ليالى الكنز..حلقة 9
تربية ابليس الجزء الثانى.
اليوم اللى قبل يومين الثبات كان يوم حافل جدًا ، قمر وحاتم كانوا مركزين اوى فى دخول العهد وزودت اكسس بوينت الكاميرات علشان اقدر اتاكد انهم دخلوا العهد مع الجين وان الكنز بقى متاح ، اتصلت بالراجل بتاع شركة الحفر واتفقت معاه انه يجيلي على بداية يوم الثبات الساعة 11 بليل علشان نلحق نعدى من الرمال المتحركة بسرعة بالمعدات ونبدا عملية الحفر، حسام كان قلقان جدًا وبعد مااتصلت بالراجل قالى:
= انا مش متفائل وحاسس ان الموضوع ده هيروح فيه ناس كتير
اتضايقت عليه وقولتله بغضب:
.. بعنى ده وقته تقلقنى وتقولى الكلام ده ، وبعدين اما انت اللى بتفكر وبتخطط بتقولى كده ، امال انا اعمل ايه ؟!
= انا بقولك على احساسى ياليالى ، وبعدين انا طول اليوم عمال اسمع اصوات غريبة ، زى مايكون همس بنى ادمين ، وكمان لمحت من بعيد تيشيرت حد واقع على الارض ومكنش موجود ساعة ماجينا من كام يوم
.. تفتكر حد بيراقبنا ؟؟!
= لازم ناخد بالنا بس من حركتنا علشان كل حاجة تكون محسوبة
.. اسكت بقى وركز وبص معايا علشان قمر وحاتم بيجهزوا اهم لدخول العهد مع الجن
قمر وحاتم بدأوا يقلعوا هدومهم ويقولوا التعاويذ اللى بتطلب من الجن الدخول فى العهد ، الغربية بقى ان وانا مركزة معاهم كنت سامعة صوت خالد وهو بيقولى :
= متلعبيش معانا انتى مش قدنا ، متلعبيش معانا انتى مش قدنا
اتخضيت من صوت همس خالد ، واتلفت بسرعة لقيته جنبي ، ببص الناحية التانية على حسام لقيته بيترعش وعينه بيضا وعمال يريل من بقه ، كانه دخل فى حالة صرع ، قعدت اصوت واقول لخالد :
.. انت جيت هنا ازاى ؟! وايه اللى انت عملته فى حسام ده ؟!
وش خالد كان عمال يتغير ، بطنه اتنفخت على الاخر ، رجله طلعلها حوافر ، وفجأة نزل تحت الارض ، مبقتش مصدقة عينيا ، رجعت بصيت تانى على حسام لقيت عينيه مغمضة وزى مايكون اغمى عليه ، خبطت على وشه علشان افوقه واول مافتح عينه قالى :
= يااه عينى غفلت بس حلمت حلم فظيع يا ليالي
مرضتش اخوفه من اللى شوفته والحالة اللى كان عليها ، وقولتله:
.. حلم ايه ؟! خير
= حلمت ان الدكتور هو اللى بيراقبنا ، وانه خد الكنز فى الاخر
سرحت شوية ورجعت قولتله:
.. محدش بقى ضامن حاجة يمكن يكون رؤيا مش حلم ، احنا لازم نأمن نفسنا
= ازاى؟!
.. والراجل بتاع الحفر جاى بالمعدات ، نوصفله طريق تانى قريب من مكانا هنا ونراقب من بعيد ونشوف فيه حد وراه ولا لأ
= كده مش هنلحق الوقت ويومين الثبات يادوب يعدونا بالمعدات
.. العهد مع الجان مش هخليه الكنز بس ، كمان هيكون الامان من الرمال المتحركة ، بلاش نستعجل علشان منفقدش كل شئ ، وكمان اتصل بالراجل بتاع الحفر قدم الميعاد كام ساعة
= ليه ؟!
.. اسمع كلامى بس وهقولك فى الاخر
حسام اتصل بالراجل بتاع الحفر وقاله يجي على الساعة 6 مساءا بدل 11 مساءا ، وخليت قمر وحاتم يكملوا طقوس الدخول فى العهد واتفقت معاهم انهم يطلبوا الامان من الرمال المتحركة وفتح الكنز.
قعدت على الكاميرا اراقبهم كويس ، لحد مالقيت حاتم شبه مغمى عليه وعمال يتحرك بجسمه كأنه بيمارس الجنس بشهوة عالية ، وسمعت صوت صراخ قمر وهي برضو مش فى وعيها وكأن حد بيمارس معاها الجنس ، الاتنين قاموا وقفوا بعدها وطلبوا العهد من الجان ، وكان بيان نجاح العهد حاجة من الاتنين ، لو وقعوا على الارض وماتوا
، ده معناه فشل العهد ، لكن لو فتحوا عينيهم وابتسموا ده معناه نجاح العهد ، وبعد دقايق كتير وهما واقفين ومغمضين عينيهم ، فتحوا عينيهم وابتسموا .
انا وحسام حضنا بعض بسبب نجاح الخطة وكانت الساعة قربت على 6 مساءا ، الميزة اننا كنا مديين الراجل بتاع الحفر جهاز لاسلكى مربوط على الاكسس بوينت بتاعتنا علشان نقدر نتصل بيه وهو فى الصحرا ، وفعلا اول مالمحناه جاى بعربية المعدات ، اتصلنا بيه وخليناه ينزل من العربية وقولناله يمشى الطريق اللى بنقوله عليه ،
وبدأنا نراقب خطواته لحد مالمحنا 4 رجالة ماشيين وراه ووراهم الدكتور .....
الحلقة العاشرة من هنا
