#فوق_الخيال_الجزء_التاني
روحت ومسكت الاكرة ولسا هقفل الباب .. لفت انتباهي حاجه غريبة خلت جسمي كله يرتعش من الدهشة ... لقيت قدامي نفس كرسي الصالون الأسود اللي بشوفه ف الحلم وبصيت فوقيه .. ايه ده نفس صورة البنت كمان ....
محستش بنفسي بعد كده غير وأنا ف اوضتي وقدامي عزة وبابا وإيهاب ....كنت حاسة إن دماغي تقيلة اوي ..مسكت دماغي وأنا بقولهم:
....ايه اللي حصل ... أنا كنت نايمة ولا ايه ؟؟؟
بابا قالي بقلق:
... حاسة ب ايه يا حبيبتي ..أنتِ كويسة اجيبلك دكتور؟؟
رديت عليه :
دكتور ليه ... هو ايه اللي حصل ؟؟؟
ردت عزة :
....احنا سمعنا فجأة صوت جامد برا الشقة وأول لما طلعنا لقيناكِ مغمي عليكِ عند الشقة اللي قدامنا ..
بصيت عليهم ف ذهول وقولت :
...يعني أنا مكنتش بحلم وده حقيقة ... معقول ؟؟
إيهاب قال:
....ف ايه يا بنتي ... حلم ايه احنا العصر... يلا قومي بقا نتغدا ... أنا مش عارف ايه اليوم ده ... انتوا جايبنا هنا تجوعونا ولا ايه!!
ردت عليه عزة :
...طول عمرك مفجوع يا حبيبي ...
بعد الغدا اعتذرتلهم إني مرهقة شوية ومحتاجة ارتاح .. دخلت اوضتي ودخلت عزة ورايا ع طول :
...مالك يا مودة النهاردة... لو تعبانة تعالي نروح لدكتور أو مستشفى...
....أنا مش كويسة فعلا يا عزة ... بس اللي فيا مش وجع عضوي .. أنا بيحصل معايا حاجات غريبة اوي ...
.....خير يا مودة ف ايه ؟؟؟ قلقتيني!!
حكيت لعزة على الحلم اللي ملازمني من ساعة ما جينا الشقة دي لغاية اللي شوفته النهاردة ف الشقة اللي قصادنا ...
فضلت عزة مصدومة قدامي ومش عارفة تتكلم تقول ايه وقالتلي بصوت مهزوز:
...أنتِ بتتكلمي بجد يا مودة ... طيب ما ممكن تكوني شوفتي الشقة قبل كدا من جوا وأنتِ نازلة ف أي وقت !!!
.....هشوفها ازاي يا عزة وعلى طول بابهم مقفول .. أنا اصلا من يوم ما جيت ماشفتهموش غير مرتين تلاتة بالكتير وف مدخل العمارة تحت
....ممكن يا مودة وأنتِ نازلة ف مرة الباب كان موارب ولا حاجة .. وعينك لمحت البيت من جوا ... عادي بتحصل والله
.....يوووووه يا عزة عشان كده مكنتش عايزة احكيلك ..... أنا عارفة إن محدش هيصدقني ... مفيش غير يمنى بس اللي بتريحني!!
....خلاص خلاص ... اهدي بس وريحي كده أنتِ مرهقة اوي النهاردة ونتكلم ف الموضوع ده بعدين !!!
تاني يوم اتصلت ب يمنى وطلبت منها تيجي ضروري وفعلا جت على طول ... حكيت لها على اللي حصل وطبعا كانت ف حالة ذهول من اللي سمعته.....
..... معقول الكلام ده يا مودة ... ده ولا ف الخيال طيب ايه علاقة مامتك ب الشقة اللي قصادكم .. ده انتوا عزلتوا بعد ما هي اتوفت!!!
..... مش عارفه يا يمنى .. دماغي هتتشل ومش مصدقة اللي بيحصلي ده ...
يمنى قالت وعينيها كلها شغف:
... بصي بقا احنا لازم ندخل الشقة دي بأي طريقة ... ونعرف مين اللي ف الصورة دي ؟؟؟
.... طيب هندخل ازاي ؟؟؟ دي الست قليلة الذوق اوي
يمنى قالت بحماس:
... لا احنا نخطط كده ونشوف طريقة عشان نعرف ندخل عندهم ... مفيش حل تاني !!!
وبعد تفكير وصراعات بيني وبين يمنى وافقتها على فكرتها المجنونة وهي إننا ندخل البيت وهو فاضي .. ده أنسب حل واللي هيساعدنا أكتر على القرار ده عدم وجودهم ف الشقة الأيام دي بسبب تعب الراجل ووجوده هو ومراته ف المستشفى بشكل دائم
استنيت لغاية لما بابا نزل يجيب طلبات .. ويمنى كانت عندي من بدري واستعدينا أنا وهي للمغامرة المرعبة دي ... يمني عملت استعداداتها كلها ف موضوع فتح باب الشقة من غير أضرار اصل هي عندها خبرة ف المجال ده بسبب شغل باباها ....
وفتحنا باب الشقة وبصينا لبعض بس نظراتنا كانت مختلفة ... أنا عيني كانت كلها رهبة وخوف إنما يمنى عينيها كانت مليانة شغف واثاره .. شدتني من إيدي ودخلنا ....وفجأة الباب اتقفل ورانا لوحده من غير ما حد يلمسه ...
.... افتحي الباب يا يمنى هو اتقفل كده ليه ؟؟
... أنا مقفلتوش والله .... يالهوي مش راضي يتفتح
.... بطلي هبل بقا يا يمنى ده مش وقت هزار ... اوعي كده أنا هفتحه ..
حاولت أفتح الباب بكل قوتي بس للآسف الباب فعلا مش راضي يتفتح خالص ..حسيت بخوف عمري ما حسيته قبل كده وندمت إني سمعت كلام يمنى المجنونه دي .. فعلا مجنونة دي ولا ف دماغها إن الباب اتقفل ده بالعكس دي دخلت ووقفت تحت صورة البنت اللي ف الحيطة وبصت عليا وضحكتلي ضحكة غريبة..وقالت:
.... عاملة ايه يا مودة .. أخيرا جيتي ده أنا مستنياكِ من بدري .. من بدري اوي
... ايه الصوت ده .. ده مش صوت يمنى ..أنتِ مين وفين يمنى..
.... اهدي بس كده .. حاليا يمنى مش موجودة ... مفيش غيري أنا وأنتِ هنا .. وأنا هتواصل معاكِ من خلال جسمها ... أنا صاحبة الصورة اللي بتزورك ف أحلامك الفترة دي كتير!!!
حاولت أفتح الباب عشان أهرب من اللي أنا فيه ... بس وصلني صوتها المخيف :
... متحاوليش يا مودة ... الباب مش هيتفتح دلوقتي غير لما أقولك على اللي جبتك هنا عشان أقوله ...
فضلت أقرأ قرءان واستعيذ بالله على أمل إنه يطلع كابوس وافوق منه !!
..... أعوذ بالله من الشيطان الرجيم ... أنتِ مين ؟؟؟ من الجن ؟؟؟؟ وازاي عملتي كده ويمنى راحت فين .....وعايزة مني ايه ؟؟؟
ردت عليا:
..... أنا حاليا مش موجودة ف العالم بتاعكم...أنا جايالك من عالم تاني ...متسأليش ازاي عشان مش مهم تعرفي ... أنا عندي رسالة لازم اوصلهالك ... لازم تعرفي يا مودة إنك مش واحدة عادية عشان كده أنا قدرت أتواصل معاكِ ... معاكِ أنتِ بس ...مكنش ينفع حد يسمعني غيرك....
رديت عليها بسرعه:
.... الرسالة دي ليها علاقة بالحلم ... وب امي ..صح ؟؟؟
.... بالظبط كده ... تعالي يا مودة معايا ..أنا مش هحكيلك أنتِ هتشوفي كل حاجة بعينيكِ..
مشيت وراها ب استسلام تام ... هخاف من ايه أكتر من كده ... بيتهيألي خلاص مفيش مفر غير المواجهة... لازم أعرف سر الحلم وايه علاقة امي بالبيت ده ....
مشيت وراها في طُرقة طويلة لغاية لما وصلنا عند باب اوضة مقفول ....وقبل ما تفتح الباب بصتلي وقالتلي ها مستعدة يا مودة. ....
جاوبت عليها بهز راسي ... وفيما معناه إني مستعدة .. وكانت المفاجأة الكبيرة...أول لما الباب اتفتح...........
الجزء الثالث والاخير من هنا
