رواية الدكتورة شمس الفصل السادس 6 بقلم فاطمه شعبان


 رواية الدكتوره شمس الفصل السادس 

كان يوم عادي في مستشفى الهواري التخصصي، كل قسم ماشي بنظامه، والدكاترة بيتابعوا الحالات، والإدارة مشغولة بتجهيز تقارير الأسبوع.
شمس كانت في مكتبها بتراجع ملفات المرضى، ومريم قاعدة جنبها بتكتب بعض الملاحظات.
مريم: – إنتِ مش بتزهقي من الورق ده؟ من ساعة ما دخلتي وإنتِ ماسكة ملفات!
شمس ضحكت: – أعمل إيه؟ هو إحنا جايين المستشفى نتفسح؟
مريم: – طب خدي نفس كده، اشربي القهوة اللي بردت دي.
شمس بصت للكوباية: – دي بقالها ساعة، دي محتاجة تتعملها شهادة وفاة!
مريم انفجرت في الضحك: – والله إنتِ دمك خفيف، بس وقت الشغل بتتحولي لشخص تاني خالص.
شمس: – عشان المرضى مش ناقصين هزار، يلا خلينا نخلص اللي ورانا.
وفي نفس الوقت، كان فارس في مكتبه بالشركة، قدامه مجموعة من الملفات، والسكرتير دخل عليه ومعاه ظرف رسمي.
السكرتير: – صباح الخير يا فندم، وصل لحضرتك خطاب مهم من وزارة الصحة، واتبعثت منه نسخة لإدارة المستشفى.
فارس: – حطه هنا.
السكرتير: – حاضر يا فندم.
فتح فارس الخطاب وبدأ يقرأه، وكان محتواه إعلانًا عن مؤتمر طبي عالمي في دبي، بتنظيم وإشراف الجهات الصحية المختصة، بحضور نخبة من الخبراء والاستشاريين ورؤساء الأقسام الطبية من داخل مصر وخارجها.
المؤتمر مدته عشرة أيام، والحضور مطلوب لرؤساء الأقسام والأطباء المختارين، لمناقشة أحدث التطورات الطبية، وتبادل الخبرات، ومناقشة موضوعات مهمة في مختلف التخصصات.
فارس كمل قراءة الخطاب، وبعدها فتح الكشف المرفق بأسماء المدعوين.
بدأ يقرأ الأسماء واحد ورا التاني، لحد ما عينه وقعت على اسم معين.
الدكتورة شمس.
وقف عند الاسم، ورجع قرأه مرة تانية.
فارس بصوت واطي: – شمس؟!
رجع بص للكشف كله، واتأكد إن الاسم موجود فعلًا.
فارس: – يعني إيه؟ كل رئيس قسم هيسافر؟ وعشرة أيام كاملة في مؤتمر؟
فتح التقويم قدامه وبدأ يحسب الأيام.
عشرة أيام مؤتمر، غير يوم السفر ويوم الرجوع، ومعاهم يومين راحة قبل السفر وبعده حسب ترتيب الإجازات.
يعني شمس ممكن تغيب عن المستشفى حوالي أسبوعين!
رجع بضهره على الكرسي، وسند إيده على المكتب.
فارس بينه وبين نفسه: – معقولة؟ يعني هتغيب كل المدة دي؟ طب والقسم؟ والحالات؟ ومين هيتابع مكانها؟
وبعدين افتكر إن دكتور أحمد موجود، وإن المستشفى فيها فريق طبي كامل.
لكن الفكرة ماطمنتوش.
فارس: – طب ما أبعت دكتور أحمد مكانها، وهي تتابع الشغل من هنا! مش لازم هي اللي تسافر.
قام من مكانه وبدأ يتمشى في المكتب.
– بس المؤتمر عالمي، ومهم جدًا، وده ترشيح ليها، ومينفعش أحرمها من فرصة زي دي لمجرد إن القسم محتاجها.
وقف فجأة، وبص للخطاب تاني.
– طب وأنا مالي؟ ما هي دكتورة، ومن حقها تحضر المؤتمر زي أي حد.
رجع قعد، وفتح تليفونه، ودخل على اسم شمس.
فضل باصص للشاشة شوية.
كان عايز يتصل بيها، يسألها إذا كانت عرفت بالخبر، ويقولها إن غيابها هيعمل مشكلة في المستشفى.
لكن الحقيقة إنه ماكانش عارف هيقول إيه بالظبط.
هل هيطلب منها تعتذر عن السفر علشان مصلحة المستشفى؟
ولا هيعرض إن دكتور أحمد يسافر مكانها؟
ولا يسيبها تسافر ويقبل إنها تبعد عن المستشفى الفترة دي كلها؟
مسك التليفون، وبعدها حطه تاني.
فارس: – لأ، مش هينفع أكلمها دلوقتي. لازم أفكر الأول.
رجع بص للملفات اللي قدامه، لكنه ماقدرش يركز في ولا ورقة.
دخل السكرتير مرة تانية.
السكرتير: – فندم، حضرتك عندك اجتماع بعد نص ساعة.
فارس من غير ما يبصله: – أجله.
السكرتير: – لحضرتك اجتماع مهم مع الوفد الأجنبي.
فارس رفع عينه: – قولت أجله يا أستاذ، لما أكون جاهز هبلغك.
السكرتير: – حاضر يا فندم.
خرج السكرتير، وفارس فضل قاعد مكانه.
كان مستغرب من نفسه، عمره ما كان بيأجل اجتماع مهم بسبب خطاب أو خبر يخص المستشفى، لكن النهارده خبر سفر شمس قدر يشغله عن كل حاجة.
وفي المستشفى، وصل إخطار رسمي للإدارة الطبية، وبدأت السكرتارية تبلغ رؤساء الأقسام والأطباء المرشحين.
مريم دخلت مكتب شمس وهي ماسكة ورقة.
مريم: – شمس! عندي ليكي خبر.
شمس: – خير يا مريم؟ وشك منور كده ليه؟
مريم: – إنتِ اسمك موجود في قائمة المدعوين لمؤتمر دبي الطبي!
شمس رفعت عينيها باستغراب: – مؤتمر دبي؟ إنتِ بتتكلمي بجد؟
مريم: – أيوه، عشرة أيام كاملة، مؤتمر عالمي، واسمك موجود ضمن الأطباء المرشحين.
شمس أخدت الورقة وبدأت تقرأها.
شمس: – يا خبر! ده مؤتمر كبير فعلًا، وفيه تخصصات وخبراء من بلاد مختلفة.
مريم: – ومش بس كده، الحضور مطلوب من الأسماء اللي اتبعتت، يعني فرصة مهمة جدًا.
شمس ابتسمت: – الحمد لله، دي فرصة حلوة، الواحد يتعلم ويشوف خبرات جديدة.
مريم: – طب وإنتِ هتوافقي؟
شمس: – طبعًا، لو الإجراءات اتظبطت، دي فرصة مش بتتكرر كل يوم.
مريم: – طب وفارس بيه؟ تتوقعي هيوافق بسهولة؟
شمس ضحكت: – هو المؤتمر دعوة رسمية، مش رحلة فسحة، وبعدين أنا مش هسيب شغلي من غير ترتيب. كل حاجة ليها نظام.
مريم: – أنا بس بقولك، أصل إنتِ عارفة فارس بيه بيحب كل حاجة تبقى تحت عينه.
شمس: – يبقى يتعود إن فيه ناس تقدر تتحمل المسؤولية حتى وهي مش موجودة.
مريم ضحكت: – ربنا يستر من رد فعله!
شمس: – سيبك منه دلوقتي، خلينا نشوف إجراءات الترشيح، وبعدها نرتب شغل القسم قبل السفر.
وبالفعل، بدأت شمس تراجع جدول الحالات، وتفكر إزاي تجهز كل حاجة قبل المؤتمر، وتحدد مين هيتابع كل ملف خلال فترة غيابها.
كانت فرحانة بالفرصة، لأنها عارفة إن حضور مؤتمر عالمي هيفرق في خبرتها، وهي من البداية سافرت للصعيد علشان تبني مستقبلها وتثبت نفسها.
أما فارس، فكان لسه في مكتبه، والنهار قرب يخلص.
فتح تليفونه مرة تانية، ودخل على رقم شمس.
المرة دي كان مصمم يتصل، لكنه قبل ما يضغط على زر الاتصال، سمع صوت أمه في ذاكرته وهي بتقوله:
«إنت لازم ترجع تتابع شغلك، مش معقول تفضل في المستشفى طول الوقت.»
ابتسم بسخرية من نفسه وقال: – أهو رجعت أتابع شغلي، بس إيه اللي مضايقني في سفرها؟
قفل التليفون، وقرر يروح البيت.
وصل فارس البيت، دخل الصالون، ولقى أسماء قاعدة بتقرأ.
أسماء: – أهلاً يا حبيبي، رجعت بدري النهارده؟
فارس: – مساء الخير يا أمي.
أسماء: – مالك؟ وشك مش مريحني، فيه حاجة؟
فارس حاول يبتسم: – لا يا أمي، مفيش حاجة، شوية مشاكل في الشغل.
أسماء: – مشاكل إيه؟ المستشفى ولا الشركة؟
فارس: – شوية ترتيبات في المستشفى.
أسماء: – طب اقعد واحكيلي، يمكن أقدر أساعدك.
فارس: – مفيش حاجة تتحكي يا أمي، مجرد موضوع شغل وهخلصه.
أسماء بصتله باهتمام: – إنت متأكد إن الموضوع شغل بس؟
فارس: – أيوه يا أمي، متقلقيش.
أسماء: – طيب يا حبيبي، بس متشيلش كل حاجة لوحدك. إنت عندك ناس مسؤولة تقدر تعتمد عليها.
فارس: – عارف يا أمي.
أسماء رجعت تكمل قراءتها، لكن عينيها كانت بتتابعه وهو طالع على السلم.
دخل فارس أوضته، غير هدومه، وقعد على السرير، وبعدها مد إيده للتليفون وفتح الخطاب تاني.
قرأ اسم شمس مرة جديدة.
فارس بص للسقف وقال لنفسه: – هو في إيه؟ أنا مالي أصلًا؟ دي دكتورة شاطرة واترشحت لمؤتمر مهم، والمفروض أكون أول واحد يشجعها، مش أقعد أفكر إزاي أمنعها من السفر!
قفل التليفون وحطه جنبه.
حاول ينام، لكنه فضل يتقلب ويفكر.
– طب لو سافرت، مين هيتابع القسم؟ ولو حصلت حالة مهمة؟ ولو احتاجناها؟
وبعد لحظة سكت، وسأل نفسه سؤال مختلف:
– طب ولو أنا مش عايزها تسافر أصلًا؟
فتح عينيه فجأة، وقعد على السرير.
– إيه الكلام ده يا فارس؟ إنت مالك؟ مش عارف تشتغل، ولا تنام، ولا حتى تتكلم مع حد!
سند راسه بإيده، وأخد نفس طويل.
لأول مرة من فترة، حس إن فيه حاجة مش قادر يتحكم فيها، حاجة شاغلة تفكيره رغم إنه مش فاهمها.
وفي الناحية التانية، كانت شمس بتجهز أوراقها الخاصة بالمؤتمر، وبتكلم أمها في التليفون.
الأم: – يعني هتسافري دبي يا بنتي؟
شمس: – أيوه يا ماما، مؤتمر طبي عالمي لمدة عشرة أيام، ودي فرصة كبيرة ليا.
الأم: – ربنا يوفقك يا حبيبتي، وتتعلمي وتستفيدي، وترجعي بالسلامة.
شمس: – ادعيلي يا ماما، أنا نفسي أحقق حاجة كبيرة في شغلي.
الأم: – ربنا يفتحها في وشك يا بنتي، إنتِ تعبتي وتستاهلي كل خير.
شمس قفلت المكالمة وهي مبسوطة، وبدأت تفكر في تفاصيل السفر والمؤتمر.
لكنها ماكانتش تعرف إن مجرد اسمها في قائمة المدعوين قدر يقلب يوم فارس كله، وإنه لأول مرة هيبقى قدام اختيار مش سهل عليه.


تعليقات