت لدرجة بقي صوتها مسموع والخوف اتمكن منه: انتَ مين ...أنتَ مين !
*ــــــــــــــــــــــــــــــــــــ*
إنارة مالية الشارع بألوان الأحمر والأبيض والأصفر والأزرق ...

متوصلة من بيت فرحة لـ بيت سعيد علي مساحة كبيرة ...

وخيمة كبيرة مالية الشارع فيها مسرح كبير وقدامه صفين طوال من الكراسي ...

صوت عربيات بتزمر وبنات صُغيرة لابسة فساتين عروسة وحاطين ميكب بألوان فاقعة بيجوا يجروا  وهما بيضحكوا ومبسوطين وبيقولوا في صوت واحد : 
العريس وصل ...العريس وصل ...

بتقف ام سعيد اللي بتكون لابسه عباية سوده بتلمع من علي صدرها ولابسة طرحة سودة مع كحل تقيل في عينيها والفرحة باينة علي وشها بترفع ايديها وبتزغرط وبتجاملها الستات وبيزغرطوا معاها في نفس واحد.

بتدخل عربية سودة وعلي كبوتها بوكيه ورد كبير...
ومتزينة من علي الأبواب بالورد .. 
بتقرب الفرقة منهم ...

بينزل سعيد من العربية وبيكون لابس بدلة سوداء مزوداه جمال فوق جماله  فـ بتبُص له أمه بفرحة وعيونها مليانة دموع ...

بيلف وبيفتح الباب لـ فرحة اللي بتنزل بفستانها الأبيض اللي فوقه حجاب كامل وميكب هادي مطلعها زي الملاك من كتر رقتها ...

بيمسك ايدها وهو بيبُص لـها بسعادة وهي مبتسمة...

وبتشتغل الفرقة ...
وبسم الله الرحمن الرحيم وهتبدأ الليلة ...
عريسنا الزين كحيل العين وعروسته حلو وجميلة ...

ميلت علي ودنه : ماكنش ليها لازمه الكلفة دي كلها .

وطي لمستواها وهو مبتسم : 
افرحي يا حبيبتي...ده يوم في العُمر  
وانا عاوز اوري الدنيا كلها ...أن سعيد فرحان بـ فرحة .

ابتسمت وهي بتبُص له وعيونها بتلمع  ..
وهتنطق وتقول له بحبك ...

مسكت ام سعيد كيس حلاوة ورمتها عليهم ...
فجري العيال الصغيرين وحاوطوهم وهما بيلموا الحلاوة ...

ضحكت فرحة وهي بتبُص عليهم ...

مشيوا لحد ما قعدوا علي الكوشة كانوا بيبُص لبعض وكأنهم في عالم لوحدهم ...
وكأن عينيهم فاهمة بعضها .

الناس بترقص مع دق المزيكا ...الأطفال فرحانة الستات بتزغرط..

وفي بيت صابرين ...وقفت تبُص عليهم من بعيد بغضب وهي واقفة قدام بيتها: 
دول جيران دول ...
دول جيران الهم...الهي ما يوعوا يفرحوا ...

عدت واحدة عليها وسمعتها فـ قالت بضيق : 
حرام عليكي يا أم رُقية ...دول غلابة ده ام سعيد ماصدقت عقدته اتحلت واتجوز !

بصت لها صابرين بغضب: وبنتي اللي لسه دمها مابردش !

ردت عليها وهي بتخبط كف في كف : لا حول ولا قوة الا بالله الحي أبقي من الميت..

رفعت صابرين حاجبها وقالت بقرف: امشي يا وليه من وشي الساعة دي ...غوري 

ابتسمت باستفزاز وهي بتقول : حاضر هروح الفرح اهو اهيص معاهم.

بصت عليهم صابرين بغضب ودخلت وقفلت الباب بقوة : ناس ما بتحسش...

وفي الفرح ....

بيرقص سعيد مع أمه علي أغنية محمد سعد
اللي منك منك ...
وانت منه ياعم 
الشكل هو هو 
والدم هو الدم 
واللي أمه تملي بتدعيله تدعيله 
أحسن من اللي أمه بتديله تديله ..

وفرحة بتهز كتافها مع الستات اللي بيرقصوها من غير ابتذال ولا أفورة..
*ـــــــــــــــــــــــــــــــــــــــــــ*
وفي فيلا مروان ...

اتسحب مروان بالراحة لحد ما وقف قدام باب أوضة رُقية بص يمين وشمال وهو بيآمن الطريق 

وبعدها وطي وبص من خرم الباب.

فجأة لقي اللي بيمسكه من ودنه :
بتعمل ايه يا سافل يا واطي أنتَ

نفخ بضيق وهو بيحاول يفك ايديها وبيقول بصوت واطي : يوووه يا ماما عاوز اشوف الحنة !

ردت سلوي بصوت واطي: ايه يا ولا مالك كده مش علي بعضك هتتجوز علي نفسك كده ليه !
أنت لسه ماكتبتش كتابك ياروح أمك !

ضحك وهو بيتنهد: تعبان ياما !

سلوي : بص ...أنت تروح تنقع نفسك في ماية ساقعة هتريحك وهتهديك !
يلا ياض من هنا 

مروان بيبُص لها بغضب مكتوم : حاضر ! 

سلوي بتبرق له: اتكلم بطريقة كويسة بدل ما اظبطك وأقل منك قدام العروسة .

ابتسم : لا وعلي ايه حاضر يا ماما !

ضحكت سلوي : شاطر ...يلا حسك عينك اشوفك تهوب ناحية هنا تاني ...هجرسك .

هز مروان راسه ومشي ...فخبطت سلوي ودخلت عليهم ...

بتكون رُقية قاعدة رجليها وايديها مكشوفين وواحدة بتحنيها...

ابتسمت سلوي: بسم الله ماشاء الله قشطة !..
زودي في الحنة ياختي 
الواد بيحب الحنة .

ضحكت الست اللي بتحنيها ...وبصت رُقية في الأرض بكسوف. 
كسوف وكأنها لأول مرة في حياتها بتتجوز...

زغرطتت سلوي بـ ابتسامة ..

ورُقية بتبُص عليها بفرحة ...

سلوي : وأخيرًا الفرح هيدخل بيتنا .
*ـــــــــــــــــــــــــــــــــــــــ*
وفي بيت ميادة ...

طلعت ميادة من الحمام وهي بتنشف شعرها 

طلعت كوثر علي الكرسي المتحرك وهي بتقول :
يعني جاية من بره علي المطبخ وبعدها علي الحمام عدل الا ما دخلتي تسألي عن أمك ؟

ميادة بابتسامة : معلش ياما حقك عليا ...
أنا بس عاوزة اخلص بسرعة عشان راغب لوحده 

كملت كلامها بفرحة : فاق ياما ...فاق ...

ابتسمت كوثر : طيب الحمد لله...ربنا يقومه بالسلامة ..

بصت ميادة حواليها: هي مي فين ؟

كوثر : مي راحت لجوزها ...قالت هتبات في بيتها النهاردة وچني معاها كالعادة !

هزت ميادة راسها : طيب ماشي .

دخلت ميادة الأوضة لبست دريس هافان بسيط وعليه طرحة اوف وايت ...حطت كحل وروچ نود ..
رشت برفان وبصت لـ نفسها في المراية وهي مبتسمة ..

دخلت المطبخ حطت شوية شربة خضار وفوقها حتة فرخة في طبق علي صينية وراحت لأمها ..

ميادة : خودي ياما ...

مسكت كوثر الطبق: ياخد عدوينك يا حبيبتي...

بصت لها ميادة بابتسامة ودخلت حطت الأكل في حافظة الأكل وقالت : 
أنا همشي أنا عاوزة حاجة..

كوثر : سلامتك يا حبيبتي....

خرجت من البيت وعدت جنب الفرح وهي مبتسمة وبتبُص له بانبهار وبتقول: عقبالي !
*ـــــــــــــــــــــــــــــــــــــــــ*
وفي السجن....

بيقعد العسكري علي الكرسي جنب باب الزنزانة وبيولع سيجارة وبيبُص علي الأرض 

بيلاحظ لون احمر تحت جزمته ...بيوطي عليه وبيحط صابعه فوقه وبيفركه يشوف ملمسه بيلاقيه دم ..

بيقف بصدمة وبيتتبع الدم جاي منين فـ بيلاقيه جاي من تحت عقب الباب ...

بيفتح باب الزنزانة وبيبرق بصدمة لـ ثواني وهو بيقول:
ممدوح باشا !...

بيكون ممدوح واقع علي الأرض 
ايديه الاتنين شراينهم متقـ.طعة وكم بدلته البيضاء متغرق دm
وفي ايد من ايديه كاتر متغرق دm

جري العسكري وهو بيقول بصوت عالي:
ممدوح باشا انتحر ...ممدوح باشا انتحر!
*ــــــــــــــــــــــــــــــــــــــــــــ* 
وفي المستشفي ...

يلا يا حضرة الظابط اخر معقلة اخر معقلة عشان خاطري ..

ضحك راغب: حاضر ...بس كفاية ماعدش مكان ...

هزت راسها : حاضر. ..

ابتسم : ما ارتاحتيش ليه يا ميادة في البيت النهاردة ..

ابتسمت : راحتي هنا ...جنبك يا راغب باشا ...

ابتسم راغب: مش قولتلك الدنيا هتحلو !
ماتجيبي !

قرب منها بوشه فـ بعدت عنه وهي بتضحك : 
بشروط يا راغب باشا !

راغب : أحلي شروط دي ولا ايه!

ابتسمت : بجد ...يعني مبسوط أننا هنعمل فرح؟

راغب: لأول مرة هعمل فرح وانا فرحان بجد ...بس للأسف !

بصت له باستغراب: للأسف ايه ؟

ضحك بغمزة : مش هعرف أعمل ليلة الدخلة اللي بحلم بيها ...

ضربت في كتفه : يا سافل...

مسك كتفه بوجع: ايدك تقيلة اوي يا ميادة ..

قربت منه بخوف: أنا أسفة ...آسفة والله ...

طبع بوسة علي خدها فـ بعدت وهي بتقول:
مافيش فايدة فيك ابدًا!

ضحك راغب: اعمل ايه في ....قلبي ...اول ما بتقربي مني ...بـيـ

حطت ايدها علي بوقه بسرعة:
أنا سمعت الجملة دي قبل كده ...بطل قلة آدب !

اتنهد: يعني مش كفاية عيان ....هبقي محترم كمان ...يعني لا كلام ولا فعل!

ضحكت ميادة: اتعلم ضبط النفس يا حضرة الظابط!

ضغط بسنانه علي شفايفه: مافيش ضبط نفس قدامك يا وحش الكون!
*ــــــــــــــــــــــــــــــــــــ*
اتمخطري يا حلوة يا زينة ...
ياوردة من جوه جنينة 
ياعود قرنفل يا عروسة
الورد ضلل علينا ...

دخل سعيد من باب البيت ووراه الفرقة وهو ماسك ايد فرحة والستات بتزغرط...

فجأة شالها بين ايديه وهي بتضحك من المفاجأة ..

وام سعيد وراهم واقفة بتزغرط ..

دور ورا التاني لحد ما وصل التالت 
نزلها قدام باب الشقة وهو بينهج

فـ قالت وهي بتضحك: كده هبطناك يا عريس ..

ضرب علي صدره وهو بيضحك: هبطوا مين أنا بومب أشيل عشرة !...

فتح باب الشقة ودخل وهي وراه ...

وقفت تفرك في ايديها بتوتر ...

ابتسم وهو بيقول : أنا هغير ...وانت غيري ...
عشان نصلي ركعتين لله ...
عشان ربنا يبارك لنا في حياتنا ..

هزت راسها بالموافقة ...دخل الأوضة خد هدومه ودخل الحمام ...

ودخلت فرحة الأوضة وحاولت تقلع فستانها كانت السوستة معلقة لحد ما قلعته بصعوبة ...

وقعدت فكت الطرحة ..
طلع سعيد من الحمام ...فأخدت هدوم ودخلت جري وهي بالبادي الابيض والاستريتش بسرعة وقفلت الباب ..

ضحك سعيد علي توترها ...وقعد يستناها لحد ما طلعت وهي متوضية وشايلة الماكياچ ولابسة الاسدال

فرش سعيد السجادتين علي الأرض وصلوا ...

خلص وبص لها بابتسامة : حرمًا ..

ابتسمت : جمعًا إن شاء الله...

قام وقف وشال السجادتين وطواهم وبعدين بص لها ...

فبعدت عنه بتوتر وهي بتقول : ايه ؟

ضحك سعيد وهو بيقلع الجلابية: ايه ؟
انتِ عارفة أنا بقالي كام سنة عاذب !

شالها علي ايديه وهو بيجري بيها علي اوضة النوم وبيقفل الباب وراه وهي بتقول :
اهدي يا سعيد مش كده بالهداوة يا اخويا بالراحة !

سعيد : هدواة ايه وراحة ايه ...ده مافيش راحة ولا بالراحة !

ضحكت فرحة بمياصة: يوه ...خلاص اللي انت شايفة يا سيد الرجالة!
*ــــــــــــــــــــــــــــــــــــــــــ*
وفي المستشفي...

كانت ميادة قاعدة علي كرسي جنب سرير راغب ...

دخل واحد وميل علي ودن راغب وقال حاجة بصوت واطي 

ملامح وش راغب اتبدلت وبان عليه الصدمة ...

بص راغب لـ الراجل وهو بيقول:
انتحر فعلا ولا بفعل فاعل؟

*كلنا عارفين انها بفعل فاعل...بس متفصلة انها تبان انتحار ..

اتنهد راغب: ريح واستريح...

مشي الراجل وقعد راغب ساكت بيبُص في الفراغ ...

ميادة باستغراب: في ايه ياراغب ؟

بص لها وقال: ممدوح الجندي...لقوه منتحر أو مقتـ.ول الله أعلم !

بصت له بفرحة : طب الحمد لله ...انت دلوقتي في أمان ..

هز رأسه بصمت فـ بصت له باستغراب: 
مالك يا راغب أنت زعلان عليه بعد كل اللي عمله فيك ده !

اتنهد راغب: المفروض اكون مبسوط ان الخطر اللي بيهدد حياتي راح ...بس لأ 
حاسس اني حزين عليه ...
الراجل ده أنا كنت بحبه وبحترمه ومش بنكر فضله عليا ..
لولاه ماكنتش وصلت للي أنا فيه !...
الله يعامله باللي بيستحقه !.
*ــــــــــــــــــــــــــــــــــــــــ*
يا مؤنسي في وحدتي
يا منقذي في شدتي
يا سامعًا لندائي
فإذا دجا ليلي وطال ظلامه
ناديت يا رب كنت ضيائي
 سبحانك جل جلالك يا الله 

كانت مي بتتألم وهي نايمة جنب أحمد وسامعة صوت الراديو ودموعها بتنزل بصمت بتحاول تستحمل الوجع...

اه ...اه ...صرخت بعلو صوتها ..فقام أحمد بسرعة وهو مفزوع وفتح نور الأباجورة : مالك يا مي ..

مي بصريخ: بولد ...بولد يا أحمد الحقني ..

نزل من علي السرير وطلع بره باب الأوضة .
فـ صرخت : رايح فيييييييين ؟

احمد بتوتر : هسخن مايه!

مي بصريخ : ليه هو انت اللي هتولدني وديني المستشفي يا بني آدم بسرعة !

هز رأسه : طيب حاضر حاضر اهدي !

مي بصريخ : اهدي ايه هو انا اعصابي تعبانة !
بقولك بولد ...همووووووووت

أحمد بخوف: اذكري الله ...اذكري الله 

مي بألم والدموع مغرقة وشها: يارب ....

فتح الدولاب بسرعة وطلع عباية سودا ولبسها ليها ولبس لها الطرحة ومسك الشنطة اللي فيها الهدوم اللي مي مجهزاها من فترة وحطاها علي الكرسي للطوارئ وشال مي علي ايديه وهو بيقول : يا قوي !

حطها في العربية جنبه وساق العربية بسرعة وهو بيقول : يارب ..
يارب ...يارب ...لا حول ولا قوة إلا بالله
لاحول ولاقوة إلا بالله

صوت صريخ مي كان بيزود توتره فـ يقول اذكار اكتر ...

وقف قدام المستشفي وفتح باب العربية ودخل وهو شايلها بخطوات سريعة : 
المدام بتولد ...دكتور ...دكتور بسرعة ...
*ـــــــــــــــــــــــــــــــــــــــــ*
وقفت رُقية قدام المراية تبُص علي الحنة بفرحة : 
سبحانك يارب .
أنا عارفة اني مش هموت وانا نفسي في حاجة !
امي ماعملتش ليا حنة ولا اتحنيت مع اني كان نفسي !
عوضتني خير بـ مروان وماما سلوي اللي عاوزين يسعدوني بأي شكل !

لبست إسدال وطلعت من أوضتها وكانت رايحة علي اوضة البنات ..
وفي ابتسامة مرسومة علي وشها اللي منور ما الفرحة بتنور الوش !

فتح مروان باب اوضته بسرعة وطلع لها : 
اييييييه ....

ابتسمت : ايييييه؟

ضحك: من الصبح قافلين علي نفسكم وحنة وبتاع !
طب ما توريني بقا!

هزت راسها وهي بتضحك : لأ!

مروان : طب حتة صغنططة !

ابتسمت رُقية: أما ابقي مراتك !

اتنهد مروان: هانت ! 
بس أنتِ سهرانة ليه ؟
مش بعادتك يعني؟

رُقية: عادي ماكانش جاي لي نوم بس هروح اتطمن علي البنات وهنام...

مروان : نوم الهنا يا قلبي أنا !

ضحكت رُقية وهي بتزقه يدخل اوضته :  طب روح نام يا مروان باشا يلا ...السهر مش حلو !

ضحك مروان: الوحدة وحشة يا رُقية يا ختي !

رُقية: مروان باشا ...اتقل شوية ...تصبح على خير.

ابتسم مروان : وأنتِ من أهلي !

مشت رُقية وهي مبتسمة وقفل مروان الباب ودخلت غطت البنات والضحكة مش مفارقة وشها ..

راحت اوضتها وقلعت الاسدال ونامت علي ضهرها وهي بتبُص للسقف بابتسامة وبتتنهد براحة :
احساس الأمان ده طلع حلو اوي !
أمان حقيقي مع واحد مطمنه له بحبه وفرحانة بيه ...
كل الحاجات الحلوة دي اول مرة أحسها ...
اول مرة احس اني اخترت مش مجبورة 
فرحانة مش بمثل الفرحة متطمنة مش خايفة 
متعشمة خير وراضية بكل اللي هتجيبه يارب ومتعشمة فيك خير.

غمضت عينيها وهي مبتسمة وراحت في النوم !...

وفي اوضة مروان ...

كان نايم  ايده تحت دماغه وحاطط رجل علي رجل وهو بيدندن : 
يابختك يا اللي صاحي الليل 
مادام كان السبب واحدة 
ومين يقدر ينام الليل 
وهو خياله مع واحدة !

الواحد عنده فرط حماس ويكأنه شاب مراهق أعذب مش شاب ثلاثيني كاريزما زيي!
*ــــــــــــــــــــــــــــــــــــــــ*
وقدام أوضة العمليات ...

كان احمد رايح جاي بقلق ....وأمه واقفة جنبه وبتقول : ربنا يقومها بالسلامة يابني ويرزقكم اطفال سليمين معافيين .

وصوت عياط طفل بيطلع من اوضة العمليات بص احمد ناحية الصوت بـفرحة وبعدين بص لأمه 

حنان بفرحة : الله أكبر الله أكبر تبارك الله...

خرجت الممرضة وهي شايلة طفلين ...
اول ما أحمد شافهم الدموع ملت عينيه وهو بيقول : بسم الله ماشاء الله...لا حول ولا قوة إلا بالله...

شالهم وهو بيبُص لأمه بفرحة وگأنه مش مصدق :
ولادي..ولادي يا أمي ...زين و وتين ...

دموع حنان نزلت علي وشها : الف مبروك يا حبيبي يتربوا في عزك ربنا يجعلهم من حفظة كتابه الكريم ويجعلهم بارين بيك.

رد أحمد وهو بيبُص في وشهم ودموعه بتنزل علي خده والإبتسامة مرسومة علي وشه: اللهم آمين ...

ادي طفل منهم لأمه وبص للممرضة: 
مي ...مي عاملة ايه.

ردت الممرضة: الحمد لله الولادة الطبيعية مرت علي خير ...

اتنهد أحمد بابتسامة وطلع فلوس من جيبه ...

رفضت الممرضة بكل ذوق وابتسامة ومشت وسابته
*ــــــــــــــــــــــــــــــــــــ*
ومع طلوع اول ضوء للشمس وصوت العصافير ..

فتحت مي عينيها وبصت حواليها شافت أحمد اللي كان قاعد جنبها مبتسم مسك ايديها وهو بيقول : حمد الله علي سلامتك يا أم زين ..

ميادة بفرحة: حمد الله علي السلامة يا ميوي ...البت طلعت شكلي !

ابتسمت مي : الله يسلمكم !...وبعدين ده يبقي من حظها لما تطلع شبهك يا دودو 

حنان : بركة انك قومتي بخير يا حبيبتي..حمد الله على سلامتك

ابتسمت مي: الله يسلمك ..

 بصت علي السرير اللي جنبها وبصت لأحمد بفرحة : عاوزة اشوفهم يا أحمد ..

ساعدتها ميادة تقعد وأحمد راح جاب زين وحنان جابت وتين ...

دقات قلب مي كانت عالية وهي بتبُص في وشوشهم وبتمسك ايديهم الصُغيرة وبتضحك 

وكانت جني واقفة جنبهم بتبُص علي العيال وهي فرحانة 

بصت مي لأحمد بفرحة ودموعها بتنزل علي وشها:
ولادنا يا أحمد ...الحمد لله حمدا كثيرا طيبا مباركا

بصت لـ فوق وهي بتقول : ربي أوزعني أن أشكر نعمتك التي أنعمت علي وعلي والدي وأن أعمل صالحًا ترضاه وأصلح لي في ذريتي إني تُبت إليك وإني من المسلمين .
*ـــــــــــــــــــــــــــــــــــــــــ* 
فتح سعيد عينيه علي فرحة اللي حاطة ايديها تحت دماغها وبتبُص عليه تتأمل ملامحه...

ابتسم : صباح الفل يا عروسة 

ابتسمت : صباح الورد يا أحلي عريس
اما أقوم اجهز لك الفطار .

اتحركت فـ شدها من ايدها قبل ما تقوم من علي السرير وهو بيقول: أنا مش عاوز افطر.

فرحة : اومال عاوز ايه ؟

غمز بضحكة : عاوز أحلي!
*ــــــــــــــــــــــــــــــــــــــــ*
وفي فيلا مروان...

بيكون في ناس بيظبطوا الجنينة وبيزينوها...

وقفت رُقية تبُص ليهم بتوتر وبصت لـ سلوي وهي بتقول : حنة ايه يا ماما سلوي اللي هنعملها هنا في الجنينة .
وبعدين مين اللي هيجي اصلا !
لا أنتِ اجتماعية ولا حد يعرفني عشان يجيني !
ماكنش ليها لازمة أنا اتحنيت ومبسوطة وكده رضا ..

سلوي: الجنينة دي مش هيبقي فيها خرم ابره حد يعرف يقف فيه ..
استني بس عليا !

اتنهدت رُقية: ماشي !...
*ــــــــــــــــــــــــــــــــــ*
وفي المستشفى....

ميادة بفرحة وهي بتحكي لـ راغب :
البنوتة ماشاء الله تبارك الله عسولة اوي 
دخلت قلبي واستربعت فيه .

ابتسم راغب: عقبال ولادنا ..

بص علي چني اللي واقفة متدارية في الباب وهو مبتسم: تعالي ياچوچو أنا بابا راغب ايه نسيتيني ولا ايه ؟
وحشتيني.

اتنهدت ميادة وهي بتبُص عليها: في الفترة الأخيرة كنت مأهملاها خالص وكانت قاعدة مع مي دايمًا ...حبيبة قلبى حاسة بالذنب اوي من ناحيتها ...

ابتسمت وهي بتبُص عليها: تعالي يا چوچو بابا راغب أما يبقي كويس هيخرجنا الملاهي ويوديكي البحر كمان ..

فرحت چني وقالت بحماس: بجد ...

ضحكت ميادة: ايوه يا حبيبتي...

جرت عليها چني فشالتها ميادة وقعدتها علي رجلها وقالت : أنا جبت لك حاجة أنتِ من زمان نفسك فيها 

بصت لها چني وهي بتفكر : ايه دي ؟

حطت ميادة ايدها علي بطنها : مش كان نفسك في أخ أو أخت نونو أنا هاجيبلك نونو ..

صرخت بحماس : بجد يا ماما هتجيبي لي نونو ألعب بيه

ضحك راغب وميادة وهما بيبصوا لبعض
وقال راغب: كلنا هنلعب بيه 

بص راغب لـ ميادة وميل عليها وقال بصوت واطي:هو حسين الوسخ الم@@@
ده ماظهرش تاني؟

ميادة : ليه....ليه الكلمات البذيئة دي يا حضرة الظابط وبعدين لأ من يومها ما ظهرش.

غمز راغب وقال بصوت واطي: الكلمات البذيئة بقت وحشة دلوقتي يا ميادة !
ده ذي الماذة بتعلي معاكي !

حطت ايدها علي بوقه بسرعة : يا قليل الأدب !

چني باستغراب: مين يا ماما ...مين قليل الأدب !

هرشت ميادة وهي بتضحك : ده بابا راغب بيحكي لي عن ولد وحش بيعمل بي بي في الشارع يا جوجو !

ضحك راغب: وحش اوي ...ينفع ...ينفع يعمل بي بي في الشارع !
وصلت لـ كده.
هي الدنيا جري فيها ايه بس !.......

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم



شكرا لزيارتكم عالم روايات سكيرهوم

تعليقات