Ads by Google X

قصة الملك الحلقة الرابعه


الحلقة الرابعة | الملك
لما بحثت على النت عرفت سر خطير جدًا ان فيه بعض الحيوانات التمثيل الضوئى بتاع خلاياهم بيكون اعلى فى الضلمة اكتر من النور ، ومش بس كده ، ده انا عرفت كمان ان فيه بعض الحيوانات خلاياهم بترجع للحياة او بيتحسن ادائها مع وضعها فى بيئة ومناخ مناسب لنمو الخلايا دى .
وعلى طول جه فى بالى ان ممكن يكون الحيوان اللى انا جبته كل مابيتعرض للضلمة كل ماخلاياه بتنمو ، لكن صعب اصدق اللى بقوله ده لانه ميت من الاف السنين او ملايين السنين ، لكن لما عرفت فكرة الحيوان السلمندر وازاى بيقدر يعوض اى جزء بيفقده فى جسمه جابلى احساس كبير جدًا بالخوف ان ممكن يكون الحيوان ده شبيه ليه والخلايا المفقودة عنده تقدر ترجع بكل سهولة تحت ظروف مناخية معينة .

ماريان كانت مشغولة بتحليل حيوانات تانية لانها كانت بتعمل بحث لمنظمة عالمية عن الحيوانات المنقرضة من الزواحف ، ومكنتش مهتمة بموضوع الحيوان اللى موجود فى الاناء الزجاجى ، القصة للكاتب مصطفى مجدى ، وقررت من غير ماتعرف انى اطفى الاضاءة الموجودة على الاناء الزجاجى واسيبه فى الضلمة شوية وابدأ اراقبه واراقب التغيرات اللى هتحصله .
وطبعًا علشان مبوظش الدنيا لماريان لانها قالتلى ان المحلول اللى موجود فيه لازم يكون عليه اضاءة ، قررت انى افصل النور دقايق قليلة ، علشان الفضول عندى من ناحية الموضوع ده يروح .
اول يوم فصلت النور حوالي ربع ساعة ، لكن قبل ماافصله صورت الحيوان بالتليفون من زاوية معينة ورجعت صورته تانى بعد ماشغلت النور من نفس الزاوية ، مكنش فيه اختلاف تقريبًا .
وبالرغم ان التجربة الاولى فى قطع الاضاءة معملتش جديد ، لكن كان عندى احساس جوايا بيقولى انى هلاقى تغيير لو فصلت عنه الاضاءة مدة اطول .

فى اليوم التانى فصلت الاضاءة
 حوالى عشر دقايق وماريان كانت موجودة فى البيت ولاحظت ، وطبعًا اتخانقت معايا وقالتلى :
.. ايه اللى انت بتعمله ده ؟ ليه بتفصل الاضاءة ؟! مش انا قولتلك ان المحلول ده يفسد من غير اضاءة !
= اهدى بس ياماريان ، انا قرأت ان فيه حيوانات خلاياها بتتحسن وبترجع زى الاول بالضلمة والفضول خلانى اجرب
.. الكلام ده ياساهر لما يكون الحيوان ده ميت من 3 دقايق مش من مليون سنة ، انت دلوقتى بتتعامل مع عضم مش خلايا ، ولو فيه اى حاجة جوة العضم ممكن تتحلل ، انت بالطريقة دى بتضيعها ، ومش هتخلينا نعرف حتى نوع الحيوان ده ايه ولا تاريخه
= خلاص ياماريان شغلى الاضاءة ، اعتبرى اني مقولتش حاجة
راحت ماريان علشان تشغل الاضاءة ، واول ماشغلت النور فضلت واقفة على الاناء الزجاجى مندهشة وتعبيرات وشها كلها وقفت ، مشيت ناحيتها وسألتها :

= مالك فيه ايه ؟ واقفة متنحة كده ليه ؟
شاورتلى بإيديها على الاناء الزجاجى ، لقيت الحيوان جزء كبير من عضمه اسود وملامح بسيطة من وشه بدأت تظهر ، وحجمه كبر عن الاول ، سألتها بإندهاش :
= عندك تفسير للى شايفينه ده ؟
.. معنديش اى فكرة عن اللى بيحصل ، ازاى كده؟!!!
= مش قولتلك انا قريت عن الموضوع

.. انا خايفة ياساهر ، قلبي اتقبض بجد ، الحيوان ده ميطمنش لازم نتخلص منه
= نتخلص من ايه ياماريان ؟ ! ، عارفة الحيوان ده لو طلع هو اللى فى بالى ، هيكون اكبر اكتشاف فى القرن الجديد
.. الحيوان ده خلاياه بترجع ياساهر ، انا خايفة يصحى تانى
رديت عليها بهزار :
= هو الميت بيصحى ؟! ، وبعدين لو افترضنا ده ، تفتكرى يعنى مش هنقدر نسيطر على حيوان بالحجم الصغير ده
.. احنا لازم ننقله لاناء محكم ويكون اكبر شوية ونحطه تحت عنينا ليل نهار
= مفيش مشكلة ، وانا هتابعه معاكى وهفصل عليه الضوء من وقت للتانى لحد مانشوف ايه اللى هيحصل
فى اليوم اللى بعده على طول قررت انى افصل عليه النور لساعات واشوف اللى هيحصل ، اول ماشغلت النور وقبل مااقرب من الاناء الزجاجى الجديد اللى حطيناه فيه ، وقفت مكانى واتسمرت ...........

              الحلقة الخامسه من هنا

بدل ماتدور وتبحث علي الروايات خليها علي تليفونك وحمل تطبيقنا

تحميل تطبيق سكيرهوم
تعليقات



حجم الخط
+
16
-
تباعد السطور
+
2
-