رواية نور الفصل الثامن 8 بقلم فاطمه شعبان

نور واقفة مكانها.. مش عارفة تبص فين..

إسلام قدامها.. مستني ردها..

وآسر وراها.. واقف.. ساكت.. بس عينيه بتقول كل حاجة..

قلبها بيدق بسرعة.. حاسة انها لو وافقت.. آسر هيتضايق..

ولو رفضت.. إسلام هيزعل..

قالت وهي بتحاول تبتسم: إمممم.. مش عارفة يا إسلام.. أصل ماما بتقلق عليا لو اتأخرت..

إسلام: يا ستي مش هنتأخر.. ساعة واحدة بس.. في الكافيه اللي جنب الشركة.. نخلص ورق المشروع ونمشي..

نور لسه هترد.. لقيت آسر اتكلم لأول مرة.. بصوت هادي.. بس جد جداً:

آسر: لا.. مينفعش..

الاتنين بصوا له..

نور: نعم؟!

إسلام: ليه مينفعش يا آسر؟!

آسر قرب منهم خطوة.. وحاول يبان انه بيتكلم كمدير.. مش كـ آسر:

آسر: عشان المشروع ده.. مشروع الجامعة.. والحاج شريف هو اللي مكلفني أنا بيه.. أنا اللي هراجع معاها.. مش انت..

إسلام اتصدم: امتى ده؟! الحاج قالي أنا اللي أساعدها!

آسر: الحاج قالي أنا امبارح بالليل.. بعد ما انت مشيت.. قالي خلي بالك من نور.. المشروع ده مهم.. وانت عندك شغل متأخر كتير..

إسلام بص لنور.. وبص لآسر.. وحس ان في حاجة غلط.. بس مقدرش يقول ايه..

إسلام: ماشي يا آسر.. لو الحاج قال كده.. خلاص..

وسابهم ومشي.. وهو متضايق.. بس مش عارف يتكلم..

نور فضلت واقفة.. بتبص لآسر:

نور: هو الحاج فعلاً قال كده؟!

آسر سكت ثانية.. وبعدين قال: اه.. قال كده..

نور: طيب.. وهنراجع امتى؟

آسر: بعد الشغل.. النهاردة.. في مكتبي.. عشان نخلص بسرعة..

نور وشها احمر: في مكتبك؟! لوحدنا؟!

آسر حس انه اتورط في الكلام: لا.. يعني.. قصدي.. بعد الشغل.. في الشركة.. هنا.. عشان محدش يضايقك..

نور: ماشي يا أستاذ آسر.. اللي تشوفه..

ومشيت على مكتبها.. وهي مش فاهمة حاجة..

هو ليه مصمم ان هو اللي يساعدها؟! وليه مش عايز إسلام يساعدها؟!

آخر اليوم.. الموظفين مشيوا واحد ورا التاني..

إسلام عدى على نور وهو ماشي: متزعليش مني يا نور.. أنا كنت عايز أساعدك بس..

نور ابتسمت: أنا عارفة يا إسلام.. متزعلش انت..

إسلام مشي.. ونور فضلت قاعدة..

الشركة بقت فاضية.. وهادية أوي..

نور لمت حاجتها.. وراحت ناحية مكتب آسر.. خبطت خبطة خفيفة..

آسر من جوه: ادخلي..

نور دخلت.. لقيته قاعد.. قالع الجاكيت.. ومشمر كم القميص.. ومركز في اللاب توب..

أول مرة تشوفه كده.. من غير رسميات.. من غير بدلة المدير..

قلبها دق.. قالت في سرها: ايه ده؟! هو شكله كده ليه؟!

آسر: اقعدي يا نور..

نور قعدت قدامه.. وفتحت اللاب توب بتاعها..

آسر: وريني وصلتي لفين..

نور بدأت تشرح.. وهي متوترة.. كل شوية تتلغبط في الكلام..

آسر كان بيسمعها.. ومركز معاها أوي.. أول مرة يسمع صوتها من قريب كده.. من غير دوشة.. من غير هزار إسلام..

كل ما تتكلم.. هو يبص لها.. وكل ما تبص له.. هو يعمل نفسه بيبص في الورق..

شوية.. ونور قالت: أستاذ آسر.. هو انت ليه منعت إسلام انه يساعدني؟!

آسر اتخض من السؤال: أنا ممنعتوش.. أنا بس..

نور: لا منعت.. انت قلت مينفعش.. قدامه..

آسر سكت.. وحط القلم من ايده.. وقال بصوت واطي.. أول مرة يتكلم بيه قدام حد في الشغل:

آسر: عشان.. عشان أنا.. مش بحب أشوف حد بيضايقك..

نور: إسلام مكنش بيضايقني.. إسلام كان بيضحكني..

آسر: ما هو عشان كده..

نور: عشان كده ايه؟!

آسر بص لها.. وعينيه فيها حاجة غريبة.. حاجة نور أول مرة تشوفها..

آسر: عشان أنا مش بعرف أضحكك زي ما هو بيضحكك..

نور سكتت.. وقلبها وقف.. هو قال ايه؟! هو آسر بيقول كده بجد؟!

آسر فاق لنفسه بسرعة.. وكح.. ورجع صوت المدير تاني:

آسر: قصدي.. قصدي ان الشغل.. الشغل محتاج تركيز.. وانتوا لما بتهزروا.. الشغل بيبوظ..

نور: اه.. تمام..

ورجعوا يشتغلوا.. بس الجو بقى غريب.. لا هي عارفة تبص له.. ولا هو عارف يبص لها..

بعد نص ساعة.. نور كانت عطشانة.. آسر قام بسرعة: تحبي تشربي ايه؟!

نور: لا شكراً.. مش عايزة أتعبك..

آسر: لا مفيش تعب.. قهوة؟!

نور: ماشي.. قهوة..

آسر راح عملها قهوة بنفسه.. أول مرة يعمل قهوة لحد في الشركة.. طول عمره السكرتيرة هي اللي بتعمل..

جاب القهوة.. وحطها قدامها.. ايده لمست ايدها غصب عنه..

الاتنين اتنفضوا.. نور شدت ايدها بسرعة.. وآسر عمل نفسه مش واخد باله..

نور: شكراً..

آسر: العفو..

كملوا شغل.. لحد ما نور خلصت جزء كبير من المشروع..

نور: خلاص.. أنا كده خلصت النهاردة..

آسر: برافو.. انتي شاطرة أوي..

نور ضحكت ضحكة خفيفة.. أول ضحكة ليها مع آسر لوحدهم:

نور: بجد؟! أول مرة تقولي كده..

آسر ابتسم.. ابتسامة حقيقية.. مش ابتسامة المدير..

آسر: عشان أول مرة أشوفك بتشتغلي من قريب.. انتي بجد.. مجتهدة..

نور وشها احمر.. وقامت بسرعة تلم حاجتها: أنا لازم أمشي.. ماما هتقلق..

آسر: استني.. أنا هوصلك..

نور: لا.. مينفعش.. هروح لوحدي..

آسر: الدنيا ليلت.. مينفعش تمشي لوحدك.. أنا هوصلك.. ده أمر.. كمدير..

نور ضحكت: حاضر يا أستاذ مدير..

نزلوا مع بعض.. وركبوا العربية..

طول الطريق.. لا هي بتتكلم.. ولا هو بيتكلم..

بس الراديو كان شغال.. على أغنية هادية..

نور كانت بتبص من الشباك.. وآسر كل شوية يبص لها من غير ما تاخد بالها..

وصلت عند البيت.. نور: شكراً يا أستاذ آسر.. تعبتك معايا..

آسر: مفيش تعب.. خلي بالك من نفسك.. وبكره.. نكمل..

نور: بكره برضه؟!

آسر: اه.. بكره.. بعد الشغل.. هنا.. في مكتبي..

نور هزت دماغها.. وطلعت البيت.. وهي قلبها بيدق..

دخلت البيت.. مامتها: اتأخرتي ليه يا نور؟!

نور: كنت بخلص المشروع مع أستاذ آسر يا ماما..

مامتها بصت لها بصة.. بصة الأم اللي فاهمة كل حاجة:

مامتها: آسر؟! مش إسلام؟!

نور: اه.. آسر هو اللي هيساعدني من هنا ورايح..

مامتها ضحكت: اه.. فهمت..

نور: فهمتي ايه يا ماما؟!

مامتها: ولا حاجة يا حبيبتي.. ادخلي نامي.. انتي تعبتي..

نور دخلت أوضتها.. وقعدت تفكر..

إسلام اللي بيضحكها.. وبيهزر معاها..

وآسر اللي بيغير عليها.. ومش عارف يقول..

وهي.. مش عارفة تبص فين.. ولا تفكر في مين..

تاني يوم الصبح.. إسلام دخل الشركة.. لقي نور قاعدة مع آسر في مكتبه.. بيشتغلوا في المشروع..

إسلام وقف مكانه.. حس بنار جواه..

هو اللي كان المفروض يبقى مكان آسر..

هو اللي كان المفروض يساعدها..

بس آسر سبقه.. وخد مكانه..

إسلام قال في سره: لا.. أنا مش هسيبها.. أنا مش هسكت المرة دي..

فضل واقف شوية قدام باب مكتب آسر.. الباب كان موارب..

شاف نور بتضحك.. أيوه بتضحك.. مع آسر!

آسر اللي عمره ما ضحك حد.. نور بتضحك معاه؟!

إسلام حس إن قلبه اتقبض.. دخل مكتبه بسرعة.. وقعد.. وفضل يبص في اللاب توب.. بس مش شايف حاجة.. كل اللي شايفه نور وهي بتضحك لآسر..

شوية.. ونور خرجت من مكتب آسر.. وكانت ماسكة ورق المشروع.. ومبسوطة..

إسلام أول ما شافها.. قام وقف:

إسلام: صباح الخير يا نور..

نور: صباح النور يا إسلام..

إسلام: ها.. خلصتي ايه مع آسر؟!

نور: خلصنا جزء كبير أوي.. هو بصراحة شاطر.. وبيفهمني بسرعة..

إسلام حاول يضحك.. بس الضحكة طلعت تقيلة:

إسلام: اه.. ما هو آسر شاطر في كل حاجة..

نور حست إنه متضايق.. قربت منه:

نور: مالك يا إسلام؟! انت زعلان؟

إسلام: لا.. زعلان ليه؟! أنا مبسوط إنك خلصتي..

نور: بجد؟! أصل حاسة إنك متغير..

إسلام سكت.. وكان نفسه يقولها: أيوه متغير.. عشان انتي مبقتيش بتقعدي معايا.. بقيتي بتقعدي مع آسر.. بقيتي بتضحكي معاه هو.. مش معايا أنا..

بس خاف.. خاف تقول عليه بيغير.. خاف تفتكره أناني..

فقال: لا والله.. مفيش حاجة.. بس الشغل كتير..

نور: طيب.. لو احتاجت حاجة هقولك..

إسلام: ماشي..

نور رجعت مكتبها.. وإسلام فضل قاعد.. حاسس إنه مخنوق..

قام.. راح يعمل قهوة.. لقي السكرتيرة واقفة..

السكرتيرة: مالك يا إسلام؟! وشك مش عاجبني..

إسلام: مفيش..

السكرتيرة: لا في.. انت من امبارح وانت مش انت.. هو آسر زعقلك تاني؟!

إسلام: لا.. آسر مزعقليش.. آسر.. آسر خد نور مني..

السكرتيرة اتخضت: خدها منك؟! يعني ايه؟!

إسلام: يعني المشروع.. اللي الحاج قالي أساعدها فيه.. آسر قاله هو اللي هيساعده.. وقعدها معاه في مكتبه.. بعد الشغل.. لوحدهم..

السكرتيرة: يااااه.. لوحدهم؟! وبعد الشغل؟!

إسلام: اه..

السكرتيرة ضحكت ضحكة خفيفة: يا عيني يا إسلام.. انت كده.. بتغير..

إسلام: بغير؟! أنا؟! على نور؟!

السكرتيرة: اه.. بتغير.. وباين عليك أوي..

إسلام سكت.. ووشه احمر.. هو فعلاً بيغير؟! هو فعلاً حاسس إنه مش عايز حد يقرب منها غيره؟! حتى لو الحد ده صاحبه؟! صاحبه اللي زي أخوه؟!

وفي نفس الوقت.. آسر كان قاعد في مكتبه.. مش عارف يشتغل..

كل شوية يفتكر ضحكة نور امبارح.. لما ضحكت معاه لوحدهم..

أول مرة حد يضحك معاه كده في الشغل..

أول مرة يحس إنه مش مدير.. إنه بني آدم عادي..

قام وقف جنب الشباك.. وقال لنفسه: أنا بعمل ايه؟! أنا ليه فرحان أوي كده عشان هي ضحكت؟! وليه متضايق عشان إسلام زعلان؟! أنا بين صاحبي.. وبين.. وبين نور..

الضهر قرب.. الحاج شريف وصل الشركة..

دخل.. لقي الجو غريب.. إسلام ساكت.. ونور ساكتة.. وآسر قافل على نفسه..

الحاج نادى على نور: تعالي يا بنتي..

نور راحت له: أيوه يا حاج..

الحاج: مالكم؟! الشركة مالها النهاردة؟! حسسها مقلوبة..

نور: مفيش يا حاج.. بس الشغل كتير..

الحاج بص لها بصة.. بصة الأب اللي فاهم:

الحاج: نور.. انتي بنتي.. وانا عارفك.. في حاجة مضايقاكي..

نور عينيها دمعت غصب عنها: يا حاج.. أنا مش فاهمة حاجة.. إسلام زعلان مني.. وآسر.. آسر متغير معايا.. وأنا مش عارفة أعمل ايه.. أنا جيت هنا عشان أشتغل وأخلص مشروعي.. مش عشان حد يزعل مني..

الحاج طبطب عليها: يا بنتي.. اسمعي مني.. انتي معملتيش حاجة غلط.. الاتنين بيحبوكو.. بس كل واحد بيحب بطريقته..

نور: بيحبوني؟!

الحاج ضحك: اه يا بنتي.. إسلام بيحبك زي أخته.. بيحب يضحكك.. ويخليكي مبسوطة.. وآسر.. آسر بيحبك.. بطريقة تانية خالص..

نور وشها احمر: طريقة تانية ازاي يا حاج؟!

الحاج: دي انتي اللي هتعرفيها لوحدك يا نور.. بس متستعجليش.. سيبي الأيام تبينلك..

نور خرجت من عند الحاج.. وهي سرحانة أكتر..

العصر.. نور كانت قاعدة بتشتغل.. لقيت إسلام جاي لها بورقة..

إسلام: خدي.. دي ورقة المشروع اللي كنتي محتاجاها.. أنا خلصتهالك..

نور: بجد؟! انت عملتها امتى؟!

إسلام: امبارح بالليل.. بعد ما روحت.. فضلت أشتغل عليها عشانك..

نور عينيها لمعت: ربنا يخليك يا إسلام.. انت بجد.. جدع..

إسلام ابتسم.. أول ابتسامة حقيقية من الصبح:

إسلام: انتي بس اطلبي.. وأنا أعملك أي حاجة..

في نفس اللحظة.. آسر كان طالع من مكتبه.. شافهم واقفين مع بعض.. وبيضحكوا..

وقف مكانه.. وحس بنفس النار بتاعة امبارح.. بس المرة دي أكبر..

نفسه يقول لإسلام: ابعد عنها.. دي بتاعتي.. أنا اللي بساعدها.. أنا اللي بوصلها..

بس مقدرش.. لأنه عارف إنه مالوش حق يقول كده..

فرجع مكتبه.. وقفل الباب جامد..

آخر اليوم.. الموظفين مشيوا..

نور جهزت حاجتها.. عشان تروح تقعد مع آسر تاني في مكتبه..

إسلام كان لسه قاعد.. بيبص لها..

إسلام: رايحة لآسر تاني؟!

نور: اه.. عشان نكمل المشروع..

إسلام: طيب.. خلي بالك من نفسك..

نور: حاضر..

إسلام قام.. ولبس الجاكيت.. ومشي.. وهو حاسس إنه خسران حاجة..

نور دخلت مكتب آسر..

آسر: اتأخرتي ليه؟!

نور: كنت باخد ورق من إسلام..

آسر سكت.. ووشه اتغير شوية:

آسر: اه.. إسلام.. ماشي.. اقعدي..

نور قعدت.. وبدأوا يشتغلوا..

بس آسر كان ساكت.. مش زي امبارح.. امبارح كان بيتكلم.. وبيضحك.. النهاردة ساكت.. ومكشر..

نور: أستاذ آسر.. انت زعلان من حاجة؟!

آسر: لا.. مفيش..

نور: لا في.. انت من ساعة ما دخلت وانت ساكت..

آسر بص لها.. وكان نفسه يقولها: أيوه زعلان.. زعلان عشان انتي كنتي واقفة بتضحكي مع إسلام.. وسيباني أنا قاعد لوحدي مستنيكي..

بس قال: لا.. بس تعبان شوية..

نور: طيب.. تحب نأجل لبكره؟!

آسر بسرعة: لا!.. لا.. نكمل.. أنا كويس..

نور ضحكت ضحكة خفيفة: حاضر.. نكمل..

اشتغلوا شوية.. لحد ما نور تعبت.. حطت راسها على ايدها..

آسر: تعبتي؟!

نور: شوية.. بس عايزة أخلص..

آسر: خلاص.. كفاية النهاردة.. انتي تعبتي..

نور: لا.. لسه شوية..

آسر قام.. وراح جاب لها عصير.. وحطه قدامها..

نور بصت له باستغراب: انت عرفت منين إني بحب العصير ده؟!

آسر اتلخبط: ها؟!.. أصل.. أصل السكرتيرة قالتلي.. انك بتحبيه..

نور: السكرتيرة؟! السكرتيرة متعرفش..

آسر سكت.. ووشه احمر.. هو كان مركز معاها من زمان.. عارف هي بتحب ايه.. وبتشرب ايه.. وبتضحك امتى.. وبتزعل امتى.. بس مش عايز يقول..

نور شربت العصير.. وهي بتبص له.. وبتفكر: هو آسر.. مركز معايا أوي كده ليه؟!

خلصوا شغل.. ونزلوا مع بعض تاني..

آسر وصلها.. زي امبارح..

وهو بيوصلها.. قال لها فجأة:

آسر: نور..

نور: أيوه؟!

آسر: انتي.. انتي مبسوطة هنا؟! في الشركة؟! معانا؟!

نور: اه.. مبسوطة أوي.. انتوا زي أهلي..

آسر: طيب.. لو.. لو في يوم.. حد ضايقك.. هتقوليلي؟!

نور: أكيد هقولك.. انت أول واحد هقوله..

آسر ابتسم.. وحس براحة غريبة.. كأنه كان مستني الجملة دي..

نور طلعت البيت.. وآسر فضل واقف تحت.. باصص على شباكها لحد ما النور اتطفى..

وقال لنفسه: أنا.. أنا شكلي.. وقعت.. وقعت بجد..

نور دخلت.. لقيت مامتها مستنياها..

مامتها: ها.. عملتي ايه النهاردة مع أستاذ آسر؟!

نور: عادي يا ماما.. كنا بنشتغل..

مامتها: بس؟! بنشتغل بس؟!

نور: اه يا ماما.. بس..

مامتها: طب وإسلام؟! مكلمكيش؟!

نور: كلمني.. وجابلي ورق المشروع.. وقالي اطلبي وأنا أعملك أي حاجة..

مامتها ضحكت: يااااه.. الاتنين بيتنافسوا عليكي يا نور..

نور: بيتنافسوا؟! يعني ايه؟!

مامتها: يعني انتي اللي هتختاري في الآخر يا حبيبتي.. اللي بيضحكك.. ولا اللي بيخاف عليكي من غير ما يتكلم..

نور دخلت أوضتها.. وقعدت تفكر..

إسلام.. اللي دايماً جنبها.. وبيضحكها..

وآسر.. اللي دايماً بيراقبها من بعيد.. وبيوصلها.. وبيجيبلها العصير اللي بتحبه من غير ما تقول..

وهي.. مش عارفة تبص فين.. ولا تختار مين..

بس اللي هي متعرفوش.. إن بكره.. هيحصل حاجة.. هتقلب كل حاجة..

يا ترى ايه اللي هيحصل بكره؟! وإسلام هيعمل ايه لما يعرف إن آسر بيغير عليه؟! وآسر هيعترف لنور بحبه.. ولا هيفضل ساكت؟!