روايه القلب وما يريد
( ارض الانتقام)
الحلقه ال 21
عاصي : ايه ؟!
بلال : بييييب
عاصي : انت مجنون يلا
بلال بغيظ : لا مش مجنون هي اسمها تلابيب وبيدلعوها يقولولها تلا
عاصي : وانت عرفت منين ؟!
بلال بصله وسكت
عاصي ضرب رأسه بايده :اما انا غبي صحيح. ... هي معاك في نفس البلد
بلال : السؤال بقي انت عرفتها ازاي ولحقت حبيتها امتي
عاصي كان واعد نفسه انه ميقولش لحد عن الحادثه علشان صورتها متتهزش قدام حد علشان هو عارف التفكير المتخلف لاغلبيه الناس اللي بتجيب الحق علي البنت
عاصي : منا دكتورها في الجامعة وكمان اتعرفت عليها اكتر في جواز بروج وجسور
بلال وهو بيقوم : اه قولتلي
عاصي : رايح علي فين
بلال : قايم ورايا تليفون هخلصه
بلال ضغط علي الرقم واتصل ....
تلا كانت قاعده في اوضتها بتفكر في اللي حصل ودماغها هتنفجر من كتر التفكير.... طب ليه اتصل بمنه.. وليه منه مش راضيه تقول حاجه ...... لاقت موبايلها بيرن بصت لموبايلها بزهق. وقررت متردش بس ردت لما رن اكتر من مره
تلا : الو عايز ايه
بلال: اظن انتي عارفه انا بتصل ليه
تلا : اه عارفه لانك انسان معندكش دم مش قولتلك تبعد عني
بلال : لا يا عسل انا مش متصل علشان كده... انا متصل علشان عاصي
تلا : دكتور عاصي!!!
بلال : الله ينور علي اهلك
تلا : وانا دخلي ايه ؟!
بلال : مبحبش اللف والدوران... انتي سلكتي طريق اخويا علشان تنتقمي مني
تلا : انت بتخرف تقول ايه ؟!
بلال: ده مش تخريف فابعدي عن عاصي احسنلك للإ انتقم منك في اخواتك زي ما انتقمتي في اخويا
تلا : انت اتجننت
بلال : احنا في ارض الانتقام وكل شئ مسموح بيه فابعدي عنه احسنلك لإما بكره هروح اتقدم لبوسي
تلا : دي نجوم السما اقربلك منها
بلال : حقك مانتي لسه متعرفنيش
تلا : صدقني محدش يعرف جبنك وندالتك وخساستك وقله اصلك قدي...
وقفلت في وشه السكه
تلا : ربنا ينتقم منك يا بلال ربنا ينتقم منك
**************************
خرج للبلكونه اللي في اوضته يشم شويه هوا وسابها نايمه.... فاقت لاقته واقف في البلكونه
راحت وحطت ايديها علي ايده اللي موجوده علي حاجز البلكونه.
بروج : جسور
جسور :نعم
بروج : بكره عيد ميلاد جدي وأنا عايزه اروح
جسور : مينفعش تروحي وانتي تعبانه كده
بروج : لا منا بقيت كويسه
جسور : برضه مفيش مرواح
بروج : ليه ؟!
جسور : لان في اسلام
بروج : انا مش عارفه انتوا ليه واخدين من بعض تار.. انتوا في ايه ما بينكوا فهموني
جسور : عايزه تعرفي سبب التار اللي ما بينا
بروج : ياريت
جسور : انتي
بروج مش فاهمه وشاورت علي نفسها : انا.. انا اكتر واحده مش عايزه تار ولا غيره
جسور : انتي شكلك كده ولا بستعبطي ولا ايه نظامك .... مبتفهميش خالص كده
بروج صرخت في وشه : طيب فهمني انت
جسور حاول يتمالك أعصابه : اسلام بيحبك
بروج مستوعبتش حاجه خالص : ليه
جسور بتريقه : اهو يا ستي القلب وما يريد.. هو ايه اللي ليه انت هتجننيني
بروج : منا مش مصدقه اللي انت بتقوله بصراحه.
جسور : ولو قولتلك انه اعترفلي
بروج : اسلااااام... ازاااااي... ده اصغر مني
جسور : وده يمنع انه يحبك ؟!
بروج : مش عارفه... بس عمره ما قالي عمره ما لمحلي حتي
جسور ضغط علي دراعها وصرخ في وشها : ولو كان قالك يعني كنتي هتعملي ايه كنتي هتوافقي يعني وتتجوزيه
بروج صرخت بصوت اعلي منه : لأ كنت فهمته انه زي اخويا واني بعامله علي الاساس ده
عاصي كان نايم في الجنينه وسامع كل زعقيهم فقام مخرج قطنه من جيبه حطها في ودانه... جه بلال ورقد جنبه مره تانيه فمد عاصي ايده بحته قطنه
بلال : ايه دي
عاصي : هتحتاجها دلوقتي
بلال : ليه
عاصي : هتعرف
صرخ جسور بعلو صوته : انا قولت مفيش مرواح يعني مفيش مرواح
اخد بلال من عاصي القطنه بسرعه وحطها في ودانه
عاصي : مش قولتلك هتحتاجها
**************************
تاني يوم الصبح
مشي راح علي شغله من غير ما يقولها صباح الخير حتي قال كده يعني بيعاقبها مكنش يعرف كده انه بيعاقب نفسه
قعد يخبط علي المكتب بالقلم تايه خالص لا مركز في شغل ولا غيره... عمال يفكر يا تري هي اخدت ادويتها ولا مأخدتهمش اكيد مش هتأخدهم عند فيه ..... هيتصل بيها يفكرها بيهم بس مجرد تفكير.. طب ويتصل ليه وهو ممكن يروح ويتأكد أنها اخدت دواها
خرج جسور بره مكتبه
جسور للسكرتيره : الغيلي اي مواعيد النهارده
راح البيت ملاقهاش في اي حته فطلع الاوضه وفتحها ملاقهاش
جسور بغيظ : بروووووج
وراح علي عربيته جري
**************************
ماشيه وراها في كل حته لحد ما زهقتها في عيشتها
بوسي : مش هتقوليلي بقي عاصي كان عايزك في ايه مش هتقوليلي ها. .. قوليلي بقي كان عايز يكلمك في ايه... اكيد هتقوليلي منا أختك حبيبتك امانك وسرك.... انتي هتذليني ابقي اضربيني بالجزمه لو كلمتك تاني
* بعد خمس دقايق *
بوسي : مش هتقولولي بقي كان عايزك في ايه
حطت منه الفطار علي السفرا
منه : حرام عليكي جبتيلي صداع والله... اتقي ربنا... ايه مبتتعبيش من اول ما صحيت ولاقيتك فوق رأسي في الاوضه ولما نزلت نزلت ورايا ولما دخلت المطبخ دخلتي معايا ولما خرجت جيتي ورايا ورغي رغي رغي رغي ايه ارحميني
بوسي : هتقوليلي ولا لأ
منه : هقولك ايه ومفيش حاجه اصلا
بوسي : كده..... يا عدي عيزاك في كلمه
منه : استني يا بنتي حرام عليكي
جريت بوسي لعند عدي
عدي : نعم
بوسي : عايزه اقولك حاجه .... البت منه
منه : متصدقهاش
بوسي : البت منه
بروج من وراها : مالها بقي.
بوسي : بروووج يا قلبي
وجريت عليها حضنتها
منه بصت لبروج وحركت شفايفها من غير ما تتكلم : الحمد لله نقذتيني
عدي : حماتك بتحبك زي ما بيقولوا تعالي افطري معانا بقي
بروج :اه بتحبني اوي ..... واجي افطر مجيش ليه هو انا صغيته ولا ايه
عدي : ايه اللي في رأسك ده
بروج : لا دي وقعه خفيفه علي السلم
الكل اتلم حاولين السفرا وبروج مثبته عنيها علي اسلام
بروج بخبث : مال ايدك يا اسلام
اسلام اتخض وبص حواليه : مملهاش
بروج : اومال بتأكل بالشمال ليه
اسلام حاول يأكل بالايد اليمين معرفش واتألم جامد
بروج : الظاهر خبط في حاجه
اسلام بغيظ : او حد خبطني
بوسي كانت مركزه في الحوار اوي وعماله تبص لنظرات كل حد فيهم وتحلل كلامهم
بوسي : بروج هو انتي اللي ضربتي اسلام علي ايده
بروج زورت فشربت مايه وقالت بتوتر : اضربه ازاي يعني هو كنت شوفته فين يعني
بوسي عملت انها مش مهتمه ورفعت كتافها ومطت شفايفها : معرفش بس من كلامكوا حسيت كده
خلصوا الفطار والكل بدأ يقوم فمالت بروج علي عدي : عملت ايه في حكايه داليدا
عدي بصوت واطي : الاسم اللي ادتهولي ملهوش اي وجود
بروج : وبعدين هنعمل ايه ؟!
عدي : لما ارجع القاهره واظبط امور شغلي هبقي اخدها ونروح العماره اللي حصل فيها الحادثه
بروج:طب ما تخليها تروح لوحدها
عدي : لا علشان البواب لو انكر اواجهوا بيها
بوسي : انتوا بتقولوا ايه
بروج : بوسي يا حبيبتي بقولك ايه ما تروحي تذاكري
بوسي : اسكتي مش حاولت اذاكر امبارح وحصل حاجات غريبه عاصي كلم منه وتلا زعلت واسلام ايده معرفش ايه اللي جرالها وانتي معرفش ايه اللي حصل في دماغك وكل الدنيا اتلخبطت وده كله ليه علشان حاولت اذاكر
كانت وهي بتتكلم بروج عماله تشاورلها وهي بتتكلم
عدي : مين اللي كلم منه
بوسي كانت لسه هتتكلم قامت حاطه ايديها علي بوقها : متأخدش في بالك دي عيله هبله.... تعالي لما نروح لجدك ونقوله كل سنه وانت طيب
**************************
جسور وصل قصر ولاد علام بس كانت بروج طلعت اوضتها
بوسي استقبلته : أهلا اهلا. . بروج في اوضتها
جسور : ممكن توديني اوضتها
بوسي : اه طبعا طبعا
جسور : شكرا
بوسي : اللي هي جات لوحدها ليه
جسور : خليكي في نفسك
بوسي : ايه الكسفه دي
بوسي وصلته لأوضه بروج .... فجسور بصلها لاقاها لسه واقفه
جسور : ايه
بوسي : ايه ايه مش هتخبط علي الباب
جسور : مش هتمشي انتي طيب
بوسي : عايزني امشي
جسور : ده بعد اذنك
بوسي بزهق : كده بقوا كسفتين
بوسي مشيت وجسور فتح الباب من غير ما يخبط... لقي بروج لابسه بنطلون جينز كحلي علي قميص اسود وفي ايديها مج وبتبص من شباك اوضتها .... اول ما الباب اتفتح اتخضت وكانت هتوقع المج من اديها بس راحت وحطته علي طاوله الزينه
بروج : حرام عليك خضتني
لاقت معالم وشه كلها قسوه ومفيش اي حب في عنيه
بروج بصوت رقيق : جسور
قناع الغضب اللي كان لابسه من شويه انهار قدام رقتها فغصب عنه ضحك وانهارت هيبه الغضب قدامها
بروج راحت وحضنته
جسور بألم : اااه الحروق
بروج خرجت من حضنه بسرعه :انا اسفه اسفه نسيت
جسور : بقيت مشوه بسببك
بروج : محدش قالك تنقذني
جسور : بتهزري صح انتي لو جرالك حاجه انا كان ممكن يحصلي ايه
بروج : افهم من كده انك سامحتني
جسور :اه بس متحصلش تاني لان لو خرجتي بدون علمي هطلقك
بروج بضحك : بطل رخامه
جسور : تعالي وريني بقي بتتفرجي علي ايه ؟!
بروج : تعالي
وقفوا الاتنين قدام الشباك الطويل وكان منظر الاراضي الخضرا يجنن
**************************
عدت الايام وعلاقه بروج وجسور بتقوي
الا في يوم جه رساله لجسور علي الواتس من رقم هو عارفه كويس ومكتوب فيها : دخلت عماره مع الراجل ده
بص جسور للصوره وقال ما بين اسنانه : عدي
الحلقة الثانيه والعشرون من هنا
