رواية ديون النبض الفصل السابع والخمسون 57 بقلم مروه صياح


 رواية ديون النبض الفصل السابع والخمسون 

كنت انا ومجد لسه بنتكلم في موضوع تعب ساره بدون نا يعرف انها هي  الحاله إللي بتكلم عليها...

مجد مسك وشي بين كفوفه، وقال: مجد: تهمك قوي يا وعد الحالة اللي إنتِ بتتكلمي عنها دي؟

بصيت له وقلت: وعد: تهمني جدًا يا مجد.

بص لي وقال: مجد: إنتِ تعرفيها من إمتى؟

وعد: تقريبًا من سنة.

بص لي باستغراب وقال: مجد: سنة؟
 واحدة صاحبتك يعني؟

ابتسمت وقلت: وعد: حاجة زي كده، أنا بعتبرها أختي.

سكت شوية، وبعدها قال: مجد: بس من سنة وإنتِ ما كنتيش بتخرجي... أزاي يا يا وعد.

وعد: كنا بنتكلم كتير في التليفون، وعرفت طبيعة مرضها متأخر جدًا. وهي دلوقتي حامل.

سكت لحظة، وبعدها سألني: مجد: طيب هي لوحدها؟ مالهاش أهل؟ ولا حد ياخد باله منها؟

سكت، وبعدها قلت: وعد: لا، ليها أهل، بس ما فسرتش. وبيهتموا بيها كمان جدًا، لكن هي زعلانة. هي وزوجها مش مع بعض، وهو ما يعرفش طبيعة مرضها، وهي كمان ما قالتلوش. والمشكلة إنها حامل.

سكت شوية، وبعدها قال: مجد: وعد، زوجها لازم يعرف طبعًا إنها تعبانة بالمرض ده، وإنتِ بتقولي إنها حامل. 
وفي نفس الوقت، إنتِ دكتورة وفاهمة كويس إن ممكن تموت في أي لحظة. لازم زوجها يفضل جنبها علشان يطمن عليها، وتكون مرتاحة وتحس مع الوقت إنها مش لوحدها. على الأقل قبل ما تموت.

بص في وشي، ولقاني ببكي والدموع نازلة من عيني.

أخدني في حضنه وقال: مجد: في إيه يا وعد؟ هي غالية قوي عندك كده؟

اتنهدت وقلت: وعد: آه يا مجد، غالية جدًا عليا. أنا عايزة زوجها يعرف.

بص لي وقال: مجد: يعرف منها هي؟ لكن إنتِ لأ،  ما ينفعش تعرفيه؟

هزيت راسي وقلت: وعد: لا، ما أعرفوش، لكن أنا فعلًا عايزة يعرف. ولازم ياخد باله منها، علشان فعلًا أنا حسيت قد إيه هي تعبانة.

سكت شوية، وبعدها قال: مجد: كل واحد بياخد نصيبه يا وعد من الحياة.

سكت وقلت: وعد: معاك حق، بس على الأقل تعيش الأيام اللي فاضلة لها في الدنيا دي مع الإنسان اللي بتحبه، واللي شايفاه أمل ليها.

سكت مجد، وبعدها قال: مجد: ما كانش ليها حمل يا وعد. المفروض هي كانت عارفة إنها مريضة بالمرض ده، ما كانتش أخدت الخطوة دي واتجوزت وحصل الحمل.

سكت وقلت: وعد: كان لها ظروف تانية، ولكن هو أي إنسان مريض مش من حقه يحب ويتحب يا مجد؟ مش من حقه إنه يعيش حياة طبيعية؟

قال لي: مجد: أنا بتكلم على الطفل اللي هيتولد.

بصيت له وسكت.

وقتها حسيت إن كلامه فيه موقف من الموضوع، وكأنه واخد رد فعل مسبق منه، بسبب اللي حصل بينه وبين مامته. لكن ما رضيتش أضغط عليه في الكلام.

كان كل هدفي إنه يعرف معظم التفاصيل عن الحالة اللي أنا بكلمه عنها، علشان ما يتفاجئش لما أنا وهو نروح نزور سارة بكرة.

كملنا يومنا بشكل طبيعي، وبعدها جه اليوم اللي كنت مستنياه.

صحيت تاني يوم وأنا حاسة بإرهاق شديد. التفكير في كل اللي بيحصل كان مرهقني، لكن كنت مستنية مجد يعدي عليا علشان نزور سارة زي ما اتفقنا.

من غير ما يعرف إننا رايحين الفيلا اللي هو اتربى  وكبر فيها، ومن غير ما يعرف إن الزيارة أصلًا لسارة.

كنت متفقة مع دكتورة جيهان إننا نكون موجودين الساعة واحدة، وهي بالفعل بلغت سارة، وسارة فرحت جدًا إنها بعد شهور هتشوف مجد.

لكن كلهم كانوا عارفين كويس إن مجد مش عارف إنه رايح الفيلا.

ومش هقدر أقول إني أجبرته على الزيارة، لكن أنا حاولت أقنعه من ناحية إنه طبيب، وإنه يقدر يساعد مريضة في حالتها، ويقف جنبها في الوقت الصعب اللي بتمر بيه.

الساعة عدت واحدة، ومجد بالفعل وصل، ولقاني جاهزة.

نزلنا سوا وركبت معاه العربية.

بعد شوية، بص لي وقال: مجد: قوليلي بقى، هنتجه فين بالضبط؟

سكت وقلت: وعد: الشيخ زايد.

بص لي وسكت، وكملنا طريقنا وإحنا بنتكلم في حاجات كتير، لكن أنا ما كنتش عارفة أقوله إزاي إننا رايحين فيلا دكتورة جيهان.

وبمجرد ما قربنا من المكان، بدأ يلاحظ الطريق، وبص لي وقال: مجد: وعد، إنتِ متأكدة إن هي ساكنة هنا؟

وعد: آه.

مجد: ساكنة فين بالضبط؟

هزيت راسي وقلت: وعد: فيلا خمسة وعشرين.

بص لي وسكت، وبعدها وقف العربية على جنب وقال باستغراب: مجد: إنتِ بتقولي إيه؟

بصيت له وقلت: وعد: مجد، أنا بتكلم على سارة، المريضة اللي إحنا هنزورها... هي سارة.

في اللحظة دي بص لي وعينه وسعت، واتنهد وقال: مجد: سارة مين؟

هزيت راسي وقلت: وعد: سارة مراتك وبنت خالك وأم ابنك أو بنتك. سارة محتاجة لك يا مجد، سارة تعبانة، وإنت بنفسك عارف طبيعة المرض اللي هي فيه.

هز راسه وقال: مجد: يا ترى دي لعبة جديدة منها هي ودكتورة جيهان علشان أرجع لهم وأقرب تاني؟

بصيت له ومسكت إيده وقلت: وعد: لا يا مجد، صدقني، فعلًا سارة تعبانة. أنا شفتها وزرتها مرة واتنين وتلاته.

بص لي بذهول، وعينيه كانت بتسألني: زرتيها إمتى؟ وشوفتيها إمتى؟

هزيت راسي وقلت: وعد: مجد، علشان خاطري. أنا عارفة إن إنت ممكن تكون زعلان مني إني خبيت عنك، لكن صدقني كان غصب عني. 
كنت بحاول أفتح معاك الموضوع، لكن كنت لسه شايفة إن نفسيتك بدأت تتحسن، وما كنتش عايزة أرجعك لنفس الوجع تاني. لكن لما لقيت سارة تعبانة وعرفت موضوع مرضها، ما كانش ينفع أسكت.

بص لي، وبعدها لف بالعربية علشان يرجع.

اتكلمت بسرعة وقلت: وعد: مجد، بعد إذنك، مش هينفع ما نزورهاش.

بص لي وقال بحسم: مجد: انسي الموضوع ده يا وعد، بعد إذنك.

حطيت إيدي على إيده وهو سايق العربية، وقلت له:
وعد: مجد، علشان خاطري. سارة تعبانة ومحتاجة لك جنبها.

فضل مكمل في سواقته، وقال بنبرة حاسمة:
مجد: أنا قلت لك انسي الموضوع ده بعد إذنك، وأنا خلاص أخدت قراري.

بصيت له وقلت:
وعد: وأنا كمان أخدت قراري ومش هرجع فيه.

بص لي بصدمة، وقلت:
وعد: بس إحنا يا مجد ما اتفقناش على كده.

رد عليا وقال:
مجد: إحنا اتفقنا إن أنا أفكر براحتي، وأوصل للقرار اللي أنا أرتاح له. وأنا ارتحت، وده القرار اللي أنا ارتحت له. بعد إذنك يا وعد، ما تفتحيش الموضوع ده معايا تاني.

بصيت له وقلت:
وعد: وقف العربية يا مجد.

بص لي باستغراب وقال:
مجد: ليه؟

كررت كلامي تاني:
وعد: بقولك وقف العربية. لو إنت مش هتزورها، بعد إذنك أنا هروح لها وأزورها وأطمن عليها.

وقف العربية على جنب، وبص لي وهو بيقول:
مجد: أنا مش قادر أفهمك يا وعد، مش قادر أفهمك! إنتِ بتفكري في إيه؟ وليه غاوية تتعبي نفسك؟ وليه غاوية تحملي نفسك فوق طاقتها؟ أنا مش قادر أسامحهم على اللي عملوه فينا.

بصيت له وقلت:
وعد: وأنا كويسة وحرة في نفسي يا مجد. أسامح أو ما أسامحش، دي حاجة تخصني أنا.

بص لي، وبعدها قال:
مجد: كده يا وعد؟ إحنا مش متفقين إن اللي يخصنا، واللي يخصك يخصني؟

بصيت له والدموع في عيني، وقلت:
وعد: علشان كده أخدت قرارك لوحدك؟ أنا كمان أخدت قراري لوحدي، وبقولك إن أنا هزور سارة، ومش هقطع علاقتي بيها ولا بالدكتورة جيهان. أنا حسيت بصدق كلامهم معايا، وحسيت بصدق رجوعهم عن أخطائهم ....
ديون النبض 🫀 
بقلم الكاتبه مروة صياح 🎯 ✍️ 

كملت كلامي مع مجد وقلت له:
وعد: وحسيت بصدق رجوعهم عن أخطائهم. ربنا بيغفر وبيسامح يا مجد، إنت ليه مش عايز تسامح؟

بص لي وقال:
مجد: العفو بيكون عند المقدرة يا وعد، وأنا مش قادر. أنا ما عنديش الملكة دي، ما عنديش ملكة إني أسامح وأغفر للي عذبني واللي كانوا سبب في وجعي.

بصيت لمجد وحسيت إن مهما اتكلمت معاه، هو مصر على موقفه.

فتحت باب العربية وقلت له:
وعد: تمام يا مجد، أنا بعد إذنك، زي ما قلت لك، هروح أزور سارة وأطمن عليها.

بص لي نظرة طويلة، وبعدها قال:
مجد: وعد، بعد إذنك اركبي. أنا مش موافق إن إنتِ تروحي هناك.

بصيت له وقلت:
وعد: هتمنعني يا مجد؟

مسك إيدي قبل ما أنزل وقال:
مجد: وعد، أنا ما أقصدش إني أمنعك من أي حاجة بتعمليها ولا أتحكم في قراراتك، بس حاجة زي كده تخصني أنا.

سكت شوية، وبعدها قلت:
وعد: تخصني أنا كمان. أنا زوجتك وشريكتك في كل حاجة، وشريكة حياتك في الوحش قبل الحلو يا مجد. وبعد إذنك، أنا مش هقدر أتوقف عن إني أطمن على سارة وعلى الجنين اللي في بطنها.

إنت مش عايز تصدق إن سارة فعلًا تعبانة. بالنسبة لك، الموضوع مجرد لعبة من دكتورة جيهان، وإنها بتعمل كده علشان تقرب منك تاني، هي وسارة. إنت براحتك، لكن أنا جوايا قلب بيخليني أحكم على الناس، وبيخليني أحس بصدق مشاعرهم وصدق كلامهم.

وأنا عارفة إن جواك إنت كمان حاسس بكل ده، لكن إنت بتكابر يا مجد، بتكابر بسبب الوجع اللي إنت عشته. لحد إمتى هتفضل عايش في الوجع ده؟ إنت عمرك ما هتتعافى منه يا مجد طول ما إنت متمسك بيه بالشكل ده، طالما إنت ما سامحتهمش.....

فتحت باب العربية وخرجت.

كان مجد بيبص لي وساكت.

لمحت تاكسي جاي ناحيتي، وقفته وركبت فيه. مجد نزل من العربية بسرعة علشان يوقفني، لكن التاكسي كان بدأ يتحرك.

ناداني:
مجد: وعد!

لكن التاكسي كان بيتحرك، فقلت للسواق:
وعد: بعد إذنك، كمل طريقك.

وفعلًا اتحرك، وبمجرد ما التاكسي اتحرك، بصيت ورايا، لقيت مجد واقف وعينيه متعلقة بالتاكسي اللي أنا راكباه.

لكن ما كانش قدامي غير إني أمشي.

كنت عارفة إني ما قدرتش أجبره ييجي معايا، لكن كان لازم يعرف من جواه إن الموضوع فارق معايا جدًا، وإن وجوده في حياة سارة مش مجرد زيارة عادية.

كنت متضايقة جدًا إنه مش موجود معايا. كنت عايزة أحس بمسامحته ليهم، وبرحمته على أمه وعلى سارة والجنين اللي في بطنها.

حتى بعد ما قلت له إنها تعبانة، ما كنتش فاهمة إزاي مش مصدق حقيقة إن سارة فعلًا مريضة ومحتاجة وجوده جنبها.

كنت متلخبطة ومش قادرة أصدق إن مجد، صاحب القلب الكبير، مصمم على موقفه بالشكل ده.

وصلت الفيلا، وبمجرد ما دخلت حسيت فعلًا إني داخلة لوحدي.

ما كنتش عارفة هواجه دكتورة جيهان وسارة إزاي، ولا هقول لهم إيه، خصوصًا إني اديتهم أمل إن مجد هيكون موجود معايا.

لكن في النهاية، ما قدرتش أقنعه إنه ييجي.

أول ما دكتورة جيهان شافتني لوحدي، فهمت وعرفت من غير ما أتكلم.

سلمت عليها وسألت علي ساره وبعدها دخلت أطمن عليها.

وسارة، بمجرد ما شافتني لوحدي هي كمان، سكتت، وما رضيتش تتكلم أو تفتح الموضوع.

كنت قاعدة حزينة جدًا لأن مجد مش موجود معايا. حاولت أهون على نفسي وأتصرف بشكل طبيعي، لكن في الآخر لقيت نفسي مضغوطة جدًا، وما قدرتش أتحمل أكتر من كده.

دموعي نزلت غصب عني.

دكتورة جيهان طبطبت على إيدي وقالت:
د. جيهان: وعد، ما تضايقيش نفسك. أنا عارفة إن مجد مش عنيد طول الوقت، لكن خلاص، أنا عارفة إنه دلوقتي بيعاند نفسه، ومش هيقدر يسامحنا على اللي إحنا عملناه.
ما تضغطيش على نفسك يا وعد، لكن أنا كمان بطلب منك إنك ترجعي، مش عايزة الموضوع ده يكون سبب في خلاف بينك وبين مجد أو يعمل زعل بينكم.

رفعت راسي وبصيت لها وقلت:
وعد: يا ماما، الموضوع ده بالنسبة لي مسألة حياة أو موت.

بصيت لسارة، ولقيت دموعها نازلة على خديها.

كملت كلامي وقلت:
وعد: مجد لو ما رجعش ليكم...

سكت شوية، وبعدها بصيت لدكتورة جيهان وقلت:
وعد: أنا مش هكمل حياتي معاه حتى لو روحي في روحه. مهما حصل بينكم، إنتِ أمه، ومهما طول زعله منك، ما ينفعش يقاطعك بالطريقة دي....

بعد ما قلت الكلام ده، حسيت إني مش قادرة أتخيل حياتي فعلًا من غير مجد، ولا أتخيل إني أبعد عنه. لكن لو رجوعه لدكتورة جيهان ولسارة محتاج إني أضغط عليه وأقوله إني هبعد عنه علشان يرجع لهم، فأنا فعلًا مستعدة أعمل كده.

انفجرت في البكاء وأنا قاعدة مع دكتورة جيهان، وبجانب سارة.

سارة قربت مني وأخدتني في حضنها، وفضلت هي كمان تبكي بشدة.

اتنهدت د جيهان وقالت:
د جيهان: أنا السبب في كل ده. أنا مش عارفة أصلح نتيجة اللي عملته إزاي. للأسف فهمت غلطتي متأخر، لكن صدقيني يا وعد، أنا مش عارفة أعمل إيه.

لقيتها قامت من مكاني، وبعدها غابت حوالي عشر دقايق، ورجعت تاني وفي إيديها شوية ورق.

مدت إيدها ليا وقالت:
د. جيهان: خدي يا وعد، ادي الورق ده لمجد.

بصيت لها باستغراب وقلت:
وعد: ده ورق إيه؟

قالت لي:
د. جيهان: ده علشان أقدر أوصل لمجد وأثبت له صدقي، وأبين له إني فعلًا غلطت، ومستعدة أتحمل نتيجة غلطتي. دلوقتي ما بقاش يهمني أي فلوس ولا أي حاجة أملكها أنا وسارة.

أنا يكفيني مرتبي، هيعيّشني كويس. وأي حاجة أملكها، ده توكيل عام مني لمجد يتصرف فيها زي ما هو عايز.

لو مش عايز ورث جده وورثي، وكمان نصيب سارة، يتبرع بيهم للجمعيات الخيرية براحته. يكمل بيهم الصرح الطبي اللي هو عايزه براحته، حتى المستشفى الاستثماري وكل اللي بيطلع منها، أنا مش متمسكة بأي حاجة.

أنا كمان حولت كل الفلوس اللي في البنك على حسابه هو.

صدقيني يا وعد، أنا فعلًا أدركت إن السعادة الحقيقية في راحة ابني اللي حرمته منها، لكن كل ده ما بقاش يفرق معايا دلوقتي.
كل اللي يفرق معايا إني أشوفه راجع لي، وأحس إنه فعلًا ابني اللي اتحرمت منه وحرمت نفسي منه سنين طويلة.

بعد كده رفعت عينيها لسارة وقالت:
د. جيهان: حتى سارة، أنا عودتها على حاجات كتير غلط، وربيتها بطريقة مدلعة. يمكن علشان مرضها وتعبها ما كنتش عايزاها تحس بيهم، اهتميت بيها زي بنتي، ونسيت ابني خالص.

لكن صدقيني يا وعد، كل اللي أنا عايزاه دلوقتي إني أطمن على سارة وتكون بخير، وربنا يعافيها، والطفل اللي هيتولد ما يحسش بأي حرمان من ناحية أبوه، ولا يتعذب زي ما مجد اتعذب هو كمان.

كنت بسمعها وأنا ساكتة، ومش عارفة أرد عليها وأقول لها إيه، ولا قادرة أقول لها قد إيه مجد مُصر إنه يفضل بعيد عنهم، ومتمسك بقراره.

بعد فترة استأذنت منهم، وبصيت لسارة وقلت لها:
وعد: هعدي عليكِ كل يوم أطمن عليكِ.

مسكت إيدي وقالت:
سارة: بلاش يا وعد، أنا كويسة، ما تقلقيش عليا. وبالنسبة لمجد، صدقيني، هو أدام هيكون كويس. ده عندي بالدنيا كلها.

قربت منها وطبعت قبلة على جبينها وقلت:
وعد: معلش يا سارة، ما تزعليش منه. هو لسه ما أخدش وقته، بس صدقيني أنا واثقة ومتأكدة إنه هيسامحك وهيقرب منك تاني.

ابتسمت لها وقلت:
وعد: وبعدين؟ إنتِ زوجته قبلي، وهتكوني أم طفله اللي جاي.

ابتسمت لي، وبعدها استأذنت منهم ومشيت.

بعد ما خرجت من الفيلا، وكنت قفلت تليفوني علشان محدش يقدر يوصل لي.

دكتورة جيهان كانت بلغت السواق إنه يوصلني، لكن أنا طلبت منه يوصلني لحد الكورنيش، وقلت له:
وعد: ارجع إنت، أنا هقف هنا شوية.

فضل يحاول يقنعني إنه يستنى أو يرجعني، لكن أنا أصريت وقلت له:
وعد: ما تقلقش، أنا كويسة.

وفعلًا نزلت وفضلت أتمشى لوحدي.

كنت حاسة إني في صراع بين حبي لمجد وتعلقي بيه، وبين إني أسيبه ياخد وقته ويقرر بنفسه.

لكن في نفس الوقت، كنت حاسة إن مفيش وقت للحالة اللي سارة فيها. مفيش وقت، وخايفة بين اللحظة والتانية يحصل لها حاجة، أو حالتها تسوء أكتر.

ما كنتش عايزة أقصر في حقها، وخصوصًا في الظروف الصحية الصعبة اللي بتمر بيها.

كان نفسي فعلًا مجد يقرب منها ويسامحها، وكنت خايفة جدًا عليها، لكن ما كانش في إيدي أي حاجة أقدر أعملها، ولا حتى أمل جديد أقدر أقدمه لها.... 

فضلت فترة طويلة وأنا بفكر، ومش عارفة أوصل لحل يرضي جميع الأطراف.

كل حاجة كانت في إيد مجد...

فضلت أتمشى لحد ما حسيت إني مش قادرة أكمل، تعبت وقررت أرجع.

ركبت تاكسي ورجعت البيت.

بمجرد ما دخلت شقتنا عند ماما، قربت مني بلهفة، وكان واضح عليها القلق، ومش هي بس، رغد وياسين كمان.

قربوا مني وسألوني: ماما: إنتِ اتأخرتي ليه؟ ما رجعتيش من بدري ليه؟

رغد: مجد رجع، وكان باين عليه إنه متضايق جدًا. حصل إيه؟

سكت وسألتهم: وعد: هو مجد فين؟

رغد: أنا اللي شفته وأنا نازلة، كان داخل الشقة، وباين عليه الضيق جدًا. حاولت أفهم منه، لكنه سابني وقال إنه مرهق وتعبان. وسألته عليكي، قال إنك بتزوري واحدة صاحبتك.

ماما بصت لي وقالت: ماما: كنتِ فين يا وعد؟ ومين صاحبتك دي؟ غريب اللي سمعته من رغد.

ياسين بص لي، وكان فاهم إن في حاجة من غير ما أتكلم.

قرب مني وقال: ياسين: وعد، بلاش تضغطي على مجد. سيبيه براحته.

بصيت له وأنا بهز راسي وقلت: وعد: ياسين، صدقني، ما فيش وقت.

بص لي باستغراب وسألني: ياسين: ما فيش وقت لإيه؟

قربت منه وقلت: وعد: سارة تعبانة.

بصوا لي باستغراب من موقفي، وسألوني: ماما: سارة مين؟

رديت عليهم: وعد: سارة زوجة مجد، هو فيه غيرها؟

ماما قالت باستغراب: ماما: أنا مش فاهمة حاجة! هو إنتِ كنتِ عندها؟ إزاي؟ وإزاي تخالفي مجد وإنتِ عارفة موقفه منهم لسه يا وعد؟

هزيت راسي وقلت: وعد: يا ماما افهموني، سارة بين الحياة والموت. سارة تعبانة، ولازم مجد يكون جنبها، ياخد باله منها ومن صحتها ونفسيتها.

ياسين قرب مني وسألني: ياسين: تعبانة مالها؟ من الحمل؟

وطيت راسي وقلت: وعد: لو على الحمل، أمره سهل، لكن سارة ممكن في أي لحظة تفارقنا.

رغد قالت بقلق: رغد: وعد، سارة مالها؟ تعبانة بإيه؟

بدأت أحكي لهم كل حاجة، من طبيعة مرض سارة، وليه دكتورة جيهان كانت مصرة على جوازها من مجد، والسبب الحقيقي ورا إصرارها.

كانوا مذهولين من كل اللي بيسمعوه.

وكملت كلامي وحكيت لهم إني اتكلمت مع مجد، وإنه كان معايا في طريقه ليها، لكن بمجرد ما عرف إننا رايحين لوالدته وسارة، رجع بالعربية ورفض يكمل الزيارة.

وحكيت لهم إني قررت أروح أزورها لوحدي.

بعد ما خلصت كلامي، بصيت لهم وقلت: وعد: قولوا لي، أنا أتصرف إزاي؟ أعمل إيه؟!

بصيت لياسين وقلت: وعد: رد عليا يا ياسين، وقولي أعمل إيه؟ أسيب سارة كده؟ وأفكر في نفسي بس؟ ونفضل كلنا شايلين ذنبها؟

رغد بصت لي وسألتني: رغد: إنتِ متأكدة فعلًا إنها تعبانة؟

بصيت لها وقلت: وعد: رغد، أنا دكتورة، وأعرف كويس أعراض المرض ده.

سكت شوية، وبعدها أخدت قراري وقلت: وعد: أنا هتكلم مع مجد تاني.

وفعلًا اتجهت لشقتي.

دخلت، وعيني كانت بتدور على مجد، لحد ما لقيته في مكتبه.

دخلت عليه، وقلت: وعد: مجد...

رفع عينه وبص لي.


تعليقات