اول ماسمعت صريخ ندا فى التليفون ، سبت كل حاجة فى ايدى
وروحت جرى على البيت عندها ، لقيت باب الشقة موارب
دخلت بسرعة ، لقيتها واقعة على الارض وسايحة فى دمها
واختها وامها مفيهمش نفس ، من خضة المنظر اتسمرت مكانى
معرفتش اعمل ايه ، بعد ثوانى تداركت الموضوع ، خدتها فى حضنى
وبدات اسألها:
= مين اللى عمل فيكم كده؟
.. ياسمين ، ياسمين ياناصر
= ياسمين عملت كل ده ؟!!
.. كلمت ناس وفتحتلهم الباب من المنور ، دخلوا علينا وقعدوا يضربونا
علشان يعرفوا مكان العُقد ، وقتلوا امى واختى قدامى ياناصر
وخدوا العُقد وادوه لياسمين وخرجوا
خدت نفسها بالعافية وقالتلى :
= انا بحبك اوى ياناصر ، اوى
عينيها اتثبتت مكانها وقطعت النفس ، قعدت اصرخ فيها
ومش مصدق انهم قتلوها .
الصدمة كانت شديدة جدًا عليا والصدمة الاشد ان كله يطلع من ياسمين
وتطلع مدبرة الموضوع مع حسن علشان تاخد العُقد
حاولت اتمالك اعصابي للحظات وقولت ممكن يكون حد فيهم عايش
اتصلت على طول بالاسعاف وفضلت قاعد مكانى واتفاجئت
ان الشرطة ماسكانى بتهمة قتل ندا واختها ووالدتها
الغريبة انى من اثار صدمة موت ياسمين مبرأتش نفسي
ولا حتى قولتلهم انا معملتش حاجة ، فضلت ساكت لحد ماروحت القسم
واتعرضت على النيابة ووكيل النيابة فى الاول طلب مني الاعتراف
وطبعًا اكدتله انى برئ من موتها وان لايمكن اعمل كده ، واعتقد ان ملامحى
كان واضح عليها اوى اد ايه انا حزين على فراق ندا
والسؤال اللى بعده كان مين اللى ممكن يعمل كده ، وبالرغم انى
عارف لكن مقدرتش اقول على ياسمين واللى حصل وفضلت السكوت
قرر حبسي 4 ايام مبدأيًا على ذمة التحقيق لحد مايجمع كل الادلة .
لما دخلت الحجز علشان اقضى الـ 4 ايام ، لقيت ناس وشوشها فاسدة
الاجرام باين فى عيونهم بطريقة عجيبة ، وبعد دقايق واحد خرج من وسطهم
شاورلهم عليا ، كله هز راسه كانهم فاهمين حاجة او متجمعين على حاجة
عملوا حواليا دايرة كبيرة والراجل طلع مطوة من بنطلونه ، مسكها بكيس بيلاستيك
وضربنى بيها ومش بس كده ، ده كمان حط المطوة فى ايدى ودمى ساح فى الارض
والمساجين قعدوا يصرخوا الحقوا الراجل قتل نفسه ، وكأنهم معملوش اى حاجة
محستش بنفسي غير وانا بحاول افتح عيني بالعافية فى المستشفى
اول مافوقت سألت الممرضة :
= انا فين ؟!
.. حضرتك فى المستشفى يافندم حمدالله على السلامة
عرفت منها انى دخلت غيبوبة طويلة وبقالى اكتر من شهرين فاقد الوعى
ومن الاخبار السارة انها قالتلى :
.. عندى بشرى سارة لحضرتك
= ايه؟
.. حضرتك خدت براءة فى القضية بتاعتك ، الطب الشرعى وكاميرات المحلات
اثبتت برائتك ، انا طبعًا عرفت الموضوع ده من الحرس اللى هنا فى المستشفى
ومستنيين حضرتك علشان يكملوا اجراءات خروجك بالسلامة
= الله يسلمك اشكرك
خرجت من المستشفى وروحت النيابة وخرجت عن طريق القسم وطبعًا
اول حاجة فكرت فيها انى اروح ازور قبر ندا واستسمحها تسامحنى على اللى حصلها
وفعلا عملت كده وروحت على المنطقة ومفيش اى حاجة فى بالى
غير انى ارجع العُقد وانتقم من حسن وياسمين ، وارجع روحهم للى خالقهم
اول مادخلت البيت لقيته فاضى تمامًا من كل حاجة ، نزلت زى المجنون
سألت جارنا اللى تحت ، وقالى:
= حمدالله على سلامتك يااستاذ ناصر
.. اخواتى فين ياعم زكريا؟
استغرب شوية وبعد كده قالى:
= هو انت ياابنى معزلتش معاهم ؟ّ! دول سابوا المنطقة من شهر بس مقالوش لحد
هما راحوا فين.
سرحت شوية وعرفت من طريقة كلامه اللى فيها مباركة ان حالهم المادى اتغير تمامًا
وساعتها عرفت انهم باعوا العُقد ، ضيعوا وصية امى وضيعوا حياتى معاها ...
