رواية ارحام متناثرة الفصل الثامن بقلم مجهول
مشتاق☆☆ صارلي فترة طويلة ماشايف بيت عمي مكي ابو غسان تقريبا اكثر من سنتين ..
جنت اعرف عدهم بنية شكرة يكولون تشبه بيبية ابوية الله يرحمه نسخة منهة...
بس شايفهة هية وبعدهة طفلة ماشايفهة من كبرت....صاحولي بالمطبخ حتى اخذ مواعين الغدة..
دخلت شفت بنية شكرة شعرهة طويل وبي كسرة متموج ويخبل دتمشي ودايرة وجههة
وتحجي راسا استدارت والتف شعرهة وياهة واتناثر على وجهي.. واصطدمت بيه وباوعتلي بتك عين وحجت وياية بتكبر ومشت...
اتنرفزت كلش من هيج حجت وياية ...رأسا جريتهة من ايدهة ورفعتلهة حاجبي وكلتلهة...
وثول.. احجي عدل😡 هوة منو اللازم ينتبه؟
رباب☆☆ لزم ايدي وحجة هالكلمتين وياية استغربت... نفضت ايدي من ايدة وكلتلة
..وخر عني انت منو حتى هيج تحجي وياية
مشتاق ☆☆ اني من شفتهة عرفتهة هاي بنت عمي مكي لان ماعدنه غيرهة شكرهة بالعائلة
بس لبستهة ماكلتلهة اني منوكلتلهة.. سالي ابوج ويكلج اني منو.
ام غسان☆☆ شفته لأبن ام مشتاق شلون يباوع على رباب وشلون جر ايدهة وحجة
وياهة وهية كلشي ممسويتله وتالي سألته رباب انت منو وهو ماجاوبهة عاد اني جاوبتهة
هذا مشتاق ابن عمج محمد يمه 😒
رباب☆☆ باوعتلة تك عين وعابسة وجهي ومشيت وعفته
مشتاق☆☆ اتضايقت من تصرفاتهة وباوعت لامي وكلتلهة.... والله لو ما عمي مكي واكف
بعيني لا افر راسهة براشدي اخليهة تعرف شلون تباوع عدل
ام غسان☆☆ تضرب منو ياعمة😳 ؟ صدك انتة متستحي مو اني كاعدة هنا كدامك ماوكفت بعينك؟
وباوعت لأم مشتاق.... مو خابصتنه ولدي احسن تربية واحسن اخلاق هية هاي تربيتج😒 هيج يحجي كدامي لا احترام ولاتقدير
مشتاق☆☆ ليش شبيهة تربيتي مرت عمي؟
ام مشتاق☆☆ اسكت ابني اني اردهة... التفتت عليهة وحجيت وياهة بنبرة حادى شوي...
اذا على الاحترام والتقدير فہ شوفي تصرفات بنتج واذا على تربيتي فہ اني واثقة منهة يا ام
غسان الحمد لله والشكر الدنية كلهة تمدح بولدي واخلاقهم ....وماراح ارد عليج اكثر من
هيج.. بس اخذيهة كلمه مني يافضيلة لا تدخلين بين البزرة هذول يتعاركون ويرجعون
يتصافون ورة ربع ساعه وتالي احنه نطلع بصخام الوجه..
ام غسان☆☆ 😒 همست مابقى(عليه غير وسخ رجلية ) عود دتعلمني شلون اتصرف
والله يالله حجيت بصوت عالي..
شنحجي بعد لا عتب على البنيات اذا حتى
الولد يغارون من جمالهة.. سودة عليه بنيتي مصيبوه بعين من ورة حسنهة.
مشتاق☆☆ سمعتهة هيج تحجي مرت عمي صدك ضحكت شهالعقلية اني زلمه مشورب
شطولني شعرضني عمري 21 سنه اغار من بنية😐 لاصدك خزي اذا هيج تفكر هالمرة
سكتت عنهة شسويلهة الكلام وياهة عقيم وميفيد.. تركتهة احتراما لعمي... دنكت اخذت الصينية ومشيت ... بس ضل حسنهة بين عيوني وابالي..
رغم جمالهة اليسلب العقل بس السانهة الطويل وغرورهة وتكبرهة مضيع كل حسنهة.... نصبنه
الغدة وكعدنه احنه الزلم وتغدينه وكملنه وصار حجي بين عمامي وابوية
ابو قاسم☆☆ شرايكم نروح زيارة للأئمه هاي الجمعه ؟
ابو غسان☆☆ هههههه شنو هاي راضي شجاب هالفكرة ابالك ؟ بس والله يعني تريد الصدك هية فكرة حلوة
ابو قاسم☆☆ احنه عائلة وخوان ومافد يوم طلعنه طلعة سوية خلونه نروح نزور مادام هسة بدت العطلة مالت الجهال نستغلهة
ابو مشتاق ☆☆ والله اني عاجبني اروح للبصرة اريد اخذ هالجوق الموسيقي واروح...
لصديقي عندة كاع وباني بيهة بيت للضيوف وكل ما يجي يحلفني جيب اهلك وتعال بس
والله غير الصدك هناك جنه الله على الارض تخبل اليروحلهة مرة ميعوفهة بعد
ابو قاسم☆☆ اي والله خوية تخبل البصرة فينيسيا العرب يسموهة خضار ومي وحدايق وبساتين وكورنيشات ..تخلي العليل يصحة .
ابو غسان☆☆ هههههههههههه واحد متدين والثاني فالتون ارسولكم على بر وين تروحون دين لو دنية
ابو قاسم☆☆ طالما هيج ناخذ الجنوب مقطوعه نطلع كربلا ونجف وننزل للجنوب ونروح للبصرة
ابو غسان☆☆ وهاي😨 شكد يرادلنه مصرف وتكاليف.. كل واحد عائلته شكبرهة يراد كومه فلوس وانتو تعرفون وضعي هاليومين مو تمام
ابو مشتاق☆☆ احنه خوان ونتعاون بينه هية سفرة عائلية ونريدهة من العمر.....نتونس
ونترفه هيج طلعات تغير المزاج وبعدين البيت موجود يعني لا نحير بفندق ولا طلابته.. والله
ياخوية نحتاج هيج ونسة لأن طلعت روحنه جبناهة ثورات بأنقلابات ومشاركات بحروب
وية دول الجوار وشمستفادين من هالبلاوي بس الشيب والطيحان حظ وكصر العمر
ابو غسان☆☆ اي والله لاعاب حلكك
ابو قاسم☆☆ ها يعني متفقين ؟
ابو غسان☆☆ وهاي ياسيارة التلمنه احنه ومكاميعنه😑؟
ابو مشتاق ☆☆ خوية شبيك سيارات مكومه نأجر سيارة جبيرة تكفيكم وسيارتي بيهة
عائلتي ونروح وتتوزع على الروس الكروة والميكدر على كروته نعينه بيناته بين ما الله يسهلة عليه
ابو غسان☆☆ يلة على بركه الله....خلينه نغير جو نشوف دنية
ابو مشتاق☆☆ خوش..الجمعه الجاية نروح حضرو نفسكم نبقى فد اسبوعين ونرجع...
مو تخبصونه هناك كلمن يضب مرته و
جهاله نريد نتونس مو نكضيهة فشار وكتل ولعبان نفس وفلانه زعلت وفلانه تكافشت وية فلانه .
ابو قاسم☆☆😂 خوية نسوانه.. خواتك وانت جبيرنه ومخول ترزلهن وتحجي عليهن وشتريد تسوي سوي
ابو غسان☆☆ تمون علينه خوية ابو مشتاق
ابو مشتاق☆☆ لا ارزل ولا اضبهن انتو كل واحد اطول مني وشاربكم نازل للكاع عود اني
جبيركم عمي اضيع بينكم فہ الافضل كلمن يلزم حرمته ويفضهة... هوووف بويةةة مشتاك
لشط العرب وللكورنيشات وللخضار والزرع ومشتاك للشختورة مشتاك للبساتين.... مشتاك لكلشي هناك.
ابو غسان☆☆ 😐 شعندك هناك ابو مشتاق اشتو تحجي وتتحلم بالبصرة اخاف مشتاك للكيف والشرب
ابو مشتاق☆☆ يعني لازم عندي نسوان هناك حتى اشتاك عمي الحياة بلا نسوان جنه
وبعدين اذا ع الكيف هذا بكل مكان منتشر موشرط نروح للبصرة وندورة 😂 هههههههههه
مشتاق☆☆همست لأخوية ليث..😐 ولك حسبة ابوك مو خالية اشو يسولف بالبصرة ويتحلم بيهة بس لاعندة ولف هناك...
خطية ليث كلش على نياته وبسرعه يصدك من احجي وياه 😁....
ليث☆☆ 😦ها.. صدك والله كلشي يصير خلي نسأله ونشوف شيكول
مشتاق☆☆ 😐ولك شنسال ليش ماتسكت احسنلك تريدنه ننطرد منا... بس هوة موصوجك صوجي اني الحجيت وياك.....
رباب☆☆ مر الوكت واني اتضجور من الكعدة مليت كل الي بعمري ميجن يمي ولاىيسولفن
وياية واني ما احب اروح يمهن اوع هنة يجن انس ماروح.. سمعت صوت فرحه برة طلعت
شفتهة طالعه وتلعب وية بنات عمي.. واني مصفطه وكاعدة ....اووف جيناهم من الصبح
وهسة صار العصر طلعت روحي كل حركه اتحركهة امي تهمسلي اكعدي لاتسوين هيج لو
تغمزلي لو مدري شسوي تالي طكت روحي وهمست... شبيج يمة مو طلعتي روحي شتريدين
ام غسان☆☆ همست وعيني طايرة على نسوان حمويني... اهجعي بمكانج لا تبقين
تتحركين اريدهن يتخبلن عليج ثكلي شوي وكافي حركه منا ومنا
رباب☆☆ عود ليش؟
ام غسان☆☆ بالبيت احجيلج هسة اسمعي كلامي مبقى شي ونرجع
رباب☆☆ 😧 امري لألله اباوع .....على بنات عمومتي اوع شحالهن سودات يخرعن ويخزن
وهنة فاكات عيونهن عليه ويباوعن لحسني وجمالي.. 😏ههههه شحلاتني عيوني ورسم
وجهي وبياضي وشكاري وشعري كاملة ماناقصني شي 😍.. وكل شوي اسويلي حركه
حتى اضوجهن بيهة مثلا اگلب بشعري لو ارمش بعيني لو افرك خدودي وشفايفي حتى
يصيرن ورديات..... وامي ماقصرت كل شوي وتذبلهة حجاية يم نسوان عمومتي فلان خطبهة وفلانه تخبلت عليهة😂
فرحه☆☆ جان هذا اليوم كلش حلو شبعت لعب بيه وية بنات عمي ماحسيت بغربه ولا
حسيتهن يكرهني مثل ما امي فضيلة علمتنه بالعكس حبينه بعض ولعبنة سوية جان يوم
مميز بحياتي اول مرة بعد وفاة امي امينه اضحك والعب بهالشكل
مشتاق☆☆ صار العصر وعمامي كاعدين ويسولفون واحنه نستمع.. ورة شوي عمي ابو
غسان اترخص من ابوية يريد يروح وكالي صيح الجماعه بوية دنروح ..كلتلة صار عمي ..
تمشيت وصلت للغرفة البيهة النسوان وشفت
رباب تضوي من بعيد بعدهة صغيرة وزاهيتلهة الدنية وتلعب بشعرهة...
وكفت برة بالحوش يم الدرج وعيني عليهة ماشلتهة اراقب حركاتهة ... يا الله حتى من
تتنفس بغرور شنو هالبشر .. بس والله يحقلهة تنغر حلوة وحسنهة ضاوي... استغفر الله
شبيك يويل مشتاق هاي تاليتك ..اني واحجي وية روحي عمي صاح وينكم يااااجماعه ..
رأسا فزيت ورحت اركض لغرفة النسوان ...
عمي مكي يكول يلة دتروحون...
ام غسان☆☆ شفت مشتاق اجة ويحجي وياية ولاجن صاير شي الضهرية.. ضحكت
وكلت درب الجلب على الكصاب كلتلة...كلة اي هسة نجي.. دغيت رباب كلتلة شفتي وغمزتلهة وابتسمت
رباب☆☆ جنت كاعدة واتصفن على الحياطين من الضوجة .. شوي واجه ابن عمي
محمد هذا المكروه اسمه مشتاق يكول ابوية يريدنه ..رأسا امي دغتني وكلتلي شفتي
جاوبتهة... اوع وشنو يعني ...عدلنه ملابسنه ولبست امي عبايتهة وطلعنه.. من دنطلع
بوسوني عمامي ويجرون بخدودي ويكولولي انتي نسخة من بيبيتنه همين جانت هيج
حسن وحلوة مثلج.... همة يحجون واني انتعششش احس روحي اتفوقت على بنات
عمي بجمالي 😍 شعور لايووصف ابداااا بهالاثناء استرق لنضر لمشتاق انتبهت عليه ..
يسوي نفسة ميشوف عليه بس هوة من جوة لجوة يباوع .. عباله ما ادري.. تالي خزرته
بنضرة ورفعت تك حاجب وتركتة ومشيت
.طلعنه ورجعنه للبيت وعرفنه ابوية
يريد ياخذنه سفرة لهواي مناطق وية بيت عمومتي يبوو ردت انجلط من الفرحة وكمت
احسب يوم يوم على جية الجمعه ...صار ثاني يوم وسالت امي.. يمة من شنو تريدين نسوان
عمامي يتخبلن؟ امس خبلتيني لا تخليني اكوم ولا تخليني اتحرك
ام غسان☆☆ لج يالثولة اخاف عليج من عيونهم لان عيونهم تحرك حرك بالمكان...
شفتيهن شلون مفلفلات من حسنج وجمالج لج حيتخبلن منج بودهن تسويلج شغلة حتى
يتكابلن عليج ويضربنج.. اعرفهن تعلميني بيهن همجيات ويغارن.. ولج مني جانن يغارن
عاد منج ميغارن
رباب☆☆ من شنو يغارن منج يمه 😐
ام غسان☆☆ 😒 لاتشوفيني هسة هيج حالي اني بشبابي اخبل.. وبعدين يحسدوني على ابوج
لان خوش رجال وهنة زلمهن زباله اليشرب والي مكعدهة ابيت ايجار.. من هاي السوالف
يغارن مني 😏.. وبعدين يالعوبة خليتج كاعدة يمي حتى يكولون شوف شوووف رباب
بنت فضيلة شلون حسن وجمال وفوكاهة ثكيلة ورزنه وعاقلة معدلة لج شفتي ابن عمج
شلون كام يلوب من شافج ضل مثل الجلب رايح راد بس يتمنى نضرة منج
رباب☆☆ ايع هذا شنو اباوع عليه شايف نفسه فد نمونه والله يا الله شلون جر ايدي الحقير..
ام غسان ☆☆ وهوووة منوو الينطيج الهم... بس السمعه الحلوة اطش بالولاية يمة
افتهمتي لو بعد؟..هسة شوفيلي هاي مكصوفة العمر وينهة خلي تجيني
رباب☆☆ تقصدين فرحة
ام غسان☆☆ اي غمة اكو غيرهة بهالبيت صيحيهة خلي تجي
رباب☆☆ طلعت وكفت بالحوش وصحت لفرحه جانت فوك السطح...فرررحة فرحةةةة تعالي امي تريدج..
فرحة☆☆ جنت اشر هدوم فوك السطح وصاحتلي رباب نزلت اركض.. ها رباب كلتلي تعالي امي تريدج...دخلت شفت امي بالمطبخ..
نعم يمه
ام غسان☆☆ وين العيديات لج بومه؟
فرحه☆☆ مالت منو
ام غسان☆☆ لاتتغابين امس نطوج عيديات كووم كوم وينهن
فرحه☆☆ ضميتهن
ام غسان☆☆ اي عفية روحي طلعيهن ويجيبهن
فرحه☆☆ ما انطي عيدياتي هذني مالاتي... رأسا جرتني من شعري وضربتني راشدي
ام غسان☆☆ امشيييييي طلعيهننن لا اطلع عيووووونج من مكانهن ادبسززززززززز ....
وشمرتهة من ايدي للحايط...
فرحه☆☆ جرتني من شعري وضربتني ودفعتني على الحايط بهذه اللحظة ماحسيت على شي
رباب☆☆ عزةةةةةةة يمةةة شسويتي ركضت عليهة واجر بيهة فرحةةة فرحةةةة
ولج كومي حبيبي ولج فرحةة واضرب بيهة على خدهة
ام غسان☆☆ انصدمت من شفتهة واكعه ومتتحرك جمدت بمكاني ..ولج رباب شبيهة
رباب☆☆ انتي تسأليني تعااالي يمةة شوفيهة شبيهة.. ولج فرحةة كومي حبيبتي وج والله
بعد ماغار منج بس كومي فرحةةة ردي عليه فرحة واهز بيهة واضرب وجهة.. وعيوني تكت دمع عليهة
ام غسان☆☆ اتقربت عليه شفتهة تتنفس وحركت حواجبهة شوي بس جانت مفشوخة
براسهة ( جرح بالراس) وصاير الجرح بين شعرهة شفت لون شعرهة متغير وعرفت
جريتهة وشلتهة من جسمهة ورباب رفعت راسهة وعاطت
رباب☆☆ اااااااااااا ددمممم يووووم دممم هذااا ..وج فرحه ماتت لاتموتين فرحةة
ام غسان☆☆ لااااتصرخين هذا فشخ بالراس دتنفس مبيهة شي لاتصدعيني اوكفيييي
شلتهة وحطيتهة على الفراش..كعدت وفتحت عينهة ورأسا بجت وصيحت اريد بابا مجيد ..
واتذكرت اليوم ثاني يوم العيد ياعزة حيجي مجيد ياخذهة تعايد اخوته عزة العزاج فضيلة
شراح يخلصج من لسانه ..يلة كومي فرحة ابوج راح يجي عليج ياخذج يلة كومي حبابة
رباب☆☆ متاذية من شي فرحة اكو شي يوجعج حبيبتي انتي دتشوفني؟
فرحه☆☆ اشوف امي مصدوعه واول مرة دكولي حبابة ..ورباب تبجي وتحجي وياية...
اول مرة احس بحنية اختي رباب عليه.. ما ادري افرح ما ادري ابجي من وجع راسي..
سالتني رباب بيج شي.. مكدرت اجاوبهة من وجع راسي حطيت ايدي على شعري
حسيت اكو شي لزج بأيدي جريت ايدي وشفت دم وتذكرت دم امي امينه على وجهة
من نسحكت وعبالي راح اموت مثل امي وبديت ابجي واصرخ بعالي صوتي ااااااااااااااااااا
رباب☆☆ لاتخافين حبيبتي لاااا تخافين اهدي مابيج شوي والله التفتت على امي وج
يمه اشو عايفتهة شبيج تعالي سكتيهة احجي وياهة ما دعرف شسويله
ام غسان☆☆ كاااااافي بسسسسس شنو هالعيااارة وكعتي وشوي انفشختي براسج
قابل متي شبعنه وكعات وفشخات براسنه وكبرنه ومصار بينه شي
فرحة☆☆ صرخت بية امي فضيلة سكتت من خوفي وماحجيت بعد.....بعدين كومتني
رباب وغسلتلي وداوت الجرح البراسي وبدلت ملابسي وكلتلي كعدي هنا... كعدت واني
انتضر ابوية مجيد شوكت يجي صارت ساعه فوك ال10 الصبح وبعدة ما اجه كلي ياخذني
لبيت عمامي اخوته....اريد يجي حتى اشكيلة من امي وعمايلهة 😭
ام غسان☆☆ دخلت الغرفة وشفتهة تبجي..
شوفي يالحيوانه هذا جزاااات الميسمع كلام
امه.. لو من البداية سامعه كلامي وجايبتلي فلوس العيدية وناطيتنياهن ماجان هنتج وضربتج ولا جان تاذيتي
رباب☆☆ يمة صدك تحجين انتي؟ عوفيهة البنية انفشخت براسهة ياعيدية ياصخام عوفيهة لخاطر الله
ام غسان☆☆ اسمعي من يجي مجيد بااااالج وياج تحجين كلمه كوليلة اتكربست من
الدرج ووكعت افتهمتي.. لا والله العظيم اكطعج من الكتل واحرمج منه...هووو خلك
رجل اختي ومااتت الله يرحمهة يعني بعد ماعندة شي يمي... افتهمتي شحجيت لولاااا
فرحة☆☆😨 اي..... ضليت مرتبكه وخايفة لاصدك تسويهة وتحرمني من بابا مجيد....
ورة ربع ساعه اندكت الباب واجى بابا مجيد ركضت عليه ركضض وحضنته بكل قووتي وبجيت
مجيد☆☆ رحت اجيب فرحة ودخلت للحوش ركضت عليه وحضنتني وانتبهت. اها
اشو راسهة ملفوف 😳 شبيج بابا ليش راسج ملفوف شصاير بنيتي احجي
فرحه☆☆ وكعتي من الدرج واتكربستي افتهمتي لو لا😭
مجيد☆☆ شنو افتهمتي لو لا؟ احجيلي بابا انتي متكذبين على ابوج مو صحيح
فرحة☆☆ اخذني بابا مو كلتلي اخذج لعمامج يلة كوم اخذني يلة خلي نروح.. واجر بايدة
مجيد
☆☆ شلون اخذج وانتي هيج راسج ولج فهميني شصاير .
فرحة☆☆ ضليت ساكته وعيوني تلمع من الدموع ☹ اخاف احجي اخاف لاصدك
فضيلة تحرمني من بابا مجيد.. اخذني بابا خلي نروح
رباب☆☆ اجيت شفت عمو مجيد لازم فرحه وهي تبجي بسكوت بس عيون تدمع راسا
سلمت عليه وعايدتة وسلم عليه وكلتلة... عمو فرحة وكعت من الدرج مابيهة شي لاتخاف
مجيد☆☆ شلون وكعت؟ قابل اول مرة تصعد درج
رباب☆☆ خجلت منه ... لا عمو بس جانت شايلة الهدوم دتشرهن وثكيلات ومسيطرت ووكعت
مجيد☆☆ انهد حيلي من هيج حجت رباب كعدت بالحوش كلتلة....بنتي رباب هاي اخيتج
وبعدهة صغيرة مو حمل ثكل. ترة عمرهة 10 سنين والله.. زين منهة وشايلة نفسهة شغلوهة
وياكم بالبيت حلوة المساعدة بينكم وعلمود تطلع ام بيت معدلةمثلج.. بس مو تشيلوهة
ثكل بنتي انتي اختهة الجبيرة يعني امهة الثانية لازم تحنين عليهة وداريهة.. وشكد
عندج هية بس هالوحدة قابل 10 حتى تضوجين منهة.. لازم تحبون بعض يا بابا اذا
فد يوم وحدة من عدجن اتأذت الثانية تسندهة الخوات بينهن محنه اكثر من
الصديقات يصيرن لان من نفس الدم ومن نفس الرحم ..فهمتي بنتي هاي من اليوم امانه عندج ..
انتي اختهة الجبيرة أئمنهة يمج لأن امج كبرت وبعد ومبيهة حيل.. وابوج بالشغل ملتهي فہ
انتي لازم تكونين جبيرتهة وتعلميهة الصح من الغلط وديرين بالج عليهة مو صحيح بنتي .
رباب☆☆ عمو مجيد حجة وياية حجي ماسامعته لا من امي ولا من ابوية حسيت
بنفسي شكد مقصرة وية اختي خصوصا اني اكبر منهة عمري هسة حيصير 14 وهية
ستوهة 10 سنين كلتلة حاضر عمو والله اني احب اختي ما اكرهة... بوسني وكلي عفية
ببنيتي الحبابة وانطاني نص دينار كلي هاي الج ولفرحة اشترو بيهن .. طرت من الفرح
بويةةة نص دينار شكبرهةةةة😎.... وكلهة لفرحة من يطيب جرحج اخذج خليهة غير يوم هسة ارتاحي
⚘مرت الايام وصار يوم الجمعه .. لبست نفنوف احمر نص ردن... وشلت شعري بفيونكه
حمرة وبيضة ونزلت كذلة برجم خفيفة ولبست صندل فلات واخذنه جنطة بيهة
ملابسنه وفرحة همين لبست نفوف العيد مالتهة ...وامي اخذت اكل واخذت الفلوس
الجانت تبوكهن 😂 من شغل اخوتي صارلهة كومه تجمع بيهن جنة كلش فرحانين
ومتحمسين للطلعه ...وصلو بيت عمامي بسيارتين وحدة باص مصلحة والثانية سيارة عمي ابو مشتاق صغيرة ..
شفت الباص لو مدري شصار بية.. من اني وطفلة اتمنيت اصعدهة واخيرا حتتحقق
امنيتي واصعدهةة 😍 يوووو رحت اركض مثل الطفلة فتحت
الباب دة اصعد وصار بوجهي مشتاق ______😐؟
شكرا لزيارتكم عالم روايات سكيرهوم
