(الفصل الثاني)
شادى قرب من حور جامد ومسك دراعها بقوه
= ماما ازاى يعنى !! دا ابن اختك او ابن حد قريبك وبيقولك ماما كدا وخلاص صح ...
- شادى .. انا ...
شادى هزها جامد
= قولى ان كلامى صح .. لا لا اكيد انت مش متجوزه ولا عندك عيال .. لو كان دا صح كنتى قولتيلى
- انا اسفه يا شادى ..
= اسفه ؟!!! انتى كسرتى كوبايه ف بتقولى اسفه مثلا !! انتى كسرتى قلبى يا حور
وبعدها كمل وهو بيعيط
= انا كنت هقولك النهارده انى بحبك وانى هاجى اتقدملك بكرا .. حرام عليكى ليه تعملى فيا كداا
بعياط - انا كمان بحبك يا شادى والله....
وقتها شادى ساب دراعها و بعد عنها
= لو سمحتى متنزليش من نظرى اكتر من كدا . يعنى مش كفايه كدبتى عليا وخبيتى انك متجوزه وكماان خاينه لجوزك ... وبعدين لما انتى متجوزه ليه مش بتلبسى اى خاتم
بعياط - عشان انا بكرهه يا شادى .. هو سابنى من بعد م ولدت فريد بسنه . كل دا عشان تخنت و بشرتى باظت من الحمل ... سابنى وقتها وبقا كل الى يعمله انه يبعت مصاريف فريد .. انا والله قلتله كذا مره يطلقنى بس هو رفض عشان فريد ونفسيته
= وانا مالى بقا بكل الحكايه دى .. انا ذنبى اى ان قلبى يتكسر !!! عارفه .. دى كانت اول مره احب ... بس خلاص
مسح دموعه وكمل كلامه
= انزلى لجوزك الى مستنيكى من بدرى دا . شكله جاى يصالحك . طبعا استغلتينى عشان اساعدك تخسى و بشرتك تتصلح و بعدها ترجعى لجوزك ولا كأن حاجه حصلت
بعدها بدأ يضحك بهستيريه
= برافو يا مدام حور برافوو قدرتى تخدعينى عشان مصلحتك
- شادى استنى ...
بس هو مسمعش كلامها و نزل
لما نزل من الشركه شاف فريد واقف مع راجل
فضل واقف دقيقه كدا يبص عالراجل دا ..
فنفسه = هو دا الراجل الى خدعتينى عشانه يا حور .. تمام
وقتها حور نزلت من الشركه
اول لما جوزها شافها حضنها وباسها
~ متتصوريش انتى وحشتينى اد اى يلا تعالى هفسحك انتى وفريد و نتصالح ونرجع لبعض بقا .. بقالى ٥ سنين مقعدتش معاكى ..
بسخريه " فنفسه" = واضح جدا انك بتكرهيه يا مدام حور
حور وقتها كانت مركزه مع شادى وبس بعدها شادى مشى ..
بعصبيه ~ انا بكلمك يا حور مش بتردى عليا ليه !!!
- هاه .. نعم يا حاتم جاى ليه
بسخريه ~ قلتلك جاى اصالحك و نرجع لبعض تانى . هنتفسح احنا وفريد شويه بعدها هنرجع البيت مع بعض .. انتى وحشتينى اوى
- انا عايزه اتطلق يا حاتم ... ياخى انا مبقتش طايقاك ..
حاتم ضربها بالقلم
~ يعنى بقولك كلام حلو من سعت مقابلتك النهارده وانتى مش هامك .. قلتلك طلاق مش هطلق كام مره هقولهالك دى وبعدين انا مرضيتش اطلقك وانتى وحشه . هطلقك وانتى حلوه ليه مثلا !!
بعياط و صريخ - انت مش راجل اساسا . بقولك مش طايقاااك مش طايقاااك هتخلينى اعيش معاك بالعافيه يعنى
حاتم بص على فريد ال كان بيعيط
بعصبيه ~ هنكمل كلامنا فالبيت عشان فريد بس
فالوقت دا كان شادى وصل بيته
£ ازيك يا حبيبى عملت اى فموضوع البنت الى عجباك . وافقت صح اصل مفيش بنت عاقله هترفض ابنى
= ماما لو سمحتى سيبينى وحدى ...
£ رفضت !!!
= اه يا ماما رفضت ارتحتى
£ طيب اهدى بس يا ابنى انت الف واحده تتمناك وبعدين البنات ماليين الدنيا شوف واحده غيرها
=طيب يا ماما لو سمحتى ينفع تسيبينى وحدى انا عايز انام
£تنام !! الساعه ٨ لسا لو مش واخد بالك
= عادى هنام دلوقتى فيها اى يعنى . ماما لو سمحتى انا والله معنديش القدره انى اناقش حد دلوقتى ف ياريت تسيبينى وحدى
£ ماشى خلاص براحتك
شادى راح اوضته و قعد على السرير بهدومه و جزمته
بعياط = طيب يارب ليه يحصل معايا كدا ليه .. دا انا حبيتها اكتر من نفسى .. دا ذنب الى يحب بصدق يعنى ؟!!
نام وهو بيعيط
* اليوم الى بعدو*
~ اصحى يا هانم شغلك هيضيع عليكى
= الساعه كام ..
~ ٨ الصبح
حور قامت بسرعه
~ بس كانت ليله حلوه امبارح صح .. بصراحه يعنى رجعتى احلى من الاول بعد م سبتك .. كويس انى سبتك طول الفتره دى عشان تعدلى من نفسك
بعصبيه و زعيق - انا معدلتش نفسى عشانك تمام !!!
شدها من شعرها
~ انتى بتعلى صوتك عليا ازاى كدااا هااا انا هربيكى من اول وجديد
حور ضربته بالقلم ف ساب شعرها من صدمته ان هو اتضرب من مراته
بعصبيه شديده ~ انتى ازاى تضربينى يعنى انتى اتجننتى !!!!!!
- انا بحب واحد تانى
~ نعم !!!
- زى مبقولك كدا . ف لو راجل بقا طلقنى . اى هتعيش مع واحده بتحب واحد تانى ؟!!!
حور كانت متوقعه ان حاتم وقتها هيطلقها لان مفيش راجل يقبل على نفسه كدا
بس كلامها دا معملش حاجه غير انه زود غضب حاتم اكتر واكتر
~ انا قولت انك محتاجه تربيه من اول وجديد ...
قام وقفل باب اوضتهم بالمفتاح
و فتح الدولاب جاب اكتر حزام غليظ عنده
و نزل فيها ضرب وهى تصرخ وهو يضحك كأنه بيستمتع ب صوت صراخها .. اه هو مجنون متستغربوش
بعصبيه ~ متوطى صوتك يا فاجره انتى .. فريد هيسمع
بعياط- سيبنى بقا انت واحد مريض اساسا .. خد ابنك وسيبنى انا مش عايزاك
كالعاده كلامها بيعصبه اكتر واكتر
فضل ساعه كامله يضرب فيها
بعدها هى لبست و راحت الشغل وكانت متأخره ساعه كامله عن الشغل
₩ كنتى فين يا حور !!! ساعه كامله تأخير . مخصوم منك اسبوعين
- ماشى ...
كل الى فالشركه لاحظو ان وشها عليه علامات ضرب كبيره وكمان لاحظو اختفاء شادى الى اول مره يغيب من الشغل
* فنفس الوقت دا فبيت شادى *
مامته دخلت عليه الاوضه وشافته نايم ب لبسه و الجزمه لسا ف رجله
£ يبنى اى الى انت عامله فنفسك دا متقطعش قلبى عليك ... فيه مليون بنت غيرها والله
= لو سمحتى يا ماما اطفى النور و اقفلى الباب . انا عايز انام
£ الساعه ١٠ الصبح دلوقتى ... بقالك ١٤ ساعه نايم !!!
= يا ماما سيبينى كدا انا مرتاح
£ ماشى براحتك ...
حور كانت بتدور بعينها على شادى ... كانت بتقاوم ان دموعها تنزل بالعافيه . كان نفسها بس تشوفه بس مكنش موجود
حور خلصت شغل وكانت ناويه تروح لبيت شادى . هو قالها العنوان قبل كدا بس كان حاتم مستنيها تحت الشركه
~ اى يا هانم استغربتى ليه اول مشفتينى . جاى اوصل مراتى حبيبتى البيت فيها حاجه دى !!!
- ارحمنى بقا حرام عليك
~ اتنيلى اركبى العربيه يلا بدل م اديكى علقه زى بتاعت الصبح
- لا خلاص هركب اهو ..
وهما فالطريق كانت حور بتفتكر الى حصل زمان وقت م اتجوزت حاتم غصب عنها بسبب جشع عمها ..
حور باباها ميت من وهى طفله و مامتها اشتغلت كل حاجه فالدنيا بس عشان تصرف على حور .. كذا مره حاتم اتقدملها بس حور كانت بترفضه ومامتها كانت بتحترم رفضها لغايه اليوم ال ماتت فيه مامت حور ... بعد وفاه مامت حور بكام يوم عمها راحلها البيت و قالها انها لازم تتجوز حاتم . هى فالاول رفضت بس هو ضربها لغايه لما وافقت ( حاتم ادى فلوس كتير لعم حور عشان يخليها توافق) و بعدها ب اسبوع كان فرح حور وحاتم ...
~انتى يا زفته .. بقولك عايزه تتزفتى تتعشى فين النهارده
- بقا بذمتك دا منظر اسلوب كلام ..
وقف العربيه على جمب ومسكها من رقبتها
~ بقولك اى .. اتكلمى عدل احنا معندناش ستات ترفع صوتها على رجاله ولا حتى تعترض على كلامهم
حور بعدها منطقتش ب ولا كلمه
فعلا رجعو البيت اخد فريد و راحو يتعشو برا
* فالمطعم*
-انا هروح الحمام ..
~ متتأخريش.. هما خمس دقايق بالظبط وتكونى هنا
- تمام ...
حور مثلت انها رايحه الحمام بس جريت ناحيه باب المطعم و حاتم كان مشغول بالاكل وقتها
اخدت تاكسى و راحت بسرعه عند بيت شادى ال كان لسا مش راضى يقوم من سريره ...
خبطت عالباب ومامته فتحت الباب
£ نعم ؟!
- لو سمحتى يا طنط انا زميله شادى فالشغل . ينفع تناديه هقوله حاجه مهمه ..
£ انتى الى رفضتيه صح !!!
- هو انا مرفضتهوش ...
£ عموما شادى مش راضى يقوم من سريره من امبارح . حرام عليكى كسرتى قلبه ..
- يا طنط والله انا بحبه بس ...
£ بس اى ..
- هقول لحضرتك بعدين بس دلوقتى انا عايزه شادى ضرورى بعد اذنك
£ قولتلك مش راضى يقوم من السرير
- طيب ينفع انا ادخله
£ ماشى ..
دخلت اوضه شادى
- شادى .. قوم ..
بسخريه = اى يا شادى بقيت تتخيلها قدامك كمان . انا بقت حالتى الواحد يشفق عليها ...
- انا قدامك فعلا يا شادى مش بتتخيل ..
قام مخضوض
= انتى بتعملى اى هنا !! وبعدين جوزك ازاى اصلا سمحلك تيجى عندى ..
- شادى .. انا هربت ..
فنفس الوقت دا كان حاتم اكتشف انها هربت
راح ناحيه الشركه عشان يشوف مين دا الى كانت بتتكلم عنه وبتقول انها بتحبه .. هى اكيد راحتله لان معندهاش حد تانى تروحله
÷ حضرتك عايز مين كل الموظفين مشيو عشان وقت الشغل خلص
~ انا جوز حور
بصدمه ÷ جوزها ؟!!! هى حور كانت متجوزه اساسا ؟!!
بعصبيه ~هى كمان مكنتش معرفه حد انها متجوزه !!
÷ ايوا احنا بنشتغل مع بعض بقالنا ٤ سنين واول مره اعرف
~ ما علينا .. مين اصحابها هنا
÷ مفيش غير شادى .. اتعرفو من سنه تقريبا بس اى . كنا بنقول عليهم توأم ملتصق من كتر مبيعملو كل حاجه مع بعض وكمان كنا فاكرينهم ه ...
بعصبيه ~ كملى كلامك !!
÷ كنا فاكرينهم هيتجوزو يعنى . بس انا بقولك اهو ان شادى ملهوش دعوه هى الى مقالتلهوش من الاول انها متجوزه . شادى كان صاحبى زمان وعارفه اد اى هو انسان كويس
~ وانا مسألتكيش عن رأيك فيه ... اى عنوان شادى دا
÷ ليه هتعمل اى بالعنوان ! بص والله زى مبقولك كدا شادى برئ وملهوش دعوه بالحكايه دى . انت لو حابب تحاسب حد ف حاسب مراتك الى خبت انها متجوزه
~ وانا بقولك عايز عنوانه
÷ مش هديهولك ..
قرب منها جامد و شدها من شعرها
~بقولك اى . انا مش جاى اهزر هنا . بقولك اى عنوان الزفت دا
÷ طيب خلاص سيبنى هقولك اهو
وفعلا ملك ادتله العنوان
حاتم ركب عربيته وراح ناحيه العنوان وهو متعصب اوى اوى لانه كان متأكد انه هيلاقى حور هناك
اول موصل خبط عالباب جامد وصوته كان عالى
~ افتح يا زباله افتح
الجيران طلعو يشوفو فيه اى
€ فيه اى يا استاذ انت عايز شادى ف حاجه ؟!
بعصبيه وصوت عالى كأنه قصده يفضحه وسط جيرانه ~ البيه عشيق مراتى !!!!
€ نعم !! لا اكيد حضرتك غلطان . شادى متربى و شاب كويس
~ افتحو الباب بقولكم
طبعا شادى كان واقف ورا الباب هو ومامته وحور وسامعين كل الى حاتم بيقوله للجيران
وحور كانت مستخبيه ورا شادى
بعياط - ارجوك يا شادى متسبهوش ياخدنى ارجوك . بعدها رفعت الكم و وريتله دراعها . بص عمل اى ف جسمى امبارح . كل جسمى مليان علامات زى كدا ارجوك اوعى تسيبنى دا هيموتنى
£ سيبها يا شادى احنا ملناش دعوه بيها .. احنا كنا عايشين فحالنا وبعدين انت مش سامع بيقول اى للجيران ؟!!
