رواية عمر وليلي الفصل التاسع 9 بقلم نون لاشين


 رواية عمر وليلي الفصل التاسع 

قرب عمر منها عشان يبدأوا حياتهم الحقيقية مع بعض ويطيروا لعالم تاني مفيهوش غيرهم هما الاتنين..


هجمت مايا بالمشرط وهي بتصرخ بجنون.. وليلى رجعت لورا بسرعة ورفعت دراعها تحمي وشها ورقبتها!

المشرط شق كم بلوزة ليلى وجرح دراعها .. سالت منه الدماء بغزارة.. وصرخت ليلى صرخة مكتومة عشان متفزعش عمر: "آاااااااه!!"

مايا ضحكت بهستيريا وعنيها مبرقة وقالت: "لسه! أنا هقطع وشك الحلو ده اللي خطف عمر مني!"

ورفعت مايا إيدها بالمشرط مرة تانية عشان تغرزه في صدر ليلى اللي وقعت على الأرض ..

لكن صرخة ليلى كانت أقوى هذه المرة 

فتح عمر عيونه فجأة.. ولما شاف ليلى واقعة على الأرض ودراعها بينزف.. ومايا واقفة فوقيها ونازلة بالمشرط عليها.. 

شال عمر ماسك الأكسجين من على وشه.. وبكل قوته المتبقية مسك "حامل المحاليل الحديد"  اللي جنب سريره.. وقطعه من الكانيولا اللي في إيده.. وهوى بيه بكل عزمه على ضهر مايا قبل ما المشرط ما يلمس ليلى!

الضربة كانت قوية لدرجة إن مايا صرخت ووقعت على وشها في الأرض وطار المشرط من إيدها بعيد!

ليلى زحفت بسرعة وضغطت على زر الطوارئ الأحمر اللي جنب السرير.. وفي ثانية كان طارق والحرس والدكاترة بيكسروا باب الجناح وبيدخلوا!

أول ما دخلوا اتصدموا من المنظر.. مايا مرمية على الأرض وبتضحك  زي المجانين وبتشد في شعرها.. وليلى دراعها بينزف.. وعمر قاعد على حرف السرير بيلهث وقميص المستشفى الأبيض اتغرق بالدم تاني بعد ما خياطة الجرح اللي في صدره اتفتحت من الحركة العنيفة!

ليلى نسيت جرحها وجريت على عمر : "عمر! الجرح اتفتح تاني! إنت ليه اتحركت يا حبيبي حرام عليك نفسك!"

عمر مسك وشها بإيده : "كـ.. كنتي عايزاني.. أسيبها تأذيكي.. ؟! إنتي كويسة؟"

ليلى عيطت وحضنت إيده: "أنا كويسة والله دي خربشة بسيطة.. دكاترة بسرعة!"

الشرطة دخلت وكتفت مايا اللي كانت بتصرخ بكلام مش مفهوم بعد ما عقلها طار رسمي من الصدمة والغل.. والدكاترة نقلوا عمر بسرعة لأوضة العمليات خيطوله الجرح الخارجي تاني، وضمدوا جرح دراع ليلى اللي رفضت تتحرك من جنب أوضته.

عدت تلات أسابيع..

تلات أسابيع وعمر بيتحسن يوم بعد يوم تحت رعاية ليلى اللي كانت سهرانة على راحته ليل ونهار.. بقت هي اللي بتأكله بإيدها.. وهي اللي بتغيرله على الجرح.. وحبهم كان بيكبر في كل لحظة وبيتعمق أكتر.

.. خرج عمر من المستشفى أخيراً بعد ما خف تماماً.. ورجع قصر الراشد وهو حاضن ليلى تحت إيده.. وكان الحاج راشد وطارق وندى والخدم كلهم واقفين في استقبالهم بالورود 

في الصالون الكبير.. كان قاعد الأستاذ فريد المحامي.. وأول ما عمر وليلى قعدوا.. ابتسم المحامي وقال: "حمد لله على السلامة يا عمر باشا.. أنا جيت النهاردة عشان أبلغكم بالأحكام النهائية اللي صدرت من المحكمة الصبح في قضية الشروع في القتل والقتل العمد."

عمر مسك إيد ليلى وقال: "قول يا أستاذ فريد.. سمعنا الأخبار الحلوة."

المحامي : "المحكمة حكمت بإحالة أوراق كل من (عبد الرحمن ) والمدعو (كريم) لفضيلة المفتي لتنفيذ حكم الإعدام شنقاً! وحكمت على (سارة) بنت عبد الرحمن وعمتك (فريال) بالسجن المؤبد 25 سنة مع الشغل.. أما (مايا) فبعد الكشف الطبي عليها ثبت إنها أصيبت بجنون رسمي وفقدان للعقل، والمحكمة أمرت بإيداعها في مستشفى الأمراض العقلية الجنائية !"

ليلى غمضت عيونها وخدت نفس طويل.. وأخيراً الكابوس انتهى للأبد وكل واحد ظلمها خد جزاءه بالعدل!

الحاج راشد قال : 
"سبحانك يارب.. يمهل ولا يهمل.. القصر دلوقتي نضف من الحقد والغل.. وجه الوقت اللي نفرح فيه بقى!"

عمر بص لليلى بنظرة كلها حب وشوق وقال: "فعلاً يا جدي.. أنا صبرت كتير أوي.. ويوم الخميس الجاي.. يعني بعد تلات أيام بالظبط.. هيكون فرحي أنا وليلى هنا في جنينة القصر.. وهعزم مصر كلها عشان يشوفوا ملكة قلبي."

هنا طارق نط في الكلام وقال بمرح: "طب وبمناسبة الأفراح والليالي الملاح يا كبير.. أنا كمان هطلب إيد الدكتورة ندى رسمي.. عشان نلبس الدبل في نفس اليوم بدل ما نخسر مصاريف مرتين!"

الكل ضحك من قلبه.. وندى وشها احمر واستخبت ورا ضهر ليلى.. وعمر ابتسم وقال: "وماله يا طارق.. ندى بنت أصول ووقفت جنبنا في الشدة.. على بركة الله الفرح هيبقى فرحين!"

قبل الفرح بيوم..

طلبت ليلى من عمر  إنها تروح شقتها القديمة اللي في الحارة الشعبية لآخر مرة.. عشان تجيب فستان الفرح الأبيض بتاع والدتها الله يرحمها اللي وعدتها تلبسه.

عمر صمم يروح معاها بنفسه.. وصلوا الحارة وطلعوا الشقة البسيطة.. أول ما ليلى فتحت الباب وشمت ريحة أمها في المكان.. دموعها نزلت غصب عنها.

دخلت أوضة والدتها.. وفتحت الدولاب وطلعت الفستان الأبيض المطرز.. وحضنته لصدرها وهي بتعيط وتقول: "كان نفسي تكوني معايا بكرة يا ماما.. تشوفيني وأنا عروسة زي ما كنتي بتتمني."

عمر دخل وراها .. وحضنها من ضهرها وحط دقنه على كتفها وقال : "ماما حاسة بيكي وشايفاكي دلوقتي يا ليلى.. وهي أكيد فرحانة ومرتاحة في مكانها.. وأنا هنا في أوضتها.. بعاهد ربنا إني عمري ما هخلي دمعة تنزل من عينك تاني.. وهكون ليكي السند والأمان لآخر نفس في عمري."

ليلى لفت في حضنه ودفنت وشها في صدره : "ربنا يخليك ليا يا عمر.. أنا بحبك أوي."

عمر خد الفستان الأبيض.. ووداه لأكبر مصمم أزياء في مصر.. خلاه يضيفله لمسات بالألماظ واللؤلؤ من غير ما يغير تفصيلته الأساسية عشان يفضل محتفظ بروح والدة ليلى.

وجه يوم الخميس.. ليلة العمر!

قصر الراشد كان بيتلألأ بالأنوار .. الجنينة الضخمة اتفرشت بالورد الأبيض من أول البوابة لحد الكوشة .. الصحافة والقنوات ورجال الأعمال والدكاترة كلهم كانوا حاضرين الفرح الأسطوري لعمر الراشد والدكتورة ليلى!

وقف عمر .. لابس بدلة سودة في منتهى الشياكة والوسامة.. وجنبه الحاج راشد وطارق اللي كان لابس بدلة شيك وماسك إيد ندى اللي كانت زي القمر في فستان خطوبتها الوردي.

وفجأة.. الموسيقى الهادية اشتغلت.. واتفتحت أبواب القصر الداخلية..

وظهرت ليلى على السلم الرخامي الكبير!

كانت لابسة فستان والدتها الأبيض بعد ما اتعدل وبقى تحفة فنية.. والطرحة الطويلة نازلة وراها.. ومكياجها الرقيق مظهر جمالها الطبيعي الملائكي.. كانت حرفياً شبه الأميرات !

عمر أول ما شافها.. اتسمر في مكانه.. قلبه دق بعنف.. ولمعت دمعة فرحة في عيونه وهو شايف الحلم اللي استناه تلات سنين بيتحقق قدام عينه!

طلع عمر على السلم بخطوات سريعة.. ومد إيده لليلى اللي حطت إيدها في إيده وهي مكسوفة وبتترعش من الفرحة.. عمر رفع إيدها وباسها قدام الكل.. وقرب من ودنها وهمس بصوت ذوبها: "إيه الجمال ده كله؟ إنتي ناوية تخلصي على قلبي اللي لسه خافف من العملية ولا إيه؟"

ليلى ابتسمت بخجل وقالت: "سلامة قلبك يا حبيبي."

نزلوا مع بعض وسط تصفيق حار من كل المعازيم.. ولبس طارق الشبكة لندى وسط الزغاريد.. وبعدها أخد عمر ليلى في نص البيست عشان يرقصوا رقصة السلو الأولى ليهم.

حاوط عمر خصرها بإيديه وشدها لحضنه .. وليلى حطت إيديها حولين رقبته وبصت في عيونه الساحرة.

عمر وهو بيلف بيها : "تعرفي إني لحد دلوقتي حاسس إني بحلم؟ خايف أغمض عيني وأفتحها ألاقي نفسي لسه واقف تحت بيتكم من تلات سنين وببص عليكي من بعيد."

ليلى حطت راسها على صدره : "ده مش حلم يا عمر.. إحنا خلاص مع بعض.. ومفيش قوة في الدنيا هتفرقنا تاني."

خلص الفرح الأسطوري على خير بعد منتصف الليل.. ومشوا المعازيم.. والحاج راشد باركلهم  وراح الجناح بتاعه في الدور الأرضي.. وطارق وصل ندى لبيتها.

 عمر فاجئ ليلى وشالها بين إيديه  وهي بتشهق وبتضحك بخجل: "عمر نزلني الخدم يشوفونا!"

عمر ضحك : "يشوفوا اللي يشوفوه.. واحدة وجوزها.. وبعدين أنا مستني اللحظة دي بقالي تلات سنين وشهرين!"

طلع بيها عمر للجناح بتاعهم في الدور التاني.. جناح متزين كله بالشموع والورد الأحمر.. نزلها  وقفل باب الجناح .. وقالها : "هسيبك تغيري الفستان براحتك وأنا هغير البدلة في غرفة الملابس."

ليلى هزت راسها بكسوف شديد ودخلت الحمام.. وبعد عشر دقايق خرجت وهي لابسة روب ستان أبيض رقيق جداً وشعرها الطويل مفرود على ضهرها.. كانت آية في الجمال والأنوثة.

خرج عمر من غرفة الملابس.. وأول ما شافها وقف مكانه مبهور.. قرب منها .. ومسك إيديها وباس جبهتها : "مبروك عليا إنتي يا ليلى.. يلا نصلي ركعتين لله نشكره إنه جمعنا ببعض على خير."

صلوا مع بعض ركعتين في خشوع.. وعمر حط إيده على راسها ودعا دعاء المتزوجين وعيونه مدمعة من الفرحة.. وبعد ما خلصوا.. شالها عمر وحطها على السرير .. وقعد جنبها يتأمل ملامحها بحب وعشق ملهوش حدود.

قرب عمر منها عشان يبدأوا حياتهم الحقيقية مع بعض ويطيروا لعالم تاني مفيهوش غيرهم هما الاتنين..

وفجأة!!

وقبل ما شفايفه تلمس شفايفها.. شمت ليلى ريحة غريبة ونفاذة ماليه الأوضة!

ليلى بعدت وشها ثانية وكحت وقالت باستغراب: "عمر.. إنت شامم الريحة دي؟ دي ريحة دخان وبنزين!"

عمر عقد حواجبه بقلق.. وبص ناحية باب الجناح.. ولقي دخان أسود كثيف جداً بيدخل من تحت عقب الباب وبيملى الجناح بسرعة مرعبة!

قام عمر مفزوع وجري على باب الجناح عشان يفتحه.. مسك الأكرة لقاها سخنة مولعة.. حاول يفتح الباب.. الباب كان مقفول من بره 

ليلى قامت من على السرير وهي بتكح جامد ومرعوبة: "إيه ده يا عمر؟! الباب مقفول ليه؟! القصر بيولع ولا إيه؟!"

عمر جري على البلكونة بتاعة الجناح وفتحها.. ولقي الدور الأول من القصر تحتهم والجنينة ماسكة فيهم النار بالكامل والنيران طالعة للسما.. والحرس واقعين على الأرض متخدرين!

وفي اللحظة دي.. موبايل عمر اللي على الكومودينو رن 

عمر جري فتح الخط وسمع صوت راجل  بيضحك وبيقول: "مبروك يا عمر باشا.. عبد الرحمن بيه بيبعتلك هدية الفرح من جوه سجن الاستئناف.. الرجالة بتوعنا خدروا حراسك وقفلوا عليكم الجناح ورشوا القصر كله بالبنزين.. قدامكم خمس دقايق بالظبط والنار توصل لأنابيب الغاز الرئيسية والقصر ينفجر بيك إنت وعروستك وجدك اللي نايم تحت.. موتة سعيدة يا عرسان!"

وقفل الخط!

ليلى صرخت برعب والدخان ملى الجناح ومبقوش قادرين ياخدوا نفسهم: "يا نهار أسود! جدي تحت يا عمر! وإحنا محبوسين والنار محاوطانا من كل حتة!"

عمر بص من البلكونة العالية للأرض.. وبص لليلى اللي بدأت تدوخ من الدخان والاختناق.. والنار بدأت تمسك في باب الجناح !

تعليقات