قصة الملك الفصل الخامس مصطفي مجدي
لقيت تسريب مياه كبير جدا فى المعمل، ولما ركزت اكتشفت ان الاناء الجديد اللى نقلنا فيه الحيوان اتخرم، طبعا اتخضيت وناديت على ماريان اللى جت على طول ونقلت الحيوان لاناء جديد.
وطبعا عاتبتها وقولتلها:
... فى ايه ياماريان؟! مش نبهتك كتير ان ناخد بالنا من الحيوان ده بالذات!
.. الاناء كان سليم ياساهر وبعدين من امتى وانا بهمل فى شغلى!
... يعنى هيكون اتخرم لوحده؟! عفريت جه خرمه ومشي، اكيد انتى مخدتيش بالك
اتعصبِت جدا ومسكت الاناء وقلبته وحطته تحت الاضاءة ووقفت متنحة شوية، سألتها:
.. ايه مالك واقفة كده ليه؟
... تعالى كده بص!
روحت لقيت جزء صغير من عضم الحيوان متعلق فى الاناء مكان الجزء اللى اتخرم، سألتها بإندهاش:
.. ده معناه ايه؟
... الحيوان هو اللى كسر الاناء!
.. ازاى يعنى حيوان ميت من ملايين السنين يكسر اناء؟!
... عضمه قوى جدا وممكن يكون المحلول حركه ومع الحركة خبط فى الاناء فاتكسر.
عدينا الموضوع وماريان جالها رحلة علمية تبع شغلها وهتسافر فيها يومين، قعدت طبعا اكمل باقي الابحاث على الحيوانات، وكنت قاعد زهقان وقولت اخرج الحيوان من المحلول وانحته، لاني مجنون بالنحت جدا، رسمه الحيوان صعبة جدا وهتاخد مني وقت ومجهود كبير، لكن مش مشكلة ادينى بتسلى.
طلعت ادوات النحت وطبعا كان لازم احط الحيوان قصادى علشان اعرف اشتغل عليه.
طلعته من الاناء وحطيته على الترابيزة وبدأت شغل، وانا بنحته لاحظت تفاصيل فيه مختلفة جداً عن ما جبته، لاحظت بروز فى عضلات ووشه والوان صفرا على بقه وعينيه حواليها بقع بيضا.
حسيت انى جعان روحت حضرت اكل وعملت عصير ورجعت علشان اكمل شغل النحت بتاعى، لاحظت ان هوا المروحة حركوا شوية، روحت علشان اعدله، لاحظت ان البقع الصفرا اللى على بقه بقت اكتر، حاولت افتحها بصوابعي بالراحة، لاحظت ان فيه سنة من سنانه موجودة نصها لونه اصفر والنص التانى ابيض غامق وبينهم خط اسود رفيع.
طبعا اندهشت جدا من منظر السنة وحاولت افتح بقه على اد مااقدر علشان النحت يطلع على افضل مايكون، لكن فجأة بقه قفل عليا والسنة عورتنى.
صرخت، حسيت ان صباعى اتقطع مش اتعور، شيلته من بقه وجريت على الحمام، غسلت ايدى ولفيت عليها شاش وبلاستر ومرضتش اكمل نحته.
رجعته للمحلول تانى وكملت شغل مع الحيوانات التانية لان نفسيتى قفلت منه ومن غموضه.
ماريان لما رجعت قعدت تحكيلى عن الحاجات اللى عملتها فى الرحلة وفى لحظة قالتلى:
... انا نسيت اقولك حاجة مهمة، فى الرحلة واحد من الرحالة كان بيحكى عن الحيوانات المميتة اللى اتذكرت فى كتب الاساطير التاريخية، وكان جايب على البروجيكتور صور توضيحية لكل حيوان واسمه، عارف ذكر ايه؟!
..ايه؟
... الحيوان اللى انت جبته من البحيرة، او شبهه جدا جدا وقال ان اسمه فى الكتب التاريخية، الملك، وسموه كده لانه اخطر حيوان عرفته تاريخ البشرية، ومن المعلومات كمان ان جسمه فعلا بيتجدد وخلاياه بترجع عن طريق الضلمة والدم.
سرحت شوية فى كلامها، لكن قاطعتنى وقالتلى:
... لا متسرحش ده التقيل جاى، بيقول كمان ان الحيوان ده قادر على تغيير خلايا الفريسة لخلايا تشبه خلاياه علشان الحيوانات اللى حواليه تقتل بعض وينتشر الدم فى كل مكان وهو يستغل ده بأنه ينمو اكتر وسمه يبقى اقوى وبعد كده يقتلهم براحته.
حسيت ان معدتى قلبت ودخلت جرى على الحمام، بصيت فى المرايا اترعبت من اللى شوفته......
