رواية خلخال مشوه الفصل السادس والخمسون 56 بقلم زمرده

 

 


رواية خلخال مشوه الفصل السادس والخمسون بقلم زمرده



أرسم بيك أمس و أبچي
ومدري البيه شيفضة
وخفت لتشوفني شلوني
رسمت عيونك مغمضة

°جفون°

حطيت ايدي على گلبي اباوعلهم حيلي بأيد ما اعارف شلون وصلتلهم، دنگت شلتها وحواري اخذتها مني تحجي وياها بصوت يرچف
حواري : شبيج ماما ،شبيج حبيبتي ؟

وهي تأشرلها على سيف وترد تأشر على رأسها ومبين سيف طاگها
حواري : سيف طگج ،الا اطگنه اوگفيلي

اطتنياها ومشت لسيف الواگف بكل صلافه فلا چنه جاهل، دنگت گباله تسوي روحها تطگه وهو يباوع لحوراء بعناد ما يبچي
حواري : خررب امك شگد صلف

دنگت عمة عطاء شالته ما راضيه چي حواري تصيح عليه
عطاء : لا تعيطين عليه بعد حتى ترضين هل نواصه هاي

حواري : فدوة اروحلج عمة گلتيها نواصه اذا بچت شيسكتها شاله حالي والله
بعيارتها بس شسوي اطيها على مايها حتى اخلص منها

عطاء : أي تطيها على مايها وتكسرين بهل مگرود هذا

حواري : يا مگرود هذا ،دشوفي عمة جاي يعيبلها

بس باوعتله عمة عطاء نزل ايده ،ضحكت ومشيت يم غاية الگاعدة بالگاع ،مديتلها ايدي كضتها وگامت
غاية : والله طيحوا گلبي ،خايبة حورية بطليهم من سالفة العياط

حواري : وين اگدرلهم انا بس بالاسم امهم كل حجاية ماعدي عليهم خوبين هاي الهايشة گبل تشكيني الابوها وما يرضى احجي وياها

دنگت تگرص خدودها وتحجي
غاية : شگد ما تحجين وتگولين هايشة حتى ضعفانات خدودها

حواري : وين ضعفانات شوفيهن راح يطگن ليگول تاكل بطشت

ضحكت اباوع لحوراء لمبرطمه تفرك خدودها وتدردم على غاية
حوراء : دااج ايه

رافعه اديها ثنينهن تغم غاية ،دنگت شالتها تداهر بيها
غاية : عليمن ولج عليمن
تدغدها بيها وتحجي وحوراء تضحك وتدفع بايدها

تطشرنه من اندگ الباب ،مشيت بساع افتحه واصيح
_ اجنه النسوان غاية الماي حظرنه

فتحت الباب اتلگاهن ب أبتسامه وبس طبتتهن للديوان رديت ركض للمطبخ و وراي طبت ريحانة وعون
ريحانة : السلام عليكم

درت اردن عليها السلام وي الباقين، نزعت عباتها ترد على عمة من سألتها
زهرة : جا وين هيوفة ؟

ريحانة : ما ترضى تجي

تنهدت عمة عاجزة تلگه حل لسالفة هيوفة الما ترضى تدوس بيتنه عگب الصار لميمنة بأستنثاء مرة اجتنة من نوح سوه حادث وبعدها شگد نمشيلها ونتوسل تگول اتأذه ولا تلحن علي وحتى عمة هسة خلتها براحتها
بالرغم جاي اشوفن معالم الضوجه بوجها وتتمناها بيناتنه بس ماتگدر تضغط عليها بالاخص هي وضعها تعبان والحمل ماخذ عافيتها

علگت عباتها بالتعلاگه بصف عباة عمة تسأل
ريحانة : عدچن شي اساعدچن بيه ؟

غاية : لا كلشي مكملين

عطاء : جايتنه من تالي وتريد تساعد

رفعت حاجبها
ريحانة : هاا عمة راح تبدين

عطاء : عاب لهل حواجب الشگر

ضحكت ريحانة تحرك بيهن ثنيناتهن بنفس الوكت تغيض عمة وعمة اجت تريد تطگها وهي شردت ورا غاية وكل ما
تتحرك تحركها وياها تحمي روحها تجيبها منا وتوديها منا وصوت ضحكتها مالي المطبخ

فزت موسعه عيونها حاطه ايدها على حلگها من اجانه صوته من برا
صخر : صووووت

لطمت على خدها وحارت وين تطي وجها من طب خارزنه كلنه
صخر : شهل ضحك هذا

عطاء : هاي ريحانة وضحكتها مو جديدة

دار على ريحانة وهي مدنگة متفشله ،ما حاجاها وبس مشى باوعت لعمة بعتب
ريحانة : شدعواج عمة هيج حرجتيني انوبه وي صخر

عطاء : وشبيه صخر يعض ؟

ريحانة : تغشمين روحج عمة ما شفتي شلون ضاج لوما زحمة الا يلطشني بالگاع

عطاء : كله من ضحكتج الما تبطليها

ريحانة : شسويلها هيج الله خالقني

مشيت للصالة من سمعت صوت جده تصيحني ،دنگت گبالها
_ هاا جدة ؟

غضة : بعد حبوبتج امشي للغرفة جيبلي قوطية المسج والعمبر

_ صار

جبتهن ورديت اطيتهياه
_ بعد تردين شي ؟

غضة : اوگفي

ضليت واگفه اباوعلها دهنت شيلتها بالمسج والعمبر وسدت القوطية وكضت عوجبتها بايد وايدها الثانية مدتها الي حتى اساعدها تگوم ،گومتها احجي بمداهر وياها
_ كبرتي جدة بعد گضه الاكسباير مالتج

غضة : جا طلابه يا حبوبة

باوعتلها من صدگ مبينه تعبانه هل أيام مفاصلها هايجات عليها وكل ما نگلها خل ياخذوج الولد للدكتور ما ترضى وتگول ملتهين
بالموكب ومو وكتها
وبس مشيتها للديوان گعدت وي النسوان ورديت انا يم البنات بين ما اجت الملايه كلنه ميشنه للديوان

ريحانة : جفووون

درت راسي تحاجيني من الباب
_ هاا

اشرتلي اگوم ،گمت اعدل بثوبي بس وصلت عدها گالت
ريحانة : عمة گالت هم يله نحضر حتى نوزع بساع

_ غاية وين ؟

ريحانة : مشت گبلنه

_ جا امشينه

كضيت ايدها ومشينه و ورانه اجت حورية ،وعلى خبصتنه وطبت عمة خالدة
سلمنه عليه كلنه وردينه كلمن لشغلها بس ضلت غاية تحجي وياها وتصب بالجاي ومن سألتها ليش تأخرت گالتلها

خالدة : تلاغينه انا وعمج ، اگله اريدن امشي للدكتورة يگلي ما تعبتي وخليها على الله

غاية : صدگ حجيه خليها على الله لان الدوه ما يقدم الوكت البيه الله كاتب يرزقكم

تنهدت مفرفح گلبها
خالدة : راح اموتن اريدن احس بروحي أم

غاية : جا مو عدج علي

خالدة : صار زلمة وانا ما أتذكر شي من طفولته عمن چبته وانا كلش زغيرة ،وهم اريدله اخو يشد ضهره بيه

غاية : اذا على الإخوان هو عده ولا واحد ولا ثنين بس گوليها أنت التردين

خالدة : شلون ما اريدن ما شايفة وحشة البيت علي وهو وابوه ما يلفون غير بالليل

غاية : مو اگلج تعاي عدنه كل ما تضوجين

ما عارفت شني افسر سكوتها من ما ردت على غاية
زهرة : جفون يمة

_ هاا يمة

زهرة : اخذي ماي للنسوان بساع كتلهن العطش

_ صار

ترست الدولكة الگزاز ثلج وماي ومشيت شايلتها بأيد وايد الثانية الگلاص
افتريت على النسوان ومن جهه والثانية حواري فرتها وگبل لا نطلع طبت غاية شايلة الجاي
و وراها ريحانة شايلة
الكعك وبس گضن النسوان صارت الوگفه ومثل كل سنة بس يگضي مجلسنه نطلع للمجالس التعودنه نطلعلهن كل سنة

طبيت بساع اللبس عباتي واحاجي جدة
_ جدة ليش ما تمشين ويانه منا لهنا احنه نتچيلج

غضة : مابي حيل حبوبة راسي يون علي اريدن انام

_ اضلن يمج ؟

غضة : هاي مني التضل يمي جفون ،والله وصدگ كبرتي

_ عود اسوي زين بطلت

رادت ترد علي بس صاحن من برا چي تأخرت
غضة : امشيلهن حبوبة هسة يخلنج ويمشن .

هزيت رأسي ب أي و وصيتها على روحها وطلعت اركض بس شافتني صاحت
حواري : بساع طلعن گبلنه

مشت گبلي وانا وراها لگيناهن هستوهن يردن يطلعن من القرية ،خفتت مشيتي من وصلنالهن صرت بصف غاية ورفعت راسي على صوته يسأل

نوح : شني وين ماشيات ؟

وگفنه ورا عمه ترد عليه
زهرة : للمجالس ،أنت شعجب راد ؟

نوح : طاح علي الجاي واجيت ابدل هدومي وارد

رفعت راسي بفزه اباوعله بعيوني اتفحصه ،عيونه اجت بعيني ومن حجه خلاني احيرن وين اديرن وجهي من كلهن صارن يباوعلي
نوح : لا تخافين ما احترگت كلش

عطاء : ويامن جاي تحجي ؟

نوح : ما تعارفين ويامن، عطاء سوالفج مو علي

ندستني
حواري : انا الج رموش اذا ما اهلس رموشج اليوم شوفي

جريت روحي وختلت ورا عمه حتى ريحانة تباوعلي وتتحلف بي ،اشرتله بسيطة بدون ما ينتبهن
بس من ضحك كلهن ضلن يسألنه شكو وهو يجاوبهن

نوح : ماكو شي

حمحم و وخر من دربنه يريد يمشي للبيت بس وگفت بدربه وهن طلعن گبلها بس انا ضليت متانيتها
غاية : شو اشوفن الحرگ

رفعلها ايده وبس شفته نشغت وي نشغتها ،الجلد صاير احمر وبادي يصير بيه ماي ويگول مو كلش محترگ
ضل يباوعلها ويباوعلي
نوح : شبيچن يمعودات

غاية : صاير فرگيس بيها وتگول ما محترگ ،امشي للمضمد بساع

نوح : يمعوده ماتسوه

ردت علينه عمة تحجي لان صاحت اكثر من مرة
وما مشينالها
زهرة : شني سالفتچن يمة ما تمشن هسة حتى المجلس گضه

غاية : يامجلس يمة ،باعي ايد نوح اليگول مابيها شي

جر ايده من غاية يخزرها بس شافتها عمة ورفعت ايده تباوع بيها
زهرة : يمةةة وتگول ما محترگ ،ولك نووح يمةة ايددك

مفرفحه روحها من شكل ايده، بالگوه قنعها راح يمشي للمضمد يداويها الا شوي هاد بالها وگالتلنه نلحگهن ،مشن گبالي ،ضليت واگفه گباله واباوعله بقهر ،غمض عيونه ورد فتحهن وابتسامه خفيفة ابتسم وأشرلي

نوح : امشي

هزيت رأسي ب أي ولحگت غاية ،بس حست بي وراها كضت مدتلي ايدها، كضيتها احجي وياها
_ كون صدگ يمشي لا يضل

غاية : حلف يمشي ،واذا ما صدگ مشى شيخلصه مني

من وصلنه لبيت أم رقية لگينه النسوان جاي تطلع من مجلسهم وهي وراهن تلبس عباتها تريد تطلع بس شافتنه صاحت
رقية : عليش جايات بعد المچلس وگضه

حواري واگفه بصفها بساع كفختها
حواري : موزين لحگت كفيت البيت وياج

رقية : خايبة شسويتي كلهن چم كاغد
شلتيهن من الگاع

حواري : ايا ادبسزز يا نكاره المعروف

يتناگرن بالباب وعلى الحظ وي ما فكيت حلگي اريد احجي صاح اخوها من جوه
_ رقيةةة فضيهاا لا اجيج

شالت عباتها وطفرت گبلنه ،ضلينه من بيت لبيت منا لمن گضن المجالس
ردينه و وي طبتنه للقرية طبگت سيارة برهان گبال بيتنه ،ضليت اباوع اشوفن منو الفتح الباب الورا ،مشيت بساع من
شفتها غمد نزلت من السيارة و وراها سيوف ،صحت عليها بحس مسموع

_ غمدد ام النبگ

باوعت بأتجاهي وبس شافتني رفعت ايدها تسويلي هلو، ومن وصلت عدها سلمت عليها وعلى سيوف اسأل
_ شعجب اجيتن الله هداچن

سيوف : جده ودت علينه ،وين چنتن ؟

_ بالمجلس

اجت سلمت عليهن غاية وراهن ريحانة ومن طفه السيارة ونزل اشرلنه نطب
برهان : كملن سوالفچن جوه

بلايه ما نحجي وحده ورا الثانية طبينه ،امشي واحجي اسمع جدة
_ عيني غضة اچن عزيزاتج بنات كاظم ،صايرة ما تگدرين على فراگهن

نزعت عباتي اضحك من صاحت علي صوتها جايني من الصاله كملت دربي وبس شافتني گالت
غضة : ولج رموش جا انا ما صدگت اشوفنهن وروح أبوي چنت مأيسه من شوفة بزر كاظم

_ أي بعد بزر كاظم بت منير ببيش الكيلو

غضة : يا مفلوكه ،شني قصدج انا افرق

رفعت ايدي
_ خوب انا ما حاجيه أنت الحجيتي .

غضة : أنت تحجيني وتگولين ما حاجيه

_ جده الصوج منج لسانج بساع يزلگ

غضة : ياا ياا خايبات جيبنها الي اكسر العوچيه عليها

_ توو توو جده ،حسافه عليج بساع بعتيني

بالگوة كاضه ضحكتي وهي مصدگه ،ومن گتلها اداهرج ما حجت بعد وصاحت
بنات عمي كاظم يمها ،اخذت عباتي علگتها و وي طلعتي الغرفة طبوا الولد
من برا ضليت اباوع عليهم كاضه گلبي من ملامحهم المگلوبه و وي روحي اردد
_ سترك ربي بسلا هم طلابه

زهرة : شكو شصاير ،شبيكم مغيمين ؟

صخر : ماكو شي

گعدت مگابلتهم
زهرة : انا امكم واعارف من يصير شي مضوجكم ملامحكم تحجيلي لا تچذبون علي

طلع چگاره من الباكيت علگها ودار عيونه من عمه لصخر
ليث : وحگ هذا شهر الحزن بصلافته ماكو ،تندرس وتتقدم للأجيال

عطاء : منو ؟

جر نفس من الچگاره ورد عليها
ليث : ابن چسار

زهرة : ياهو منهم ؟

ليث : رهيب

زهرة : ليش شسووه ؟

ليث : غاية جيبلي ماي
گامت غاية تجيبله ماي وانا بكل تركيز فاتحه عيوني واذاناتي وياهم ،ردت بساع اطته دولكة الماي بين ما
يشرب بكل فضول نباوعله وصفنه كلنه مصدومين من گال
ليث :طب لموكبنه بحجة محتاجين دبة غاز ويعارف زحمة لو رديناه وموش اطباعنه

بصدمه گامت وگفت گباله تسأل
عطاء : واطيتوووه ؟؟؟

ليث : أي ،اجيت احطنها براسه بس تعوذت الشيطان

ضحكت عمة وبضحكتها خلت صخر وليث واحد بوجه الثاني يصفنون ما مفتهمين سبب الضحكه هاي
ليث : شكوو عمة ؟؟

يسألها وما ترد ولوما نترة صخر ما چان سكتت مسحت دموعها اثر ضحكها وگالت بحماس
عطاء : والله اذكروني تاليتكم تصالحون وعلى ايد ابن الچسار

هز ايده ليث وصخر گام يستغفر وخله وطلع وعمة گعدت بصف ليث شلون الواحد منتعشة روحه ،هو ضايج وروحه بخشمه وهي مبتسمه ،صاحتها عمة زهرة تگوم من شافت ليث صدگ متنرفز

وهي ابد فلا اهتمت ،طبطبت على چتف ليث وبس باوعلها گالتله
عطاء : على هل فرحه كون اذبحلي فد چم طلي من حلال أبوي واوزعهن على الوادم حتى المو فقره

ليث : شعدج ويانه عمة ؟

عطاء : كلشي ماعدي الله وكيلك ومحمد كفيلك

ليث : جا ليش احسنج بس تردين تتشمتين بينه

فرت عيونها وبكل صراحه جاوبته
عطاء : اريدن اتشمت بأبوي ،تدري اضن الله استچاب دعائي وابن الچسار حب بت عمك

خزرها وهي حاطه عيونها بعيونه ما مهتمه ،رفع أيده البيها الچگاره يأشر على روحه
ليث : شو تحجين گبالي وبعرضي هم

عطاء : تريدني اخافن منك ؟

ليث : لا بس احترمي غيرتي اذا ماتصير زحمة يعني

عطاء : صار تدلل

بأبتسامه تحجي وهو روحه صايره بخشمه متنرفز كلش ،بس طلع
گالت وهي تباوع لبنات عمي كاظم، وچن تتقصد تريد توصل الحجاية
عطاء : ليث ترا مايريد بركة هذا چدچن بكيفه يحجي

سيوف : شنو يعني يجبغهم ؟

هزت رأسها عمة ب أي
عطاء : جا شعبالچن

گامت تريد تمشي للغرفة بس گبلها وگفت تحذر
عطاء : انا راح انامن ديروا بالكم تگعدوني

غضة : أنت بس نامي وخلصينه

عطاء : مشكورة يمة وهاي عود انا بتج تردين تخلصين مني

تسوي روحها زعلانه بس الحقيقة كلنه نعارفها هي ما تزعلها هيج سوالف وابد ما تهتم ،مشيت للمطبخ من سمعت صوتها تصيحني ،بس طبيت گالتلي مرتبكة
غاية : عزيز خابرني يريد يجي يشوفني دام الولد بالموكب

_ أي وأنت شبيج راح تموتين ؟

غاية : استحي من بنات عمي كاظم ،گلتله بس ولا اهتم وگال اجي وسداه بوجهي

حطيت ايدي على خدي مصدومه
_ سداااه بوجهج ؟؟

غاية : أي والله فد صوجني

_ من يجي لا تطلعيله

صفنت بوجهي حايره
غاية : ها

هزيت ايدي
_ هم عوزها تطلعين ،تعارفين شني يعني يسد الموبايل بوجهج ؟

غاية : يعني ما يحترمني

_ اييي، ودام ما احترمج لا تطلعين

احجي احجي واعارف بيها بس يدگ الباب تنسى كلشي حجيته وسوتها صدگ بس شافته فتح باب الشارع وطب رادت تطلع ،كضيتها
_ سالمين ،جا صار ساعة شني احجي ؟

عيونها معلگات على الشباچ تباوع عليه يمشي بأتجاه المطبخ ،بس وصل قريب
علينه هديتها وطلعت ركض واسمع صوته وراي يگللها
عزيز : قضيتي

°غاية°

باوعتله بزعل ،مبتسم اجه وگف گبالي ،كض اچتافاتي يحجي وياي
عيونه بعيوني
عزيز : اعتذر سديت الموبايل بوجهج بس الروح لايبه على شوفتج وأنت تحجيلي بالعيب

_ ضوجتني

عزيز : سوده بوجه ليث

وسعت عيوني ما راضيه وهو ضحك ،حطيت ايدي على حلگه اكتم صوت ضحكته بس جريتها بساع من طبع بوسه خفيفه
على باطنها من ردت ابتعد بساع جرني يقربني عليه نشغت احجي بصوت ناصي منفعله

_ عزيز شجاي تسوي هسة احد يجي ،هدني عزيز

گبل لا يهدني همسلي
عزيز : الحگيني ماشي بضهر البيت

ما اطاني مجال اناقشه وهذا اكثر شي ينرفزني بيه ،بس مشى طبت
جفون : امشي وراه بساع

رفعتلها حاجبي افرك مكان قبضت ايده على ايدي
_ جا مو هستوج تحرضيني عليه

جفون : ما احرضج بس ردت اختبرج ،هسة يزعل امشيله

زغرت عيوني
_ چنتي تتسنطين ؟

هزت رأسها ب لا
جفون : البنات گاللي اصيحج بس ضليت متانيته يمشي

بلعت ريگي متوتره من گالت
جفون : اطلعيله وانا راح اگلهن جاي تنضف الديوان تكمل وتجي

بلايه ما اردن عليها طلعت من المطبخ وبس عبرت لضهر البيت شفته واگف ومطيني ضهره بس گلت اسمه اندار علي فاتحلي ايده
مثل كل مره حتى لو ضايجة هل حركه تنسيني كل ضوجتي، بس صرت قريبة
عليه جرني يلمني بحضنه بأيد والايد الثانية جر شالي و وخر الشكاله من راسي ،طاح شعري على طوله رفع خصله بأيده يشمها
ضليت متشنچه وما جريت نفس عدل الا بعدما وخر وگالي

عزيز : تعاي نگعد

گعد وخلاني على رچله ،عدل شعري بأيده يباوع لعيوني وبصوت خافت گال
عزيز : كل ما اتذكر وجودج بحياتي ابتسم واحس من صدگ أنت المسك بيها

_ يعني قصدك ختامها مسك

هز رأسها ب أي وقربني يطبع بوسه خفيفه على حنچي
عزيز : وين چنتي عني

_ قريبة

عزيز : قريبة عن العين بي بعيده عن الگلب

بابهامي عدلت حواجبه
_ وهسة

عزيز : قريبة عن الگلب اكثر من العين

بلعت ريگي وكضيت ايده متوتره من قربه من راد يبوسني، ابتعد مبتسم
عزيز : بطلت عمي كلشي ماريد بس ضلي احجي وياي

_ عزيز

عزيز : غايته

_ خل اطب

عزيز : ماشبعت منج

جريت روحي من حضنه گعدت بصفه سانده وجهي على حنجي ضحك ودار روحه مگابلني ،صفنته بوجهي خلتني ارتبك وانزل عيوني ،كض ايدي وگام وگف دنگ شال شالي
الطايح بالگاع وشكاله شعري بايده يلمه يريد من أيس وما گدر اطانياها لميته و حطيت الشال على راسي
_ راح امشي

بلايه ما يحجي دنگ لطولي طبع بوسه قوية على خدي وابتعد
عزيز : اصبر بيها روحي

أبتسمت ومشيت وهو وراي انا طبيت وهو طلع من البيت ،و وي طبتي لاگتني امي تسأل وين چنت وانا مستحيل اچذب على امي
_ عزيز اجه يشوفني وچنه گاعدين بره

احس وجهي بوخ وانا احجي ،ما حرجتني واكتفت ب
زهرة : حگه يشوفج يمة حلاله

هفيت على وجهي ومشيت للسنك اغسل، بشالي نشفت الماي ودنگتلهم من اجوي يحجون وياي ،حجاية افتهمها وحجاية لا ،صحت على حواري

_ تعاليلي ولج جهالج يحجون هندي

طبت تسألني شكو
_ صار ساعة يرطنون وكلشي ما افتهم چن هنود گدامي

دنگت گبالهم تباوع علي وترد تحجي وياهم
حواري : شتردون ماما گلولي هاي خالتكم كلشي ماكو ما تفتهم

يأشرولها على الثلاجه ،مشيت فتحتها، وهم هجموا عليها سيف اخذ تفاحه وحوراء اخذت بطل لبن جرته منها حوريه وهاي بساع عاطت، ردتها الها الا سكتت

باوعت علي بغصه تحجي
حواري : الله يرحمج بصائر كل ما اشوفن اللبن اتذكرها

بلعت غصتي ودرت على صوت فقار من طب وياه عون البس شاف سيف ركض حضنه ،هزت ايدها
حواري : ابنك لو ضارب لو ضارب ،ساعة يدگ على فرگ ابني ساعة يحضن بيه ويبوسه

فقار : مزاجي على عمته

فتح السنك يغسل ايده لان چان مشتري لعون ومدمره ككو، اباوعله بقهر چن حزنه متجدد وي دورة سنتها الما ضل الها شي ،بس سد البوري
دار علينه يسأل
فقار : ريحانة هنا ؟

حواري : أي

فقار : خوش ،گليلها عينها على عون وچنه نعسان خلها تنومه

حواري : صار

مشى يرد للموكب وانا وحورية طبينه ،جده نامت وامي هم وجدي وابوي هم اجوي تعبانين من الموكب وكلمن مشى الغرفته، على گعدتنه وسمعنه صوت حق برا يصيح
على حورية طلعتله بساع ومن ردت مخبوصة تلبس بعباتها وتحجي ويانه
حواري : تسترن حتى اصيحن حق يشيل حوراء

كلمن حطت حجابها على رأسها وصاحته،طب سلم علينه ودنگ شال حوراء ،شماها يردد
عبد الحق : يابعد ابوج فدوة لهل شكل هذا چن ملاك

ريحانة : خوية منيلها ملاك بتك ،اشو گبل شوي كلساع تافلتلها على وحدة

عبد الحق : ميخالف خالاتها تمون عليچن

دنگت شالت سيف وتحجي
حواري : مو اگلچن ابوها مطلع عينها شفتن هسة بعينچن

عبد الحق : شني أنت تغارين منها

يحجيها مبتسم وحواري عوجت حلگها
حواري : عشتوا اغار من هاي الهايشة

سيوف : چن اختها مو بتها

عبد الحق : اي والله يا خوية شايفتلج وحده حاطه عقلها وي بتها

حواري : انا حق ،انا حاطه عقلي وي بتي ؟

خزرها وبعيونه يأشرلها علينه ،گبلها طلع وهي حتى ما سلمت ومشت وراه بساع مبين ما راح تعبرها اله
غمد : الله يعينك يا عبد الحق

جفون : ما اسمحلج

غمد : وأنت منو يمج

گامت تتثاوب
ريحانة : انا راح اموتن من النعاس لو ماشية وياهم موديني احسن

_ هسة يجي واحد من الولد ويوديج واذا ما اجوي ضلي عدنه شعدج قابل

ريحانة : هاا

سيوف : أي صدگ عليج الله ضلي

لحينه عليها حتى تضل وبالاخير استسلمت ورضت بس گالت اذا اجه احد من الولد نخلي يطي خبر الامها، فرشتلهن بغرفتنه الصارت كلات
جفون : لو نفرش بالديوانية مو احسن

نزلت البطانية من ايدي
_ ها هيج تگولين

جفون : أي والله عاد لا يگعدن عمة وجدة

_ جا خوش

تساعدنه انا وجفون وغمد فرشنه بالديوانيه الجوه بس كلمنه گعدن على الفراشات
وانا مشيت للصاله صحت سيوف وريحانة الوحده مگابله الثانية ويوسلفن وحتى من نمت اتذكر ضلن گاعدات

°ريحانة°

جريت المخده من حضنها حطيتها على الفراش اضحك
_ نامي طفيتي باجر نگضي سوالفنه كوم هن
مو مال گعده وحده

تمددت تتثاوب
سيوف : مو تنسين وصلنه عد كوكبة وهذا الضاغب حماج

_ لا ما انسى

بس شافتني گمت سألتني بعيون مطفيه
سيوف : وين ؟

_ اشوفن بلكت اكو شي بالثلاجة لعون عمن من فطمته لليوم يگعد هواي جوعان عاد حتى لا يبجي احطن كلشي عد راسي

سيوف : شعجب مو بعده زغيغ ؟

_ راح يقبط السنتين بعد چم يوم

سيوف : مو خطية

_ هو أخير فترة صار ما يريد الممه

سيوف : جا خوش

گلبت على الجه الثانية وجرت الغطا تغطي روحها طلعت انا امشي على كيفي الاضويه كلهن طافيات وبس ضوه الحوش
مشتغل من قوته واصل للبيت ،طبيت للمطبخ بلايه ما اشعل الضوه فتحت الثلاجه من شفت اكو تفاحه طلعتها وطلعت
سجين ومشيت للسنك اگشرها ما يحب ياكلها هي وگشورها ،بس كملتها طلعتلي
حافضه صغيره دائما عمه تحط بيها اكل وتوديه ل ليث اذا تأخر بالاراضي، وانا حايره ادور على القبق فززني صوت حمحمه رواي

فزيت وحطيت ايدي على گلبي ،وبنفس الوكت رديت ليوره، جريت نفس من شفته
_ صخر

صخر : فززتج

_ لان هدوء چان خفت ،رايد شي ؟

صخر : لا

مشى يطب جوه ومبين هاي جيته من الموكب رديت ادور القبق وبس لگيته قبقت الحافظة ومشيت للديوانيه وهستوني جاي اغفه وفزيت على صوت الباب ينفتح
جريت شالي اللبسه وهو ضل باهت بمكانه يدير بعيونه متفشل من الموقف

صخر : ما اعارف بيچن هنا

_ صح

رفع رأسه مستغرب من اختصاري بالجواب ،جريت نفس اشرحله
_ اكيد ما تعارف وأنت هستوك اجيت

بلايه ما يرد علي دار ضهره ومشى وهسة الا انتبهت چانن بيده مخده وبطانيه ،رديت تمددت وهستوني غفيت وفز يبچي
گعدت وحطيته بحضني اوكله و ورا كل لگمه اشربه ماي اخافن لا يغص من شبع
حطيته بحضني ونمت وما فزيت غير الصبح على اثر طگاته على وجهي
عون : يحانه يحانه

فتحت عيني مبتسمة
_ ها يا روح ريحانه

عون : گعدي يحانه

حجيه مكسر بس انا افهم عليه ،عدلت حجابي وشلته وطلعنه
_ صباح الخير

غضة : صباح النور ،عون گعدج مو ؟

_ أي

غضة : انا وديته عليج حتى تتريگين ويانه دام الجاي حار

_ بس اغسل واجي

غسلت ورديت گعدت وياهن ،وعلى گعدتنه طب علي سلم واجه گعد ياكل ويانه
غضة : شعجب ما متريگ بالموكب ؟

علي : تريگت من الفچر وي الزوار وهسة طگني الجوع

اوكل بعون ومنتبهتله كلساع يباوع ل أم النبگ ويريد يدنگ ،غطيت حلگي ما اريدن اضحك وافشله من طگته گالتله عمة

عطاء : عيونك عد الوادم اكثر من لگمتك ،دير بالك عمة لا تغص

وهو عود استحه لا ابد ،بكل صلافه رد عليها
علي : جاي اكحل عيوني شبيج تفگسين بالسالفة

عطاء : اها جا اذا هيج ما امهدلك الدرب مثل ما سويت وي ذولاك الوادم

علي : من وصلت السالفة يمي بدت الخباثه

طگته على رگبته ،صاح متوجع وكضاها يحجي وي جدة الضلت تسأل شجاي يحجون
علي : جده بتج ماخذه خاوة علينه مايصير هيج والله

تباوع لعمة بقهر
غمد : خطية اذيتيه

رفعتلها حاجب ومبين ببالها حجاية تحجيها بس گوه كاضه روحها ،بس گضينه ريوگ
ردت اردن للبيت بس ما خلني وحتى عون اتحد علي وياهن ما يرضى
يمشي متونس وي غمد يلعب، بس شافوني اقتنعت اضلن طلعوا هو وياها وجفون ولهناه اسمع صوت البطوط، طلعت اباوع
عليهم مبتسمه ،يركض وره البطوط وجفون وغمد وراه يركضن،صحت عليهن

_ لا يفحط لا تركضن حيل

باوعت للباب من انفتح ،طب برهان ،فتح ايده لعون ركضله شاله يحجي وياه
برهان : شلونه عزيز گلب خاله

عون : ذين

يعدل شعره بايده ويحجي وياه مبتسم
برهان : عساك دوم زين

عون : خاو

برهان : هاا روح خالو

عون : ويد بغه

برهان : تريد بطه ؟

يهز رأسه ب أي ويرمش بعيونه ببرائه ،أشر برهان على عيونه
برهان : من عيوني

نزله وبس شافته اجه عليها صاحت
جفون : مو اكو سوگ

برهان : بفلوس شبيج

طلع محفضته يحجي وياها وهي مچتفه ايدها
برهان : ثنين زغار بيعيلنه

جفون : الوحده بعشرة

برهان : مو چانت الوحده بخمسة

جفون : هاي الاسعار واذا ما تشتري بعد احسن

طلع عشرين الف من المحفضه سداها وردها بجيبه
برهان : ولو راح تقطينه بس فدوة لعون

جفون : حركوا جيبوكم شوي نايمين على الفلوس راح يختنگن

ما حاجاها ومشى جاب بطتين زغار من الطالعات يفترن بالحوش حطاهن بايد عون وهذا من فرحته صار يگمز
جفون : بطلت ما ابيعن

برهان : ماعدنه نسوان تتراجع بحجايتها

جفون : هاي بس للزلم

اطه الفلوس ل عون وگاله
برهان : اطيهن لخالتك بس دير بالك لا تاخذ البطوط منك

مشى بايد لام البطوط بحضنه وايد الثانيه كاض بيها الفلوس بس وصل عدها دنگت اخذتهن منه
جفون : والله لوما تبچي چان اخذتهن منك بس المشكلة انقهر عليك

_ الحمدلله طلعت عدج انسانيه

جفون : جا شبي وحد

جاي ارد عليها وقاطعنه صوته يصيح بأسم برهان ،طبگ باب الشارع واجه وگف بصفه
صخر : شو هنا ؟

برهان : مريت اشوفن جدة

صخر : اها اشوف جدة ؟

حمحم برهان يأشرله يسكت وبساع غير السالفة
برهان : شقررتوا على الغده تسوون ؟

صخر : سمج

برهان : شني منين عدنه سمج ؟

صخر : من اولت امس ليث ناصب الشبج وهسة مشوا يفكوهن

برهان : زين سوه

صخر : وفر علينه فلوس المشتره

برهان : أي بعلي ،اگلك على سالفة ابن الچسار خوما دره جدي ؟

صخر : لا أبوي گال لا نحجي

برهان : احسن ،تعال نشوف جدة حتى نرد ماضل وكت

عون : عمو عمو
يجر بدشداشة صخر يريد يحاجيه ،دنگله
صخر : ها بعد عمك

شايل البطات يراويهن لصخر
عون : بغه

صخر : عدك بطات، منيلك

عون : جون

صخر : من جفون ؟

هز رأسه أي ،باسه صخر وعدل وگفته ،طبوا يم جدة ،مشيت وراهم عدي فضول اشوفهم بنفس المكان
برهان : السلام عليكم

رفعت رأسها چانت گاعده بصف جدة ،ردت السلام وي جدة وعمة زهرة
وضلت بمكانها ،صاحته جدة مشى گعد بصفها من الجهه الثانية
گعدت على الدرج اباوعلهم هي مدنگه وهو بحجة يحجي وي جدة عيونه كلساع تروح عليها ،حطيت ايدي على خدي مبتسمه ،شوكت يعترفلها ما مل من الانتظار

غضة : حبوبة برهان

فز وباوع لجدة ،چانت عيونه مركزة وي ايدها التعدل الشال
برهان : ها جدة ؟

غضة : خل نعقدلك بس تدور سنة اخيتك ،كبرت جدة والوياك بزرهم بطولهم

تفاجئ من حجي جدة وحار شني يرد عليها وهستوه راد يحجي ورفعت راسها ضاعت كل علومه وضاع اكثر بغرابة لون عيونها اليلمعن ،بلع ريگه حاله مگلوب مسح وجهه متشتت باله حتى نسه الجاي تحجيه جده
برهان : شگلتي جدة ؟

وي ما باوعت جدة لسيوف بساع دنگت راسها ،أبتسمت مفتهمة السبب الخلاه
ما يركز بحجيها
غضة : اريدن نعقدلك بس تگضي سنة ميمنة ،كبرت والعمر يركض ياحبوبة

برهان : مو هسة جدة

غضة : جا شوكت راح تشيب ومحد تاخذك

أبتسم
برهان : خلهن لا ياخذني جدة ،سدي السالفة والرحيم اهلج

غضة : ضل هيج ضل كل ما احجي تگلي
سدي السالفة

صخر : لا تضغطين عليه جدة يريد هو يتصرف

غضة : خايب هذا حجارة ما يطلع منه فعل ولو تضل عليه يدگ عمره الاربعين وهو ضال بس يباوع بعيونه

صخر : بعد هل امر راجعله

ضليت جدة ساكته بس تباوع عليهم ،خابرهم جدي ومشوا ،بس گبل لا يمشون وصتهم عمة يجيبولنه غده من الموكب وبس
اكلنه گامن غاية وجفون على البيت وانا وريحانة نسوي محلبي حتى نوزعه
سيوف : چن يحتاج بعد شكغ

_ اذا يحتاج حطي بعد

فكيت مواعين السفري مال محلبي حتى بساع تصبه بيهن وبساع عزلت
الهوسة ورديت كلشي لمكانه ،گضه اليوم وي خبصة المجالس وثاني يوم انا
وسيوف لبسنه عبينه گبل لا تجي الملايه ومشينه لبيت اهلي بس طبينه صارت گبالنه هستوها طالعة من الحمام بس شافتنة أبتسمت

هيوفة : ياهلا، هاي سيوف جايتنة

مشت تسلم عليها وتحجي
سيوف : اجينه ناخذج يمنه

هيوفة : وين ؟

سيوف : لبيت اهلج ،عليج الله لا تگولين لا

غورگت عيونها تباوعلنه بغصه تحجي
هيوفة : ما يطيني گلبي اروحن وما اشوفنها هناك وانا وياها كل سنة نوگف سوه

غطت وجها تبچي ،تندمنه على جيتنه الهيجت جروحها
هيوفة : هذا أول محرم هي مو وياي، انا بلايها چن مضيعه روحي

دنگت عليها من گعدت ،كضيت ايدها احجي بشوغة
_ كلنه ندور مكانها بيناتنه ،حتى اليوم ذكرتها هواي غاية ،بس هذا امر الله وهي ما ترضى هيج تأذين روحج

هيوفة : مو بيدي والله ،تفرفح روحي كل ما ذكرتها

لميت شفتي اسيطر على دموعي اريدن لان مو مال ازيدنها عليها وهي منا
وضعها تعبان، من شافتنه مگابليها وگاعدين گالت

هيوفة : گومن نمشي

سيوف : اذا ما تگدغين لا تضغطين على غوحج

هيوفة : شوي وارد ،بس تانني امشط شعري

بس مشت هي ،طلعت امي من الغرفة مبين چانت نايمة ،غسلت وجها وردت سلمت على سيوف تسأل
نجوى : تردن شي ؟

_ اجينه ناخذ هيوفة

نجوى : لبيت جدج ؟

_ أي

نجوى : ورضت ؟

هزيت رأسي ،أبتسمت
نجوى : جا خوش حتى انا هم اجي وياچن تانني ابدل ثوبي

طبت بساع بدلت ثوبها وطلعت لابسه حجابها وعباتها بأيدها، وبس كملت هيوفة ردينه لبيت جدي و وي طبتنه بدن يجن النسوان ومن
ردينه من أخر مجلس جابلونه الولد مبيت
نسوان انخبصنه بيهن وحده تفرش و وحده تغسل هدومهن

طلعت من الحمام شايله الطشت اريدن اشر الهدوم وبوجهي صار صخر بأيده هدومه ،وخرت من دربه انزل ثوبي الرافعته
كل ضني بعد ما يجي احد منهم بس همزين شالي ضال على راسي ،طلعت بساع شريت الهدوم وطبيت اسألهن
_ زايرات العدها هدوم تطينياهن اغسلهن

ردن علي ب لا ما عدنه ومن بيناتهن چانت اكو مرة چبيرة اشرتلي بمعنى تعاي ،مشيت اسألها
_ گولي خالة رايده شي ؟

_ اگعدي حداي يمة عدي حجاية وياج

گعدت گبالها متانيتها تحجي ،صلت على محمد گبل لا تگول
_ هل حليوه متزوجه لا ؟

_ منفصلة

_ يا يمة ليش ؟

_ سالفة طويلة ،بس مختصرها يا خالة بسبب امه
تنهدت وما انتبهت على نبرة صوتي الصارت ترچف من تذكرته
_وبس تطلگنه ثاني يوم مات

نشغت حاطه ايدها على رأسها
_ صدگ يمةةة

_ أي والله خالة

_ جا شكثر يحبج

_ وانا هم ياخالة حبيته حب بس الله اليعلم بيه لخاطره اشكال ظيم من اهله تحملت

كضت ايدي تمسح عليها
_ سوده علي يايمة

أبتسمت بوجها وترخصت حتى اگومن اكمل شغلي بس كضتني من ايدي
_ انا اشوفن نصيبج بوجهج

طبگت حواجبي مستغربه وهي كملت
_ انا اشوفن بالوجوه وهسة گبالي يتراوح الحال هيج ما يضل

_ شلون يعني ؟

_ نصيبج من الاول مكتوب وشما افترت بيج الدنيا غير نصيبج الاولي ما راح تنالين

_ هاا

_ راح يصيرلج عوض واذكريني

وهي تحجي ما چنت اهضم التگوله ،بس ضلت ببالي تتراوح حجاية"نصيبج الأولي"
جفون : ولج ريحااانة وين صافنة ،يااا دهر شبيج

فززتني من صاحت يم اذني ،سدت البوري مال
سنك
جفون : گضيتي المواعين المن مخلين البوري مشتغل بعد

_ نسيته

جفون : شعدج صافنه

مسحت وجهي احسن بالي مو عدي
_ هيج

جفون : امشي نامي وانا اكمل الباقي

_ خوش ،ضل بس الطباخ نضفي وامسحي الگاع

عون : يحانه
دنگتله
_ شو گول ريحانه

عون : يحانه

أبتسمت وشلته ما الحن عليه لان لفضه لحرف الراء قليل ،ثاني يوم رديت لبيتنه وبس بوكت
جية الزايرات اجي اساعد البنات واردن و وره زيارة الاربعين بچم يوم بدينه نحظر لدورة سنة بصائر الثانية
نجوى : يمةةة ريحانة

طلعت من الغرفة مخبوصة بايدي هدوم عون اريدن احطنهن بالجنطه الاخذها اله
_ هاا يمة

نجوى : تعاي شوفي اخيج وين

حطيت الهدوم على محجر الدرج وصعدت فوگ اعارفها تقصد فقار
عمن اليوم كله ما بين ،دگيت باب غرفته اكثر من مرة وماكو رد ،فتحته ومديت رأسي
من شفته نايم على الچرباية طلبت الضوه عليه ونزلت

نجوى : هااا فوگ ؟

_اي نايم

نجوى : شعجب

_ ما اعارف بس اضنه ما نايم بالليل لان انا من گعدت ضليت الفجر چان گاعد

نجوى : جا هل نام هسه

هيوفة : عمة

اجت تتمشه بطنها البارزه گدامها وگفت تتوسل بأمي
هيوفة : عليج الله عمة خل امشي وياكم

نجوى : تريدين تدولبينه عمنه ،هنا هنا درب النجف

طب من بره بس شافته گالت
هيوفة : ضيرم عليك الله حاجي عمة امشي وياكم

ضيرم : انا ما اروحن اضلن وياج ومن تجيبين اخذج ونمشي

باوعتله بقهر
هيوفة : حتى أنت علي

ضيرم : علمودج ما تريدنج تتعبين

استسلمت لان تعارف محد راح يرضى على روحتها الفجر طلعنه بكوستر بس احنه محد غريب ويانه عدلت عباتي بيها اغطي عون النايم بحضني وجريت البرده مال جامه اليمي من بده يطلع الضوه

سيوف : غيحانه

باوعتلها تتثاوب
_ ها عيوني

سيوف : نعست كلش

_ نامي

سيوف : استحي

_ غطي وجهج بالعباة وحطي راسج على چتفي

سوت مثل ما گلتلها ،شي خطية کضتها كلساع تتفزفز وي كل طسه تصير ،وبس وصلنه للنجف گالوا اول شي نزور الأمام وراها نمشي للمگبره ،حركتها فزت

سيوف : وصلنه ؟

_ أي

گامت گبلي نزلت وانا وراها ،برهان چان يحجي وي السايق يگله على وكت طلعتنه من الأمام سكت وعلت شواربه مبتسم
من انتبه عليها گبالي تعدل بعباتها، عارفت سبب ابتسامته هاي اول مرة يشوفها
بالعباة الطالعة بيها تضوي كلش لاگيتلها ،ببداله صخر كمل حجي وي السايق وهو بحجه ياخذ عون مني وگف يصلها يحجي وياي

برهان : اطينياه انا اشيله

ما گلت لا لان ايدي انتهت ،بس اخذه مني حركتها منمله ،مشى گبلنه و وراه انا وسيوف والباقين گدامنه ،بس زرنه الامام
علي طلعنه للمگبره ،هنا چان وكت الصدگ وكت البيه نرد نشوف گبورهن وحده
بصف الثانيه ،ومثل كل مره يجي بيها أخوي يحضن گبرها وچن حاضنها هي

كل نفس يجره يروي تعب وثگل هل سنتين عليه وبهل وگفه گدامه وانا امسح دموعي ايقنت أخوي ما راح ينساها بيوم من الايام لو مرت فوگ السنتين اضعافهن بعد ...

برهان : خوية ريحانة هاج عون

اخذته مني دموعي تصب فلا سكتن عيوني ،رفع ايده يمسح عيوني مبرطم
عون : ويش بجي حيانه ،اووه حيانه اووه، بابا

يأشرلي على ابوه ما مفتهم سبب لوعة گلبه وكسرته بهل ساعة وگبل سنتين، اخذته وصعدت
بالكوستر اباوع عليهم وهو ما سكت ما خله واحد من سأل عليه ليش يبجي شگله وشحجي چان المفروض اليوم عيد ميلاده ونحتفل بيه مو نجيبه ونجي للنجف

عون : ثيف

يأشرلي على سيف الشايله حق ،خليته على الكرسي ونزلت جبت سيف يمه وضليت مگابلتهم وگاعده وهم يرطنون واحد يفتهم على الثاني بس عون ايده والكفخ وياه
_ عووون لا خطية

صحت عليه وجريت ايده اوخرها من شعر سيف وهذا فرفح من البجي نزلت اطيته الابوه وصعدت اباوع لعون خازرته
وهو ولا چنه شمر روحه يقشمرني ويبوسني مثل كل مره

°حواري°

بس ردينه بوجهي لبيت اهلي جبت ميمنة الزغيرة من هيوفة ورديت خاوية روحي من التعب ،بس طبيت للبيت صارن
گبالي
عمة وبركة كل وحدة صافنة بجهه بس حسبتهن وحده، تنهدت اباوع لحزنهن الرد تجدد، خليتهن بلايه ما احاجيهن
صعدت فوگ حطيت ميمنة على الجرباية وسبحت سيف وحوراء ونومتهم وطبيت
سبحت انا ،جسمي يون علي من تعب الدرب ،وي
ما طبيت للغرفة وراي اجه هو اخذ
هدوم ومشى يسبح ،رد مشط شعره وتمدد حاط ايده على عيونه

گعدت گباله على الجرباية اشرب ميمنة مميتها واباوع عليه من نفسه مبين گاعد ،بس نامت حطيتها بكاروكها وطفيت
الضوه ومشيت يمه بس حس علي تمددت غطاني وياه وحضني بساع غفيت
على هدوء الغرفة وفززني الصبح صوتهم يبچون كلهم
سوه ركض خطبت ممياتهم اطيتهن الهم ورديت
يمه چان گاعد

باوعتله وانا امسح على لحيته بأيدي
_ شبيك حبيبي

غمض عيونه ورد فتحهن مختنگ يحجي
عبد الحق : كل اطبن للمگبره واشوفن الچانن ماليات البيت علينه وحده بصف الثانية روحي احسنها تطلع

تنهد غصة البصوته حسيتها صابت حنجرتي وي حنجرته
عبد الحق : ياريت اردن اسمع كلمة الخوية منهن ياريت كلشي يطلع حلم وترد ذيج الايام البيها الگه ميمنة متانيتني اطبن للبيت الا تنام لو بصائر من توصيني على لبن اجيبلها وياي

رجفت شفايفي ضغطت عليهن اكتم شهگتي وهو ضل كلساع ذاكر شي يخصهن منا لمن تعب ونام وانا هم نمت ،بس ردت تجددت نفس اجواء الحزن وأكثر منهن بعد من بدت تقرب دورة سنة ميمنة الاوله وگبلها بحدود الشهر بدلت للجهال وگلت امشي يم اهلي نشوف هيوفة عمن
هل ايام كلش تعبانة ،و وي طبتي الهم سمعت صوت بچيها ،كملت دربي اشبه بالركض لاگتني ريحانة من سألتها شكو گالت

ريحانة : هيوفة جاي تلطگ

_ عليج الله

ريحانة : أي والله، ماشية اصيحن واحد من الولد

_ جا ضيرم وين

ربحانة : توه طلع خابر عليه صخر

هي مشت وانا طبيت للصالة شفتها گاعدة على الدرج گبالها امي وامها ،اندارت علي امي تسأل مخبوصه
نجوى : رچلج هنا ؟

_ لا والله طالع

گبالي واگفين عون وسيف وحوراء كلساع مندارين علي يسألوني شبيها وليش
تبچي وانا من القلق عليها احسن بروحي وياها چاي اطلگ وما خلوني بحالي الا بعدما عطت عليهم

طبت مستعجله تحجي عيونها على هيوفة وصخر بره من صوته مبين شگد قلق عليها
ريحانة : صحت صخر ،يله يمه بساع اللبسي عباتج

مشت امي لبست عباتها بساع ومشن وياها كلهن وضليت بس انا والجهال ،لهناك وطب ضيرم مخبوص صعد يركض فوگ
ومبين عارف اخذوها للمستشفى ومن نزل على اذنه الموبايل
ضيرم : جايك جايك ،بس مسافة الطريق صخر خلهم يطببوها يمعوود يا چنسيه ،خرررب اخذها لمسشتفى ****هذولي ماعدهم رحمه

صحت وراه دار علي يضم المستمسكات بجيبه ،حلفته
_ عليك الله ساعة التجيب خابر علينه

هز رأسه ب أي وطلع وحتى ما سألني عليمن يخابر ،هزيت ايدي ادردم وي روحي
_ هو انا منيلي موبايل اذا كل ما جابلي ابوهم وكسوره توم وجيري لو سوولهم بيه مصيبه

ضليت ببيت اهلي حتى من يجون اتلگاهم، ضيعت الوكت بالتنظيف والجهال يفترون على راسي عمة عطاء اجت يمي ،لهناك وطبت غاية ،هديت المكناسة من ايدي
_ هااا غاية

غاية : خابرني عزيز يگول جابت

نشغت فرحانه
_ عليج الله

غاية : والله

تحجي والابتسامه تارسه ملامحها ،ضلت يمي منا لمن ردوا ،طلعت اركض اتلكاهم و وراي غاية وعمة عطاء ،اخذتها من ايد امي اصلي
على محمد چن قطعة حلقوم من جمالها لوما زغيره وانقهر عليها چان عضيتها ،طببوا هيوفة وانا وراهم امشي شايله اول بت اخو الي

خلوا هيوفة بغرفة امي وين ما فرشتلها عمن چبيره وتفتح النفس ،حطيت الطفله بكركوتها وباوعت لضيرم الضاله عيونه وياي چن
ما مصدگ روحه صار أبو وهاي ثمره عشگه گباله

_ شسميتوها

باوعلي وباوع لهيوفة
ضيرم : در مثل ما رادت أم در

ابتسمت هيوفة مبين عليها التعب بس ما گدرت ما ترد على حجاياته
هيوفة : احبك أبو در

وحضها وي ما طب سمع الگالته
صخر : سالمييين

غطت وجها بالشال وانا انفجرت اضحك وعمة عطاء تگله
عطاء : جا طبعا تحبه غير زلمتها لو مايصير ولازم تحط روحك

غلس عنها ومشى متجه لكريكوت در،ضل واگف بس مدنگ رأسه يباوع عليها ولهناك وشفت ابتسامه تزور ملامحمه
صخر : يابعد خالج هل حسن

دنگ حط بگماطها فلوس وعدل وگفته يحجي وي هيوفة
صخر : الحمدلله على سلامتج خوية

هيوفة : الله يسلمك خوية ،يوم الاشوفن بزرتك

ما علق على الگالته وخله وطلع ،مشيت اشوفن گمطها ورفعتها بصدمه
_ وررقة

هيوفة : رجعيها اجيبلها بيهن تراجي

_ جا شو ضيرم ما دلع جهالي ورقة

عطاء : حطت عينها

_ ما احسد انا ،اگلج جوعانه ،تاكلين شي ؟

هيوفة : أنت تسويلي ؟

_ لا امي بس انا اسألج

هيوفة : ما اشتهي شي هسة احس نفسي تلعب

ضليت انا وجهالي مگابلين در وسيف كلساع گايلي
سيف : ماما حوه دوه

حطيته بحضني اخافن يحوس هواي لا يروح يطيح البت
_ أي ماما تخبل تريدها احجزها الك من هسة

عبد الحق : ضيرررم ،أبو دره

گامله ضيرم وانا حجيت وي سيف من رد طب وياه حق
_ اجه ابوك گله بابا عجبتني بت خالو احجزها الي

سلم وتحمد لهيوفة بالسلامه وباوعلنه انا وسيف
عبد الحق : شني بوية لگيتلك مره

_ يگول حلوة

عبد الحق : جا سهله ،ضيرم من هسة بتك لسيف

ضيرم : اعذرني ما اطي

يحجون بضحك وسيف ما افتهم غير بس بتك لسيف وصدگ يريد ناخذها من هسة
طگيته على ايده خفيف بهذلني حتى حجابي تحرك
_ اگعد ماما شني هيته هيج ناخذها بعدهم اهلها ما شبعانين منها

ثاني يوم ضيرم ذبح لسلامة هيوفة ودر ،وامي ودت علي تريد تطبخ وتسوي غده، جهالي گبلي طبوا وانا وراهم اسمع امي تحجي وياهم
نجوى : يمة هلا بعزاز گلبي ،تعال سيوفي تعال احبنك

طبيت للمطبخ اباوعلهم مبتسمه نزعت عباتي احجي
_ يمة موديه علي اعاونج عود عبالج انا كبرت وصرت أم بيت

نجوى : جا شعايزج ما تكبرين

_ منين اجيبلج حق يحجيلج على البتيته المحترگه

ضحكت تحمد الله وتشكره مصدومه بصراحتي كفيت رداناتي
وكل ضنها راح اساعدها، صفنت بوجهي من گتلها

_ ماشيه اشوفن بت اخوي

مشيت وجهالي گبلي دفعوا الباب وطبوا سيف بوجهه گعد مگابل هيوفة ترضع بيها
_ صباح الخير

هيوفة : صباح النور

ريحانة : شراح تطبخيلنه

گعدت يمهن اباوع
للحلقومه
_ حدي تمن بزل

ريحانة : هم نمعة متطورة

_ أي جا شعبالج

مديتلها ايدي اخذها
_ فدوووة لهل جمال ،خايبة هيوفة كلش تشبهج

ريحانة : حتى عيونها صفر

_فتحت ؟

ريحانة : أي گبل لا تجين

ضليت گاعده يمهن شوي وگمنه انا وريحانة من صاحت علينه امي ولهناك واجت
عمة زهرة وغاية أول ما طبن مشن شافن در وبدن ويانه بالغدا وخبصته ،ندستها من شفته طب يمنه وهي بس سمعت صوته جمدت مرتبكه

°غاية°

حسيت عليه من وگف وراي وبحجة يغسل ايده لزگني بينه وبين السنك، ضليت جامده بمكاني وگبل لا يوخر همس
عزيز : اصعدي فوگ

باوعتله بمعنى ليش ،ما جاوبني وطلع من المطبخ ندستني
حواري : امشي وراه وانا ما اخليهن يحسن عليج

_ من شوكت أنت هيج تسوين خير

حواري : مو علمودج ،علمود اخوي ولو هو مدري شلونه وياي بس ميخالف

_ ما اروحن

حواري : اكو شي ما تعارفيه ،هذا اخوي ما يستحي عده استعداد يصيحج گدام خلق الله الموجودين

_ ما يسويها

حواري : جا لا تمشين وشوفي يسويها لو لا

ثقتها خلتني احيرن وگبل لا امشي هواي ترددت بس استلمت واول ما صعدت صار گدامي
واگف عد نهاية الدرج كملت دربي بس وصلت عده كض ايدي ومشى بي لغرفته من طبينه طبگ الباب وبس شافني اباوعله گالي

عزيز : زحمة من الولد اذا صعدوا

هزيت رأسي مقتنعنه ،گعد وگعدني بصفحه بأبهامه مسح على خدي ،ملت راسي على ايده
عزيز : ما ضل شي وتجين يمي ،متلهف لليوم البيه افتح عيوني واصبح بوجهج

صار اكثر من سنة انا وياه مخطوبين وكل ما يحجي اردن استحي منه چن أول مره يحجي
عزيز : غايتي

رفعت رأسي اباوع بعيونه وبصوت خافت گلتله
غاية : هاا

عزيز : وجهي ما راح يتعالج بنسبة مية بالمية

فريت عيوني ببطئ على أثار الحرگ بوجهه،دنگت كضيت ايده ورديت اباوعله وهو منتظرني احجي
_ ما مخرب شكلك الحرگ ،بالعكس صرت احلى بعيوني

علت شواربه مبتسم ابتسامه من كل گلبه ،تنهد ورفع ايدي حطاها على گلبه
عزيز : يجوز انا اكثر بشر مختار صح ،يابة احبج

همس أخير كلمتين وهو يحضني لصدره ،عبرت ايدي احضن ضهره مبتسمه ،وخرني يبوس خدودي وانا اضحك من يردد
عزيز : ترفاااات

فزيت وطفرت بساع من سمعت صوت امي تصيحني ،وگف گبالي
عزيز : بهدااي غاية

_ عزيز

عزيز : روحه ،ما تحجي عمتي ،جري نفس وانزلي

جريت نفس وبس خف ارتباكي نزلت ،امي بس شافتني ما حجت شي مبين تعارف وين چنت بس غلست علي ،من كمل الغده التمينه سفرة للزلم و سفرة للنسوان

اطتني الصينينة وگالت
نجوى : اكلي وي اختج على الواهس

اخذتها من ايدها ومشيت فتحت باب الغرفة وخليته مفتوح تباوع عليهن ملتمات كبالنه بالصاله ياكلن وصوت سوالفهن وملاغات
الجهال لهنا ،عدلت گعدتها وگعدنه انا وياها ناكل وانتبهت عليها كلساع تصفن وتدنگ شلون اليمنع روحه ما يبچي

_ هيوفة ليش ما تاكلين ؟

هيوفة : اكلت

_ شأكلتي ،هذا ماعونج بعده مثل ما هو ما تغير

نزلت الخاشوگه من ايدها وشالت گلاص الماي تشرب منه عيونها اباوعلهن انترسن دموع وهاي حسرتها لشني اعارفها كلش زين وتأكدت بس
گالت
هيوفة : متمنيتها موجودة هسة ،فرحتي ما كامله بلياها

باوعت لدر العاطتها بصفها على الفراش
هيوفة : چانت تگلي بس تصير عدج بت الا احبنها اكثر منج
مسحت عيونها و وياها انا غورگت عيوني
هيوفة : سميتها در لان هي تحب هل اسم وچانت تحلفني بس تجيني بنيه اسمهياه
شهگت بشوغة
هيوفة : تالي اجت در بس الرادتلها الاسم ماكو

گمت حضنتها ما اريدنها تبجي بس انا الجاي ما اگدر اسكت ،طبت مصدومه
ريحانة : شكووو ،يااا شبيچن

گمت امسح عيوني وهيوفة تهفي لروحها مختنگه
ريحانة : اسم الله الرحمن

گعدت گبالها ،جرت گلاص الماي غلست وجها و وي گطرات الماي دموعها ينزلن، بالگوات سكتت ،وبس گضه اليوم ردينه للبيت خاويه اروحنه من التعب يوم چان ثگيل گضه بالشغل والفره ،چم يوم وبعد بدت امتحانات
نص السنة دربي ما صرت اندله ولان اول سنة الي واجهت هواي صعوبة عكس ليث چان يمتحن ويرد عادي عده

طبيت للبيت اسحل بروحي سحل ،وراي ليث يطبگ السيارة، بوجهي صار عزيز هستوه طالع من بيتنه ،وگف من شافني يسأل شلوني بالامتحان
جاوبته
_ زينة

عزيز : ما نايمة مو ؟

وراي وگف ،حط ايده على اچتافي
ليث : حنين الله يسلمك

بلايه ما يرد على ليث گالي
عزيز : نامي حبيبتي لا تضلين گاعدة

مشى وخله ليث يحير بيا طريقة يسبه
خليتهم
يگضون نگرتهم من رد عزيز على ليث و
بس طبيت تلگتني عمه
عطاء : شبيه اخوج صوته عالي ،شكو ؟

_ تناگروا هو وليث

عطاء : يا ليش ؟

_ عزيز يحب يضوجه بي وليث ما يتحمل وبده يغردله

عطاء : دوة بعد گلبي

_ منو ؟

عطاء : عزيز

طبگ باب الشارع حيل وطب يسب بيه
ليث : السگط انا الك

عطاء : شبيك ؟

ليث : لا تدخلين عمة

عطاء : مو صدچك

خله ومشى يصعد فوگ وانا طبيت للغرفة بدلت هدومي وتمددت ميته من التعب
بساع غفيت وبس گعدت بديت اقره والما اعرفله احاجي ليث يشرحه الي عمن مرت عليه الماده العام ،بأخر امتحان طبيت لگيتهم گبالي يحضرون مخبوصين
بدورة سنة ميمنة بس بدلت هدومي وياهم حطيت روحي اشتغل، ودام تنضف خضره و
وادم تخبط لبن وقسم على المواعين وهل خبصه هاي لان عازمين واول سنة ،وبس كفينه من هوسة العشه طلعنه وفوگ تعب اليوم كله گضيت الدرب
ما نايمة بس وصلنه
طحت عليهم وحاروا بي ،أول ما حسيت الدنيا افترت بي چان گبالي ليث كضيت فالنيته بقوة بس اندارلي گلتله

_ دخت ليث راح اطيحن

كضني مفزوع من خوت روحي بأيده وبعد ما سيطرت على رچليه ،گعدني على وگعد گبالي التموا علي نوح وعزيز
وليث گاعد گبالي يهفيلي الجو ما چان حار بس انا مختنگه أاشرله ،وهو تخبل بين يلوم بي وبين يلوم بروحه
ليث : شگد گلتلج اگعددي ،تعبااانه أنت ،خووية لا تطيحين علينه ما سمعتي كلامي

جاب كارتون يهفيلي ويحجي وي ليث
نوح : الطم بعد الطم

رفع رأسه خازر نوح
ليث : شوف حالها شلون انگلب

گعد بصفي عزيز يريد يحجي
ونتر عليه
ليث : گوم لا احفر حفره واطمك هنا ،مو تستغلها فرصه وعبالك اعبرها الك

گام وگف على حيله يتحلف بليث وخله ومشى يم الولد ،جابلي بطل ماي فتحه واطانيه اشرب وضل واگف گدامي ،يوم عن يوم احسن عدي احسن اخ بالدنيا ومواقفه تثبتلي

اخذ مني البطل غسل وجهي وبچفيته نشف الماي وباوعلي
ليث : ها شلون صرتي ؟

_ احسن بس بعدني دايخه

ليث : امشي اگعدي بالسيارة
احسن

ما گلت لا لان صدگ ما اگدر بعد ،اخذتي لسيارته فتحلي الباب الوره وگالي
ليث : تمددي حتى يستعدل حالج

من شافني صعدت ومددت مشى رد يم الولد بس ضل كلساع يجي يباوع علي ،منا لمن صار الوكت نرد عدلت روحي وگعدت من انفتح الباب

نوح : ها شلون صرتي ؟

_ احسن

اجه وگف بصف نوح فاتحين الباب ويحجون وياي
ليث : راح اصيحن جفون تجي يمج

_ لا انزل امشي وياهن بالكوستر

وخر من الباب من ردت انزل، يوصيني
ليث : ديري بالج على روحج واذا تتعبين خابريني اخذج بسيارتي

_ خوش

عدلت عباتي على راسي وصاح على عمة عطاء وصاها علي وضل واگف يباوعلنه من صعدت الا صعد بسيارته، حركت السيارات رادين لمحافظتنه ضالات ورانه انسانتين وحده اعز من الثانية على گلوبنه ،الدرب كله
كلساع اندارلها من اسمع صوت نشتغتها، همست اسمها
_ بركة

باوعتلي بعيون ما ضال بياضهن صافي، احمر دم من كثر البچي
_ كافي فدوة راح يصعد ضغطج

مسحت عيونها تدعي
بركة : ريت يصعد وتدفنوني بصفهن

خزرتها ممرود گلبي من حجاياتها
_ اسم الله ،عوزنه قهررر شبيج أنت

نحجي بصوت ناصي كل الي بالسيارة نايمين، تنهدت وحطت راسها على الجامه تباوع للدرب ومن
شفتها ساكته بعد ما حجيت ،انا هم غفيت مستسلمه للنعاس، فزيت گبل لا نوصل قريتنه
باقل نص ساعة
وبس طبينه للبيت عد باب المطبخ تلگتنه شايله در بجت مقهوره چي ما مشت ،سألتني

هيوفة : سلمتيلي عليها عليج الله

نزعت عباتي
_ أي والله وصلت سلامج الها

تمسح بعيونها وترد تبچي ،حلفتلها اني بس تعبر اربعينها تخلي در عدها وتمشي للنچف
هيوفة : ما شايفين شصار بگلبي من مشيتوا وانا مو وياكم

زهرة : جا غير ما يصلح لحالج يا يمة
هزت رأسها ب أي
_ جدة گاعده ؟

هيوفة : أي گبل شوي گعدت ريگتها

طبيت سلمت على جدة الضلت وي هيوفة بحجة مفاصلها وما تگدر وكلنه نعارف
علمودها ضلت بس عبرناها، بس سبحت نمت بلايه حتى ما امشط شعري ومن گعدت
چانت جفون تعزل
بالغرفة صايرة نادره ،گلتلها اطتني المشط ،مشطت شعري وانا گاعدة وطبت امي گالت

زهرة : عزيز اجه يشوفج ،يگول ضال باله عليج يخابرج ماكو

جريت موبايلي من جوه رأسي
_ گاضي شحنه وما اعارف بيه

زهرة : گومي يمة صارله هواي متانيج

بس طلعت امي انا مشيت عد المرايه رشيت عطر
وعدلت شعري وطلعت
حاطه الشال على راسي استحي اچفت عليه بلايه حجاب، دگيت باب الديوان وفتحته من طبيت ما چان احد
موجود يمه ،أشرلي سدي الباب ،سديته وبس صرت قريبه عليه گام وگف على حيله بعيونه يتفحصني ويسأل

عزيز : شلون صرتي ،خوما بعدج تعبانه ؟

_ لا احسن من نمت

عزيز : الحمدلله

بس گعد گلتله
_ متعشي ؟

عزيز : أي ،بس اريدن ماي وشوفتج

أبتسمت
_ الاهم

عزيز : شوفتج بدون شك

بس مشيت للباب گال
عزيز : وين ؟

_ اجيبلك ماي واردن

بساع جبتله ماي ورديت اطيته الگلاص ،كضاه بايد وايد الثانية بيها كض
ايدي وگعدني بصفه شرب الماي وبعدها ايدي بين ايده حط الگلاص گباله وگال

عزيز : اسبوع بعد واستلم غرفة الاخشاب حتى اطيج فلوس الجهاز

_ هاا

تأمل عيوني وگبل وحلف گبل يگول
عزيز : ما اصبر غاية بعد

_ يعني بعد شگد

عزيز : غير منا لعطلة اخير السنة

صفنت بوجهه احسب الوكت الباقي
عزيز : بحدود اربعت اشهر كافي تجهزين روحج

هزيت رأسي ب أي ما اريدن اكسر بواهسه
_ كافي

عزيز : جا خوش

ضلينه گاعدين منا لمن دگ موبايله ضيرم يريده طلعت وراه من راد يمشي ،وگبل لا يطلع حضني سديت الباب وراه وطبيت لاگتني واگفه عد باب المطبخ
عطاء : حضووون

_ اهووو عمة

عطاء : الله يحفضكم خايبة والله افرح من اشوفنكم احسن بروحي مسوية انجاو جمعتلي ثنين بالحلال

أبتسمت
_ ويحفضج النه

گرصتني من خدودي
عطاء : ترفااات على گولته

رفعتلها حاجبي
_ وأنت شمدريج هيج يگول ؟

عطاء : اكثر من مرة سمعته

_ هاا تتسنطين علينه ؟

عطاء : لا وداعة أبو چسار

_ دامج حلفتي بالغالي راح اصدگج

ضحكت ومشت تطب گبلي ،صليت صلاة المغرب عمن فاتتني ،وانا على المصلاية
نزل ليث من فوگ يركض ،صاحته امي يوگف وگف بمكانه بنص الصاله

زهرة : وين ماشي يمة ؟

ليث : للدواچن ماشي اضبط نظام الرطوبة واردن

زهرة : جا مو تعبان يمة

ليث : شسوي ما يعارفولهن وابو فلاح اليوم اجازته

زهرة : خوش بس لا تبطي

_ ليوثي

اندار علي
ليث : ها بعد روحي

_ لا تمشي جوعان خل اسويلك شي تاكله

ليث : سوتلي جفون گبل شوي

_ خوش بالعافية

ليث : الله يعافيج

لميت السجاده ونزعت ايزار الصلاة وضليت اعزل بالبيت اللهي روحي عمن
ماكو شي اسويه ،كلهم ناموا وما ضليت غير انا وجفون ،طلعت ارشن الحديقة ودرت على صوت الباب من انفتح ،طاحت
الصونده من ايدي وچمد الدم بعروگي من شفته طب للبيت

°كوكبة°

جريت نفس ودرت عليها ،شايله كرار، فتحتله
ايدي اخذته منها
_ شوكت گعد

سكينة : هسة نزلت ولگيته گاعد مبين جوعان وگلته واجيت انومه

تعارفني كل ما اضوچن امشي للشط حتى ما سألتني وين چنتي
_ اتمنى الله يرزقج لان متأكده راح تصيرين
احن أم بالدنيا

أبتسمت عيونها تلمع
سكينة : الله يسمع منج

_ امين يارب ،راح انامن اصعدي أنت

هزت رأسها ب أي وبس صعدت طبيت انا للغرفة وثاني يوم گاعده اتريگ گبالي كرار وطبت خالتي تدگ وتطلم من الباب تصيح
بشرى : بحضج وبختتتج، بحضج وبختتتج ابني راح يصعددد محكمةةةة، الحگيلييي خيةةة الحگيلييي

گمت على حيلي مصدومة من الچاي تگوله ،ما مستوعبة كلامها، تلگتها امي وهي طاحت من رأسها العباة تلطم على رأسها
بشرى : بساع بساع خيةةة اليوم حددوا محكمته بعد ست اشهررر ،ولج يمةةة هم راح اخسرر واحد من ولدييي

نادية : على كيفج خية بعد اسبوع تنحل بكفاله بشي

گعدت غادي حيلها تراب ،من كل گلبي تشممت بيها وضليت اباوع بعيوني بلايه ما اتأثر حتى بالصارله

رفعت عيونها تخوز بي چن جاي تشوف شيطان گبالها ،گامت عيونها فاتحتهن بقوة حسيت تريد تفترسني ،ردت اشرد بس
ما لحگت هستوني تحرگت وحسيت بشي انهبد على راسي ،حروره حسيت صارت
على رگبتي وبعد ما حسيت بشي غير وانا بسيارة سعد وعياطه هارج الدنيا

سعد : خرررب اهله الما يطلعهااا من عيووونچن بسيطةةة انا الهاااا لو ينزل وحيي بيها ما اخليها تدوووس البيييت ،السحااااره أم الشعووذه ،عينهااا گومية خررب امهااا

اسمع صوت سكينة قريب علي تحاجيه
سكينة : خفف السيارة راح تطير بينه ،سعد عليك الله استر علينه

رديت غمضت من داهمني السواد، صحيت بعد ما اعارف شگد وبس فتحت عيوني صارت گبالي مثل الغواشة، كضيت ايد سكينة حيل من حسيت بيها بصفي وسمعتها تحاجيني

_ ما اشوف سكينة

سعد : كوكبة

غمضت عيوني ورديت فتحتهن اريد اشوفن عدل، هذا هو گبالي بس مو واضح
شكله بعيني، صاح على الدكتور من گالتله سكينة
ما اشوف، طبوا هو والدكتور
سألني شني الجاي احس بيه گلتله وانا خايفة لا اضلن هيج

_ عيوني مغوشات دكتور ،ليش هيج ما اشووف

_ طبيعي بنيتي لا تخافين كلها چم يوم وتردين تشوفين عدل

_ عليك الله دكتور

ضحك يحلف
_ والله بابا لان الضربه على رأسج تأثرت شوي الشبكية، راح اكتبلكم على قطرات وهم اطيكم تعليمات تستمرون عليهن وان شاء الله ماكو شي يخوف

سعد : أن شاء الله دكتور ،مشكور ماتقصر

_ تدللون واجبي هذا

رفعت ايدي على رأسي اتحسس مكان الطگتني بيه چان ملفوف بالشاش، تنهدت حايرة اضحك لو انقهر من گالت
سكينة : سعد لو شايف شلوون شالت الطاوة و حطتها براس كوكبة، گلبها مترووس حقد والله جمدت بمكاني حرت اشيلن كوكبة لو ارد الطاوة براس خالتك

سعد : لو مخلية كوكبة ومبرده گلبي بيهم أول تالي خيطنه راسها

سكينة : أي والله فاتتني بعد

يحجون بضحك وعلى ضحكهم مبتسمة انا ،اعارف بيهم يحجون هيج حتى يغيرون علي جو ،لهناك و تذكرته
_ سكينة جا وين كرار ضل

سكينة : اسماعيل گال عينه عليه

جريت نفس شوي مأمنه عليه، يضل اسماعيل احسن من الباقين، بس كتبولي خروج طلعنه، كاضتني سكينة وسعد يمشي
گدامنه بس صعدنه بالسيارة هو مشى للصيدلية جاب الدوره ورد

حطيت رأسي على الجامه الوجع بده ينهش براسي نهش، بس وصلنه ونزلت من السيارة فتحتله ايدي شمر روحه علي من حضن اسماعيل

اسماعيل : هاا خيطوا رأسج ؟

حاوبته ب أي وطبيت شايله كرار، بس وخرت شالي صاح
كرار : اواااه مامااا، اووو

يكض رأسي بأصبعه الزغير ويوخره ويرد يعيد نفس الحركه ويعقج ملامحه ،طبوا وراي يحجون
اسماعيل : شردت خالتك حرامات ما لحگت عليها

سعد : بيهه بخت شردت چان حتى نسيت صله الدم بيناتنه ومثل سوايتها بكوكبة اسوي

كاضتني تمشيني وتضحك
سكينة : يعني تحط طاوه براسها ؟

سعد : بلوكه ،كرك گولي الا افك رأسها نصين

اخذت كرار تحجي وياه
سكينة : امك انكتلت بطاوه

طلعت على طولها واگفه بباب المطبخ
نادية : ها شو تضحكون

ما رد عليها سعد وخله وعبرها يطب جوه وصاح على سكينة مشت وراه وكرار بأيده، كضاني اسماعيل يطببني جوه ويحجي وياي

اسماعيل : حطولج بنج لا

_ اضن أي لان هسة بدو يبين علي الوجع

بس وصلنه عدها گالت
نادية : شنو صاير حنين ،ما عرفناك .

ما چن سمعها ،وصلني للغرفة ومن راد يمشي سألته
_ داليا شلونها ؟

من گلت اسمها أبتسم
اسماعيل : الحمدلله ،ارتاحي ولا تنسين دواج

هزيت رأسي ب أي وعود غمضت عيوني بس ضليت اللوبن كل ما جايه الوجع يزيد، فتحت عيوني من سمعت صوتها بالغرفة ،گعدت يمي

سكينة : اخليلج القطرة حتى امشي اسويلج شي تاكليه

ما گلت لا لان صدگ احس روحي مخلوبه من الجوع مدري من الدم النزفته،حطتلي قطره ومشت وهيج ضليت ايام على هل حال منا لمن شوي شوي بديت استعيد نظري
سكينة : كوكبة

طلعتلها من الغرفة
_ هاا

سكينة : تعاي تگدرين تصعدين ؟

هزيت رأسي ب أي ،وبس صعدت گالت و وصلت عدها كضت ايدي ترچف
سكينة : امس سمعت خالتج وامج يتفقن يحطلج شي بالاكل

عگدت حواجبي مستغربة
_ شي ،مثل شني

سكينة : اكو غير السحرر خايبة

نشغت فاكه عيوني على وسعها
_ سحررريش

سكينة : صووتج يمعووودة، باعي اذا امج اطتج شي لو طبخت شي اليوم ابد لا تاكلين خوش وانا اخابر على سعد يجيلنه اكل وياه بدون لا أحد يعرف

هزيت رأسي ب أي وشگد ما گدرت سويت روحي طبيعية من شفتها اليوم من
دون الايام گامت تطبخ وهي يوميا حاطه كلشي براس سكينة ،دست على روحي وسويت الوضع
طبيعي وما چن اكو
شي وبوكت الغدا اخذت كرار نومته وضليت انا احوسن بالغرفة ،صاحني اسماعيل
حتى اكل گلتله من اگعد اصبن انا وكرار وصدگ
بس صار الوكت الاعارفها بيه
تنام طلعت من الاكل بعلاگه سوده حتى تشوف الچدر ناقص منه من تگعد ومشيت ذبيته بالزبل

گعدت على دجه باب المطبخ مكسوره روحي من سوايتها الما تتسولف، رفعت راسي على صوتها وراي
سكينة : لا تضوجين هسة يجي سعد وصيته على دجاجه

تحجي بهمس ماتريد احد يسمعنه ،ما تعارف بنفسي شلون انسدت هسة ،لو يتقدملي اكل يتقدم لملوك هم ما راح اگدر اكله

سعد : السلام عليكم

ما حسيت عليه من اجه ،گمت بساع اردن عليه السلام ،حط العلاگه بأيدي
سعد : اصعدي گبلي خوية

هزيت رأسي ب أي وصعدت ،رتبت كلشي سكينة وتگابلنه حتى ناكل بس لگمه وحده ما گدرت احطن بحلگي وكلساع واحد بيهم يگلي

سعد : اكلي

سكينة : ولا جاي تاكلين

_ انسدت نفسي والله

شرب من قوطية الببسي
سعد : تعلمي مثل اخوج ،انا بس تخابرني سكينة تگلي جيب وياك اكل اعارف النگده وين

_ انقهرت

سعد : سلامتج من القهر بس اذا تضلين مقهوره انا راح اكل الدجاجه كلها

_ بالعافية

بالگوة جبرت روحي بس اشرب ببسي، ومن نزلت لگيتها گاعدة تفتر بالبيت ذيج هي مبين عدها شي بس شافتني
گالت
نادية : اكلتي ؟

هزيت رأسي ب أي ،من شفتها ابتسمت كرهت الساعا البيها اجيت للدنيا ،خليتها ومشيت للغرفة گعدت كرار صعدتها يم
سكينة توكله أول ما فتحت الاكل عزلتله، نزلت وهو ضل يمها ،من ضوجتي طلعت گعدت بالحوش اباوع على الغروب

صديت وجهي عنه من طب على اذنه الموبايل يحجي وي رفيف بس شافني گال
حسن : هاي مرة اخوج يمي ،تردين تحجين وياها

اطاني الموبايل ،اخذته منه ما طايقته ادردم بگلبي
_ خررب حضيج على هل بلوه البلاج الله بيها

حاجيتها
_ هلوو رفيف شلونج ؟

رفيف: الحمدلله وأنت شلونج كرار شلونه

_ الحمدلله بخير ،اخوي شلونه وياج

من جرت نفسها عرفت الوضع متوتر بيناتهم
رفيف : يعني زين

حجيت وياها شوي بعد واطيته الموبايل ،وبيوم چنت گاعدة بحضني كرار انا وياه نباوع كارتون ركزت وي امي التحجي بالموبايل
لان جذبني الحديث من سمعت اسم استبرق اتذكر

نادية : عساها لا ردت ،اندرري ششاف منها ابنج وكتل روحه عليها ،أي والله صدگ حظوظ ،جا خلها عد اهلها حالها حال النعال

افتهمت لهسه استبرق بعدها معانده ما ترد اذا ما صدگ منتظر يطلگ عذراء، وما طول اسبوع وصدم امه بطلاگها ،خالتي تسودنت خابرت امي تلطم بحيث امي بساع لبست عباتها ومشتلها خذاها حسن ومنها يشوف رفيف المتورطه بيه

فركت ايدها متشفي گلبها متشمته بيهن
سكينة : حييييل بعد گلبي ،والله لوما الحرام الا ابوسنه من راسه على سوايته هاي

ضحكت وگمت ازيدن على حجيها
_ بس رادن يفرقنهم وما گدرن ،منتظر مو مثل العدي ولا حمزة الجان يخاف من زعل امه عليه

سكينة : يشبه سعد فدوة لگلبه

_ أي والله

ومن ردت امي عرفنه منها خالتي ومنتظر متعاركين وعناد مطلگ عذراء ومن القهر من واصله امي هناك لاگيه خالتي طايحه ومن ماخذيها للمستشفى لاگين ضغطها صاعد والدكتور گايللهم لوما ملحگيها چان انجلطت

امي ماده رجليها بتعب واحنه واگفين گبالها ،غطيت حلگي ما اريدن اضحك من گالت
سكينة : سودة عليه خالة تعبانة أنت شوداج لو ضاله

امي صفنت بوجه سكينة ما مفتهمة قصدها ،بس حسن لگفها وهي طايرة ضل يباوعلنه مزغر عيونه يريد يحجي وطاحت علي الدنيا من سمعت صوت طيحته، فكيت عيوني بقوة وعطت مفجوعة من انداريت وشفت كرار طايح من الدرج ودمه تارس الگاع ...

─── ⋆⋅☆⋅⋆ ───

كرار ‍

أحداث كوكبة بدت تنقلب وبدة
وقت الجد بيها
اكو قصة جديدة راح تبدي
قبل النهاية

يابة بعد ماكو هيوفة صارت
ام در

وغايتنة صارت خالة

واكو ناس راح يصير تطور بيناتهم
برائيكم منو هم ؟؟


شكرا لزيارتكم عالم روايات سكيرهوم

تعليقات