رواية تاني فرصة الفصل التاسع بقلم هاجر سلامه
طارق سكت لثواني عينه بتتحرك في وش ندى وفي عينها اللي بتلمع بصدق عمره ما شافه منها زمان وحس إن جبل التلج والشك اللي جواه بدأ يسيح قدام حرارة كلامها وقربها الدافي
مد إيده براحة ولمس شعرها الأسود السايح على كتافها وقال بنبرة هادية وخايفة من الوعود ندى أنا تعبت من الحروب دي ونفسي أصدقك بجد نفسي أصدق إنك ليا ومش شايفة غيري
ندى ابتسمت براقة وقربت منه أكتر ولزقت فيه وقالت بصوت كله حنان صدقني يا طارق وادينا فرصة نعيش العيشة اللي نستاهلها
من الليلة دي طارق قرر يقفل باب الشك ويبدأ معاها صفحة جديدة بجد وكان بيحاول يتقرب منها بكل حب والدنيا بدأت تضحك ليهم جوه الشقة
مرت أسابيع وندى كانت بتثبت له في كل لحظة وفي كل نظرة وكل تفصيلة في البيت إنها بتموت فيه وإن روحها بقت متعلقة بيه هو وبس
كانت تبص له وهو لابس هدوم الشغل وتقرب تظبط له الياقة وتدعي له من قلبها وهو كان بيحس إن ربنا عوضه عن كل الوجع اللي شافه في أول الجواز
وفي يوم الصبح وندى واقفة في المطبخ بتعمل القهوة لقت دماغها فجأة لفت وصوت صفارة جامد ضرب في ودنها
سندت على الرخام وضغطت على عينيها جامد وفي ثانية شريط حياتها كله رجع قدام عينيها زي البرق
افتكرت كل حاجة
افتكرت دراستها في الهندسة وافتكرت حبها القديم لشريف والوجع اللي عاشته ليلة الفرح وافتكرت الحاجز اللي بنته بينها وبين طارق
بس الغريب والمدهش إنها لما افتكرت شريف محستش بأي حاجة خالص تجاهه وكأن الحب ده كان مجرد وهم أو إعجاب بنت صغيرة وراحت لحالها
ولما افتكرت طارق القديم وقسوته وجفائه وافتكرت طارق الجديد بحنانه واهتمامه وخوفه عليها لقت نفسها بتعشق طارق بتاع دلوقتي بكل كيانها
الذاكرة رجعت كاملة لندى بس هي قررت تقفل الصفحة القديمة تماماً وماتقولش لطارق ولا لمخلوق إنها افتكرت عشان تحافظ على السعادة والهدوء اللي بقوا عايشين فيه وم تفتحش أبواب الشك تالي
وهي بتقلب في المذكرات اللي شالتها في الدولاب افتكرت تفصيلة مهمة جداً طارق عمره ما قالها عليها
افتكرت إن بكرا هو يوم عيد ميلاده
طارق من نوع الرجالة اللي مابيهتموش بالمناسبات دي وعمره ما جاب سيرة ليوم ميلاده من ساعة ما اتجوزوا
ندى ابتسمت وخططت لـ مفاجأة كبيرة تسعد قلبه وتثبت له مكانته عندها
تاني يوم طارق نزل الشغل كالعادة وندى بدأت تتحرك بسرعة البرق في الشقة
نزلت اشترت زينة رقيقة وشموع وبلالين وجابت تورته شيك جداً مكتوب عليها بالكريمة البيضاء بحبك يا طارق
وقفت في المطبخ وعملت الأكل اللي بيحبه ونظفت الشقة وخلت ريحتها ورد ومعطرات دافية
علقت الزينة وطفت الأنوار ووعملت إضاءة خفيفة بالشموع خلت الشقة زي الجنة الصغيرة
ولبست فستان رقيق وجميل وسابت شعرها وقعدت تستناه وروحها طايرة من الفرحة
على الساعة تمانية الباب اتفتح ودخل طارق وهو شايل شنطة شغله ووشه باين عليه التعب من يوم طويل في الشركة
أول ما خطى خطوة جوه الشقة استغرب الظلمة والإضاءة بتاعة الشموع وصوت المزيكا الهادية اللي شغال في الخلفية
ندى خرجت له من الصالة وهي ماسكة التورتة في إيديها والشموع منورة وشها وبتغني بصوت عذب هادي كل سنة وأنت طيب يا حبيبي كل سنة وأنت جوزي وسندي وأغلى حاجة في حياتي
طارق وقف مكانه متسمر والشنطة وقعت من إيده وبص للتورتة وللشقة والزينة وعينيه لمعت بدموع الفرحة والذهول
ندى قربت وحطت التورتة على التربيزة وجريت عليه وحضنته جامد ودفنت راسها في صدره
طارق ضمها بقوة لدرجة إنه كان هيخفيها جوه ضلوعه وقال إيه كل ده يا ندى أنتي عرفتي منين ان انهارده عيد ميلادي أنا عمري ما قولتلك على التاريخ ده ولا جيبت سيرته من يوم الحادثة
ندى بعدت عنه شوية وبصت في عينيه وابتسمت ابتسامة كلها حب ودموع فرحة وقالت بصوت هادي وثابت طارق أنا ذاكرتي رجعت
طارق ملامحه اتغيرت فجأة والخوف صدمه وقال بذهول ورعب يعني إيه رجعت تذكرتي شريف وتذكرتي الماضي
ندى مسكت وشه بين إيديها وقالت بحنان اآه يا حبيبي افتكرت كل حاجة وافتكرت شريف وافتكرت إني كنت فاكرة نفسي بحبه بس انهارده وأنا بفتكر عرفت إن ده كان وهم وأني عمري ما حبيت ولا هحب في الدنيا دي غيرك أنت يا طارق أنا رجعت لي الذاكرة من كام يوم ومارضيتش أقولك عشان خفت تشك فيا تاني بس قولت لازم أثبت لك إن البنت اللي فاكرة كل حاجة هي كمان بتموت فيك وعايزاك أنت وبس
طارق أول ما سمع الكلام ده قلبه دق بطريقة جنونية وفرحة الدنيا كلها دخلت جوه صدره وشالها ولف بيها وهو مش سايعاه الأرض من السعادة وأخيراً بقوا لبعض بجد ومن غير أي حواجز أو ماضي يهددهم
طارق نزلها على الأرض وباس راسها وقال بحبك يا ندى بحبك بجد
وفجأة ونظرات الحب مالية المكان ملامح ندى اتغيرت وابتسامتها اختفت وعينيها زغللت وضاقت
حست بدوخة شديدة وجسمها كله ساب ومبقتش قادرة تقف على رجليها
طارق لاحظ التغيير ومسكها بسرعة ندى مالك في إيه
ندى مالحقتش ترد وراحت في غيبوبة تامة وإغمى عليها بين إيديه وطيرت راسها لورا
طارق صرخ برعب ندىىىى ردي عليا في إيه
وهو بيشيلها عشان يحطها على الكنبة بص لوشها وانصدم صدمة عمره
لقى خيط د..م أحمر غامق نازل ونظيف من مناخير..ها ومغرق وشها الفاتن
طارق قلبه وقف من الرعب وبقى يصرخ بأعلى صوته في الشقة الفاضية ندىىىىى ردي عليا أرجوكي متسبنيش دلوقتي
