رواية عين مش شايفه وروح دافيه الفصل التاسع 9 بقلم مريم الجنيدي


 رواية عين مش شايفه وروح دافيه الفصل التاسع 

_ بقولك أي أنت هتقرفني لي طلقني 
_ بقولك تعالي وريني لابسه أي، طلاق أي وزفـ.ت أي ! 

_ لابسة لبس، جيبة و شميز، وبعدين أنت من امتى يتركز في الحاجات دي 

وشه كرمش بعصبية 
_ هو أي إللي مش بركز أنتِ مراتي وعايز أعرف لابسه أي، إحنا هنروح الشركة وفي رجالة ولازم أتأكد أن لبسك مناسب

_ وأنا من امتى بلبس لبس مش مناسب! 

_ أسمعي الكلام وخلاص مش عايز مجادلة أنا مش عايزة مجادلة 

_ أستغفر الله العظيم يارب، نوح أنت بتغير! 

وشه أتغير بإستدراك وقال بسرعة 
_ لا طبعًا 

قولت بسخرية وأنا بقرب منه 
_ ولي لا طبعًا عيب ولا أي؟ 

_ مريم مش عايز مجادلة 

قولت بملل 
_ نوح أنا مش عايزة أروح الشركة النهاردة 

_ نعم ! لي بقا إن شاء الله، أنتِ ناسية إنك المساعدة بتاعتي! 

قولت بصوت خافت حزين 
_ ومراتك برضو اعتبرني اجازة النهاردة 

قال بصوت عالي 
_ مفيش الكلام دا، مش هعتبر حاجة بلاش دلع يلا 

قولت بنفاذ صبر 
_ يا نوح تعبانة بجد مش قادرة

_ تعبانة من أي، يلا يا مريم بلاش دلع، ماتعمليش نفسك هانم وتدلعي على الفاضي، أنتِ نسيتي نفسك و المجهود إللي كنتِ بتعمليه ولا أي!؟ 

بصيت ليه بصدمة، وسكت، وهو استوعب كلامه، قولت بصوت ساخر 
_ آه معلش نسيت نفسي وإن كنت مساعدة وباخد بالي من كل حاجة، واحد الآن باخد بالي من كل حاجة ومش من حقي أرتاح عشان مش من مقامي 

كان لسه هيتكلم لكن دخلت وقفلت الباب وأنا بقول بصوت عالي 
_ عايز تروح روح لواحدك، أنا مش خدامة تحت أمرك 

فضل واقف في الصالة ندمان على إللي قاله، بس الحقيقة إن لما بنقدم كل حاجة لشخص بدون مقابل، هو بينسى إن إحنا محتاجين مقابل و عندنا مشاعر

خرجت بالليل وأنا بمسح دموعي عشان أعمل حاجة أكلها العياط جوعني، بس لقيته قاعد في العتمة على كرسي قدام الباب 
_ بسم الله الرحمن الرحيم أنت قاعد كدا لي زي قرد قطع! 

_ مستنيكِ تخرجي، خبطت عليكي وأنتِ مرداتيش 

سيبته منغير رد ودخلت المطبخ 
_ مريم ... مريم أنا بكلمك 

_ مش عايزة أتكلم، روح شوف مصلحتك 

وقف على باب المطبخ 
_ ماكنش ينفع أقول إللي قولته 

ضحكت بتهكم
_ والله شاطر إنك عارف 

_ ممكن نقعد نتكلم شوية 

قولت بوضوح وأنا برزع الكوباية على الرخامة 
_ بقولك أي بصراحة مش طايقة أشوف وشك 

حمحم بإحراج 
_ طب اسمعيني 

_ عايزة أكل هتطفحني اللقمة ولا أي! 

_ طب أعملي ليا معاكي 

_ أعمل لنفسك مش عاملة حاجة 

أخدت السندوتشات وكنت هدخل، لكن وقف قدامي 
_ مش بحب الأسلوب دا 

_ واحد اتنين تلاتة أربع، أربع حيطان اضرب راسك في أي واحدة 

كنت هعدي من جنبه لكنه مسك أيدي 
_ دا مش أسلوب تعامل متحضر على فكرة 

_ لا ما أنا مش متحضرة، وكلمة كمان وهديك من المنفي خيار 

_ يعني أي! 

_ يعني وسع من وشي 

قال بعند وهو بيشدد على أيدي أكتر
_ مش هوسع يا مريم، واهدي كدا وكلميني زي ما بكلمك 

_ كدا طب اهو
 عضيته من أيده جامد وهو صرخ 
_ آه يابنت العضاااضة سيبي أيدي بقولك 

_ وسع بقا بدل ما اقرمك تاني 

_ متجوز مصاصة دماء! 

حاولت امشي واسيبه، لكنه فضل ماسك فيا، لحد ما فجأة انفجرت في البكاء، مع إن مش بحب أعيط أبدًا قدام حد، لكن هو أصر عليا لحد ما فقدت القدرة على التماسك، قولت بنحيب 
_ مش بحب حد يقلل مني، وتقبلت الكل، لكن ماتصورتش أنها تطلع منك 

_ حقك عليا أنا آسف مش عارف قولت كدا إزاي 

_ عشان أنا إللي فضلت أدافع عنك، و أقف لدا ولدا، ومحدش وقف ليا، أنت اعتبرت أن المداس بتاعكم، لكن أنا مش هسمح أبدًا بكدا، أنا عندي كرامة 

_ أكيد طبعًا عارف يا مريم، أنا ماقصدش أقلل منك نهائي 

_ سيبني دلوقتي مش بحب أقعد مع حد وأنا متعصبة 

دفعته بعيد عني ودخلت الأوضة 
تاني يوم الصبح لما خرجت كان قاعد نفس القعدة 
_ أنا جاهزة عشان نروح الشغل 

_ مص هنروح طول ما أنتِ زعلانة 

_ مش بحب أبقى مش منتظمة في شغلي 

_ والله!! طيب ياستي هقوم ألبس

طول الطريق كنت ساكته لحد ما وقف قدام كافية على الكورنيش 
_ تعالي هنفطر 

_ مش عايزة، نبقى نجيب سندوتشات فول وطعمية وخلاص 

_ يلا يا مريم 

اتنهظت ودخلنا وقعدنا فطرنا، ولما جه الحساب بصيت فيه 
_ احي بجد، شوية الفطار دا بألف جنية، و البيض الجبن دول بألف جنية، قولتلك نربي فراخ ونعمل مشروح بيض، يعني حسبي الله ونعم الوكيل

_ والله والله لو جيبني سيرة الفراخ دي تاني أنتِ حرة 

_ ألف جنية لي والله! 

_ عادي يا مريم مكان وأكل نضيف 

_ ماتخلنيش اغلط، بقا وأحنا بنعنل أكل مش نضيف، دا أنا كنت بوفر لك وبنجيب فول وطعمية 

_ ما حر..قت معدتي يا مريم 

بصيت بعيد وقولت ببرود 
_ اممم تمام أنت حر؟

قال بتردد
_ أنتِ لسه زعلانة! 

_ آه، ولولا إنك جوزي كنت شوحتك في النيل هنا 

اتنهد وقال 
_ حقك عليا يا مريم، هقعد اعتذر كل خمس دقائق يعني 

_ وأي المشكلة وتجيب ورد وتصر في الإعتذار أي كتير عليا!! 

_ مفيش أي حاجة في الدنيا كتير عليكي 

مشينا وهو وقف قدام محل ورد 
_ أي دا أنا بهزر مش عايزة ورد أكيد 

_ الرجل النبيل إللي يجيب ورد لمراته 

قولت بإستغراب 
_ نبيل مين! 

_ إحنا بعاد أوي يا لطيف 

نزل مع السواق ورفض إن أنزل وبعد شوية رجعة ببوكية ورد أحمر كبير وعطاه ليا 

_ ها كدا سامحيني 

_ يا سلام على الحلاوة، أول مرة حد يجيب ليا ورد، البوكية دا يتعمل مربة ورد عظمة 

_ نعم ياختي؟!

ضحكت بإرتباك 
_ بهزر بهزر 

_ سامحيني طيب 

_ بعد الورد والفطار إللي بالشئ الفلاني دا، خلاص سامحتك، أخاف ازعل شوية كمان تفلسنا 

_ مريم قولتيلي شكلك أي!! 

_ أي دا اشمعنى مش قولتلك مرة! 

أبتسم وقال 
_ معلش محتاج أعرف تاني 

_ شعري أسود وقمحية و عيني سودا عادي يعني 

_ امممم 

_ أي بتفكر في أي 

_ بحاول أرسم ملامحك في خيالي 

مسكت أيده ومشيتها على وشي 
_ ها حاسس 

_ حاسي بمناخيرك بس يا مريم 

_ تصدق أنا غلطانة أبعد أبعد 

_ استنى حسيت رموشك طويلة 

_ آه الحمد لله رباني 

_ دي مش مسكرا! 

_ لا مش بحط العبط دا 

وصلنا الشركة وخلصنا الشغل، وروحنا وأنا داخلة المطبخ 
_ ها تاكل أي عشان احضره بسرعة 

_ مريم 

_ نعم 

_ أنا هسافر اسبوعين 

خرجت من المطبخ بسرعة 
_ أي! رايحين فين، أحضر الشنط 

قال بإرتباك 

_ لا أنا رايح لواحدي يا مريم

قولت بإعتراض 
_ دا لي بقا إن شاء الله 

اتنهد بنفاذ صبر 
_ عندي شغل، وزينب هتبقى معايا، لأن هحتاج ترجمة، ولما تخلص الشغل دا، هنبقى نسافر لواحدنا 

_ طب خدني معاك، مش هعرف اسيبك لواحدك 

_ متقلقيش يا مريم أنا مش صغير 

_ أنا عارفة إنك مش صغير بس أنا هبقى قلقانة 

ربت على أيدي وقال بهدوء 
_ متقلقيش وفي حاجة مهمة أوي هقولك عليها اول ما أرجع 

ماكنتش مقتنعة، بس غصب عني اضطريت اسيبه يسافر رغم إن عارفة إن مش هفيدة في حاجة في بلاد برا، وأن أخته معاه، لكن محتاجة اشوفه قدام عيني 

عدى أسبوعين وكنت بحاول أوصل له لكن تليفونه مقفول وتليفون زينب مقفول!! قلبي وقع في رجلي وأنا خائفة جدًا عليه مش عارفة أعمل أي، هل أروح لباباه، ولا في أيدي أي أعمله، الف سيناريو في دماغي وأنا مش عارفة استوعب أي بيحصل، ولي مش بيردوا وحصل أي!!!! 


تعليقات