الحلقة الرابعة | المجموعة النسوية الممنوعة
كريم كان بيعاين شقته الجديدة اللى اشتراها قريبة من الشغل وطبعا ناوى ينقل فيها، لقيته بيكلمنى في التليفون وقالى
.. عايز اقعد معاكى لوحدنا علشان نعرف نتكلم براحتنا
طبعا قولتله:
...مفيش مانع بس فين؟
.. انا هعاين الشقة الجديدة النهاردة وعايزك تيجي معايا منها تشوفيها ومنها نتكلم
فى الاول اترددت فى الموافقة، وبعد مافكرت لقيت ان مينفعش نكون فى مكان عام لان كده كده شكلنا هيبقى زفت، فرديت وقولتله:
... موافقة بس متفكرش فى اى حاحة ياكريم
فعلا روحت معاه الشقة واتفرجنا عليها حتة حتة وكان يادوب جايب فيها كنبة واوضة نوم صغيرة وتليفزيون فى الريسيبشن بره قصاد الكنبة
لما دخلت المطبخ لقيت نسكافيه والكاتل موجود، عملتلنا كوبايتين نسكافيه وقعدنا نشربهم على الكنبة وكان كلامنا اغلبه عام وعلى الشغل والناس اللى فيه، بعد كده اتطور الكلام ولقيت كريم بيقولى:
.. بقيت شايف فيكي كل حاجة عايزها ياسالى، ومبقتش طايق اعيش مع كاميليا تانى، وانتى كمان مش لازم تكملى حياتك مع جوزك بالشكل ده، انتى لازم تطلقي واتجوزك وتعيشي معايا على طول
للحظات فكرت ان الموقف اللى انا فيه ده مينفعش اكون متجوزة اساسا، كريم بدأ يقرب منى ويهمسلى بكلام حلو حسيت انى لو سبت نفسي هضعف ومش هقدر اسيطر على نفسي.
فكرت للحظات وقومت اتنفضت من مكانى وقولتله
...يلا نمشي ياكريم، انا مش حابة نكون في الموقف ده
نزلت من عنده وانا حاسة انى عملت غلطة كبيرة والغلطة الاكبر انى اسيب نفسي متجوزة كل ده
قطعت كلامها وقولتلها:
..وقعتى قلبي يخربيتك، افتكرتك غلطتى مع كريم
... لا طبعا يامشيرة، بالرغم ان ممكن يكون عقلي فيه جنان حبتين لكن متوصلش للدرجادى
.. ربنا يقدم اللى فيه الخير ويهديكى للطريق الصح.
سبتها وقومت وكملت شغل عادى، وقبل مانروح لقيت عايدى بتقولى
.. تعالى نخرج فى اى كافيه نقعد نروق على نفسنا شوية
بدون تردد قولتلها:
... ياريت الواحد ايامه بقت شبه بعضها، اهو نفك عن نفسنا شوية
روحنا قعدنا على كافيه فى النادى اللى قصاد الشغل، الكافيه جنب التراك اللى بيجروا فيه على طول، المهم قعدنا وطلبنا لاتيه وانا بشربه وبتكلم مع عايدة، لمحت اللى شوفته فى اوضة النوم بتاعتى امبارح بيجرى فى التراك وعمال يبصلى اوى، اتفزعت وسهمت وركزت معاه وهو بيجرى، عايدة عمالة تتكلم وانا مش مركزة معاها اساسا، وفى لحظة قررت انى اجيبه واوقفه واشوف ده مين، سبت عايدة وقومت جريت وراه، قبل مااحصله لقيته وقف وفتح ازازة المياه اللى في ايده وبيشرب قربت منه بحذر وخبطت على كتفه، لقيت راجل عجوز اوى هو اللى اتلفتلى، طبعا قولتله:
.. انا اسفه جدا اتهيألى انك حد تانى
رجعت تانى لعايدة اللى كانت مندهشة جدا وقالتلى:
... ايه اللى عملتيه ده؟ فيه واحدة تجري ورا شاب كده حتى لو متعرفوش
.. شاب ايه ياعايدة ده عنده يجي ١٠٠سنة وبعدين شبهت عليه عادى
قالتلى بهزار
... ١٠٠ سنة ايه يابنتى، انتى مش شايفة قمر ازاى؟!
رجعت بعيني تانى لقيته نفس الشاب، قولتلها فجأة
..انا عايزة اروح يلا بينا
روحت ولقيت الشقة فاضية، ماما وبابا واخويا راحوا زيارة لستى، قلعت ودخلت الحمام علشان اخد دش وافوق من تعب الشغل، حطيت الصابون على وشي وشعرى، سمعت صوت تخين بيقولى:
... جسمك حلو وهو ده اللى حلمت بيه من زمان
نزلت المياه على وشى وشعرى بسرعة وفتحت عينى، لقيت نور الحمام مطفى وكل انوار،الشقة اللى بره مقفولة، مش شايفة حاجة، روحت ناحية باب الحمام علشان اخرج، لقيت ناس لابسين اسود فى اسود مش باين منهم حاجة واقفين على الباب وموطيين راسهم فى الارض وبيمنعونى من الخروج، سمعت صوت تانى بيقول
.. انتى بتتهربي مني ليه؟ انتى كُلك ملكي، مش هتقدرى تمنعيني من اللى عايزه
حسيت بحركة ايد على جسمى،،قعدت اصوت واصرخ بشكل هيستيري والحركة على جسمي اكتر واكتر.
زودت فى الصراخ بشكل غير طبيعى، حسيت بسخونة جامدة اوى ورايا، اتلفت بسرعة لقيت البانيو كله نار وحد واقف وسط النار عمال يتلوى من الالم، عقلي مستحملش اللى بيحصل وفقدت الوعى فى الحال.
فتحت عيني وانا فى السرير وبابا وماما حواليا مخضوضين وبيحاولوا يفوقونى.
اول ماشوفتهم قعدت اعيط وجسمى بيترعش، بابا قالى بخوف:
.. مالك يابنتى ايه اللى حصل؟
... مفيش يابابا لما جيت من الشغل وانا فى الحمام باخد دش
بابا قطع كلامى وقالى:
.. دش ايه يابنتى اللى بلبسك، ده انتى حتى مغيرتيش هدومك، وبنحاول نصحيكي من ساعة ماجيتي وانتى ولا هنا
حاولت اهدى شوية وامسك نفسي وقولتله:
... انتوا جيتوا امتى من عند ستى
.. يابنتى احنا مروحناش اساسا
... ازاى يابابا انا لما رجعت من الشغل مكانش حد موجود فى البيت
.. محدش موجود ازاى يابنتى اذا كان احنا شايفينك وانتى داخلة ومقولتيش حتى السلام عليكم ودخلتى جرى على اوضتك، سبناكي شوية قولنا هتغيري هدومك وتطلعى، لما غبتى لقيناكى نايمة وعمالة تعرقي وختى مغيرتيش هدومك جرينا عليكي نشوف مالك ونحاول نفوقك
قعدت اعيط ومقدرتش اكمل كلام مع بابا اللى خرج من الاوضة وقال لماما:
.. خليها تغير هدومها وخليكي معاها لحد ماتبقى كويسة
من ساعة اللى حصل والامور معايا ماشية كويسة بقالها كام يوم، وبقيت عمالة اسمع حكايات كتير من اصحابي فى الشغل ومشاكل بتخص حياتهم الزوجية، وفى يوم روحت الشغل لقيت كاميليا غايبة وده طبعا مش عادتها، اول حاجة دورت عليها هو كريم علشان اسأله عليها وفعلا لقيته على مكتبه، وسألته:
.. هى كاميليا فين ياكريم؟ عرفت انها غايبة هي كويسة؟
... طلقتها امبارح يامشيرة
..يانهار ابيض انت بتهزر
... علاقتنا مكنش مكتوبلها تكمل من البداية وانا كنت بكابر لكن دلوقتي تمام
سكت شوية وابتسم ولقيته بيقولى حاحة متوقعتهاش، قالى:
.. تعرفي انك حلوة اوى يامشيرة!
التفاعل بالنسبالك بسيط، لكن بالنسبالى بيمثل دعم كبير
البارت الرابع من هنا
بدل ماتدور وتبحث علي الروايات خليها علي تليفونك وحمل تطبيقنا
