سكت ومرضيش يتكلم ، ولعت سيجارة وخدت منها نفس وقولتله:
= طبعًا مش محتاج اقولك انى مش باقى على حاجة وكمان
مش محتاج اقولك انى ممكن اقتلك دلوقتى عادى جدًا بسبب الفيديو ده
طلعت الموبايل بتاعى وشغلت الفيديو بتاعه هو وايمان ، ووريته للباقى
سميرة لفت راسها وتفت عليه وعلى ايمان ، وياسمين لقيتها مذهولة
وكأن فيه حاجة تانية متدارية عنى.
سميرة مستحملتش وقعدت تشتم فيه هو وايمان وعمالة تحاول تقوم
علشان تضربه ، حسن لما لاقى الموضوع كبر منه ، نده على الامن
بصوت عالى ، ضحكت بسخرية وقولتله :
= انا اديت الامن بتاعك اجازة ، انت ناسى ان صوتنا يشبه لبعض
يعنى من الاخر كده مفيش مفر ، وهنصفى حساباتنا دلوقتى ، يلا
زى الشاطر كده قولى بعت العُقد لمين وبكام؟
.. العُقد بعته لاجانب جايين عن طريق حمودة العربي بـ 3 مليون دولار
= انت عارف تمن العُقد الحقيقي كام؟
.. كام ؟
= المزاد بتاعه بيبدأ من 10 مليون دولار ، يعنى تخيل بقى ممكن يوصل لكام
علشان اعرفك بس انك حرامى وقاتل ومغفل كمان
.. انت بتقول كام؟!!!
= زى ماسمعت بالظبط ياحدق
.. ابن النصابة اللى ضحك عليا ، فُكنى ياحسن فُكنى نكلم ابن النصابة ده
= هفكك بس قبلها تكتبلى شيك دلوقتى بنصيبى من الـ 3 مليون دولار
واصرفه بكرة بالكتير ، وبعد كده نروح نجيب الباقى وبعد مانجيب باقى الفلوس
نبقى نقسمها ومش عايز اشوف وشكم كلكم تانى
.. حقك يااخويا ، نجيب حقنا وابقى اعمل اللى انت عايزه ، اهم حاجة انك عرفت
قيمة العُقد واد ايه هيغير حياتنا
فكيتهم كلهم ، وايمان راحت جرى على اوضتها تلبس ، ولقيت حسن قرب منى وقالى:
= مش هتمسح الفيديو ده بقى ؟! انا حرمت اخر مرة
.. الفيديو انا بعته لحد معايا علشان لو التليفون بتاعى حصل فيه حاجة اعرف اجيبه تانى
نخلص موضوع العُقد واخد الفلوس فى ايدى وبعد كده نشوف الفيديو بكام ولو عايز
تشتريه يبقى عنيا
= اتغيرت اوى ياناصر
.. مفيش حاجة بتفضل على حالها ياحسن ، وبعدين اكيد مش هجيب الوساخة من بره
زى ماانت شايف ، انا عايش فى مستنقع وساخة
تانى يوم الصبح ، حسن كلم حمودة العربي واتفقوا انهم يتقابلوا وروحت معاه
حمودة العربي راجل كبير قاعد فى محل اجهزة كهربائية بيع وشراء ، يعنى ممكن نقول
كده انه بيعمل اى نشاط يدارى وراه تجارة الاثار ، واول مادخلنا قال لحسن :
= ايه الوغش اللى انت عامله فى التليفون ده ياعم حسن ؟ ومين الهلف اللى جايبه معاك
حسن رد عليه بعصبية وقاله:
.. ده اخويا ناصر ياحمودة وبعدين بدل ماتقولى الوغش اللى انا عامله ، ازعل
على اللى حصلى والخازوق اللى خدناه فى العُقد.
= خازوق ايه ياجدع انت ، مش خدت حقك على داير المليم
.. يعنى عُقد يساوى اكتر من 10 مليون دولار تدينى منه 3 مليون؟!
= ياحبيبي احنا مش بايعينه شرعى ، العُقد ده لازم تثبت ملكيته علشان تعرف تبيعه
غير كده هيتاخد منك ومش هتطول ولا ابيض ولا اسود
.. طب وانت مقولتليش الكلام ده ليه من الاول؟ وبعدين ممكن تكون فاتورته او اى حاجة
تثبت ملكيته فى البيت القديم ، لو قولتلى كنت دورت كويس وبعناه بأعلى سعر
= خلاص ياسيدى متزعلش ، هكلملك الناس تهز المبلغ كمان مليون ولا اتنين
.. زى مااديتهم العُقد بايدى ، انا عايز اقعد معاهم واتفاهم بنفسي
طبعًا كنت بسجل كلامهم بالحرف واتفاقهم على الميعاد والمكان اللى هيتقابلوا فيه
اتفقنا على اننا نقابل الناس اللى خدت العُقد بعد يومين ، وفى خلال الوقت ده كنت صرفت
نصيبى من الـ 3 مليون دولار.
روحت قعدت معاهم فى الفيلا اللى شاريها حسن ، ولقيت ايمان داخلالى الاوضة بليل
بتتسحب .....
الحلقة العاشرة والاخيره من هنا
