(الفصل الثاني)
صليتي؟؟
ملاك لنفسها: ايه دا أكيد حد باعته بالغلط ، كملت لعب على الفون وبعد شوية جاتلها رسالة تانية
مردتيش عليا صليتى؟
ملاك قررت ترد عليه
ملاك : أفندم
الرقم: سؤالى واضح صليتي
ملاك: وانت مين أصلا وتعرفني منين
الرقم: علي فكرة طريقة لبسك مش عجبانى ياريت تغيريها
ملاك بعصبية من طريقة كلامه كتبت: أنت مجنون ، هتقول مين ولا أعملك بلوك .
الرقم شاف الرسالة ومردش وملاك اتعصبت من بروده واستنت شوية ولسه جاية تعمل بلوك لقته بيكتب
جاسم: أنا جاسم اللى كلمتك النهاردة في الكلية أنا أخدت موضوع المحاضرات حجة عشان اتكلم معاكي
ملاك: وتتكلم معايا ليه أنت تعرفي
جاسم: أيوا أعرفك يا ملاك وبحبك كمان
ملاك مكنتش مستوعبة الكلام قفلت الفون وخبت وشها بالمخدة وقعدت تكرر في الكلمة عشان تستوعبها
ملاك: أكيد بيشتغلنى ماهو مش معقول هيحب واحدة شبهي يعنى ، بعدها فتحت الفون وقعدت تبص علي صورة الواتساب بتاعته لقت ملامحه وسيمة جدا وأكدت كلامها : أكيد بيتسلي مش معقول واحد كدا هيحبنى أنا ، أفضل حل أني أنام ..
قامت اتوضت وصلت الصبح وقعدت تفطر وبعدها قررت تفتح الفون عشان تكلم هدي وبعدها تقعد تذاكر
فتحت الفون لقت رسايل كتير من جاسم فتحتها عشان تقراها
جاسم: أنتى ليه مردتيش عليا أنا عارف انك مستغربة بس أنا بحبك وأتمني أنك تحبيني وقعد يعرف نفسه وانه شافها وحبها
ملاك كانت فرحانة جداا بالكلام دا بس مكتبتش حاجة ، قعدت تكلم هدي ومحكتش ليها حاجة وبعدين فضلت تذاكر لحد ما سمعت الاذان ابتسمت وقامت تصلي ورجعت تذاكر تاني لحد ما تعبت قررت ترتاح شوية فتحت فونها وشغلت أغنية وقعدت تلعب في شعرها اتنهدت لما افتكرت الحوار اللى دار بينها وبين سلمي
فلاش باااك:
سلمي: ملاك ملاك
ملاك بضيق: أيوا يا سلمي عاوزة حاجة أظن كفاية اللى عملتيه انتى وصحبتك
سلمي بحزن: ملاك أنا اسفة والله ما كنت أعرف هما ناوين علي ايه ولما عرفت اتخانقت معاها وطلبت منها تسيبك في حالك ومشيت ومكلمتهاش تاني ، متزعليش مني يا ملاك انتي عارفة اني بحبك ، انتي صحبتي الوحيدة انتى وهي وخلاص مبقاش ليا غيرك
ملاك بابتسامة: خلاص مش زعلانة منك ، علي فكرة الخمار جميل جداا عليكي ربنا يثبتك
سلمي: أنا كنت لابسة الخمار بس لما دخلت الكلية اتشديت للمظاهر ومبقتش ألبسه للاسف بس الحمدلله ربنا هداني تانى ليه
ملاك: الحمدلله ،يلا بقا نروح المحاضرة عشان أعرفك علي هدي صحبتي
سلمي بابتسامة: يلا بينا .
باااك .
ملاك لنفسها: قد ايه كنت مخدوعة فيكي يا سارة مش عارفة أنا مشيت وراكي ازاي بعد ما كنت داخلة الكلية وعندي هدف نفسي أحققه ضحكتي عليا بكلامك واخدتيني وراكي ، بس أنا اللى غلطانة أنا اللى معرفتش الصح من الغلط، الحمدلله اني بعدت عنك
تانى يوم صحيت ملاك وجهزت عشان تروح الكلية
بعد وقت وصلت الكلية لقت سلمي صحبتها دخلوا الاتنين المحاضرة وبعد ما خرجوا
سلمي: ياااه المحاضرة دى رخمة بشكل
ملاك بابتسامة: مش اوي يعني
سلمي: اومال فين هدي
ملاك: هدي مش هتيجي النهاردة كنسلت المحاضرات وهتيجي بكرا
سلمي: اممم ، يعني كدا انتي هتكملي اليوم لوحدك لاني همشي عشان ماما مستنياني زي ما قلتلك
ملاك: مضطرة بقا ، خلي بالك من نفسك
سلمي وهى قايمة: حاضر يا حبيبتي ؛ هتعملي ايه دلوقتى باقى ساعتين علي المحاضرة الجاية .
ملاك بتنهيدة: هفضل قاعدة هنا في الكافتيريا لحد معادها
سلمي: تمام وسابتها ومشت ، طلعت ملاك فونها وقعدت تلعب بيه لحد ما جات ليها رسالة
جاسم: احسن ان صحبتك مشت عشان اعرف اتكلم معاكي
ملاك : انت بتراقبني ولا ايه
جاسم : أيوا
ملاك بصت حواليها ملقتش حد قامت من المكان وراحت جنينية محد بيقعد فيها كتير عشان تبعد عنه
جاسم: حلو اوي المكان دا
ملاك اتخضت وبصت وراها: انت جيت هنا ورايا ، انت عايز منى ايه
جاسم: قلتلك اللى عايزه منك امبارح
ملاك بسخرية: طب ما تقول تانى فيها ايه
جاسم: انا بقول الحاجة مش بكررها
ملاك بعصبية: أنت مغرور وبارد
جاسم بغلاسة: عارف
ملاك غصب عنها ابتسمت ، وبعدها اتكلم هو: ايه رأيك
ملاك: أنا مش عارفة بصراحة خايفة اكون بعمل حاجة غلط
جاسم: ادى نفسك فرصة لو مرتحتيش معايا بلاش تكملى انا واثق انك هتحبيني بسرعة
ملاك : مش بقولك مغرور ، أنا موافقة ، بعد اذنك بقا عشان عندى محاضرة وسابته وقامت
بعد انتهاء اليوم خرجت ملاك من الكلية واتمشت شوية عشان تلاقى مواصلة للسكن لقته ماشي وراها
ملاك: مينفعش تمشي كدا ورايا
جاسم ببرود: ومينفعش تمشي لوحدك في الوقت دا
ملاك: طب ما انا طول عمري بمشي لوحدى ايه الجديد
جاسم: الكلام دا قبل ما أكون موجود
ملاك ابتسمت ومشت وهو فضل وراها لحد ما ركبت وروحت ، لقته بيرن عليها
جاسم: وصلتي ولا لسه
ملاك: وصلت دلوقتي
جاسم: طيب يلا غيري وصلي وبعدين هكلمك ، مستناش ردها وقفل المكالمة
ملاك: ايه الغلاسة دى وضحكت بس اعترفت في نفسها ان دى اول مرة حد يهتم بيها
وبالفعل غيرت واتوضت وصلت وأكلت وقعدت تذاكر وبعد شوية فونها رن
جاسم: بتعملي ايه
ملاك: قاعدة لوحدي بذاكر
جاسم بهزار: حبيبي أشطر كتكوت ، أومال فين صحبتك اللى بتمشي معاها دي
ملاك سابت المذاكرة وقامت من مكتبها راحت السرير: هدي لسه مرجعتش من السفر
جاسم: أحسن عشان صحبتك دى مش بطيقها ، فارضة شخصيتها عليكى
ملاك: علي فكرة هدي كويسة جدا انت متعرفهاش
جاسم: ومش عايز اعرفها ،هتيجي الكلية بكرا
ملاك: ان شاء الله
جاسم: هنتقابل
ملاك: جاسم أنا مش عايزة حد يشوفني معاك عشان متفهمش غلط ياريت بلاش تكلمني فى الكلية
جاسم: حاضر يا ستي مش هكلمك، نامى بقا وكفاية سهر وقبل ما تنامي اقري وردك من القرآن
ملاك بخجل: وردى
جاسم: انتى مش عاملة لنفسك ورد يومي
ملاك: مش منتظمة دايما يعني
جاسم: لازم تقري كل يوم لو حتى صفحة عشان ربنا يحفظك ويبارك فيكى، وكمان طريقة لبسك مش عجباني
ملاك: أنا حاسة انك بتتحكم فيا
جاسم: مش بتحكم فيكي كل الحكاية مبحبش حد يبص عليكي كدا غلطت وآسف لو اعتبرتيها تحكم
ملاك: خلاص بلاش تزعل أوى كدا
جاسم: مش زعلان ، المهم أتمنى تغير طريقة لبسك وكمان تداري شعرك اللى بيخرج من الطرحة
ملاك: حاضر يعم ، ف حاجة تانية
جاسم: لا كدا خلاص
تاني يوم راحت الكلية وحضرت المحاضرات وقابلت هدي بس محكتش ليها اللى حصل وبعد ما اليوم خلص خرجوا وساعتها قابلوا جاسم اللى غمز لملاك وساعتها هدي اخدت بالها
هدي: ممكن أعرف ايه اللى حصل دا
ملاك بتوتر: ايه حصل مش فاهمة
هدي: لا انتي فهمانى مين الولد دا وغمزلك كدا ليه
ملاك: وانتي مالك انتى هتتدخلي في حياتي كمان خليكي في حالك انتي مش وصية عليا
هدى: تمام أنا اسفة انى اتدخلت في حياتك بس خدي بالك الولد دا مش مظبوط انا عايزة مصلحتك سلام يا صحبتي.
سابتها ومشت وملاك اتضايقت وروحت هي كمان وبعدها جالها مكالمة من جاسم نست اللى حصل وقعدت تتكلم معاه لفترة كبيرة
جاسم: علي فكرة شكلك كان حلو النهاردة في اللبس الواسع
ملاك: شكرا ، وبعد وقت رغي كبير بينهم
ملاك: أنا هروح انام تصبح علي خير
جاسم: وانتي من اهله
بعد ما قفلت معاه
ملاك لنفسها: انا لازم اتغير واكون حلوة فى عيونه ويحبني اكتر ، مرت الايام وبدأت ملاك تتغير فعلا بقت تلبس بناطيل واسعة وتغطي شعرها ومرة في مرة منعت البناطيل وبقى لبسها كله فساتين ، كانت بتصلي وتقرأ قرآن وقربت من ربنا فعلا مش عشان تعجب جاسم، بدأت تستغرب ازاى هو ملتزم وبيحبها وبيتكلم معاها ومش محافظ عليها نفضت التفكير دا من دماغها وفي يوم دخلت الكلية وكل اصحابها راحوا ناحيتها باستغراب وفرحة
سلمي: ماشاء الله ربنا يحميكي يا حبيبتي
حد من صحابها: مبارك يا ملاك الخمار عليكي يجنن
ملاك باحراج: شكرا جدا وبعد ما خلصت معاهم قررت تصالح هدي فراحت عندها واتكلمت
ملاك: مش هتباركيلي علي الخمار
هدي بفرحة: مبارك يا روح قلبي ربنا يثبتك عليه ويحفظك من كل سوء
ملاك حضنتها بفرحة: أنا اسفة متزعليش منى غصب عني اللى قلته سامحيني
هدي: مش زعلانة منك يا قلب أختك انا خايفة على مصلحتك
ملاك: يلا نمشى
هدي: ازاى لازم نجيب هدية لحبيبة قلبي على الخمار دا ، وبالفعل جابت لها هدي رولية وتعمدت نوعها دا
ملاك باستغراب: ولنا في الحلال لقاء!
هدي: الروابة دى جميلة جدااا لازم تقريها
ملاك: حاضر .
تاني يوم
ملاك كلمت هدي: على فكرة أنا قريت الرواية كلها طبقت لحد ما قرأتها
هدي : طب وايه رأيك
ملاك بدموع: عارفة اني غلط واني مينفعش اللى بعمله دا عشان حرام بس انا حبيته قلبي اتعلق بيه اول حد يتعامل معايا كدا ويحبني ويخاف عليا حد يشاركني كل حاجة حبيته لانه ميتعوضش
هدي: يا روح قلبي انتي دا مش حب ، انتي عشان مكنتيش لاقيه اهتمام فلجأتي للشخص الغلط صدقيني دا انبهار بشخصيته مش حب ابدا ولما الحب الحقيقي يجي هتعرفي ان كلامي صح
ملاك: مش هقدر ابعد عنه
هدي: لازم تبعدي لأن كدا حرام عليكي دا ابتلاء من عند ربنا لانك عصتيه فى الاول لما قررتي تكلمي شباب فوقعك مع دا لازم تكوني اقوي من شيطانك ومن ضغفك وتبعدي عنه وتقربي أكتر من ربنا
ملاك: معاكي حق .
مرت الايام وملاك بتجاهد نفسها انها تبعد عن جاسم وعملته بلوك ومبقتش تكلمه وكل ما تضعف هدي تقويها ولاحظت فعلا ان جاسم مبقاش يكلمها ولا يبصلها حتي في الكلية عرفت انها كانت فترة في حياته وكان بيتسلي بيها وقررت تكلمه وتشوف فعلا اذا كان بيحبها ولا لا عشان تنهى موضوعه للابد
ملاك: جاسم ازيك ؟!
