#غاليتي 1
🌹للكاتبة الشاعرة شهرزاد🌹
الحلقة الأولى
ماشي بنغازي ونقلت شغلي غادي بعد ثلاث سنين عمل في الحقول .. زعما شن يراجي فيا غير هلي ؟
وحياتي الجديده كيف تبي تكون شكلها !؟
كيف نبي نبدا من الصفر وانا غادي
ولما كان المنجي غارق في تفكيره
صوت الطياره وغبارها وسط الصحراء عبّآ المكان
__________________________
رجب قاعد في الصالون ماسك تليفونه : وين طبيتو يااحمد
احمد يسوق وحاط السماعات : في سيدي خليفه ياحاج واهو معايا المنجي شويا ونوصلو فيكم
رجب : باهي توصلو طيبين ياباتي
امينه في المطبخ اتحرك في الرز : حطيتي ورق غار في المرقه ياامباركه
امباركه اتقطع في الخيار : حطيت ياامينه
امينه تضحك : ياناعلي ربي يكمل عليا فاتحة وليدي وغداء رجاله و المنجي مروحلي مبرك علي نهار ياعويشه
عائشه تضحك : ربي يكمل عليكم وعقباله انويجي تفرحي بيه
هناء اتستف في صناديق الميه عند الباب : عارفه ياخالتي عيشه احمد قاله باتي ماتمشيش عريس توا تصهدك الشمس قال لا والله مايجيب المنجي الا انا
امينه : سلم خيّه ان شاء الله مايفقدو بعضهم
________________________
المنجي راقد ع الكرسي لاوره وسمع صوت بيابات فتح عيونه لقى روحه في الشارع
شارعهم زمان !!
الشارع الي كبر فيه وعاش فيه و لعب فيه ذكريات طفولته كلهن وشبابه
وليد ولد سيده راكب قدامه : حمدلله ع السلامه ياطيري وصلنا
المنجي دوب فاتح عيونه : الله يسلمك ياطيري
احمد درس السياره ونزل وطلعو رجاله من باب الحوش و رجب مصبي عند الباب نزل المنجي يسلم عليهم وكلهم رحبو بيه
والصبايا مصبيات فم باب الحوش جوا يغنن
هذا اليوم الي نبيه فرحانه وانراجي فيه 👏🏼👏🏼
دز عليه العقل يريده مهندس مسطرته فيده 👏🏼
بنت خالتهم ساره : يانجيه ونجه لأمه الي داير قفل على فمه 😍👏🏼👏🏼
عائشه امها فنصت فيها : تحشمي يابنت را نفصع رقبتك 😡
ساره تضحك : تي باهي ياماما بحتي كيف شكله 😍🙈
هناء تضحك : خلاص توا ناخدوك له
خش المنجي امينه طلعت تجري للجنان اضبطاته : ياناااعلي وليدي طيب فيااا طيب فياااا مبرك علي يوم
المنجي يبوس في راسها : ربي يطول في عمرك ياامي ويعطيك الصحه
امينه تبكي : معاش في حقول والله مانخليك اتباعد
المنجي يضحك : خلاص قاعدلك حتى انا ماعندي وين متحرك غير جيبولي طاسة ميه بس
طلعن عماته وخالاته وعيلته كلهن سلمن عليه
ساره خشت تجري للمطبخ : يابنات صبن شوفنه بسرعه 😭
البنات ملتمات يديرن في المصير : انتحشمو منه مش واخدين عليه
هناء خشت تجري تاخد في كباية اميه : صبن سلمن مبرد دمكن من امتى اتحشمن يعني
غاليه تضحك : انا فكيني منه من يومه ايتكحل بالسم ولا ايتكحل بيا
ساره طلعت تجري : لا صح خليكن المهم انا انشوفه وانسلم عليه وصبت ترقص فم المطبخ :
عيونك والحاجب والخد .. خذن عقلي سافر مارد 👏🏼💃🏻
وطلعت تجري
المنجي سلم وطلع للحلاق وروح يغير عشان يمشي مع هله لغداء الرجاله في الصاله
بعدها نزل مالدروج مغير دبشه ولابس سروال كحلي وسوريه كاروهات ابيض في كحلي وكندره كحليه
طلع للرجاله لقاهم ماشيين شور باب المطبخ مالجنب : وين ياوليد
وليد داهش : انطلعو في الطناجر يانويجي تعال
رجب مسكه من يده : وين ماشي انت جاي من طريق خلي العويل يشيلو
المنجي : لا جو تمام ياحاج .. ولحق وليد
امينه : خلو الي اتحط الرز اتسخنه كويس كان عليا نمشي نا معاكم وانتهنى على غدايا وبحتت لقت المنجي جاي : ماشاءالله على غزالي الي بان علياا نعيماً ياحبيبي
المنجي يضحك ويمسك في لحيته : الله ينعم عليك هاتي ياامي معش ترفعي ثقيل
ورفع الطنجره : ارفع من عندك ياوليد
وقعدو يطلعو في الصناديق والصبايا يغنن
العقبه للمنجي ياعين يشيلك شور عرب زينين 👏🏼
سلم خوه وسلم سيده .. داروله كل الي يريده
هناء ترقص : يامبروك عليه شقيقي هذا وين زمطته ريقي 💃🏻👏🏼
عائشه : العقبه لعرسك يالعسل .. انقيمو فيه شهر كامل
هناء فرحانه ترقص : سلمك ياخالتي سلمك 😍👏🏼👏🏼💃🏻
جا احمد لابس عربي : يعطيكم الصحه والله
هناء طلعت تجري ماسكه تليفونها : تعال يامنجي صبي احدا احمد انصوركم ع الفيس
المنجي يضحك : لا فكينا مالتنزيل مانحبش
غالية مصبيه عند الروشن واتفرج عليهم من ورى الستاره
واتفكر ( شكله تغير بكل وكبر سبحان الله .. بس قعد سمح صدقت ساره اتعيط امبدري اتقول يهبل .. زعمك مزال يكرهني زي زمان )
ساره قرصتها : فيش اديري هنا
غاليه انقزت : فجعتتتتيني
ساره : عجبك المنجي
غاليه تضحك : لا عادي جدا انت مكبره الموضوع
ساره قلبت وجها : اسكتي انتي شن فهمك في الرجاله انا عندي خبره
__________________________
11:00 م
جآ الليل و غاليه في دارها مع خواتها
صفاء راقده في سريرها فوق ومروه تحتها
صفاء : غالية قولي لماما توافق نلبسو عدسات 😢
غالية تضحك : وانا كبركن عمري مافكرت نلبسهن وحتى توا مستحيل انديرها ولا نحبهن
مروه تضحك : لانك بارده وتقلد في صوت غاليه : مافش اجمل مالبساطه 🙄
غالية فنصت فيها : تحسابيني كيفكن مازلتن في الثانوي ودايرات العار
صفاء تضحك وتلعب بشعرها : والله ياماما الجيل يختلف
مروه طلعت راسها مالسرير واتبحت فوق في صفاء : صفو بكرا توا انديرو كونتور من ورا ماما
صفاء : صاح هي هزيبه واتعدي 😂👏🏼
غاليه تضحك : متخلفات اصلاً ارقدن باهي الصباح رباح توا ندويلها في الصبح
انفتح عليهن باب الدار بالقوه
انس : وين الماي فاي
صفاء : دق قبل ماتخش 😒
انس : را انجي انكفخك
غالية شايرتله ع الروشن : قاعد هنا
مروه : خليه لنااا
انس فنص فيها وطلع
غاليه تغطت ورقدت : ارقدن ورانا فرح بكرا
صفاء : تصبحن على خير 😘
مروه تثاوب : وانتي بخير
_________________________
9:00 ص
وليد في جنان صاحبه مع المنجي : ريتها السياره والله لما كلمتني وانت غادي وقتلي جاي قتله ماتبيعهش ولد سيدي جاي توا ياخذها هو مزالت جديده
المنجي : لا هي نظيفه ماشاءالله
وبحت في الراجل : على بركة الله يابوصاحب ومدله الفلوس
الراجل : ربي يعوض عليك ان شاء الله ومبروك
المنجي الله يبارك فيك
وليد مدله فلاش : وهذا هديه مني كله علي العريبي ع الفرح شوف ولد سيدك قايمها بيك
المنجي يضحك : عارفك اصلي
وليد : هيا نمشو شور محل البدالي ناخدك بدله وانا انعاني فيك ازف تقول جايبك وناسيك
المنجي يضحك : بكره بعد بكره تلقاني على حالك يالاجرب
اصلا البدله مش عارف عليش غير امي الله يهديها
وليد يضحك : لنقاااانك تغلضت يبوك اتخششه 😂😂
المنجي يسوق ويضحك : لا توا انحل منهم بعدين
__________________________
4:30 م
غالية وهناء في الكوافير
هناء ادير في شعرها وتحكي في التليفون : ياخالتي شوفيلنا حد ياخدنا من هنا للصاله طول نحنا وتينا خلاص
غالية ادير في الروج : هناء مكياجي تمام
هناء : لالا روجك باهت
غالية : مانحبش اندكن مايخيلش فيا
هناء فنصت فيها : تعالي انديرلك من ابتاعي يمشي معاك وانتي حتى قفطانك اسود زي معيشتك السوده
غاليه تضحك : انحس في روحي مايطلعنش عليا الالوان مش عارفه
هناء اديرلها في الروج دمي : خليك ديما هك لعند اتعنسي هذا الي جايبك لاوره
________________________
امينة في الصالة : سواكك حاار يامباركه ؟
مباركه حاطه السواك في فمها : ايراني يعجبك ويصبغ بسرعه غير ديري منه خلك من سواك عزيزه ماينفع بكل
ساره اتستف في البمبنيرات : خالتي كويس ولا انزيد ؟
امينه : خلي الصندوق تحت الطاوله وغطيه بالمفرش كان نقص زيدي الخير واجد
خشت هناء حامقه : خزززي التافه يقولي غطي وجك مكياجي ساح
امينه : كنك شن في
هناء : عماد ولد سيدي دارلي باب الحاره غطي وجك يشوفو فيك الناس و غاليه ساكته غطت وجها معايا قتله شن دخلك بالبنت قالي الي تركب اتغطي
ساره ضحكت : مبروك عليك عماد ياغاليه
غالية فنصت فيها : بطلي يابارده
سعاد طلعت من دار هل العريس : وريني كيف طلعتي ياغاليه
امينه : لا ماشاءالله على بنيتي ياسوعيده تقول قمر
غالية تحشمت : تسلمي ياعميمه امينه
هناء اتعيط : حي علي اممممي الايلاينر ساح اكيد رخيص الي داراته ليا الكوافيره الحقيره حسبي الله
ساره تضحك : تعالي كملي عليا ياغاليه مع رشا لعند نمشي انديره لها
صفاء ماسكه مروه في الحمام اديرلها في كونتور
مروه : خشمي صغر ؟
صفاء اتبحت فيها : لا مزال شويا اصبري انزيد اندكن
مروه : بسرعه عشان انديرلك بعدها ونطلعو
_____________
بدو يجو المعازيم والزحمه وبدت الفرقه 🎤
ومر الوقت
7:00 م
بيب بيب بيب بيب 🚘🚖🏍
احمد راكب لاوره : هيا ياراجل امتى نوصلو
وليد طالع مالفتحه ويصور في الزفه
المنجي يسوق : هذي القاعه ولا لا ؟
احمد : نزلني هنا عند البوابه توا نمشي كعابي
المنجي يضحك : اقنط روحك يالمرخي كنك طايح بوجك
احمد يضحك : هرمنااااا
ودرسو السياره قدام الباب وعلو الاغاني ونزلو وجو اصحابه يصورو معاه ويعيطو ويغنوله قدام الباب
المنجي مسك تليفونه ومشى يتصل ....
......؛
هناء اتصور في روحها على مراية الاستقبال
((( طبعاً اكيد كلكن مصورات عليها يابنات 😉 ؛ لنقانها تمسح الكبد 😂 ))))
المهم انردو للروايه :-
غالية جت ماسكه قفطانها وماحوتك تمشي : كرعيا خلاص مالكعب
هناء تضحك : هذي القصيره ديما واكلتها
غالية قعمزت وسلحاته : معلااااه اقطع وخذتي له كله منك قتلك يومها عالي قتيلي لا
هناء تليفونها رن : حي حي المنجي يرن شكلهم جو
وفتحت الخط
المنجي : هناء قولي لأمك وصلنا
هناء : قاعدين برا ؟
طوط طوط طوط طوط
هناء : طح سعده سكر في وجي 😳 عليك ذوق فيه خويا هذ
ومشت تجري : خالتي عيشه جوووو جوووو 😍😍
عيشه صبت : صبي ياامينه وصلو
انفتح الباب بشويا
غاليه صبت تجري للحمام
المنجي تباوع بشويا ولقاهن جايات يجرن كلهن امه وخالاته وعماته وهناء اتصور في فيديو
خش احمد وكلهن يسلمن عليه
امينه اتكر في المنجي من يده : سلم وليدي خشش خوك الله يربحك عشان خاطري
المنجي يكشر في وجه : ياامي ننقانك فكيني
احمد بحت فيه : خلاص يارااا خلصني نبي انخش امك تجدا فيك
المنجي متخزرط وخش : هذينا رايات الصبايا اصلا
هناء مصبيه اتصور : صبو احدا امي انتم الاثنين و بحتو فياا
اهو جي الي مهبلني ... اهو جي ايغار عليا انغار عليه الي مهبلني 👏🏼👏🏼
والبنات يعيطن مع الفرقه 👏🏼👏🏼👏🏼
غالية ماشافتش من خش معاه تحساب احمد خش بروحه
طلعت مالحمام واتسقم في قفطانها
وفجأة ............ !!!
____________
وصلو للمسرح ... العروس صبت و احمد سلم عليها
العروس ابتسمت للمنجي
احمد في وذنها : هذا المنجي
اميره مدتله يدها : اهلا وسهلا
المنجي سلم عليها ويبحت في الارض : مبروك عليكم ان شاء الله
اميره : عقبالك
امينه بحتت في المنجي : صبي احدا خوك صور معاه
احمد صبا جنبه و صورو مع بعضهم
ساره تحكي للفرقه : غني على خوه ياحنونه اسمه المنجي
حنان العريبي 🎤 : سمح الطله نجّي المنجي سمح الطله ... ياسمح الطله نا خايف مالعين اسمله
ساره رفعت ايديها : ايااااااااااي 💃🏻💃🏻👏🏼👏🏼
حنان العريبي : احميده ياربي نجيه ... الله اكبر والحوت عليه 👏🏼👏🏼👏🏼
يانجيلي زول احميده ....... هو خايل والعين اتريده 👏🏼👏🏼👏🏼
المنجي منزل راسه وطالع بسرعه في المامر ومش فاطن من في قدامه
خبط في بنت فم القاعه طاحت من قوت الخبطه
غالية اتبحت ومصدومه تبي اتصبي معش عرفت
المنجي تلخبط : بسم الله اسف يااختي سامحيني
غالية عيونها دمعن و اتحاول اتصبي مش قادره كراعها انفصعت
المنجي متحشم يبي يصبيها يحكي معاها وبارم في الجيهة الاخرى : امسكي في الكرسي الي جنبك وصبي
غاليه اتغطي في قفطانها من فوق وماحوتك تدوي : توا انصبي خلاص اربح
المنجي طلع يجري مالباب ويسب ويلعن ..
وساره لحقاته بسرعه شافاته طالع مالباب
لقت غاليه طايحه : كننننك 😱😱
غالية مدتلها يدها : صبيني كراعي إلتويت وطحت مالكعب
ساره ترفع فيها : ان شاء الله شافك المنجي هكي ؟؟
غالية ارتبكت : لالا انا شفته طلع وجيت مالحمام طحت توا هالوقت
.......؛
المنجي طلع متلخبط
وسام يضحك : كنك متخزرط زرنك جوا ؟ 😂
المنجي يمسح في عرقه : ياراجل وانا طالع خبطت في بنت كسرتها تهيالي ولا مش عارف
صلاح : ياريتك شلتها وجبتها لنا معاك
المنجي يضحك : عدي يا ......
قعدو يضحكو اصحابه وهو سارح زعمك البنت شن صار فيها ..؟ كله من امي عليك تزليط ازف توا اتخش تقولها للبنات واسمع يلي ماتسمع
__________________________
ثاني يوم ..
11:30 ص
غالية مقعمزه ع الكرسي في الجنان
وهناء اتسيق في الدروج : صبي ساعديني بدال مانك ماده وجهك
غالية : كيف انساعدك بكراعي المربوطه ؟
هناء تضحك : وووووه فاااتتني الطيحه ياريتني شفتها 😂
غالية تضحك : بطلي ياكلبه
هناء : وراس لولي كيف طحتي احكيلي نبي نضحك 😂
غالية : انا طالعه مالحمام تعثرت في القفطان
المنجي طالع مالحمام صبا عالروشن قعد يبحت
مش هذي البنت الي امس ؟؟
ودقق زين في وجها ننقانها هي !
حي علماا شكلها وحده مالعيله عليك فضيحه
وانا نحسابها برانيه !! والبنت رابطه كراعها !
اصلا ماعندي ماندير .. 😒
هي ماده وجها ! كانهي ماسكه روحها راهو ماطاحتش ؛ وبعدين حتى حجمها طشه مش مساعدها 😒
بس من هي !!؟؟
فتح الروشن يسمع في هناء تضحك صوتها عالي
المنجي رقاله وطلعلها مالروشن : يسمعو فيك الناس ياحيوانه ياقليلة الادب
غالية صبت بسرعه خايفته يشوفها وزلقت في الميه طاحت عيطت وقعدت تبكي : حي علياااا كراااعي 😭
هناء سكتت بسرعه ومشتلها : طح سعدك شن صارلك
امينه والصبايا الي جوا طلعن : كنهااااا
هناء : طاحت اخرى
سعاد : طيح سعدك خلاص انتي تكسرتي تكسرتي ؛ وانتي ديما فاتحه فمك وماده وجهك
غالية تبكي 😭
امينه فنصت في سعاد : خلاص وانتي اترعشي فيها مش ناقصها البنت توا انشيلوها للمستشفى
سعاد : من بيشيلها ياحسره بوها المقعد ولا خوها الي ينعبى عليه
امينه فنصت فيها : خلاص قدام الصبايا استرينا توا يشيلها المنجي كيف خيها ومش براني عليها ..
سعاد فنصت فيها : صبي ياقهرة عمري غيري دبشك المبلول
غالية تبكي : مش قادره انصبي 😭
امينه : جيبي عباية ياهناء توا انلبسوها و يرفعها المنجي
غالية انفجعت : لالا توا انصبي
امينه : انتي قادره اتحركي اصلا عشان اتصبي
هناء ادق عالباب وخايفه : منجي منجي
المنجي فتح ويفنص فيها : عاجبك توا ياقرده البنت تكسرت بسببك
امينه اتنادي مالدروج : منجي انزل ارفع غاليه
المنجي سكت وقال في عقله
هي هذي غاليه جارتنا كبرت هكي !!
هناء نزلت تجري بالعبايه
المنجي : باهي الي برا خليهن يخشن عشان نقدر نطلع
امينه طلعت : خشن يابنات خلاص توا ينزل يشيلها
غاليه متحشمه بكل وخشت في بعضها
ساره مصبيه احداها : ياناااعليااا انعني انا ياغااليه ياريتني مكانك انعنها كسرتي 😭
امينه : سااااره خشي 😡
ساره : هيااا اني جايا ياخالتي 😢🙄
امينه اتلبس في غاليه وسعاد وهناء احداها
المنجي نزل : عمتي سعاد شنحالك
سعاد ابتسمت : الله يسلمك كيف حالك يانويجي
المنجي متزلط منها لان هو السبب : لاباس ان شاء الله ساهله ماهناك الا كل خير
سعاد : وين الخير الي يجي من وراها هالمريوحه ديما طايحه وديما مذهوبه شيرتها
امينه : خلاص ياسعاد را ناخدها منك والله ماعاد اتذوقيها هالبنت الي كلكم جايين عليها ومانكم عارفين قيمتها
غاليه متزلطه منه وتبكي وتبي اتحاول اتصبي مش قادره
المنجي قرب منها و .....
الحلقة الثانيه من هنا
