الفصل الثاني
"محدش كان عارف اني رجعت من السفر ... اسكندرية لسه جميلة ... والبحر لسه بيحارب علشان يتحرر من اسر الصخور... هو ميعرفش أن اللي واقفة قدامه دلوقتي بالرغم من هروبها إلا أنها متحررتش من اسرها ... ههههه كل حاجة في الدنيا دي مضحكة ... حتى اصعب مشاكلها مضحكة ... الدنيا نكتة سخيفة وبالرغم من سخفتها إلا أننا كل مرة نضحك عليها وكأنها اول مرة نشوفها .... رجعت البيت كل حاجة زي مهى بس البيت كان واحشني اوي الدفا اللي فيه وحشني ... لعبنا وضحكنا وحشني ... حسيت أن مر عشر سنين مش ثلاثة قولت قبل كدا أن الوقت السئ بطئ جدا جدا ... دخلت جنينة البيت لقيت بابا بيسقى الزرع زي عادته ... بابا بيحب الورد جدا وانا زيه ... دايما يقولي الوردة لو عجبتك هتقطفيها بس لو حبتيها هتراعيها لحد متكبر وتفتح ... وماما طالعة من البيت بفنجان القهوة ... عمو محمد وطنط وفاء قاعدين على الطاولة ... دينا قاعدة في ركن بعيد عن الكل ... ركننا انا وهى المخصص جنب ورد التوليب ... كانوا أشبه بلوحة جميلة هادية ودافية ... بس ناقصها شخصين وانا واسر ... انا جيت بس اسر فين ... ؟!"
بابا : أمنية ...
الجميع بفرحة : أمنية ...
" سلمت عليهم كلهم بس دينا سابتني وطلعت على السطح على أساس أنها زعلانة ... استأذنت منهم وطلعت وراها علشان اصاحها قبل كدا كنت بفضل إذن عليها علشان تصالحني واعمل حركات غريبة بس مش عارفة دلوقتي اصالحها ازاي ... خصوصا انا ودينا مش بتعرف نتكلم على الفون اتعودنا دايما أن يكون كلامنا وجها لوجه علشان كدا لما كنا بنتكلم طول الفترة اللي فاتت كان مجرد سؤال عاملة ايه ..."
= احم احم
+ ........
= زعلانة
+ وانا هزعل ليه يعني ... علشان سبتينا كلنا وسافرتي
= امممم يعني مش زعلانة
+ لا خالص
= بدموع ... وحشتيني يا بطريقي
+ وانت يا قطتي
= ياااااه حضنك وحشني اوي ... اوقات كتير كان نفسي ارجع علشان احضنك بس واسافر تاني
+ علشان انت غبية وهربتي
= مكنش ينفع ابقى يا دينا ... اسر كان هيواجه مشاكل كتير بسببي ... انا بغير على اسر من ريم ومكنتش هستحمل اشوف اهتمامه بيتحول من بيا انا لريم وكذلك هي كانت بتضايق من علاقتي باسر ... كان هيتعذب بنا وانا مقبلش اكون سبب حيرة اسر وحزنه
+ اتغيرتي
= ازاي ...؟!
+ طريقتك في الكلام بقت هادية وعاقلة
= هههههه لا وحياتك دا اثر السفر
+ ولا أثر البعد ... وبعدين تعالي هنا انت بتترعبي من الطيارة ازاي تركبيها كدا
= مكنتش بحجز جنب الشباك وكنت بمسك في الكرسي جامد واغمض عيوني ...
+ ههههه راكبة ميكروباص
= هههههه شكرا يا ساحبي .. ا....ا...
+ اسر مش هنا
= مكنتش هسال عنه
+ لما بتسالي عن اسر في حاجة فيكي بتتغير زي نظرة عيونك ...
= والله ليه بيبقى لونهم اخضر
+ لا يا فالحة بينوروا
= شبه القطط يعني
+ مانت قطتي
= طب ... يعني
+ في الكافية ... اسر اتغير اوي يا أمنية ... بقى حزين طول الوقت ... الحب طلع بيكسر اوي
= اوي اوي يا دينا اسالي مجرب وعارف ... طب ايه اللي حصل
+ في اخر فترة الشركة كان فيها مشاكل كتير اوي وكانت شبه بتفلس ... اسر انشغل فيها جدا مكنش بيفضى كان كل وقته في الشركة احنا كنا بنشوفه صدفة ... بس هى مش استحملت كانت كل يوم تتخانق معاه لما كنت اشوف اسر كنت بلاقيه مهموم وسأله يحكيلي هو بيحبها بس هى مش قدرت الضغط اللي هو فيه كان بتزيد على همه حزن ... وفي الاخر سابته .... قالتله أنها عايزة حد يحسسها أنها عايشة يخرجها ويكون كل وقته ليها ... الاول كان كل وقته ليها فعلا بس هو انشغل غصب عنه ... كافأت حبه ليها بالهجر ... اسر انكسر يا أمنية ... اوقات كتير كنت بقوله لو أمنية كانت هنا كانت خففت عننا كل دا بدمها وضحكها ولما سابته قولتله لو أمنية كانت هنا كانت مسحت الأرض بشعر ريم دي وبعدها زغردت كان يضحك ... سيرتك بس كانت تضحكه ... انا متأكدة أن وجودك هيفرق ...
= هو في اي كافيه
+ على الكورنيش
= تمام ... انا رايحة
+ طب ارتاحي ...
= طب مانا مرتاحة ... سلام بقى يا بطريقي ...
" مشيت وانا خايفة من المواجهة ... خايفة أقابله ... كداب اللي قال إن البعيد عن العين بعيد عن القلب ... لا والله دا اقربهم للقلب ... القلب لما يحب ميعرفش يأسى في البعد طب ازاي ريم بعدت ... ازاي قلبها اسي مع انها كانت اقربهم لقلب اسر ... اسر متغيرش بس قلبه انجرح وربنا يكفيك حزن قلب مجروح ... وصلت المكان وعرفته من ظهره ... عرفت اسر اصلا اعرفه وانا مغمضة ... اعرفه من نفسه ... من حركته ... من ريحه البرفم بتاعته ... كل دول احتفظت بيهم في قلبي لحد مرجع تاني ... بس اتغير ... أيوة ... فقد حاجة مهمة زي اللي انا فقدتها زمان ... فقد روحه ... يمكن اللي مخلياه باقي بحد دلوقتي روحي اللي فرقتني وعاشت معاه ... بكيت لما شوفت حالته دي ... انا اصلا هربت علشان مش اشوفه حزين ارجع الاقيه مكسور ... ياريت انا انكسر الف مرة وانت لا يا اسر ... قربت عليه وانا بقول مقطع من قصيدة اميرة البيلي ... المقطع دا عالق في قلبي "
= كان فـ الكافية وحده وسجايره كاتـ صاحب
وفـ ودنه هاند فري بتغني فيها الست :-
" يا نسيني وانت علي بالي وخيالك ما يفارق عيني " سرحان وشايل حمل مش قده .. والاشتياق هده الكل قاله يا سيدنا مش راجعة ، وهو مستني .
_ أمنية ...
= تؤتؤ بحب حورية اكتر
_ عيونك فيها دموع ... ايه صعبت عليكي ...
= ايه لسه بتعرفتي
_ انا اللي ربيتك ... رجعتي ليه
= حد نداني بقلبه وقلبي لبى الندا
_ عرفتي منين أنه انا
= اعرفك ولو غبت بدل السنة مية يا اسر ... انت ناسي اني دايما بلاقي في صوتك الامان ... لما كنت بخاف كنت بكتفي اني اسمع اسمي منك علشان ابطل خوف ... بس الريكورد اللى وصلني صوتك فيه ضعيف وانا اتعودت انك تكون قوي ... لابس اسود مش من أناقته لا انت بتدراي بيه وجع ظاهر في عيونك
_ دينا قالت انك مستحيل تتغيري ولو بعد مية سنة ...
= وانت شايف ايه اتغيرت
_ لا شايف حوريتي في عيونك ... بس أمنية اللي عاملة نفسها كبيرة وفليسوفة دي جديدة عليا ...
= فرق توقيت بين هنا ولندن
_ ههههههههه
= ضحكتك كانت اصدق من كدا زمان
_ سابتني
= هى اللي خسرانة
_ للاسف الخسران الوحيد هو انا ... اتفضلي
= ايه دي
_ دعوة خطوبتها ...
= علشان كدا بعتلي
_ محتاجك ... بابا اسر مكسور
= لا عاش ولا كان اللي يكسر بابايا
_ ريم كسرته ... وجع الحبيب مؤذي
= ليه اثر الماية المغلية على القلوب
_ تحسي أن روحك بتتسحب منك
= ويارتها بتطلع لخلقها دي بتروح للى جرح قلبنا وتسكن معاه
_ وفي الاخر بنموت
= تحت مسمى عايش وكل يوم زي اللي قبله
_ يارتني محبيت ....
= ياريته حبني ...
_ ايه !!
= لا لا ... المفروض تقول يارتها حبتني مش يارتني محبيت ...
_ خليكي معايا ...
= انا معاك دايما يا اسر ... رجعلي انت بابا
_ مات
= بدموع ... اياك تقول كدا تاني والله العظيم هرجع لندن ومستحيل انزل مصر تاني ولا هتشوف وشي ابدا ... انت مش ضعيف ... والدليل الاكبر انك سبتني اسافر من غير متفكر توقفني ... اتخليت عني ... ومش سألت انا فين ولا حالي ايه ... هونت عليك ... هان عليك غيابي ... ريم مكانتها عندك اكبر ...
_ كنت بعرف اخبارك دايما من دينا .. كنت زعلان منك علشان لأول مرة تخدي قرار من دماغك ... كنت كل يوم اطلع على السطح استناكي تيجي تقوليلي انا اسفة يا بابا اسر بس انت مكنتيش بتيجي ... كنت برجع من الشركة والكل نايم اقعد شوية قدام زهرة التوليب بتاعتك وافتكر قد ايه كنت بتخافي عليها ... وأشوف طيفك في كل مكان ... كنت حاسس أن روحك معايا
= هى كانت فعلا معاك يا اسر ... لسه بتحبها
_ .........
= ايه ... اللي بيحب بجد مستحيل ياخد وقت في التفكير ...
_ هى خلاص شافت مستقبلها ... حبت غيري
= هى خطوبتها امتى
_ بكرة
= ايه دا يا دوب
_ يادوب ايه يا امنية ...
= يادوب الحق انام علشان اجهز لبكرة ... يلا يا عم هتاخرني ... وانا جاية من السفر هلكانه
_ انا مش هروح
= تؤتؤ هنروح يا بابتي ... هى عزمتك علشان تشوف اسر الحزين الندمان على فراقها بس يا حرام هتشوف اسر اللى قال ...
"مع السلامه للي عايز يمشي
والمركب اللي تودي مترجعشي
مدام جدعنتي معاكوا مبتنفعشي
في داهيه اي حد ميقدرشي
وعادي وعادي وعادي "
" وقف مصدوم لحظة كدا وبعدين قال "
_ لا شكليلي احسن يا أمنية ... انت كنت في لندن بجد
= هههههههه ... أيوة يا عم كنت في لندن بس دي ثقافة البلد لازم اتابعها
_ دا اسفاف مش ثقافة
= ثقافة حمادة من تحت بير السلم هؤهؤهؤهؤ
_ قدامي يا أمنية ... قدامي
" انا مش ناسية جرح قلبي من حبه ... بس هو ادي واجبه اتجاهي وكان اب وام وصديق ... لازم انا أقف جنبه علشان يرجع اسر ... انا عندي استعداد اكلم ريم واقنعها انها ترجع لأسر علشان بس اشوف ضحكته تاني بس لو اسر عرف هيحس انه خسر كرامته ... انا هساعدك يا اسر ... هكون جنبك ... علشان انا بنتك مش أمنية اللي حباتك ...أمنية اللي بتحبك هاين عليها تملى الدنيا فرح علشان فاكرة أن قلبك خلي ... بس أمنية بنتك حوريتك تملى الدنيا حزن وتعاسه علشان جرح قلبك ... واللي هتقف جنبك بنتك مش حد تاني ... "
___________________
تاني يوم ........
" حسيت بالدفا اللي فقدته من زمان ... حبيت اني ابقى هنا ... بس لا يا أمنية .. احنا جاين نساعد اسر بعدين نرجع لندن ... مش تتعودي تاني ... جاين نرجع لأسر حياته وروحه ... وجه الليل وانا وقفت قدام المراية اظبط الحجاب على كنت لابسه درس اسود وحجاب نبيتي ... عرفت أن ريم عمله حفلة الخطوبة نفس المكان اللي كانت خطوبتها هى وأسر ... على البحر ... حاسة أنها بتعمل كدا قصدا ... ريم مش من المغرمين بالبحر ... بتشوفه عادي ... مش زي نظرتي انا وأسر ليه ... انا وأسر بنشوف البحر صديق بنهرب من العالم ليه ... كان اسر في الجنينة ولما نزلت لقيته لابس هاي كول اسود وبنطلون اسود ..."
= يا عيني يا عيني ...
_ لسه بتحبي الاسود
= اللي يحب ويتعلق مستحيل ينسى ولو قدامه الوان الطيف كلها ... انت بقى لابسه ليه
_ اخر فترة برتاح فيه
= هههههههه تقصد بتدارى فيه ...
_ بس الاسود يليق بك
= وانت كمان يليق بك أناقته ... يلا
_ متأكدة انك عايزة تروحي
= متأكدة ....
" وصلنا مكان الحفلة وأسر شاف ريم مع احمد خطيبها ... عرفت من الدعوة أن اسمه احمد ... اسر مسك ايدي جامد ... لأول مرة يمسك ايدي حاولت أشدها منه لاني مش بحب حد يلمس ايدي خصوصا لو راجل اي راجل لان دا حرام بس هو كان ماسك ايدي جامد لدرجة أنها وجعتني .... افتكرت لما مسكت ايد دينا في نفس الموقف دا من ثلاث سنين ... غصب عني الألم طلع بصوت ... مش عارفة إذا كان الالم دا من قلبي ولا من مسكته ليا "
= ااااااه
" ساب ايدي بسرعة وبصلي بقلق "
_ ا... أمنية انا اسف والله مش قصدي
= ولا يهمك يا اسر
_ حقيقي اسف
= يلا نبارك
_ يلا ...
= الف مبروك يا ريم ... مبروك يا استاذ احمد
& الله يبارك فيكي يا أمنية ... ازيك يا اسر
_ ازيك يا ريم مبروك
& مش تقول إن أمنية رجعت ... الحمد لله على سلامتك يا حبيبتي ... طبعا عارفين احمد خطيبي ... عقبالك يا أمنية عقبالك يا اسر هو اي نعم انك تلاقي واحدة تستحملك يا اسر دي معجزة بس عقبالك باذن الله تلاقيها
_ انا لقيتها خلاص يا ريم
= هااااا ... ( بهمس ) امتى دا يا اسر دا انا جاية معاك من البيت .... دا انت كنت هتقكع شرايينك من شوية ايه حصل
& ومين دي بقى
_ احب اعرفك يا ريم ... أمنية ... بنتي وحوريتي و بنت عمي و..........خطيبتي
