-->

قصه ساره الفصل الحادي والعشرون

قصه ساره الفصل الحادي والعشرون


     (الفصل الحادي والعشرون)


    عواطف النمر في مكتب النقيب شهاب منهاره وتبكي بشدة ويبدوا عليها اثار دماء وجروح علي وجهها وكدمات حول عينها وشفتاها متورمتان بشدة ..
    شهاب .. خلاص بقي يا عواطف بطلي بكي .. قلتلك هاجيبلك حقك !!
    عواطف .. انا عايزة حقي ياشهاب باشا من الرائد ممتاز .. دا ضربني وبهدلني زي ما انت شايف .. انا عواطف النمر اتبهدل بالشكل دا علي آخر الزمن .. انا عايزة محضر رسمي يا باشا .. انا في عرضك تحميني من الرائد ممتاز .. انا عايزه حقوق الانسان .. انا انسان يا باشا والرائد شهاب عاملني معاملة الحمار في مطلع !! دا هددني بالقتل ياشهاب باشا !! انا خايفة لا يعمل فيا حاجة
    شهاب .. قلتلك اهدي بقي يا عواطف !! واللي انتي عايزاه هيتعمل .. وحقك هيجي لحد عندك
    عواطف .. ماشي يا باشا
    وفجأة يقتحم الضابط ممتاز مكتب شهاب ويري عواطف فيغصب بشدة
    ممتاز .. انتي ايه اللي جابك هنا يا بت ؟! انطقي ؟! ومين اللي عمل فيكي كدا ؟!
    عواطف .. في ايه ياباشا ؟! انت اللي شلفطتني كدا يا باشا !!
    ممتاز .. انا !! انا عملت فيكي كدا بردوا يا بنت الجزمة ؟! دا انتي وقعتك سودا !!
    شهاب .. من فضلك سيبها يا سيادة الرائد وملكش دعوة بيها خالص !!
    ممتاز .. البت دي انا كنت راميها في حجز انفرادي بعد المصيبة السودا اللي عملتها.. مين اللي خرجها ؟!
    شهاب .. انا اللي خرجتها عشان احقق معاها
    ممتاز .. تحقق معاها !! تحقق معاها بخصوص ايه ؟!
    شهاب .. بخصوص اللي عملته فيها دا ؟! الضرب والاهانه اللي اتعرضت ليهم المسجونه علي ايدك وفي مكتبك !!
    ممتاز .. انا ؟!
    عواطف .. ايوا انت ياباشا ضربتني وبهدلتني اخر بهدلة وشتيمه بالاب والام !! وكل دا عشان اعترف بحاجة انا معملتهاش واقول اني انا اللي ضربت البت سارة .. بس انا عمري ما هعترف بحاجة معملتهاش يا باشا .. حتي لو قتلتني زي ما بتقول









    ممتاز .. انا يابنت الكلب عملت فيكي كدا ؟! دي كدابة متصدقهاش
    شهاب .. بس الصول انصاف قالت انك اقتحمت الزنزانه اللي فيها عواطف وطلبت منها تجيبهالك ع المكتب وهناك انت استفردت بيها بقي واحدثت فيها كل الاصابات دي !!
    ممتاز .. انت بتقول ايه يا سيادة النقيب ؟! محصلش طبعا الكلام دا كله
    شهاب .. والله يا سيادة الرائد المأمور بنفسه طلب مني احقق في الواقعة دي ولو تأكدنا فعلا ان دا حصل الموضوع هيتحول نيابة عسكرية .. اومال ايه .. دي مواطنه زي ما عليها لينا واجبات.. ليها كمان علينا حقوق .. ابسطها انها تتعامل كإنسانه يا ممتاز باشا !!
    ممتاز ينظر اليهم في غضب واستحقار ثم ينصرف بلا استئذان .. وشهاب يبتسم سخرية من ممتاز ..
    ونذهب الي سيد يجلس في سيارته حيث قام رجالة بالحفر واستخراج جثة ام بثينه ويأتي عوض احد رجال سيد ويدعي عوض ليخبره بأنه تم استخراج الجثة
    عوض .. طلعنا الجته يا معلم
    سيد يترجل عن السيارة ويتوجه نحو الجثة
    سيد .. ايه دا !!.. دي واحدة بس .. فين التانية ؟!
    عوض .. معرفش يا معلم .. احنا ملقناش غير دي بس !!
    سيد .. يعني ايه ملقتوش غير دي بس ؟! هما مش كانوا اتنين مع بعض ؟!
    عوض .. ايوا .. جايز التانية تكون اتحللت في الارض خلاص !!
    سيد .. نعم يا اخويا .. اتحللت في الارض ؟! جته مدفونه ملهاش ٤٨ ساعة تتحلل في الارض !! انت بتستهبل ياض ولا فاكرني كروديا ؟!
    عوض .. العف يا معلم مش قصدي والله .. بس انا محتار زيك كدا .. هما فعلا كانوا اتنين مع بعض في حفره واحدة
    سيد .. فك ياض وريني وش الجته دي
    وبعد ان يرفع عوض الغطاء عن وجه الجثة وينظر اليها سيد يجد ان تلك الجثة هي جثة عطيات ام بثينه
    سيد .. دي ام البت بثينه ؟! اومال الجتة التانية راحت فين ؟! الجته راحت فين يا اولاد الكلب ؟!
    عوض .. منعرفش يا معلم
    سيد .. اه لو اعرف انتي فين دلوقتي يا بثينه ؟! اه يا ناري !!
    ونذهب الي ممتاز الذي ذهب اللي مكتب المأمور
    المأمور .. لا يا ممتاز انا مكنتش اتوقع في يوم من الايام ان ضابط عندي ومن اكفأ الضباط كمان يعمل كدا ابدا ؟!
    ممتاز .. محصلش يا فندم صدقني .. البت عواطف بتتبلي عليا واكيد هي اللي عملت دا في نفسها عشان تشوشر عليا مش اكتر ؟!
    المأمور .. انت ايه اللي خلاك تحطها في حبس انفرادي من غير ما ترجعلي ؟!
    ممتاز .. يا فندم الست دي اعتدت بالضرب علي بنت اسمها سارة والبنت حاليا في المستشفي بين الحياه والموت !!
    المأمور .. عندك دليل علي كلامك دا يا سيادة الرائد ؟!
    ممتاز .. هي رفضت تعترف والبنات في العنبر معاها رافضين يقولوا مين اللي عملت كدا !! بس انا متأكد ان عواطف هي اللي عملت كدا
    المأمور .. ايوا انا بسألك اهوه .. اتأكدت مين ان هي اللي عملت كدا ؟!
    ممتاز .. يا فندم عواطف ليها سوابق كتير برة السجن وجوة السجن كمان واغلبها تعدي بالضرب علي المساجين واحداث عاهات مستديمه ومحدش يقدر يعمل كدا في البنت المسكينة دي غير عواطف وانا عندي احساس كبير ان هي اللي عملت كدا في سارة
    المأمور .. اها .. قول كدا يا سيادة الرائد .. احساسك !! يبقي انت سبت الادلة والبراهين وجريت ورا احساسك ؟!











     واحساسك دا بقي يخليك تضرب مذنبة بالطريقة الهمجية دي وفي الاخر ترميها في حبس انفرادي لمجرد احساس وهمي خالي من الادلة والبراهين ؟!
    ممتاز .. محصلش يا فندم .. صدقني ارجوك .. انا فعلا جبتها المكتب عندي بس كل اللي حصل اني واجهتها وهي انكرت!! بعدها امرت انهم يحطوها في سجن انفرادي .. نوع من الضغط والتهديد عشان تعترف مش اكتر
    المأمور .. تعترف بإيه بالظبط ؟! بحاجة هي معملتهاش ؟! ثانيا الصول انصاف والنقيب شهاب والعسكري فارس اللي واقف علي مكتبك شاهدين يأنك ضربتها جوة مكتبك وهي قعدت تصرخ لدرجة ان شهاب داخل وخلصها من ايديك .. ولولا كدا كان زمانها ماتت ووديتنا كلنا في داهية !!
    ممتاز .. كدب .. محصلش يا فندم .. شهاب كداب !! .. دا بيتبلي عليا عشان عايز ينتقم مني لأني طلقت اخته
    المأمور .. بقلك ايه يا سيادة الرائد .. مشاكلك الشخصية دي في البيت مش هنا !! وياريت توفر دفوعك دي للتحقيق انا مش عايز اسمع حاجة .. وعلي فكرة انت من انهارده موقوف عن العمل لحد ما يخلص التحقيق .. اتفضل ..
    رد فعل علي وجه ممتاز ..
    ونذهب الي سيد الذي ذهب ومعه رجالة الي خالة بثينه والدة قاسم الذي قتلته بثينه حيث يقتحم المنزل ورجالة يفتشون في كل مكان.
    سيد .. بقلك فين بثينه يا وليه ؟!
    الخالة .. معرفش يا معلم والله .. دي من ساعة ما المرحوم ابني مات انا مشوفتهاش !!
    سيد .. يعني مجاتش هنا خالص ؟!
    الخالة .. لا ورحمة المرحوم ابني ما جت ولا شفتها .. هي عملت ايه يا معلم ؟!
    سيد .. عملها اسود ومنيل علي دماغك انتي وهي !!
    عوض .. فتشنا البيت كله وملهاش اثر يا معلم !!
    سيد .. اسمعي يا ولية انتي .. عارفة لو البت دي جت عندك وماتصلتيش بيا علطول .. انا هاجي اعلقك من رقبتك في السقف دا .. فاهمه ؟!
    الخالة .. فاهمه يا اخويا فاهمه
    سيد .. وادي الكارت اهوه فيه كل تليفوناتي .. يلا يا رجالة
    وبعد ان ينصرف سيد ورجالة تقول الخالة لنفسها
    الخالة .. الراجل دا اكيد مجنون ؟! ولنفرض ان البت جت عندي انا هتصل بيه ازاي وانا اصلا مش معايا محمول ؟! لما انام احسن . قلق منامي الله يقلق منامه هو واللي معاه ..
    ونذهب الي الرائد ممتاز حيث ذهب الي مازن وكيل النيابة
    مازن .. عندك حق يا سيادة الرائد .. واقعة الاعتداء علي سارة في التوقيت دا بالذات وهي كان المفروض تعترض تاني يوم ع الطب الشرعي عشان يكشف علي ايديها وان الضرب يتركز علي ايديها اكتر بهدف تعجيزهم تماما !! دا مش صدفة ابدا ؟!.
    ممتاز .. الغرض واضح يا فندم .. ان سارة متعرفش تثبت ان هي مقتلتش قاسم !!
    مازن .. ومعرفتش مين اللي عمل فيها كدا ؟!
    ممتاز .. للأسف لا . بس انا شاكك في بنت اسمها عواطف .. بنت سوابق وقلبها ميت وانا متأكد ان هي اللي عملت كدا في سارة
    مازن .. حتي لو مش هي .. اللي عملت دا من جوا الزنزانه اللي هما فيها .. واللي عملت كدا مزقوقة من حد معين طلب منها انها تعمل كدا وانها تركز جرعة الضرب علي ايدين سارة عشان يتحطوا في الجبس والطب الشرعي ميعرفش يثبت حاجة من ادعاءات سارة !!
    ممتاز .. طب مين هو ده ؟!
    مازن .. هو دا السؤال اللي لازم نعرف اجابته ؟!!..
    ونذهب الي مكان مهجور ومظلم حيث تسير سيارة في جنح الظلام تضئ الكشاف العالي حتي تري الطريق امامها .. نسمع صوت الكلاب يعلو في المكان ثم تتوقف السيارة امام منزل مهجور ويخرج منها شخص لا نري الا قدميه التي تسير باتجاه هذا المنزل ثم يقوم بطرق باب المنزل .. انه المنزل الذي تختبئ به بثينه
    بثينه تنزعج بشدة . مين ؟! مين اللي بره ؟!
    لا احد يرد وتفتح بثينه الباب بحذر شديد فلا تري احدا .. ولكن عندما تنظر الي الارض تري جثة حسن امام الباب فترتجف من الخوف وفجأة يظهر امامها ..... ؟؟!

    إرسال تعليق