رواية ارحام متناثرة الفصل الخامس بقلم مجهول
⚘جانت امنية حياتي اصعد بالسيارات الجبيرة الجنت اشوفهة من اروح للمدرسة (الباص)..
ومن ذاك اليوم اتمنيت اصعدهه لان حتى من نروح للمزرعه مالتنه نروح بحنتور عربانة
يجرهة( حصان او حمار) مو بسيارة...فہ بيوم من ايام الصيف الحار اجتي عليه امي من الفجر كعدتني..
ام غسان☆☆ ربابة ربااب يلة يمه كومي لبسي و اتحضري دنروح زيارة لكربلا
رباب☆☆ فتحت عيوني كوة لأن جنت نعسانه بس سمعت بيهة طلعه صحيت😁... شنو يمة وين نروح
ام غسان☆☆ دنروح لكربلا حبيبتي وية بيت خالتج امينه ..عندي نذورة كومه علية بلكي اتذكرهن واوفيهن هناك.. يلة يمة لا تأخرينه
رباب☆☆ يمة يعني بعيدة كربلا؟
ام غسان ☆☆اي بعيدة لازم بالسيارة الجبيرة نروح يلة نكدر نوصل لعد بحنتور بعد 3 ايام منوصل
رباب☆☆صددك يمة بالسيارة الجبيرة 😀💃
ام غسان☆☆ اي يلة كوومي لاتاخرينه يلة ع السريع بين ما اكعد اخوتج ..
رباب☆☆ هاي اول مرة اروح لمكان بعيد جنت متحمسة وفرحانه من كثر فرحتي جنت
بس اضحك واشاقة وية اخوتي بس جانو يضوجون مني ومن شقاية وياهم... بدلنه على
السريع وامي حضرت اكلنه...جانت خابزة خبز عروك ومسوية جدر دولمه واخذت قوري فارغ
جبير للجاي وبيض مسلوك....طلعنه وجه الفجر جانت ضلمه بعدهة وبيهة نسمه هوى باردة استنشقت الهوى حتى الهوى بهاليوم يختلف
وصلنه بيت خالتي امينه دخلنه وسلمنه عليهم لكيناهم كاعدين ومتحضرين وينتضرون
السيارة الجبيرة تجي كعدنه وصار سوالف بين الكبار....
عرفت بعدين هاي السيارة مالت اخوه لعمو مجيد اسمه محمود مشتريهة ويريد يزورهة...
فہ كلتلة لعمو مجيد... عمو عفية اتمنى اكعد يم السايق اريد اشوفة شلون يسوق 😐
مجيد☆☆ عمو ميصير لازم احنه الزلم نكعد بالصدر يم السايق..انتو الجهال خاف تضوجوه للسايق والسيارة تنكلب بينه ياستار...
ابو غسان☆☆كول غيرهة ابو فرحة هاي النسوان وين تسيطر على هالجهال لوحدهن
والله يصير طشارهم ماله والي ..وينشمرون من البدي واحد ورة الثاني لازم رجال يكعد يمهن يضب الوضع
مجيد☆☆ فرحت من كلي ابو فرحة اعتبرت هالامر نكران ذات منه لان هوة ابوهة الشرعي ورغم ذلك كلي ابو فرح.....
ضحكت وكلتلهة لاخوية بيهة جادر شلون نخلي النسوان والجهال بالبدي بدون جادر مترهم
رباب☆☆ 😐 جادر شنو ردا اسألهم بس حانو يحجون وملتهين .. يلة يجوز مكان نكعد بية اسمه جادر 🤔
ابو غسان☆☆ اي اذا هيج بيهة مجال نكدر شوي انئمن عليهم واستر همين خو مو يبقون مكشوفين....
كمنه وطلعنه دنشوف السيارة اجتي لو بعد وبقينه واكفين بالباب ونسولف ورة شوي
بينو.... اها هذيج السيارة بينت مديت راسي من الباب وصحت...يلة ياجماعة تحضرو اجوي
رباب☆☆سمعت السيارة اجتي طلعت طايرة 🏃دة اشوفهة ..طلعت من الباب 😳شفتهة
شو هاي سيارة تختلف مو الباص الي جنت اشوفهة بالشارع هاي شكلهة جبير ويخوف
ومابيهة سكف من ورة 😨سألت امي ...يمة يمة هاي شنو السيارة...
امينه☆☆ هاي اسمهة لوري حبيبتي...
رباب☆☆ خالة اشو هاي مو مثل السيارات الجبيرة الي اشوفهة بالشارع هاي تخوف 😰
امينه☆☆ هههههههه لج ليش والله متخوف دصعدي بيهة وشوفيهة شكد حلوة كعدتهة خصوصا الكعدة لالبدي والهوى يلعب يخبل
رباب☆☆ سكتت بس ضليت اباوع ع السيارة واخيرا راح يتحقق حلمي واصعد بالسيارة 😀
ديصعدونه وشفنه خوات عمو مجيد 2.. رضية ونورية.. كاعدات بالبدي هنة وجهالهن بس
زلمهن ماجايين وياهم... صعدت امي وخالتي وسلمو عليهن واحنه صعدونه ابوية وعمو
مجيد لأن كلش عالية شالونه شيل...اخذتلي مكان يم الباب مالت البدي وكعدت اباوع ع
السيارة جانو فارشين منادر خفيفة بالبدي حتى نكدر نكعد ومنتأذة...
صعدو كلشي ابوية وعمو مجيد وكملو كالو هاا خو ماناسين شي كالولهم لا ماناسين حذرونه
احنه الجهال نلعب بالبا مالت البدي ابوية كال الي يلعب بيه لو يمد ايدة عليه اكسر ايدة...
كلنة خفنه وكلنة لا منلعب وشوي ابتعدنه عن الباب....شغل السيارة عمو محمود... واتحركت
وبدت تمشي اول شي بطيء وتتمروج بينه يمنة ويسرة مشت السيارة لو 😨
راحت روحي وياهة... يبو شكد تخوف من تمشي ومن تلوف..كلبي وكف..عبالي راح توكع
السيارة لو اتطب ابيت الجوارين ونندعم انوب مشى بيهة والشارع بي طسات وخضتنه
خض بمشيهة...بالبداية ختلت بحضن امي من الخوف وخنست ....بس ورو شوي اتجرأت
وكعدت مرة ثانية يم باب البدي وكمت امد راسي واشتم الهوى لو امد ايدي والعب جنت
اشوف شلون البساتين تمشي على السريع جان كل عقلي النخل والاشجار يمشن وية السيارة
😂 لأن ما اكدر اباوع على الشجرة لو النخلة زين متثبت تخطف خطف من يمي ردت انحول الا شوي 😅 تالي دخت وكعدت بمكاني 😁... ورة شوي كبت العيطة🙊
رضية☆☆ اييه سوودة عليه ياخوية مجيد.. يربي ويداري بزرة غيرة وهوة ماشاف بزرته.. اووف الله لاينطي امهات السحورة
نورية ☆☆ 😏والله يارضية اخوج مابي خير يربي بزرة العالم وحاي
ر بيهم....شبي مو رجال ميكدر يتزوج مرة ثانية ويشوف بزرته
ام غسان☆☆ هيج سمعت لو فار دمي... على كيفجن ياابة شحارك تنورجن رجال ويحب
مرته وميريد يتزوج عليهة شدخلجن بالنص.. وبعدين منو يكول الصوج من اختي يجوز اخوجن ميخلف ...
امينه☆☆ تحجي فضيلة واني اكرص بيهة واهمس..اسكتي عوفيهن اتعودت عليهن خليهن يحجن لاتجاوبيهن
ام غسان☆☆ لا والله ما اسكت وشيريد يصير خلي يصير
رضية ☆☆ وانتي شدخلج؟ اني واختي دنسولف عن اخونه..تدخلين بينه شنو احترمي نفسج يا فضيلة ولاتحجين.
امينه☆☆ كافي فضيلة اسكتي عوفيهن
ام غسان☆☆اسميي ام غسااااان يارضيةةةة افتهمتي.. واخوج التحجين عنه ماخذ اختي يا الفاهمه يعني هالحجي يمسهة ومادام يمسهة يعني يمسني
امينه☆☆ اوف ربي اصواتهن بدت تعلى ويتصايحن ويخنزرن وحدة على الثانية والجهال اتصركعو
رضية☆☆ استحي على نفسج فوك ماكاعدة بسيارت اخوية ولسانج شطولة.. صدك لو كالو نزل ويدبج على السطح المستحى انشال من هيج بشر
ام غسان☆☆ بكروووتنه عيوني ماجايين بلاش بفلوسنه اجينه ما ماخذين من جيبكم
نورية☆☆عوفيهة رضيه شتترجين من وحدة شمرت بنتهة على اختهة هيج بشر مينحجي وياهن
ام غسان☆☆ شمررررت😡 شنو ولج عرفي احجييي لا افرك حلكج فرك....ومن هاي
الفتحة البسيارة اشمرج وداعت هذا الحسين الرايحيلة
نورية☆☆ يبوووو ولج منوووو تفركين حلكهة اليوم اعرفج اوادمج...💥💣
ابو غسان☆☆ جنه نسولف اني والولد عن الاوضاع بالعراق بعد الانقلاب
على عبد الكريم قاسم سنه 1963..وكل شوي نسمع صوت النسوان والجهال يعلى عبالنه
ديسولفن... وهنة النسوان اصلا اصواتهن تلعلع
مرة مرتين علت اصواتهن كلتلة..محمود اطبك خلي انزل اشوف شكو
محمود☆☆بعد نسوان وجهال والتمو شتتوقع خوية اكيد تصير حمام نسوان بالهوسة ههههه
ابو غسان☆☆فضحونه بوية اصواتهم عاليه اطبك خلي انزل اشوفهم
محمود☆☆ خطية عوفهم خليهم ينطلقون منو يسمع دنمشي بنص البساتين وچولة
والفجر بأولة وبعدهة الناس نايمه منو يسمعهن عوفهن ...كملنه سوالفنه اشو ورة دقايق
السيارة كامت تختض وتهز ركبة 😳 شنو القصة ونسمع صوت النسوان يتصايحن
مجيد☆☆شنو هاي شبيهة سيارتك مو خبصتني بيهة جديدة ؟ بس لا يطلع بيهة عيب ..
محمود☆☆لا خوية مجيد مو السيارة هاي الجماعة الي بالبدي مدري شبيهم... راح اطبك ونزلو شوفو شكو
ابو غسان☆☆ سمعتهن وميزت صوت فضيلة صوتهة عالي ورفيع ويلعلع لو عيوني صارت
بنص راسي .........هالنسوان سوونهة بلا ملح اطبك خوية اطبك خلي نشوفهن .....طبكنه
ونزلنه ونشوفهن صايرات مكافش شي فوك شي😳واصرخ ولج فضيلةةة شدتعملين
وللك غسان اكعددد بوية شصايرر ولكم شبيكم رباب جرررري امج ولج
مجيد ☆☆ شفت خواتي وامينه وام غسان صايرات مكافش من الروس والجهال شي فوك
شي وازمخ بيهن كلهن بعالي صوتي لأني مو غريب عنهن خواتي ومرتي واختهة زمخت كعدوووووو يززز😡زززي عاددددد ..
راسا تفرقن كلهن.. ولجن شبيجن شصاير ماتخجلن فضحتونه واحنه بالشارع ماتستحن على روحجن....
ابو غسان☆☆ جريت فضيلة من ايدهة ولج ما ستحيتيي هاي تصرفات وحدةة عاقلة ولج
كاعدة بسيارتهم شنو من بشر انتي لا خجل ولامستحى ولج خشيتي بالعمرين شوي ثگل..
امشوو امشو انزلو...يلة هسة نشوف شي يرجعنه لبيتنه نزلو لانعل ابوكم لابو اليطلعكم..
مجيد☆☆ وين وين ابو غسان على كيفك خوية خواتي همين مو خيرات ادري بيهن واعرفهن ..
رضية☆☆ هاي تاليهة خوية نطلع مو خيرات ومو خوش علمود الغرب .
ابو غسان☆☆ خوية حسبيهة عليه لخاطر شيباتي هاي .. ولزمت لحيتي
محمود ☆☆ اسكتن انتن لا تحجن حسابجن بالبيت بعدين😠.... لا تخلي ابالك خوية ابو
غسان اصلا احنه ما افتهمنة على شنو المشكلة
تلكاهن علمود الجهال تعاركن استهدى بالرحمن
وهاي نسوان وبيناتهن مندخل عوفهن وهسة يتصافن خلينه نكمل طريقنه خوية يلة امشي..
مجيد☆☆ رضية ونورية وامينه نفسسسس منجن ما اسمع كلمن تلزم جهالهة وتكعد ترة يصير حسابجن غير شكل والعباس ابو فاضل
ابو غسان☆☆ خلي اسمع صوتج انتي وجهالج يافضيلة واعتبريهة كتبته الله وانكتبت عليج...
رباب ☆☆ من بعد رزاله ابوية وعمو مجيد للنسوان كل وحدة كعدت صفح ودايرة وجهة
عن الثانية عود يعني متزاعلات😅...
ورة شوي رجعنه احنه الجهال نلعب ونهوس ماهتمينه للكبار.....وصلنه كربلا وية طلعت
الصبح اول مرة اشوف الحضرة والامام..ناس هواي هناك مكان يخبل.. دخلنه وزرنه وضلينه
فترة كاعدين الي يصلي والي يقرة دعاء.. تالي امي والنسوان رادن يطلعن للسوك ابوية وعمي
ماخلوهن يطلعن وحدهن ...وتالي طلعنه كلنه سوية...امي اتسوكت هواي شغلا خصوصا الي
هواي اشترتلي اشياء... كلشي أأشر عليه تشتريلياه.....خالة امينه جانت تشتري لفرحه
بس ما اعرف ليش...جنت اضوج واغار من فرحه رغم امي وابوية ميشترولهة شي بس
عمو مجيد وخالة امينه...بس همين جنت اضوج واغار...وشنو جانو يشترولهة لازم اني
اشتري مثلة...صار وكت الضهرية ورحنه كعدنه ابستان ويمهة نهر بمكان اسمه سدة الهند
ية...
اترخصو ابوية عمي من اهل البستان وكعدنه .. يخبل المكان كله خضار واشجار ونخل ونهر
وحشيش اخضر كلش حلو😍...مر الوكت وجعنه كلش فہ كلمن طلع اكله بس النسوان
بالبداية مقبلن يكعدن سوية يريدن كل عائلة
لوحدهة تالي حصلن رزاله من ابوية عمي 😂
يلة حطن الاكل وهنة ساكتات....كعدنه سوية
وصارت سفرة شكبرهة الي جايب دجاج
مشوي والي جايب كبب سمج واحنه دولمه
وخيار وطماطه وخضورات واتغدينه سويه
كلنه....وبعدين سوو جاي على الحطب للزلم
وشربو...وضلينه احنه الجهال نلعب ونكمز
بالبستان...ورة شوي عمو مجيد وابوية وعمو
محمود نزلو سبحو بالشط واحنه نباوع عليهم
ونكمز نريد نسبح وياهم جنه نشوفهم شلون
يسبحون ويروحون بعيد بنص الشط انوب
اخوية غسان غافل امي وكمز بالشط وصار
المعايط بفلس بس ابوية وعمو مجيد وعمو
محمود لحكو عليه وطلعو من الشط بس وراهة اخذ كتلة معدلة من ابوية وامي...
بقينه نتوسل نريد نلزم المي ونلعب بي احنه الجهال والنسوان عاد كوة قنعناهم ننزل للمي
لأن جانت اكو بركه صغير متفرعه من النهر صايرة على جانب البستان الي كعدنه بيهة
ماجانت غميجة هالبركه ولا تغركنه لأن بيهة مي بس قليل ويخبل فہ نزلنه احنه الجهال
والنسوان وكمنه نطبش بالمي......المي بارد والجو حار ضلينه نلعب ومتونسين بالمي وتبللت ملابسنه بس ماهتمينه...
امي وخالة امينه جابو ركية جبيرة وحطوهة بالمي الجاري يكولون حتى تبرد...مر الوكت و
ابوية كال يلة لمو غراضكم دنرجع راسا انقبض گلبي 😔 ماردت اعوف هالمكان....طلعنه من
المي بس ماغيرنه هدومنه لأن امي ماجايبة النه غير ملابس.... وضلينه بهدومنه جابو
الركية وفتحوهة وقسموهة واتكابلنه عليهة واكلناهة بهالاثناء يبست علينه ملابسنه
ونشفت..صعدنه السيارة واحنه تلمع عيونه من القهر مشت السيارة واني اباوع على هالمكان
واتمنيت ارجع اله مرة ثانية.......جانت احلى ونسة بحياتي كلهة 😍...
⚘⚘مرت الايام وصرت صف ثاني ابتدائي تقريبا سنه 1965...بوقتهة عنفصت ومقبلت
اداوم جنت اكره المدرسة واتخبل منهة حتى من امي تكعدني من النوم ابقى ابجي واتدلل
عليهم لذلك جنت اغيب هواي... بداية السنه كلتلهم اريد ابطل بعد ماداوم... ماريد اداوم
وضليت ابجي اهلي كالو خلص ينعل ابو الدراسة.. بطلت وكعدت بالبيت ...اتعلمت
اغلب شغل البيت... حتى جانت امي تحطلي بلوكه او طابوك تسفطة يم التنور حتى اصعد
عليه و اشلع الخبز من تنور الطين واساعدهة جنت سباعية كلش وما اخاف من النار...وشوي
شوي قوى عودي بالبيت وثبتلي رأي وصارتلي
كلمه...وابوية وامي جانو ابد ميكسرولي كلمه
ولا يرفضولي طلب..الاكولة يمشي على اخوتي رغم اني اصغر منهم ....
⚘⚘امينه☆☆مشت السنين وفرحة عمري تكبر كدام عيني وتحلى... واتعلق بيهة اكثر
واكثر...جنت متأملة خير وعبالي ربي ينطيني ذرية وتكمل فرحتي بس من ماصار عندي حمل...
سلمت امري لألله وحمدت ربي وشكرته على فروحة....جانت حركاتهة ودلعهة ودلالهة
وسوالفهة تخلينه نتعلق بيهة اكثر واكثر شفت امومتي بيهة ومجيد نفس الشي شاف ابوته
بيهة ...جنت كلش هواي اسولف وية فرحة.... واحجي وياهة جنت اعتبرهة جبيرة لان اكو اشياء جانت تفهمهة ...
فرحة☆☆ يمة ليش خاله فضيلة متريدني وماخلتني ابقى يم اخوتي والعب وياهم
امينه☆☆ 😨 ليش فروحه متريدين تبقين يمنه اني وبابا مجيد متحبينه بعد.
فرحة☆☆ لا ماما اني اموت عليكم انتي وابوية مجيد بس اني احب العب وية اخوتي.. بيتنه فارغ وماعندي احد العب وياه☹
امينه☆☆ اني العب وياج يابعد روحي شعندي غيرج يا بنيتي هسة اكمل العجين واعوفة يختمر واجي العب وياج
فرحة☆☆ بس يمة ما كلتيلي ليش خالة فضيلة تكرهني وماقبلت تخليني يم اخوتي
امينه☆☆ لا يمة هية متكرهج وبعيدين هية امج مو خالتج ياعمري....بس هية من جابتج
جانت تعبانه وصارت جبيرة بالعمر ومبيهة حيل اداريج واني ماعندي جهال كالتلي اخذي
فرحة وانتي ربيهة.. وجبتج يمي وفرحت بيج يافرحة عمري.
فرحة☆☆ ماما صدك جان اسمي نهاية..
امينه☆☆ 😳 منو كلج ولج
فرحة☆☆ مازن اخوية كلي...امي سمتج نهاية لان تكرهج ومتحبج.
امينه☆☆ اتنهدت.. استغفر الله.. لا يمة مو لان تكرهج..بس لان انتي اخر العنگود سمتج نهاية يعني بزر الكعدة
فرحة☆☆ لايمة هية متحبني ولا يوم بوستني وحضنتني مثل ما انتي تحضنيني
وتبوسيني حتى متطيني جاي وكليجة من نروح يمهم تنطي بس لرباب وتعوفني.
امينه☆☆ يااااايمةة بنيتي الكمر تريد كليجة وجاي شووو تعالي ياعمري فدوة لهلسان تعالي
انطيني بووسات💋.. هسة اسويلج كليجة مو تؤمرين امر يابعد روحي..... اتهربت من اسأله
فرحه لان ماعندي اجوبة الهة وماريد اخليهة تنقهر بالزايد صح صغيرة بس تفتهم كلشي
ماشاالله......
فروحة يمة حطيلي شوي شكر من هاي الكونية الصفرة اليمج .
فرحة☆☆ اكلج يمة شنوو مكتوب على هاي الكونية؟
امينه☆☆ 😔 مو كلتلج يمة ما اعرف اقرة شوفيهة لست رازقية كلشي تعرف تقرة
وتكتب اريدج انتي همين من
تكبرين تقرين وتكتبين وكلشي تعرفين بلكي تصيرين مثل
ست رازقية موضفة وعندج راتب فلوس وتصرفين على نفسج.......
جنت هواي اعلمهة واحجي وياهة وهي همين لسان الله يحفظهة لأن تحب تسال وتتعلم جانت كلشي تشوفة تسال عنه وتريد تعرفة ...
⚘امينة☆☆ فروحة كبرت وصار عمرهة 6 سنين واستحقت مدرسة...جنت فرحانه بيهة والدنية ما واسعتني من فرحتي..
حضرت الهة كلشي اني ومجيد ملابس مدرسة وجنطة اشترينالهة من السوك حاضرة وحذاء ودفاتر واقلام وشرايط وقراصات...
داومت بنيتي بصف الاول ابتدائي بسنه 1967 جانت شاطرة وذكية وتلكط القراية بسرعه ...
ماجنت اعرف اقريهة لان اصلا ما اعرف اقرة واكتب بس جنت اعتني بدفاترهة واخططهن
جان مجيد خطية هوة يقريهة لان خريج دور الكتاب ويعرف يقرة ويكتب.. فہ من يرجع من
شغلة يتغدة ويكعد يقريهة ... فدوة لعمرهة طالبة مرحة ونضيفة وشاطرة الكل يحبهة
وخصوصا معلماتهة يكولن عليهة هادئة جنت اطير من فرحتي من يمدحون بيهة ويهنوني على تربيتي الهة..
وبيوم من ايام شهر 12 جانت الدنية باردة و الجو مطر والشوارع زلك وطين ...ضل بالي
يم فرحة وكلت اروح اجيبهة من المدرسة على وكت خاف تستبرد وتتمرض بهالجو... لأن
مجيد ماجان موجود يمنه جان عندة شغلة بالبصرة...واني اضوج ابقى بالبيت لوحدي عاد
لبست عباتي وطلعت اركض وكلبي مقبوض ما ادري شبيه واطافر كدام السيارت والناس بس
اريد اوصل شلون ماجان......دخلت للمدرسة ولكيتهم مبقيهم بالصف ممخليهم يطلعون
للساحة لان طين....اترخصت من المدير ورحت لصفهة شفتهة كاعدة برحلتهة وتلعب وية
صديقتهة اترخصت من معلمتهه واخذتهة دنرجع البيت....اشتد المطر بالطريق وكمت
كوة اشوف دربي..الشارع مبلط بس صار طينه وزلك لان السيارات تحمل طين بتايراتهة
حطيت فرحه جوة عباتي ومشيت كلش سريع وفجئة سمعت هورن وشفت سيارة كدامي
😱 ..... اااااااااااااااااااا__________؟
شكرا لزيارتكم عالم روايات سكيرهوم
