الحلقة الثانية | الملك
لقيت هيكل باين عليه انه قديم جدًا لحيوان اقرب للعقرب ، طوله حوالى 90 سم ، مش ده الغريب ، الغريب انه لسه محتفظ بحالته بشكل كبير ، اه عبارة عن عضم بس لكن متماسك جدًا مش هش يعنى وانا ماسكه مكنتش خايف انه يتكسر فى ايدى ، عضمه قوى جدًا جدًا ، وملامح وشه المرعبة تفاصيلها باينة بشكل كبير.
زيادة للفضول حطيته فى الشنطة بتاعتى وحتى نسيت اقول لديفيد عليه ، وانتهت رحلتنا ورجعت للبيت.
طبعًا فضيت محتويات الشنطة ، وعندنا غرفة فى البيت بحط فيها اى اكتشافات لحد ماابحث عنها واحلل الاجزاء اللى تنفع تتحل منها ، والحقيقة مش انا اللى بقوم بعملية التحليل دى ، ماريان شريكة حياتى هي اللى بتعمل ده وبصراحة مخذلتنيش قبل كده ابدًا .
عندنا معمل صغير كده فى غرفة تانية ، ببص عليه من وقت للتانى لانى مش بفهم اوى فى المواد الكيميائية والعضوية والحاجات اللى بتستخدمها ماريان .
المهم حكيت لماريان عن البحيرة وجمالها وكمان حكيتلها على الحيوان اللى لاقيته هناك ، وعن الاسطورة اللى بتقول ان الاف البشر ماتوا هناك بسبب حيوانات برمائية مفترسة كانت بتعيش فى المنطقة دى.
كان باين على ملامح ماريان الاهتمام جدًا بالحكاية دى ، وقالتلى :
= هديلك اناء زجاجى كبير جواه محلول ، حط فيه الحيوان ده وانا هحاول افحصه فى المعمل واقولك على النتيجة
حطيتهولها فى الاناء الازاز ومهتمتش بالموضوع وعدى اسبوع واتنين ومتكلمناش فى الموضوع تانى ومارسنا حياتنا بشكل طبيعى .
فى يوم ماريان كانت بتزور حد من عند اهلها والبيت كان فاضى وانا قاعد زهقان ، صاحبي ديفيد لقيته بيكلمنى على التليفون قولت كويس اهو ندردش سوا ونكسر الملل وفى وسط الكلام لقيته بيقولى :
.. فاكر البحيرة اللى كنا عندها المرة اللى فاتت ؟
= اه طبعًا هي دى حاجة تتنسي
.. اهو الموضوع اللى قولتلك عليه بتاع الاف الناس اللى ماتت طلع صح
= صح ازاى ؟!
.. بالصدفة قابلت راجل عجوز كان عايش فى المنطقة دى من سنين ، وقالى ان جده حكاله عن حاجة مهمة جدًا بالنسبة للبحيرة دى
= حاجة ايه شوقتنى ؟
.. بيقولوا ان الحيوان البر مائى اللى قتل الناس دى كلها حجمه مش كبير ، يعنى مش ديناصور ولا تمساح ولا حتى ثعبان ولا غيرهم من الحيوانات المفترسة الضخمة .
= امال ماتوا ازاى ؟
.. من الاقاويل ان الناس كلها ماتت جوه المياه من حيوان مجهول مصدره اقرب لسمكة فى البحر او حاجة تشبهلها او حتى فى حجمها ، ولما فحصوا الناس لاقوا انهم بيموتوا من السم ، والاساطير بتحكى عن ان ملامحهم كلها بتتغير بمجرد مايخرجوا من البحر.
= بتتغير ازاى ؟!
.. يعنى كل خلايا الجسم مبتستحملش كمية وقوة السم وبتنفجر فى خلال دقايق ، يعنى حتى لحم وش الانسان بيقع تخيل!
= لا طبعًا مش متخيل ، مهما كان السم قوى لايمكن يعمل كده
.. كل حاجة ممكنة ياصديقي ، لو بحثت هتعرف انى عندى حق، فيه انواع من السموم كانت بتطلع من اعشاب معينة ، قوتها بتعادل الاف المرات من السم العادى ، ومن ده نقدر نستنتج ان ممكن يكون كان فيه حيوان عايش من الاف السنين عنده نفس القوة دى .
= ممكن برضو ، والله اعلم
.. عارف كمان ايه من مواصفاته ؟!
= ايه؟
.. الحيوان ده عضمه قوى وصلب جدًا ، لان طبيعة جسمه لازم تمكنه ان يتحمل كم السم بالقوة دى ، يعنى تخيل الحيوان ده لو موجود فى وقتنا الحالى ، مكنش حد هيعرف يتخلص منه .
= امال انقرض ازاى ؟
.. لحد دلوقتى محدش عارف نوع الحيوان ده علشان يعرفوا هو انقرض ازاى ، البحيرة مكنتش حد بيقدر يقرب ناحيتها ، كل اللى كان بيحاول كان بيموت
=معقولة محدش اكتشف الحيوان ده لحد دلوقتى ؟!
.. ياما الصدف بتجمع ، اهو حيوان زى ده لو تم اكتشافه هيكون بالصدفة مش هيكون مترتبله ابدًا لان انت بتبحث عن حاجة غير معلومة ومش عارف ماهيتها ايه
وانا بسمع كلامه ، افتكرت العقرب اللى جبته بالصدفة من هناك ، قفلت معاه المكالمة بسرعة وروحت جرى على المعمل علشان ابص عليه جوه الاناء الزجاجى وهنا كانت الصدمة ....
بدل ماتدور وتبحث علي الروايات خليها علي تليفونك وحمل تطبيقنا
