( ارض الانتقام)
الحلقه الخامسه
غمض بلال عنيه مستني الطلقه توصله في اي وقت.... بس فتحها بعد شويه وهو مستغرب ان مفيش حاجه ..... بص لجسور باستغراب
جسور : المرادي جبتها ما بين رجليك المره الجايه هتبقي في نص دماغك
بلال : خلاص خلاص انا اسف ايدك ابوسها
وراح وطي علي ايد جسور علشان يبوسها بس جسور سحب ايده
جسور بقرف : امشي غور من قدامي
ولما جسور لقي بلال لسه واقف رفع مسدسه
جسور : اااااخللللللص
بلال خرج من الاوضه جري
***********************************
دخلت بيها من باب القصر وهي ماسكه شعرها... حاولت تلا ان اخلي بروج تسيب شعرها وفضلت تنطط بس بروج ماسكه في شعرها مش راضيه تسيبه.... حسنيه ام تلا اول ما شافت بروج مسكاها كده جريت عليها
حسنيه : في ايه يا بروج... عملت ايه علشان تمسكيها بالشكل ده ؟!
بروج : عملها اسود ومنيل يا خالتي
حسنيه أخدت تلا منها وحضنتها
حسنيه : عمك ميت اه.. بس طول منا عايشه علي الدنيا مش هسمح لحد انه يأذي....
ومكملتش كلامها لان بروج قاطعتها : بنتك كانت هربانه... مع بلال ابن ولاد فارس ... وانا اللي رحت جبتها.. والغريب بقي انك ملاحظتيش غيابها
حسنيه : بحسبها معاكي والله
وراحت زقت تلا عند بروج : علميها الادب يا بروج.. ان شالله تقلعيلها شعرها شعرايه شعرايه
تلا اتصدمت من موقف امها اللي اتحولت بين الثانيه والتانيه .. اخدتها بروج لأوضتها ومعاها بوسي ولحقتهم منه ..... بروج رمت تلا علي سرير بصتلها تلا بغل
بروج مش مصدقه ليها عين تضحك بعد اللي عملته كله.... فضحكت بصدمه
بروج : وكمان ليكي عين تبصيلي بصه زي دي ؟!
تلا بصوت واطي : انا معملتش حاجه غلط
بروج بتريقه : والله!!
تلا بزهق وبصوت عالي : انا معملتش حاجه غلط
بروج : وهروبك مش حاجه غلط
تلا : بحبه وبيحبني
بروج : حب ايه يا حيوانه حب ايه.... الحب يبقي بالجواز مش بالهروب
ولسه هتروح علشان يضربها حاشوها بوسي ومنه
تلا: بقولك ايه مطلعيش عقدك علينا... طب مانتي اتجوزتي يا حلوه محبتهوش ليه... لا واطلقتي في نفس اليوم يا ست يا شريفه يا عفيفه... تقدري تقوليلي طلقك. ليه
بروج فقدت كل هدوئها في اللحظه دي.. ممكن تتعصبش وتبقي بارده في اي حاجه الا موضوع جوزها وتلا عرفت تضغط صح علي الجرح .... وبالرغم من ان منه وبوسي واقفين ما بينهم... بس بروج مسكت تلا من شعرها وفضلت تصرخ
بروج : انا اشرف منك ومن عشره زيك يا زباااااله
حاولوا يسلوكها بس مفيش فايده ماسكه في شعرها زي الغرا... ولما نجحوا من انهم يبعدوها كامت بروج طلعت شعر تلا في ايديها من كتر غيظها
عرفوا يهدوا بروج شويه وخلوها تبعد عنها علشان تروح اوضتها... تلا شافت شعرها اللي واقع علي الارض اتجننت مسكت فاظه كانت موجوده في اوضتها واحت تضرب بروج وهي خارجه من الاوضه... ولسه هتضربها لاقت بروج اديرت وخنقتها... فمن كتر ما تلا مش عارفه تتنفس وقعت الفاظه اللي كانت في ايديها ورجليها بدأت تبعد عن الارض وبدأ وشها يزرق ولسانها يخرج بره... ده كله وبروج لسه بتخنقها ومنه وبوسي بيحاولوا يبعدوا بروج عنها وعاملين يصوتوا وبروج في عالم تاني ومش سامعه اي حاجه.... عدي كان في اوضته لما سمع الصوات جري وراح المبني التاني من القصر.... لانه كان فيه مبنين مبني للبنات ممنوع الرجاله يدخلوا فيه والمبني التاني للرجاله والضيوف اللي هيجي.... فضل يجري ورا الصوات لحد ما وصل لأوضه تلا... اتردد ان يدخل اوضتها ولا لا بس لما لقي ان صوت اخواته مش راضي يبطل دخل بسرعه... لقي بروج خانقه تلا وتلا خلاص شكلها بتطلع بروج.... زق بروج فوقعت علي صدر منه واغمي عليها ....خبطته في كتفها علشان يبعدها عن تلا كانت بالنسبالها التلكيكه اللي بسببها فقدت كل قوتها... جوازها كان مأساه وربنا ناجها باعجوبه... بس كان زي ذكري سودا في حياتها مبتحبش حد يتكلم فيها وخصوصا لو شخص زي تلا ميعرفش حاجه.... منه فضلت تعيط بحرقه وهي حاضنه بروج.. منه هي اللي كانت حاضره تفاصيل الجوازه المشئومه او بالأدق البيعه.... لسه صرختها في ودنها وهي صغيره لما نزلت علي رجل ابوها تبوسها وهي بتعيط تترجاه وهي بتقول " لا يا بابا متخليش بروج تروح مع الراجل الوحش ده لا يا باباااااا "
نزل عدي علي ركبته محتار يطمن علي انهي واحده فيهم الاتنين مرمين علي الارض... بس من الواضح ان تلا رغم ان هي كانت مخنوقه الا انها كويسه عن بروج بكتير
عدي : عايز افهم ايه اللي حصل ؟!
منه : عايريتها بجوازها حراام والله اللي بيحصل ده حرام
بوسي : هي بروج كانت متجوزه ؟!
بص عدي لتلا بعتاب وزهق عليها : لما متكونيش عارفه تفاصيل الموضوع متتكلميش فيه
تلا : طبعا مش انت اخوها لازما تقف معاها.. اومال هتقف معايا.. ما انتا زيك زيها سمعتك زي الزفت
اسوأ شئ ورسوه عن ابوهم هو البرود وانهم يستحملوا يستحملوا بس لو انفجروا مفيش اي حاجه تقف قدامهم .... فجأه تلا لاقت كل حاجه في اوضتها ببتكسر وبتترمي علي الارض ...... كان زي الطور المجنون.
عدي بجنون : يا متخلفه يا متخلفه اتطلقت في نفس اليوم لان ابوها كان بايعها مش جواز ده عمره.... مفيش اب يرضي لبنته اللي عندها 15 سنه تتجوز واحد عنده 40 سنه بس عمك رضاها.. بعها ب 200 الف جنيه تخيلي!!! والاسم جوازه... ولولا منذر الله يرحمه دخل الشقه وكسرها علي راس الحيوان ده وخلاه يطلقها في الوقت المناسب كانت اختي دي ضاعت كانت ضاعت
سكت فجأه لما لقي بوسي قعدت في زوايه في الاوضه ودمت ركبتها لصدها وفضلت تعيط بهيستريا .... راحلها ومسك ايديها مكنش عايزها تعرف الحقيقه مكنش عايزها تعرف ابوها علي حقيقته بالطريقه دي... من وقت ما اتولدت وهي عايشه مع جدها وامها ابوها حتي مشفهاش وراح اتعرف علي واحده اجنبيه واتجوزها واخد منه وبروج معاه وسابها هي.... علشان كده هي دلوعه جدها متتطلبش طلب الا ويتنفذ في وقتها.. لأن جدها حب يعوضها عن حنان ابوها اللي مشافتهوش اصلا... بس دايما كانت تسأل علي بابها وتقول انها عايزه تشوفه
عدي : هشششش يا قلبي انتي متعيطيش
بوسي بعياط : دايما اقولكوا اني عايزه اشوفه دايما اقول كده وازعل منكوا لما ملاقيش رد.. بس انا دلوقتي مش عايزه اشوفه مش عايزه اشوفه يا عدي
وفضلت تضرب بايديها ورجليها وهي منهاره وعدي بيحاول يهديها معرفش بعدها صرخت منه
منه : الحقني يا عدي مفيش نفس ولا حركه... بروج مش راضيه تفوق
وقف عدي وهو مش عارف يعمل ايه... غرس صوابعه في خصلات شعره مش عارف ينقذ مين ولا مين وبوسي صواتها يزيد ومنه صواتها يزيد اكتر واكتر وهي لاقيه بروج مرميه ومبتنطقش .... لقي نفسه نازل علي السلم وهو بيصرخ : يا ماااااااماااا... يا خالتي
طلعت رقيه وحسنيه جري وهما مش عارفين فيه ايه لغايه ما وصلوا لأوضه تلا... وراح عدي شال بروج وخرج ووراه منه.. انما رقيه فضلت تهدي بوسي وحسنيه تهدي تلا لانها هي كمان بدأت في نوبه عياط مش راضيه تخلص
*********************************
بعد ما الاوضاع هديت والكل راح علي اوضته. .... حست تلا بتأنيب ضمير وراحت عند اوضه بروج.... فتحت الباب ودخلت... لاقت بروج نايمه
تلا : بروج... انتي صاحيه
بروج بتعب : اااأأااا
تلا : انا اسفه والله مكنتش اعرف حاجه انا اسفه.. والله مش عارفه انام وانا عارفه اني جرحتك
وسعتلها بروج من غير ما تفتح عنيها
بروج : تعالي نامي وانتي ساكته
نامت تلا جنبها
تلا : يعني سامحتيني!!
بروج بتعب : نامي
************************************
تاني يوم الصبح
سمعت بروج موبايلها بيرن جت تجيبه وهي نايمه لاقت حاجه سدت طريقه... فتحت عنيها ولاقت تلا نايمه جنبها
بروج باستغراب : ايه اللي جاب البت دي هنا
أخدت بروج موبايلها بالعافيه لاقته رقم غريب... ردت وصوتها كان تعبان من كتر زعيق امبارح بس لما خرج صوتها خرج كأنه رقيق كأنه همس
بروج : الوو
بس صدمها صوت اللي بيتكلم لما قال :
********************************
تفتكروا مين اللي بيتصل ؟
الحلقة السادسة من هنا
