رواية اساطير الورد الفصل الثامن 8 بقلم نعمه حسن


 رواية اساطير الورد الفصل الثامن 

الفصل الثامن

         ''""''''''''''''''''''''''''''""""""""""""""""""

_ورد.. أنا قابلت رحمـه!! 

شَعُرت و كأن قلبها قد توقف عن النبض، إنفطر و كاد يتطاير إلي شظايا من هَول ما حلّ به فـنظرت إليه بأعين زائغة تكاد لا تري شيئاً وقالت: 

=رحمـه؟!! رحمه مين؟! 

إبتسم متعجباً وقال: جرا إيه يا ورد لحقتي تنسي؟! رحمه اللي حكيتلك عنها قبل كده. 

خفق قلبها و تسارعت أنفاسها وقالت بصوتٍ مرتعش: 

=هي دي الحاجه اللي عايز تكلمني فيها؟! 

مَسَح وجهه بغضب وقال: 

_أيوة.. أنا إتصرفت تصرف غبي جداً.. إمبارح كلمتني و فضلت تحكيلي عن الظروف اللي خلتها تبعد و مش عارف إيه و إنها عايزانا نرجع و طلبت نتقابل النهارده وأنا روحت قابلتها... 

قاطعته متسائلة: يعني دلوقتي كنت معاها؟! 

أومأ موافقاً و تابع حديثه قائلاً: 

_قابلتها و أول ما شوفتها لقيت نفسي باخدها في حضني زي العبيط.. نسيت كل الكلام اللي كنت عايز أقوله و نسيت أسألها هي عملت فيا كده ليه.. أنا متضايق من نفسي اوي يا ورد.

إبتسمت تسخر من حالها و قالت: بتحبها أوي كده؟! 

زمّ شفتيه بضيق و أجاب: النهارده لما شوفتها عرفت إنها عقدة حياتي و مش هعرف أنساها ولا أبطل أحبها. 

إحتبست أنفاسها و أحسّت بالإختناق فنهضت فوراً عن مقعدها و قالت: 

_معلش يا عصام..أنا مش قادره أخد نفسي و نسيت البخاخه فوق.. لازم اطلع حالاً. 

وقف قبالتها وقال: طيب هتنزلي تاني؟! 

هزت رأسها مرات متتاليه دون النطق بكلمة واحده ثم هرولت إلي الأعلي مسرعةً. 

غُلِبَت علي أمرها و عادت و الخيبه تنهش قلبها نهشاً فـتهاوي جسدها إلي الفراش و راحت تبكي علي مُصاب قلبها الأليم حتي غفت عيناها و غطّت في النوم. 
ـــــــــــــــــــــــــــــــــــــــــــــــــــــــــــــــ
في منزل "بدير" تجلس زينب أمام النافذة تنتظر مجئ زوجها و ولدها و بمجرد ما إن رأتهم حتي إصطنعت البكاء بـ إجادة. 

دخل بدير أولاً فسألها: إيه يا وليه مالك بتعيطي ليه؟! أبوكي مات تاني ولا إيه؟! 

تجاهلت سخريته المعتادة و إرتفع بكاؤها المصطنع وقالت وكأنها تتحدث إليه: 

_لأ يا ريس بدير كرامتي هي اللي إتمرمغت في التراب علي إيد مريم هانم.

توقف طارق علي باب المنزل يستمع إلي كلامها فقالت: 

_مريم اللي أنا شيلاها فوق دماغي و عملاها بنتي.. النهارده بقولها معلش يا مريم أنا تعبانه و مش قادره أكمل شغل البيت معلش ساعديني قبل ما جوزك و أبوكي يرجعوا قعدت تغلط و تهرتل بكلام وحش و تقولي هو أنا الخدامه بتاعت أبوكي، هو إنتوا جايبيني هنا عشان أخدمكوا و خدت بعضها و طلعت شقتها. 

زمجر طارق غضباً و لعن تحت أنفاسه ثم تمتم بصوت مسموع: بنت الكلب!! والله لأطين عيشتها النهارده. 

تصنّعت زينب الذهول وقالت: 

_طارق؟! إنت هنا يا حبيبي؟! 

تقدم منها طارق وقال بعتاب غاضب: وإنتي مش عارفه تجيبيها من شعرها تحت رجليكي لما بجحت فيكي كده؟! 

إتسعت عينيها وقالت: لا يا حبيبي إيه اللي إنت بتقوله ده؟! حد يعمل كده في بنات الناس بردو؟! 

صاح بغضب قائلاً: بنات ناس؟! أنا هوريكي هعمل إيه في بنات الناس دول. 

هرول إلي الأعلي مسرعاً فركضت خلفه تمنعه وهي تقول: 

_لأ يا طاررق إستني.. متضربهاش يا طارق.. أنا هعرف أتعامل معاها بلاش إنت تتدخل. 

نزع يده منها بغضب جامح وقال: سيبيني ياما. 

قالت بإصرار وهي تكرر كلماتها علي مسامعه: عايزني أسيبك لما تطلع تضربها ولا تكسرلها دماغها.. لأ طبعاً. 

أعماه الغضب فركض إليها وهو يصرخ بإسمها: مررريم! 

إبتسمت بإنتصار و تمتمت: بالهنا والشفا يا بنت زينب. 

إستدارت فإصطدمت بزوجها من خلفها يقف بغضب ويقول: 

_مبسوطه كده؟! سخنتيه عليها و إرتاحتي؟! 

رَفَعت كتفيها بلا مبالاه وقالت: وأنا يعني عملت إيه.. ما إنت سامعني وانا عماله أقوله متضربهاش. 

هز رأسه بضيق وقال: ماهو ده التسخين بعينه.. عشان إنتي عارفه إن إبنك مكانش هيضربها لولا إنتي نبهتيه لكده.. تقوليله متضربهاش فيطلع هو يموتها من الضرب. 

صرخت بوجهه بإندفاع وقالت: ما هي اللي قليلة الادب و لسانها متبري منها.. ده إنت لو كنت سمعتها النهارده وهي واقفه حاطه إيديها في وسطها و بتكلمني بالعين و الحاجب كنت قولتله إطلع إحدفها من البلكونه بنت الحلمبوحه دي. 

_يا وليه إتقي الله.. هتخربي علي إبنك و هتوديه في داهيه من ورا عمايلك السودا. 

إستمعا إلي صراخ مريم بالأعلي فقال: 

_أهو.. إتفضلي.. إسمعي و إتمزجي لما يموتها و يجيب لروحه مصيبه. 

تركها و صعد إلي شقه طارق و مريم وطرق الباب كثيراً دون فائدة فقال: 

_واد يا طارق بطل العبط اللي بتعمله ده و إلا قسماً بالله لأكون مقاطعك مدي الحياة.. إفتح البااب. 

بالداخل كانت مريم تركض هنا و هناك تحاول أن تختبئ من بطش طارق الذي أعماه الغضب و بدأ بتكسير كل ما تقع عليه عيناه. 

أمسك بها وهو يقول بإستنكار غاضب: 

_بقا حتة بت لا راحت ولا جت زيك تعلي صوتها علي أمي و تكلمها بالأسلوب ده؟! 

تحدثت ببكاء هستيري وقالت: والله العظيم هي اللي بدأت. 

صفعها بقوة قائلاً: بدأت إيه و مبدأتش إيه.. و إنتي تردي عليها ليه أصلاً؟! طب عليا الطلاق منك بالتلاته لتعيشي خدامه تحت رجليها من هنا ورايح. 

=ده ظلم.. أنا معملتش حاجه لكل ده.. 

تمتم بهدوء أرعبها: ظلم؟! هو إنتي لسه شوفتي ظلم؟! ده أنا هخلي عيشتك مرار طافح. 

إنهال عليها بالضرب كالمغيّب وهو ينعتها بأقذر الشتائم قبل أن يستمع إلي طرقات والده الحاده القويه علي الباب وهو يقول: 

_يا ابني مينفعش كده حرام عليك الراجل ميت اللي إنت عمال تغلط فيه ده. 

فَتَح طارق الباب لوالده فأسرعت مريم تختبئ خلفه وتقول: إلحقني يا عمو بدير والنبي هيموتني. 

نظر بدير إليها بذهول عندما رأي آثار الضرب الوحشي بادٍ عليها بشدة فقال: 

_إيه ده يا طارق اللي عملته في البت ده؟! إنت إتجننت؟! 

أجاب طارق بفظاظه: دي قليل عليها اللي إتعمل فيها.. واحده قليلة الربايه. 

ترجّت مريم بدير وقالت: والنبي يا عمو بدير تخليني أروح لأمي. 

برز صوت طارق غاضباً وقال: أمك؟! لا يا حبيبة أمك مفيش خروج من البيت من هنا ورايح لحد ما تتعلمي الأدب. 

تحدّث بدير قائلاً: سيبها يا طارق تروح لأمها يومين و ترجع.. هي محتاجه حد يراعيها لحد ما تخف من اللي إنت عملته فيها ده. 

همهم طارق معترضاً فقال والده بإصرار: إسمع الكلام يا طارق ولا إنت فاكر نفسك إتجوزت و مبقالكش كبير خلاص!! 

_العفو يابا. 

تحدث بدير إلي مريم وقال: خشي يا بنتي إلبسي. 

أسرعت مريم إلي غرفتها فتحدث بدير إلي وَلَدِه وقال: 

_إنت إيه اللي عملته ده يا طارق.. إنت عارف دي لو ليها أب ولا أخ كان عمل فيك محضر و بهدلك.. ربنا يستر بقا و أمها متعملش حكايات. 

=يابا يعني إنت مش شايف بجاحتها و قلة أدبها علي أمي! 

_كنت أدبها بكلمتين..ميبقاش بالمنظر ده.. عالعموم أنا هاخدها لأمها تقعد يومين و هحاول ألم الموضوع. 

أذعن طارق لحديث والده وقال: اللي تشوفه يابا. 

إصطحب بدير مريم إلي والدتها التي بمجرد ما إن رأتها ضربت علي صدرها بيدها وقالت بفزع: 

_يالهوي إيه اللي عمل فيكي كده يا مريم!! 

بادر "بدير" بالحديث قائلاً: مريم غلطانه غلط جامد يا ست غرام.. عالعموم هي هتحكيلك علي اللي حصل و عقليها بكلمتين عشان المركب تمشي.

نظرت إليه غرام بقهر وقالت: وهي حتي لو غلطانه تعملوا فيها كده يا ريس بدير؟! اليتيمه اللي سايبها ريس غريب أمانه في رقبتك تتهان و تتذل عندك كده؟! 

تنهد بدير و بدأ بسرد ما حدث لها فقالت: 

_حتي لو مريم غلطانه بس مكانش يضربها بالشكل ده. 

=والله يا أم مريم أنا شديت عليه و فهمته غلطه و مش هتتكرر تاني أوعدك.. أستأذن أنا. 

إنصرف فأغلقت الباب من خلفه و أسرعت إلي غرفة مريم و طرقت الباب طرقات متتاليه وهي تقول: 

_مريم.. إفتحي يا حبيبتي. 

أجابت الأخري بإعياء و تعب: سيبيني أنام يا ماما.. بعدين نبقا نتكلم. 

أسندت رأسها إلي وسادتها تتهاوي دمعاتها دون هداوة ولا توقف وهي تشعر لاول مره بالحسرة و الهوان. 

ـــــــــــــــــــــــــــــــــــــــــــــــــــــــــــــــ

أفاقت ورد من نومها ليلاً، تشعر و كأنها قد طُعنت للمرة الثانيه، ألهذا الحد أصبح كَسرها يسيراً؟! 

جَمَعت أغراضها القليلة و غادرت الشقه ثم نزلت إلي الأسفل فقابلت "فوده" في طريقها فقال: 

_إيه يا ورد رايحه فين دلوقتي يا بنتي؟! 

نظرت إليه بأعين منتفخه من أثر البكاء وقالت بنشيج: 

=ماشيه يا عم فوده.. إدعيلي. 

قطب حاجبيه دهشةً و قال: ماشيه؟! علي فين؟! 

_مطرح ما رجليا توديني.. أهي كلها بلاد ربنا. 

إنصرفت فوراً ولم تستجب لنداءاته المتكرره فدخلت إلي الكافتيريا تتطلع حولها بتردد فلم تراه، زفرت براحه ثم ذهبت إلي أحد العاملين بالكافتيريا و قالت له: 

_خد يا رائد لما أستاذ حماده ينزل إبقي إديله المفتاح ده و قولله ورد مشيت. 

=مش خير يا آنسه ورد ولا إيه؟! 

_خير إن شاءالله.. عن إذنك. 

أسرعت تحاول الفرار قبل أن يلحق بها أحدهما و يمنعها من الرحيل حتي إبتعدت عن المكان. 

بدأ قلبها ينتفض خوفاً و راح القلق يساورها، لقد جنّ الليل وبدأ السكون يخيم علي المكان فدعت الله بداخلها: 

_ياارب.. مليش غيرك إسترها معايا و وقفلي ولاد الحلال. 

سارت كثيراً وهي لا تدري أين هي الآن، كل المحال التجاريه اُغلِقت و فرغ الشارع من المارة إلا من قليل، ظلت تدعو الله بداخلها و يملؤها يقين داخلي بأنه لن يمسها سوء. 

توقفت في شارع خالي تماماً من المارة فـ دارت حول نفسها بخوف و دب الرعب في أوصالها وهي لا تعلم للعودة سبيل حتي رأت متجر ورود مازال مفتوحاً علي بعد خطوات منها فركضت سريعاً حتي وصلت إليه و دخلت بعد أن طرقت الباب ولم تستمع لأي إجابه. 

دخلت المتجر تجول بعينيها يميناً و يساراً قبل أن تنتفض عندما إستمعت إلي صوت سيدة عجوز تتحدث من خلفها وتقول بصوت راقي مهندم: 

_أفندم؟! 

إستدارت ورد و نظرت إليها ثم زفرت بخفه و قالت: 

=مساء الخير حضرتك. 

_يسعد مساكي يا حبيبتي.. أي خدمه؟! 

تلعثمت ورد ولم تعرف كيف تبدأ حديثها فإنفجرت باكية مما أثار دهشة السيده و قالت: 

_خير يا حبيبتي.. أقدر أساعدك بإيه؟! 

جففت ورد دمعاتها وقالت بصوت يرتجف: 

=لو سمحتي ممكن تشغليني هنا.. هشتغل أي حاجة معنديش مانع. 

تعجبت الأخري وقالت: إنتي جايه تدوري علي شغل الساعه 12بالليل؟! 

=أنا كنت شغاله في كافتيريا جمب المحطه بس حصل ظروف و إضطريت أسيبها و معنديش مكان أروحه. 

زفرت السيدة بـ حيرة و قالت: 

_معلش يا حبيبتي بس أنا مينفعش أشغل أي حد.. انا معرفكيش كويس.. إيه اللي يضمنلي إنك مش عامله مصيبه و جايه تستخبي هنا!! 

إنهالت دمعاتها مجدداً وقالت: والله العظيم لأ.. ورحمة أبويا أنا مش وش كده خالص.. حتي شوفي شنطتي مفيش فيها أي حاجة غير الهدوم.. صدقيني أنا مش بكذب عليكي والله. 

تنهدت السيدة وقالت: والله يا بنتي مش عارفه أقوللك إيه بس أنا مش هاين عليا أقوللك إمشي. 

تفائلت ورد و لاح شبح إبتسامه يظهر علي شفتيها فتابعت السيدة: طيب بصي.. أنا هشغلك في المحل هنا تساعديني بما إني مفيش معايا حد.. بس هتنامي فين؟ 

تحدثت ورد بحرج وقالت: لو ينفع أنام هنا لحد الصبح و بكرة إن شاءالله هشوف مكان أقعد فيه.. الليله بس. 

إبتسمت السيدة وقالت: لا يا حبيبتي إنتي هتطلعي معايا أنا شقتي فوق في السابع. 

إتسعت عينا ورد بذهول وقالت: السابع؟! و بتطلعي و تنزلي كل يوم السابع!! 

ضحكت الأخري كثيراً وقالت: يعني شايفه ده شكل حد يطلع السابع و يوصل حي؟!! الأسانسير موجود يا حبيبتي. 

هزت ورد رأسها وقالت: ربنا يديكي الصحه يارب. 

_شكراً يا حبيبتي.. ألا صحيح إنتي إسمك إيه؟! 

=إسمي ورد. 

إبتسمت السيدة وقالت: شكلك جيتي مكانك الصح يا ورد.. يلا. 

=يلا فين؟! 

_يلا عشان تطلعي تباتي معايا فوق. 

=لا معلش كتر خيرك.. أنا هنام هنا للصبح و بكره إن شاءالله هشوف مكان أقعد فيه. 

_لأ طبعاً مينفعش تنامي هنا.. إطلعي نامي الليله فوق و بكره ربنا يحلها من عنده. 

أومأت ورد بموافقه خجوله و صعدت معها إلي شقتها. 

خرجت من المصعد بدور حول نفسها بعدم إتزان فقالت السيده بضحك: 

_مالك يا ورد إنتي دوختي ولا إيه؟! 

إبتسمت ورد و قالت: أصلي أول مرة أركب أسانسير. 

_معقوله؟!

هزت ورد رأسها بتأكيد فقالت الأخري: طب يلا الشقه أهي. 

دخلت ورد إلي الشقه تتطلع إليها بتعجب، إنها متسعه للغاية و لكن ليست مرتّبه و بها الكثير من الأغراض العشوائيه و الفوضويه. 

قالت السيدة دون أن تنظر إلي ورد: 

_متستغربيش يا ورد من الكراكيب اللي ماليه البيت.. أنا بطبيعتي مبحبش حد غريب يدخل البيت و مبقاش فيا صحه انضف زي ما انتي شايفه. 

إبتسمت ورد بحرج وقالت: ربنا يديكي الصحه يا مدام.. و أنا من الصبح إن شاءالله هشوف مكان أقعد فيه مش هتقل علي حضرتك. 

إبتسمت الأخري وقالت وهي تربت علي وجنتها بحنان: 

_أنا مش قصدي عليكي يا ورد.. وبعدين أنا خدت قرار إنك مش هتمشي خالص. 

نظرت ورد إليها بإستفهام فقالت السيده: بما إنك وحيده زيي و كده كده هتشتغلي معايا في المحل يبقا تخليكي معايا هنا أهو نونس بعض. 

=شكراً لحضرتك والله بس أنا كده هبقا بتقل عليكي.. أنا هشوف مكان قريب من هنا و أقعد فيه و كتر خيرك إنك ساعدتيني و هتشغليني في المحل. 

جلست السيده و قالت: إقعدي يا ورد.

جلست ورد مقابلها فقالت: أنا من زمان عايشه لوحدي يا ورد.. جوزي ميت من 10سنين و ربنا مأرداش إني أخلف.. من يوم ما مات وأنا مبعملش حاجه في حياتي غير إني بنزل المحل أفضل فيه طول اليوم و أطلع هنا وقت النوم بس.. فـ إنتي هتونسيني و أونسك بدل ما تقعدي لوحدك و أنا أقعد لوحدي.. ها قولتي ايه؟! 

زفرت ورد بإرتياح و هزت رأسها موافقةٍ وقالت: 

_اللي تشوفيه حضرتك.. ألا بالحق حضرتك إسمك إيه؟! 

إبتسمت السيده وقالت: إسمي ماجدولين.

تعجبت ورد وقالت: الله.. إسم حلو أوي بس غريب.. أنا هقولك يا مدام ماجي. 

ربتت علي كفيها و قالت: قولي زي ما تحبي يا ورد.. يلا قومي حضريلنا بقا حاجه ناكلها.. عندك الحاجه في التلاجه. 

إرتسمت علامات الحرج علي وجه ورد وقالت: حضرتك أنا مش جعانه.. بس هعملك حاضر من عنيا. 

أشاحت "ماجدولين" بوجهها كالأطفال وقالت: 

_لأ.. إذا مكنتيش هتاكلي مش هاكل أنا كمان. 

إبتسمت ورد بـ ود حقيقي وقالت: هاكل. 

بادلتها الأخري الإبتسام وقالت: طيب يلا إدخلي الأول غيري هدومك و بعدها إعمليلنا ناكل. 

نهضت ورد تنظر حولها فقالت: أنهي أوضه؟! 

أشارت لها وقالت: خدي الأوضه دي هواها بحري و هتعجبك. 

دخلت ورد إلي الغرفه التي أعجبتها كثيراً فنظرت حولها إلي الفوضي التي تعصف بالمكان أجمع وقالت: 

_مهمتك كبيره بكرة يا ورد.. إستعنا علي الشقا بالله.

تعليقات