رواية خلخال مشوه الفصل الرابع والستون 64 بقلم زمرده

انا الما شوف غيرك وسط هاي الناس

چن مخلوق بس أنت بالكوكب

°غايـة°

من نامت الا كدرت انام والظهرية گعدتني عمة حتى اغسل السمج جايبه فقار يردون يشوونه ويتغدون هناك

ساعة ورد اخذه چنت مخلصته وياه كلشي يحتاجوه

ما ردوا غير المغرب و وي ردتهم صارت هوسة غريبة بقريتنة ومن طب عون وسألته گال

عون : هذا جدو الذباح

أبتسمت ودنگت گباله

_ اسمه الرباح مو الرباح

عون : مو حلو اسمه

جريت خدوده وبسته منهن حط ايده عليهن ضايج ورد طلع ،وما لفه احد من الولد الا ورا اكثر من ساعتين ومن سألنه عن سبب جيته گال عمي باقر

باقر : يردون يردون عطاء يدرون يعقدون الابنها وما يرضى إلا هي موجودة

نجوى : الله يهديها كون ترد لخاطره طولت زعلتها هل مرة لاسنة ولا سنتين

باقر : محمد گال يحجايها وبعد الله كريم، انا ما اريدن اتدخل واخلي بخاطرها مني

نجوى : زين تسوي

°كوكبة°

گاعدة بحظرة الأمام العباس وبحضني هاشم ،اباوع على الناس متانيه سكينة مشت تزور، من بين النسوان أبتسمت من شفتها ،بأبتسامتها الچانت الها حصه بتغيرري للافضل گالت

سكينة : ها تمشين تزورين ؟

كلتلها أي ومشيت ،بين هوسة النسوان طبيت وانا احس بروحي خفيفة صرت بس تقربت من الشباچ

ذبيت كل همي وثگلي ولوعة سنيني الگضن ورديت السكينة چني الحياة انبثت بي من جديد ،صلينه و ضلينه گاعدات نسولف وهاشم گبالنه يلعب بالسبحة

رفعت راسي على صوت بنية شابة تحاجينه، أبتسمت واطتني چگيلته وردت اطت السكينة وگالت بفرح مرسوم بملامحها

_ اطلبن مراد من الطلعلي نظر عيني من السچن وما خلاني منه محرومه

سألتها

_ ابوج ؟

_ لا رچلي ،عانينه هواي الا صرت اله وانا عرس انسچن وهسة بعد سنة اجاه افراج

كزبز جسمي وفرحتها حسيت بيها، صاحتها مره وياها سلمت علينه ومشت بساع

سكينة : اسمها كلش حلوة عجبني

_حتى انا اول مره اسمع بيه ،اذا تصير عدج بت سميها ميسره

أبتسمت وهزت رأسها ب أي ،بس خابر علينه سعد طلعنه، تلگانه اخذ هاشم من سكينة وگال

سعد : امشن ناكل متت من الجوع، هناه خوش مطعم صاحبي دلاني عليه

سكينة : انا راح اتخربط أصلا

أبتسم ومشى گبلنه واحنه وراه ،هاي الحياة المر من عمري هواي وانا اتمناها، استقرار وشخص واحد اسند روحي عليه بلايه ما اخافن من شي ،امشي بين الناس

وما مصدگه الحرية الانا بيها ،طبينا للمطعم طلبلنه اكل

وراه چاي نزلولنه، اباوع على سعد الدنيا كلها بكوم عده وهاشم بكوم ثاني ،يخوط ب استكان الجاي و يحجي وياه

وهذا يشمر روحه عليه، اضنها چانت احلى زيارة بحياتي بعد ايام ثگال على روحي وابد ما انسى شكد ساعدني

حتى اطلع من الانا بيه ودوم من اشوفن طبيتهم اتذكر

بسم الله الرحمن الرحيم

(والطيبون للطيبات) صدق الله العظيم

ثاني يوم گاعدين على الغدا واندگ الباب ،گام سعد يشوف منو وشوي وطب اسماعيل ،أبتسمت من شفته وگمت وانا اكله بعتاب

_ هم أجيت وحدك جا مو وصيتك تجيب داليا وياك

اسماعيل : شني صرت ما اعجب انا ؟

_ لا مو هيج بس مشتاقتلها

اسماعيل : باجر اجيبنها الج وعد

_ والله

اسماعيل : أي والله

صاحه سعد حتى ياكل ويانه، گعد يحجي يسأل على اوضاع مرتضى

سعد : راح يخيس بالسچن من افعاله

اسماعيل : واختك مصيرها شني ؟

سعد : ناوي ابدي بمعاملة طلاگهم

اضن چان احلى چم حجاية سمعتهن من الفرحة حسيت

روحي شبعت، گمت سويتلهم جاي بين ما يگضون

اكل وسواها صدگ ثاني يوم اخذتي للمحكمة حتى نبدي

بالاجرائات ،بالبداية اخذني سويت وكاله اله بعدها طبينا

للمحكمة نشوف محامي، گبالنه صار عزيز اعارفه رچل

غاية سلم على سعد وسأله شعدنه هنا بس حجاله گال

عزيز : انا اتكفل بكلشي اذا تردون

سعد : جا بعد احسن والله ،هم قريب علي بشني احتاج

عزيز : تدلل بالخدمة

اتفقوا على كل التفاصيل المطلوبة وردينا ،ويا ساعة تضارب المشاعر الصارت ساعة الگالي سعد ضل بس اتواجه وياه حتى يطلگ وانتظرنه ليوم محدد واخذني ومشينا ،ما رف گلبي ولو ذرة من شفت حاله بالظيم چان ،اذا اريد اوصل بأدق صوره "يرثى له"

باوعت بعيونه وانا على يقين الله ما ضيع حگي عده ابد وراح يگضي الضال من عمره بالسچن ما عيشني حاجاه عزيز حتى يطلگني ،عيونه شفت چانت تسولف رفضه بس ما گدر يحجي غير اليمين الچنت متانيته

مرتضى : أنت طالق طالق طالق

هنا جريت نفس متحرره الاخر ذره، أبتسمت وكضيت ايد سعد وبلايه مو احد بينه يحاجيه طلعنا ،فزيت من

چنت توني اريد اصعد للسيارة وسمعت صوت عزيز يحجي بالموبايل وذكر اسم ليث ،يعني الجاي يحجي وياه هو ...؟؟

اباوعلهم من الجامة سد الموبايل وتسالم وي سعد بعد ما تشكر منه على وگفته

عزيز : تدللون بالخدمة بالاخير احنه أهل

سعد : الله يسلمك ،فضلك و وگفتك ابد ما راح انساها

عزيز : الفضل لله

ترخص منه سعد واجه صعد بالسيارة بس حرك گال

سعد : نسوان اخوانج طابخات غده لوجه الله بمناسبة طلاگج

ابتمست

_ هاي وين صايرة

سعد : ما اعرف چن قانون جديد اخترعنه

وصدگ بس وصلنه لگيت اسماعيل وداليا عدنه ولا الاكبر چانت من تلگني بالچگليت ،ضحكت ودنگت شلت چگليته من الگاع

_ شني ترا تطلگت مو عرست

اجت بوستني

داليا : بالعافية وبالخير طلاگج أن شاء الله الزواج اليستاهلج

سكينة : امين ياااارب العالمين

ضحكت اباوعلها رافعة ايدها من كل گلبها تدعي المفروض

غيري تضوج بهذا اليوم بس لا چان يوم حلو عدي لازم

اعيش تفاصيله الحلوه واكل واضحك والاهم بقرار بدايتي

الجديده وجود أشخاص بحياتي چان بمثابة نعمة خلوني احس

بالعوض من صدگ وشكد مختلفة حياة البت اذا چانوا اهلها وياها وسانديها

°جفون°

نزلت من فوگ على صوت الصياح بالصالة ،صاح علي

نوح امشي على كيفي لان من استعجالي نسيت روحي ،وگفت بأستغراب بصف غمد سألتها شني صاير گالت

غمد :ليث يرد جدج يخطبله

_جا عليش ضايج جدج

غمد : يريد هاي البت الجابها

نشغت

_ كوكبة

غمد : أي هي

رديت اباوعلهم من جدي صاح على ليث الواگف گدامه ما راضي ومبين قافل كلش

رأجس : تحلم اخذهاا الك ،شناقصك أنت هااا زلمة شغل وشهادة وما معرس شناااقص حتى تاخذهااا

اباوعله قبض على ايده بقوة يهدي روحه وجاوبه مطيها لجدي من الاخير

ليث : غيررها ياجدي ما راح اخذ وحطها ببالك، انا سنين محرم حرمه غيرها علي تريدني من تالي هسة وبعد ذيج السنين ابدلها

شمر عليه السبحة

رأجس : لك لك شنييي من صلافه شايل أنت

ليث : مو صلافة وداعتك بس أنت ما متعلم احد يحاجيك هل تنرفزت مني

رأجس : من الاخير بت عمك ماتعقد ولا تصيرلك مره غيرها

كض شواربه يحلف

ليث : وحگ علي واطلع مو زلمة اذا رضيت بغير كواكب على ذمتي

خزره عمي محمد من بده يعله صوته وبالگوات گدر يضبط اعصابه ويرد يحجي بهدوء

ليث : انا الراح اتزوج مو أحد غير راضيه بيها بكلشي ما عليكم أنتم

رأجس : شلووون ما علينه ،شلووون وأنت تتمناك النساوين وتريد وحده مطلگه حتى وجها متشوه

ليث : انا راضي بيها مطلگه واذا على التشوه اخوها جاي يعالجها

رأجس : اها وأنت شمدريك

ليث : عزيز چان كاض سالفة طلاگها وگالي

صفگ ايد بأيد

رأجس : تشتغلووون من ورا ضهرري وانا يا غافل الك الله

نوح : هسة عليش تصيح جدي ،خله يتزوج بأختياره

صاح على نوح يسكت وابد ما تغير موقفه ولا گد ذره

محمد : يابة تراها بت يوسف ما تريد ليث خاف ما عدك علم

ليث : ولا انا رايدها عمنها مثلها مثل غاية

تنرفز جدي من حجايته وضل ما مفتهمها غير جانب هو مبدل بركة بغريبة مثل ما صيح هسة بصوت عالي

رأجس : لك تبدل بت عمك بالغريبةةةة

مسح وجهه بچف ايده واصل مرحله من التعب والعجز وي جدي

ليث : ما ترضى مو ؟

رأجس : تحلم، مو انا الاخلي الغريبة تصيرلك مره

واطانه الصدمة كلنه من گال

ليث : جا لا ترضى ،واحسبني مو حفيدك من اليوم لان عن شورك راح اطلع

صاح بيه عمي وجدي ضل فاك عيونه بصدمه يباوع ل ليث الگاله مو بس جدي ما متوقعة حتى احنه ضلينه واحد يباوع بوجه الثاني ،مسح وجهه واستغفر اكثر من مره گبل لا يرد يواجه جدي من جديد بعد ما سأله

رأجس : تطلع من شوري تريد ،لچل غريبة ما الها مچان بيناتنه ؟؟

ليث : الديره الما تلفيها ما اضلن بيها ،وچانكم ما تردوها معناها ما تردوني حتى انا

رأجس : تبيعنه لچلها ؟؟

ليث : ما بايعكم ،انا زلمة عشگت وموش مشكلتي اذا الرايدها خارج عن قوانينكم

رأجس : المختصر ليث ،المختصررر شتريد ؟؟؟

تنهد يباوع لجدي الچانت نضراته اله مليانات غضب

ليث : رايدها جدي ،وحگ الحسين ما رايد غيرها

رأجس : وبت عمك ؟

صفگ ايد بأيد لو بيده يدگ على رأسه

ليث : يا طلابة بت عمك الما تگضي

رأجس : شووو ما تصيح

ليث : من الاخير جدي غير بت ضاري ما تصيرلي مره

رأجس : امشييي ولي من چدامي طايح الحظ ،بت ضاري چماله علي

بس طلع ليث وگف عمي محمد گبال جدي المتخبل من سوايته الجاب عمره مثل ذراعه اليمين مثل ما يگول

محمد : حفيدك عاشگ وحرام نحرمه من الرايدها

رأجس : هاه ،وياااه أنت واگف ؟

محمد : لا ،بس خليها ببالك بوية لو اخذ بت يوسف راح يظلمها

رأجس : عليش يظلمها

محمد : ما هاويها وگبالك و گال يعتبرها مثل اخته بعد شني بوية خوما نجبره ؟

سمير : حگ بوية لازم هو يختار موش احد غيره

ضل ساكت ما جاوب عمامي وخله ومشى لغرفته باوعتلها من گالت

غمد : جدج قافل فرد نوب ،والقافل عليهم ثنيناتهم يطربون على الغريب

_ "الغريب" رهيب "الغريبة" بت ضاري المتعلگه روح اخونه بيها

غمد : جا حتى بت عمي يوسف متعلگه روحها بأبن خالي

_ اممم

غمد : والله ما شايفة من ينجاب طاريه شلون تفز

_ راح ينشلع گلبها

غمد : ما يخليها ياخذها وگولي ما گالت

_ يمعوده شيقنع جدج

غمد : خاف جدنه رأسه يابس وعناد رهيب اعند منه

اشرتلنه عمة عطاء شجاي نحجي جاي احاجيها و عيوني صارت على عمي محمدالگعد بصف جدة حاير شني يحجي

زهرة : مايصير هيج وروح أبوي مايصير يعني وياه بكلشي بس مو حتى الزواج

رفع رأسه عمي محمد واشرلها تسكت لا جدي يسمع بس هي گابلته بحرگه گلب تحجي واول مره چنت بيها اشوف عمة هيج

زهرة : احجي أنت مو ابوه ،اوگف وي ابنك ،دگ عمره الثلاثين يروكض الكم وچماله مستكثرين عليه الراحه

محمد : شمستكثرين، شبيج زهرة ،أبوي تعارفينه موش جديد علينه

زهرة : محترگ گلبي ،لا چبيري ولا الثاني مرتاح

نوح : بس انا مرتاح يمة

اندارت عليه

زهرة : اسكت اسكت مو هم انشلع گلبك الا اخذتها

غضة : أي وعلي حتى بچي بچه

طلعت من الغرفة تتثاوب وبشماته گالتله

عطاء : انفضحت يانوح

باوعلي ورد باوعلهم وانا مبتسمة

نوح : شبيچن مو گدامها

غضة : يدومها الك بعد حيلي

أبتسم ورفع ايده

نوح : امين يسمع منج جدة

عمة عطاء ردت للغرفة ،تنهدت جدة وردت تحجي وي عمة

غضة : انا احاجيه وبلكت يقتنع اعارفنه كلش زين ما يجي غير بالمسايس

زهرة : فدوة الگلبج عمة

امل زغير انزرع وخلانه نتغاضى عن رفض جدي بهذا اليوم ،صعدت حتى ارد اكمل نومتي وتوني تمددت و طب نوح سد الباب واجه بصفي رفعت روحي احطن رأسي على صدره واسأل

_ صدگ بجيت علي ؟؟

من ما جاوبني رفعت راسي اباوعله بأبتسامه، باوع ب عيوني

نوح : حتى تربيتي والحلال والحرام نسيتها ساعة الگالولي عقد عليج ابن شيخ خزعل

_ اممم، غرت يعني ؟

نوح : گولي متت

_ اسم الله عليك نوحي

ابتسم وقربني اله اكثر

نوح : حبيتيني ؟

_ چبرتني أحبك .

جر نفس وحرك خشمه على خدي

نوح : المهم هسة أنت بين اديه .

_ اممم

نوح : ترفه شحمتي كلش ترفه ونوحها ما يتحمل هل ترافه

جريت روحي اردن انام على ايده واحجي ،دار رأسه يباوعلي من گلتله

_ أنت تعارف ب ليث عاشگ ؟؟

نوح : أي

_ جا انا هم اعارف بس ساكته

نوح : يعني هم تضمين اسرار

_ جا وحد وموش أي سر ،هذا سر ليوثي اخوي

نوح : اخوي هو اخوج شلون هاي

_ جا موزين استثنيتك ،انا گبل طابگتك وي ليث و صخر

ضحك

نوح : الحمدلله من صدر بحقي الاستثناء

ضلينه گاعدين نوبة نتداهر وامد لساني ونوبة يسكتني بغزله و سوالفه منا لحد ما نمت وحسيت عليه من طفه التيبلام ورد حضني، الصبح گعدت لگيته نازل گبلي ،بأستغراب باوعت ل عمة الشاده رأسها وگاعده عيونها للباب

_ شكو يمة شبيج ؟؟

باوعتلي بعيون ذبلانه

زهرة : من امس ماكو ليث ما رد

_ يا يمة صدگ تحجين ،شني الجديد دوم ليث هيج يطلع ونوبات يطر الظهر الا يجي

غضة : جا انا هم گلتلها بس ما سمعت مني

عطاء : ما الله يهديچن تحجلي شصاير ؟

نسمات : انا هم چنت نايمة اسألي جفون

اجت وگفت گبالي

عطاء : احجيلي شكو الي ساعة اتوسل بأمي ليگول شوف شاريدنها تحجي وتشحتني

غضة : بحال سوالف انا ،أنت الچ خلگ

عطاء : جا خوما اضل مثل الاطرش بالزفة

طبت غمد صبحت علينه وسألت

غمد : شكو شبيكم ؟

غضة : ليث طالع وما اجه لهسه وعمتج خبصتنه

غمد : يا عمة شني أول مرة

مشيت للمطبخ ورا نسمات ،هي تسوي الريوگ وانا بس ابوگن من المواعين ،طگتني على ايدي خفيف

نسمات : كافي زيتون موزين عليج كلش مالح

رديت جريت الماعون منها

_ روحي لايبة على الملوحه

نسمات : لا گولي على الزيتون، گضيتي نساوتج كلها تاكلينه

غمد : شجاي تسون ؟

باوعت للصينية

غمد : هم زين بعدچن ما متريگات طگني الجوع

نسمات : ليش بعدج ما متريگه ؟

غمد : سويت ريوگ وماگدرت اكل عمن علاوي مو وياي

نسمات : يا جا وين ؟

غمد : طالع وي فقار يشتغل وياه

_ شمدويه على هل شغلة

غمد : عاجبته وهم صايرله واهس بيها

شالت الصينية ومشت گبلنه للصاله واحنه وراها عمة عطاء وامها اجن ويانه واحنه ناكل حجيتلهن الصار امس

عطاء : يا يا ،خايبات كون ابوسن رأسه عمن سوه الما سواه احد گبله

غضة : خايبة وعلي اعارف بقصدج شني ،متونسة عمنه وگف بوجه ابوج

حركت رأسها براحه

عطاء : وعلي كلش متونسة ،شفت اليوم البيه احد منهم يطلع عن شوره ومو اي واحد ،ليث راعي المال و الحلال

خزرتها جدة ما راضية على حجيها ردت تاكل ما مهمتة ،كل ما مر وكت القلق بوجه عمة يزيد گالتلي اجيبن موبايلي حتى نخابره نشوف وينه ،صعدت جبته و رديت نزلت ،دگيت عليه مره والثانية وماكو رد منه

_ عمة ما جاي يجاوب

تنهدت تباوع للساعة حسبة ببالها ومبين عليها شكد خايفة لا يسويها صدگ وما يرد ،وبس طب عمي محمد گالتله

زهرة : ليث ما رد لهسه ،ما عدك خبر وينه ،گلبي ب نار عليه

بأستغراب گاللها

محمد : شني مارد جا راح يصير العصر

زهرة : خابرناه يدگ وما يشيله ،خابره أنت بلكت يجاوب عليك

وبلايه ما يحجي طلع موبايله من جيبه ،كلنه عيونه وياه ،طبگة حاجبه زادت خلت الخوف بگلبنه ياخذ مكان ،بخوف من ملامحه الي نگلبت گالتله

زهرة : شكو ابو صخر ،شبيك ؟؟

باوعلها بحيره ،وبقلق مبين بصوته گال

محمد : موبايله مغلق

نشغت عمة طايح گلبها من السمعته ،بجت منتهي بيها المطاف عاجزة والخوف مسيطر عليها، انخبصنا خبص وحتى جدي من اجه وسأل شكو گاله عمي محمد وهو يگوم من مكانه

محمد : ليث ما اله أثر

رأجس : بالگيعان تلگوه

نوح : ماكو سألت عنه گالوا ما جاي ابد

بهت عيونه تندار بين الولد ما يريد يبين على روحه القلق بس اسألته كاشفته

رأجس : الدواچن مشيتولهن ؟

جعفر : خابرت گالوا ما مارلهم ولا شايفيه من اهد گبل چم يوم من مشينا انا وياه

رأجس : هاه ،بالمرعى خاف .

عزيز : ماكو جدي ،ماكو بكل مكان سألنه عنه ماكو

قبض ايده على عبايته ملامحه مگلوبه ،حالنه حال اليوم كله الولد ماخلوا مكان يعتب عليهم عشنه على نار القلق ما هدنه ولا لحظة بينه خوفه من سالفة مرتضى رجل كوكبة ، عمن وراه وآدم مو قليل شرها وليث مندگ وي واحد منهم

زهرة : يايمة يا ليث يا يمة ،وين رحت يبعد امك ما گلت امي موش حمل خوف

باوعت لباب المطبخ صوتها عالي چان من تسأل ب نسمات ومبين درت

غاية : شكوو نسمات وين ليث ؟؟

شوي وطبت وگفت گبالنه شايله كواكب وجها مخطوف لونه

غاية : صدگ ليث هد الديره، حاجيني يمةة .

غطت وجها عمة تبچي ،دارت عيونها الي صوتها يرچف

غاية : حجالي ،والله گال لو حروموني منها احرمهم شوفتي ،ولج يمة سواهااا صدگ وخلانه ليث

حطيت ايدي على بطني وگمت بوجع اخذت كواكب من ايدها نزلتها بالگاع

غاية : خوية ليث يا شلاع گلبك ياخوية ،وعلي انا احاجي جدي چماله هو عليه

كضيت ايدها

_ وين ماشية شبيج ؟

غاية : هدينيي عقل ما ضال براسي ،يسويها صدگ وبعد ما يرد اخوي واعارفنه مسودنه العشگ ،محد يعلم بگلبه شني غيري

جرت ايديها مني وطلعت بساع ،مشيت وراها چانوا كلهم بالحواش طبت بيناتهم وگفت گبال جدي چنت اسميها بزون ماعدها لسان بس طلعت عدها والسالفة الحجتها وخلتها توگف گبال جدي سالفة ليث مو غيره ،باوعلها جدي مستغرب وگبل لا يسألها گالتله

غاية : مابيكم الدره بسالفة أخوي شني غيري ،انا الشهدت على كل الصارله، تمرمر ومر الظيم كله على حاله ،وهسة من ردتله توگفون ضده ليش ،تراه والله لو شاهدين على وحدة من شوغاته چان بچيتوا على حال گلبه

تمسح بدموعها وتحجي مابيهم احد قاطعها، حتى انا وياها بچيت ،اشرت على جعفر

غاية : أسالوه مو هو بايده شاله للمستشفى مجلوط عمن شاف زفتها، اسألوه بايده يجيبله دوه الضغط انا اوصيه لان اعارفه يتهاون وي روحه وبس ينقر يصير بيه شي كل هذا وأنتم مستكثرين عليه الراحه وگضه عمره يركض حتى يرضيكم

دنگ جدي ما يعارف شني يرد عليها ورد رفع رأسه من حاجاها عزيز حتى تطب ،كض ايدها وعبروا مني وراهم مشيت اسمعه يگللها

عزيز : يرد والله ،بس جاي يلوي ذارع جدي مبينه سالفته

مسح دموعها وحاجه عمة عطاء يوصيها

عزيز : لا تخليها تطلع مرتي صايرة، مرتي صايرة صلفة توگف بوجه جدي

عطاء : جا هذا ليث عدها وي الهوه

مشت گعدت يم عمة زهرة باوعلها مقهور على حالها وخله وطلع من صاحوه، هيوفة اجت وما گدىت تضل هواي عمن اجه عون گاللها ريحانة تريدها الجهال يبچون اليوم كله

گضه وماكو أي خبر الوجوه كلها مگلوبه والملامه على جدي اذا مو بالحجي چانت النظرات كافيه ،ثاني يوم واحنه گاعدين وطب صخر بلايه سلام گال بصوت عالي يولم ما راضي على طلعته

صخر : شلووون تخلوه يطلع ،مو تعارفونه مهدد شلووون

طب وراه عمي محمد جاي على صوته ،اندار عليه صخر من گال

محمد : لا تصيح واحجي مثل البشر

صخر : شلون ما اصيح بوية ،شلووون گلي ،بفعلتكم هاي قدمتولهم ليث على طبق من ذهب

دار عيونه من عمي لجدي التوه طلع من غرفته

صخر : كفر من حب وحده موش من ديرته ،جدي مو ليث التوگف بوجهه هيج ،اخوي واعارفه غير عن كل واحد بينه

بمكابر گاله

رأجس : تاليته يرضى ويرد

عدل ياخة بدلته العسكرية

صخر : نشوف

گبل لا يسمع رد جدي صعد فوگ ،ندستني وتدنت علي

غمد : چن محملين على جدي كل ساع واحد منفچر بيه

_ انا هم هيج جاي احس

گعدت على الدرج رچليه توجعني بس رديت گمت من سمعت صوته وراي ،گمت اسويله درب يمر بس مشى طبت غاية تسأل شني صار

زهرة : ماكو شي يايمة على حطة ايدج

حطت ايدها على رأسها

غاية : راح اموتن والله حتى ما گدرت انام مثل البشر التفكير اكل راسي

نحير شلون وحدة تخفف على الثانية ،ليث هذا الما خله بگلب وحده من عدنه عليه ،فتره نساوتي كلها كل ما شافني شرايده

ومن عارفني اتنسى على الزيتون صار كل ما يطلع يجيب

وياه الزيتون ب انواعه ترسلي الثلاجة ما قصر وي احد

شكد اتمناله الراحة عگب ذاك التعب المبين ب ملامح وجهه بس مبين جدي ما راح يلين بسهوله ..؟؟؟

ومثل اليوم الگبله گضه واجه ليله وماكو أي خبر خله گلوبنه ترتاح ،چنت واگفه يم نسمات تسوي چاي للولد برا وطب صخر من رگعته لباب الشارع مبين صاير اعصاب ،طب حتى ما انتبهلنه خطواته اشبه بالركض چانت ،وبس لحگناه لگينه عمه واگفه عد الدرج تصيح بأسمه

زهرة : خايب صخر يمة ،حاجيني شكو ،ولك انزل شلعت گلبي وانا ما عوزي البي كافينيي

شوي ونزل باوعلنه متجمهرين يم الدرج

صخر : شكو ؟

زهرة : أنت الشكو موش احنه ،شبيك طبيت ترعد رعد خليتني احيرن شلون اوگف على رچلي

صخر : ماكو شي يمة بس جدي الله يسلمه يعاندني

حطت ايدها على گلبها

زهرة : وعلى هاي اسمعنك تصيح

نزل اخر باية و وگف گبالها بأس رأسها

صخر : اعذريني خوفتج

طبطبت على صدره

زهرة : تمون على الروح يبعد امك ،گلي ما لگيت خبر على اخوك

صفن على الفراغ ورد باوعلها

صخر : لا والله لهاي اللحظة مثل فص ملح وذاب بس لا تخافين يردلج واخذها وعد من هل شارب

كض شواربه بنهاية حجيه ورد صعد بعد ما شاف الدم شوي رد بوجه عمه وگدر يزرع الاطمئنان ب ولو شي قليل ...

°ريحانة°

شمرت الحجاب على راسي وطلعت للحوش حتى اصيحن عون وتوني اخطي متوجهه لباب الشارع و انفتح وطبوا ضيرم و وراه صخر ،بساع عدلت حجابي من اجت عينه علي ودنگ ،بلعت ريگي گبل منحرجه وسألت ضيرم

_ ما تصيحلي عون الوكت تأخر وهم يله ينام وراه قرايه

ضيرم : ليش وين هو ؟

_ لو تيهته تلگاه عد بيت عمي يوسف

ضيرم : ها ،جا طب صخر ودقايق ورادلك، ريحانة

اشرلي اطب، درت مطيتهم ضهري ومشيت و وراي حسيت بخطواته التفتت من سمعته گال

اسمي من بعد فتره طويله گضاها حتى بوجهي ما يباوع

جريت الشال اقربه على گصتي ونزلت ايدي من اجه وگف گبالي ،باوعت للمسافة بيناتنة ورديت باوعتله احسن بيه شي متغير ،عيوني افترت على ملامجه وجهه بلايه ما احس وانتهت اكو طبره قوية صايرة يم حاجبه ،شتت عيوني بساع من گال بصوت خافت

صخر : عيونج ،وارتباكج گبالي شني تفسيرهن ؟؟

دنگت اعض شفتي وكمل كلامه الخلاني انتبه لروحي وافقطن ل افعالي الما چنت حاسه بيهن

صخر : چم شهر صار ريحانة ،چم شهر وانا واگف ضد قرار جدي لچل ما تنچربين علي

رفعت راسي اباوع لعيونه ومشيت بساع للغرفة من سمعت صوت ضيرم وعون ،بس طبيت نزعت حجابي چن النفس ثگل بريتي ،گعدت مختنگه افكر بكلامه ورفعت راسي من طب عون ،فتحتله ايدي ابين روحي طبيعية بس ما عبرت عليه ذكي ويلگفها فلا چنه زغير

_ تعال حبيبي تعال

اجه حضني و بس وخر باوع بوجهي حط ايده على خدي

عون : شبيج عمة ليش ضايجة ؟

أبتسمت وملت رأسي

_ ما ضايجة بس ضليت متانيتك وانا منعسة

عون : بعد ماعيدها

بسته من خده وتمددت، اجه نام على ايدي يگلي

عون : خالة سولفتلي قصة

بكلامه چان يقصد بركة ،درت راسي عليه اباوعله

_ قصة شنو سولفتلك ؟

عون : قصة مال غول

_ حلوة

عون : أي بس سيف خاف وانا ضحكت عليه

_ ليش خاف

عون : لان خالة گالت الغول يخطف الجهال الوكحين وهو وكح

عدلت شعره بايدي

_ نام حبيبي حتى تگعد تقره

بلايه ما يحجي غمض عيونه وشوي وحسيت بنفسه ثگل ،نزلته على المخده وگمت ما جايني نوم ،طلعت اتمشى على كيفي وتوني اريد اطلع للحوش و وگفت بمكاني من سمعت صوتهم جاي من الديوانية ،تدنيت اكثر مركزة باليحجوه

صخر : انا شاك بيه ما ضال بالمحافظة أصلا ،وشكي كله جوابه عد برهان

ضيرم : شني الخلاك تشك بيه ؟

صخر : التحق وهو ابد ما مهتم للسالفة ولا شفت منه ردة فعل على الصار

ضيرم : يمعود هو هيج من يوم يومه خوما مثلنه انا وياك نگمز تگمز

بأصرار گاله

صخر : وداعتك سكوته مو خالي

ضيرم : سطرتني، سوالف الضباط هذني والتحقيق مسيطرات عليك

صخر : تصنف مو ؟

ضيرم : لا ،ما تمشي لبيتكم شعدك مگابليني

صخر : هاه

ضيرم : أي والله اريدن انام

صخر : نامت عليك طابوگه

ضحك ضيرم وشوي وسمعته صاح

ضيرم : خرررب اهلك ليش تطگ

صخر : امشي سويلي درب اولي

ضيرم : ما يحتاج كلها نايمة حتى اختك

وخرت من الباب واسمعه يرزل بضيرم ،مشيت للمطبخ حايره وين اروحن بخنگتي ،انا صارلي فترة ضايعة ودرب الصح ما ملاگيته

ضيرم : شني بعدج گاعدة ؟

درت عليه وعيوني اجت على صخر الواگف وراه نزلت راسي بساع

_ أي ما جايني نوم

ضيرم : جا تتمرضين اذا تضلين گاعدة ،نامي

_ احاول

بلعت ريگي ودرت عيوني احس اريد ابچي من الضياع الجاي احسن بيه ،طلعوا ثنيناتهم وانا گعدت مقرره لو حاجاني جدي اگله لا ما اريدنه وافضها ،ضغطت على عيوني اسولف وي روحي "هم راح ارد اكسره مثل ما صار بيه گبل ساعة الگابلني و گال

"فلاش باك"

گعدت بصف ميمنة من صاحتني ،گالتلي اتدنه عليها شاورتني

ميمنة : مو اگلج مطيحته چفي يمفلوكه وتگليلي لا

وخرت خازرتها ورفعت عيوني اجت بعيونه ،اشرلي بعيونه على حجابي عدلته ودنگت عليها اريد اطگها من ردت تحجي ما تايبه

ميمنة : وچماله يغار ،وعلي يا ريحانة يحبج وگولي ما گلت

_ بس انا ماحبه

ميمنة : المهم هو يحبج

_ هاي أنت شبيج ؟

ميمنة : شوفي انا سمعت عمة تريد تخطبله

_ أي

ميمنة : وجعي ،اذا خطبتج ارضي ولا تسويها سالفة أخوي ومدري شني

_ ما تفتهميني أنت لو تتعمدين تسوين روحج ما مفتهمة

ميمنة : لمصلحتج دامه يحبج حتى عصبيته الكلنه نضوج منها يتنازل يمج منها

_ مشيها على الدبه ،غير اذا ما يصيح ويعيط يموت

غمتني وگرصتني خلتني احيرن شلون اسد حلگي وما اعيط

ميمنة : الغبية المتعافية

_ ساعة السودة الصرتي بيها أكبر مني

گمت من صاحتنه هيوفة ،بس طبينا للمطبخ گالت

هيوفة : انا اغسل المواعين وانتن نضفن ما ضل وكت وتجي الوادم

تأفأفت

_ جدج يسوي العزايم واحنه نتورط

هيوفة : والله انا اريد ابجي عدي امتحان وچماله انگليزي هسة لو رياضيات بيها مجال

ميمنة : تتنفسين رياضيات

حطت ايدها على گلبها

هيوفة : هنا الرياضيات هنا

غمزلتها تتداهر وياها وانا مثل الاطرش بالزفة

ميمنة : جا على الاساس اكو غيره هنا

عضتلها شفتها، زغرت عيوني وتخصرت اسألهن

_ ضامت شي علي

ميمنة : ابد

هيوفة : احمم امشن يله كل وحده لشغلها

ميمنة : وين ما اطي وجهي الشغل وراي وراي

هيوفة : لا تبچين

غطت وجها تسوي روحها تبجي واحنه نضحك عليها منا لمن تقاسمنا الشغل وتوني طلعت للحوش وصاحتني هيوفة رديتلها

_ ها شتردين ؟

هيوفة : هدوم الولد لميهن من الحبل زحمة يضلن

_ خوش

الهوه چان عالي بداية بداية عمنه بداية شهر العاشر ،لميت الهدوم ركض ركض ومنهن الچان طايح بالگاع ،شلتهن هم وطبيت جوه

هيوفة : صعديهن فوگ كلهن بغرفة ليث عاد ما يحجي اذا شاف هوستهن مو مثل صخر يتخبل

_ اخوج مريض مال ترتيب

هيوفة : الرجال المرتب نعمة بس على گولة ميمنة وادم متعافية

ضحكت وصعدت فوگ واجاني شعور بالخباثة مشيت لغرفته طشرت الهدوم بكل مكان بيها ونزلت ركض حاطة ايدي على حلگي ،فاتت مني ميمنة وردت سألتني

ميمنة : ها شبيج

وخرت ايدي بالكوات ضامة ضحكتي

_ مابي شي

ميمنة : والله جذابة

عضيت شفتي وهي كلش زين تعارفني عمني فضيحة لو سويت شي

ميمنة : ما مرتاحاحتلج

_ مظلومة انا

سوت روحها مقهورا طبطبت على چتفي

ميمنة : قهرتيني سودة علي

ضحكت و وي ما درت عيوني صار گبالي توه مبين جاي بس عيوني صارت عليه خزرني وعبر يصعد عدلت شالي متوتره يمة راح يشوف الهدوم بغرفته

ميمنة : والله حسيت وراج

_ ميمنة شبييج وياي

ميمنة : سوالفج كلهن ما يعبرن علي

توني اردن عليها وفزيت من صاح بصوت عالي على هيوفة ،اجت تركض مهبوطة وگبل لا تصعد سألتنة

هيوفة : شكو ليش يصيح

_ مو اگلجن اذا ما يصيح يموت

غمتني وصعدت من رد صاحها ضليت اباوع وراها و اطگطگ بأصابعي، جرتني تستجوبني چن مو تسألني

ميمنة : شسويتي احجي

_ ما سويت شي

ميمنة : يا سوالفج على يوم يطيحنج بداهيه خليتي الوادم كلها وتندگين بصخر

دنگت افرن بعيوني من نزل و بالتحديد وگف گبالي

صخر : أنت هيج سويتي مو ؟

رمشت بعيوني اباوعله ارديدن اكسر خاطره الما ينكسر

_ لا

صخر : ريحان

_ ريحانة اسمي بطل تگلي ريحان

صخر : مو بمزاجج امشي

صاح على هيوفة تنزل وگالي

صخر : اصعدي لميهن أنت

بس طب للحمام هجمن علي صعدت اركض شارده منهن ومن الدرج احجي

_ شبيكم ما تحبون الشقه واذا طشرت الهدوم ب غرفته انگلبت الدنيا يعني

عضت اصبعها تتحلف اذا كضتني

هيوفة : انا الج اذا ما اسحلج سحل بالبيت اليوم شوفي

حركتلها ايدي

_ رچفتيني

ركضت للغرفة وقفلت الباب من صعدتلي تركض من ورا الباب كتلها

_ شبيج ما تحترمين مو أكبر من عدج

هيوفة : دروحي روحي أم الاحترامات، لمي الهدوم وانزلي

_ حقيرة ليش گتيله انا هيج سويت

هيوفة : جا خوما احطن السالفة براسي ،أنت سويتها أنت تتحملين

ضلينه نتناگر من ورا الباب وبس مشت دنگت المن بيهن وادردم ،حطيتهن على الجرباية من تحركت يدة الباب بس ما انفتح لان انا قافلته ،صرت قريبة من الباب وصحت

_ منو ؟

چان كل ضني وحدة من البنات بس اجاني صوته جمدت بمكاني

صخر : افتحي الباب

طگيت القفل و وخرت ،فتحه وطب بايده النشفة ينشف بشعره باوع للغرفة مرتبة ورد باوعلي توني اريد اطلع وگالي

صخر : ضلي اريد احجي وياج

وگفت بمكاني اباوع عليه حط المنشفة على الميز واجه وگف گبالي

صخر : صار هواي اريدن احاجيج بس اگول بعدها زغيره

_ شتحچي ؟

رفع شعره الخفيف بايده گبل لا يگلي

صخر : امي تريد تخطبلي وانا رايدج أنت ،لو گلت لجدي، ترضين بي ؟

بهتت واشرت على روحي

_ انا

هز رأسه ب أي

صخر : رايدج حلال الي ،شتگولين ؟

بعد ما كمل كلامه ضل مركز وياي ومن شافني طولت بسكوتي ملامحه اتغيرت

صخر : ها ريحانة شني ؟

_ بس أنت مثل اخوي الچبير

طبگ حواجبه

صخر : شني يعني ؟

_ انا وياك ما نتشابه

صخر : نتفاهم على شكو اختلاف وبالاخير نوصل ل نقطة ترضيني وترضيج

_ لا

صخر : شني لا ؟

_ ما اريدنك انا ما اشوفك غير مثلك مثل ضيرم

اكثر من مره حاول يحجي بس ما گدر ،وخر من دربي واشرلي انزل، نزلت وانا احسن الدنيا طاحت علي معقولة ما واصله خبر لليوم صاحب ابوي ابو منتظر خاطبني منه ومتانين جواب مني ،وبدال ما اكحلها عميتها من سألني أبوي

وگلتله

_ راضية

وساعة الصار عد الكل علم بموافقتي شفت نظرة بعينه ابد ما انساها، چان بايده گلاص الجاي وابوي گال لجدي

باقر : بوية حاجيت ريحانة ورضت

رفعت رأسي وما اعارف ليش اجاني شعور لازم اشوف ردة فعله ،شفت نضرات الاستغراب كلها ب ملامحه

رأجس : بيها الخير ان شاء الله ولو انا ما راضي تطلع للغريب

باقر : جا بوية حمزة حاله من حال ولدنه انا اعارف طينته كلش زين ويشهد الله صايم مصلي ويخاف الله

رأجس : الله يكتب البيه الخير

انا والگاعدين فزينه من طاح گلاص الجاي من ايده عيونه تفتر بيناتنة حاجاه ضيرم وهو فاصل گمت ب ساع طلعت من المكان كله عمن عيونه راح تفضحه

بس طبيت للمطبخ نترت بوجهي بحرگة گلب

ميمنة : ليش رضيتيي، ليششش مخبلة أنت لو شني

دنگت رأسي وغطيت وجهي اريد ابجي ،وگفت گبالي

ميمنة : ولج حرام والله ،ليش هيج تسوين ،شلون اطاج گلبج

جرت ايدي توخرها من وجهي وانا عيوني احسن نار بيهن

_ والله مو بيدي ولج اشوفنه اخوي ما اتخيل روحي مرته

ميمنة : أنت الخسرانه وحطيها ببالج فد يوم من الايام راح تعضين اصابعج ندم

بلعت ريگي وهي وخرت تمسح بعيونها تبچي مقهوره عليه لو علي ،عبر خطف يمشي بساع ومنها طلع وبعد

ما رد الليل كله الولد يدورن عليه وهو مثل فص ملح وذاب ،وثاني يوم الا اجه وبيوم الجان بيه حمزة يجي يشوفني وي اهله كشخت بثوب جديد وطلعت احجي وي امي

_ يمة شوفيني ،الثوب شلونه ؟

جمدت بمكاني من سمعت صوته وراي ،انداريت وعيوني اجت بعينه چان نازل من فوگ وهدومة كلهن ترابة باوعلي من فوگ ليجوه وعبرني بس رد اندار يصيح ضيرم

وبس اجه اطاه صندوگ الغراض البيده ،ركزت وي رجفتها، وبس طلعوا گلتلها

_ شني جا مو على الاساس گضوا شغل من الصبح ؟

نجوى : غير الكاك مال صاعد خربان وسووه ردوا

_ هاا زين

ضليت احوسن بالبيت وكلشي بعيني حسيته طفه و كل ما اتذكر وضعه المخربط گلبي ينعصر واگولن ،"شبيدي ما اگدر اتقبله" اجت جدة يمنه و هيوفة ،وبنفس الليلة وبعد ما شفته وشفتني و تحدد موعد العقد اجه حتى ياخذ جده من عدنه، چنت گاعدة ومدنگة راسي ماعدي جرئه اباوعله،ما چنت غلطانة بحقه بس بنفس الوكت احس روحي السبب ب اذيته

عقدت ،وعشت اضن احلى ايام بحياتي ،بس بعدها كلشي تغير من طبيت لبيت مابيه ذرة رحمة ،چنت يوم عن يوم عدهم اذبل والتذبحني اكثر جهال ما صار عدي سنين ،چنت بكل مره اجي مكسورة واباوعله اگولن ما تهنيت عمن خليته وراي متأذي و مافكرت بيه

"الحاظر"

كلشي مر ذاكرتي مثل الشريط ،صحاني صوت هيوفة تسأل

_ شعدج هنا گاعده ؟

گمت على حيلي امسح بعيوني ،من سنين وانا ما فارگت هل خنگة

_ اريدن اموت والله

حطت ترمز الماي مال جهالها على المجمدة وكضت ايدي تسأل

هيوفة : اسم الله الرحمن شبيج ؟

_ جدي يريدنه انا وصخر نتزوج

هيوفة : بعدج ما ترديه ؟

صوتي بالگوات يطلع احسن شي ونايم على صدري

_ ضايعة انا ،والله ضايعة

هيوفة : جدي شحط هاي السالفة براسه

_ ميمنة ،بين عيوني ،شلون لو جبرني هيوفة شلون

وي كل حجاية چنت اشهگ ادور الهوه وما الگاه، حضنتني حيرتها مو اقل من حيرتي ما چانت متوقعة هل قرار من جدي ،مسدت على راسي تريد تهون علي

هيوفة : مايصير غير الكاتبه رب العالمين، امشي نامي ولا اتعبين روحج اكثر

بس ما چانت عيني تستلم ولا عقلي يهدني بحالي بلايه تفكير حتى انام ،ثاني يوم مشت امي وياها البنات لبيت جدي ومشيت وياهن انا وجه بوجه صرت وياه كل ما احاول اشرد الاگيه ،وگف گبالنه من سألته

غاية : شصار على ليث ،ما ندليتوا مكانه خوية ؟

صخر : لا ،موش زغير حتى نخاف عليه وأنت هم لا تضلين مخبوصة هيج

غاية : شلون ما انخبص وانا متعلمة يوميا اشوفنه

بيده باكيت الچگاير حطاه بجيبه واخذ صگر من ايدي ملعب كلساع ويشمر روحه عليه يريده يشيله

هيوفة : خوية شو عيونك مگلوبات ؟

باوعلها ورد يحجي وي صخر ومن اجت عيونه علي گاللها

صخر : تعبان من الدوام، هاجياه

اطاني صگر ومشى يطلع، امي گبلنه طبت و وراها غاية بالاخير انا وهيوفة ،نزلت صگر بالگاع ونزعت عباتي اسأل عمة

_ جا معقولة لهسه ما ندلوله مكان ؟

زهرة : لا والله ،گلبي ساعة الساعة يوگف من الخوف عليه

گعدت يمها امي

نجوى : گولي يا الله خية وداعتج يرد بس طلع من قهره

زهرة : ويضل هيج مقهور ،جا مو من حگه يستقر وي اليريدها لو هنا كلشي اوامر وقوانين

طبت جدة تحجي على عمة ما راضية صوتها عالي وجدي هنا گالتلها بملل

زهرة : جا ليا وكت نضل ساكتين ،عمة ابني ماكو اليندل مكانه وين

غضة : بس گولي يا الله گلبي بارد واگولن هو بخير هسة

زهرة : انا گلبي نار

گعدت حاطة ايدي على خدي واباوع بعيوني ،امي ردت وهيوفة هم ضلينه بس انا وغاية عدهم عمن نسمات وغمد مشلوع گلبهن بالبيت ،رفعت ثوبي وصعدت اركض

غضة : ولج ولج لا تطيحين

درت عليها

_ ما اطيحن لا تخافين

دفرت باب الغرفة وطبيت ،فزت مهبوطة ايدها على گلبها

جفون : سم حتى سم شبيج

طگيتها بالمخده على رأسها

_ سم بگلبج ما تحترمين ادبسزز

ردت حطت رأسها على المخدة تدردم ومبين تريد ترد تنام

_ تمبل گومي اذن الظهر وبعدج نايمة

جفون : خاب ما توخرين مني شبيج أنت ،منو دازج علي

_ عمة گالت اگعدج تاكلين حتى تاخذين دواج لو درب التغليسة

جفون : اكلت انا ونوح الصبح واخذته

_ احلفي

جفون : والله

گتلها ترد تنام ونزلت شوي واجت وراي ،وعلى هل حالة اسبوع گضه ،مبين الخوف بوجوه الكل وحتى جدي انتبهت جان مبين الندم عليه بس يكابر لو لامه احد

باقر : شيصير يا بوية لو راضي وفاضها ،احسن هيج ما ايام صار شوفة عينك متبهذلين الولد وحالهم حال

رأجس : ما يعارف مصلحته وين متحكم بيه گلبه

ضيرم : چان خليته هو وگلبه ،لاتنسى جدي زواج مو لعبة وحتى گبالك عمي باقر گال حتى لو رد ما يطيه بته

رأجس : دخله يرد ونشوف حجاية منو راح تمشي

يحجي بعناد خلانه نأيس ،درت راسي على صوت غمد وراي

_ شعدج يم الباب

_ واگفه اسمع شسوي يعني

جرتني وياها للمطبخ وانا كلساع اگللها

_ راح أعثر ولج

هدتني عدلت هدومي احجي عليها

_ شبيج ولج

غمد : حرگت الجاي سوي جديد حبااااابة

هزيت ايدي

_ الحمدلله ربي ،صدگ تحجين ؟

غمد : اسوي اكل ما احرگه بس الجاي ما ينضبط عدي

شلت القوري حطيته جوه الماي وانداريت الها

_ جا شلون لو علاوي راد منج جاي ؟

غمد : هو يسوي جايه اطيب من جايي

_ زلم اخر وكت

ضحكت وباوعتله من طب مشت وگفت گباله وهو مبتسم سألها

علي : شكو ؟

غمد : ريحانة ما راضية چي أنت تسوي جاي ل روحك

باوعلي باستسلام للواقع گال

علي : جا شسوي خوية خوما اشرب جاي محترگ

طگته على صدره ما متوقعة رده، ضحكت وكتمت صوتي بساع من طب صخر ،بس مشى گلتلها بشماته

_ توج مترهية تحجين شوفي تالي الرجال طلع مستسلم

رفعت رأسها تباوعله وهو مدنگ ،برطمت تشكيله علي

غمد : شوف خليتها تتشمت بي

علي : عمي اسحب كلامي، ترا جاي مرتي ماكو منه

اشرتله على القوري

_ قصدك المحترگ

صاحه صخر وطلع بساع ردت يمي تحظر بالاستكاين وبس صار الجاي اخذته الهم وتوني وصلت يم الباب احد واگف وراي من انداريت چان صخر ،مدلي ايده

صخر : اطيني الجاي وامشي

اطيته الصينيه واشرلي اطب من شافني ضليت واگفه بمكاني ،غمضت عيوني من حسيت بعطر قوي خليجي ترس ريتي

صخر : ريحان

فتحت عيوني وچن من نطق اسمي نبهني على الوضع

المألوف الحسيت بيه، رديت بساع للمطبخ اشرد بمستحاي منه حطيت ايدي على گلبي متخردل وضعي وبس طبت وحاجتني ومن ما رديت عليها بأستغراب گالت

نمسات : ريحانة شبيج ؟

جريت نفس اگللها

_ مابي شي

نسمات : شني المابيج علينه، صخر حاجاج ؟

_ لا

نسمات : جا ؟

_ ماكو شي نسمات فدوة لا تزيديها علي

سكتت بس عيونها بيهن اكثر من سؤال ،رديت احاول اضيع وكت ب أي شي گدامي ومن ردت امشي صاحت عمة على نوح حتى يوصلني بس ما چان هنا

طلع من الديوانية

صخر : ها يمة ؟

زهرة : دنيا ليل وريحانة تريد تمشي وصلها أنت بعد امك

چنت اريدن اگلها لا بس شلون بيا طريقة الما تخليني اتعرض ل سؤال ،استسلمت ومشيت گدامه من گالي

صخر : امشي

فتح باب الشارع و اشرلي، انداريت عليه و وگفت رافعة رأسي ل طوله

صخر : شكو ؟

_احجي وي جدي لا يجبرني

شمر چگارته وابتسم

صخر : ما تنجبرين راح ترضين ب ارادتج ريحانتي

غلست على نقطه ل اسمي بطريقة خلتني احس ب غرابة من جرئته

_ شلون ارضى مو تعارف بجوابي شني ؟

صخر : ما يصير شي خارج عن ارداتج لا تخافين

مد ايده فتح السرگي مال باب من فوگ وبس شافني طبيت رد سداه ومشى ،طبيت اسحل بروحي تمددت بصف عون النايم ويمه سيف ،والصبح من گعدت لگيت جدي عدنه، بهتت ساعة الشفته گاعد يم أبوي

صحت غاية وبس اجتني سألتها

_ شكو شعده جدي جاينه ؟؟

غاية : ما اعارف ،اضن عدهم شغل يمشوله

مشت تصعد فوگ وانا تحركت من مكاني صبحت عليهم وبتوتر ضليت اباوعلهم خايفة لا جدي يحجي بالسالفة ساعتها شراح اسوي وشلون اخلص روحي ،بس الحمدلله من ما حجه وگضت گعدتهم على خير

نجوى : خايبة غاية شلعتي گلبي ما تاكلين شني سالفتج

تنهدت ونزلت الخاشوگة من ايدها

غاية : نفسي ما تهوه الاكل عمة ،مشتاگه الأخوي

نجوى : اخذيها مني اخوج بخير ،لا تخلين التشائم يسيطر عليج

هزت رأسها ب أي وباوعت لهيوفة وحدتهن قلقه اكثر من الثانية ،وگبل فترة قليلة كلش من الحصاد چنت ببيت جدي وسمعت جدي يگول للولد بثقة

رأجس : هسة يرد ما يخلي اراضيه بوكت حصادهن

ثقته خلتنه نحس صدگ راح يجي ،بس ما سواها وضل مختفي وكلام جدي مو صح ليث طلع عده الاعز من اراضيه وناسه ، استسلموا الولد وتحزموا كلهم عكس كل مره چان يوگف هو وجعفر وكلش كافي

°حواري°

نزلت اركض ورا سيف خبلني بعناده، صحت وراه

_ اذا الزمك الا اشلع اذاناتك

بركة : ولج صوتج الولد بره

درت عليها متشعوط گلبي ،طگيت على رچلي بحرگان گلب

_ يعاندني ولج يعاااند

بركة : يمعودة خليه يمشي وياهم مو حتى عون راح ياخذوه وأنت تعارفين وين ما يشمي عون هو وياه

_ غير ابدله خوما يمشي هيج

بركة : من يجي بدليله

اشرتلها على ميمنة من طلعت

_ اجت بتج

أبتسمت واندارت تباوعلها

ميمنة : عمة

دنگت فاتحتلها ايدها ،ضحكت واجت تركض شمرت روحها بحضنها ،شالتها تبوس بيها

بركة : شلون ميمنة حلوة هي ،هواي احبج انا تعارفين

هزت رأسها ب أي وباست بركة من خدها ،مسودنتها بسوالفها

ميمنة : دوعانه

بركة : يخسى الجوع ،امشي اسويلج اطيب اكل

مشيت وراهن اباوعلها گعدتها على المجمدة تسألها

بركة : شنو تردين سولفيلي ؟

حطت اصبعها على راسها تفكر وشوي وگالتلها

ميمنة : اويد بيضة

بركة : چنج على بيضة

ميمنة : من حوواء (حوراء)

بركة : من بيضات الدجاجة ؟

هزت رأي ب أي ،ردت نزلتها ومشن يجيبن بيضة من الدجاجة

خليتهن وصعدت فوگ اباوع لهوسة الغرفة حطيت ايدي على

راسي حايرة منين ابدي هاي انا كل ما اگعد الصبح هيج اشوفن حالها

بديت شي ورا شي اعزل بيها ،وبس كملت سبحت و نزلت ل ورا الغدا الا اجوي حق والولد

هلكانين من التعب ،تلگيتهم بالماي ومركزة بحجيهم

عبد الحق : وحگ الله لو اندل مكان ليث الا انا ارده عمي تبهذلنه

جعفر : يمعود مو وياكم انا

عبد الحق : اسكت اسكت عود أنت وياه طلعت مكاين الماي ما تعارف شلون يشتغلن

شرب من گلاص الماي واطيانياه وگام صعد فوگ اباوعله كله تراب ،جعفر تمدد بمكانه صافن مدري وين صعدت

ورا حق لگيته يطلعله هدوم ،بس گلت اسمه اندار علي ،سديت الباب وتقدمت اداهره

_ المهندس صار فلاح اليوم

أبتسم وجراني عليه

عبد الحق : جا فلاحنه هم مو شوي ،محلل ومتخرج بس كلمن وهوايته وانا والفلاحة خطين صعب نتلاگه

حطيت ايدي على صدره ورفعت روحي استجوبه

_ جا شو خليتوها على الساكت، تندلون مكانه مو ؟

عبد الحق : لا والله بس شنسوي لازم نكض الشغل ونعوض مكانه

_ اممم

عبد الحق : اگلج

_ گول حبيبي گول

عبد الحق : بعلي اكضن گلبي ب ايدي من تگليلي حبيبي

_ ليش حقوق ؟

عبد الحق : هاي حوريتي أم حقوق مو حبيبي

_ اممم

عبد الحق : راح امشي اسبح واريدن تصبيلي غده من ايدج

نزلت بس طلع هو ،ومن شافتني اريدن امشي للمطبخ وصتني احسب حساب جعفر ،حميت الاكل و طلعت للحوش مخبوصة على صوت مناگرهم

صحت بيهم

_ شبيكمم

باوعلي ثنيناتهم

عون : ابنج طگني

سيف : أنت طگيتني اول شي

عون : انا اكبر منك واذا طگيتك

دنگت گباله باوعلي مترهي

_ مفتهم السالفة غلط عمة ،ترا مو هيج ابد يعني مو لان ازغر منك تطگه

عون : جا گليله لا كل ما يشوفني يشمر حجار علي

باوعت لسيف خازرته

_ ليش تشمر عليه حجار

سيف : اتشاقه وياه

_ ماكو هيج شقه ،اعتذر منه يله

اجه وگف گباله

سيف : اسف

أبتسمت و وگفت اباوعلهم تحاضنوا ولا چن شي صاير وصيتهم يجيبون حوراء لانها يم بيت اهلي مشت

علمود دره، صبيت الاكل واخذت الصينية للصالة وصحت

على حق وجعفر وتوهم بدوا يأكلون وطبت بس شافت ابوها صاحت

حوراء : بابا الحلووو

ركضتله تحضن بيه وتبوسه چن صار شكد ما شايفته هل بت فاره مو بس عقل ابوها حتى عقلي ،گعدها بصفه يوكل بيها وياكل وهي كلساع تگله

حوراء : حبيبي ،فدوة الايدك

اشرت لعمة تركز عليها وضحكت بس گالتله

حوراء : بابا رجال

غطيت وجهي بشالي اضحك وجعفر تمدد بالگاع من الضحك ،تتلفت بيناتنة وتسأل شكو وهي ما جاي تستوعب مو أي شي يجي على بالها تحجي گامت تدردم

حوراء : ضوجتونيي

عدلت فستانها ومشت للحمام تغسل ،لحگتها خاف لا تبلل روحها وبس شافتني گالت

حوراء :مو اگلج انا چبيرة واعرف

دنگت ابوسن خدودها واحجي

_ فديت الچبيره اروحلها فدوة أنا ام خدود حلووة

°سيوف°

گعدت وي صلاة الصبح صليت وشكد حاولت ارد انام وما

گدرت نزلت مستسلمه وگبال عيني صار سياف جاي يصلي

بس گضه صلاته گلتله

_ تقبل الله

شال المصلايه وعدل وگفته طبگها ورد علي بأبتسامه

سياف : من الجميع صالح الأعمال ،شو گاعدة اليوم مو عطلتج ؟

_ أي ،بس گعدت وبعد ما گدغت انام

سياف : جا دام هيج سويلي ريوگ حتى امشي وي الولد للراضي

اشرتله على عيوني

_ تدلل

مشيت للمطبخ وهو صعد يبدل هدومه ويلبس هدوم الشغل

علگت النار جوه القوري وصفنت على الحلقة ب ايدي تنهدت وحركتها ب اصبعي ما توقعت راح اللبسها بيوم من الأيام بوضع انا مو بكامل قناعتي بس حتى ارضي اهلي ولو ينحجي الصدگ اكثر ،بس حتى اما احد

يزعل من أبوي لانه سنين گضه من عمره وهو يتمنى بس يردلهم

فززني من أكثر موضوع دوم افكر بيه صوت الباب من اندگ ،من ورا الباب صحت

_ منو ؟؟

برهان : انا

_ شتغيد ؟

سكت شوي وكل ضني مشى توني تحركت حتى اطب وسمعته گال

برهان : سيوف

وگف بمكاني وگلتله

_ ها

برهان : افتحي الباب

_ بس اوگف

وما اعرف شلون دره شني ببالي وخلاني جامده ب مكاني من گالي

برهان : حلالي أنت ما يحتاج تتسترين مني سيوف

عضيت شفتي حايره والارتباط مسيطر علي ،فتحت الباب وبنفس اللحظة صار گبالي ،دفعني يوخرني ورد سده ،عيونه اكلتني اكل ،أول مره نتلاگه انا وياه من العقد لهسه مكان واحد وبس انا وياه ما جمعنا ..

برهان : بوية راح تطبين النار بذنب ما ينغفر ابد

_ ذنب شني ؟

أبتسم وكض ايدي ،ردت اجرها منه بس شدد عليها يمنعني ،عيونه بعيوني وقربه ل أول مره هيج زيد من ارتباكي دنگت حايره وين

اشرد من نضراته الي وحدهن كافيات يخلني احس بروحي جاي اتبخر

برهان : حارمتني شوفتج ليش ؟ اليحرم المحب من محبوبة يرتكب ذنب

رفعت حاجبي ورديت اباوعله

_ شهل سالفه الجديده ؟

برهان : موش جديدة بس ما گايلج احد بيها ،بعد لا تتختلين مني لان تاليتج بالنار

صفنت بوجهه اريدن اصدگه بس ابتسامته تخليني اتراجع واگول جاي يضحك على عقلي ،جريت روحي منه من سمعت صوت سياف من شافني وگفه يمه ما حجه بس گالي اطبن اكمل الريوگ ،مشيت و وراي اسمعه يگله

سياف : ضل تريگ وياي حتى نمشي وراهم دامهم ماشين گبلنه

طبوا للديوانية وانا بس كملت الريوگ صحت على سياف اخذ الصينية ولحگته بقولي الجاي والخبز

حطيتهن بالگاع ومن ردت اطلع گالي

سياف : مو ما متريگه ؟

هزيت رأسي ب أي ،سوالي مكان يمه گعدت اصبلهم جاي

وهم يحجون على موسم الحصاد ،وبرهان يشرح ل سياف على چم شغلة مت مفتهمها، حطيت گلاص الجاي گباله و بالاخير صبيتلي وبالگوه گدرت اكلي لگمتين ،وبس طلعوا الا كدرت اتنفس

العصرية جبرتني امي امشي وياها ل بيت جدي وانا هذا الوكت ما امشي بيه لان عدي علم كلهم ملتمين هسة

وهو اكيد وياهم دامه هل أيام ب إجازة وصدگ بس طبيت لاگيته يريد يطلع ،امي تبرت مني سلم عليها وگاللها

برهان : اريد احجي وياها اذا ترضين ،عمنها تتشرد مني بتج

حنان : گدامك اذا تريد اخطفها هم

ضحك وبس مشت كض ايدي وجرني وراه للديوان الخارجي ،بس طبينا سد الباب ،خزرته عين عليه و عين على الباب

_ افتحه لا اعيط

هد ايدي بخباثه مبينه بأبتسامته يگلي

برهان : عيطي

وگف يمنعني افتح الباب من شافني اريدن صدگ اطلع ،دگيت رچلي بالگاع وانتفضت من جرني يحضني طگيته على صدره

ارجف وگلبي دگاته زادت احس بيه جاي يشمني من جرة نفسه القوية

_ بغهان ،وخغ ،شبيك هدني

قبضته على خصري تزيد ،مدنگ علي وبس وخر نترت ارجف

_ شبيك أنت شبييك ؟

عيونه ثگلانات تفاحة آدم برزت من بلع ريگه ،تقدم علي يجبرني على قربه ،رديت چم خطوة ليوره لحد ما نطگ ضهري بالباب ،صرت بين صدره وبين الباب

_ كافيي شبيك لا تتقغب

برهان : ما متقرب

باوعت على المسافة المعدومه بيناتنا

_ بعد شضل اكثغ من هيج ؟

أبتسم وحرك واحد من حواجبه من هاي حركته قصدن افتهمته، دفعته احجي

_ ما تستحي كلش ماتستحي ،مسوي غوحاك بس أنت وبس گدام الناس

كضني من ايدي خازرني رديت خزرته ،عيونه من عيوني

نزلت تفتر على ملامح وجهي لحد ما استقرت على شفتي

دفعته من حسيت راح يخطي خطوة يخليني اتخبل عليه

فتحت الباب و طلعت احجي وي روحي على امي الخلتني

وي واحد متسرسر على اخر درجة ،من ردت اطب صاحتني غمد ...

غيرت طريقي لمشتملها وگبل لا تسألني شلونج شهگت تباوع بوجهي

غمد : شبي وجهج صاير دم

حطيت ايدي على خدي اتحسسه

_ ماكو شي

غمزتلي

غمد : چن لگفتتج

_ انجبيي

جرتني تطببني جوه ،گعدتني على الجرباية وجابت الطابوريه گعدت گدامي

غمد : احجييي حاجيه وي برهان ؟

_ لا

غمد : جذابة ولله ،شبيج مو اختج انا احجيلي

تأفأفت حايره شلون اوصللها خربطة احوالي وما تلومني مثل البقية دنگت رأسي وگلتلها

_ بغهان غاد يبوسني

رديت اباوعلها من گالت

غمد : صدگ تحجين ؟

هزيت رأسي ب أي ،غمت روحها وسألتني

غمد : وهذا المضوجج ؟

بضوجة گلتلها

_ جا بعدني ما متعوده عليه شني هل حغكات

غمد : حبيبتي يا تعودين هذا الزلمة لو بيده هسة يخلوهم يزفوج اله بثوبج

رفعت ايدي اگللها

_ سالمين شكو ؟

غمد : جا گضه العمر متانيج وأنت مستكثريه بيه حتى شوفتج

_ مو بيدي غمد والله

تقربت علي اكثر وحرت شني اگللها من سألتني

غمد : شني المخليج هيج ما تهويه ؟

رفعت اچتافي

_ ماعغف بس مو بيدي

غمد : حاولي تتقبليه ترا والله ما تلگين اليحبج مثله أنت ما شايفة لمعة عيونه كل ما باوعلج

ملت رأسي ضايعه

_ شلون اقتنع

غمد : بس لا تضلين تنفرين منه و ويوم عن يوم راح تشوفين روحج متقبلته ويجوز تحبيه هم

_ صعب

غمد : صعب تحبي لو تتقبليه ؟

گمت وگفت اريد اطلع بس گبلها جاوبتها على سؤالها

_ ثنيناتهن

وگفت گبالي

غمد : والله راح يجي تحبي انا متأكده وساعتها راح انا اتشمت بيج من تطيحين

وبكل ثقه گلتلها

_ يمعوده ما راح يجي هل يوم

غمد : نشوف نشوف

طلعت بضوجة متنرفزه من موضوعه وبس طبيت للصالة مال بيت جدي لگيته گاعد يم الولد وبس سمع صوتي

سلمت التفت يباوعلي، ما نزل عيونه خلاني احير شلون

اتحرك وامشي يم جدة ،شكد ما اگدر حاولت اغلس على

نضراته ومن وصلت عدها ودنگت حتى اسلم عليها گالتلي بهمس

غضة : شمسويه بالزلمة يمفلوكه ،مطيحته چفي حتى عيونه ما يتحكم بيهن

عضيت شفتي حايره شني اجاوبها وگعدت بصفها ساكته ،گمت يم البنات من سألت عليهن وگالت عمة بالغرفة ،دگيت الباب وطبيت

_ هلوو بنات

نسمات : ياهلا بالمختفية

سديت الباب وگلتلها

_ ملتهيه بالدوام، شلونچن

جفون : انا بنص الظيم والتعب والاذيه والورطة

سطرتهن على وحطت ايدها على بطنها چانت متمدده

جفون : بطني توجعني اضن راح اجيب بالسابع

گعدت يم نسمات

_ مشيتي للدكتورة ؟

جفون : تگول تقلصات وطبيعي تصير وي كل حامل

_ جا بعد شبيج ؟

جفون : خايفة كلش

نسمات : والله حگج

جفون : أي والله

اشرت ل نسمات بعيوني بمعنى شبيج

نسمات : ترا والله جاي احجي الصدگ الجياب تخوف

_ مجغبتها گبل ؟

نسمات : لا

_ جا بعد عليش تحجين من وحدج

باوعت ل جفون وردت باوعتلي

نسمات : شبيج مطنگره ؟

_ ما مطنگغه .

جفون : على گولة نوح الچذب حرام

نسمات : والچذاب الله يذبه بالنار

_ شبيچن ؟

جفون : كلشي مابينه ،بس نريد نعارف سبب الطنگوره

_ ماكو شي مو جاي اگللچن

نسمات : خوش خوش صدگناج

گمت طلعت وهن وراي من صاحتنه جده، امي ضلت وانا اجه سياف ومشيت وياه للبيت كفيت الشغل العدي بين ما اجت وبالليل چنت توني اريد اغفى و دگ موبايلي

وخرت الغطا ومشيت اشوفن منو الجاي يخابر بهل وكت باوعت للرقم بأستغراب ،رقم غريب ما محفوظ عدي ..! !

ضليت متررده ارد لو لا ،بس فصل الاتصال اجتني رسالة هم على الواتساب ،طبيت بساع ومن قريتها چان مكتوب بيها

"انا برهان ردي"

جاوبته متردده من دگ مره ثانية ،لا أنا الحجيت ولا هو ،ثنيناتنة ساكتين، وخرت الموبايل من أذني اشوف بعده على الخط وفززني صوته من گال بهدوء

برهان : الليل طويل والروح رادت تسكن بصوتج

بلعت ريگي حايرة شني احجي ،نبرة صوته وترتني

برهان : وكحه وخجولة ،ثنيناتهن تنافر لازم يصير لو اچتمعن عد بشر ،بس عدج متلاگيات ومخلياتني اعشگ خدودج لو تحمر

_ شتغيد ؟

سألته وانا احس روحي مصخنه رغم الجو چان زين

بس هو يتعمد يخليني احير شحجي ،شوي وسمعت صوت الجداحة مبين شغل جگارة ،صوت جرة النفس منها كسر الهدوء الصاير

برهان : رايدج أنت بمكان الچگاره

يحجي چان بصوت ثگيل ،نترت من فهمت قصدة

_ ليش ما تستحي أنت ؟

جر نفس طويل وبشوغة وصلتني گال

برهان : خليني احجي براحتي ،سنين وانا ضام كلشي ب گلبي ،هسة حلالي أنت ،لا تمنعيني

مسحت على واحد من خدودي بچف ايدي وركزت وياه من گال

برهان : ساهونتي

_ شنو ؟

برهان : چنتي زغيرة عمرج اقل من التسع سنين گبل لا تطلعون ،بوكتها مشيت لزيارة الاربعين انا والولد

ضحك ضحكة خفيفة وكمل

برهان : طلعتي تركضين ورانه وتصيحين بأسمي و من گلتلج شتردين ،گلتي "اغيد ساهون جيبلي وياك حباب"

أبتسمت وگلتله

_ اتذكغ

برهان : چنتي گلشي ترديه تطلبيه مني ،ومن ذاك العمر وأنت معشعشه ببالي

_ اممم

برهان : انا اعارف بيج رضيتي بس حتى لا يصير خراب بين ابوج وابوي ،واخذيها وعد من زلمة نذر سنين عمره لجلج، راح يجي اليوم البيه محبتج الي تتسابگ وي محبتي

حاولت اغير السالفة من سألته

_ شوكت تمشي للدوام ؟

برهان : ليش يابة تردين تخلصين مني ؟

_ لا والله بس اسأل

برهان : بعد اسبوع

وبهل اسبوع ما رد خابر الا بليلة الچان بيها يريد يلتحق ،چنت توني نايمة وفززني صوت الموبايل گبل لا اشوفن منو عرفت هو ،جاوبته بصوت ثگيل

_ الو

برهان : نايمة

تثاوبت وگلبت روحي على ظهري

_ أي

برهان : تگدرين تگومين ،تفتحين الشباج اشوفج

_ ليش ؟

برهان : واگف يم بيتكم، گومي

سداه ما مطيني مجال اعترض،دفرت البطانية وگمت فليت شعري ورديت لميته وجريت البرده، وبس فتحت الشباج صار گبالي سأند روحه على النخلة گبال الشباج ،مرر اصابعه على شعره، چان لابسه هدومه العسكرية ،رديت شلت الموبايل من خابر ،باوعتله متانيني اجاوبه ،وبس فتحت خط گال

برهان : اريد اصعدلج

وسعت عيوني اباوعله

_ وين تصعد

برهان : اشوفج من قريب

_ بغهاان

ما چن سمعني وبس سداه صعد على السياج مال بيتنا ،اباوعله مصدومة شوي و وگف گبالي ،بايده گرصني من خدي

برهان : وخري خلي اطب

وخرت ما مصدگه هل سوالف تطلع منه ،ثواني و صار يمي بالغرفة ،ضحك يعدل هدومه

برهان : تالي عمري اطبن من الشبابيج والله زحمة

_ محد جابغك

باوع بعيوني وكض ايدي حطها على گلبه

برهان : هذا جابرني ،جابني يعتني عت الج

جريت ايدي منه وحاولت اشتت عيوني ما اخليهن يتلاگن وي عيونه ،كض وجهي ودنه روحه باس خدي و وخر ،حركته خلتني اجمد ما متوقعتها ابد

لف ايده على خصري وهمسها قريب كلش من أذني

برهان : احبج

رفعت عيوني بعيونه ،أبتسم

برهان : شو صايرة حبابة ؟

دفعته متفطنه ،اطيته ضهري احاول ارد لطبيعتي، شهگت من حسيت بيه حضني من ضهري

برهان : لا تتقيدين عيشي على طبيعتج وياي

سحبت روحي منه ،واگف گبالي ايده بجيوب البنطرون مال بدله ،الهوه خافت يطب من الشباج عمن مفتوح، البرده تتحرك بهدوء

صخر : لك برهااان

حط ايده على گصته استغفر ومد رأسه بكل صلافه يحجي وي صخر

برهان : شبيك أنت ،حالف علي لو شني ؟

صخر : انزل انزل الا اچفص بنص مصارينك اخليك ترد الأصلك

برهان : يا اصل غير گلبي طاگه الديك

صخر : انزل حتى اوگف گلبك ،انززل تأخرنا

اندار علي

برهان : ديري بالج على روحج

هزيت رأسي وبس نزل طبگت الشباج وخليت شوي منه مفتوح اسمع

صخر : مترعن كلش مو عيب ما تستحي تطفر من الشبابيج

برهان : عاجبني اراهق من تالي

قفلت الشباج وجريت البرده وضليت افتر بمكاني وشكد

حاولت انام ماگدرت الصبح طلع وانا بعدني گاعدة وبأول

ليلة من ليالي شهر رمضان بعد ما تسحرنا توضيت وفرشت

مصلايتي وگعدت اقرا قرآن بغرفتي وتوني صدقت وباوعت

للموبايل چان يمي اشتغلت الشاشة دليل على جية رساله

نزلت القرآن من ايدي وفتحت الرمز وبس طبيت للواتساب

أول اسم صار گبالي اسمه فتحت الرسالة وابتسمت بلايه شعور من قريت كاتبلي

" أول رمضان يجي وأنت حلالي ،وأن شاء الله رمضان الجاي بأحضاني"

ضليت حايرة شني اكتبله ،شوي وطلعلي يكتب ومبين چان متانيني ارد

_ شلونج

_ الحمدلله وأنت ؟

_ بخير ،تسحرتي ؟

_ أي وأنت ؟

_ بالعافية ،بعدني الولد جاي يسوون .

_ ماضل وكت

_ بواجب طالعين تونه ردينه

_ ها خير أن شاء الله

_ مشتاگلج .

صفنت على الرسالة وطولت هواي گبل لا اگله

_ تشتاگلك العافية

_ يعني ما مشتاگه أنت ؟

_ شوكت تجي ؟

دزلي ملصق مبتسم انتبه غيرت السالفة، شوي و وصلتني رسالة صوتيه

_ بعد يومين ،ماشي اتسحر واردلج مو تنامين .

_ خوش

گمت نزعت ايزار الصلاة رتبته هو والمصلاية خليتهن بالجراره وتمددت على چربايتي راسلت نسمات

_ شصار منو راح ياحذج ؟

من ما اجاني رد منها طبيت لليوتيوب ادورلي مسلسل اتابعها وبنص الحلقة ردت علي كاتبة

نسمات : حايرة والله عازة ليث عازة تبهذلت

_ جا مو جعفر گال ياخذج

نسمات : شلون امشي وياه غير مطنگر علي

_ راضيه

نسمات : ما غلطانة حتى اراضيه

_ جا ضلي تفوتج المحاظرة واذا لطمتي اخلي عمة زهرة تلزمج وتكتلج

نسمات : الله كريم تنحل ،اكلج

_ گولي

نسمات : شعجب گاعدة مو عدج دوام ؟

_ متانيه الصلاة

نسمات : جا صلي ونامي انا ماشية اغسل مواعين السحور

_ نداره هنياله ابن عمي

نسمات : ما تطيرين أنت وياه

دزيتلها ضحكة ما شافتها مبين راحت، شوي و دگ الموبايل جاوبته يحجي مخبوص

برهان : بساعك ما ضل وكت جاي اريد

الهوسة اليمه اختفت وصوت باب انطبگ ،تنهد و گالي

برهان : احجي مشتاگ لصوتج

_ تسحغت ؟

برهان : أي الحمدلله ،خوما منعسة ؟

_ لا ،اغيد اصلي وانام

برهان : بعد نص ساعة للأذان

_ أي

برهان : جاي تداومين ؟

_ أي

برهان : منو ياخذج ؟

_ سياف ومغات حق يغجعني

برهان : زين

شوي وسمعت صوت واحد يمه يگله

_ هذا الجاي سيدي رايد شي بعد

برهان : لا سد الباب وراك

شوي وهمستله

_ سيدي

برهان : روح سيدج يابة

_ اكلك

برهان : گولي يابة گولي

_ هم يخافون منك عود ؟

برهان : ماكو خوف بس يحترمون، بس أنت لا خوف ولا احترام

_ يااا انا ؟

برهان : أنت شايفة من تخزريني، خررب اريد اكضج وافگس عيونج بس اكض روحي واگول لا تمون هاي ساهونه الحلوة

_ تضوجني

برهان : شمسويلج ؟

_ عيونك صلفة

برهان : يا طلابة عيوني بعد اللبس منظار من احجي وياج

غطيت حلگي اضحك

_ أي عفية احسن

برهان : انا الج خل ارد

_ شتسوي ؟

برهان : ماسوي شي ،اگلج

_ گول

برهان : مو شهر رمضان وصايمة ما تلبسين عباة احسن

_ ما احبها

برهان : حبيها حتى احبج

_ لا تحبني

برهان : لخاطري

_ ما

برهان : مو احاجي عمي عليج والله واگله بتك تكسر كلمة زلمتها

_ حاجي

برهان : بويةةةة شكد صلفة

_ منك نتعلم الصلافة

برهان : من اكضج لسانج هذا يختفي، بعيني سيوف

_ اكلك شو بس تهدد أنت ؟

برهان : وبس اجي انفذ .

_ خوش

ضحك وحسيت بيه من تحرك مغير مكانه

برهان : ليش نحيسه أنت ؟

_ هيج من الله

برهان : وتعترفين

_ جا خوما اچذب

ضلينه نحجي لوكت الآذان وبس اذن كلتله راح اصلي وانام

برهان : تقبل الله مقدما

_ من الجميع ، باي

برهان : الله وياج

سديته وگمت توضيت وبس صليت وحطيت روحي على الفراش نمت واقل الساعتين وفزيت على صوت المنبه گمت بالگوات اسحل بروحي تحظرت ونزلت جنطتي

بايدي لگيت سياف متانيني اخذني وياه ل لدوامي ومشى لشغله وبالرده اجاني حق گال اليوم سياف يتاخر وموصيه

يمر علي ،وياه چانت حواري و بركة ،ندست بركة چانت گاعدة بصفي وصافنة على الشارع بالها مو يمها

_ شبيج ؟

باوعتلي وردت تباوع للدرب ولا چن حاجيتها ،هزيت ايدي

_ نعمة طلعت الطنگوغه وغاثيه عدنه

اندارت علي

حواري : شبيج تحجين وي روحج ؟

_ هيج تخبلت

حواري : جا راح اگول لحماي يطلگج عمن ما عوزنه مخابلين بركة كافي علينه

بركة : هسة انا يمج تتحارشين بي

حواري : شبيج اليوم چنج بومة

بركة : مابي شي شبيچن بس ضايجة لان ما جاوبت

عبد الحق : ليش ما جاوبتي ؟

بركة : راسي يوجعني عارفت بروحي ما راح أجاوب

عبد الحق : يله لا تضوجين خيرها بغيرها تعوضين

بركة : شلون اعوض هذا الدكتور فد حقنه لا يرحم ولا يخلي رحمة الله تنزل، هم يصعب الماده وهم متشدد

عبد الحق : جا اذا تضلين هيج تحرگين بروحج هسة يصعد ضغطج وتطيحين علينه

بركة : اصلا هو صاعد

عبد الحق : صدگ عود تحجين ؟

بركة : أي والله ،شسويله يعني والله ترا مليت منه

ضل يحجي عليها ما راضي وثاني يوم گبل الفطور اندگ الباب ومن صحت منو اجاني صوته ،صرت بسد الباب وفتحته گبل لا احاجيه حضني، دفعته اتلفت

_ صدگ تحجي أنت

برهان : جا چذب

_ لو أبوي وسياف هنا وشافونه چان طميت غوحي منوغاك

برهان : شفتهم يم بيت جدي واجيت ،شني هيج انا زايعها فد نوب

_ اوووف بغهان

طلعت امي من شافته سلمت عليه وردت طبت جراني وراه للديوانية بس طبينا گالي

برهان : ها شو انخطف لونج ولسانج ضاله بس بالموبايل تمديه علي

_ احمم

جر شالي من راسي

برهان : بدون حجاب احلى

مديت ايدي اريد اخذه بس رفع ايده، نترت

_ اطينياه

برهان : اخذيه

_ وين اللوح

برهان : اشيلج ؟

_ اطينياه وفضها عليش تشيلني

بايده الثانية رفعني

برهان : اخذيه

جريته من ايده بس بخباثة رفعها اكثر وتقرب على رگبتي

برهان : اريد اقنع روحي اوخر وما اگدر ،الملائكة صافنة على صيامي هسة

رفعت روحي اكثر ومن صار الشال بأيدي كلتله

_ نزلني

بس وخر ايده انا طحت ،كضيت رچليه متوجعة وگعدت ادردم من دنگ گبالي بملامه گلتله ضايجة من ترصفه

_ ليش طيحتني ؟

برهان : أنت گلتي نزلني

_ نزلني مو تطيحني

برهان : تأذيتي ؟

رفع ثوبي يشوف رجلي، جريت روحي مستحية

برهان : شبيج ؟

_ أنت شبيك ؟

برهان : عادي اشوف تراني زلمتج

_ وخر خلي اگوم

گام عدل وگفته بعد ما چان ثاني ركبته ومگابلني

برهان : راح امشي انا ،وبالليل امرن لجدي حتى نحدد موعد العرس

_ ياعغس ؟

برهان : عرسنه

_ بسم الله الغحمن الغحيم ،تغه ما صار هواي من عقدنه وبعدني ما متعلمه عليك

برهان : سهله اعلمج علي يمي

ما اطاني مجال احجي و خله ومشى ،عضيت اصبعي متنرفزه منه وگمت هديت على امي و وهي گضتها علي

حنان : زين يسوي

°نسمات°

ورا رمضان ب أيام قليله صار عدي امتحان ،هذيج النوبة غلست على المحاظرة وعدت بس هسة ما اگدر طلعت من الغرفة حايرة اذا ما امتحنت ارسب لان تنضاف على السعي السنوي

زهرة : شبيج خالة ؟

مشيت وگفت گبالها

_ باجر امتحاني خالة

زهرة : مو گلتلج ياخذج جعفر وانا امشي وياج

_ ليش الا جعفر

زهرة : جا غير محسوبة عليه ومايصير نعبره و نخلي غيره ياخذج

استسلمت وخليتها تحاجيه وصدگ بالليل ومشينا حتى

نصبح هناك ،بنص الدرب وخاله نامت وانا عيوني ضلت

معلگه وياه خاف لا يغفى ونتدولب عمن مبين عليه تعبان اليوم الا گضوا الحصاد ...

#خِلخال_مُشوه🪞

#بــارت__64ج2

#بقلم_الكاتبة_زُمرده

عيونه چانت كلساع تجي علي بالمراية بس ابد ما حجه ومن ،وصلنه گبل نمت البيت نضيف وبس ترابه

خفيفة بيه گعدتني خالة زهرة حظرت روحي ومن التوتر ماگدرت اكل ،ضليت متانيته و واگفه اراجع بالماده مناه

لمن كمل وطلع گبلي وراه مشيت صعدت ليگدام وحرك

السيارة متوجهين ل جامعتي وگبل لا انزل بايده رفع كمامتي يوصيني

جعفر : لا تنزعيها ابد مناعتج ضعيفة تنصابين بساع

هزيت رأسي ب أي ونزلت ،وبس طلعت من الامتحان لگيته بعده متانيني ما حاجاني وبس أشرلي اصعد

صعدت وانا بگلبي احجي عليه ،شعدوه هيج يحب الزعل ،انداريت عليه مستغربة من گال

جعفر : نتغده برا

_ وين ؟

جعفر : اخذج ل مطعم اكلت يمه نوبة من النوبات اكله كلش طيب ونضيف

ما اعترضت لان صدگ چنت مختنگه وبحاجة اطلع بس گلتله

_ وخالة ؟

جعفر : ناخذلها ويانه

سكتت وبس وصلنه للمطعم وطلب اكل گال وهو يطگطگ بالسويج مال سيارة إلى الميز

جعفر : اريد اسولف وياج اذا ترضين .

_ شتسولف ؟

جعفر : سالفه تخصني انا وياج .

اشرت على روحي

_ انا وياك ؟

هز رأسه ب أي وسكت من اجه جابوا الاكل ،فتحلي قوطية اللبسي وقدمها گبالي يباوع عل ايدي

جعفر : اظافرج طوال

باوعتلهن ورديت باوعتله

_ احبهن

جعفر : حلوات ،اكلي

مديت ايدي على الاكل مستحيه أول مره اگابله وحدنه، اكلت شي خفيف ومسحت ايدي بالكلنكس

جعفر : شني شبعتي؟

_ أي

جعفر : چذابه حتى ريوگ ما متريگة ،مستحيه مني ؟

هزيت رأسي ب لا ،شال شوي لحم خلاه گبالي على التمن

جعفر : اكلي

_ ما اريد شبعت

جعفر : اكلي حبابة حتى نتصالح

_ ليش احنه شوكت تعاركنا ؟

جعفر : اكلي واگلج

اكلت لگمتين ورديت سألته

_ ليش ضايج مني ،نوبات احسك ما تطيقني

رفع رأسه موسع عيونه مستغرب من الگلته ،أبتسم وشرب من قوطية الببسي مالتي

جعفر : العكس نسمه العكس كلش

_ شلون يعني ؟

جعفر : انا حابج مو ما طايقج

صفنت بوجهه متيهه الجواب وبأذني تررد ضلت حجايته

_ حابني ؟؟؟

هز رأسه ب أي وگام

جعفر : ماشي اغسل گومي ادليج على حمامات النساء

گمت اعدل ب صايتي ومشيت وراه جنطتي ب ايدي طبيت غسلت وطلعت ادور عليه بعيوني من بعيد شفته جايني وبس وصل عدي گال

جعفر : تعاي

كض ايدي وعبرنه من كومة زلم صاير المطعم هوسة وبس طلعنا وصعدت بالسيارة رد يجيب غده خالة

حط الاكل وره وصعد باوعلي وگبل لا يسوق گال

جعفر : ابوج ما ضل شي ويطلع ورايد اخطبج منه وراح اطيج روحي تتطين فرصه الي والروحج لان الصارلج مو نهاية العالم

بلعت ريگي اباوعله حايره، شغل السيارة و توجه للبيت تلگتنه خاله تسأل ليش تأخرنا گاللها

جعفر : تغدينا بره وجبنالج غداج ويانه عاد حتى نرد للديره

زهرة : الف عافية ،زين سويتوا عمن ما عدي حيل لوگفة المطبخ

بس مشى گلتلها بقهر

_ انا هم زيدتها عليج أنت بيا حال ياخالة واجيتي وياي

زهرة : جا خوما اعوفنج

حضنتها ما اعرف شلون اعبرلها إلى امتناني، بين ما اكلت انا لملت البيت حتى نرد وبالدرب احنه واخابروا على جعفر ،فز گلبي وشهگت من گال يسأل

جعفر : تحجي صدگ ،باجر يطلع ،الله يبشرك بالخير

وبس سداه سالته وانا ارچف اريد ابجي

_ أبوي موو ؟

تنهد ومن اكدلي على السمعته بچيت مو مصدگه

جعفر : خابرني صخر يگول انثبتت برائته وحتى الرتبة ما راح تنسحب منه

غطيت وجهي ابجي وهو وخالة انخبصوا يسكتوني وانا دموع الفرح ما فارگن عيوني

زهرة : يا ولج نسمه ،كافي عليش تبچين

_ ما صدگت يطلع خالة والله ما صدگت

زهرة : صدگي ياخالة ،راح يردلج بس مسحي دموعج تقهريني من تبچين

جعفر : خليها عمة فرحانة ،وچماله راح تخلص مني هم حگها

بهتت مصدومة من تفكيره ،ما حاجيته وحاولت ما اخرب فرحتي وخبر طلعة أبوي گبلي لگيته طاش

بليلتها ما گدرت انام احسب دقيقة دقيقة شوكت اشوفن طوله گدامي وارد احتمي بيه من الدنيا گبل الوادم ،طلعت من الغرفة وكعدت على الدرج اباوع على بيبان الغرف شوكت احد بيهم يگعد مو صبر ما ضل عدي

طفرت من مكاني من شفت خالة طلعت ،بس شافتني وگفت بمكانها

زهرة : نسومه شعدج گاعدة هسة

تحركت اوگف گبالها وبأبتسامه گلتلها

_ متانية أبوي

زهرة : بعد وكت گالوا بالعشرة يشمون يجيبوه

_ شيصبرني للعشرة خالة

ابتسمت بوجهي رغم التعب الجان مبين عليها والسبب منه فراگ ليث الصارله اكثر من شهر ونص وكل العارفناه عليه "مسافر"

شلون محد يعارف ،بس من دگوا اسمه بالمطار وبين هو طالع من العراق بعد اسبوع من طلعته من القرية

والمحير الكل چان ،هو طلع بدون حتى چنسيته و هدومه شلون گدر يسافر، مشيت ورا خالة للمطبخ ومن شفتها مشت يم الطباخ گلتلها

_اگعدي خالة انا اسوي الريوگ

اندارت علي وما اعترضت ،گعدت على الكرسي وانا صرت اتحرك واسألها شني اسوي ،گعدوا كل الموجودين ومنهم امي الي بس غسلت وجها سألتني

ناهدة : جا شوكت يجي ابوج ؟

_ بعد ساعتين

ناهدة : هواي

ملت رأسي

_نصبر صبرنه اكثر من سنة على فراگه

أنا حتى اخليها تتحمل الساعتين هذن بس چانن حتى عدي ما يمشن وما صدگت عيوني ساعة الشفته، ركضت لحضنه مثل طفل زغير ضايع ولگه اهله، حضني يمسح على رأسي وانا اشهگ بحضنه

واردد

_ مشتاگتلك والله ،عيوني ما جاي يصدگن شوفتك

وخرني يسمح بعيوني وذاك أبوي متغير كلش ،لحيته طولانه وجسمه الچان معتني بيه ضعفان، باسني من رأسي

غافر : رديتلج بوية ،رديت وما افارگج بعد للموت

شهكت

_ اسم الله عليك ريت عمري كله يندار على عمرك يابعد كل ناسي

انداريت من عيونه صارت وراي ،هداني ومشى الامي باسها من راسها وطب جوه ورا الولد ،كل ساع اباوعله واردن ابجي گضيت اليوم بالدموع ،وبالليل چنت گاعدة بالصالة وسمعت صوته يصيحني ،گمت و وراي خالة صاحت

زهرة : ولج لا تركضين ،نسمه هسة تطيحين خايبة

بلايه ما اندار گلتلها

_ماعلي شي خالة

كملت دربي وبس شفته واگف عد باب المطبخ گلتله

_ ها بوية

غافر : بعد ابوج اريدن فراش

_ تدلل، امشي وهسة اجيبنه وراك

بساع جبتله فراش ومشيت للديوان الخارجي بس طبيت ضليت واگفه بمكاني من شفت جعفر گاعد يمه گام يريد يطلع من شافني ،حاولت اسوي روحي طبيعية ونزلت الفراش من ايدي

_ بعد بوية شتريد ؟

غافر : سلامتج

طلعت وانا افكر وي روحي ،شريد جعفر من ابوي

جفون : هاي شبيها الوادم بس تصفن

حطيت ايدي على گلبي وغميتها بايدي الثانية

_ فززتيني صدگ تحجين

جفون : لا چذب ،شبيج ؟

_ كلشي مابي

جفون : المطلوب اصدگ ؟

_ الفقمة وخري مني

جفون : مو چانت البطريق

_ ولج بالكوة تتحركين

دنگت تباوع على بطنها وردت سألتني

جفون : سمناننه كلش مو ؟

_ راح تنفچرين

جفون : هسة اگعد ابجي

ضحكت وكضيت ايدها اصنف عليها

_ لا تمشين وحدج لازملج احد يتچيلج

جفون : اهووو شبيكم وياي ؟

_ كلشي مابينه عيني بس مكزكزين عليج ،أول مره اشوف حامل هيج حلوة

رمشيت بعيونها عود تسوي روحها خجلانه، تونه طبينا و اجه ورانه صخر يصيح وگف بنص الصاله

صخر : نوووح ،لك نوووح انزززل

على صياحه كل النايمين گعدوا ومنهم جدهم ،ضلوا بس يردون يفتهمون منه شكو وهو خبص الدنيا على نوح

وبس نزل صاح عليه عيونها صايرة بگصته لو يكض نوح اضن يموته

صخر : أنت المطي الجواز ل ليييث

بهت نوح وضل واگف بمكانه بلايه جواب ،تلفتت واستقرت عيونه على ابوه

نوح : احميني بوية بداعة امي

صخر : يعنييي مسويها صددددگ

محمد : شبيك تصيح اطينه مجال نفتهم ،احجي نوح وضحلنه

استغفر يمسح وجهه واندار على عمي محمد

صخر : طلع هو وبرهان يندلون حتى مكانه وساكتين

رأجس : شجاي تحجي أنت ؟

صخر : مثل ما تسمع جدي ،اسبوع ضال بشقة برهان ببغداد بالتحديد هو مطيه المفتاح مالتها

اشر على نوح

صخر : وهذا موديله الجواز وكل المستمسكات وحتى هدوم ماخذله

وي كل حجاية يحجيها خالة تتوسع عيونها مصدومة من سوايتهم

زهرة : وساااكتين واحنه گلوبنه نار عليه ،شلون سكتت ولك وتشوفني اريدن اموت عليه ما گلت امي خطية احجيلها

نوح : هددني ما احجي والله وگال اذا طلعت منك اعلگك بالنخله مگلوبي واعارف بيه يسويها

ضل ياكل رزاله من كل جهه وثاني يوم تگابلوا عليه ابو علي وصخر

سمير : اطيني رقمه

نوح : ماعدي

جراه صخر من ياخه البدي مالته

صخر : اطيني الرقم لا وعلي احبسك بالورشة

نوح : بمكان ابن چسار مو ؟

عطاء : ويگطعون عليك الاكل والشرب مثل ما سووا بيه

طلع موبايله

سمير : احجي بساع

نوح : صفر سبعة مكعب حزن وجروح وعلى روحي الفاتحة

صاح متوجع من طگاه صخر ،غطيت حلگي وصارت عيوني على الگاعد على اعصابه

رأجس : فضوهااا عاد غير سالفة هاااي

نوح : جدي اذا اطيكم الرقم تضمنون سلامتي ؟

رأجس : شحده يتدنالك

نوح : جا خوش ،تانوني اجيبن الموبايل عمن ضميته

ركض فوگ جاب الموبايل ونزل ،ردلهم الرقم كتبه ابو علي وخابره بنفس الوكت ما اجاه رد ،خابر اكثر من مره وماكو وتوهم يحجون ودگ موبايل نوح كل العيون صارت عده، حمحم وگام ،بس ما لحگ يشرد لان صاح بيه جدي

رأجس : افتح سبيكر

بلع ريگه وباوع ل جفون

نوح : انا حسني گلبي ابني راح يجي وابوه مودع

رمشت بعيونها واشرتله على صخر من اخذ الموبايل من ايده

صخر : افتح الرمز

فتحله الرمز يردد

نوح : الله يرحمك نوح

دگ على ليث واطه الموبايل ل نوح وبس رد عليه سمعنا صوته صاح

ليث : المن مطي رقمييي

نوح : وعلي تگابلوا علي وجبروني وهسة جاي يسمعوك

ليث : هااه ،سهله بعيني نوح سهله ،اذا ما اچفص ببطنك شوووف

گام جر الموبايل منه وخله الكل بحالة صدمة من گال

رأجس : رد واخطبها الك

حتى ليث ما حجه ،هدوء غريب صار ،ما متوقعين منه يتنازل

رأجس : الك منا لباجر اذا ما اشوفنك گبالي احسب غيرت قراري

شمر الموبايل على نوح كضاه يتحسب على ليث و طلع يحجي وياه ،ندستي

جفون : عود صدگ يخطبها ؟

_ خايبة اضن جاي نتحلم

جفون : شو گرصيني

گرصتها من زنداها فركت عيونها بايدها

_ لا ولج صدگ مو حلم

حاجوه الظهر قبل الوحده بالليل سمعنى صوته ركضت غاية تتلكاه والولد كلهم بره متانينه، وراها طلعنا، اصواتهم عاليه بيهم اليرزله وبيهم يعاتبه على سوايته وهو گاضيها يضحك

برهان : لو تغطوه بالطين هم ما يهتم لا اتعبون رواحتكم

وصدگ من ضحكته ما چان مهتم غير بس لقرار جدي ،بس طب وشافها واگفه فتحلها ايده حتى تحضنه، دارت وجها زعلانه ،ضحك واجه حضنها

ليث : يابة اعتذر

غاية : مايفيد حتى الاعتذار زعلانه منك كلش

ليث : افا انا ليوثي شلون تزعلين مني ،مو على الاساس ما اهون عليج

غاية : جا انا هنت عليك ،تسودنت والله من طلعت لا ليلي ليل ولا نهاري نهار كل بالي عدك

ليث : يعني ما نتراضى ؟

برطمت مقهوره وحضنته

غاية : اهم شي هسة أنت بخير

وخرها ياشرلها على روحه وفرحته ذيج هي مبينه

ليث : ماكو يوم عشت بيه بخير مثل اليوم

غاية : يابعد روحي الله يدوم الضحكة على وجهك أن شاء ما تفارگها ابد

گرص خدها وباس اصابعه

ليث : امين الله يسمع منج

باوع لخالة زهرة من صاحت باسمه، مشالها وبساع حضنها

يعتذر على سوايته ،طب سلم على جدة و وراه عمه عطاء تداهر بيه ،تلفت يسأل

ليث : جا جدي وين شو ماكو ؟

غضة : بالديوان ،كلش صاير بخاطره منك امشي راضيه

ليث : سترك ربي

°غاية°

مشيت وراه والولد كلهم طبوا ،چان أبوي گاعد يمه اندار على صخر

ليث : شلون يرضى جدك ؟

صخر : راح ضل كارهك سنة سنتين بس لا توضج يصالحك

سمه بسم إلله وطب ،ضليت واگفه اباوعله سلم على

أبوي طبيعي ودنگ گبال جدي حاير شني يحجي

ليث : اعارف بيك شگد ضايج مني وحگك علي بس والله ياجدي الصار خارج عن ارداتي انا زلمة من حگي اختار الاگضي وياها حياتي

ما رد عليه وگام يريد يطلع ،اعترض طريقه والولد يتوسطوله حتى لا يضل الزعل بيناتهم

ليث : شتريد من ايدك هاي ل ايدك هاي بس خلني اخذها سنين صار وانا ماخذ عهد على روحي لو ردت امشي عليها

بين القهور من فعلته وبين بده يلين گاله

رأجس : جا وتوگف بوجهي تگلي راح اطلع عن شورك

ليث : ساعة عصبية

محمد : اعذره بوية خبالات العشگ هاي سودنته

وبس أبتسم جدي الولد گلبوا على ليث ما راضين چي سامحه

صخر : مايصير هيييج انا سنة اتوسل وما رضيت علي

برهان : وانا بس لان الي ايد بالسالفة كل ما يشوفني يشحتني

نوح : وانا يگلي الا اخذ بت منير منك

فقار : هذا اقوى تهديد

باس ايد جدي وباوعلهم يغيضهم

ليث : انا وجدي لا تتدخلون أنتم

جعفر : انا هم اريد اعرس

سياف : مو عاقد

جعفر : لا اريدن عرس خوما هيج على الساكت

ليث : حطيت روحك خوب

وبهل ليلة توسلت بعزيز بس حتى اضلن ،صعدت وراه من صعد وبس شافني ابتسم

ليث : يابة هلا بالشهدت على كل العاشه اخوها

حرگتني عيوني اريد ابجي وانا اگله

_ ما يمرك حزن بعد وما اشوف غير الضحكة على وجهك

گعد على الجرباية وجر نفس طويل وخلاني ابچي من گال

ليث : راح يدگن العشر سنين ،كل التعب بيهن نسيته اليوم

ضليت گاعدة يمة للفچر نوبة نضحك ونوبة يمرنا ذكر الايام البيهن انكسر وارد اگله

_ يله يله تاليها راح تصير كواكب يمك وبعد حتى ما تشكيلي تشكيلها

رفع شعره وضم شفته عارفته اختنگ ،گمت وگفت يمه ايدي على جتفه

_ خلهن ينزلن دموعك براحتهن الهن حگ يبچن عيونك من الفرح

دفن رأسه ببطني وبجه برچفه وياه أنا بچيت ما گدرت اكضن روحي وبين عيوني مرن الايام البيهن شكد تأذه ،و ورا يومين مشت امي وجدة وعمة عطاء لزگت روحي حتى امشي وياهن

جفون : جا ما يصير أنت تمشين وانا اضلن غير أخوي هم

نمسات : جا وانا منو يضل يمي

جفون : جدة اخذينا شبيج

غضة : هيديي ولج وبطلي سوالفج باجر عگبة صايرة ام وبعدها تتلزگ

جفون : خلف الله عليج

لبست عباتي وشلت كواكب وطلعت من صاح علينه انا اول وحدة بيهن

طلعت وبس شفته واگف يم السيارة أبتسم وهوستله بصوت ناصي

_ عريسنا چگليته ،حامض حلو باكيته

أبتسم وشمر چگارته

ليث : ذكرتيني ب الاء حسين

_ هو انا حافظتها منه

اخذ كواكب مني ومن صعدت اطانياها ،الظهر خابر أبوي على سعد وگاله امي تريد تحجي وي حرمته وبلغتها

راح نجيهم ،بس وصلنه نزلت انا اول وحدة متلهفه اكثر من أخوي، صاحت علي جدة

غضة : ولج غاية وين تدگين الباب

وگفت بمكاني متانيتهن شوكت يوصلن وبس دگت الباب امي مشى ليث و وصاني اخابره حتى يجي ياخذنه، فتحتلنه الباب مرة اخوها تلگتنه احلى ملگه الابتسامة مرسومه على وجها قدملتنه الماي و شوي وطبت علينه كوكبة وراها داليا صاحبتي أول ما داومت ،انصدمت من شفتها وگمت فازة من مكاني

_ داليا

تقدمت علي مبتسمة سلمت علي وبس وخرت انا سألتها

_ عود صدگ مرة أخو كواكب أنت ؟

هزت رأسها تذكرني

داليا : الچنت احجيلج عنه اسماعيل تتذكري؟

هزيت رأسي ب أي

داليا : غير اخوها وفد انصدمت من دريت أنت وكوكبة صاحبات

_ يا يا شني هاي الصدفة

كوكبة : صارلي ساعة واگفه يمج

ضحكت وسلمت عليها اتعذر منها، وبس گعدنه جدة بدت تحجي بالموضوع الجاين لخاطره

غضة : أنتم الكم معرفة بينه واحنه اليوم جاييكم بطلب نتمنى ترضون عليه

سكينة : گولي حجية عيوني الج

غضة : سالمات أن شاء الله، احنه نريد نخطب كوكبة بتكم ل ابن محمد ليث

صفنت سكينة واندارت على كوكبة المدنگة رأسها ردت حجت وي جدة

سكينة : نتشرف بيكم والله ،بس تطونه وكت حتى نشور اخوانها واكيد ناخذ موافقتها

غضة : هذا الحگ يمة

ندستني

عطاء : غاية اخذي رقمها

سويت مثل ما گالت عمة واخذت رقم سكينة ،ومن خابرته گال

ليث : ها بشري

_ تعال اخذنه

ليث : جايكم

شوي خابرني واگف بالباب ودعناهم وطلعنه وبس صعدنه بالسيارة گال

ليث : ها احجلي شصار ؟

زهرة : اصبر يمة چم يوم ويردولنه خبر

حط ايده على راسه يحجي وي روحه ،ضحكت ومديت ايدي على چتفه

_ تانيت سنين تاني شوي بعد

ليث : احاول

تلگنه البنات من الباب واحنه نحجي جفون گضتها علينه

جفون : لو ماخذاتني

زهرة : هيدي يمة كافي تتحركين

گعدت على باية الدرج تحجي علينه ضايجة، يومين وردولنه الخبر ،لمعة عيونه الشفتها ما انساها ساعة الگلناله

_ رضت

واجه اليوم البيه اخوي يفرح ،عوضه چان بنفس الانسانة النذرلها عمره، صعدت اركض حتى اشوفنه

وبس فتحت الباب ضحكت

_ صدگ عريس فدوة لطولك

عدل سترته ورد يباوع الروحه

ليث : وحگ الحسين ما مصدگ ،اضن الليلة ما انام من الفرح

_ اذا من الفرح عادي ،يله انزل الولد جوه يردوك

طلع من الغرفة وانا وراه ،جوه عد الدرج ملتمين الولد

وعماتي والبنات ،هوسات وچگليت وضحكة محب انتصر بمحبوبته بعد تعب ،هوستله

شايلة واحد من جهالها وانا هلهت وياها من گالت

هيوفة : ليوثي التين يمحلي البساتين عمامة شيوخ واهل امه السلاطين ليوثي التيين

وياها هوست بس گضت هوستها

_ واخونه خوش اخو يستاهل الهوسة ،واخونه خوش اخو يستاهل الهوسة

نزل وگف عد جدة ،يگللها

ليث : جدة بداعة الحسين هوسيلي

"هاي الرادها وهاي التمناها" ...

وها قد نال نهاية الصبر وذكر ذلك العاشق كمثال للوفاء عندي انا وعند اصحاب تلك الحكاية ...

انه بطل لحكاية باكملها

عند الضفاف الملتقى كان

يعلم من هي لكن سألها

" من أنت"

حتى ارتجفت خوفا قبل أن تعلم

"انه الامان لها"

•—————————•

هاي القفله الي صار سنة اتمناها

مشاااعر متلخبطة

طن طن فرح

صار الوكت البيه صدگ نهوس لاخونه

─── ⋆⋅☆⋅⋆ ───

فجرها ليث فجرهااا

شنو راح تكون النهاية برائيكم

وهل عدو الغريبات راح يجي

يوم يقتنع ؟؟

انتن بس تخيلن تصير صدگ

وياخذهااا

يمةةة اذا مو اكثر لحظة نتمناها

اطلع اني مو زمرد

•---------•

وهسة هنا نجي لبرهان الي

انتصر بحبه واخيرا من بعد

سنين

سيوف برائيكم راح تصير حبابة

وياه لو تشلع گلبه

زين شفتن اعتراف الشحمة