روايه القلب وما يريد.
( ارض الانتقام)
الحلقه ال 24
بروج : افندم انت جاي تهزر هنا. . منذر ابن عمي ميت في حادثه والكل عارف كده
حيدر : وانا كمان عارف كدا بس اللي انا اعرفه وانتي متعرفهوش ان فرامل عربيته اتلعب فيها بفعل فاعل
بروج بانفعال : انت بتقول ايه يا بني ادم انت
حيدر : بصي علشان منهاتيش ونأخد وندي في كلام ملوش لازمه هسمعك حاجه وانتي هتفهمي الباقي
بروج : حاجه ايه
حيدر : ثواني
حيدر فتح ريكورد من علي موبايله وبروج سمعت الاتي :
ايوه انا قاتلته ولو اتكلمت انت كمان هقتلك ... انت يا غبي انت مش عارف ان منذر ليه ربع الشركه دي وبروج الربع التاني وانا النص فلما منذر يموت وانا عارف كويس انه عامل ان الوصايه علي ابنه من بعد مماته تبقي لبروج وانا اتجوز بروج يبقي كل الشركه في ايدي فبطل غباوه
حيدر : ايه رأيك في اللي سمعتيه.
بروج. بصدمه : ده صوت جسور بس لو هو فعلا هو اللي قتله وانا بمتلك ربع الشركه مع اني معرفش ازاي ليه طلقني مهو كده مش هيعمل اللي هو عايزه
حيدر : اكدب عليكي لو قولتلك اعرف اناا اصلا معرفش في دماغه ايه
بروج حست ان الدنيا بتلف بيها : طب تشكر
حيدر مد ايده بكارت ليها : لو عوزتيني في اي وقت كلميني
بروج اخدت الكارت وحطته جنبها من غير ما تشوفه ودماغها عماله تودي وتجيب فيه مليون سؤال في دماغها... ازاي جسور بقي شريك منذر والعيلتين اعداء وازاي هي ليها اصلا في الشركه وهي متعرفش بس بما انها اتأكدت انه قتل منذر محدش هيأخد تار منذر غيرها
***********************************************
كان قاعده بتذاكر بص اسلام ليها اوي وبعدها دعك في عنيه يتأكد انها بتذاكر فعلا
راح وقف قدامها وبصلها فرفعت عنيها تشوف مين اللي واقف لاقته اسلام
فجري جري خرج بره ورجع تاني
بوسي : ايه الهبل اللي انت بتعمله ده انت متخلف يابني
اسلام : لا بس اني اشوفك بتذاكري ودي ظاهره كونيه بتيجي كل سبعتلاف سنه
بوسي : لا ظريف اوي انت... اقعد سمعلي
اسلام : اسمعلك ايه
بوسي : فلسفه
اسلام: وهي الفلسفه بتتحفظ يا فقيقه
بوسي : هو حد بيفهم في الفلسفه حاجه اصلا يا فقيق... وبعدين سمع وانت ساكت
مسك اسلام الكتاب وراح ضربها علي دماغها
بوسي حطت ايديها علي دماغها : ليه كده يخربيت غباءك يا شيخ
اسلام : هو غتاته كده
بوسي : رخم
**********************************************
وبالليل راح جسور قصر ولاد علام
في مكتب فوزي علام
فوزي : قالولي انك عايز تقابلني خير
جسور خرج ورق : ده ورق الطلاق خلص والمحامي هيخلصلي ورق المؤخر وغيره
فوزي : طلاق ايه وطلاق مين ؟!
جسور : ليه هو حضرتك متعرفش ان انا وبروج اطلقنا
فوزي بصدمه : ايه
جسور بتردد : هي بروج مقالتلكش اننا اطلقنا
فوزي حس ان الدنيا بتدور بيه اقرب حفيده لقلبه اتظلمت في الجوازتين اللي اتجوزتهم لا واتطلقت كمان.... محسش بنفسه الا وهو مش قادر يتنفس وشويه شويه اغمي عليه ... جسور قام بخوف ناحيته
جسور : مالك. يا حاج فيك ايه
فوزي بصوت متقطع : مش قا در اتنفس هموت
جري جسور بره وفضل ينده علي اي حد يساعده لغايه ما اتلم اهل البيت كلهم واول واحد كان اسلام.
اسلام : في ايه
جسور شاور علي باب المكتب : جدك
اسلام جري جري وبعده بوسي وبروج وبعدها العيله اتلمت
بروج لما دخلت جسور دخل هو كمان فلما شافت جدها بالحاله دي
بروج بصن لجسور بغيظ : انت قولتله ايه
جسور : مكنتش اعرف انك مقولتلوش حاجه
بروج بغيظ : اطلع بره
جسور اخد نفسه ومشي
ويعد ما جدهم اخد نفسه شويه
فوزي : ليه مقولتليش
حست في نبرته بالكسره
بروج : لا يا جدي ابوس ايدك بلاش نبره الضعف دي ما عاش ولا كان اللي يضعفك ويكسرك حتي لو انا والله ما يستاهلني يا جدي... وفتحت درج المكتب وخرجت المسدس وخرجت بره
فوزي : اخرج وراها يا اسلام شوفها هتعمل ايه
خرج اسلام وراها لاقاها ضربت كمان طلقه في الهوا ونادت علي الغفير
بروج : تعزملي كل كبارات البلد الليله اللي جايه بمناسبه طلاقي وعايزه يتنشر دلوقتي في كل البلد اني اتطلقت من جسور ابن فارس
الغفير : حاضر
التفتت لاقت اسلام
اسلام : ايه اللي انتي بتعمليه ده
بروج : اللي انت شايفه
اسلام : بصي انا اكتر واحد مبيقبلش جسور ورافض فكره جوازكوا بس اللي انتوا بتعمليه ده اسمه تهور وخصوصا انك حامل منه
بروج حطت ايديها علي بطنها : اللي بطني ربنا يتولاه برحمته.
اسلام : يعني ايه مش هتقوليله
بروج : ميستاهلش انه يعرف
*********************************************
بعد ساعات من السفر والراحه شويه في الطريق
فتح عدي شقته ودخل
عدي : ادخلي من النهارده ده بيتك
دخلت داليدا بتقدم رجل وبتأخر رجل وراحت قعدت علي كرسي... قعد عدي علي الكرسي اللي جنبها
عدي : متخافيش انتي هنا في امان
داليدا : مخافش ازاي وانا معاك
عدي : متخافيش مش هتعرضلك خالص ولا كأني في البيت
واضح جدا انه مفهمش قصد داليدا فداليدا اتعصبت : مخافش ازاي وانت زيك زيه
عدي : زي مين ؟!
داليدا سكتت شويه مش قادره تجيب اسمه علي لسانها
داليدا : زي اللي عمل فيا كده
عدي بصدمه : بتشبهيني بواحد مغتصب ؟!
داليدا : وهو اللي يضحك علي بنت ويخليها تنتحر ميبقاش اسمه مغتصب برضه
اتحولت ملامح عدي لملامح شرسه شريره... لاقته قابض علي ايده اوي وجسمه كله بيتنفض
عدي : قومي ادخلي اي اوضه واقفلي علي نفسك دلوقتي
داليدا : نعم
عدي صرخ فيها : قوماااي
داليدا جريت علي اول اوضه قابلتها وقفلت الباب بالمفتاح اللي كان فيه وسمعت صوت حاجات بتتكسر وحاجات بتتهبد وفضل علي الحال ده لمده ساعتين عمال يكسر في الشقه
عدي خبط علي الباب وده خلاه ترتعش فقال بتعب : تقدري تخرجي دلوقتي انا ماشي
راحت داليدا علي السرير اللي كان قدامها ونامت كأنها بتهرب من الواقع
**********************************************
والصبح بدري
في مكتب الحاج فوزي
فوزي :نعم يا عاصي... ومتقوليش انك جاي في موضوع اخوك احنا خلصناه
عاصي : انا عرفت اللي هو عمله وزعلان جدا ومتأكد انه هو هيندم بس ده مش موضوعي دي حياته.... انا جاي طالب القرب من حضرتك في الانسه تلا
فوزي : ومش شايف ان دي حاجه صعبه وخاصه بعد طلاق بروج وجسور.
عاصي : اللي انا شايفه ان ده موضوع وده موضوع تاني خالص ومش معني ان هما فشلوا في حياتهم تبقوا تعمموا التجربه علي الجميع.. انا شاريها ولو حتي كان شرطوكوا ان اخرج من بيتي وابقي في بيت منفصل انا وهي مش هيفرق معايا لان عاجلا او اجلا هيبقي ليا انا وهي بيت خاص بيها... ياريت حضرتك متأخدنيش بذنب اخويا وتفكر في الموضوع كويس
سكت فوزي وفضل يدور الموضوع في دماغه
*******************************************
في بيت ولا فارس
خلت عزه الكل متجمعين
عزه : سمعت اللي انا سمعته يا حاج
جمال : خير
عزه : قال المحروسه وعيلتها عاملين ليله كبيره بمناسبه طلاقها وعزمت فيه كبار البلد
جسور رمي المعلقه من ايده وقام وخرج
جمال : يارب تكوني ارتاحتي لما سممتي بدنه بكلامك الماسخ
عزه : الله مش هي دي الحقيقه
جسور راح ناحيه قصر ولاد علام ووقف بره وشاف الانوار اللي مزينه القصر والهيصه اللي حواليه وجواه فرجع بعربيته تاني وهو هيولع
*******************************************
اسلام : ايه يا حاج الغفير قال انك عايزني والناس كتار عايزين اللي يقف معاهم
فوزي: في عريس اتقدم لأختك وانا عايز اخد رأيك
اسلام : مين ده
فوزي : عاصي
اسلام : الفارسي... ده علي جثتي لو دخلت بنت تانيه من عيلتنا بيتهم تاني.
فوزي : وان قولتلك انه هيعيش هو وهي لوحدهم
اسلام : برضه لأ اللي اتلسع من الشوربه ينفخ في الزبادي يا حاج
فوزي بضحك : وليه ناخد الزبادي بذنب الشوربه وخصوصا ان الزبادي غلبان
اسلام : قصدك ايه
فوزي : قصدي ان اللي هيأخد القرار في الموضوع ده هي تلا احنا يدوبك هننصحها... وكمان في عريس اتقدم لبوسي
اسلام : نننننعم ودي مين اللي هيتقدملها بقي.. سبونج بوب!!
الحلقة الخامسة والعشرون من هنا
