رواية ضغينة قلب الفصل الخامس 5 بقلم رقية الأنصاري

 

 

 


رواية ضغينة قلب الفصل الخامس بقلم رقية الأنصاري


صحيت على صوت ماما وهي بتخبط على الباب، فتحت عيني بالعافية وبصيت في الساعة اللي جنب السرير، ولما لقيتها تسعه ونص قومت من مكاني بسرعة.

_ يا نهار أبيض.

ماما فتحت الباب أول ما سمعت صوتي.

_ انتي مصحيتينيش بدري ليه ياماما.

_ أنا بقالي ربع ساعة بصحيكي وإنتي الي مش راضيه تصحي.

بصيت للساعة تاني وأنا بجري على الدولاب.

_ عندي اجتماع الساعة عشره.

_ طب براحه شويه اهدي كده.

_ حاضر يا ماما.

قالتلي إنها هتجهزلي الفطار وخرجت، وأنا دخلت الحمام بسرعة وبعدها لبست بنطلون بيج وقميص أبيض، ولميت شعري ورا بمشبك كبير، وأخدت اللابتوب والشنطة ونزلت.

كنت فاكرة إني هفطر وأمشي على طول، لكن أول ما خرجت السفرة لقيت بابا قاعد مع ماما، وقدامه فنجان القهوة المعتاد، وكان واضح إنه مستنيني.

_ صباح الخير.

ماما ابتسمت.

_ صباح النور يا حبيبتي تعالي كلي لقمة.

قربت من بابا وبوست راسه، وبعدها قعدت وأنا ببص في الموبايل على رسالة من مديري.

_ ملك.

رفعت عيني لبابا.

_ نعم يا بابا.

_ إنتي فاضية الخميس الجاي بالليل.

فكرت شوية.

_ معرفش لسه ليه.

_ عندنا مناسبة عند شريف وعايزين نروح كلنا.

رجعت أبص للموبايل.

_ مناسبة إيه.

_ عاملين عشا بمناسبة اتفاقية جديدة بين الشركتين.

هزيت راسي.

_ ربنا يوفقكم.

_ آمين بس أنا بقولك عشان تيجي معانا.

اتنهدت وأنا بحط الموبايل على السفرة.

_ يا بابا أنا بخلص شغلي متأخر اليومين دول ومش عارفة الخميس هيبقى عندي إيه.

_ اومال أنا بقولك من دلوقتي ليه ما أنا بقولك عشان ترتبي نفسك وتعملي حسابك. 

_ ما هو مش كل حاجة بإيدي.

بابا حط الفنجان وبصلي.

_ وبعدين حازم سأل عليكي امبارح وقال إنه بقاله فترة مش بيشوفك.

بصيتله وأنا بدأت أفهم سبب إصراره.

_ طب وحازم ماله بالمناسبة.

_ ماله إيه ده ابن صاحب المناسبة.

_ أقصد ليه حضرتك بتقولي إنه سأل عليا.

ماما بصت لبابا وبعدين ليا، لكنها فضلت ساكتة.

_ عشان بيحب يطمن عليكي يا ملك هو ده يضايقك.

_ لا يا بابا مش بيضايقني بس أنا مش عايزة كل خروجة عائلية تتحول لموضوع حازم.

بابا اتعدل في قعدته.

_ محدش قال كده.

_ بس ده اللي بيحصل.

_ إنتي مكبرة الموضوع من غير سبب.

بصيت في الساعة، ولقيت الوقت بيجري وأنا أصلًا متأخرة.

_ ممكن نتكلم بعدين عشان عندي اجتماع.

_ أنا مش بطلب منك حاجة صعبة يا ملك.

_ وأنا مقولتش إنها صعبة بس مش هقدر أوعدك بحاجة مش متأكدة منها.

قومت أخدت شنطتي، وماما قامت ورايا بسرعة وادتني ساندوتش ملفوف.

_ خدي ده معاكي.

ابتسمت وبوست خدها.

_ تسلمي يا حبيبتي.

بابا ناداني قبل ما أخرج.

_ ملك.

لفيت ناحيته.

_ نعم.

_ أنا عايزك تفكري في كلامي بهدوء.

هزيت راسي.

_ حاضر يا بابا.

خرجت وأنا حاسة إن اليوم شكله باين من أوله.

مكنتش زعلانة من المناسبة نفسها ولا من حازم كشخص لكن من إحساس إن كل الناس عمالة ترتبلي حياتي من غير ما تسألني أنا عايزة إيه.

وصلت المشروع متأخرة عشر دقايق دقايق، وكنت ماشية بسرعة في الممر وأنا بحاول أفتح الملف المطلوب على التابلت، لحد ما سمعت صوت سليم من ورايا.

_ يا بشمهندسة ملك.

لفيتله وأنا بكمل مشي.

_ صباح الخير يا سليم.

مشي جنبي وهو بيبتسم.

_ صباح النور إيه السرعة دي كلها إنتي داخلة سباق.

_ عندي اجتماع.

بص في ساعته.

_ فاضل عليه عشر دقايق.

وقفت وبصيتله.

_ عشر دقايق.

_ أيوه.

فتحت الموبايل بسرعة، واكتشفت إن الاجتماع اتأجل نص ساعة ورسالة التعديل كانت وصلت وأنا في الطريق ومخدتش بالي.

غمضت عيني واتنهدت.

_ الحمد لله.

سليم ضحك.

_ في إيه.

_ أنا صحيت متأخرة واتخانقت في البيت وجريت في الشارع عشان ألحق الاجتماع وفي الآخر اتأجل.

_ طب دي أخبار حلوة المفروض تفرحي.

بصيتله بغيظ.

_ أنا لو فرحت دلوقتي هعيط بعدها على طول.

ضحك وهو بيهز راسه.

_ لا واضح إن الصبح كان لطيف.

كملت مشي وهو جنبي، ولما دخلنا الاستراحة كنت ناوية أجيب مية وأطلع، لكنه وقف عند ماكينة القهوة وسألني.

_ لاتيه؟

هزيت راسي.

_ لا مش عايزة.

بصلي باستغراب مصطنع.

_ إنتي كويسة.

ضحكت رغمًا عني.

_ آه يا سليم بس مش في المود.

_ طب استني هنا دقيقة.

_ ليه.

_ عندي حل لمشاكل البشرية.

راح ناحية الماكينة، وبعد شوية رجع بكوبايتين قهوة، وحط واحدة قدامي.

_ اتفضلي.

بصيت للكوباية.

_ ما أنا قولتلك مش عايزة.

_ دي مش قهوة ده احنا بنحاول نصلح اليوم.

ضحكت وأنا بأخدها.

_ طب لو منجحتش.

_ يبقى خلاص رجعيها للضمان.

ضحكت أكتر، وهو قعد على الكرسي اللي قدامي.

_ أخيرًا ضحكتي.

بصيتله وأنا بشرب.

_ هو أنا كنت مكشرة أوي.

_ كنتي ماشية كأنك داخلة ترفعي قضية على حد.

ضحكت وهزيت راسي.

_ لا ده أنا بس عندي شوية مشاكل عائلية الصبح.

سليم سكت لحظة، وبعدها قال بهدوء.

_ خير إن شاء الله.

_ مفيش حاجة كبيرة يعني متقلقش.

_ طب الحمد لله.

كنت متوقعة إنه يفضل يسألني لكنه رجع يتكلم عن الاجتماع والملاحظات المطلوبة، ولما حس إني بقيت أهدى بدأ يهزر تاني.

بعد شوية لقيت نفسي بقوله.

_ هو إنت عمرك ما حسيت إن أهلك بيقرروا حاجة تخصك من غير ما ياخدوا رأيك.

بصلي باهتمام.

_ في إيه بس.

اتنهدت.

_ بابا عنده إصرار غريب إنه يقربني من ابن شريكه.

سليم كان ماسك كوباية القهوة، ووقفها لحظة قبل ما يشرب.

_ ابن شريكه.

_ أيوه اسمه حازم.

هز راسه.

_ وعايز يتقدملك يعني ولا ايه.

بصيتله بسرعة.

_ لا مش للدرجة دي بس واضح إن الموضوع في دماغهم.

_ وإنتي.

ضحكت بسخرية خفيفة.

_ وأنا مش عايزة.

سليم ابتسم ابتسامة صغيرة.

_ طب خلاص.

_ خلاص إزاي.

_ يعني طالما إنتي مش عايزة يبقى محدش المفروض يقرر مكانك.

بصيتله.

_ ما هو ده اللي بقوله من الصبح.

_ طب متزعليش نفسك يمكن باباكي فاكر إنه بيعمل حاجة كويسة ليكي.

اتنهدت.

_ أنا عارفة إنه بيحبني وعايز مصلحتي بس نفسي يسيبني أحددها بنفسي.

هز راسه، وبعدها بص في ساعته.

_ على فكرة الاجتماع قرب.

بصيتله وأنا بقوم.

_ يالهوي بقى.

ضحك وهو بيقوم معايا.

_ المرة دي بجد.

مشينا ناحية القاعة، وأنا حسيت إن مزاجي اتحسن فعلًا شوية.

سليم كان عنده طريقة غريبة في إنه يخليني أضحك من غير ما أحس إنه بيحاول، والأريح إنه مكنش بيسألني في تفاصيل أنا مش عايزة أحكيها.

•••••••••••••••••••••••••••••••••••••••••••••••••••

في بيت سليم، كانت مريم قاعدة على السفرة قدام اللابتوب وحواليها أوراق فيها رسومات وألوان، وأمها بتبص لها من بعيد وهي بتحاول تفهم سبب الفوضى اللي عاملاها.

_ يا مريم هو إنتي ناوية تفتحي مكتبة هنا.

مريم رفعت راسها وهي متضايقة.

_ يا ماما عندنا يوم أنشطة في الجامعة ومطلوب مني أجهز ركن العرض وأنا مش عارفة أختار الألوان.

_ طب ما تسألي حد من صحابك.

_ سألتهم وكل واحدة بتقولي رأي مختلف.

في اللحظة دي سليم دخل البيت، وكان لسه راجع من الشغل، فبص على السفرة باستغراب.

_ إيه ده إحنا فتحنا مكتب هندسي في البيت.

مريم بصتله بسرعة.

_ سليم تعالى.

رجع خطوة لورا وهو بيضحك.

_ لا أنا هروح آكل وأنام.

_ معلش بس خمس دقايق.

قرب منها وبص على الرسومات.

_ إيه ده.

_ تصميم ركن العرض بتاعنا في الجامعة.

قعد جنبها وبص على الألوان.

_ طب ما هو حلو أهو.

مريم بصتله بغيظ.

_ إنت لسه مشوفتش حاجة أصلًا.

ضحك.

_ طب وريني.

بدأت تشرحله فكرتها، وهو حاول يساعدها على قد ما يقدر، لكن بعد شوية رفع إيده باستسلام.

_ بصي أنا شاطر في حاجات كتير بس تنسيق الألوان ده مش بتاعي.

مريم اتنهدت.

_ يعني مفيش حل.

فكر شوية، وبعدها قال.

_ استني أنا أعرف واحدة شاطرة في التصميم ممكن أسألها.

مريم رفعت حاجبها.

_ واحدة؟

ضحك.

_ أيوه واحدة.

_ اسمها إيه.

_ ملك.

مريم ابتسمت فورًا.

_ ملك بتاعة المشروع.

سليم بص لها.

_ أيوه هي.

_ يا سلام.

_ يا بنتي في إيه.

_ مفيش كمل.

هز راسه وهو بيضحك، وبعدها طلع موبايله وبعت لملك رسالة.

_ مساء الخير يا ملك معلش هعطلك دقيقة أختي مريم عندها تصميم لركن في الجامعة ومحتاجة رأي حد فاهم ينفع تبصّي عليه لما تكوني فاضية.

بعد دقايق ملك ردت.

_ مساء النور يا سليم طبعًا ابعتهولي وأنا أشوفه.

سليم ابتسم وورّى مريم الرد.

_ أهو قالت ابعتي.

مريم بدأت تجمع الصور بسرعة.

_ طب استنى أصورلها كويس.

بعد شوية بعتوا الرسومات، وملك ردت برسالة صوتية بتشرح فيها إن فكرة توزيع الألوان حلوة، لكن الأفضل يقللوا عدد الدرجات عشان الركن ميطلعش مزدحم بصريًا.

مريم سمعت الرسالة مرتين، وبعدها بصت لسليم وهي مبتسمة.

_ دي بجد شاطرة أوي.

سليم هز راسه.

_ ما أنا قولتلك.

مريم أخدت الموبايل منه.

_ ممكن أرد عليها.

_ ردي.

سجلت رسالة صوتية بتشكر ملك، وبعدها فضلت تسألها عن تفاصيل بسيطة، وملك ردت عليها بلطف واقترحت عليها كمان طريقة بسيطة لترتيب اللوحات.

لما خلصوا، مريم رجعت الموبايل لسليم وهي مبسوطة.

_ البنت دي عسولة أوي.

سليم ابتسم.

_ آه هي لطيفة.

مريم بصتله شوية، وبعدها قالت.

_ طب ما تعزمها تيجي عندنا يوم.

ضحك.

_ يا مريم هي زميلتي في الشغل مش صاحبتك من ابتدائي.

_ طب ما هي بقت صاحبتي دلوقتي.

_ بسرعة كده.

_ آه عندك مانع.

سليم هز راسه وهو بيضحك.

_ لا يا ست الكل براحتك.

قام عشان يطلع أوضته، لكن مريم نادته.

_ سليم.

لف ناحيتها.

_ نعم.

_ هي ملك مرتبطة.

سليم وقف لحظة، وبعدها ابتسم.

_ لا على حد علمي.

مريم ضيقت عينيها.

_ وإنت عرفت منين.

ضحك وهو بيكمل طريقه.

_ تصبحـي على خير يا مريم.

_ استنى أنا لسه بسألك.

_ وأنا جالي صداع.

مريم فضلت تضحك وراه،و هو طلع أوضته وهو لسه مبتسم.

الحقيقة إن سليم مكنش قاصد يدخل ملك في تفاصيل حياته العائلية بالشكل ده لكنه كان مبسوط إن مريم ارتاحتلها وإن ملك وافقت تساعدها من غير ما تتردد.

ولما افتكر كلامها الصبح عن حازم وإنها مش عايزة ترتبط بيه، حس براحة صغيرة، لكنه مفضلش يفكر في سببها.

لسه كان شايف الموضوع إعجاب ببنت جميلة وشاطرة ومريحة في التعامل، ومكنش عايز يستعجل أي حاجة.

••••••••••••••••••••••••••••••••••••••••••••••••••

كنت واقفة في الدور التاني براجع تشطيبات إحدى الغرف لما سمعت صوت عالي جاي من الممر فخرجت أشوف فيه إيه، ولقيت واحد من العمال واقف قدام مشرف التنفيذ، والاتنين بيتكلموا بعصبية.

_ يا باشمهندس والله أنا عملت اللي اتقاللي.

المشرف رد عليه بصوت عالي.

_ وإنت فاكر إن كل مرة هنصلح الغلط على حساب الشركة.

قربت منهم وأنا مستغربة.

_ في إيه يا جماعة.

المشرف بصلي.

_ العامل ركب جزء من التكسية في المكان الغلط وده هيحتاج نفكه ونعمله من أول وجديد.

بصيت للمكان، وكان فعلًا فيه جزء مترّكب بشكل مختلف عن الرسم اللي معايا.

سألت العامل.

_ إنت اشتغلت على أنهي نسخة.

الراجل طلع من جيبه ورقة متطبقه وفتحها قدامي.

_ دي اللي المشرف اداهالي الصبح يا بشمهندسة.

أخدت الورقة وبصيت فيها، ولقيت إنها نسخة قديمة قبل آخر تعديل اتوافق عليه.

رفعت عيني للمشرف.

_ دي نسخة قديمة.

اتضايق.

_ هو كان المفروض يتأكد.

بصيتله باستغراب.

_ يتأكد من إيه وهو استلم الرسمة من حضرتك.

العامل هز راسه بسرعة.

_ أيوه والله.

المشرف بدأ يتكلم تاني، لكن زين كان وصل بعد ما سمع الصوت، وسأل بهدوء.

_ إيه المشكلة.

شرحتله اللي حصل ووريته الورقة، فراجع تاريخ النسخة وبص للمشرف.

_ مين اللي سلم العامل الرسمة دي.

المشرف اتردد لحظة.

_ أنا يا باشمهندس بس كان المفروض يراجع.

زين بصله بجدية.

_ يراجعها مع مين وهو شغال بتعليمات منك.

سكت المشرف.

_ النسخة المعتمدة موجودة على النظام من يومين ومفروض تتوزع على كل الفرق قبل بداية التنفيذ.

_ حاضر يا فندم.

_ طيب مين المسؤول عن إن ده محصلش.

المشرف نزل عينه.

_ أنا.

زين هز راسه.

_ يبقى مينفعش العامل يتحمل الغلط لوحده.

بص للعامل.

_ إنت هتكمل شغلك عادي ومفيش خصم على الخطأ ده طالما نفذت الرسمة اللي اتسلمتهالك.

الراجل ابتسم براحة واضحة.

_ ربنا يخليك يا باشمهندس.

زين كمل كلامه مع المشرف، وطلب منه يتأكد إن كل الفرق معاها النسخ الأخيرة وإن أي تغيير يتسجل ويتبلغ رسميًا قبل التنفيذ.

بعد ما الناس مشيت، فضلت واقفة جنب زين وأنا ببص للمكان اللي اتنفذ غلط.

_ بصراحة كويس إنك جيت.

بصلي.

_ ليه.

_ عشان الراجل كان هيتخصم منه وهو مش غلطان.

زين هز راسه.

_ الغلط له صاحبه يا ملك ومش معنى إن العامل أضعف واحد في المكان إننا نحمله كل حاجة.

بصيتله شوية، وبعدها ابتسمت.

_ اممم كلام محترم.

رفع حاجبه.

_ شكرًا.

ضحكت.

_ لا بجد أنا بحب الناس اللي بتفكر بالطريقة دي.

_ دي مش حاجة زيادة دي المفروض تبقى الطبيعي.

هزيت راسي.

_ للأسف مش كل الناس بتعمل كده.

بدأنا نمشي ناحية الأسانسير وبعد شوية قلتله.

_ بس فيه حاجة غريبة.

بصلي.

_ إيه.

_ إنت بتتعامل مع العمال بصبر أكتر من اللي بتتعامل بيه معايا.

وقف وبصلي باستغراب.

_ أنا.

_ أيوه.

ضحك.

_ إنتي لسه ماسكة في أول يوم.

_ لا أنا بتكلم بشكل عام.

_ طب ما إنتي ساعات بتستفزيني.

فتحت عيني باستنكار مصطنع.

_ أنا!

_ أيوه.

_ يا بشمهندس زين أنا إنسانة مسالمة جدًا.

ضحك بصوت عالي.

_ ماهو واضح.

_ اه والله.

_ ماشي يا ملك.

دخلنا الأسانسير وإحنا بنضحك وبعدها نزلنا الدور الأرضي.

وأنا راجعة مكتبي، افتكرت كلامه عن العامل، وحسيت إن فيه شبه بينه وبين الصورة اللي سليم دايمًا بيحكيهالي عنه.

زين كان ممكن يبقى حاد وعصبي، لكن لما الموضوع يخص حق حد أو ظلم واقع على شخص أضعف منه، كان بيتغير تمامًا.

ودي كانت حاجة بحترمها فعلًا.

•••••••••••••••••••••••••••••••••••••••••••••••••••

بعد حوالي أسبوع، كان سليم قاعد مع ملك في غرفة الاجتماعات الصغيرة بيساعدها تراجع بعض تفاصيل الخامات، وفي نفس الوقت كانت مريم باعتة له صور التصميم النهائي لركن الجامعة.

فتح الصور وورها لملك.

_ بصي الست مريم عملت إيه.

ملك ابتسمت وهي بتقرب الموبايل.

_ الله حلو أوي.

_ ده من توجيهات حضرتك.

ضحكت.

_ لا هي أصلًا فكرتها كانت حلوة بس محتاجة تنظيم.

سليم ابتسم.

_ دي مبسوطة جدًا وفضلت تقولي أشكر ملك تاني.

_ ربنا يخليها ليك ابقى قولها إني مستنية أشوف صور الركن يوم الفعالية.

_ حاضر.

في اللحظة دي موبايل ملك نور برسالة من حازم، فبصت للشاشة واتنهدت بضيق قبل ما تقفلها.

سليم لاحظ تغير ملامحها، لكنه مكلمهاش على طول وفضل يراجع الملف لحد ما هي بنفسها قالت.

_ هو الناس ليه ساعات مبتفهمش كلمة لا.

رفع عينه.

_ مين زعلك بس.

ضحكت وهي بتحط الموبايل بعيد.

_ حازم.

سليم سكت لحظة.

_ ابن شريك باباكي صح.

_ أيوه.

_ لسه بيحاول يقنعك تخرجوا.

هزت راسها.

_ أنا مش مضايقة إنه بيطلب أنا مضايقة إني بقوله إني مش عايزة ارتباط ومشغولة في شغلي وبرضو بيرجع يفتح نفس الموضوع.

سليم قفل الملف وبصلها.

_ طب يمكن هو فاكر إنك مشغولة بس مش رافضاه كشخص.

ملك اتنهدت.

_ ما أنا قولتله بوضوح إن الموضوع مش في دماغي.

_ طب ما يبقى لازم يحترم ده.

هزت راسها.

_ بالظبط.

فضلوا يتكلموا شوية، وبعدها رجعوا للشغل، ولما ملك قامت عشان تلحق اجتماعها، سليم وقف يفتح لها الباب.

_ متخليش الموضوع يعكنن عليكي ها.

ابتسمت.

_ بحاول والله.

_ ولو حد ضايقك قوليلي أروح أعمله محاضرة عن احترام قرارات الآخرين.

ضحكت.

_ لا كفاية محاضراتك ليا.

ضحك وهو بيشاورلها تمشي.

_ ماشي يا بشمهندسة.

بعد ما خرجت، رجع سليم قعد مكانه وبص للموبايل اللي كان على الترابيزة.

مكنش مستغرب إن حد زي حازم يكون معجب بملك بالعكس، هو نفسه بدأ يحس إنها مختلفة عن بنات كتير اتعامل معاهم قبل كده.

لكن اللي لفت نظره فعلًا إنه ارتاح لما عرف إنها مش مهتمة بحازم، وإن محاولاته لسه ملهاش نتيجة.

فضل ساكت شوية، وبعدها ابتسم لنفسه وهز راسه قبل ما يرجع يفتح اللابتوب.

الإعجاب اللي كان بيعتبره حاجة بسيطة بدأ ياخد مساحة أكبر في تفكيره، حتى لو لسه مش مستعد يسميه بأي اسم تاني.

•••••••••••••••••••••••••••••••••••••••••••••••••••

كنت في الشركة براجع عروض أسعار جديدة، لما سليم دخل عليا وهو ماسك موبايله ووشه متغير.

بصيتله.

_ خير.

_ المورد اللي كنا هنروحله النهارده بيقول إن العينات الجديدة وصلت ومحتاج حد يراجعها قبل ما تتنقل الموقع.

بصيت في الساعة.

_ طب ما احنا كنا متفقين على بكرة.

_ هو بيقول إن الشحنة هتتحرك بدري وعايز اعتماد مبدئي النهارده لو أمكن.

_ طيب وملك.

_ كلمتها وهي جاهزة تروح.

هزيت راسي.

_ تمام نتحرك بعد نص ساعة.

سليم اتردد لحظة، وبعدها قال.

_ أنا عندي مشكلة في مشروع التجمع ومضطر أروح هناك.

بصيتله.

_ طب أنا مين هيروح معايا.

ابتسم.

_ ملك.

رفعت حاجبي.

_ ما أنا عارف إن ملك هتيجي بس إنت مش جاي؟

_ لا للأسف.

اتنهدت.

_ ماشي روح إنت وأنا هروح معاها.

سليم ابتسم وهو بيتحرك ناحية الباب.

_ ربنا معاكوا.

بصيتله.

_ إيه النبرة دي.

ضحك.

_ مفيش يا عم قصدي ربنا يوفقكوا في اختيار الخامات.

_ غور يا سليم.

ضحك وخرج.

بعد حوالي نص ساعة ملك وصلت الشركة، وكانت شايلة شنطة كبيرة فيها عينات ورسومات، وأول ما دخلت مكتبي وقفت عند الباب.

_ جاهز يا بشمهندس.

قومت وأنا باخد مفاتيح العربية.

_ أيوه يلا.

نزلنا الباركينج وركبنا، وبدأنا نتحرك ناحية معرض المورد اللي كان على بعد حوالي أربعين دقيقة.

في الأول كنا بنتكلم عن العينات المطلوبة والمواصفات، وبعد شوية الطريق زحم بشكل مستفز، وفضلنا واقفين عند إشارة واحدة أكتر من عشر دقايق.

ملك بصت قدامها واتنهدت.

_ هو إحنا هنبات هنا ولا ايه.

ضحكت.

_ غالبًا.

_ طب ما نرجع ونقول للمورد يبعت الصور.

_ الصور مش هتبين الملمس الحقيقي ولا درجة اللون صح.

بصتلي وابتسمت.

_ الله إنت بقيت بتتكلم زيي.

_ لا أنا كنت بقول الكلام ده قبل ما أعرفك أصلًا.

ضحكت وهي بترجع تبص للطريق.

_ ماشي يا بشمهندس.

بعد شوية شغلت الراديو، وكان فيه أغنية قديمة فملك ابتسمت أول ما سمعتها.

_ أوه أنا بحب الأغنية دي.

بصيتلها.

_ بجد.

_ اه جدًا.

_ غريبة.

لفت ناحيتي.

_ إيه الغريب.

_ يعني الذوق ده مش لايق عليكي.

ضحكت.

_ هو حضرتك بتحدد أذواق الناس من شكلهم.

_ اه أحيانًا.

_ طب توقع تاني.

فكرت شوية وأنا بسوق.

_ اممم أنا حاسك بتحبي السفر.

_ صح.

_ وبتحبي البحر أكتر من الجبل.

ابتسمت.

_ صح برضو.

_ وبتكرهي الصحيان بدري.

ضحكت بصوت عالي.

_ دي مش محتاجة ذكاء يعني.

ضحكت أنا كمان.

_ طب وإنتي توقعي عني.

بصتلي شوية وهي بتفكر.

_ بتحب القهوة السادة.

_ صح.

_ مبتحبش الزحمة.

_ صح.

_ بتكره المفاجآت.

ابتسمت.

_ على حسب المفاجأة.

_ وبتحب كل حاجة تبقى ماشية زي ما إنت مخطط لها.

بصيتلها للحظة قبل ما أرجع أبص للطريق.

_ دي صح جدًا.

ضحكت.

_ والله كنت عارفة.

_ طب عندك توقعات تانية.

فكرت شوية، وبعدها قالت.

_ إنت من الناس اللي بتبقى لطيفة جدًا مع اللي بتحبهم بس مش بتعرف تبين ده بسهولة.

بصيتلها باستغراب، وهي كملت بسرعة.

_ قصدي أهلك وصحابك يعني.

ابتسمت ابتسامة خفيفة.

_ اه…يمكن.

سكتنا لحظة، وبعدها غيرت الموضوع وسألتها عن الأماكن اللي بتحب تسافرلها، وفضلنا نتكلم لحد ما وصلنا المعرض.

أول ما دخلنا، موظف المبيعات استقبلنا وبدأ يورينا العينات الجديدة، وملك كانت مركزة جدًا في التفاصيل، من أول ملمس الخامة لحد طريقة تركيبها وتنظيفها.

في نص المعاينة، وقفت قدام لوحة كبيرة فيها خامة مختلفة عن اللي كنا جايين نراجعها، وفضلت تبص لها وهي مبتسمة.

قربت منها.

_ إيه.

بصتلي.

_ بص دي.

بصيت للخامة.

_ اه حلوة.

_ حلوة أوي بس مش مناسبة للمشروع الحالي.

_ ليه.

_ عشان ألوانها دافية أكتر من الهوية اللي ماشيين عليها.

هزيت راسي، وهي فضلت تبص لها شوية، وبعدها رجعتها مكانها.

_ بس ممكن أستخدمها في مشروع تاني.

ابتسمت.

_ إنتي بتحبي شغلك بجد.

بصتلي باستغراب بسيط.

_ أوي.

_ باين عليكي.

ضحكت.

_ أنا ممكن أقعد بالساعات أتفرج على عينات وخامات ومزهقش.

_ اه ما أنا لاحظت.

_ هو ده عيب.

_ لا بالعكس.

فضلنا نراجع العينات، ولما وصلنا لخامة خاصة بمنطقة انتظار الزوار، افتكرت اقتراح كانت قالته في اجتماع من كام أسبوع.

طلبت من الموظف يجيب درجة معينة من اللون، ولما جابها حطيتها جنب العينة الأساسية.

ملك بصت للاتنين، وبعدها رفعت عيني ليا.

_ استنى كده.

ابتسمت.

_ إيه.

_ دي نفس الدرجة اللي كنت بتكلم عنها في الاجتماع القديم.

هزيت راسي.

_ أيوه.

_ إنت فاكر.

_ ما إنتي قعدتي تقنعيني بيها نص ساعة.

ضحكت.

_ يا سلام يعني فاكر عشان كنت بصدعك.

_ فاكر عشان كانت مناسبة بس مكنش عندنا عينة فعلية وقتها.

رجعت تبص للعينتين، وبعد شوية ابتسمت ابتسامة واسعة.

_ لا بصراحة دي ممتازة.

_ يبقى نطلب عينة أكبر ونراجعها في الموقع.

هزت راسها بحماس.

_ خلاص ماشي.

كملنا شغلنا، وبعد ما خلصنا خرجنا من المعرض، وكانت الساعة قربت ستة.

ملك كانت بتقلب في الصور اللي صورتها للعينات، وأنا فتحت العربية واستنيتها تركب.

أول ما قعدت قالت.

_ على فكرة أنا مبسوطة إننا جينا النهارده.

بصيتلها وأنا بدور العربية.

_ عشان الخامات.

_ أيوه وعشان لقيت اختيارات أحسن من اللي كنت متوقعاها.

ابتسمت.

_ طب كويس.

بعد شوية الطريق زحم تاني، وملك كانت بتبعت الصور للمكتب، ولما خلصت بصتلي.

_ على فكره إنت وسليم مختلفين أوي عن بعض.

ضحكت.

_ ملاحظة جديدة دي.

_ لا بجد.

_ إزاي يعني.

_ سليم اجتماعي وبيحب الكلام والهزار وإنت هادي أكتر.

ابتسمت.

_ سليم لو قعد ساكت عشر دقايق ورا بعض بنقلق عليه.

ضحكت.

_ والله.

_ أيوه.

_ بس واضح إنكم قريبين من بعض جدًا.

هزيت راسي.

_ هو أخويا مش مجرد صاحبي.

سكتت لحظة، وبعدها قالت بابتسامة.

_ ربنا يخليكوا لبعض.

بصيتلها بسرعة وبعدها رجعت للطريق.

_ آمين.

كملنا مشوارنا في كلام خفيف، ولما وصلنا الشركة كانت عربيتها موجودة في الباركينج، فنزلت وهي شايلة الشنطة.

وقفت جنبها وسألتني.

_ هتبعت للمشتريات النهارده.

_ آه هبعتلهم ملخص بالعينات اللي اخترناها.

_ طب أنا هبعتلك الصور والكودات دلوقتي.

_ تمام.

ابتسمت.

_ شكرًا على المشوار يا زين.

بصيتلها وانا بضحك.

_ الله الله بقينا بنقول زين كده من غير القاب.

_ خلاص يا بشمهندس.

_ لا لا زين احلى بلاش رسميات.

ضحكت.

_ خلاص اتفقنا.

فتحت عربيتها، وقبل ما تركب لفت ناحيتي.

_ على فكرة إنت طلعت بتعرف تتكلم في العربية من غير ما يبقى معاك رسومات.

ضحكت.

_ وإنتي طلعتي بتعرفي تسكتي خمس دقايق لما تركزي في الموبايل.

فتحت عيني باستنكار مصطنع.

_ يا سلام.

ضحكت وهي كمان، وبعدها ركبت ومشيت.

وقفت لحظة أراجع رسالة من سليم قبل ما أركب عربيتي، وبعدها اتحركت للبيت.

المشوار كان عادي جدًا، مجرد شغل ومراجعة خامات، لكن لاحظت إن التعامل مع ملك بقى أسهل بكتير من الأول، وإننا بقينا نعرف نختلف ونضحك ونتكلم من غير توتر.

وده كان تطور كويس بالنسبة للشغل.

على الأقل ده اللي كنت شايفه وقتها.

••••••••••••••••••••••••••••••••••••••••••••••••••••

بعد مرور حوالي أسبوعين كان عندنا مناسبة عائلية تانية والمرة دي بابا كان مصر إني أحضر من بدري فوافقت عشان منفضلش نتخانق م.

المناسبة كانت في بيت شريف وكان فيه ناس كتير من معارفهم وشركائهم، وأنا معظم الوقت كنت قاعدة مع ماما وبعض قرايبنا.

حازم كان موجود، ومن أول ما وصلت وهو بيحاول يقعد جنبي أو يفتح معايا كلام، وأنا كنت برد عليه بشكل طبيعي من غير ما أدي أي إشارات غلط.

بعد العشا، كنت واقفة في الجنينة بكلم ليلى على الواتساب، ولقيته قرب مني وهو ماسك كوباية عصير.

_ إنتي هربانة من الناس ولا إيه.

رفعت عيني وابتسمت.

_ لا بس الجو هنا أحسن.

وقف جنبي وبص قدامه.

_ فعلًا.

سكتنا شوية، وبعدها قال.

_ ملك أنا عايز أتكلم معاكي في حاجة.

قفلت الموبايل وبصيتله.

_ اتفضل.

_ أنا حاسس إنك بتتجنبيني الفترة الأخيرة.

اتنهدت بهدوء.

_ لا يا حازم مش بتجنبك بس أنا فعلًا مشغولة.

_ طب ليه كل ما أقولك نخرج تعتذري.

بصيتله بجدية.

_ عشان أنا مش عايزة أخرج معاك بالطريقة اللي إنت تقصدها.

سكت لحظة.

_ وإنتي عرفتي أنا أقصد إيه.

_ حازم إحنا كبار ومش محتاجين نلف وندور على بعض.

ابتسم ابتسامة صغيرة، لكنها اختفت بسرعة.

_ طيب ما يمكن أنا عايز فرصة نتعرف فيها على بعض أكتر.

_ إحنا عارفين بعض من سنين.

_ بس دي معرفة عائلية مش أكتر.

هزيت راسي.

_ فاهمة بس أنا مش حاسة إني عايزة أخد خطوة تانية.

حازم بص بعيد شوية، وبعدها رجع بصلي.

_ عشان فيه حد تاني.

استغربت.

_ لا.

_ طب إيه السبب.

_ مفيش سبب محدد يا حازم ومش لازم يبقى فيه حد تاني عشان أكون مش عايزة أرتبط.

سكت شوية، وبعدها قال.

_ أنا بس شايف إننا مناسبين لبعض.

ابتسمت بهدوء.

_ يمكن إنت شايف كده بس أنا مش شايفة الموضوع بنفس الطريقة.

حازم أخد نفس طويل.

_ تمام.

_ أتمنى متزعلش مني.

هز راسه.

_ لا يا ملك مفيش زعل.

حاول يبتسم، وبعدها استأذن ورجع جوه البيت، وأنا فضلت واقفة شوية قبل ما أرجع للناس.

كنت عارفة إن الكلام ممكن يضايقه، لكن كان لازم أبقى واضحة خصوصًا إني بدأت أحس إن محاولاته بتزيد بدل ما تقل.

لما رجعنا البيت، بابا طلب مني أقعد معاه شوية في الصالون، وماما دخلت المطبخ تعمل شاي.

قعدت قدامه وأنا متوقعة الموضوع اللي هنتكلم فيه.

_ حازم كان بيقولك إيه النهارده.

بصيتله.

_ كنا بنتكلم.

_ في موضوع ارتباطكم.

هزيت راسي.

_ أيوه.

_ وإنتي قولتيله إيه.

_ قولتله إني مش بفكر في ارتباط ومش شايفة إننا مناسبين لبعض.

بابا اتنهد.

_ يا ملك حازم شاب محترم ومن عيلة كويسة وناجح في شغله.

_ وأنا مقولتش غير كده يا بابا.

_ طب إيه اللي مش عاجبك فيه.

_ ماهو مش لازم يكون فيه عيب عشان محبهوش.

بصلي شوية.

_ إنتي أصلًا مش مدياه فرصة.

_ يا بابا هو مش امتحان لازم أديله فرصة عشان أشوف هينجح ولا لأ.

بابا كان هيبتسم، لكنه مسك نفسه.

_ إنتي بتاخدي الكلام بهزار.

_ لا والله بتكلم جد.

سكت لحظة، وبعدها قلتله بهدوء.

_ أنا بحترم حازم جدًا بس مش حاسة ناحيته بحاجة وإنت أكتر واحد المفروض يكون عايزني أتجوز حد أنا مقتنعة بيه.

بابا بصلي شوية، وبعدها اتنهد.

_ طبعًا يا بنتي.

_ خلاص يبقى متضغطش عليا.

_ أنا مش بضغط عليكي بس كنت شايف إنه مناسب.

ابتسمت.

_ عارفة يا بابا.

قربت منه وبوسته، وبعدها قومت أطلع أوضتي.

مكنتش عايزة الموضوع يتحول لخناقة، وكنت مبسوطة إننا قدرنا نتكلم بهدوء للمرة دي.

لكن وأنا طالعة السلم، افتكرت كلام حازم لما سألني إذا كان فيه حد تاني.

ضحكت لنفسي من غير ما أحس.

حد تاني إيه بس.

أنا أصلًا مش لاقية وقت أنام.

••••••••••••••••••••••••••••••••••••••••••••••••••••

في مكتب زين كان سليم قاعد على الكنبة وبيشرب قهوته وزين واقف قدام السبورة اللي عليها جدول التنفيذ، وبيشرحله ملاحظات الاستشاري الأخيرة.

_ يعني لو خلصنا المرحلة دي قبل يوم عشرين هنقدر ندخل فريق التشطيبات على الدور اللي بعده.

سليم هز راسه.

_ تمام بس لازم نتأكد إن التمديدات اتراجعت كلها.

_ أنا طلبت التقرير.

سليم بص في ساعته.

_ طيب أنا هكلم مهندس الموقع وأتأكد.

قام من مكانه، لكن زين ناداه.

_ سليم.

لف.

_ نعم.

_ إنت مالك اليومين دول.

ضحك.

_ مالي إيه.

_ مبسوط زيادة عن اللزوم.

سليم رجع قعد.

_ هو أنا ممنوع أبقى مبسوط يعني.

زين ابتسم.

_ لا ياعم وبعدين إنت كل شوية بتجيب سيرة ملك.

سليم رفع حاجبه.

_ ملك.

_ أيوه.

ضحك.

_ يا عم دي شغالة معانا طبيعي أجيب سيرتها.

زين قعد قدامه.

_ ماشي أنا بهزر معاك بس.

سليم فضل ساكت لحظة، وبعدها ابتسم.

_ بس بصراحة هي لفتت نظري.

زين رفع عينه له.

_ بجد.

_ أيوه بس متكبرش الموضوع.

ضحك زين.

_ لا ده أنا لازم أكبره.

سليم هز راسه وهو بيضحك.

_ يا زين!

_ طب قول.

_ ياعم هو إعجاب بسيط كده بس.

_ عاجباك يعني.

سليم ابتسم.

_ هي بنت جميلة وشاطرة ودمها خفيف ومريحة في التعامل.

زين ضحك.

_ كل ده إعجاب بسيط.

_ أيوه إعجاب بسيط.

_ طب كويس.

سليم بصله.

_ إنت شايف إيه.

زين فكر لحظة قبل ما يرد.

_ شايف إنها بنت محترمة فعلًا وشاطرة في شغلها.

سليم ابتسم.

_ طيب ماأهو.

زين كمل وهو بيضحك.

_ بس خلي بالك دي لو اتخانقت معاك هتطلع عينك.

سليم ضحك بصوت عالي.

_ ما هو إنت اللي بتعرف تتخانق معاها مش أنا.

_ يعني شايف المشكلة فيا.

_ بصراحة آه.

زين رمى عليه قلم كان في إيده، فسليم مسكه وهو بيضحك.

_ يا عم بهزر.

فضلوا يضحكوا شوية، وبعدها رجعوا يتكلموا في الشغل بشكل طبيعي.

زين مكانش شايف في كلام سليم أي حاجة تستدعي القلق، بالعكس، كان عارف صاحبه كويس، وعارف إنه ممكن يعجب ببنت ويقول ده بمنتهى البساطة من غير ما يكون فيه ارتباط أو مشاعر كبيرة.

أما سليم، فكان مرتاح إنه قال جزءًا من اللي حاسس بيه، حتى لو لسه مش مستعد يعمل أي خطوة.

••••••••••••••••••••••••••••••••••••••••••••••••••••

مع بداية الأسبوع الأخير من الشهر، كنا دخلنا مرحلة جديدة في المشروع، وبدأنا نراجع بعض المناطق اللي لسه فيها شغل فني وتجهيزات قبل التشطيبات النهائية.

اليوم ده كنت مع زين وسليم ومهندس السلامة ومسؤول التنفيذ في جولة طويلة وكنا بنراجع الممرات الخدمية وبعض الغرف اللي لسه مقفولة على فرق العمل.

وصلنا لممر جانبي في أحد الأدوار، وكان فيه باب خدمة تقيل شوية، ولما حاول العامل يفتحه احتاج يزقه مرتين قبل ما يتحرك.

بصيت للباب.

_ هو الباب ده طبيعي يبقى كده.

مهندس التنفيذ قرب منه.

_ هو محتاج يتظبط شوية.

زين بصله.

_ محتاج يتظبط يعني إيه.

_ المفصلة العلوية فيها مشكلة بسيطة.

سليم جرب يفتح الباب وقفله، ولاحظ إن اللسان مش بيرجع بسهولة.

_ لا ده محتاج صيانة فعلًا.

بصيت جوه الممر، ولقيت الإضاءة المؤقتة فيه بتفصل لحظة وترجع تاني.

_ وكمان النور هنا مش ثابت.

مهندس السلامة دخل يبص، وبعدها قال.

_ هنقفل المنطقة دي لحد ما الصيانة تراجع الباب والكهرباء.

زين هز راسه بجدية.

_ تمام ومحدش يدخلها غير بتصريح وبعد ما نتأكد إن الوضع آمن.

مسؤول التنفيذ بدأ يكتب الملاحظات، وأنا سألت عن موعد الإصلاح عشان المنطقة دي كان مطلوب مني أراجع بعض التشطيبات فيها بعدين.

_ المفروض خلال يومين.

بصيتله.

_ طيب ابعتولي تأكيد لما تخلصوا عشان أحدد المعاينة.

هز راسه.

_ حاضر.

كملنا الجولة وبعدها رجعنا للمكاتب، وكان عندي شغل كتير ففضلت قاعدة لحد بعد المغرب.

وأنا خارجة لقيت سليم واقف عند المدخل بيتكلم في الموبايل، ولما شافني قفل المكالمة وقرب.

_ خلصتي.

_ اه أخيرًا.

ضحك.

_ طب تعالى نطلع قبل ما زين يلاقينا ويقول عندنا اجتماع.

ضحكت.

_ لا أنا المرة دي همشي حتى لو عنده اجتماع مع رئيس الجمهورية.

سليم ضحك بصوت عالي، وفي اللحظة دي زين خرج من الباب اللي ورانا وسمع آخر جملة.

_ مين اللي عنده اجتماع مع رئيس الجمهورية.

اتخضيت ولفيت بسرعة، وسليم كان خلاص مش قادر يبطل ضحك.

بصيت لزين وأنا بحاول أمسك نفسي.

_ مفيش يا بشمهندس.

رفع حاجبه.

_ لا واضح إن فيه.

سليم تدخل وهو بيضحك.

_ ملك بتقول إنها تعبت وعايزة تروح.

زين بصلي.

_ طب ما تروحي محدش ماسكك.

فتحت إيدي باستغراب.

_ سليم اللي بيحرضني.

سليم بصلي مصدوم.

_ أنا.

ضحكت.

_ أيوه إنت.

زين هز راسه.

_ واضح إنكم محتاجين إجازة طويلة.

سليم رد بسرعة.

_ والله عندك حق.

مشينا احنا التلاتة ناحية الباركينج، وفضلنا نهزر على ضغط الشغل والمواعيد اللي مش بتخلص، ولأول مرة حسيت إننا بقينا فريق فعلًا مش مجرد ناس مضطرة تتعامل مع بعض.

لما وصلنا عند العربيات، سليم افتكر إنه ناسي ملف في المكتب، فاستأذن ورجع يجيبه، وأنا فضلت واقفة جنب عربيتي مع زين.

كان الجو هادي شوية بعد زحمة اليوم، وزين كان بيبص في موبايله على رسالة وصلتله من مسؤول التنفيذ.

بعد ما خلص بصلي.

_ على فكرة تقرير السلامة بتاع المنطقة اللي شفناها النهارده اتسجل.

هزيت راسي.

_ طيب كويس.

_ بس لسه مستنيين المقاول المسؤول عن صيانة الباب يحدد المعاد.

_ يعني المعاينة هتتأجل.

_ لحد ما المنطقة تتسلم بشكل آمن أيوه.

بصيتله وأنا مبتسمة.

_ حضرتك بقيت بتقرأ أفكاري ولا إيه.

رفع عينه باستغراب.

_ ليه.

_ عشان كنت لسه هسألك عن المعاينة.

ابتسم.

_ لا أنا بس عارف إنك هتفضلي تسألي عنها كل يوم لحد ما تتعمل.

ضحكت.

_ طب ما أنا شغلي كده.

_ وأنا مقولتش حاجة.

سكتنا شوية، وبعدها بصيتله.

_ تعرف إن المشروع ده بدأ يبقى ألطف من الأول.

ابتسم.

_ عشان المشاكل قلت.

هزيت راسي.

_ آه وعشان الناس بدأت تفهم بعض.

بصلي لحظة، وبعدها قال.

_ ده طبيعي بعد فترة شغل مع بعض.

_ اممم.

فضلنا ساكتين ثواني، كنت واقفة ببص على العربيات اللي بتخرج من الباركينج، وزين كان واقف جنبي بهدوء، لحد ما سمعنا صوت سليم جاي من بعيد.

_ انا جيييت.

لفيت وضحكت.

_ كنا لسه هنمشي.

سليم حط إيده على صدره.

_ يا خاينين.

زين ضحك.

_ جيبت الملف.

_ أيوه.

_ طب يلا يلا طرقنا.

سليم بصلي.

_ شايفة المعاملة.

ضحكت.

_ استحمل بقى ده صاحبك.

_ للأسف.

زين ضربه بخفة على كتفه وهو بيضحك، وبعدها كل واحد فينا راح ناحية عربيته.

وأنا بركب، لقيت سليم بيشاورلي من بعيد.

_ متتأخريش بكرة يا ملك.

ضحكت وفتحت الشباك.

_ حاضر يا أستاذ سليم.

زين كان واقف جنب عربيته وسمعنا، فقال وهو مبتسم.

_ ومتنسيش الرسومات.

بصيتله باستنكار.

_ إنتوا الاتنين اتفقتوا عليا ولا ايه.

سليم ضحك.

_ اه.

هزيت راسي وأنا بضحك، وبعدها ودعتهم ومشيت.

في الطريق كنت بفكر في اليوم كله، من أول المعاينات لحد الهزار اللي حصل في الآخر، وحسيت إن الوقت فعلًا بيغير حاجات كتير من غير ما الواحد ياخد باله.

من كام شهر، كنت ممكن أضايق لمجرد إني داخلة اجتماع مع زين، ودلوقتي بقينا نعرف نشتغل ونتناقش ونهزر من غير أي توتر.

وسليم كان بقى من أكتر الناس اللي برتاح في الكلام معاهم، يمكن عشان دايمًا بيخليني أحس إن الدنيا أبسط من اللي أنا شايفاها.

مكنتش بفكر في أي حاجة أكبر من كده، ولا كان عندي وقت أصلًا أفكر.

كل اللي كنت عارفاه إن الشغل اللي كنت خايفة منه في البداية بقى جزءًا مهمًا من يومي، وإن الناس اللي قابلتهم فيه بقوا مألوفين لدرجة إني ساعات بحس إني أعرفهم من زمان.

لكن كان فيه حاجات تانية لسه متحلتش.

الخلاف القديم بين بابا وعيلة السيوفي، وموضوع شريف، والرسالة اللي وصلتلي من رقم غريب، كلها كانت موجودة في الخلفية، حتى لو انشغلت عنها شوية.

وأنا واقفة عند إشارة في الطريق، لقيت ماما باعتالي رسالة بتسألني هتأخر ولا لأ، فرديت عليها إني قربت أوصل.

بعدها فتحت جروب المشروع أشوف آخر تحديث، ولقيت مسؤول التنفيذ كاتب إن صيانة باب الخدمة هتتأجل لحد وصول قطعة غيار، وإن المنطقة هتفضل مقفولة لحين الإصلاح.

قرأت الرسالة بسرعة وقفلت الموبايل بعد ما الإشارة فتحت.

مكنتش متخيلة إن الملاحظة الصغيرة اللي سجلناها في جولة عادية ممكن ترجع تشغل بالنا تاني بعد أيام.

ولا كنت أعرف إن الفترة اللي جاية هتخليني أشوف ناس اتعودت على وجودهم بشكل مختلف تمامًا.


شكرا لزيارتكم عالم روايات سكيرهوم

تعليقات