اول ما لفيت ورايا لقيت بابا اتصدمت و فضلت اعيط بهيستيريا قولت اكيد شافني ونا بكلمه و اكيد هيمسكني يموتني ضرب و فضلت اترعش جامد جدا لقيت بابا بيقولي مالك يبنتي فيكي اي اهدي كدا مالك! وقتها فهمت ان بابا شكله مشافش حاجة و ربنا سترها الحمدلله و قولت اني لا يمكن اعمل كدا تاني و مش هتكلم معاه تاني ابدا عدى تاني يوم ونا واقفة أدام البلكونة عمالة كل شوية افتحها و اقول لا بلاش اطلع و اقفلها بعدها افتحها تاني و هكذا لحد ما قررت اني اطلع مع اني اتفقت مع نفسي اني مش هكلمه تاني بس كنت واقفة
مستنياه بفارغ الصبر انه يطلع دا الساعة عدت 12 و لسة مطلعش! و اخيرا لقيته ادامي و قالي انا اسف لو كنت عملتلك مشاكل مع بباكي لقيت نفسي بدون إرادة بتكلم معاه عادي و قولتله لا مفيش حاجة خالص بابا مشافش حاجة فضلنا نرغي حوالي ساعة تقريبا من غير ما نحس بنفسنا هو بجد ماشاء الله جميل اوي سواء شكل او طبع و دايما لسانه بيقول كلام حلو بس و عمره ما اتريق عليا رغم تهتهتي الزيادة معاه عشان بخاف من أي حد غريب فضلنا يوميا على كدا ضحك و هزار بالساعات انا اول مرة ارتاح مع حد بالشكل دا انا اول مرة ابقى واثقة ف نفسي ونا بتكلم! حكالي كتير عن نفسه ونا نفس الكلام فضلت احكيله حاجات كتير جدا عرفت انه ف سنة تالتة هندسة معماري و حكيتله اد اي انا حلمي اني اطلع مهندسة بترول و شجعني جدا و فضل يفهمني حاجات كتير ف الهندسة اي دا اول
مرة محدش يقولي اني فاشلة و هروح الكلية ازاي ونا بتكلم زي العيال كدا! اول مرة حد يشوفني حلوة! في يوم من الايام فضلت مستنياه بس مطلعش خالص و تاني يوم نفس الكلام و تالت يوم!! افتكرت اني معايا رقمه بس خوفت اتصل مرضتش اتصل بعدها ببص جمبي لقيت ست واقفة ف البلكونة لقيتها بتبصلي و بتقولي اي القمر دا انتي اسمك اي بقا يا حلوة قولتلها بتهتها اسمي ياسمينا ونتي اسمك اي قالتلي اسمي مريم كنت عايزة اسألها على محمد جدا و غالبا هي شكلها مامته بعدها رفضت و قولت لا عيب و بدون سبق إنذار لقيت نفسي بقولها طنط هو ابن حضرتك بقاله كذا يوم مش بيطلع البلكونة هو كويس؟ ضحكت و قالتلي انا عندي 4 ولاد تقصدي مين فيهم
قولتلها محمد لقيتها بتبرئلي جامد و هي بتزعق و بتقولي محمد مين انتي مجنونة انا معنديش عيال بالأسم دا و دخلت جوا فضلت اعيط جامد و مش عرفة انا غلطت في اي قولت يمكن هي زعلانة منه لدرجة مش عيزة اجيب سيرته بقيت اسأل نفسي 100 سؤال و مش لاقية إجابة لحد ما لقيت شاب تاني طلع و قالي متزعليش من ماما هي بس متدينة شوية ونتي فاهمة يعني قولتله لا انا مش فاهمة حاجة!! انا كل اللي عملته اني سألت على محمد ضحك و قالي بصي يا ستي مبدأيا هو مسموش محمد صحابه هما اللي مسمينوه كدا عشان هو شاطر ف الكورة جدا فا بيندوه محمد صلاح اسم الشهرة يعني ثانيا هو عنده سخونية جامدة جدا بقاله فترة و مش بيقدر يتحرك من ع السرير زعلت جدا اول ما عرفت و كنت هنهار م العياط بس بردو كان في سؤال محيرني جدا فقولتله ايوة يعني هو اسمه اي و اي علاقة اللي حصل بأسمه انا مش فاهمة حاجة لقيته بيرفعلي ايده و بيشاورلي ع الصليب و بيقولي احنا مسيحين و هو مسموش محمد هو اسمه بيتر
الجزء الثالث من هنا
